1. Kurusa mati ra ǁgau Jehovab a māxasa?

JEHOVAB ge ǀguri ge hâ i xūnab nî kurus aiǃâ xaweb ge ǁîb xa ǀgui ge ǂâi tama hâ i. ǁÎb ge ûib di ǀkhaeba kurusabena ge mā, gagasises tsî sorosises tsîna. “ǃGâiǃō hâ Elob” Jehovab ge ǃgâi xūna hoaǁae ra mā. (1Tim. 1:11; Jak. 1:17) Tsî sida nî ǃgâiaǂgaosab ra ǂgao amagab ge Jehovaba ra ǁkhāǁkhā da î da māxa.​—Rom. 1:20.

2, 3. (a) Māsa tae-i ǃaroma ra ǃgâiaǂgao kai da? (b) Tae-e da nî ǃhoaǃgao?

² Elob ge khoesiba ǁîb īsib ǃoa ge kuru. (Gen. 1:27) Sida ge ge kuruhe î da Jehovab ǀgauga ǁgae. ǃGâiaǂgaoba da ga ra ūhâ ǂgao o, o da ge Jehovab aiǁgausa nî ǁgae tsî nau ǃgâsan ǃnâ ǃgâiǃgâibasensa nî ūhâ. (Fil. 2:3, 4; Jak. 1:5) Tae-i ǃaroma? Nēs ge kaise a supu Jehovab ge khoena di a kuru amaga. ǀOasa kurusa da ūhâ tama hâ xawe da ge Jehovab di māxasiba a ǁgae ǁkhā.

³ Elobmîs ge ra ǁgau mati da a māxa ǁkhā ǀgausa.  Hā re î da ǀnî aiǁgaude ôa hîna da nēsa xu a ǁkhāǁkhāsen ǁkhāde. Nē ǁkhāǁkhāǃâs ǃnâ da ge nî mû māxasib mati Elob tawa ǃgâiǃgâibasensa ra mā dasa tsî mati i nē ǀgauba ūhâsa Elob ge mā da ǁgui-aisa nî dīǀoaǀoasa. Tsî da ge nî mû māxasib mati ǃgâiaǂgaob ǀkha ra ǃgûǀhao ǀgauba tsî tae-i ǃaroma da nē ǀgauba ūhâsa nî ǁgūtsâsa.

4, 5. Jehovab tsî Jesub tsîna tae-i aiǁgausa ge ǁgau da?

⁴ Jehovab ge ra ǂgao în khoena ǁîba ǁgae tsî ǁnā-amaga ra ǃgâiaǂgao māxa da ga ra o. (Efe. 5:1) Jehovab ge khoen tsî xūn tsîna îsa ǀgaub ǃnâ a kuru ǃkhais ge ra ǁgau ǁîb ra ǂgaosa în khoena ǃgâiaǂgao. (Psa. 104:24; 139:13-16) ǁNā-amaga da ge ǁÎba ǃgôasiba ra ǁgau nau khoena da ga ra ǃgâiaǂgao kai o.

⁵ Ama Xristeǁîn ge Xristuba ra ǁgae hîna ge aiǁgausa a māba khoen mati nî māxasa. Jesub ge ge mî: “Khoen Ôab ge hā tama, ǃoabaheb nîse, tsîb nî ǃoaba tsî ǁîb ûiba māse ǂguin di orehesa ǃoa.” (Mat. 20:28) Apostel Paulub ge Xristeǁîna ge ǂkhâǃnâ: “ǁKhā ǂâisa as sadu ǃnâ hâ, Xristub Jesub ǃnâ ge ǁkhāti hâ isa” xaweb ge ǁîba aitsama ge māǁnâsen tsî ǃgāb īsiba ge ū. (Fil. 2:5, 7) Hoa da ge nî dîsen, ‘Jesub aiǁgausa ta ǃamkuse nî sao ǀnai ta ra dīs xa?’​—Khomai re 1 Petrub 2:21.

6. Jesuba Samariaǁîb di ǂkhōs ǀkha tae-e ge ǁkhāǁkhā? (Tsoatsoas ǃnâ hâ ai-īsiba mû re.)

⁶ Jehovab xa da ge a ūǃoahe ǁkhā ǁÎb tsî Jesub tsîn di aiǁgausa da ga ra ǁgae o tsî nau ǃgâsan ǃnâ ǃgâiǃgâibasensa ga ra ūhâ o. Jesub ge Samariaǁîb di ǂkhōs ǃnâ ge mî ǁîb ra ǂgaosa î da sida daoba xu ǂoa sida ǃgâsana huis tawa i ga ra hā o, ǀnî hâ khaoǃhūba xun ga ra hā xawes tsîna. (Khomai re Lukab 10:29-37.) ǂÂi oa î du ra dîs hîna ge Jesuba a ǂgaesa îb Samariaǁîb di ǂkhōs xa a ǂâi? Jodeǁîb ge ge dî bi: “Tari-e kha a ti ǀgūkhoe?” Jesub ǃereams ge ge ǁgau Elob xa da ga ra ūǃoahe ǂgao o, o da ge Samariaǁîb khami nî māxa.

