1. Oviutwa vi raisa vi kutja Jehova ondjandje?

NANDARIRE kutja Jehova wa ri erike ngunda e hi ya mema ngamwa otjiṋa, eye kee ripurire ku ye erike uriri. Moruveze rwa nao, eye wa yandja otjiyandjewa tjomuinyo koviutwa vye, okutja oo mbi vyombepo novandu wina. “Ndjambi omuwa,” Jehova, wa suvera okuyandja oviṋa oviwa. (1 Tim. 1:11; Jak. 1:17) Eye tjinga e vanga kutja eṱe wina tu kare nondjoroka, eye u tu honga kutja tu rire ozondjandje.—Rom. 1:20.

2, 3. (a) Ongwaye okuyandja tji ku tu pa enyando? (b) Matu ka tara ku ye morupa ndwi?

² Mukuru wa uta ovandu kosaneno ye. (Gen. 1:27) Kunao, eṱe twa ungurwa kutja tu raise ovikaṋena eye mbye na vyo. Kokutja tu kare nondjoroka nu tu kowe mu imbi mbi tu na vyo, okutja matu hepa okuhorera ku Jehova mokukara nonḓero mu varwe nokurira ozondjandje. (Fil. 2:3, 4; Jak. 1:5) Omena ra ye? Mena rokutja Jehova wa ungura ovandu momuano mbo. Nandarire mouhahomonena wetu, matu yenene okuhorera ku Jehova nu atu kara tjimuna ye.

 ³ Ombeibela i tu raera kutja matu yenene vi okurira ovandu ozondjandje. Indjo tu tare ku imbi Omatjangwa mbi ye honga ohunga nepu ndi. Matu ka tara kutja tu tjata vi ku Mukuru tji tu ri ozondjandje nokutja tji twa kara nao matu yenenisa vi otjiungura Mukuru tje tu pa. Nu wina matu ka tara kutja okurira ozondjandje ku hitasana vi nondjoroka yetu nokutja ongwaye tji matu sokukaenda komurungu okukurisa otjikaṋena ho.

4, 5. Otjihorera tjiṋe tjokurira ozondjandje Jehova na Jesus tji ve tu pa?

⁴ Jehova u vanga kutja ovandu ve horere ku ye, okutja eye tjiri u tjaterwa tjinene eṱe tji tu ri ozondjandje. (Ef. 5:1) Tjiri tji wa tara komuano mbu twa ungurwa nouwa oumanise wehi nomuhapo wa ro, omundu momunu uriri kutja Mukuru u vanga kutja tu kare nenyando. (Eps. 104:24; 139:13-16) Okutja tjiri tu mu yozika indu tji matu tjiti kutja varwe ve kare nenyando.

⁵ Ovakriste va tjiri ve horera Kristus, eye ngwe tu pa otjihorera otjiwa tjokutja ovandu mave yenene vi okurira ozondjandje. Jesus omuini wa tja: “Eye ke ere okukarerwa, nungwari we era okukarera nokuyandja omuinyo we u rire onguturiro yovengi.” (Mat. 20:28) Okuweza ko, omuapostele Paulus wa raera Ovakriste a tja: “Kareye nomeritjindiro wongaro tjingeyo ndji Kristus Jesus ndja ri na yo. . . Eye we risusuparisa na kambura ongaro yomukarere.” (Fil. 2:5, 7) Okutja ma rire nawa auhe wetu okuripura omuini nai, ‘Hapo me tjiti vi kutja mbi horere ku Jesus okuura kombanda ya indu tji mbi tjita aruhe?’—Lesa 1 Petrus 2:21.

6. Jesus me tu hongo ye momasasanekero wOmusamaria omunatjari? (Tara kotjiperendero pomautiro worupa ndwi.)

⁶ Matu yenene okuyorokera okuyakurwa i Jehova indu tji matu horere kovihorera vye na imbi ovya Kristus, mokuyandja ombango kovihepwa vya varwe nokupaha omiano mu matu yenene okuvevatera. Jesus wa raisa oukahu motjisanekero tjOmusamaria omunatjari kutja eye u undjira kokutja ovemukongorere ve raise otjari nandarire tje ri ouzeu okutjita nao, na wina kovandu vozongaro nḓa panguka kozawo. (Lesa Lukas 10:29-37.) Mozemburuka epuriro nda tjita kutja Jesus me ripure notjisanekero tjOmusamaria omunatjari? Omujuda we mu pura na tja: “Nu ingwi omukwetu owaṋi?” Eziriro Jesus nda yandja ri raisa kutja matu sokuraisa otjari tjimuna Omusamaria ngo indu tji matu vanga okuyakurwa i Mukuru.

