1. Eshito otali holola ngiini kutya Jehova oha gandja nehalo ewanawa?

NONANDO Jehova okwa li oye awike manga inaa shita sha, ka li owala ha dhiladhila kombinga ye mwene. Pehala lyaashono, okwa pe iishitwa ye iinandunge omwenyo, mbyoka yomegulu noyokombanda yevi. Jehova ngoka e li “Kalunga omunyanyukwi” (NW), oku hole okugandja iinima iiwanawa. (1 Tim. 1:11; Jak. 1:17) Onkee ano, molwaashono okwa hala tu kale twa nyanyukwa, ohe tu longo tu kale hatu gandja nehalo ewanawa. — Rom. 1:20.

2, 3. (a) Omolwashike okugandja nehalo ewanawa haku tu nyanyudha? (b) Oshike tatu ka kundathana?

² Kalunga okwa shita omuntu oshifetha she. (Gen. 1:27) Shoka osha hala okutya, otwa shitwa hatu vulu okuulika uukwatya we. Opo tu vule okukala twa nyanyukwa notwa gwanenwa, otwa pumbwa okulandula oshiholelwa shaJehova, mokukala tu na ko nasha nayalwe nohatu gandja nehalo ewanawa. (Fil. 2:3, 4; Jak. 1:5) Omolwashike mbela? Omolwaashoka Jehova okwa shita aantu osho ya kale ngaaka. Nonando inatu gwanenena, otatu vulu okupondola mokuholela Jehova ngoka ha gandja nehalo ewanawa.

 ³ Ombiimbeli otayi tu longo nkene tatu vulu okukala hatu gandja nehalo ewanawa. Natu ka kundathaneni iitsa yimwe, mbyoka tatu vulu okwiilonga mOmanyolo kombinga yokugandja. Otatu ka tala nkene okugandja nehalo ewanawa taku vulu oku shi ningitha tashi wapa tu kale twa hokiwa kuKalunga. Otatu ka tala wo nkene okugandja hoka, taku vulu oku tu kwathela tu gwanithe po onkandangala ndjoka Kalunga e tu pa. Natango, otatu ka tala nkene okugandja kwetu nehalo ewanawa kwa kwatathana nenyanyu lyetu nosho wo kutya omolwashike twa pumbwa okutsikila oku shi ninga.

4, 5. Jehova naJesus oye tu tulila po iiholelwa yini kombinga yokugandja nehalo ewanawa?

⁴ Jehova okwa hala aantu ye ye mu holele. Onkee ano, ohashi mu nyanyudha, uuna tatu gandja nehalo ewanawa. (Ef. 5:1) Omukalo moka e tu shita nosho wo iinima iiwanawa mbyoka a shitila kombanda yevi, otayi ulike kutya okwa hala tu kale twa nyanyukwa. (Eps. 104:24; 139:13-16) Onkee ano, ohatu mu simaneke, uuna tatu kambadhala okunyanyudha yalwe.

⁵ Aakriste yashili, ohaya holele Kristus, ngoka e tu tulila po wo oshiholelwa oshiwanawa shokugandja nehalo ewanawa. Jesus okwa popi ye mwene a ti: “[Omuna] gwOmuntu ine ya okuyakulwa, ihe okuyakula nokugandja omwenyo gwe, a hupithe oyendji.” (Mat. 20:28) Omuyapostoli Paulus okwa ladhipike Aakriste a ti: “Okukala kweni naku kale kwa fa kwaJesus Kristus . . . Okwi ihula uukalunga, e ta zala olupe lwomupika.” (Fil. 2:5, 7) Onkee ano, otashi ka kala shi li nawa, kehe gumwe i ipule ta ti: ‘Mbela otandi vulu okulandula oshiholelwa shaJesus shi vulithe sho tandi ningi ngashingeyi?’ — Lesha 1 Petrus 2:21.