7. ǁÎǂâibasenxasiba mati Edenni ǃhanab ǃnâ ge hâ ǃgomsib ǀkha ra ǃgûǀhao?

⁷ Xristeǁîn ge ǂgui ǃaromade ūhâ māxasiba ǁgausa. Aiǁgause, nē ǀgaub ge Satanni ge Edenni ǃhanab ǃnâ a ǃaroma ǃgomsib ǀkha a ǀgui. Mati io? Satanni ge ge mî Adammi tsî Evas tsî hoa khoesib ge ǃgâise nî ûi ǁîn ain ga aitsama ga ra ǂgomaiǂnûi o tsî ǁîn ǃgâiba ǂgurose ga ra mâi o. Evas ge Elob khami gere ī ǂgao. Tsî Adammi ge Evasa gere ǂkhîǂkhî ǂgao. (Gen. 3:4-6) ǁÎra mîǁguigu di ǀamǂoasa da ge hoa da ra mû. ǁÎǂâibasenxasib ge ǃgâiaǂgao kai da tama hâ. Māxa da ga ra io, o da ge ra ǁgau Elob xūna ra dī ǀgaub ge kaise a ǃgâi di.

8. Tae-i ǃaroma ra ga Adammi tsî Eva hâra khoen ǃnâ ǃgâiǃgâibasensa ūhâ?

⁸ Elob ge ǂguro kurusabe ra ǁgaraga ge mā, nē ǁgaragu ge nau khoen xa ga ǂâi kai ra hâ ǀguri ra ge ǃhanab ǃnâ  hâ i xawe. Jehovab ge Adammi tsî Evas tsîra ge ǀkhae tsî ge ǂkhâǃnâ ra î ra ǂûǂûxaǃnâ, ǂguiǂguisen tsî ǃhūbaiba ǀoaǀoa. (Gen. 1:28) Kuru-aob ge ǁîb kurusaben ǃnâ ǃgâiǃgâibasensa ūhâ i khami ra ge Adammi tsî Evas tsîra ǁîra ǀgôan ǃnâ ǃgâiǃgâibasensa ga ūhâ. Paradais ge ǃhūbaib ǂhawase ga hâ hâ Adammi omaris di ǃgâib ǃgao. Nēs ge sîsen ǀhaosa ga ǂhâ hâ Adammi omarisa xu.

9. Paradaisa ǃhūbaib ai dīǀoaǀoasa mati ga ǃgâiaǂgao kai da hâ?

⁹ ǀOasa kurusa ūhâ khoera ase ra ge Jehovab ǀkha ǀguiba ga sîsen hâ paradaisa ǃhûbaib ai hausa tsî Jehovab ǃgâiǃgâibasensa hōs ǃgao. (Heb. 4:11) Nēs ge kai ǀkhaega ga hau hâ. Nau khoen ǃgao ra ga māsen hâ o, o ra ge kai ǀkhaegu tsî ǀoasa kurus tsîna ga ūhâ.

10, 11. Mati da aoǁnâ tsî ǁkhāǁkhāsabedīs ǁgaumâisa nî dīǀoaǀoa?

¹⁰ Jehovab ge nētsē ǁîb khoena aoǁnâ tsî ǁkhāǁkhāsabedīs sîsen-e ge mā. Nēsa da ga ra dīǀoaǀoa ǂgao o, o da ge nau khoen ǃnâ ǃgâiǃgâibasensa nî ūhâ. Nē sîsenni ǃnâ da ge ǃgâi mûǂuisa da ga ra ūhâ o ǀgui nî aiǃgû, nēs ge Elob tsî ǀgūkhoen tsîna ǀnamsa.

¹¹ ǂGurokham ǁaeb ǃnâb ge Pauluba ǁîb tsî nau ǃgâsan tsîna ‘Elob di sîsenǀhao-ao’ di gere ǂgai ǁîn ge aoǁnâ sîsenni ǃnâ Gaosib amaba gere ǃhana tsî ǂnâ amaga. (1Kor. 3:6, 9) Sida tsîn ge nētsē a ‘Elob di sîsenǀhao-ao’ kai ǁkhā sida ǁaeb, ǁkhāsib tsî ǀgaib tsîna da ga aoǁnâ sîsenni ǃnâ ga ra sîsen-ū o. Nē aiǂhanub ge kaise a ǂoaǂamsa.

12, 13. ǁKhāǁkhāsabedīsa tae-i ǀkhaega ra hau?