7. Okuripurira kweṱe oveni ku ve tasana vi oviuru nomananeno wa Jehova?

⁷ Ovakriste ve nomapu omananḓengu ngu ve raisira otjari ku varwe. Otjotjihorera, otjikaṋena hi tja pirukirwa i Satan motjikunino tja Eden. Omomuano uṋe? Satan wa tja Adam na Eva, na wina ovandu avehe, mave rire ovaṋingandu indu tji mave ripurire ku wo oveni nokutwapo ozonḓero zawo poruveze orutenga pendje yokukara nonḓuviro ku Mukuru. Eva ee ripurire ku ye omuini nu aa vanga okukara tjimuna Mukuru. Adam ee ripurire ku ye omuini na vanga okuyeta ondjoroka ku Eva. (Gen. 3:4-6) Ovikongorere ko vyozondando nḓu va toora tu vi muna poruhaera. Okuripurira kove omuini ka ku yeta enyando. Indu tji tu ri ozondjandje, tu raisa kutja tu horera ku Mukuru eye ngu tjita oviṋa momuano omusemba.

8. Ovakupasane ovatenga aa ve sokutja ve ripurira ku ye?

⁸ Mukuru wa yandja erakiza kovakupasane ovatenga nda ri sokutjita kutja owo ve ripurire  ku varwe, nandarire kutja poutenga va ri owo aveyerike motjikunino tja Eden uriri. Jehova wa sera Adam na Eva ondaya ne ve raere kutja ve kwatasane, nu ve takavare nokuurisa ehi nu ri kare kehi yawo. (Gen. 1:28) Tjimuna Omuute wetu tjee ripurire kozonḓero zoviutwa vye, ovanene vetu ovatenga andakuzu ve ripurira kozonḓero zovanatje vawo mbu mave ka panduka. Oparadisa aa i sokuririsiwa onene okuyenena kozondekurona za Adam azehe. Otjiungura otjinene ho aa tji hepa omaunguriro wa pamwe weṱunḓa ndaa ri sokukurira ko.

9. Ongwaye okuneneparisa Oparadisa tja tja ku eta ondjoroka yatjiri?

⁹ Kokutja ovarumendu novakazendu ozohomonena mbo okutjitisa ehi arihe okurira Oparadisa, aa pe kamburire mokuṱaṱera okuura ku Jehovah okuyenenisa ondando ye ndjo, kunao ya ri okuhita morusuvo rwe. (Hebr. 4:11) Ripura uriri nondoṋeno nouwa otjiungura tjo tja tja tji yeta! Andakuzu owo aa ve ripurire ku varwe, kundino atja ku ve etera ozondaya ozengi nondjoroka yatjiri.

10, 11. Matu yenenisa vi otjiungura tjokuzuvarisa nokuisapo ovandu ovahongewa?

¹⁰ Ndino, Jehova wa yandja kovandu ve otjiungura tjokuzuvarisa nokuisapo ovandu ovahongewa ve. Kutja tu yenenise otjiungura tjo, matu sokuripurira kovandu tjiri. Otjiṋa tji matji tu vatere okukaenda komurungu notjiungura hi, orusuvero ku Mukuru na kovandu varwe.

¹¹ Meserewondo etenga O.Z., Paulus wa tja nai ohunga na ye omuini novakwao tjiva kutja owo “ovaungure vapamwe vaNdjambi” mena rotjiungura tjawo tjokukuna nokutjatja ozondwi zOuhona wa Mukuru. (1 Kor. 3:6, 9) Ndino, eṱe wina matu yenene okurira “ovaungure vapamwe vaNdjambi” mokuungurisa oruveze rwetu, oviungurisiwa vyetu, nomasa wetu kotjiungura otjiwa tjokuzuvarisa. Tjiri indjo ondjingonekero ya peke!

12, 13. Ouwa waye mbu za mokuzuvarisa?

