1. Paano mahihiling sa mga linalang ni Jehova an saiyang pagigin matinao?

DAWA ngani solo sana si Jehova bago niya punan an paglalang, bako sanang sadiri niya an pig-iisip niya. Sa kabaliktaran, itinao niya sa intelihenteng mga linalang—mga espiritu asin mga tawo—an regalong buhay. Gustong-gusto “kan maugmang Diyos,” si Jehova, na magtao nin marahay na mga bagay. (1 Tim. 1:11; Sant. 1:17) Asin huling gusto niya na magin maugma man kita, tinutukduan niya kita na magin matinao.—Roma 1:20.

2,  3. (a) Taano ta nakakapaugma sa sato an pagigin matinao? (b) Ano an pag-uulayan niyato?

² Linalang nin Diyos an tawo uyon sa saiyang ladawan. (Gen. 1:27) An buot sabihon, linalang kita tanganing ipahiling an saiyang mga kuwalidad. Kun siring, tanganing magin maugma asin kontento, kaipuhan niyatong arugon an halimbawa ni Jehova paagi sa pagpahiling nin interes sa iba asin pagigin matinao. (Fil. 2:3, 4; Sant. 1:5) Taano? Simple sana, huling iyan an mamumuton na pagkadisenyo ni Jehova sa mga tawo. Dawa bako kitang perpekto, kaya niyatong arugon an pagigin matinao ni Jehova.

³ Sinasabi sa sato kan Bibliya kun paano kita magigin matinao. Pag-ulayan niyato an pirang leksiyon na itinutukdo kan Kasuratan dapit digdi. Hihilingon ta kun paano an pagigin matinao nakakatabang  na makamtan ta an pag-uyon nin Diyos asin kun paano an pagpauswag sa kuwalidad na ini nakakatabang sa sato na mautob an asignasyon na itinao sa sato nin Diyos. Aaramon ta man kun paano konektado sa satong kaugmahan an pagigin matinao asin kun taano ta kaipuhan tang padagos na pauswagon an kuwalidad na ini.

4, 5. Anong mga halimbawa dapit sa pagigin matinao an itinao sa sato ni Jehova asin ni Jesus?

⁴ Gusto ni Jehova na arugon siya kan saiyang linalang na mga tawo, kaya nauugma siya pag matinao kita. (Efe. 5:1) Kun hihilingon an pagkalalang sa sato saka an kagayunan kan daga asin an manlain-lain na linalang diyan, malinawon na gusto nin Diyos na magin maugma an mga tawo. (Sal. 104:24; 139:13-16) Kaya, tinatawan ta nin onra si Jehova pag hinihinguwa niyatong paugmahon an iba.

⁵ Inaarog kan tunay na mga Kristiyano si Cristo na nagtao sa sato kan perpektong halimbawa bilang tawong matinao. Si Jesus mismo nagsabi: “An Aki nin tawo nag-abot, bako tanganing paglingkudan, kundi tanganing maglingkod asin itao an saiyang buhay bilang pantubos na karibay nin dakul.” (Mat. 20:28) Kaya, dinagka ni apostol Pablo an mga Kristiyano: “Papagdanayon nindo an arog kaining kaisipan na yaon man ki Cristo Jesus . . . Isinuko niya an gabos na yaon sa saiya saka nagpakang-uripon siya.” (Fil. 2:5, 7) An kada saro sa sato marahay na haputon an sadiri, ‘Puwede ko daw na mas maarog pa an halimbawa ni Jesus kisa sa dati ko nang ginigibo?’—Basahon an 1 Pedro 2:21.

6. Ano an itinukdo sa sato ni Jesus sa parabula dapit sa madinamay na Samaritano? (Hilingon an ritrato sa kapinunan kan artikulo.)

⁶ Makakamtan niyato an pag-uyon ni Jehova paagi sa pag-arog sa perpektong halimbawa niya asin ni Cristo, pagpahiling nin interes sa kapakanan nin iba, asin paghanap nin mga paagi kun paano sinda tatabangan. Iyo, sa saiyang parabula dapit sa madinamay na Samaritano malinaw na inaasahan ni Jesus na gigibuhon kan saiyang mga parasunod an pinakamakakaya ninda tanganing tabangan an iba, maski siisay man ini. (Basahon an Lucas 10:29-37.) Nagigirumduman mo daw su hapot na nagpahiro ki Jesus na iistorya an parabula dapit sa madinamay na Samaritano? Hinapot siya nin sarong Judio: “Siisay man nanggad an sakuyang kapwa?” Ipinapahiling kan simbag ni Jesus na arog kan Samaritano, dapat kitang magin matinao tanganing makamtan niyato an pag-uyon nin Diyos.

