1. ¿Toni kinextia ke Jiova kualtakat?

JIOVA iselti moajsia keman peuak tachijchiua. Sayoj ke kiixtalij kinmakas nemilis miakej akin kipiaj tamatilis itech iluikak uan itech taltikpak. Yejuatsin se Dios akin yolpaki, uan kiuelita kitemakas tein kuali (1 Tim. 1:11; Sant. 1:17). Uan kemej kineki maj no tiyolpakikan, techmachtia maj tikualtakamej (Rom. 1:20).

2, 3. 1) ¿Keyej tiyolpakij keman tikualtakamej? 2) ¿Toni tikitaskej itech nejin tamachtilis?

² Dios kinchijchiuak taltikpakneminij kemej yejuatsin tamati (Gén. 1:27). Nejin kijtosneki ke techchijchiuak kemej uelis tiknextiskej ikualneskayouan. Yejua ika, komo tiknekij tiyolpakiskej uan tikpiaskej itatiochiualis, moneki tikchiuaskej kemej yejuatsin. Moneki ininka timotekipachoskej oksekin uan tiktemakaskej tein tikpiaj (Filip. 2:3, 4; Sant. 1:5). ¿Keyej? Porin Dios ijkon techchijchiuak. Maski titajtakouanij, uelis tiktemakaskej tein tikpiaj kemej yejuatsin.

³ Biblia techmachtia maj tikualtakamej. Itech nejin tamachtilis, tikitaskej seki taman tein kijtoua iTajtol Dios. Tikitaskej  ke komo tikualtakamej techpaleuia maj tikpiakan itatiochiualis Jiova, uan no maj tikchiuakan tekit tein techmakak. No tikitaskej keyej tiyolpakij keman tikualtakamej, uan keyej moneki ijkon tiksentokaskej.

4, 5. ¿Keniuj Jiova uan Jesús kinextianij ke kualtakamej?

⁴ Jiova kineki maj tikchiuakan kemej yejuatsin, uan yejua ika yolpaki keman tikualtakamej (Efes. 5:1). Senkis nesi ke kineki maj tiyolpakikan. Kemej techchijchiuak uan nochi kualtsin taman tein kichijchiuak kinextia nejon (Sal. 104:24; 139:13-16). Yejua ika, tikueyitaliaj keman timochikauaj tikchiuaskej maj oksekin yolpakikan.

⁵ Tejuan no tikchiuaj kemej Jesús, akin senkis kinextij keniuj se taltikpaknenkej uelis yeski kualtakat. Yejua kijtoj: “Nejuatsin ni Yektagatsin amo niuala para ma aksame nechtekitilikan. Ta, niuala sayo para ma nitetekitilis, uan para ma niktemakas nonemilis [...] para nikinmakixtis nijin taltikpakuani” (Mat. 20:28). Yejua ika, tatitanil Pablo kiniluij tokniuan: “Xikpixtinemikan ne kuali tamachilis tenika Cristo Jesús tanemilijtinemia kuak [...] kisekokaua lo ke ten pouia iuan, yejua ne inemilis iuan Dios. Uan ijkon Yejuatsin mochiuako keme se tekitike” (Filip. 2:5, 7). Yejua ika moneki timotajtaniskej: “¿Uelis okachi nikchiuas kemej Jesús?” (xikonixtajtolti 1 Pedro 2:21).

6. ¿Toni techmachtij Jesús keman ika tajtoj samaritano? (Xikonita taixkopin ipeujyan tamachtilis.)

⁶ Uelis tikpiaskej itatiochiualis Jiova komo tiktojtokaj tel kuali neskayot tein techkauilianij yejuatsin uan iKonetsin. Yejua ika, moneki ininka timotekipachoskej oksekin uan tiktemoskej keniuj tikinpaleuiskej. Keman Jesús ika tajtoj samaritano akin yolkuali, senkis kinextij ke kichia maj tiitatojtokakauan tikinpaleuikan oksekin, maski taman kemej moskaltijkej oso okseko kayomej (xikonixtajtolti Lucas 10:29-37). Maj tikelnamikikan ke Jesús kitetapouij nejin porin se judío kitajtanij: “¿Akoni [...] moneki niktasojtas?”. Tein kinankilij kinextia ke moneki tiyeskij tikualtakamej kemej nejon samaritano komo tiknekij tikpiaskej itatiochiualis Dios.

