1. Чаwа әʹфьрин избат дькьн wәки Йаһоwа мәрʹд ә?

ҺʹӘТА кö Йаһоwа дәстпекьр тьшта бьәʹфьринә, әw тʹәнә бу. Паше әwи хwәст кö пʹешкʹеша жийине бьдә чаwа әʹфьринед рʹöһʹани öса жи мәрьва. Йаһоwа, демәк Хwәдейе хwәзьли, һʹьз дькә тьштед qәнщ бькә (1 Тимтʹ. 1:11; Аqуб 1:17). У әw дьхwазә wәки әм жи бәхтәwар бьн, ләма мә һин дькә, wәки әм мәрʹд бьн (Рʹом. 1:20).

2, 3. а) Чьрʹа чахе әм мәрʹд ьн, әм бәхтәwар дьбьн? б) Әме ве готареда дәрһәqа чь шеwьр кьн?

² Хwәде мәрьва дьлqе хwәда хöльqанд (Дәстп. 1:27). Әw те һʹәсабе wәки әм öса һатьнә әʹфьрандьне кö дькарьн чʹәʹв бьдьнә һʹöнöред wи. Сәва кö әм бәхтәwар у дьлша бьн, әм гәрәке чʹәʹв бьдьнә Йаһоwа кö хәм бькьн бона мәрьва у мәрʹд бьн (Фили. 2:3, 4; Аqуб 1:5). Ле чьрʹа? Чьмки Йаһоwа бь wи һʹöнöри әм әʹфьрандьн. Рʹаст ә әм гöнәкʹар ьн, ле йәкә әм дькарьн чʹәʹв бьдьнә мәрʹданийа Йаһоwа.

³ Кʹьтеба Пироз нишан дькә кö чаwа бьбьнә мәрьвед мәрʹд. Wәрә чәнд дәрсед жь Хәбәра Хwәде шеwьр кьн. Әме бьвиньн кö чаwа мәрʹданийа мә дькарә дьле Йаһоwа  ша кә, у чаwа әw һʹöнöр али мә дькә wәки шьхöле wи биньн сери. Öса жи әме шеwьр кьн кö чаwа мәрʹдани мә бәхтәwар дькә у чьрʹа лазьм ә бәрдәwам кьн мәрʹд бьн.

4, 5. Чаwа Йаһоwа у Иса мәрʹданийеда мәсәлә нә бона мә?

⁴ Йаһоwа дьхwазә wәки әм чʹәʹв бьдьнә wи, ләма чахе әw дьвинә wәки әм мәрʹд ьн, дьле wи гәләк ша дьбә (Әфәс. 5:1). Әw öса жи дьхwазә wәки әм жи бәхтәwар бьн. Әw йәк зәлал те кʹьфше ве йәкеда, кö әwи ча әм әʹфьрандьн у öса жи ча әʹрд у тьштед сәр әʹрде бона мә чекьр, сәва әм ләзәте бьстиньн (Зәб. 104:24; 139:13-16). Һьн жи чахе әм алийе хwәда тьштәки дькьн, wәки мәрьвед дьн жи бәхтәwар бьн, бь ве йәке әм Йаһоwа рʹумәт дькьн.

⁵ Әм чаwа Мәсиһи öса жи чʹәʹв дьдьнә Иса, кʹижан кö мәрʹданийеда мәрʹа мәсәла мәзьн һиштийә. Әwи гот: «Кöрʹе Инсан нәһатийә кö жерʹа бәрдәстийе бькьн, ле wәки әw хwәха бәрдәстийе бькә у әʹмьре хwә бьдә, кö гәләка бькʹьрʹә» (Мәт. 20:28). Паwлосе шанди жи ширәт да Мәсиһийа: «Мәсиһ Иса сәр чь нет-фькьре бу, жь wә һәр кәс жи öса бьфькьрә . . . Хwәха хwә шкенанд, кʹәтә бьнйатʹа хöламәки» (Фили. 2:5, 7). Wе баш бә һәр кәс жь мә пьрсе бьдә хwә: «Гәло әз дькарьм һе зедә чʹәʹв бьдьмә Иса?» (Бьхунә 1 Пәтрус 2:21.)

6. Иса чь дәрс һин кьр пе мәтʹәлока дәрһәqа мәрьве Самәри? (Бьньһерʹә шькле әʹwльн.)

