1. ¿Kenijkatsa tijmatij Jehová temaka kuajkuali tlamantli?

JEHOVÁ itstoya iselti kema pejki kichijchiua nochi tlen onka. Ya amo kema moiljuik san ipan ya, yeka kinmakak nemilistli nochi katli nama itstokej iluikak uan maseualmej. Ya eli nopa toTeotsij katli nochipa tlauel yolpaktok, uan kipaktia temakas kuajkuali tlamantli (1 Tim. 1:11; Sant. 1:17). Uan pampa kineki tojuantij nojkia ma tiyolpakikaj, technextilia moneki titemakasej tlen tijpiaj (Rom. 1:20).

2, 3. 1) ¿Kenke tiyolpakij kema titemakaj tlen tijpiaj? 2) ¿Tlake tikixtomasej ipan ni tlamachtili?

² ToTeotsij kinchijchijki maseualmej kej itlachialis (Gén. 1:27). Nopa kiijtosneki uelis tijnextisej kuajkuali tlamantli kej ya pampa kiampa techchijchijki. Yeka, tlaj tijnekij tiyolpakisej uan kuali tijyolmatisej, moneki tijchiuasej kej ya uan tijnextisej techtekipachoua tlen kinpano sekinok uan tikinmakasej tlen tijpiaj (Filip. 2:3, 4; Sant. 1:5). ¿Kenke moneki tijchiuasej nopa? Pampa kiampa techchijchijki toTeotsij. Maske titlajtlakolejkej, uelis titemakasej tlen tijpiaj kej ya kichiua.

³ Biblia techmachtia moneki titemakasej tlen tijpiaj ika nochi  toyolo. Ipan ni tlamachtili tikitasej se keski tlamantli tlen techiljuia toTeotsij iTlajtol. Tikitasej kenijkatsa kema titemakaj tlen tijpiaj, toTeotsij kuali techita uan kuali tijchiuaj nopa tekitl tlen techmakatok. Uan tikitasej kenijkatsa ni kuali tlamantli techpaleuia ma tiyolpakikaj, uan kenke moneki nochipa titemakatosej tlen tijpiaj.

4, 5. ¿Kenijkatsa Jehová uan Jesús technextilijtokej ma titemakakaj tlen tijpiaj?

⁴ Jehová kineki nochi maseualmej ma kichiuakaj kej ya, yeka tlauel yolpaki kema kiita titemakaj tlen tijpiaj (Efes. 5:1). Ya kineki ma tiyolpakikaj. Uan tijmatij ni kema tikitaj kenijkatsa kuali techchijchijtok tojuantij uan nochi tlamantli yejyektsitsij tlen onka (Sal. 104:24; 139:13-16). Uajka, kema tijchiuaj kampeka tikinpaleuisej sekinok ma yolpakikaj, tijueyichiuaj Jehová.

⁵ Katli melauak tielij Cristo itokilijkauaj tijchiuaj kej Jesús, katli kuali kinextik kenijkatsa uelis titemakasej tlen tijpiaj. Ya kiijtok: “Axniualajtok para nikinnauatis tlakamej ma nechtekipanokaj. ¡Axtle! Niualajtok para nikintekipanos tlakamej, uan para nimotemaktilis uan nimikis para nitlaxtlauas tlen moneki para nikintojtomas miak tlakamej para uelis yasej majkajtokej” (Mat. 20:28). Yeka, apóstol Pablo kiniljuik toikniuaj: “Ximoyoliljuikaj keja Cristo Jesús moiljuia: Moiljuik achi kuali kikauas nochi tlen eliyaya iaxka, uan uajka mochijki keja se tlen axkipixki niyon kentsi tlanauatili [...] keja se tlatekipanojketl” (Filip. 2:5, 7). Yeka, kualtiaskia ma timotlajtlanikaj ni: “¿Uelis nojua kuali nijchiuas kej Jesús?” (xijpoua 1 Pedro 2:21).

6. ¿Tlake techmachtia Jesús ika nopa tlapoualistli tlen se samariaejketl? (Xikita nopa achtoui tlaixkopinkayotl).

⁶ Jehová uelis kuali techitas tlaj tijchiuaj kej ya uan iKone kichiuaj. Yeka moneki techtekipachos tlen kinpano sekinok uan tikitasej kenijkatsa uelis tikinpaleuisej ipan tlen ueli tlamantli. Ipan nopa tlapoualistli kampa kiijtok tlen se kuali tlakatl samariaejketl, Jesús kinextik kineki itokilijkauaj nochipa ma tijchiuakaj tlen moneki uan ma tikinpaleuikaj nochi maseualmej maske amo elij sanse kej tojuantij (xijpoua Lucas 10:29-37). Jesús kiijtok ni tlapoualistli kema se judío kitlajtlanik: “¿Ajkeya inijuantij ne sekinok tlen moneki nikiniknelis keja nimoiknelia?”. Tlen kinankilik kinextia moneki tijnekisej ika nochi toyolo titemakasej tlen tijpiaj kej kichijki nopa samariaejketl uan kiampa toTeotsij kuali techitas.