7. ¿Keniuj tiknextiaj ke tikneltokaj ke kemej Jiova kichiua teisa yejua tein okachi kuali? Xikonmelaua.

⁷ Okse taman tein kinextia keyej moneki tiyeskij tikualtakamej yejua tein panok itech xochital tein moajsia Edén. Satanás kijtoj ke Adán uan Eva ueliskiaj okachi yolpakiskej komo amo kitakamatiaj Jiova uan kitayekanaltiayaj inintanejnekilis. Adán uan Eva sayoj inintech tanemilijkej. Eva kinekik mochiuas kemej Dios, uan Adán okachi kinekik kiyolpaktis inamik uan amo Jiova (Gén. 3:4-6). Nejon kiualkuik tein amo kuali. Senkis nesi ke amo akin uelis yolpakis komo kitayekanaltia itanejnekilis. Sayoj ke komo tikualtakamej, tiknextiaj ke tikneltokaj ke tein Dios techtajtania maj tikchiuakan yejua tein okachi kuali.

8. ¿Keyej Adán uan Eva monekia inintech tanemiliskej oksekin?

⁸ Maski Adán uan Eva ininselti yetoyaj itech xochital tein moajsia Edén, monekia inintech tanemiliskej oksekin. ¿Keyej? Jiova kinmakaka se tekit. Kiniluij maj kinpianij konemej uan  maj momoyauanij itech nochi taltikpak uan maj kipatauanij xochital (Gén. 1:28). Ijkon kemej Jiova kinekia maj nochin itech taltikpak yolpakinij, Adán uan Eva monekia no kinekiskej maj ininkoneuan yolpakinij. Monekia kichiuaskej nochi taltikpak se xochital kampa nochin yolpakiskiaj. Itech nejon ueyi tekit nochin monekia tapaleuiskej.

9. ¿Keyej taltikpakneminij kinyolpaktiskia kipatauaskej xochital?

⁹ Taltikpakneminij akin amo kipiaskiaj tajtakol monekiskia sentekitiskej iuan Jiova uan ijkon kichiuaskej taltikpak se xochital uan kichiuaskej itanejnekilis. Sayoj ueli tiknemiliaj keniuj tel yolpakiskiaj. Uan no, Jiova semi kintatiochiuiskia porin kualtakamej uan ininka motekipachouayaj oksekin.

10, 11. ¿Toni techpaleuis maj titanojnotsakan uan maj tikinpaleuikan oksekin maj mochiuakan itekitikauan Dios?

¹⁰ Axkan, Jiova techmakatok se tekit: titanojnotsaskej uan tikinpaleuiskej oksekin maj mochiuakan itekitikauan. Uelis tikchiuaskej nejon komo yekmelauj ininka timotekipachouaj oksekin. Uan uelis tiksentokaskej tikchiujtoskej sayoj komo techolinia netasojtalis tein tikpialiaj Jiova uan oksekin.

¹¹ Pablo kijtoj ke yejua uan okseki tokniuan iuan tekitiaj Dios porin tanojnotsayaj uan kinmachtiayaj taltikpakneminij tein melauak (1 Cor. 3:6, 9). Axkan, tejuan no uelis titekitiskej iuan Dios. ¿Keniuj? Komo tiktemakaj totonaluan, tein tikpiaj uan tochikaualis itech tekit tein Dios techmakatok. ¡Se tel ueyi tatiochiualis!

12, 13. ¿Toni tatiochiualismej tikonijtoskia ke se kiselia keman se tanojnotsa?