¹² Okuungurisa oruveze nomasa wetu motjiungura tjokuzuvarisa maku tupe enyando enene. Ovengi mba kara nondjingonekero yokukara novahongewa ovawa, mave ku raere nawa kutja va muna mondjoroka mokutjita nao. Ouṋingandu wa tjiri u za mokumuna omuano ovandu tji ve munika indu tji va zuu ouatjiri wOmbeibela, ongamburiro yawo mu Mukuru tji ye kuru, tji mave tjiti omarundurukiro, na ve utu okuhaṋasana ouatjiri mbo kuna varwe. Jesus wina wa ri nondjoroka ndjo indu ovazuvarise 70 mba hinda tji ‘va kotoka nenyando’ mena rouwa mbu va kamuna.—Luk. 10:17-21.

¹³ Ovazuvarise mouye ongondoroka ve kara nondjoroka okuzuva kutja ombuze ombwa i rundurura ehupo rovandu momiano omiwa. Tara kotjihorera tja Anna, omukazona omutanda omukombe, ngwa neneparisa otjiungura tje tjokuzuvarisa nu a tjindire ko Eastern Europe  ku ku nouhepe wovazuvarise. * Eye wa tjanga kutja, “Pe notuveze otuingi nguno tu mo yenene okuhakaena novandu novehongo Ombeibela, nu tjiri iho otjiṋa otjiwa kwami. Okuzuvarisa tjiri ku ndji pa ondjoroka tjinene. Tji mbe ya ponganda, hi kara noruveze okuripurira komauzeu wandje omuini. Mbi u ta okuripura na imba mbu mbi rihonga na wo, tjimuna omauzeu wawo poo oviṋa vyarwe ohunga nawo. Nu mbi ripura nomiano mu me yenene okuvetunduuza nokuvevatera. Nu ihi tji ndji pa ongamburiro yokutja ‘mokuyandja mu nenyando tjinene pokupewa.’”—Oviung. 20:35.

14. Matu munu vi ouwa motjiungura tjokuzuvarisa, nandarire kutja ovandu ovaṱiṱi uriri mba raisa ombango?

¹⁴ Mo yenene okumuna ondjoroka mokuzuvarisira ovandu ombuze ombwa kutja mave puratena poo kave nokupuratena. Ndino, otjiungura tjetu tjokuzuvarisa tji ri tjimuna tjomuprofete Esekiel, Jehova ka tja: “Ove mo sokuveraera omambo aehe ngu me ku raere, indu kutja mave puratene poo indee.” (Esek. 2:7; Jes. 43:10) Nandarire kutja tjiva kave nokuyakura ombuze ya Mukuru, Jehova tjiri u nondangi kozongondjero nḓu tu tjita. (Lesa Ovaheberi 6:10.) Omuzuvarise umwe wa raisa ongaro ombwa kepu ndi. Wa tjanga nai ohunga nomazuvarisiro, “Eṱe twa kuna, atu tjatja, nokukumba kutja Jehova ma tjite kutja imba vomitima omiwa ve hape.”—1 Kor. 3:6.

15. Ovandu ovengi ve raisa ongaro iṋe kombuze ndji tu ve yetera, nu ongaro yawo mai sokutuṱuna vi?

¹⁵ Jesus u vanga kutja tu mune ondjoroka mokuyandja. Ovandu ovengi ve puratena kombuze ndji tu zuvarisa. Eye we tu rakiza kutja: “Yandjeye kovakweṋu nu Ndjambi me mu pe wina. Tjiri, mamu pewa otjisaneke otjiwa tji tja pama, tji matji tikatika nu tji matji tuwa momake weṋu. Otjisaneke tji mamu saneke na tjo ovakweṋu, Ndjambi otjinga ame mu saneke na tjo wina.” (Luk. 6:38) Otjiperi kutja, kaavehe mbu mave yakura ombuze yetu, posi yokutja tji va yakura, oviṋa mbi ve rihonga mavi yenene okuvevatera kouṱiṱiṱiṱi. Kunao, rihonga okuyandja nandarire kutja ovandu  mave raisa ondangi poo kave nokuraisa ondangi. Omundu ko moo tjiwa kutja okurira ondjandje nandarire moviṋa oviṱiṱi maku ka yeta ye.