7. Taano ta konektado sa unibersal na isyu an satong pagigin makasadiri o pagigin bakong makasadiri?

⁷ Igwang dakul na marahay na dahilan an mga Kristiyano para magin matinao. Halimbawa, konektado an kuwalidad na ini sa isyung pinalataw ni Satanas sa hardin nin Eden. Taano man? Sinabi ni Satanas na mas mapaparahay si Adan asin Eva—asin an bilog na katawuhan—kun sadiri sana an iisipon ninda asin kun iinuton ninda an sadiri nindang kapakanan kisa sa pagsunod sa Diyos. Nagpadara si Eva sa saiyang makasadiring pagmawot na magin arog nin Diyos. Ipinahiling man ni Adan na makasadiri siya sa pagmawot niyang paugmahon si Eva imbes na an Diyos. (Gen. 3:4-6) Malinaw tang nahihiling an resulta kan desisyon nindang iyan. An pagkamakasadiri dai nagtatao nin kaugmahan; kabaliktaran ngani. Kun kita matinao, ipinapahiling niyatong kumbinsido kita na an mga paagi nin Diyos an pinakamarahay.

8. Taano ta dapat kutanang nagin matinao an inot na tawong mag-agom?

⁸ Dawa si Adan asin Eva pa sana kaidto an tawo sa hardin nin Eden, tinawan sinda nin Diyos nin mga instruksiyon na dapat kutanang nagpahiro sa sainda na isipon an kapakanan kan iba.  Binendisyunan ni Jehova si Adan asin Eva saka sinabihan na magpakadakul, panuon an daga, asin pamahalaan iyan. (Gen. 1:28) Kun paanong interesadong marhay an Kaglalang sa kapakanan kan saiyang mga linalang, dapat kutanang interesado man an inot na tawong mga magurang sa kaugmahan kan saindang magigin mga aki. An Paraiso papahiwason sagkod na makalakop sa bilog na daga para sa kapakinabangan kan magigin mga gikan ni Adan. Tanganing magibo an dakulaon na proyektong iyan, kaipuhan na magtinarabangan an saiyang nagdadakulang pamilya.

9. Taano ta magigin nakakaugma kutana an pagpahiwas kan Paraiso?

⁹ Para sa perpektong mga lalaki asin babayi, an pagpahiwas kan Paraiso mangangahulugan kutana na lubos sindang makikipagtabangan ki Jehova tanganing mautob an saiyang mga katuyuhan, dangan makakalaog na sinda sa saiyang kapahingaluan. (Heb. 4:11) Isipa kun gurano kanakakakontento asin kanakakaugma kan proyektong iyan! An pagsasakripisyo para sa kapakanan kan iba nagtao kutana sa sainda nin dakul na bendisyon asin dakulang kaugmahan.

10, 11. Paano ta mauutob an sugo na maghulit asin gumibo nin mga disipulo?

¹⁰ Ngunyan, itinao ni Jehova sa saiyang mga lingkod an gibuhon na paghuhulit asin paggibo nin mga disipulo. Tanganing maisagibo an sugong iyan, kaipuhan tang magkaigwa nin sinserong interes sa kapakanan kan iba. Makakapagpadagos sana kita sa gibuhon na ini kun tama an satong motibo—pagkamuot sa Diyos asin pagkamuot sa satong kapwa.

¹¹ Kan inot na siglo C.E., inapod ni Pablo an saiyang sadiri asin an pira niyang dayupot na kairiba na “mga kapwa trabahador nin Diyos” huli sa asignasyon nindang itanom asin baribian an banhi kan katotoohan dapit sa Kahadian. (1 Cor. 3:6, 9) Puwede man kita ngunyan na magin “mga kapwa trabahador nin Diyos” paagi sa paggamit kan satong panahon, pagsadiri, asin kusog para maisagibo an sugo sa sato nin Diyos na maghulit. Dakulaon na pribilehiyo nanggad ini!

12, 13. Para sa saimo, ano an mga bendisyon kan paggibo nin mga disipulo?

