1. Ano ang pamatuod nga maalwan si Jehova?

ANTES magpanuga si Jehova, nagaisahanon sia, pero wala niya ginhunahuna ang iya lang kaugalingon. Gintuga niya ang mga anghel kag mga tawo kag ginhatagan sila sing kabuhi. Si Jehova ang “malipayon nga Dios,” kag gusto niya maghatag sang maayo nga mga butang. (1 Tim. 1:11; Sant. 1:17) Gusto niya nga malipay man kita, gani ginatudluan niya kita nga mangin maalwan.—Roma 1:20.

2, 3. (a) Ngaa malipay kita kon maalwan kita? (b) Ano ang binagbinagon naton?

² Gintuga sang Dios ang tawo suno sa iya larawan. (Gen. 1:27) Buot silingon, gintuga niya kita nga may ikasarang nga ipakita ang iya mga kinaiya. Gani mangin malipayon gid kita kon sundon naton ang halimbawa ni Jehova. Dapat kita mabalaka sa iban kag maalwan nga maghatag sa ila. (Fil. 2:3, 4; Sant. 1:5) Ngaa? Bangod amo sini ang pagtuga sa aton ni Jehova. Bisan pa indi kita perpekto, mailog gihapon naton ang kaalwan ni Jehova.

³ Ginasugiran kita sang Biblia kon paano mangin maalwan. Binagbinagon naton ang pila ka leksion nga ginatudlo sang Kasulatan  parte sa sini. Matun-an naton nga nahamuot ang Dios kon maalwan kita kag makabulig ini nga kinaiya para matuman naton ang hilikuton nga ginapahimo sang Dios sa aton. Binagbinagon man naton kon ngaa malipay kita kon maalwan kita kag kon ngaa dapat naton padayon nga ipakita ini nga kinaiya.

4, 5. Ano nga halimbawa ang ginpakita ni Jehova kag ni Jesus parte sa kaalwan?

⁴ Gusto ni Jehova nga ilugon naton sia, gani nalipay sia kon maalwan kita. (Efe. 5:1) Gusto sang Dios nga malipay ang mga tawo, kay gintuga niya kita sa dalayawon nga paagi kag ginhimo niya nga matahom ang aton duta kag ang tanan nga ari diri. (Sal. 104:24; 139:13-16) Gani ginapadunggan naton si Jehova kon nagatinguha kita nga malipay man ang iban.

⁵ Ginailog sang matuod nga mga Cristiano ang Cristo, nga nagpakita sang perpekto nga halimbawa kon paano mangin maalwan ang isa ka tawo. Nagsiling si Jesus: “Ang Anak sang tawo wala nagkari agod alagdon, kundi agod mag-alagad kag ihatag ang iya kabuhi nga gawad kabaylo sang madamo.” (Mat. 20:28) Ginpalig-on ni apostol Pablo ang mga Cristiano: “Hupti ninyo ining panghunahuna nga yara man kay Cristo Jesus . . . Ginbiyaan niya ang tanan kag nangin kaangay sang ulipon.” (Fil. 2:5, 7) Gani dapat naton pamangkuton ang aton kaugalingon, ‘May mahimo pa bala ako para masunod ko sing maayo ang halimbawa ni Jesus?’—Basaha ang 1 Pedro 2:21.

6. Ano ang gintudlo sa aton ni Jesus paagi sa iya ilustrasyon parte sa mabinuligon nga Samaritano? (Tan-awa ang piktyur sa umpisa sini nga artikulo.)

⁶ Kahamut-an kita ni Jehova kon sundon naton ang perpekto nga halimbawa nga ginpakita niya kag sang Cristo, kon nabalaka kita sa kaayuhan sang iban, kag kon nagatinguha kita nga mabuligan sila. Gusto ni Jesus nga magpanikasog ang iya mga sumulunod sa pagbulig sa iban, bisan pa tuhay ang ila ginhalinan. Ginpaathag niya ini sa iya ilustrasyon parte sa mabinuligon nga Samaritano. (Basaha ang Lucas 10:29-37.) Nadumduman mo bala ang pamangkot kon ngaa ginsugid ni Jesus ini nga ilustrasyon? Namangkot sa iya ang isa ka Judiyo: “Sin-o gid ang akon isigkatawo?” Ginapakita sang sabat ni Jesus nga dapat handa kita nga maghatag sing maalwan pareho sang Samaritano kon gusto naton nga mahamuot ang Dios sa aton.