16. Ongwaye tji matu sokurira ozondjandje?

¹⁶ Ovandu ozondjandje tjiri kave yandja kutja ve munine po otjiṋa. Jesus wa ri nouripura mbwi tjaa hongo: “Tji wa zepa omukandi, isana ovasyona noviṱeṱu novarema novapoṱu. Indino ove mo serwa ondaya, owo kave nakusora okukupa ondjambi mena raimbi mbi wa tjiti ku wo.” (Luk. 14:13, 14) Omutjange umwe wOmbeibela wa tja: “Ondaya i undja omundu ngu notjari”. Warwe wa tja: “Ovaṋingandu imba mbe rikendera omusyona nomuhepe.” (Omiano 22:9; Eps. 41:1) Tjiri, nga tu rihonge okuyandja orondu tu muna ouwa mokurira ozondjandje.

17. Ongaro iṋe yokuyandja ndji i tu pa ondjoroka?

¹⁷ Indu Paulus tja hungira omambo wa Jesus nga, “mokuyandja mu nenyando tjinene pokupewa,” Paulus kaa hungirire kokuyandja oviṋa uriri nungwari wina aa hungirire kokutunduuza varwe, nokuveraisiro ondjira nokuvevatera tji mave hepa ombatero. (Oviung. 20:31-35) Momambo na movitjitwa, Paulus ee tu rakiza kutja tu ri punguhire varwe, mokuvepa oruveze rwetu, omasa wetu, ombango yetu, norusuvero rwetu.

18. Ovatjange ovengi va konḓonona ye ohunga nokuyandja?

¹⁸ Ovakonḓonone mounongo wonḓunino yotjiwaṋa wina va muna kutja mokuyandja mu nondjoroka. Otja korupa rumwe, “ovandu ve yandja ozoraporta zondjoroka kombunda yokutjitira varwe oviṋa oviwa.” Ovakonḓonone ve tja, okuvatera varwe otjiṋa otjinanḓengu “mokukara nondando ombwa nomuhunga omusemba” mehupo “mena rokutja tji yenenisa onḓero yomundu.” Kunao, ovakonḓonone ve tunduuza ovandu okuyandja nouharupu kovandu kokutja ve tumbire ko nokurira ovaveruke, nokukara nondjoroka. Ihi ka tji kumise ku imba mba yakura Ombeibela otjEmbo ra Jehova, Omuute wovandu.—2 Tim. 3:16, 17.

19, 20. Ove u nepu raye rokuvanga okurira ondjandje?

¹⁹ Tjiri ouzeu okurira ozondjandje orondu ovandu mbe tu kovera ve ripurira kozonḓero zawo oveni. Nungwari, Jesus wa tja omatwako yevari omananḓengu, okusuvera Jehova nomitima vyetu avihe, nomuinyo auhe, nozondunge nokusuvera omukweṋu otja tji we risuvera omuini. (Mar. 12:28-31) Otja tji twa munu morupa ndwi, imba mba suvera Jehova ve horera ku ye. Jehova u yandja ku varwe, nu Jesus u tjita nao wina. Nu owo ve tu rakiza kutja tu tjite nao wina, mena rokutja maku tu etere ondjoroka ya tjiri. Tji matu raisa ongaro yokurira ozondjandje kuna Mukuru novandu varwe, matu hivirike Jehova nokuriyetera oveni na varwe ouwa.

²⁰ Tjiri auhe wetu nai we ri rongere okuvatera varwe, nu tjinenenene ovakambure ovakwetu. (Gal. 6:10) Tji wa kaenda komurungu okutjita nao, tjiri ovandu mave ku suvere nokuraisa ondangi, nu ove omuini mokara nondjoroka. Embo rOmiano 11:25 ri tja: “Tjita ouwa, nu mo ṋingapara. Kovisa ovakweṋu, nu mo kovisiwa.” Otjiperi kutja, okuyandja nouharupu, notjari, nokurira ondjandje maku yenene okuraisiwa momiano omingi pekepeke na momiano omingi vyehupo roye otjOmukriste na motjiungura tjokuzuvarisa, nu momunu mouwa tji wa tjiti nao. Morupa ndu maru kongorere ko matu ka konḓonona omiano mu matu yenene okurira ozondjandje na mozongaro pekepeke.