YOSHUA o vha a tshi fanela u ranga phanḓa lushaka lwa Isiraele uri lu swike Shangoni ḽo Fulufhedziswaho. Zwenezwo zwo vha zwi songo leluwa na luthihi. Yehova o mu khwaṱhisedza na u mu ṱuṱuwedza. O ri: ‘Ita nga maanḓa wo ḓifunga. Tevhedza Mulayo wanga. U u elekanye masiari na vhusiku; uri U tevhedze U ite zwoṱhe zwe zwa ṅwaliwa khawo; ngauri ndi hone dzinḓila dzau dzi tshi ḓo vulea; ndi hone U tshi ḓo ita zwi ḓivhaleaho.’ —Yosh. 1:7, 8.

Na riṋe ro fara ludongo nga hu fhisaho nga nṱhani ha uri ri khou tshila “[zwifhingani] zwi lemelaho zwi konḓaho u sedzana nazwo.” (2 Tim. 3:1) Arali ri tshi ṱoḓa u bvelela u fana na Yoshua, ri fanela u tevhedza nyeletshedzo ye Yehova a mu ṋea yone. Ri fanela u vhala Bivhili ḓuvha ḽiṅwe na ḽiṅwe na u shumisa zwine ra zwi guda u itela u dzhia phetho dzavhuḓi.

Fhedzi vhaṅwe vhashu ri nga vha ri sa ḓivhi nḓila ine ra nga guda ngayo kana zwi tshi ri konḓela u guda. Samusi u guda Bivhili zwi zwa ndeme vhukuma, vusulusani bogisi ḽi re na tshiṱoho tshine tsha ri, “ Lingedzani Hezwi Zwithu” u itela u wana dziṅwe nyeletshedzo dzine dza nga ni thusa uri ni kone u ita uri u guda haṋu zwi ni takadze na u ni vhuyedza nga ho engedzeaho.

Mupsalme o imba a ri: “Ntshimbidze kha gondo ḽa ndaelo dzau, ngauri ndi takalela ḽone.” (Ps. 119:35) Na inwi ni nga ḓiphina vhukuma nga u guda Ipfi ḽa Mudzimu. Musi ni tshi khou ḓi bvela phanḓa ni tshi guda Bivhili, ni ḓo guda zwithu zwinzhi zwavhuḓi zwe na vha ni sa zwi ḓivhi.A ni khou ranga phanḓa lushaka u fana na zwe zwa itwa nga Yoshua, fhedzi na inwi ni ḓi vha na vhuṅwe vhuleme vhune na sedzana naho. Nga zwenezwo, u fana na Yoshua, gudani Bivhili nahone ni shumise zwine na zwi guda. Arali na ita nga u ralo, ni ḓo dzhia phetho dza vhuṱali nahone ni ḓo bvelela.