7. ¿Kenke tlen Satanás kiijtok ipan Edén kichiua ma tijnekikaj titemakasej tlen tijpiaj?

⁷ Cristo itokilijkauaj tijmatij onka miak tlamantli tlen kichiua ma tijnekikaj titemakasej tlen tijpiaj. Tlen Satanás kiijtok ipan Edén eli se tlen nopa tlamantli. ¿Kenke tlen kiijtok kichiua ma tijnekikaj titemakasej tlen tijpiaj? Satanás kiijtok Adán uan Eva, uan nojkia nochi ikoneuaj, kuali itstoskiaj tlaj mosentlaliskiaj san ipan tlen inijuantij kinekij uan amo kineltokaskiaj toTeotsij. Adán uan Eva san mosentlalijkej ipan inijuantij. Eva kinejki elis kej toTeotsij, uan iueue kinejki kiyolpakiltis isiua uan amo Jehová (Gén. 3:4-6). Tlen panotok kinextia kema timosentlaliaj san ipan tojuantij amo kichiua ma tiyolpakikaj, san kichiua ma titlaijiyouikaj. Tlaj titemakaj tlen tijpiaj ika nochi toyolo, tijnextiaj tijmatij kuali tiitstosej tlaj tijchiuasej kej Jehová kineki.

8. ¿Kenke Adán uan Eva kinamikiyaya moiljuijtoskiaj ipan sekinok?

⁸ Maske Adán uan Eva itstoyaj ininselti ipan Edén, tlen Jehová kinnauatik  kinamikiyaya kichiuas ma moiljuikaj ipan sekinok. Jehová kinteochijki uan kiniljuik ma momiakilikaj, ma kitemitikaj Tlaltipaktli uan ma kimokuitlauikaj (Gén. 1:28). Kej toTeotsij kitekipachoua nochi tlen kichijchijtok, inijuantij kinamikiyaya moiljuijtoskiaj kenijkatsa itstosej ininkoneuaj. Monekiyaya kiueyilisej nopa xochimili ipan nochi Tlaltipaktli uan kiampa nochi ueliskiaj itstosej nopaya. Ni tekitl ueliskia mochiuas tlaj nochi mopaleuiskiaj.

9. ¿Kenke maseualmej tlauel yolpaktoskiaj tlaj kiueyilijtoskiaj Xochimili?

⁹ Tlaj kinekiyayaj kiueyilisej nopa Xochimili, maseualmej katli xitlauakej monekiyaya kichiuasej nochi kej toTeotsij kinekiyaya, kiampa ueltoskiaj ‘mosiajkauasej iuaya toTeko’ (Heb. 4:11). Nelia tlauel yolpaktoskiaj tlaj kiampa kichijtoskiaj. Uan Jehová tlauel kinteochijtoskia pampa temakatoskiaj ika nochi ininyolo tlen kipixtoskiaj uan pampa kinextijtoskiaj kintekipachoua sekinok.

10, 11. ¿Tlake techpaleuis ma titlajtolmoyauakaj uan ma tikinpaleuikaj sekinok ma elikaj Jesús itokilijkauaj?

¹⁰ Ipan ni tonali, Jehová kinmakatok se tekitl nochi itekipanojkauaj: kineki ma tlajtolmoyauakaj uan ma kinpaleuikaj maseualmej ma elikaj Jesús itokilijkauaj. Tlaj tijnekij tijchiuasej nopa tekitl, moneki tijnekisej ika nochi toyolo tikinpaleuisej sekinok. Uelis tijchiuasej nopa tlaj nelia tikikneliaj Jehová uan tikinikneliaj maseualmej.

¹¹ Uejkajkia, Pablo kiijtok ya uan sekinok Cristo itokilijkauaj “sansejko [tekitiyayaj] iuaya toTeko” pampa kejuak kitokayayaj uan kiatekiyayaj nopa kuali tlamachtili tlen kimoyauayayaj (1 Cor. 3:6, 9). Tojuantij nojkia “sansejko titekitij iuaya toTeko” kema titemakaj ika nochi toyolo tlen tijpiaj, kej tonali, totomij uan tochikaualis. Tijchiuaj ni pampa tijnekij tijchiuasej nopa tekitl tlen toTeotsij techmakatok. ¡Nelia eli se ueyi tlateochiualistli!

