1. Yileñaleña yamwekeshaña ñahi nawu Yehova wukweti chisambu?

HELA chakwila Yehova wadiña nkawindi hampinji yatachikiliyi kuleña yuma, hadiña nakutoñojoka kwikala nkawindi hohuku. Dichi, waleñeli añelu niantu. Yehova “Nzambi wamuzañalu,” wahanaña yuma yayiwahi. (1 Tim. 1:11; Yak. 1:17) Chineli wakeñaña nindi twikali namuzañalu, watudizishaña kumwekesha chisambu.—Rom. 1:20.

2, 3. (a) Muloñadi kuhana chikwatuletelaña muzañalu? (b) Yumanyi yitukuhanjeka?

² Nzambi waleñeli muntu neyi chekalayi yomweni. (Kutach. 1:27) Dikwila nawu watuleñeli nayilwilu yikwetiyi. Hakwila nawu twikali namuzañalu nichihandilu chachiwahi, twatela kumwimbujola Yehova kuhitila mukutoñojokelaku akwetu antu nikuhana chakufuma hamuchima. (Fwi. 2:3, 4; Yak. 1:5) Muloñadi? Muloña Yehova dichatuleñayi. Hela chakwila twawanina wanyi,  tunateli kumwimbujola Yehova kuhitila mukumwekesha chisambu.

³ Bayibolu yatulejaña chitunateli kwikala akwakuhana chakufuma hamuchima. Tuhanjekenu hayikuma yashimuna Nsona kutalisha hakumwekesha chisambu. Tukudiza kwikala nachisambu chikunateli kutukwasha kutambwila nkisu jaNzambi nikwikala nanichi chilwilu chikunateli kutukwasha kuzata mudimu watwinkayi Nzambi. Tukushinshika cheñi chisambu chichendelaña hamu namuzañalu nimuloña wutwatela kutwalekelahu kwikala nanichi chilwilu.

4, 5. Yehova niYesu atumwekeshela ñahi chisambu, nawa tunateli kuyimbujola ñahi?

⁴ Yehova wakeñaña nindi antu jindi amwimbujoleña nawa watiyaña kuwaha neyi tumwekesha chisambu. (Efwes. 5:1) Chatuleñayi Nzambi niyuma yayiwahi yatwinkayi yamwekeshaña hatooka nawu wakeñaña antu kwikala namuzañalu. (Mas. 104:24; 139:13-16) Dichi twamulemeshaña neyi tuzañaleshaña antu amakwawu.

⁵ AkwaKristu alala amwimbujolaña Kristu wamwekesheli chitunateli kwikala nachisambu. Yesu yomweni wahosheli nindi: “Mwana kamuntu, henjili nindi amukalakeliku, ilaña wenjili kulonda yakalakeli antu nikuhana wumi windi kwikala ifutu danyiloña dakukuula nachu antu amavulu.” (Mat. 20:28) Dichi kapostolu Pawulu wayilejeli akwaKristu nindi: “Ikalenuña nayitoñojoka niyilwilu neyi yadiña naKristu Yesu . . . Yena washiyili yuma yejima yadiñayi nayu nakudibalumuna neyi nduñu.” (Fwi. 2:5, 7) Wejima wetu twatela kudihula netu, ‘Komana nateli kumwimbujola Yesu kubadika chinnakwila chayinu mpinji?’—Tañenu 1 Petulu 2:21.

6. Chikumanyi chatudizishiliyi Yesu muchishimu chakaSamariya wamuwahi? (Talenu mwevulu wakutachikilahu.)

⁶ Tunateli kudiluñisha nkisu jaYehova kuhitila mukumwimbujola yena niKristu, kutoñojokelaku akwetu nikukeña njila mutunateli kuyikwashila muyuma yinakaankiliwu. Mwamweni, Yesu wamwekesheli hatooka muchishimu chakaSamariya nindi akwakumulonda ejima atela kukwashaña amakwawu, kushilahu niantu afuma kumaluña ashiyashana. (Tañenu Luka 10:29-37.) Munakwanuka lwihu lwehwiliyi kaYudeya lwaletesheli Yesu yahoshi hachishimu chakaSamariya? Wehwili nindi: “Indi mukwetu hinyi?” Ñakwilu yaYesu yamwekeshaña nawu kufwana ona kaSamariya, twatela kuyimwekeshelaña antu chisambu hakwila tudiluñisheña nkisu jaNzambi.