¹² Semi techyolpaktia keman tikuij totonaluan uan tochikaualis keman titanojnotsaj uan titamachtiaj. Yejua nejon tein kijtouaj miakej tokniuan akin uelinij tamachtianij ika Biblia. Semi techyolpaktia tikitaskej keniuj yolpakij akin tikinmachtiaj keman kiajsikamatij tein yekmelauj tamachtia Biblia, keman mochikaua inintakuaujtamatilis, keman kipataj kemej monejnemiltiaj uan keman peuaj kintapouiaj oksekin tein momachtijtokej. Jesús semi yolpakik keman 70 imomachtijkauan akin kintitanka maj tanojnotsatij mokepkej “ika ueyi pakilis” porin kinpanok tein kuali (Luc. 10:17-21).

¹³ Semanauak taltikpak, tokniuan yolpakij keman kiitaj keniuj tein Biblia tamachtia kinpaleuia taltikpakneminij. Kemej neskayot, Anna, * se ichpoch akin iselti uan mokaltalito itech se altepet ompa Europa kampa monekij okachi tanojnotsanij, kijtoua: “Nikteluelita maj tel miakej kinekikan momachtiskej Biblia.  Semi nechyolpaktia nitanojnotsas. Keman niejko kalijtik, amo nikemanti notech nitanemilis. Okachi inintech nitanemilia akin nikinmachtia, ininkuejmoluan uan tein kintekipachoua. Niktemoua keniuj nikinyolchikauas uan nikinpaleuis. Nikyekmati ke ‘kachi yolpaktok in tagat ten tapaleuijtinemi ika ten niaxka uan ke ne tagat ten sayo kiselia tapaleuilis’” (Hech. 20:35).

14. ¿Keniuj uelis techyolpaktis tanojnotsalis maski sekin amo techkakiskej?

¹⁴ Maski taltikpakneminij amo techkakiskej, tiyolpakij porin titapaleuiaj maj ueli kikakikan kuali tanauatilmej. Tein melauj, Jiova kichia maj tikchiuakan tein kinauatij Ezequiel: “Moneki tikiniluis notajtoluan, yeski kikakiskej oso amo” (Ezeq. 2:7; Is. 43:10). Hasta komo amo techyeknankiliaj, Dios kipatiuita tein timochikauaj tikchiuaskej (xikonixtajtolti Hebreos 6:10). Se tokniuj takat kijtoj: “Titatokanij, titaatekianij, uan tikchiuanij netataujtil porin tikchiaj maj Jiova kichiua maj okachi kinekikan kimatiskej” (1 Cor. 3:6).

15. ¿Moneki tiyeskij tikualtakamej sayoj komo taltikpakneminij motasojkamatij? Xikonmelaua.

¹⁵ Jesús kineki maj tiyolpakikan uan yejua ika technauatij: “Xitetayokolijtinemikan aken yeski iuan para ma Totajtsin Dios no namechtayokolis ten namejuan nankimonekiltiske. Uan [...] namechtayokoliti uel miak ijkon keme kuak se kiyekpexonti in chikiuit ika tensa uan se kinpanteltalia uan se kitsejtseloa hasta pipixauiki. [...] Ne tamachiu de teiknelilis ten namejuan nankikuitinemij ya para nankintayokoliske oksekin, yejua ne Totajtsin Dios kikuis para namechtayokolijtiyas” (Luc. 6:38). Keman tikualtakamej, amo nochin motasojkamatij. Sayoj ke maski amo motasojkamatiskej, maj tiksentokakan tikualtakamej. Amo tikmatij keniuj semi tapaleuis komo tikualtakamej.

16. ¿Iniuan akonimej moneki tiyeskij tikualtakamej, uan keyej?

¹⁶ Akin yekmelauj kualtakat amo kichia maj no kimakakan teisa. Jesús  kijtoj: “Kuak tiknekis tikintatamakas aksame, ijkuakon xikinnotsa nekes ten amo teyi kipiaj uan nekes ten makotoltijke. Uan no xikinnotsa nekes ten koxojme uan ixpojpoyome. Uan [...] Dios mitsmaktilis yolpakilis porin yejuan amo ueliske mitsnotsaske no xitatakuaki tech ninchan” (Luc. 14:13, 14). Biblia kijtoua ke akin kualtakat kitatiochiuiskej uan ke “yolpaki akin kinextia ke kiajsikamati akin amo kuali moajsi” (Sal. 41:1; Prov. 22:9). Moneki tiyeskij tikualtakamej porin yekmelauj tiknekij tikinpaleuiskej oksekin.