⁶ Йаһоwа хwәш те чахе әм чʹәʹв дьдьнә wи у Кöрʹе wи, гава хәм дькьн бона һалхwәшийа мәрьва, у мәщала дьгәрʹьн сәва али wан бькьн. Гава Иса мәтʹәлока дәрһәqа Самәри ани, әwи да кʹьфше кö чьqас фәрз ә али мәрьва бькьн, фьрqи тʹöнә әwана кʹе нә у жь кʹидәре нә. (Бьхунә Луqа 10:29-37.) Те бира wә чьрʹа Иса әw мәтʹәлок гьли кьр? Щьһуки пьрс да wи: «Һәвале мьн кʹи йә?» Щаба Иса дьдә кʹьфше кö һәрге әм дьхwазьн wәки Йаһоwа жь мә рʹази бә, әм гәрәке мина wи мәрьве Самәри бь дьл мәрʹд бьн.

7. Чаwа хwәһʹьзи у мәрʹдани пьрсәкә лапә фәрзва гьредайи нә?

⁷ Диса һәнә мәʹнийед дьн, сәва кö әм мәрʹд бьн. Мәсәлә, әw һʹöнöр гьредайи йә тʹәви wе пьрсе, кö Шәйтʹан бахче Әдәнеда пешда ани. Ле чаwа? Пе готьна Шәйтʹан Адәм у Һеwа, öса жи һʹәму мәрьв, wе һе бәхтәwар буна, һәрге тʹәне дәрһәqа хwә хәм кьрана, нә кö гöрʹа Хwәде бькьрана. Һеwайе хwәст бьбә мина Хwәде у пәй ве хwәстьне кʹәт. Адәм жи пәй хwәстьна хwә чу, чьмки хwәст дьле Һеwайе ша кьра (Дәстп. 3:4-6). Ле ахьрийа сафикьрьнед wан тʹәне дәрд-кöл анин. Бәле, мәрьве хwәһʹьз, wе тʹö щар бәхтәwар нибә. Ле мәрьве мәрʹд дьдә кʹьфше, wәки баwәр дькә кö Йаһоwа һәр гав тьштед qәнщ дькә.

8. Чьрʹа жьн-мере пешьн гәрәке бона һалхwәшийа майина бьфькьрийана?

⁸ Адәм у Һеwа пешийе Әдәнеда рʹаст ә тʹәне бун, йәкә Хwәде шьхöлед öса дабу wан, кʹижан кö wе һʹәму мәрьварʹа кʹар бьанийа. Йаһоwа дöа ль Адәм у Һеwайе кьр у гот кö ль һәв зедә бьн, әʹрде тʹьжи кьн у хwәйитийе ле бькьн (Дәстп. 1:28). Әʹфьрандар хwәха дьфькьри бона һалхwәшийа  әʹфьринед хwә, у жьн-мере пешьн жи гәрәке бона бәхтәwарийа зарʹа, йед кö гәрәке бьһатана буйине, бьфькьрийана. Әʹрд бь тʹәмами гәрәке бьбуйа щьнәʹт, сәва кö тʹәмамийа зöрʹәта Адәмрʹа ләзәт бьанийа. Әw шьхöләкә мәзьн wана гәрәке тʹәвайи малбәта хwәва бькьрана.

9. Чьрʹа мәрьв wе бәхтәwар буна гава әʹрд бькьрана Щьнәт?

⁹ Мер у жьне беqьсур, гәрәке тʹәви Йаһоwа һәвкʹари бькьрана, wәки qьрара wи бьанийана сери. Wи щурʹәйи әwана дькарьбун бькʹәтана рʹьһʹәтийа wи (Ибрн. 4:11). Бьдьнә бәр чʹәʹве хwә, кö әw шьхöл wе шабун у ләзәтәкә ча бьанийа! Һәрге әwана хwәһʹьз нибуна, у бона йед дьн хәм кьрана, Йаһоwа wе һе зедә әwана кʹәрәм кьра.

10, 11. Чаwа әм дькарьн әw тʹәми биньн сери кö мьзгинийе бәла кьн у шагьрта һазьр кьн?

¹⁰ Иро жи Йаһоwа шьхöл да щьмәʹта хwә кö мьзгинийе бәла кьн у шагьрта һазьр кьн. Сәва әwи шьхöли биньн сери, әм гәрәке бь дьл у щан хәм бькьн бона һалхwәшийа мәрьва. Әме wи шьхöли һʹәта хьлазийе биньн сери, һәрге әм бь дьле хwәйи сах Хwәде у мәрьва һʹьз дькьн.

¹¹ Qьрʹна йәкеда Паwлос сәр хwә у сәр һьнә Мәсиһийа гот, wәки әwана һәвалхәбаткʹаред Хwәде нә, чьмки wана дадьчʹьканд у авдьдан тʹохьмед Пʹадшатийе (1 Корн. 3:6, 9). Иро әм жи «бона Хwәде дьхәбьтьн», чьмки бь мәрʹдани wәʹде хwә, тьшт у qәwата хwә дьдьнә хәбате, сәва шьхöле wи биньн сери. Әw рʹасти жи бона мә qәдьрәки мәзьн ә!