¹² Aoǁnâ tsî ǁkhāǁkhāsabedīs sîsenni ǃnâ sida ǁaeb tsî ǀgaib tsîna sîsen-ūs ge kaise ra ǃgâiaǂgao kai da. ǂGui ǃgâsan hîna ge khoena Elobmîsa ǁkhāǁkhās aiǂhanuba ūhâ în ge ra mî ǂkhariro xūn ge ǂgui ǀkhaega ūhâ di. Kai ǃgâiaǂgaob ge mûsa khoen ra ǂkhî ǀgausa amaban ga ra ǁnâu tsî ǁnās ǀkha ǀkharaǀkharana dī tsî ǁîn tsîna ga ra aoǁnâ tsoatsoa o. Jesub ge kaise ge ǃgâiaǂgao 70 aoǁnâ-aogu ge “ǃgâiaǂgaob ǀkha oahā” o khoen ge amaba a ūǃoa o.​—Luk. 10:17-21.

¹³ ǃHūbaib ǂhawase hâ aoǁnâ-aon ge ra ǂkhî mûsa khoen ûigu ǃgâiǂhôas xa ǃgâi ǀgaub ǃnâ ra tsâǀkhāhe o. Annas aiǁgaus xa ǂâi re, ǂkham ǃgâsas hîna ge aiǂoas Europab disa  ǃoa a doesa is aoǁnâ sîsenni ǀkha sī hui. * “ǂGui ǃēdi ge hâ Elobmîsa nēpa khoena ǁkhāǁkhāsa tsî ta ge tita nēpa kaise a ǃgâiba-e” dis ge ra mî. “Aoǁnâ sîsenni ge ra ǃgâiaǂgao kai te. Omsa ǃoa ta ga ra oa o, o ta ge ǁaeba ūhâ tama aitsama kōǃgâsensa. Tita Elobmîsa ra ǁkhāǁkhā khoen di ǃgomsigu tsî ǂâiǂhansendi tsîn xa ta ge ra ǂâi. ǀGauga ta ge ra ôa ǁîna ǂkhâǃnâ tsî huis diga. Nēsi ta ge a ǂan ‘mās ge ūs ǃgâ-ai a ǃgâi.’”​—ǃNǃkh. 20:35.

14. ǂGui khoen ga ǃgâiǂhôasa ûǃoa tama ga ra i xawe da mati ǁnāsa xu ǃgâiba nî hō?

¹⁴ ǃGâiaǂgao da ge nî ǃgâiǂhôasa da ga khoena ga ra aoǁnâba o ǃgâ taman ga ra i xawe. Sida sîsenni ge nētsē Jehovab ge Esegiela a mîba mîdi ǀkha a ǀgui: “Îts ti mîde ǁîna mîba, ǁnâun kas ǁnâu taman ga is ǁnâun kas hoasa.” (Ese. 2:7; Jes. 43:10) Nau khoen ga sida ǃgâ tama ga ra i xaweb ge Jehovaba sida ǁgūtsâde ra ǃgôaǃgâ. (Khomai re Hebreǁîn 6:10.) ǀGui aoǁnâ-aob ge nēs xa kaise ǃgâise ge tanisen. ǁÎb ge ǁîb aoǁnâ sîsenni xa ge xoa: “Sige ge ǂgā, ǂnâ tsî ge ǀgore îb Jehovaba kaikai.”​—1Kor. 3:6.

15. ǂGui khoena mati māxasiba ǃoa ra tanisen xawe ǁîn tanisen ǀgauba sida nî tsâǀkhā?

¹⁵ Jesub ge ra ǂhâba î da ǃgâiaǂgao māxasiba xu. ǂGui khoen ge māxasib xa a ǃgâibahe. “Mā, o du ge nîra māhe” dib ge ge ǂkhâǃnâ. “ǃGâi, tsî ǁgâiǂgāhe tsî ǀhōǂgāhe tsî ǂnâǂam ra ǀguiroba du ge tîǂams âdu ǃnâ nîra māhe; ǀguiro-ū du ra ǀguirob ǁkhāb ǀkha du ǁkhawa nîra ǀguirohe xui-ao.” (Luk. 6:38) Hoa khoe taman ge hîna sida māxasiba nî ūǃoa na xawen ga ra ūǃoa o, os ge nēsa ǂgui khoena a ǂgae ǁkhā. ǁNā-amaga da ge khoen ga gangansa ǁgau tama ga ra i xawe  nî mā. ǂAn da ge nî ǂkharirose mās tsîn ge ǃgâiba a ūhâ ǁkhā.

