1. Tshidi tshileja ne: Yehowa mmusue kupeshangana bintu ntshinyi?

KUMPALA kua Yehowa kufuka bintu, anu yeye nkayende ke uvuaku. Pashishe, wakafuka banjelu ne bantu. Yehowa “Nzambi wa disanka” utu musue kupeshangana bintu bimpe. (1 Tim. 1:11; Yak. 1:17) Udi utulongesha bua tuikale ne muoyo wa kupa bualu mmusue tuikale ne disanka.​—Lomo 1:20.

2, 3. a) Bua tshinyi kupeshangana bintu kudi kutupetesha disanka? b) Netukonkonone tshinyi mu tshiena-bualu etshi?

² Nzambi wakafuka muntu mu tshimfuanyi tshiende. (Gen. 1:27) Mmumue ne: mmutufuke ne ngikadilu yende. Tuetu bidikije tshilejilu tshia Yehowa tshia kupeshangana bintu, netupete disanka dilelela ne neatubeneshe. (Filip. 2:3, 4; Yak. 1:5) Bua tshinyi? Bualu Yehowa mmutufuke ne muoyo wa kupa. Nansha mutudi bapange bupuangane, tudi anu mua kuikala ne muoyo wa kupa bu Yehowa.

³ Bible udi utuleja mutudi mua kulua batshipapayi. Netumone tshidi Bible utulongesha bua bualu ebu. Netumone mudi Nzambi utuanyisha bua mutudi batshipapayi ne mudi kuikala ne ngikadilu eu kutuambuluisha bua kukumbaja mudimu udi Nzambi mutupeshe.  Netumone kabidi mudi muoyo wetu wa kupa utupetesha disanka, ne malu adi atusaka bua kutungunuka ne kuikala ne ngikadilu eu.

4, 5. Ntshilejilu kayi tshia dipeshangana bintu tshidi Yehowa ne Yezu batushile?

⁴ Yehowa mmusue bua bantu bamuidikije, nunku tudi tumusankisha patudi tupeshangana bintu. (Ef. 5:1) Bu mudi Nzambi mutufuke bimpe ne muwuje buloba tente ne bintu bilenga, bidi bileja mudiye musue bua bantu bikale ne disanka. (Mis. 104:24; 139:13-16) Nunku, tudi tumutumbisha patudi tuenza bua bakuabu bikale ne disanka.

⁵ Bena Kristo balelela badi bidikija Kristo udi mutushile tshilejilu tshipuangane tshia mutudi mua kuikala ne muoyo wa kupa. Yezu wakamba ne: ‘Muana wa muntu wakalua, ki mbua bamuenzele mudimu to, kadi mbua kuenzela bakuabu mudimu ne kufila muoyo wende bu tshia kupikulangana natshi pa muaba wa bantu ba bungi.’ (Mat. 20:28) Mupostolo Paulo wakalomba pende bena Kristo nende ne: “Nulame munda muenu meji a buena avua kabidi munda mua Kristo Yezu . . . Wakadivuija tshianana, kuangataye tshimuenekelu tshia mupika.” (Filip. 2:5, 7) Mbimpe yonso wa kutudi adiebeje ne: ‘Ndiku mua kutamba kuidikija tshilejilu tshia Yezu kupita mundi ngenza mpindieu anyi?’​—Bala 1 Petelo 2:21.

6. Yezu mmufile dilongesha kayi mu tshilejilu tshia muena Samalea wa luse? (Tangila tshimfuanyi tshia ntuadijilu tshia tshiena-bualu.)

⁶ Tuetu tuidikija tshilejilu tshipuangane tshia Yehowa ne tshia Kristo, tuditatshisha bua diakalenga dia bakuabu, ne tukeba mishindu ya kubambuluisha, Yehowa neatuanyishe. Yezu wakalongesha mu tshilejilu tshia muena Samalea wa luse ne: bayidi bende badi ne bua kuambuluisha bantu bakuabu, too ne ba bisamba bikuabu. (Bala Luka 10:29-37.) Udi uvuluka lukonko luvua lusake Yezu bua kufila tshilejilu atshi anyi? Muena Yuda kampanda uvua mumuebeje ne: “Mukuanyi nnganyi menemene?” Diandamuna dia Yezu didi dileja ne: anu bu muena Samalea au, tuetu basue bua Nzambi atuanyishe, tudi ne bua kuitaba bua kupeshangana bintu ne tshianza tshilekelela.