7. Muloñanyi wahaniniyi Satana mwitempa daEdeni, nawa tunateli kumwekesha ñahi netu Yehova welaña yuma mukuloña?

⁷ Kudi yuma yayivulu yinateli kuyileñela akwaKristu kumwekesha chisambu. Chakutalilahu, ichi chilwilu chinakundami kumuloña wahaniniyi Satana mwitempa daEdeni. Chinakundamiku ñahi? Satana wahosheli nindi aAdama naEva kushilahu niantu ejima anateli kwikala namuzañalu neyi elaña yuma yinakukeñawu chatela amwovwahileña Nzambi. Eva wakoñeli nshidi muloña wakeñeleña kwikala neyi chekalayi Nzambi. Adama niyena wakoñeli nshidi muloña wakeñeleña kumutiyisha Eva kuwaha. (Kutach. 3:4-6) Mwafumini yuma yatama yitunakumona makonu. Muntu wadikeña yomweni hekalaña namuzañaluku. Neyi tumwekeshaña chisambu, tukumwekesha netu Nzambi welaña yuma mukuloña.

8. Muloñadi anvwali atachi chateleleliwu kutoñojokelaku chisaka chawu?

⁸ Nzambi wayinkeli antu atachi nshimbi jakulondela jadi kuyikwasha kutoñojokelaku akwawu hela chakwila adiña nkawawu mwitempa daEdeni. Yehova wayikiswilili aAdama naEva nikuyileja nindi asemununi, enzeshi iseki nikudovwahisha. (Kutach. 1:28) Nzambi watoñojokeleleliku yileñaleña yindi. Dichi anvwali akusambila niwena ateleleli kutoñojokelaku anyanawu adi kusemuka kumbidi. Iseki dejima ateleleli kudilisha kwikala paradisa kudi anyana kaAdama. Chisaka chaAdama chateleleli kuzatila hamu hakwila nawu elishi iseki kwikala paradisa.

9. Kwilisha iseki dejima kwikala paradisa kwadi kuyiletela ñahi antu muzañalu?

⁹ Awa awamayala nawambanda awanina adi kuzatila hamu naYehova hakwilisha iseki kwikala paradisa kulonda ashikiji nkeñelu yindi nakwiñila mukunooka kwindi. (Heb. 4:11) Fwikijenu muzañalu wadi kutiyawu neyi azatili iwu mudimu! Kutoñojokelaku antu amakwawu kwadi kuyileñela kwikala nankisu nimuzañalu chikupu.

10, 11. Tunateli kuzata ñahi mudimu wakushimwina niwakwilisha atumbanji?

¹⁰ Makonu, Yehova wayinka antu jindi mudimu wakushimwina nikwilisha atumbanji. Hakwila nawu tuzati iwu mudimu, twatela kuyitoñojokelañaku antu amakwawu. Kumukeña Nzambi niakwetu antu dikunateli kutukwasha kuumika muniwu mudimu.

¹¹ Mumafuku awapostolu, Pawulu waditeneni yomweni niakwawu muyadiña nakukalakela nindi “tudi akwakukalakala hamu naNzambi” muloña adiña namudimu wakushimwina antu chalala. (1 Kor. 3:6, 9) Ninetu tunateli kwikala “akwakukalakala hamu naNzambi” kuhitila mukuzatisha mpinji yetu, yuma yitukweti niñovu yetu mumudimu waWanta wakushimwina. Iku hikukooleka chikupu!

12, 13. Yumanyi yayiwahi yafumaña mukwilisha atumbanji?