16. Tae-e sida māxasiba nî ǂkhâǃnâ?

¹⁶ Māxa khoen ge xū-en nî hō amaga ǀgui mā tama hâ. Jesub ge nēsa ǂâis ǃnâ ge ū hâ i mîb ge o: “Xawe ǂûǀhaosats ga dīo, ǁkhau ǁnâi re ǀgâsan, tsî ǃhom hân, tsî ǃhoran, tsî ǂgīn tsîna, ots ge nî ǃgâiǃō, mādawa-am tsin nî xū-en ūhâ tama amaga; xawets kom nîra dīdawa-amheo ǂhanu-ain di khâis ǃnâ.” (Luk. 14:13, 14) “Māxa khoe-i ge nî ǀkhae-e” dib ge ǀgui xoa-aoba ge mî. ǀNî hâ i ge ge xoa: “ǃGâiǃōb ge ǁnā khoeb, ǀgâsa-i xa ra ǂâiba.” (ǂKhm. 22:9; Psa. 41:1) Nau khoena huis ge kaise ǃgâise ra tsâ kai da.

17. Mâ ǀgaub mās diba nî ǂkhî kai da?

¹⁷ “Mās ge ūs ǃgâ-ai a ǃgâi” di hâ mîdi Jesub dideb ge ǁgae o, ob ge Pauluba gere ǂâibasen ū da hâ xūn ǀguina da ge ǀgoragu tide xawe nî ǂkhâǃnâgu, daoǁgaugu tsî ǂhâsib ǃnâ hâna nî hui. (ǃNǃkh. 20:31-35) Mîs tsî aiǁgaus tsîn ǃnâ-ūb ge apostel Pauluba ge ǁkhāǁkhā î da sida ǁaeb, ǀgaib, ǁkhāsib tsî ǀnammi tsîn ǃnâ māsen.

18. ǂGui xoa-aona tae-e mās xa ra mî?

¹⁸ Ôaǃnâ-aon kurusǂans din ge ra ǃgaoǃgâ mās ge khoena ra ǃgâiaǂgao kai di. ǀGui ǁkhāǁkhāǃâs ǃoagu î ge “khoena nau khoe-e î ga xū-e ga ra dība o, o ra ǃgâiaǂgao.” Ôaǃnâ-aon ge ra mî “kaise î ge ǂhâǂhâsa ûib ǃnâ ǂâibasensa ǂansa” nēs ge “khoesi ǂhâsiga ra dīǀoaǀoa.” ǁNā-amaga î ge ǂansa ūhâ khoena ra mî în khoena matare-e tamase ra dīhe sîsen-e dī, nēs ge ǂurusib tsî ǃgâiaǂgaob tsîn ǃgao a ǃgâi. Nēs ge khoen hîna Elobmîsa Jehovaba xu ra hā mîs ase ra ūǃoana buru kai tama hâ.​—2Tim. 3:16, 17.

19, 20. Mâ ǃaromade da ūhâ māxasib xa?

¹⁹ Kaise î ge a ǃgom māxasiba aiǃgû kaisa, khoen hîna ǁîn ǃgâiba ǂgurose ra mâin ǀkha da ǀgui ǃhūbaib ai ǁan hâ amaga. Jesub ge ge mî ǀgam ǂhâǂhâsa mîmâi ra ge hâ, Jehovaba da ge nî ǀnam sida ǂgaob, ǀoms, ǁnâuǃāb tsî ǀgaib hoab ǀkha tsî sida ǀgūkhoena sida khami nî ǀnam di. (Mrk. 12:28-31) Nē ǁkhāǁkhāǃâs ǃnâ da go mû khami da ge Jehovaba da ga ra ǀnam o, o ǁîba nî ǁgae. Jehovab tsî Jesub tsîkha ge nau khoena ra mā. Tsî ra ǂhâba î da sida tsîna ǁkhā xū-e dī nēs nî ǃgâiaǂgao kai da amaga. Nē ǀgauba ūhâsa da ga ra ǁgūtsâ o, o da ge Elob tsî ǀgūkhoen tsîna nî ǃgôaǃgâ tsî sida tsîna ǃgâiba nî hō.

²⁰ Hoa da ge ǀnai ra ǁgūtsâ nau khoen ǃaroma māsensa ǂhâǂhâsase sida ǃgâsana. (Gal. 6: 10) Nēsa da ga ra dī ǀgara o, o da ge nau khoen xa nî ǀnam-e tsî ǃgôaǃgâ-e tsî ǁnās ǀkha nî ǃgâiaǂgao. ǂKhoamîdi 11:25 ge ra mî: “ǀKhae ra ǀoms ge nîra kau, tsî ǁnāb, hîa ra āsikhanukhanub, ǁîb ǂûb ge ǁkhāti nîra āsihe.” Ama as ge māsenxasib, khoexaǃnâsib tsî mās tsîn ge ǂgui ǀgaugu ǃnâ a ǁgau-e ǁkhā, sida Xristeǁî ûib tsî aoǁnâ sîsenni ǃnâs tsîna. ǃGoaxa ǁkhāǁkhāǃâs ge nē ǀgaugu xa nî ǃhoa.