12, 13. Xikijto tlake tlateochiualistli tijseliaj kema tikinmachtiaj sekinok.

¹² Tlauel tiyolpakij kema ika nochi toyolo titemakaj totonal uan tochikaualis ipan tlajtolmoyaualistli. Miakej toikniuaj katli kinmachtijtokej sekinok maseualmej kiijtouaj nelia tlauel yolpakij kema kichiuaj nopa tekitl. Tlauel kinpaktia kiitasej kenijkatsa maseualmej kuali kiyolmatij pampa kikuamachiliaj tlen Biblia tlamachtia, kenijkatsa peuaj kuali tlaneltokaj, kenijkatsa kipatlaj miak tlamantli ipan ininnemilis uan kenijkatsa peuaj kiniljuiaj sekinok tlen kiyekouaj. Jesús tlauel yolpajki kema nopa 70 itokilijkauaj katli kintitlanki ma tlajtolmoyauatij “mokuepkej ika pakilistli” (Luc. 10:17-21).

¹³ Ipan nochi Tlaltipaktli, tlajtolmoyauanij tlauel yolpakij kema kiitaj nopa kuali tlamachtili tlen toTeotsij iTlanauatijkayo kinpaleuia maseualmej. Ma timoiljuikaj  ipan Anna, * se ichpokatl katli yajki kampa monekiyayaj tlajtolmoyauanij ipan Europa oriental. Ya kiijtoua: “Tlauel niyolpaki kema nikita miakej maseualmej kinekij ma tikinmachtikaj ika Biblia. Tlauel kuali nijyolmati kema nitlajtolmoyaua. Kema niasi nochaj, amo ueli nimoiljuia ipan tlen na nechpano, pampa nimosentlalia ipan maseualmej katli ninkinmachtia, ipan tlamantli tlen kinkuesoua uan kintekipachoua. Nijtemolia kenijkatsa nikinyolchikauas uan nikinpaleuis. Temachtli nijmati ‘más pakilistli kiselia tlen temaka se tlenijki, uan axkeja tlen kiselia’” (Hech. 20:35).

14. ¿Kenke uelis tiyolpakisej kema titlajtolmoyauaj maske maseualmej amo techtlakakiliaj?

¹⁴ Maske maseualmej amo techtlakakiliaj, tojuantij tiyolpakij pampa tijmatij tijnekij tikinpaleuisej ma kimatikaj tlen Biblia tlamachtia. Tlen tijchiuaj eli sanse kej nopa tekitl tlen kimakakej tlajtolpanextijketl Ezequiel. Jehová kiiljuik: “Moneki tikiniljuis notlajtol nochi nopa tlakamej yonke kitlakakilisej o axtle” (Ezeq. 2:7; Is. 43:10). Uan maske maseualmej amo kipatiitaj tlen tikinmatiltiaj, toTeotsij kena kipatiita nochi tlen tijchiuaj (xijpoua Hebreos 6:10). Se tlajtolmoyajketl kiijtok: “Kejuak titoktokej, tikatekijtokej uan timomaijtojtokej pampa tijnekij Jehová ma kinpaleui kuali ma tlaneltokakaj” (1 Cor. 3:6).

15. ¿Kenijkatsa kiitaj miakej kema titemakaj tlen tijpiaj, uan tlake techyololinia ma tijchiuakaj?

¹⁵ Jesús kineki ma tiyolpakikaj uan yeka techiljuik: “Xitemakakaj uan inkiselisej. Kena, toTeko inmechmakas miak intla intemakaj miak. Yajaya kichiuas keja se kuali tlanamakaketl tlen kitemas se tlayejyekoli sintli, uan kuali kiayakachos, uan más kitemas hasta motsontis. Moneki inmojuantij no xikinmakakaj sekinok tlen kuali tlayejyekoli, pampa sekinok inmechchiuilisej keja inkinchiuiliaj” (Luc. 6:38). Maske miakej maseualmej kinpaktia kema sekinok kinmakaj tlen kipiaj, amo nochi kinpaktia. Uan katli kitlaskamatij uelis kinyololinis nojkia ma temakakaj tlen kipiaj uan kiampa kinpaleuisej sekinok nojkia ma kichiuakaj nopa. Yeka, maske timoiljuiaj maseualmej amo kipatiitaj, moneki nojua titemakasej tlen tijpiaj ika  nochi toyolo, pampa amo tijmatij kenijkatsa kinpaleuis sekinok tlen tijchiuaj.

16. ¿Ajkia kinamiki tijmakasej tlen tijpiaj, uan kenke?