12, 13. Һун ча дьфькьрьн, һазьркьрьна шагьрта чь кʹәрәма тинә?

¹² Чахе әм бь мәрʹдани qәwат у wәʹде хwә бона хьзмәтийе хәрщ дькьн, әм шабунәкә мәзьн дьстиньн. Гәләк хушк-бьра әwе йәке тʹәхмин дькьн у кʹәрәма дьстиньн, илаһи чахе тʹәви кәсәки һинбуна Кʹьтеба Пироз дәрбаз дькьн. Әwана бәхтәwар дьбьн чахе дьвиньн кö шагьрт чаwа ша дьбьн, гава рʹастийед Кʹьтеба Пироз фәʹм дькьн, баwәрийеда qәwи дьбьн, гöһастьна дькьн у мәрьвед дьнрʹа жи дәрһәqа рʹастийе гьли дькьн. Иса öса жи шабунәкә мәзьн станд чахе 70 мьзгинван, кö чунә мьзгинийе бәла кьн, «бь әшq у ша вәгәрʹийан», чьмки хьзмәтийеда qәwьмандьнед гәләк баш һәбун (Луqа 10:17-21).

¹³ Хушк-бьред нав тʹәмамийа дьнйайе дьлша дьбьн, гава дьвиньн кö мьзгинийа жь Кʹьтеба Пироз ча әʹмьре мәрьва алийе башда дьгöһезә. Дина хwә бьдьнә qәwьмандьна  хушкәкә мәйә щаһьл Аннайе, * йа кö дәрбази wи щийи бу кʹидәре һʹәwщәтийа мьзгинвана һәйә. Әwе ньвиси: «Вьра гәләк мәщал һәнә кö һинбуна Кʹьтеба Пироз дәстпекьн, у әw йәк мьн гәләк хwәш те. Әз жь хьзмәтийа хwәда шабунәкә мәзьн дьстиньм. Чахе әз жь хьзмәтийе темә мал, әз нә кö дькʹәвьм һʹәйра хwә, ле һʹәйра wан, тʹәви кʹе жи һинбуне дәрбаз дькьм, у дәрһәqа чәтьнайи у хәмед wан дьфькьрьм. Әз алийе хwәда чь дькарьм дькьм, сәва дьл бьдьмә wан у али wан бькьм. У ньһа әз ида баwәр ьм, wәки ‹хwәзи ль дайийа, нә кö ль стандийа›» (Кʹар. Шанд. 20:35).

14. Һәрге мьһала wәда мәрьв кем гöһ дьдьн wә, ча һун дькарьн шабуне бьстиньн жь хьзмәтийа хwә?

¹⁴ Әм бәхтәwар дьбьн гава мәщале дьдьнә мәрьва кö мьзгинийе пебьһʹәсьн, һәрге жи әwана гöһ надьнә мә. Йаһоwа иро жи жь мә дәʹwа дькә ве йәке, чь жи жь Һәзәqел дәʹwа кьр: «Дьхwазә бьра гöһдари бькьн, дьхwазә жи бьра бьрʹәвьн, тö готьна мьн wанрʹа бежә» (Һәзqл. 2:7; Иша. 43:10). Һәрге жи мәрьв мьзгинийа мә qимәт накьн, Йаһоwа шьхöл у qәwата мә дьшекьринә. (Бьхунә Ибрани 6:10.) Бьраки мә дәрһәqа хьзмәтийа хwә гот: «Әм дадьчʹькиньн, ав дьдьн, у бь баwәрийе дöа дькьн, wәки Йаһоwа дьле мәрьва вәкә» (1 Корн. 3:6).

15. Чаwа һьнә мәрьв сәр мәрʹданийа мә дьньһерʹьн, у ча әw йәк гәрәке сәр мә һʹöкöм кә?

¹⁵ Иса жи дьхwазә әм бәхтәwар бьн, ләма һелан кьр кö әм мәрʹд бьн. Гәләк мәрьв мәрʹданийе дьшекьриньн. Иса гот: «Бьдьн, wәрʹа wе бе дайине, бь пиванәкә тʹьжи һʹәжанди, дәwьсанди, сәри qучʹ wе бькьнә пʹеша wә. Чьмки бь чь чапе һун бьпивьн, бь wе жи wәрʹа wе бе пиване» (Луqа 6:38). Рʹаст ә нә һʹәмушк wе мәрʹданийа wә бьшекьриньн, ле йед кö бьшекьриньн, дьбәкә хwәха жи  һелан бьн мәрʹд бьн. Ләма жи фьрqи тʹöнә мәрьв сәва мәрʹданийа мә рʹази бьн йан на, әм гәрәке бәрдәwам кьн дәствәкьри бьн. Һун ньзаньн һәла һе мәрʹданийа бьчʹук жи, дькарә чьqас тьштед баш бькә.

