1. Sa unsang paagi ang kalalangan nagpamatuod sa pagkamahinatagon ni Jehova?

BISAG dihay panahon nga nag-inusara si Jehova sa wala pa siya magsugod pagpanglalang, wala siya maghunahuna sa kaugalingon lang. Gani, giregalohan niyag kinabuhi ang intelihenteng mga linalang, espirituhanon ug tawhanon. Ang “malipayong Diyos,” si Jehova, ganahang mohatag ug maayong mga butang. (1 Tim. 1:11; Sant. 1:17) Ug kay gusto niyang magmalipayon ta, gitudloan ta niya nga magmahinatagon.​—Roma 1:20.

2, 3. (a) Nganong makapalipay nato ang pagkamahinatagon? (b) Unsay atong hisgotan?

² Ang Diyos naghimo sa tawo sumala sa iyang larawan. (Gen. 1:27) Nagpasabot ni nga gilalang ta aron sundogon ang iyang mga hiyas. Busa, aron magmalipayon ug mapanalanginan ta, kinahanglang sundogon nato si Jehova pinaagi sa pagpakitag interes sa uban ug sa pagkahimong mahinatagon. (Filip. 2:3, 4; Sant. 1:5) Ngano? Tungod kay si Jehova mahigugmaong nagdisenyo nato nga ingon niana. Bisag dili ta hingpit, masundog nato ang pagkamahinatagon ni Jehova.

 ³ Ang Bibliya nagtudlo nato kon sa unsang paagi mahimong mahinatagon. Hisgotan nato ang pipila ka leksiyon nga gitudlo sa Kasulatan bahin ana. Atong susihon kon nganong malipay ang Diyos dihang mahinatagon ta. Mahibaloan sab nato kon sa unsang paagi ang pag-ugmad niini makatabang nato sa pagtuman sa iyang gipabuhat. Ug atong hisgotan kon nganong magmalipayon ta dihang magmahinatagon ug kon nganong kinahanglan nga padayon nato ning ugmaron.

4, 5. Unsang ehemplo sa pagkamahinatagon ang gihatag ni Jehova ug Jesus?

⁴ Gusto ni Jehova nga sundogon nato siya, busa malipay siya kon magmahinatagon ta. (Efe. 5:1) Klaro kaayo diha sa iyang pagkalalang nato ug sa kanindot ug kaabunda sa atong palibot nga gusto sa Diyos nga magmalipayon ang tawo. (Sal. 104:24; 139:13-16) Busa, gipasidunggan nato siya kon maningkamot ta nga magmalipayon ang uban.

⁵ Ang matuod nga mga Kristohanon nagsundog sa Kristo, kinsa naghatag ug hingpit nga ehemplo kon sa unsang paagi magmahinatagon ang tawo. Siya miingon: “Ang Anak sa tawo mianhi, dili aron pagaalagaran, kondili aron sa pag-alagad ug sa paghatag sa iyang kalag nga usa ka lukat baylo sa daghan.” (Mat. 20:28) Busa, giawhag ni apostol Pablo ang mga Kristohanon: “Hupti kini nga tinamdan sa pangisip diha kaninyo nga diha usab kang Kristo Jesus . . . Iyang gihaw-asan ang iyang kaugalingon ug gihuptan ang dagway sa usa ka ulipon.” (Filip. 2:5, 7) Busa, maayong pangutan-on nato ang kaugalingon, ‘Mas masundog pa ba nako si Jesus?’​—Basaha ang 1 Pedro 2:21.

6. Unsay atong makat-onan sa ilustrasyon ni Jesus bahin sa buotang Samarianhon? (Tan-awa ang hulagway sa sinugdan sa artikulo.)