7. Mmunyi mudi muoyo wetu wa kupa uleja mutudi tutua bukokeshi bua Yehowa mpanda?

⁷ Bena Kristo badi ne malu mimpe a bungi adi abasaka bua bikale bapeshangana bintu. Tshilejilu, ngikadilu wa kupeshangana bintu eu udi upetangana ne tshilumbu tshivua Satana mujule mu budimi bua Edene. Mushindu kayi? Satana wakamba ne: Adama ne Eva, ne bantu bakuabu bonso, bavua mua kuikala ne disanka dia bungi bobu babenga kutumikila Nzambi ne bimanyina anu pa dikeba majinga abu. Budinangi buakasaka Eva bua kukumbaja dijinga diende dia kuikala bu Nzambi. Budinangi buakasaka Adama bua kusankisha Eva. (Gen. 3:4-6) Tudi bamone tshidi bienzedi biabu bikebeshe. Budinangi kabutu bupetesha muntu disanka to. Kadi patudi ne muoyo wa kupa, tudi tuleja mutudi batuishibue ne: mushindu udi Nzambi ukokesha mmutambe buimpe.

8. Bua tshinyi Adama ne Eva bavua ne bua kuditatshisha bua diakalenga dia bakuabu?

⁸ Nzambi wakapesha bena dibaka ba kumpala mêyi a kulonda avua ne bua kuikala mabasake bua kuditatshisha bua diakalenga dia bakuabu, nansha mutshivuabu nkayabu mu budimi bua Edene. Yehowa wakabenesha Adama ne Eva, kubambilaye bua bavulangane, buwuje buloba tente, ne babukokeshe. (Gen. 1:28) Bu muvua Mufuki uditatshisha bikole bua diakalenga  dia bifukibua biende, baledi betu ba kumpala bavua pabu ne bua kuditatshisha bua disanka dia bana babu bavuabu ne bua kulua kulela. Bavua ne bua kualabaja Mparadizu pa buloba bujima bua diakalenga dia bana babu bonso. Uvua mudimu munene uvua ulomba kuwenza pamue ne bena mu dîku diabu bavua ne bua kuvulangana.

9. Bua tshinyi divuija buloba Mparadizu divua ne bua kuikala dituadile bantu disanka?

⁹ Bantu bapuangane bavua ne bua kuenza mudimu pamue ne Yehowa bua kuvuija buloba Mparadizu ne kukumbaja disua diende; nunku, bavua babuela mu dikisha dia Nzambi. (Eb. 4:11) Elabi meji muvua mudimu au mua kubasankisha! Bu bobu badifile bua diakalenga dia bakuabu, Yehowa uvua ne bua kuikala mubabeneshe bikole ne mubapeteshe disanka dilelela.

10, 11. Mmunyi mutudi mua kukumbaja mudimu wa kuyisha ne kuvuija bantu bayidi?

¹⁰ Lelu, Yehowa mmupeshe batendeledi bende mudimu wa kuyisha ne kuvuija bantu bayidi. Bua kuwukumbaja, tudi ne bua kuditatshisha ne muoyo mujima bua diakalenga dia bakuabu. Tuetu banange Nzambi ne mukuetu, netutungunuke ne kuenza mudimu eu.

¹¹ Mu bidimu lukama bia kumpala, Paulo wakadibikila yeye ne bena diende bakuabu ne: “benzejanganyi ba mudimu ne Nzambi” bualu bavua benza mudimu wa kukuna ntete ya bulelela bua Bukalenge ne kuyimiamina mâyi. (1 Kol. 3:6, 9) Lelu, tuetu tufila dîba dietu, bintu bietu, ne makanda etu bua kuenza mudimu wa kuyisha udi Nzambi mutupeshe, netuikale petu “benzejanganyi ba mudimu ne Nzambi.” Edi ndiakalenga dinene be!

12, 13. Buebe wewe, kuvuija bantu bayidi kudi ne masanka kayi?

