1. ¿Tlen kiteititia Jehová kipaktia kitemakas tlen kipia?

ACHTO Jehová okatka iselti. Pero satepan okinchijchi nochtin akinmej katej iluikak uan nochtin akinmej katej tlaltikpak. ToTajtsin Dios “yolpaki” uan kipaktia kitemakas nochi tlen kuali (1 Tim. 1:11; Sant. 1:17). Uan kineki ma tiyolpakikan, ik non, techiluia ma tiktemakakan tlen tikpiaj (Rom. 1:20).

2. ¿Tleka tiyolpakiskej tla tiktemakaj tlen tikpiaj?

² ToTajtsin Dios otechchijchi ken ye tlachixtok (Gén. 1:27). Nin kijtosneki Jehová kineki ma tikteititikan iyelis. Moneki tikchiuaskej ken ye tla tiknekij tiyolpakiskej. Moneki timotekipachoskej intech oksekimej uan tikinmakaskej tlen tikpiaj (Filip. 2:3, 4; Sant. 1:5). ¿Tleka? Porque ijkon iyelis Jehová. Maski titlajtlakolejkej, uelis tikchiuaskej ken Jehová uan tiktemakaskej tlen tikpiaj.

3. ¿Tlen timomachtiskej?

 ³ Axkan tikitaskej ken techmachtia Biblia ma tiktemakakan tlen tikpiaj. Satepan timomachtiskej tleka Jehová kipaktia ma tiktemakakan tlen tikpiaj uan noijki kuali tikchiuaskej tekitl tlen yotechnauati. Noijki timomachtiskej ijkuak itlaj tiktemakaj noijki tiyolpakij. Uan nochipa ma tiktemakakan tlen tikpiaj.

4. ¿Ken kiteititia Jehová kitemaka tlen kipia?

⁴ Jehová kineki ma tikchiuakan ken ye, ik non, yolpaki ijkuak tiktemakaj tlen tikpiaj (Efes. 5:1). Noijki kineki ma tiyolpakikan. Uan ijkon mota porque kualtsin otechchijchi, kualtsin okichijchi tlaltikpak uan ijkon ma tiyolpakikan (Sal. 104:24; 139:13-16). Tiktlakaitaj Jehová tla tikchiuaj oksekimej ma yolpakikan.

5. ¿Ken okiteititi Jesús okipaktiaya kitemakas tlen okipiaya?

⁵ Noijki uelis tikchiuaskej ken Jesús porque ijkuak nikan okatka ye okiteititi okipaktiaya kitemakas tlen okipiaya. Ye okijto: “Ijkó kemi Ne Non onimochi ni tlakatl amo oniwala manechtekitilikah, yej oniwala onitekitiko iwa nimotemakas manechmiktikah iwa ijkó miakeh mamomakixtikah” (Mat. 20:28). Noijki tlatitlanil Pablo okinmilui akinmej okichiuayaj ken Cristo: “Xikpiakah nomotlayejyekolis ijkó kemi Cristo okípixki [...]. Yej okika nochi tlan okipiaya, iwa omochiwako kemi se tetlakewáli” (Filip. 2:5, 7). Ik non, ma timotlajtlanikan: “¿Uelis okachi nimochijchikauas uan nikchiuas ken Jesús?” (xiktlajtolti 1 Pedro 2:21).

6. ¿Tlen otechmachti Jesús ijkuak okijto tlen okichi samaritano? (Xikita dibujo kanin peua tlamachtil).

⁶ Jehová yolpaki ijkuak tikchiuaj ken ye uan noijki ijkuak tikchiuaj ken iKone. Ik non, moneki timotekipachoskej itech oksekimej uan moneki tikitaskej ken tikinpaleuiskej. Jesús okijto miak ipati ma tikinpaleuikan oksekimej ijkuak okijto tlen okichi samaritano (xiktlajtolti Lucas 10:29-37). Ijkuak Jesús okijto tlen okichi samaritano, okiteititi miak ipati ma tikinpaleuikan oksekimej maski amo tikinmixmatij uan maski amo tikmatij kanin uitsej. ¿Tleka Jesús okintlapoui tlen okichi samaritano? Porque se judío okitlajtlani: “¿Akin nokni?”. Tlen okijto Jesús techmachtia ma tikchiuakan ken samaritano tla tiknekij tikyolpaktiskej Jehová.

7. ¿Ken tikteititiskej okachi kuali tikchiuaskej ken Jehová technauatia?

⁷ Moneki ma tiktemakakan tlen tikpiaj porque mouika iuan tlen opanok itech Edén. ¿Tleka ijkon tikijtoaj? Porque Satanás okijto Adán uan Eva okachi kuali yolpakiskiaj tla inselti monauatiskiaj uan amo kitlakamatiskiaj toTajtsin Dios. Eva san ye itech omotekipachoaya. Ye okinekiaya yetos ken toTajtsin Dios uan Adán okachi okinekiaya kiyolpaktis isiua uan amo ye toTajtsin Dios (Gén. 3:4-6). Ik non, sapanoa otlajyouijkej. Tla tiknekij tiyolpakiskej amo san totech ma timotekipachokan. Tla tiktemakaskej tlen tikpiaj, tikteititiskej tikchiuaj ken Jehová techmachtia.