¹² An pagigin matinao ta kan satong panahon asin kusog sa paghuhulit asin paggibo nin mga disipulo nagtatao nin dakulang kaugmahan. An dakul sa mga nagkapribilehiyo na magkondukta nin progresibong mga pag-adal sa Bibliya makakapagsabi na saro iyan sa pinakanakakaugmang gibuhon. Nakakaugmang marhay na mahiling kun gurano kaugma kan mga tinutukduan pag nasasabutan na ninda an espirituwal na mga katotoohan, nagkukusog an pagtubod, nagbabagong-buhay, asin pinupunan nang ihiras sa iba an katotoohan. Nakamati man si Jesus nin dakulang kaugmahan kan an 70 parahulit na isinugo niya sa langtad “nagbalik na may kagaya-gayahan” huli sa positibong mga resulta na naeksperyensiyahan ninda.—Luc. 10:17-21.

¹³ An mga parahayag sa bilog na kinaban naggagaya-gaya na mahiling an marahay na epekto kan mensahe kan maugmang bareta sa buhay kan  mga tawo. Pag-isipan an eksperyensiya ni Anna, sarong hoben na daragang sister, na pinahiwas an saiyang ministeryo paagi sa pagbalyo sa sarong lugar sa Eastern Europe na nangangaipo nin dakul na parahayag. * Nagsurat siya: “Gustuhon ko digdi ta kadakul nin gustong magpa-Bible study. Nagtatao sa sako nin dakulang kaugmahan an paglilingkod ko. Pagpuli ko sa harong, mayo na akong panahon na pagparaisipon an sadiri ko. An iniisip ko iyo an mga tinutukduan ko—an saindang mga problema asin ikinakahadit. Nag-iisip ako nin praktikal na mga paagi na mapakusog asin matabangan sinda. Asin napatunayan ko na ‘igwang urog na kaugmahan sa pagtao kisa sa pag-ako.’”—Gibo 20:35.

14. Dawa kun dikit sana an nag-aako kan maugmang bareta, paano ka magigin maugma sa saimong ministeryo?

¹⁴ Dawa kun dai magdangog an mga tawo, puwede kitang magin maugma huling tinawan ta sinda nin oportunidad na madangog an mensahe kan maugmang bareta. Tutal, an sugo sa sato ngunyan kaagid kan ki propeta Ezequiel na sa saiya sinabi ni Jehova: ‘[Kaipuhan] mong itaram sa sainda an buot kong isabi mo sainda, magdangog man sinda o dai.’ (Ezeq. 2:7, BPV *; Isa. 43:10) Dawa dai pinapahalagahan kan iba an ihinuhulit niyatong mensahe, pinapahalagahan ni Jehova an satong mga paghihinguwa. (Basahon an Hebreo 6:10.) Mapadapit digdi, sarong parahayag an nagpahayag nin marahayon na sabuot. May koneksiyon sa saiyang ministeryo, isinurat niya, “Nagtatanom kita, nagbabaribi, asin namimibi na lugod patalubuon ni Jehova an interes kan mga tawo.”—1 Cor. 3:6.

15. Ano an reaksiyon kan dakul pag pinapahilingan ta sinda nin pagigin matinao, asin mapaapektar daw kita kun iba sa inaasahan ta an reaksiyon ninda?

¹⁵ Gusto ni Jesus na magin maugma kita paagi sa pagigin matinao. Dakul an nauugma pag pinapahilingan sinda nin pagigin matinao. “Ugalion an pagtao, asin an mga tawo matao sa saindo,” an sabi niya. “Iuula ninda sa saindong mga bulsa an abundang takad, dinusok, yinugyog, asin nagsusupay. Huli ta an pantakad na ipinantatakad nindo iyo an ipantatakad ninda sa saindo.” (Luc. 6:38) Siyempre, dai man gabos mabalos sa pagigin matinao ta, pero kun iyo, puwede iyan magin dahilan na magin matinao man sinda. Kaya  ugalion an pagtao, apresyaron man iyan o dai kan mga tawo. Dai mo aram kun gurano karahay kan puwedeng magin epekto kan dawa sarong akto nin pagigin matinao.