¹² Kufila dîba ne makanda etu mu mudimu wa kuyisha ne kuvuija bantu bayidi kudi kutupetesha disanka dia bungi. Ke tshidi bena Kristo netu ba bungi bavua balonge Bible ne bantu bamba. Tutu tupeta disanka dia bungi patutu tumona balongi ba Bible basanka padibu bajingulula malongesha malelela a mu Bible, ditabuja diabu dikola, bashintuluka, ne batuadija kuyisha. Yezu pende wakapeta disanka dia bungi pavua bayidi 70 bavuaye mutume mu buambi ‘bapingane ne disanka’ bua bipeta bimpe bivuabu bapete.​—Luka 10:17-21.

¹³ Padi bena Kristo netu bamona mudi mukenji wa mu Bible wambuluisha bantu bua kuakaja nsombelu wabu, badi bapeta disanka. Tuangate tshilejilu tshia Anna, muanetu wa bakaji utshidi nsonga, uvua muye kuyisha mu tshitupa tshia ku Mputu wa ku est mudibu dijinga ne bamanyishi ba bungi, bua kuvudija mudimu wende. * Wakafunda ne: “Tudi ne mpunga ya bungi ya kulongesha bantu Bible munemu, bidi  binsankisha bikole. Mudimu wanyi wa buambi udi umpetesha disanka dia bungi. Pantu mpingana kumbelu, tshitu ne dîba dia kutangila malu anyi nkayanyi to. Ntu ngela meji a ntatu ne tunyinganyinga tua bantu bandi ndonga nabu Bible. Ntu nkeba mishindu mipepele ya kubakankamija ne kubambuluisha. Ndi mulue kutuishibua ne: ‘Disanka dia kufila ndipite dia kuangata.’”​—Bien. 20:35.

14. Nansha bantu bakese patupu bateleja lumu luimpe, mmunyi muudi mua kupeta disanka mu mudimu webe wa kuyisha?

¹⁴ Tudi mua kupeta disanka tuetu tupesha bantu mpunga wa kuteleja lumu luimpe nansha bobu kabayi basue kuluteleja. Mudimu wetu lelu mmufuanangane ne wa Yehezekele. Yehowa wakamuambila ne: “Udi ne bua kubambila mêyi anyi, nansha bobu bateleje anyi kabayi bateleje.” (Yeh. 2:7; Yesh. 43:10) Nansha bamue bantu kabayi batuteleja, Yehowa udi wanyisha didienzeja dietu. (Bala Ebelu 6:10.) Muanetu kampanda wakafunda bua mudimu wende wa buambi ne: “Tudi tukuna, tumiamina mâyi, ne tusambila bua Yehowa akoleshe dijinga dia bantu batudi tuyisha.”​—1 Kol. 3:6.

15. Tudi ne bua kuikala tupeshangana bintu anu padi bantu batuleja dianyisha anyi? Umvuija.

¹⁵ Yezu mmusue tuikale ne muoyo wa kupa bua tupete disanka. Bantu ba bungi batu basanka bua dipeshangana bintu. Wakamba ne: “Ikalayi nupeshangana bintu, nunku bantu nebanupeshe penu. Nebanuelele mu tshibombi tshienu tshipiminu tshimpe, tshishindika, tshinyukula, tshiuwuja tente biyila ne panshi. Bualu nebanupimine penu ne tshipiminu tshinudi nupimina natshi bakuabu.” (Luka 6:38) Patudi tupeshangana bintu ne tshianza tshilekelela, ki mbantu bonso banyisha to, kadi padi bamue banyisha, muoyo wetu wa kupa neubasake bushuwa bua bikale pabu bapeshangana bintu. Nunku ikala upeshangana bintu nansha bantu bobu ne dianyisha anyi kabayi nadi to. Kuena mua kumanya malu mimpe adi tshienzedi tshimue tshia muoyo wa kupa uudi nawu mua kupetesha bantu to.