¹² Kuzatisha mpinji niñovu yetu mumudimu wakwilisha atumbanji nikushimwina kwaletaña muzañalu chikupu. Neyi mwihula antu anatwalekihu kudizisha atudizi aBayibolu, akuyileja nawu adiluñishaña chikupu. Twazañalalaña neyi tumona muntu itwadizishili yahimpa yilwilu yindi nawa yatachika kulejaku antu amakwawu nsañu yayiwahi. Yesu niyena wazañaleli hakumona atumbanji 70 atemesheliyi nakushimwina “afuntili iku anazañalali” muloña wakwila antu etejeli nsañu yayiwahi.—Luka 10:17-21.

¹³ Akwakushimwina mukaayi kejima azañalalaña hakumona nsañu yayiwahi chiyinakuhimpa yihandilu yawantu. Shinshikenu  yuma yamweniyi muhela Anna wayili nakuzatila kwiluña dakuEastern Europe kwadiña kukaankila kwawakwakushimwina. * Wasonekeli nindi: “Kunidi iluña kwekala antu amavulu akeñaña kudiza Bayibolu nawa natiyaña kuwaha kuyidizisha. Iwu mudimu wanzañaleshaña. Neyi nifunta kwitala, hinekala nampinji yakutoñojoka hakukala kwamiku, ilaña natoñojokaña hadi antu innadizishaña, hakukala kunakumonawu. Nakeñaña jinjila jakuyikoleshelamu nikuyikwasha kumujimba. Nawa neluki chikupu nami ‘mukuhana mwekala muzañalu chikupu kubadika wekala mukutambwila.’”—Yilw. 20:35.

14. Tunateli kwikala ñahi namuzañalu hakushimwina nsañu yayiwahi hela chakwila antu antesha hohu diwu anakwiteja?

¹⁴ Tunateli kwikala namuzañalu neyi tushimwinaña antu nsañu yayiwahi hela chakwila akwiteja hela nehi. Mudimu wutwazataña wudi neyi wazatileñayi Ezekeli alejeliwu kudi Yehova nindi: “Wakayilejaña mazu ami hela akatiya hela akaleka.” (Ezek. 2:7; Isa. 43:10) Hela chakwila antu akwiteja wanyi nsañu yitwayishimwinaña, Yehova watiyaña kuwaha chitwazataña nañovu. (Tañenu Aheberu 6:10.) Mukwakushimwina wumu wasonekeli kutalisha hamudimu windi wakushimwina nindi: “Tunatumbi, tunatukumwini nawa tunakulomba nakukuhwelela netu Yehova wukuyikulisha.”—1 Kor. 3:6.

15. Komana twatela hohu kumwekesha chisambu neyi antu eteja? Lumbululenu.

¹⁵ Yesu wakeñaña nindi twikaleña namuzañalu kuhitila mukumwekesha chisambu. Antu amavulu atiyaña kuwaha nachisambu chitwayimwekeshelaña. Wahosheli nindi: “Hanenuña, ninenu antu akuyinkaña. Akahuñunwina muyisweku yenu chesekelu chachiwahi, chakushikija, chakunyikumuna nawa chinakusumpoka. Muloña chesekelu chimunakwesekelaku nachu akwenu, dichi chakayesekelawu nachu ninenu nawa.” (Luka 6:38) Hela chochu, bayi neyi antu ejima etejaña chisambu chitwayimwekeshelañaku, ilaña neyi eteja ekalaña namuzañalu. Dichi twalekenuhu kuhana hela chakwila antu  akwiteja hela nehi. Muneluki wanyi yuma yayiwahi yinateli kufumamu hela chakwila munamumwekesheli muntu chisambu kamu hohu.