16. Ano an dapat na magpahiro sa sato na magin matinao?

¹⁶ An mga tawong tunay na matinao dai naglalaom nin balos pag nagtatao sinda. Nasa isip iyan ni Jesus kan itukdo niya: “Pag naghahanda ka nin bangkete, imbitaran mo an mga pobre, an mga kimay, an mga pilay, an mga buta; asin magigin maugma ka, huli ta dai sinda nin ano man na ikakabalos sa saimo.” (Luc. 14:13, 14) ‘[An matinao] bebendisyunan,’ an sabi kan pinasabngan na kagsurat. An saro pa nagsabi: “Maugma an siisay man na nagpapahiling nin konsiderasyon sa sarong hamak.” (Tal. 22:9, BPV; Sal. 41:1, NW) Iyo, dapat kitang magin matinao huling magigi kitang maugma sa pagtabang sa iba.

17. Ano an mga bagay na puwede mong itao na makakapaugma sa saimo?

¹⁷ Kan kotaron ni Pablo an sinabi ni Jesus na “igwang urog na kaugmahan sa pagtao kisa sa pag-ako,” an nasa isip ni Pablo bako sana an pagtao nin materyal na mga bagay kundi pati man an pagtao nin pampakusog nin buot, paggiya, asin tabang sa mga nangangaipo kaiyan. (Gibo 20:31-35) Paagi sa saiyang tataramon asin halimbawa, itinukdo sa sato kan apostol na magin matinao kita kan satong panahon, kusog, atensiyon, asin pagkamuot.

18. Ano an sinasabi nin dakul na parasiyasat kun dapit sa pagigin matinao?

¹⁸ Naobserbaran man kan mga parasiyasat sa social science na an pagtao nakakapaugma sa mga tawo. Sigun sa sarong artikulo, “sinabi kan mga tawo na nagin mas maugma sindang marhay pagkatapos nindang maggibo nin marahay na mga bagay para sa iba.” Sinasabi kan mga parasiyasat na an pagtabang sa iba mahalagang marhay tanganing “mas mamatian nin mga tawo na may katuyuhan asin kahulugan” an buhay ninda “huling napapaniguan kaiyan an panginot na pangangaipo nin tawo.” Kaya sa parati, irinerekomendar kan mga eksperto an pagboboluntaryo sa pampublikong paglilingkod tanganing magrahay an salud asin magin mas maugma. Dai na digdi nagngangalas an mga indibidwal na minimidbid an Bibliya bilang an Tataramon kan mamumuton na Kagdisenyo kan mga tawo, si Jehova.—2 Tim. 3:16, 17.

19, 20. Taano ta gusto mong magin bukas-palad?

¹⁹ Puwedeng magin dipisil sa sato na magdanay na matinao pag an mga tawong kaiba-iba ta iniinot an sadiri nindang kapakanan kisa kan sa iba. Pero, sinabi ni Jesus na an duwang panginot sa gabos na tugon iyo na kamutan si Jehova sa bilog tang puso, kalag, isip, pati kusog asin na kamutan an satong kapwa nin siring sa satong sadiri. (Mar. 12:28-31) Arog kan napag-ulayan ta sa artikulong ini, an mga namumuot ki Jehova inaarog siya. Si Jehova matinao, iyo man si Jesus. Asin dinadagka ninda kita na iyo man an gibuhon, huling sa paggibo kaiyan magigi kitang tunay na maugma. Kun hihinguwahon niyatong magin matinao sa Diyos asin sa satong kapwa, matatawan niyato nin onra si Jehova saka makikinabang kita pati man an iba.

²⁰ Siguradong hinihinguwa mo nang magin matinao asin matinabang sa iba, lalo na sa mga kapagtubod. (Gal. 6:10) Kun ipagpapadagos mo iyan, siyertong mamumutan asin papasalamatan ka ninda, asin bilang resulta magigin maugma ka. Sinasabi sa Talinhaga 11:25: “An tawong bukas-palad mag-uuswag, asin an siisay man na nagpapaginhawa sa iba papaginhawahon man.” (NW) Siyempre, an daing kaimutan na pagtao, kabuutan, asin pagigin bukas-palad puwedeng ipahiling sa dakul na paagi asin sa dakul na aspekto kan saimong Kristiyanong pamumuhay asin ministeryo, saka nagbubunga iyan nin nakakaugmang mga resulta. Sa masunod na artikulo, pag-uulayan niyato an pira sa mga paagi asin mga aspektong iyan.