16. Ntshinyi tshidi ne bua kutusaka bua kupeshangana bintu?

 ¹⁶ Bena muoyo wa kupa kabatu bapeshangana bintu bashala bindile bua babapeshe pabu to. Yezu uvua mumanye bualu ebu, ke bua tshinyi wakamba ne: “Paudi ulongolola tshibilu, ubikile bapele, bantu badi batebuka, balema ne bampofu; nunku newikale wa diakalenga, bualu kabena ne tshintu tshia kukufuta. Bualu neufutshibue ku dibishibua dia bantu bakane.” (Luka 14:13, 14) Bible udi wamba ne: “Muena tshipapayi neabeneshibue,” wamba kabidi ne: “Wa diakalenga mmuntu yonso udi utabalela muntu mupuekele.” (Nsu. 22:9; Mis. 41:1) Eyowa, mbimpe tuikale tupeshangana bintu bualu patudi tuambuluisha bakuabu, tudi tupeta disanka.

17. Ngimue mishindu kayi itudi mua kupeshangana bintu?

¹⁷ Pavua Paulo muambulule mêyi a Yezu a ne: “Disanka dia kufila ndipite dia kuangata,” kavua wakula anu bua kupeshangana bintu patupu to, kadi uvua kabidi wakula bua kukankamija bantu, kubabela ne mêyi a mu Bible, ne kubambuluisha mu mushindu kampanda. (Bien. 20:31-35) Mupostolo Paulo mmutushile tshilejilu mu mêyi ne ku bienzedi biende tshia mutudi mua kudifila bua bakuabu, mmumue ne: kufila dîba ne makanda etu bua bualu buabu, kubatabalela ne kubananga.

18. Ntshinyi tshidi bakebuludi ba bungi bamba bua difila?

¹⁸ Bakebuludi ba malu a bikadilu bia bantu mbamone pabu ne: kufila kudi kupetesha muntu disanka. Mukanda kampanda udi wamba ne: “padi bantu benzela bakuabu malu mimpe, badi bapeta disanka dia bungi.” Bakebuludi badi bamba ne: patudi tuambuluisha bakuabu, tudi tujingulula buimpe bua muoyo ne tumanya bua tshinyi bavua batufuke. Ke bualu kayi, bamanyi bapiluke batu balomba bantu bua badifile ku budisuile bua kuambuluisha bakuabu bua bobu bine bapete makanda a mubidi mimpe ne disanka. Bualu ebu kabuena butukemesha to, bualu Mufuki wetu wa dinanga Yehowa utu anu utuambila ne: kufila kudi kutupetesha muntu disanka.​—2 Tim. 3:16, 17.

19, 20. Bua tshinyi udi musue kuikala muena tshipapayi?

¹⁹ Bu mutudi banyunguluka kudi bantu badi bateka anu majinga abu kumpala kua a bakuabu, bidi mua kutukolela bua kulama muoyo wetu wa kupa. Kadi Yezu wakamba ne: mikenji mitambe bunene ibidi idi itulomba bua kunanga Yehowa ne muoyo wetu wonso ne anyima wetu yonso ne lungenyi luetu luonso ne bukole buetu buonso, ne bua kunanga mukuetu bu mutudi badinange. (Mâko 12:28-31) Anu mutudi bamone mu tshiena-bualu etshi, bantu badi banange Yehowa badi bamuidikija. Yehowa ne Yezu batu bapeshangana bintu. Badi batulomba bua tubidikije, bualu kuenza nanku kudi kutupetesha disanka dia bungi. Tuetu tupesha Nzambi ne mukuetu bintu ne tshianza tshilekelela, netutumbishe Yehowa, ne netudienzele tuetu ne bantu bakuabu bimpe.

²⁰ Kakuyi mpata, ukadi mutuadije kudienzeja bua kudifila bua kuambuluisha bakuabu, nangananga bena Kristo nebe. (Gal. 6:10) Wewe utungunuka ne kuenza nanku, bantu nebakunange, nebakuanyishe bikole, ne neupete disanka. Nsumuinu 11:25 udi wamba ne: “Muntu muena tshipapayi neatante, ne yonso udi ukolesha bakuabu neakoleshibue yeye muine.” Kudi mishindu ya bungi itudi mua kupesha bantu bintu ne tshianza tshilekelela mu nsombelu ne mu mudimu wetu wa buambi, ne netupete masanka a bungi. Mu tshiena-bualu tshialonda, netukonkonone imue ya ku mishindu ayi.