⁶ Maangkon nato ang pabor ni Jehova kon sundogon nato siya ug ang Kristo, kon magpakita tag interes sa uban, ug kon mangita tag mga paagi sa pag-atiman sa ilang panginahanglan. Gani, diha sa ilustrasyon bahin sa buotang Samarianhon, klarong gipakita ni Jesus nga gusto niyang ang iyang mga sumusunod motabang sa uban, bisan niadtong lahig kagikan. (Basaha ang Lucas 10:29-37.) Nahinumdom ka ba kon nganong giestorya ni Jesus ang maong ilustrasyon? Tungod kadto sa pangutana sa usa ka Hudiyo: “Kinsa ba gayod ang akong silingan?” Gipakita sa tubag ni Jesus nga sama sa Samarianhon kinahanglang andam tang magmahinatagon aron maangkon ang pabor sa Diyos.

7. Sa unsang paagi konektado sa isyung gipatungha ni Satanas ang kahakog o pagkadili-hakog?

⁷ Daghag maayong rason kon nganong angay tang magmahinatagon. Pananglitan, kining hiyasa konektado sa isyu nga gipatungha ni Satanas sa tanaman sa Eden. Sa unsang paagi? Nangangkon si Satanas nga si Adan ug Eva​—ug ang tanang tawo—​magmalipayon kon unahon nila ang kaugalingong kaayohan imbes magmasinugtanon sa Diyos. Si Eva nahimong hakog ug gusto niyang mahisama sa Diyos. Si Adan nahimo pong hakog ug gusto niyang malipay si Eva. (Gen. 3:4-6) Klaro kaayo ang resulta sa ilang desisyon. Ang kahakog dili moresultag kalipay; kagul-anan hinuon. Kon mahinatagon ta, gipakita natong kombinsido ta nga ang paagi sa Diyos sa pagbuhat sa mga butang mao ang kinamaayohan.

8. Nganong angay untang maghunahuna ang unang magtiayon sa kaayohan sa uban?

⁸ Ang Diyos naghatag sa unang magtiayon ug mga instruksiyon nga magpahunahuna unta nila sa kaayohan sa uban, bisan  pag sila rang duha sa tanaman sa Eden. Gipanalanginan ni Jehova si Adan ug Eva ug gisugo nga magdaghan, pun-on ang yuta, ug gamhan kini. (Gen. 1:28) Ang Maglalalang interesado kaayo sa iyang mga linalang, busa angay untang interesado pod ang unang ginikanan sa kalipay sa ilang umaabot nga mga anak. Himoong paraiso ang tibuok yuta alang sa kaayohan sa mga kaliwat ni Adan. Aron molampos kanang dakong proyekto, kinahanglang magtinabangay ang iyang magkadako nga pamilya.

9. Nganong moresultag kalipay ang paghimo sa yuta nga paraiso?

⁹ Ang hingpit nga mga tawo kinahanglang makigkooperar kang Jehova aron mahimong paraiso ang tibuok yuta ug matuman ang iyang kabubut-on. Niining paagiha, makasulod sila sa iyang kapahulayan. (Heb. 4:11) Hunahunaa kon unsa unta ka makapatagbaw ug makapalipay ang maong proyekto! Ang paghunahuna sa kaayohan sa uban makahatag unta nilag daghang panalangin ug dakong katagbawan.

10, 11. Unsaon nato pagtuman ang sugo nga magsangyaw ug maghimog mga tinun-an?

¹⁰ Karon, si Jehova naghatag sa iyang katawhan ug espesyal nga buluhaton​—ang pagsangyaw ug paghimog mga tinun-an. Aron matuman kana, kinahanglang interesado gyod ta sa kaayohan sa uban. Makalahutay lang ta nianang buluhatona kon husto ang atong motibo​—gugma sa Diyos ug sa atong isigkatawo.

¹¹ Sa unang siglo C.E., gitawag ni Pablo ang kaugalingon ug ang pipila niya ka kauban ingong “mga isigkamagbubuhat sa Diyos” kay sila nagtanom ug nagbisbis sa binhi sa kamatuoran sa Gingharian. (1 Cor. 3:6, 9) Karon, mahimo sab tang “mga isigkamagbubuhat sa Diyos” pinaagi sa kinasingkasing nga paggamit sa atong panahon, kuwarta, ug kusog diha sa buluhatong pagsangyaw nga gisugo sa Diyos. Dako kaayo nâ nga pribilehiyo!