7. Paano naton mapakita nga nagapati kita nga ang pamaagi sang Dios amo ang pinakamaayo?

⁷ May madamo nga rason kon ngaa dapat mangin maalwan ang mga Cristiano. Halimbawa, may labot ini nga kinaiya sa hulusayon nga ginpautwas ni Satanas sa hardin sang Eden. Ngaa? Nagsiling si Satanas nga mangin mas malipayon sanday Adan kag Eva, kag ang tanan nga tawo, kon unahon nila ang ila kaugalingon kag ang ila kaayuhan sangsa tumanon nila ang Dios. Ginhunahuna ni Eva ang iya lang kaugalingon sang ginhandum niya nga mangin kaangay sa Dios. Ginhunahuna man ni Adan ang iya lang kaugalingon sang mas ginpili niya ang gusto ni Eva sangsa Dios. (Gen. 3:4-6) Indi gid maayo ang resulta sang ila desisyon. Indi gid mangin malipayon ang isa kon unahon niya ang iya lang kaugalingon. Kon maalwan kita, ginapakita naton nga nagapati kita nga ang pamaagi sang Dios amo ang pinakamaayo.

8. Ngaa dapat kuntani nga ginhunahuna man nanday Adan kag Eva ang kaayuhan sang iban?

⁸ Bisan pa sanday Adan kag Eva pa lang ang ara sa hardin sang Eden, dapat kuntani  nga ginhunahuna man nila ang kaayuhan sang iban bangod sang ginhatag sang Dios nga instruksion sa ila. Ginpakamaayo sila ni Jehova kag ginsilingan nga magpanganak, pun-on ang duta, kag dumalahan ini. (Gen. 1:28) Dapat kuntani nga tinguhaan nila nga mangin malipayon ang ila mangin mga anak, pareho sa pagkabalaka sang Manunuga sa kaayuhan sang iya mga tinuga. Gusto sang Dios nga mangin paraiso ang bilog nga duta para sa mga kaliwat ni Adan. Para matabo ining daku nga proyekto, dapat magbuligay ang tanan sa pamilya ni Adan.

9. Ngaa makalilipay kuntani ang paghimo sa duta nga isa ka paraiso?

⁹ Kon wala nagpakasala sanday Adan kag Eva, perpekto kuntani ang tanan nga tawo sa duta. Dapat gid magkooperar kay Jehova ang perpekto nga mga tawo para matuman ang iya katuyuan nga himuon nga paraiso ang duta. Paagi sa sini, makasulod sila sa iya kapahuwayan. (Heb. 4:11) Imadyina kon daw ano ka makalilipay ini nga proyekto! Makabaton kuntani sila sing madamo nga pagpakamaayo kag daku nga kalipay sa ila mga panikasog para sa kaayuhan sang iban.

10, 11. Paano naton matuman ang ginapahimo sa aton nga pagbantala kag pagtudlo sa iban?

¹⁰ Subong, ang ginapahimo ni Jehova sa aton nga hilikuton amo ang pagbantala kag pagtudlo sa iban. Para matuman ini, dapat gid nga nabalaka kita sa kaayuhan sang mga tawo. Makapadayon lang kita sa sini nga hilikuton kon husto ang aton motibo: gugma sa Dios kag gugma sa aton isigkatawo.