8. ¿Tleka Adán uan Eva omonekiaya motekipachoskiaj intech oksekimej?

⁸ Maski Adán uan Eva inselti okatkaj itech Edén, omonekiaya ma motekipachokan intech oksekimej. ¿Tleka? Porque Jehová okinmilui ma kinpiakan miakej inkoneuan uan ma kikuepakan tlaltikpak se xochitlali (Gén. 1:28). Xamo Adán uan Eva okinekiayaj ma yolpakikan inkoneuan ken Jehová okinekiaya. Jehová okinekiaya nochtin ikalchanejkauan Adán uan Eva ma kikuepakan tlaltikpak se xochitlali. ¡Okipiayaj miak tekitl!

9. ¿Tleka tiyolpakiskiaj ijkuak tikkuepaskiaj tlaltikpak se xochitlali?

⁹ Omonekiaya san sekan tekipanoskiaj iuan Jehová uan kikuepaskiaj tlaltikpak se xochitlali. Axkan san timokuayejyekoaj ken uelis yolpakiskiaj. Uan Jehová sapanoa kinteochiuaskia tla motekipachoskiaj itech oksekimej uan tla kitemakaskiaj tlen okipiayaj.

10, 11. ¿Ken uelis titlapaleuiskej para okachi ma motetlapoui?

¹⁰ Axkan Jehová otechnauati ma titetlapouikan uan ma titlamachtikan uan nin tlamantli sapanoa miak ipati. Tla tiknekij ijkon tikchiuaskej moneki timotekipachoskej intech oksekimej. Tikchiuaskej nin tekitl tla tiktlasojtlaj Jehová uan oksekimej.

¹¹ Tlatitlanil Pablo okijto ye uan oksekimej tokniuan okipaleuiayaj Jehová porque otetlapouiayaj uan otlamachtiayaj tlen okinekiaya toTajtsin Dios (1 Cor. 3:6, 9). Tejuan noijki uelis tikpaleuiskej Jehová. ¿Ken tikchiuaskej? Ika pakilistli ma titetlapouitij uan noijki ika pakilistli ma tiktemakakan totomin para okachi ma motetlapoui. ¡Nin melauak se tlateochiualistli!

12, 13. ¿Tlen tlateochiualistli tikseliskej tla tikinmachtiskej oksekimej?

¹² Tiyolpakij ijkuak timajxiliaj titetlapouiskej uan ijkuak titlamachtiaj. Miakej tokniuan kijtoaj melauak yolpakij ijkuak tlamachtiaj. Sapanoa yolpakij porque kitaj ijkuak ikaj kajsikamatij tlen tlamachtia Biblia, okachi peua tlaneltokaj, kipatlaj innemilis uan peua kintlapouiaj oksekimej tlen momachtiaj. Jesús sapanoa oyolpakik ijkuak 70 imachtijkauan “omokopatoh ika miak pakílistli” porque miakej okinkakej (Luc. 10:17-21).

¹³ Nochtin tokniuan yolpakij porque kitaj ken Biblia kinpatilia innemilis oksekimej.  Ma timokuayejyekokan tlen okipanok Anna, nin tokni ok iselti uan otlapaleuito Europa kanin okachi moneki. * Ye okijkuilo: “Sapanoa niyolpaki porque miakej kinekij momachtiskej Biblia. Niyolpaki ijkuak nitetlapouia. Amo nimajxilia para nimotekipachojtos. Porque nimokuayejyekoa itech akinmej nikinmachtia, tlen ouijkayotl kixnamikij uan tlen kintekipachoa. Nimomachtia para nikmatis ken nikinpaleuis. Ik non, nikmati ‘okachi yolpaki akin itlaj kitemaka uan amo ijkuak itlaj kiselia’” (Hech. 20:35).

14. ¿Ken tiyolpakiskej maski oksekimej amo kinekij techkakiskej?

¹⁴ Tiyolpakij ijkuak tikintlapouiaj oksekimej kuali tlajtolmej maski amo kinekij techkakiskej. Tikchijtokej se tekitl ken profeta Ezequiel okichi. Jehová okilui: “Xikinmilui tlen nimitsiluijtok maski mitskakiskej noso amo” (Ezeq. 2:7; Is. 43:10). ToTajtsin Dios kipatioita timochijchikauaj titetlapouiaj maski oksekimej amo kipatioitaj (xiktlajtolti Hebreos 6:10). Se tokni okijto: “Yotikintlapouijkej uan tiktlatlaujtiaj Jehová ma kinpaleui okachi ma kinekikan ma momachtikan” (1 Cor. 3:6).

