Icyo wakora kugira ngo kwiga Bibiliya birusheho kukugirira akamaro kandi bigushimishe

FUNGURA

YOSUWA yari ahanganye n’ikibazo gikomeye cyane. Yagombaga kujyana Abisirayeli mu Gihugu k’Isezerano kandi ahanganye n’ingorane nyinshi. Icyakora, Yehova yamwijeje ko azabishobora, amutera inkunga ati: ‘Gira ubutwari kandi ukomere. Ukore ibihuje n’amategeko yanjye. Ujye uyasoma ku manywa na nijoro, kugira ngo witwararike ukore ibyanditswemo byose. Ni bwo uzatunganirwa, ukagaragaza ubwenge mu byo ukora.’ —Yos 1:7, 8.

Muri ibi ‘bihe biruhije, bigoye kwihanganira,’ natwe duhura n’ibibazo bikomeye (2 Tim 3:1). Kugira ngo tugire icyo tugeraho, tugomba gukurikiza iyo nama Yehova yahaye Yosuwa. Tugomba gusoma Bibiliya buri gihe, kandi twahura n’ibigeragezo tugakurikiza amahame yayo.

Icyakora, abenshi muri twe ntituzi kwiyigisha neza kandi n’iyo tubigerageje, biratugora. Ariko kwiga Bibiliya ni iby’ingenzi cyane. Kugira ngo birusheho kukugirira akamaro kandi bigushimishe, byaba byiza urebye inama zivugwa mu gasanduku gafite umutwe uvuga ngo: “ Gerageza gukora ibi bikurikira.”

Umwanditsi wa zaburi yaravuze ati: “Umpe kugendera mu nzira y’amategeko yawe, kuko nyishimira” (Zab 119:35). Kwiga Ijambo ry’Imana bishobora kugushimisha cyane. Nurisuzuma witonze, uzamenya ibintu byinshi by’agaciro.

Nubwo udafite inshingano yo kuyobora ishyanga nka Yosuwa, nawe ufite ibibazo bitoroshye uhanganye na byo. Bityo rero, kimwe na Yosuwa jya wiga Ibyanditswe kandi ubikurikize kugira ngo bikugirire akamaro. Nubikora, uzatunganirwa kandi ugaragaze ubwenge mu byo ukora.

GERAGEZA GUKORA IBI BIKURIKIRA

Jya usenga mbere yo kwiyigisha. Muri Bibiliya harimo ibitekerezo by’Imana ishoborabyose, byandikiwe kugufasha. Ubwo rero, mu gihe uyisoma, jya usaba Imana igufashe kuyisobanukirwa, kuzirikana ibyo wize no kubishyira mu bikorwa.—Ezira 7:10.
Jya wibaza ibibazo. Mu gihe usoma Bibiliya cyangwa imfashanyigisho zayo, ushobora kwibaza uti: “Ibi nsomye binyigishije iki kuri Yehova? Ni irihe sano bifitanye n’ibindi bivugwa mu Ijambo rye? Ibi nsomye nabikoresha nte mfasha abandi?”
Jya utekereza ku byo wize. Jya ufata akanya utekereze ku byo usomye. Jya wibaza uti: “Ibi nsomye bitumye niyumva nte? Kuki bitumye niyumva ntya? Bihuriye he n’ibyambayeho kera, ibyo mpanganye na byo, cyangwa ibyo nshobora kuzahura na byo? Nakurikiza nte aya mahame ya Bibiliya cyangwa izi nama nize” (Yobu 23:5; Zab 49:3)? Jya ugerageza gusuzuma icyatumye Yehova abuza abagize ubwoko bwe gukora ibintu ibi n’ibi, cyangwa urebe ingaruka zagera ku muntu aramutse akoze ibinyuranye n’ibyo Yehova atubuza.—Guteg 32:28, 29.
Jya usa n’ureba ibivugwa mu nkuru zo muri Bibiliya. Ese ushobora gusa n’ureba uko byari bimeze, igihe abavandimwe ba Yozefu bamugurishaga Abishimayeli (Intang 37:18-28)? Urahabona iki? Urumva iki? Ni iyihe mpumuro ihari? Sa n’uwishyira mu mwanya w’abari aho. Barimo baratekereza iki? Barumva bameze bate? Gusa n’ureba ibyo usoma, bizatuma urushaho kubyumva kandi birusheho kukugirira akamaro.
Jya ukoresha ibikoresho twahawe bidufasha gukora ubushakashatsi. Jya witoza gukoresha ibiboneka mu rurimi rwawe, byaba ibyo kuri interineti cyangwa ibicapye. Ntugatinye gusaba abandi kukwigisha uko wabikoresha neza. Urugero, Igitabo gifasha Abahamya ba Yehova gukora ubushakashatsi, kigufasha kumenya icyo ibitabo byacu bivuga ku ngingo zitandukanye no kumenya uko imirongo myinshi yo muri Bibiliya yasobanuwe. Jya ukoresha agatabo Imfashanyigisho y’Ijambo ry’Imana kugira ngo umenye aho uturere runaka duherereye, uko ibintu byagiye bikurikirana, ibipimo, ingero n’ibindi.
Zirikana ibintu by’ingenzi wize kugira ngo uzabyibuke. Ikiza kurushaho ni uko wabiganiraho n’abandi. Ese hari ikintu wamenye wakoresha mu murimo wo kubwiriza? Nubigenza utyo, bizaguma mu bwenge bwawe kandi bigirire abandi akamaro.

UMUNARA W’UMURINZI WO KWIGWA