¹¹ Sang unang siglo, gintawag ni Pablo ang iya kaugalingon kag ang mga kaupod niya nga “mga masigkamanugpangabudlay sang Dios” bangod sang ila pagtanom kag pagbunyag sang binhi sang Ginharian. (1 Cor. 3:6, 9) Subong, “mga masigkamanugpangabudlay [man kita] sang Dios” kon maalwan naton nga ginagamit ang aton tion, kuarta, kag kusog sa pagbantala nga ginsugo sang Dios. Dalayawon gid ini nga pribilehiyo!

12, 13. Ano ang masiling mo nga mga padya sang pagtudlo sa iban?

¹² Malipay gid kita kon maalwan naton nga ginagamit ang aton tion kag kusog sa pagbantala kag pagtudlo sa iban. Amo sini ang ginasiling sang madamo nga kauturan nga nagatudlo sang Biblia sa iban. Nalipay gid kita nga makita ang apresasyon sang mga ginatudluan naton sang nahangpan nila ang kamatuoran, nagbakod ang ila pagtuo, naghimo sila sing mga pagbag-o sa ila kabuhi, kag nagsugid sa iban sang ila natun-an. Nalipay man si Jesus sang “nagbalik nga malipayon” ang 70 ka manugbantala nga ginpadala niya bangod sang ila maayo nga mga eksperiensia.—Luc. 10:17-21.

¹³ Nalipay ang mga manugbantala sa bilog  nga kalibutan kon makita nila nga nakabulig sa mga tawo ang mensahe sang maayong balita. Binagbinaga ang eksperiensia sang pamatan-on nga utod nga si Anna sang nagsaylo sia sa isa ka lugar sa Eastern Europe diin kinahanglan ang dugang nga manugbantala. * “Madamo diri ang interesado sa pagtuon sang Biblia, kag gusto ko gid ini,” sulat niya. “Nalipay gid ako sa pag-alagad. Kon ara na ako sa balay, indi ko na mapensaran ang akon mga problema. Ginapensar ko ang mga ginatudluan ko, ang ila mga problema kag mga ginakabalak-an. Nagapangita ako sang paagi para mapalig-on sila kag mabuligan. Kumbinsido ako nga ‘mas malipayon ang nagahatag sangsa nagabaton.’”—Binu. 20:35.

14. Paano ka malipay sa pagbantala bisan pa diutay lang ang nagapamati sa maayong balita?

¹⁴ Malipay kita kon hatagan naton sing kahigayunan ang mga tawo nga mabatian ang mensahe sang maayong balita, bisan pa magdesisyon sila nga indi mamati. Ang ginapahimo sa aton ni Jehova subong ginsugo man niya kay manalagna Ezequiel: “Dapat mo ihambal sa ila ang akon isiling, magpamati man sila ukon indi.” (Ezeq. 2:7; Isa. 43:10) Bisan pa indi mamati ang iban sa aton mensahe, ginapabaloran ni Jehova ang aton mga panikasog. (Basaha ang Hebreo 6:10.) Nagsulat ang isa ka manugbantala parte sa iya ministeryo, “Nagatanom kita, nagabunyag, kag nagapangamuyo nga kabay pa patubuon ni Jehova ang interes.”—1 Cor. 3:6.

15. Ano ang reaksion sang madamo kon pakitaan sila sing kaalwan, pero dapat bala naton ini basihan para mangin maalwan?

¹⁵ Gusto ni Jesus nga malipay kita paagi sa paghatag. Madamo nga tawo ang nagaapresyar kon pakitaan sila sing kaalwan. Nagsiling si Jesus: “Himua nga kinabatasan ang paghatag sa iban, kag sila magahatag sa inyo. Ibubo nila sa inyo sabak ang bug-os nga sukob nga nadasok, nauyog, kag nagaawas. Kay kon ano nga talaksan ang ginagamit ninyo sa iban, amo man nga talaksan ang gamiton nila sa inyo.” (Luc. 6:38) Matuod, kon maalwan kita, mahimo nga ang iban indi magpasalamat sa aton.  Pero kon may magpasalamat, mahimo nga mapalig-on man sila nga mangin maalwan. Gani himua nga batasan ang paghatag, magpasalamat man ang iban ukon indi. Makibot ka lang sa maayo nga resulta kon magpakita ka sing kaalwan.