16. Нета мә гәрәке чь бә чахе әм мәрʹданийе дьдьнә кʹьфше?

¹⁶ Мәрьвед кö дьлда бь рʹасти мәрʹд ьн, wе һивийе нибьн wәки qәнщийа wан вәгәрʹиньн. Иса гот: «Гава тö хwарьнәке датини, гази фәqир, сәqәт, йед дькöльн у кора кә. Һьнге те хwәзьли би, чьмки әwана нькарьн qәнщийа тә ль тә вәгәрʹиньн» (Луqа 14:13, 14). Öса жи Кʹьтеба Пирозда те готьне: «Дöайе ль мәрʹд бе кьрьне». Зәбурда жи те готьне: «Хwәзи ль wи кö хәм дькә бона йе кʹәсиб» (Мәтʹлк. 22:9; Зәб. 41:1). Бәле, гава әм мәрʹданийе дьдьнә кʹьфше кö али мәрьва дькьн, әм бәхтәwар дьбьн.

17. Чь щурʹә мәрʹдани дькарә wә бәхтәwар кә?

¹⁷ Чахе Паwлос гьлийед Иса wәкʹьланд, кö «хwәзи ль дайийа, нә кö ль стандийа», әwи тʹәне дәрһәqа тьштед материали нә дьгот. Әwи öса жи дьгот дәрһәqа дьлдайине, ширәта, у аликʹарийе бона wан, йед кö һʹәwщә нә (Кʹар. Шанд. 20:31-35). Пе хәбәрдан у кьред хwә, Паwлос һин кьр wәки бь мәрʹданийе wәʹдә у qәwата хwә хәрщ кьн, бькʹәвьнә һʹәйра мәрьва у һʹьзкьрьна хwә бьдьнә кʹьфше.

18. Һьнә леколинкʹара дәрһәqа мәрʹданийе чь готьнә?

¹⁸ Леколинкʹаред кö рʹабун-рʹуньштьна мәрьва леколин дькьн, тедәрхьстьн wәки чахе мәрьв мәрʹд ә, әw бәхтәwар дьбә. Ль гора готарәке, «мәрьв гәләк ша дьбьн, гава кәсәкирʹа qәнщийе дькьн». Öса жи леколинкʹара готьн, wәки аликʹари мәрьварʹа, нете дьдә әʹмьре мә. Һьнә експерт жи ширәте дьдьнә мәрьва, wәки бь рʹәзәдьли шьхöл бькьн, сәва сьһʹәт-qәwат у бәхтәwар бьн. Әw йәк бона мә тьштәки тʹәзә нинә, чьмки Әʹфьрандаре мә Йаһоwа, дәрһәqа ве йәке Хәбәра Хwәда бь һʹьзкьрьне ида мәрʹа пешда гот (2 Тимтʹ. 3:16, 17).

19, 20. Чь мәʹнийед wә һәнә кö мәрʹд бьн?

¹⁹ Һеса нинә ве дьнеда мәрʹд бьн, чьмки мәрьв дор бәре мә тʹәне дәрһәqа хwә дьфькьрьн. Ле Иса гот wәки дö тʹәмийед һәри мәзьн әw ьн, кö Йаһоwа бь тʹәмамийа дьле хwә, щанийа хwә, һʹьше хwә у qәwата хwә һʹьз бькьн, у öса жи һәвале хwә wәкә хwә һʹьз бькьн (Марq. 12:28-31). Чаwа мә ве готареда дит, әwед кö Йаһоwа һʹьз дькьн, чʹәʹв дьдьнә wи. Йаһоwа у Иса мәрʹд ьн, у әwана мә жи һелан дькьн кö мәрʹд бьн, чьмки әw йәк мә бәхтәwар дькә. Һәрге әм һьндава Хwәде у һьн жи һьндава мәрьва бь дьл мәрʹд бьн, әме шькьрийе бьдьнә Йаһоwа у ча хwәрʹа öса жи мәрьварʹа кʹаре биньн.

²⁰ Бешьк, һун ида мәрʹданийе дьдьнә кʹьфше, илаһи хушк-бьрарʹа (Галт. 6:10). Һәрге һун бәрдәwам кьн öса бькьн, мәрьв wе жь wә рʹази бьн у wә һʹьз бькьн, у ахьрийеда һуне бәхтәwар бьн. Мәтʹәлок 11:25-да әм дьхуньн: «Нандаре сьһʹәт у qәwат бә, авдаррʹа жи аве бе дайине». Мәрʹдани, һʹьзкьрьн у qәнщи әм дькарьн әʹмьре хwәда у хьзмәтийеда бь гәләк щурʹа бьдьнә кʹьфше. Готара дьнда әме чәнд мәщала шеwьр кьн, кö ча ве йәке бькьн.