15. Xikijto kox san tikintlapouiskej akinmej techkakij.

¹⁵ Jesús kineki ma tiyolpakikan, ik non, okijto: “Xitetlatliokolikah iwa Dios nomechtlatliokolis. Ye nomechmakas se kuali tlatamachíwale, tejtélinki, tetentok iwa kitsonewiltis. Dios nomechkopilis ijkó kemi nomejwah ononkitemakakeh” (Luc. 6:38). Maski miakej techkakij ijkuak tikintlapouiaj, amo nochtin kinpaktia tlen tikintlapouiaj pero akinmej kikakij kinpaleuis oksekimej noijki ma techkakikan. Ik non, ok moneki ma tikintlapouikan oksekimej maski ualeua amo kinekij techkakiskej. Xamo se tonal kipatlaskej inyelis uan techkakiskej.

16. (1) ¿Akinmej moneki tikinmakaskej tlen tikpiaj? (2) ¿Uan tleka moneki ijkon ma tikchiuakan?

 ¹⁶ Akin kipaktia kitemakas ika nochi iyolo tlen kipia amo kichia itlaj kiselis. Jesús nochipa okilnamiktoka nin tlamantli: “Ijkuak tiilwichiwas xikintlalwi n próbesteh, n matepomeh, n koxomeh iwa non amo weleti tlachiah, iwa tikpias miak pakílistli. Porke yejwah mach weletis momakopaskeh mowah” (Luc. 14:13, 14). Biblia kijtoa kiselis tlateochiualistli akin kitemaka tlen kipia uan yolpaki akin kiknomati tlen amo itlaj kipia (Prov. 22:9; Sal. 41:1). Tiyolpakiskej tla tikinpaleuiskej oksekimej.

17. ¿Tlen kichiuas ma tiyolpakikan?

¹⁷ Pablo okijto: “Okachi yolpaki akin itlaj kitemaka uan amo ijkuak itlaj kiselia”. Nin amo kijtosneki tiktemakaskej miak tlamantli. Ye okijto ma tikinyolchikauakan oksekimej uan ma tikinpaleuikan akinmej moneki tikinpaleuiskej (Hech. 20:31-35). Pablo otechmachti miak ipati ma tikintlasojtlakan oksekimej, ma tikinkakikan uan ma timajxilikan titetlapouiskej.

18. ¿Tlen kijtoaj sekimej ixtlamatkej?

¹⁸ Ixtlamatkej noijki kijtoaj tiyolpakij tla tiktemakaj tlen tikpiaj. Se amochtli kijtoa akinmej kinpaleuiaj mota okachi yolpakij. Ixtlamatkej kijtoaj ma tikinpaleuikan oksekimej uan okachi kuali tiyetoskej uan tiyolpakiskej. Tla ijkon tikchiuaskej, tichikajtoskej uan okachi tiyolpakiskej. Uan tejuan melauak tiyolpakij porque tikneltokaj Biblia otechmakak toTajtsin Dios akin sapanoa techtlasojtla (2 Tim. 3:16, 17).

19, 20. ¿Tleka moneki ma tiktemakakan tlen tikpiaj?

¹⁹ Miakej sapanoa tlaixnekij, ik non, ualeua oui tiktemakaskej tlen tikpiaj. Pero Jesús okintemakak ome tlanauatilmej tlen sapanoa miak inpati ijkuak okijto ma tiktlasojtlakan Jehová ika nochi toyolo, ika nochi toyolilis, ika nochi totlalnamikilis uan ika nochi tochikaualis. Noijki ma tikintlasojtlakan oksekimej ken tejuan timotlasojtlaj (Mar. 12:28-31). Ijkon ken yotimomachtijkej akinmej kitlasojtlaj Jehová kitemakaj tlen kipiaj. Jehová uan iKone kinpaktia kitemakaskej tlen kipiaj uan noijki techiluiaj ijkon ma tikchiuakan porque non kichiuas ma tiyolpakikan. Tiktlakaitaskej Jehová uan tiyolpakiskej tla timochijchikauaj tiktemakaskej tlen tikpiaj ijkuak tikchiuaj tlen toTajtsin Dios technauatia uan tikinpaleuiaj oksekimej.

²⁰ Xamo timochijchikajtokej tikinpaleuiaj tokniuan uan oksekimej (Gál. 6:10). Tla amo timosotlauaskej, oksekimej techtlasojkamatiliskej tlen tikchiuaj uan techtlasojtlaskej uan ijkon okachi tiyolpakiskej. Proverbios 11:25 kijtoa: “Akin kitemaka tlen kipia, okachi miak tlamantli kipias uan akin tlapaleuia, noijki kipaleuiskej”. Nochipa uelis tiktemakaskej tlen tikpiaj ijkuak tiktekichiuiliaj Jehová uan amo ma tikchiakan itlaj tikseliskej. Itech okse tlamachtil tikitaskej okseki tlamantli.