12, 13. Para nimo, unsa ang mga panalangin sa paghimog mga tinun-an?

¹² Makapalipay gyod ang kinasingkasing nga paggamit sa atong panahon ug kusog diha sa pagsangyaw ug paghimog mga tinun-an. Mao nay giingon niadtong nakadumalag progresibong mga Bible study. Makapalipay kaayong makita dihang ang giestadihan makasabot sa kamatuoran, mas molig-on ang pagtuo, mohimog kausaban, ug mosugod pagsangyaw. Gibati sab nâ ni Jesus dihang ang 70 ka magsasangyaw nga iyang gipadala “namauli uban ang kalipay” tungod sa ilang maayong mga eksperyensiya.​—Luc. 10:17-21.

¹³ Ang mga magmamantala sa tibuok kalibotan nalipayng makita nga ang maayong balita nakabag-o sa kinabuhi sa mga tawo. Tagda ang eksperyensiya sa batan-ong sister nga si Anna, kinsa mibalhin sa usa ka dapit sa Eastern Europe diin gikinahanglan  ang dugang nga mga magsasangyaw. * Siya misulat: “Ganahan kaayo ko kay daghan ang gustong magpa-Bible study. Lipay kaayo ko sa akong pagsangyaw. Inig-uli nako, wala koy panahon sa paghunahuna sa kaugalingon. Akong gihunahuna ang akong giestadihan​—ang ilang mga problema ug kabalaka. Mangita kog paagi sa pagdasig nila ug paghatag ug praktikal nga tabang. Ug kombinsido ko nga ‘dunay labaw nga kalipay sa paghatag kay sa pagdawat.’”​—Buh. 20:35.

14. Bisag pipila lang ang modawat, nganong magmalipayon gihapon ka sa pagsangyaw?

¹⁴ Malipay ta sa paghatag sa mga tawo ug kahigayonan nga maminaw sa maayong balita bisan pag dili nila gustong maminaw. Kon buot hunahunaon, ang gisugo kanato sama nianang kang propetang Ezequiel, kinsa giingnan ni Jehova: “Isulti mo ang akong mga pulong kanila, walay sapayan kon sila mamati o modumili.” (Ezeq. 2:7; Isa. 43:10) Bisan pag ang pipila dili modawat sa atong mensahe, apresyahon ni Jehova ang atong paningkamot. (Basaha ang Hebreohanon 6:10.) Usa ka brader ang positibog panghunahuna bahin sa iyang ministeryo. Siya misulat: “Kami nagtanom, nagbisbis, ug nag-ampo nga unta patuboon ni Jehova ang interes.”​—1 Cor. 3:6.

15. Unsay sagad nga reaksiyon sa mga tawo sa pagkamahinatagon? Angay ba nang makaapektar sa atong pagkamahinatagon?

¹⁵ Gusto ni Jesus nga magmalipayon ta pinaagi sa pagkamahinatagon. Daghan ang makaapresyar niana. “Batasana ang paghatag, ug pagahatagan kamo sa mga tawo,” siya nag-awhag. “Ibubo nila sa inyong sabakan ang usa ka maayong takos, dinasok, tinantan ug nagaawas. Kay sa sukod nga inyong ginasukod, sila magasukod nganha kaninyo ingong balos.” (Luc. 6:38) Siyempre, dili tanan ang positibog reaksiyon sa atong pagkamahinatagon. Pero kon mapasalamaton sila, madasig sab sila nga magmahinatagon. Busa, batasana ang pagpanghatag​—apresyahon man ni o dili. Kinsay nasayod kon unsa ka dako ang epekto  bisan sa usa lang ka buhat sa pagkamahinatagon.