16. Ano dapat ang aton motibo kon nagahatag kita?

¹⁶ Ang tawo nga matuod nga maalwan nagahatag indi bangod may ginapaabot sia nga balos. Nagsiling si Jesus: “Kon maghanda ka sang sinalusalo, agdaha ang imol, ang baldado, ang piang, ang bulag; kag mangin malipayon ka, bangod wala sila sing ibalos sa imo.” (Luc. 14:13, 14) “Ang tawo nga maalwan pakamaayuhon,” siling sang Biblia. Nagasiling man ini: “Malipayon ang nagapatugsiling sa mga kubos.” (Hulu. 22:9; Sal. 41:1) Nagahatag kita bangod nalipay kita kon nagabulig kita sa iban.

17. Ano nga mga paagi sang paghatag ang makapahalipay sa aton?

¹⁷ Sang ginkutlo ni Pablo ang ginsiling ni Jesus nga “mas malipayon ang nagahatag sangsa nagabaton,” indi lang materyal nga mga butang ang ginapatuhuyan ni Pablo. Mahimo man kita maghatag sa iban sing pagpalig-on, laygay halin sa Biblia, kag bulig. (Binu. 20:31-35) Paagi sa ginhambal kag ginhimo ni Pablo, gintudluan niya kita nga mangin maalwan sa paghatag sang aton tion, kusog, atension, kag gugma.

18. Ano ang ginsiling sang madamo nga eksperto parte sa kaalwan?

¹⁸ Naobserbahan man sang mga eksperto, nga nagatuon sang pamatasan sang mga tawo, nga makapahalipay ang paghatag. Suno sa isa ka artikulo, nagsiling ang mga tawo nga mas malipayon sila kon nakabulig sila sa iban. Nagasiling ang mga eksperto nga kon nagabulig kita sa iban, mabatyagan naton nga may katuyuan kag direksion ang aton kabuhi. Gani ginapanugda sang pila ka eksperto nga magboluntaryo ang mga tawo sa pagbulig sa iban para mangin mapagros sila kag malipayon. Indi na kita makibot sa sini kay ang aton mahigugmaon nga Manunuga, si Jehova, nagsiling nga malipayon gid man ang nagahatag.—2 Tim. 3:16, 17.

19, 20. Ngaa gusto mo nga mangin maalwan?

¹⁹ Mabudlay mangin maalwan kon ang mga tawo sa palibot naton nabalaka lang sa ila kaugalingon. Pero nagsiling si Jesus nga ang duha ka pinakaimportante nga sugo amo ang paghigugma kay Jehova sa bug-os naton nga tagipusuon, kalag, hunahuna, kag kusog kag ang paghigugma sa aton isigkatawo subong sang aton kaugalingon. (Mar. 12:28-31) Natun-an naton sa sini nga artikulo nga ang mga nagahigugma kay Jehova nagailog sa iya. Maalwan si Jehova kag si Jesus, kag ginapalig-on nila kita nga mangin maalwan man, kay magapahalipay ini sa aton. Kon tinguhaan naton nga mangin maalwan sa aton ginahimo para sa Dios kag sa aton isigkatawo, mapadunggan naton si Jehova kag makabenepisyo gid kita kag ang iban.

²⁰ Sigurado nga ginatinguhaan mo na nga mangin maalwan sa pagbulig sa iban, ilabi na sa imo mga kauturan. (Gal. 6:10) Kon padayon mo ini nga himuon, palanggaon ka kag pasalamatan, kag malipay ka gid. “Ang tawo nga maalwan mangin hamungaya,” siling sang Hulubaton 11:25, “kag ang bisan sin-o nga nagapaumpaw sa iban paumpawan man.” Sa aton pagkabuhi kag pagministeryo, mapakita naton ang kaayo kag kaalwan sa madamo nga paagi, kag nagaresulta ini sa pagpakamaayo. Binagbinagon sang masunod nga artikulo ang pila sini nga mga paagi.