¹⁶ Katli temaka tlen kipia amo moiljuia nojkia kimakasej se tlenijki. Jesús kimajtoya ni, yeka kiijtok: “Kema tijpia se tlakualistli, xikinnotsa tlen tekneltsitsij uan tlen makototikej uan tlen metskuachotikej uan tlen popoyotsitsij, pampa inijuantij axuelis mitskuepilisej” (Luc. 14:13, 14). Biblia kiijtoua “toTeko kiteochiuas” uan tlauel yolpaki katli “kiniknelia tlen tekneltsitsij” (Prov. 22:9; Sal. 41:1). Uajka, titemakaj tlen tijpiaj pampa tlauel tiyolpakij kema kiampa tijchiuaj.

17. ¿Tlake uelis titemakasej tlaj tijnekij tiyolpakisej?

¹⁷ Kema Pablo kiompauik tlen Jesús kiijtojtoya: “Más pakilistli kiselia tlen temaka se tlenijki, uan axkeja tlen kiselia”, ya amo kinekiyaya kiijtos moneki san tikinmakasej tlamantli tlen uelis kitekiuisej sekinok, nojkia kinekiyaya kiijtos moneki tikinyolchikauasej, tikinyakanasej uan tikinpaleuisej (Hech. 20:31-35). Ika tlen kiijtok uan ika tlen kichijki, Pablo kuali technextilik kenijkatsa uelis titemakasej tlen tijpiaj, kej tonali, tochikaualis uan kema kuali tikintlakakiliaj sekinok uan tikinikneliaj.

18. ¿Tlake kiijtouaj miakej ixtlamatinij?

¹⁸ Nopa sociólogos kiitstokej kema titemakaj tlen tijpiaj kichiua ma tiyolpakikaj. Kej kiijtoua tlen kiijkuilojkej, “maseualmej kiijtouaj tlauel yolpakij kema kichiuaj se keski tlamantli tlen kinpaleuia sekinok”. Sekinok ixtlamatinij kiijtouaj kema tikinpaleuiaj maseualmej techpaleuia kuali ma tijyolmatikaj pampa tijmatij ika tlen tijchiuaj kinpaleuia sekinok. Sekij ixtlamatinij kiniljuiaj sekinok ma kinpaleuikaj maseualmej pampa nopa kichiuas kuali ma itstokaj uan ma yolpakikaj. Tojuantij ipa tijmajtokej ni, pampa temachtli tijmatij Biblia nelia eli iTlajtol Jehová (2 Tim. 3:16, 17).

19, 20. ¿Tlake techyololinia titemakasej tlen tijpiaj?

¹⁹ Uelis kemantika tijmatij ouij titemakasej tlen tijpiaj pampa maseualmej amo kiampa kichiuaj uan san mosentlaliaj ipan inijuantij. Maske kiampa pano, Jesús kiijtok ome tlanauatili tlen tlauel ipati: moneki tikiknelisej Jehová ika nochi toyolo, tonemilis, totlalnamikilis uan tochikaualis, uan nojkia tikiniknelisej maseualmej kej tojuantij timoikneliaj (Mar. 12:28-31). Kej tikitstokej ipan ni tlamachtili, katli kiikneliaj toTeotsij kinekij kichiuasej kej ya kichiua. Ya uan iKone temakaj tlen kipiaj, uan omej techiljuiaj nojkia kiampa ma tijchiuakaj pampa techpaleuis tlauel ma tiyolpakikaj. Tlauel tijueyichiuasej Jehová tlaj tijchiuasej kampeka tikinmakasej toTeotsij uan maseualmej tlen tijpiaj, uan nojkia techpaleuis tojuantij uan sekinok.

²⁰ Uelis tijchijtokej kampeka tikinpaleuisej maseualmej, uan uelis tlauel tijnekij tikinpaleuisej toikniuaj (Gál. 6:10). Tlaj amo tijkuesijkaitaj tijchijtosej ni tlamantli, sekinok techtlaskamatilisej uan tlauel techiknelisej, uan tojuantij nojua tlauel tiyolpaktosej. Proverbios 11:25 kiijtoua: “Se tlakatl tlen ueyi iyolo uan tlen kinmaka sekinok miak tlamantli tlen kipia, teipa achi más moricojchiuas. Uan aki kinpaleuia sekinok, toTeko kiteochiuas uan kipias nochi tlen moneki”. Ipan tonemilis uan ipan tlajtolmoyaualistli uelis tijnextisej ika miak tlamantli nelia titemakaj tlen tijpiaj, tijnextisej kuali toyolo uan tijnekisej tikinpaleuisej sekinok maske tojuantij amo tleno tijselisej. Ipan seyok tlamachtili tikitasej ipan tlake tlamantli uelis tijnextisej ni.