16. Unsay angay natong motibo sa pagpanghatag?

¹⁶ Ang tinuod nga mahinatagon dili magdahom nga balosan silag hatag. Kanay gihunahuna ni Jesus dihang siya miingon: “Dihang maghikay ka ug usa ka kombira, dapita ang mga tawong kabos, mga baldado, mga bakol, mga buta; ug magmalipayon ka, tungod kay wala silay ikabalos kanimo.” (Luc. 14:13, 14) “Siya nga maluloton sa mata [o, mahinatagon] panalanginan,” miingon ang usa ka magsusulat sa Bibliya. Ang lain miingon: “Malipayon siya nga nagabuhat uban ang pagkamahunahunaon sa timawa.” (Prov. 22:9; Sal. 41:1) Busa, kinahanglan tang mohatag kay magmalipayon ta kon motabang ta sa uban.

17. Unsang matanga sa pagpanghatag ang makapalipay?

¹⁷ Dihang gikutlo ni Pablo ang giingon ni Jesus nga “adunay labaw nga kalipay sa paghatag kay sa pagdawat,” wala lang magtumong si Pablo sa pagpanghatag ug materyal nga mga butang. Nag-apil sab nâ sa pagdasig, paggiya, ug pagtabang niadtong nanginahanglan niana. (Buh. 20:31-35) Pinaagi sa pulong ug buhat, gitudloan ta sa apostol nga magmahinatagon​—sa atong panahon, kusog, atensiyon, ug gugma.

18. Unsay giingon sa mga tig-research bahin sa pagkamahinatagon?

¹⁸ Ang mga tig-research bahin sa panggawi sa tawo nakaobserbar pod nga makapalipay ang pagpanghatag. Sumala sa usa ka artikulo, “ang mga tawo nag-ingon nga mas malipayon sila human makahimog maayo sa uban.” Matod pa sa mga tig-research, kon motabang ta sa uban, bation nato nga ang atong kinabuhi may direksiyon ug mapuslanon “kay natagan-an nato ang panginahanglan sa tawo.” Busa, nagsugyot ang mga eksperto nga mohimog serbisyo publiko ang mga tawo aron mahimong mas himsog ug malipayon. Dili ni ikatingala niadtong modawat sa Bibliya ingong Pulong sa mahigugmaong Maglalalang, si Jehova.​—2 Tim. 3:16, 17.

19, 20. Nganong angay kang magmahinatagon?

¹⁹ Lisod tingaling magpadayon sa pagpanghatag kon ang mga tawo sa atong palibot mahunahunaon lang sa kaugalingon. Pero, nag-ingon si Jesus nga ang duha ka kinadak-ang sugo mao ang paghigugma kang Jehova sa tibuok kasingkasing, kalag, hunahuna, ug kusog ug paghigugma sa atong isigkatawo sama sa kaugalingon. (Mar. 12:28-31) Sa atong nakat-onan niining artikuloha, kadtong nahigugma kang Jehova nagsundog niya. Si Jehova ug Jesus parehong mahinatagon. Ug gidasig ta nila nga sundogon nato sila, kay mao nay tinuod nga makapalipay nato. Kon maningkamot ta nga magmahinatagon diha sa atong ginabuhat para sa Diyos ug sa isigkatawo, atong gipasidunggan si Jehova ug makabenepisyo ta ug ang uban.

²⁰ Seguradong naningkamot ka na sa pagpanghatag ug pagtabang sa uban, ilabina sa mga igsoon. (Gal. 6:10) Kon padayon nâ nimong buhaton, seguradong mahalon ug apresyahon ka, ug magmalipayon ka. Ang Proverbio 11:25 nag-ingon: “Ang kalag nga mahinatagon motambok [o, mouswag], ug ang dagayang nagabisibis sa uban dagaya usab nga pagabisibisan.” Siyempre, ang pagkamahinatagon ug kaayo ikapakita sa daghang paagi ug sa lainlaing bahin sa imong Kristohanong kinabuhi ug ministeryo, nga may mga panalangin. Hisgotan ang pipila niana sa sunod nga artikulo.