16. Anyi itwatela kumwekeshela chisambu, nawa muloñadi?

¹⁶ Antu ahanaña hiyahanaña kulonda niwena akayinki kumbidiku. Yesu wadiña nakutoñojoka hanawa mazu hampinji yatañishileñayi antu nindi: “Neyi wuloñesha chawija, tambikaku atuzweñi, ayifwayi, akwakubalakata, amputamesu; nawa wakekala namuzañalu, muloña wena hiyakweti chuma chakukufwetaku.” (Luka 14:13, 14) Nsoneki wumu amwoneneni kusoneka nawu: ‘Muntu wukweti chisambu nakooleki.’ Mukwawu niyena wasonekeli nindi: “Wayitoñojokaña atuzweñi nakooleki.” (Yish. 22:9; Mas. 41:1) Mwamweni, twatela kuhana muloña twekalaña namuzañalu neyi tukwasha antu amakwawu.

17. Kuhana kwamuchidinyi kunateli kuyiletela muzañalu?

¹⁷ Hampinji yahosheliyi Pawulu mazu aYesu akwila nawu “mukuhana mwekala muzañalu chikupu kubadika wekala mukutambwila,” hatalishili hohu mukuhana yumaku, ilaña watalishili cheñi mukuyikolesha, kuyilombola nikuyikwasha antu anakaankili. (Yil. 20:31-35) Mazu ahosheliyi niyuma yeliliyi kapostolu Pawulu, amwekeshaña nawu twatela kuzatisha mpinji yetu, ñovu kukwasha antu, kuyitiyilila nikuyikeña.

18. Akwakusandujola ahoshaña nawudi kutalisha hakuhana?

¹⁸ Akwakusandujola hachihandilu chawantu niwena anawani nawu kuhana kwaletaña muzañalu. Chibaaba chimu chashimwini nawu, “antu ashimwini muzañalu watiyiliwu hanyima yakukwasha akwawu.” Akwakusandujola ahoshaña nawu kukwasha antu “dichuma chalema muchihandilu chawantu” muloña kuhana “kwakwashaña antu munakaankiliwu.” Antu adiza ahoshaña nawu antu adihanaña kuzataku nyidimu kulonda ekali namuzañalu muchihandilu chawu. Chumichi chatuhayamishaña wanyi etu tweluka netu Bayibolu himukanda watwinkawu kudi Nleñi yetu, Yehova.—2 Tim. 3:16, 17.

19, 20. Yumanyi yikutuleñela kumwekesha chisambu?

¹⁹ Chinateli kutukalila kumwekesha chisambu neyi twashakamaña nawantu akeñaña yuma yakuditiyisha awenawu kuwaha. Hela chochu, Yesu washimwini nshimbi jiyedi jabadika nindi tukeñi Yehova namuchima wetu wejima, nawumi wetu wejima, nayitoñojoka yetu yejima niñovu jetu jejima nawa nindi tukeñi akwetu neyi chitwadikeña etu aweni. (Maku 12:28-31) Neyi chitunahanjeki muchinu chibaaba, antu amukeña Yehova amwimbujolaña. Yehova niYesu ahanaña. Nawa akeñaña ninetu tuhaneña muloña kuhana kwaletaña muzañalu. Neyi tumwekeshaña chisambu kudi Yehova nikudi akwetu antu, tukumulemeshaña Yehova nawa tukwikala namuzañalu kushilahu niakwetu.

²⁰ Chakadi nikujina, mwakwashaña akwenu, sweje-e akwetu akwakwitiya. (Ñal. 6:10) Neyi mutwalekahu kwila mwenimu, akwenu akuyikeña nikuyisakilila nawa mukwikalaña namuzañalu. Yishimu 11:25 yahosha nawu “Muntu wahanaña diyi wakatoha; watukumwinaña akwawu mumatempawu akamutukumwina nimwindi nawa.” Hela chochu, tunateli kuhana nikumwekesha luwi nichisambu munjila jashiyashana muchihandilu nimumudimu wawakwaKristu, nawa mwafumaña yuma yayiwahi. Chibaaba chinalondelihu chikashimuna jinjila jikwawu mutunateli kumwekeshela chisambu.