17. ¿Toni uelis tiktemakaskej tein techpaleuis maj tiyolpakikan?

¹⁷ Keman Pablo no kijtoj tein Jesús kijtojka ke “kachi yolpaktok in tagat ten tapaleuijtinemi ika ten niaxka uan ke ne tagat ten sayo kiselia tapaleuilis”, amo sayoj ika tajtojtoya keman tiktemakaj seki taman tein kipia ipatiuj, ta no keman tikyolchikauaj aksa, keman tikyolmajxitiaj ika Biblia uan keman tikpaleuiaj (Hech. 20:31-35). Pablo techmachtij ika tein kijtoj uan ika tein kichiuak ke moneki tiktemakaskej totonaluan, tochikaualis, tonepaleuil uan tonetasojtalis.

18. ¿Toni kijtouanij miakej tatemouanij uan tamatinij?

¹⁸ Akin momachtiaj keniuj monejnemiltiaj taltikpakneminij no kiitanij ke tiktemakaskej tein tikpiaj kichiua maj tiyolpakikan. Itech se amaix moijtoj ke taltikpakneminij kijtouaj ke okachi yolpakij keman kichiuaj seki taman tein kuali ininka oksekin. Tatemouanij kijtouaj ke keman tikinpaleuiaj oksekin, kuali timomachiliaj uan tiyolpakij. Yejua ika, seki tamatinij kinyolmajxitiaj taltikpakneminij maj kichiuakan seki tekimej kampa amo kintaxtauiskej uan nejon kinpaleuis maj amo semi kokolispeuakan uan maj yolpakikan. Nejin amo tikmoujkaitaj porin toTachijchiujkauj akin techtasojta, Jiova, nochipa kijtoua ke tiyeskij tikualtakamej kichiua maj tiyolpakikan (2 Tim. 3:16, 17).

19, 20. ¿Keyej moneki tiyeskij tikualtakamej?

¹⁹ Keman taltikpakneminij akin techyoualouaj sayoj inintech tanemiliaj, uelis kichiuas maj ouij techkisa tiyeskij tikualtakamej. Sayoj ke Jesús kijtoj ke ome tanauatilmej tein okachi tayekantokej yejua maj tiktasojtakan Jiova ika nochi toyolo, tonemilis, totanemilil uan tochikaualis, uan maj tikintasojtakan oksekin kemej tejuan timotasojtaj (Mar. 12:28-31). Kemej tikitakej itech nejin tamachtilis, akin kitasojtaj Dios mochikauaj kichiuaskej kemej yejuatsin. Jiova uan iKonetsin kualtakamej, uan techyolmajxitiaj maj no ijkon tikchiuakan porin techpaleuis maj yekmelauj tiyolpakikan. Komo timochikauaj tiyeskij tikualtakamej iuan Dios uan oksekin kiueyitalis Jiova uan techpaleuis tejuan uan oksekin.

²⁰ Xa timochikaujtokejya tikinpaleuiskej oksekin, okachiok tokniuan (Gál. 6:10). Komo tiksentokaj tikchiuaj, taltikpakneminij xa techtasojkamatiliskej uan techtasojtaskej, uan tiyolpakiskej. Proverbios 11:25 kijtoua: “Akin kualtakat kipias miak taman, uan akin kinyolseuia oksekin no kiyolseuiskej”. Itech tonemilis uan itech totanojnotsalis, onkak miak taman kemej uelis tiyeskij tikualtakamej uan amo tiktemoskej tikseliskej teisa. Itech okse tamachtilis tikitaskej seki taman kemej uelis tikchiuaskej.