6. Jesus okwe tu longa shike meyele ndyoka a longitha lyOmusamaria omunamutimahenda? (Tala kethano lyopetameko.)

⁶ Ngele otwa holele oshiholelwa dhingi shaJehova noshaJesus, mokukala tu na ko nasha nayalwe noku ya kwathela moompumbwe dhawo, otatu ka kala twa hokiwa kuJehova. Jesus okwa li e shi yelitha meyele lye li na ko nasha nOmusamaria omunamutimahenda, kutya okwa li a tegelela aalanduli ye ya kale haya kwathele yalwe, naamboka wo kaaye shi yomeputuko lyawo. (Lesha Lukas 10:29-37.) Oto dhimbulukwa epulo ndyoka lyi inyengitha Jesus a gandje eyele kombinga yOmusamaria omunamutimahenda? Okwa li a pulwa kOmujuda taku ti: “Mukwetu olye?” Omukalo moka Jesus a yamukula, otagu ulike kutya otu na okukala hatu gandja nehalo ewanawa ngaashi Omusamaria, ngele otwa hala okukala twa hokiwa kuKalunga.

7. Ongiini okwiihola mwene nenge okwaaihola mwene kwa kwatathana nompata ndjoka ya holoka moshikunino shaEden?

⁷ Aakriste oye na omatompelo ogendji gokugandja nehalo ewanawa. Pashiholelwa, uukwatya mboka owa kwatathana nompata yaSatana ndjoka ya li ya holoka po moshikunino shaEden. Ngiini mbela? Satana okwa ti kutya Adam naEva otaya vulu okukala ya nyanyukwa, ngele oya kala taya gandja eitulomo kuyo yene nokupititha komeho iinima yawo yopaumwene pehala lyokuvulika kuKalunga. Eva okwa katuka momukalo ngoka tagu ulike kutya okwi ihole ye mwene, sho a li a hala okukala a fa Kalunga. Adam wo oku ulike uukwatya wokwiihola mwene, opo a nyanyudhe Eva. (Gen. 3:4-6) Iizemo yomatokolo ngoka ya ninga, oyi iwetikile. Okwiihola mwene ihaku etele omuntu enyanyu, ihe eyeme. Ngele otwa kala hatu gandja nehalo ewanawa, otatu ulike kutya otwa tompwa kutya omukalo gwaKalunga gwokuninga iinima ogwo dhingi.

8. Omolwashike aaihokani yotango ya li ye na okukala ye hole okugandja?

⁸ Kalunga okwa li a pe aaihokani yotango omalombwelo ngoka taga vulu oku ya kwathela ya dhiladhile kombinga yayalwe, nonando oyo ayeke  ya li moshikunino shaEden. Jehova okwa li a yambeke Adam naEva, e te ya lombwele yu udhithe evi alihe noye li tule mepangelo lyawo. (Gen. 1:28) Ngaashi owala Omushiti a li u ulike kutya oku na ko nasha naavali yetu yotango, nayo oya li wo ye na okuulika kutya oye na ko nasha nenyanyu lyaanona mboka ya li taya ka mona. Oparadisa oya li yi na okutamununwa mo yi kale evi alihe, omolwuuwanawa woluvalo aluhe lwaAdam. Shoka osha li tashi ka pula uukwanegumbo we awuhe wu longele kumwe, opo iilonga mbyoka yi gwanithwe po.

9. Omolwashike okutamununa mo Oparadisa kwa li taku vulu okweetela aantu enyanyu?

⁹ Opo aalumentu naakiintu ya gwanenena ya vule okutamununa mo Oparadisa, oya li ye na okulongela kumwe thiluthilu naJehova, opo ya gwanithe po elalakano lye, ya ye mevululuko lye. (Heb. 4:11) Dhiladhila owala kunkene aantu ya li taya vulu okukala ya gwanenwa noya nyanyukilwa iilonga mbyoka. Ando oya li yu ulike kutya oye na ko nasha nayalwe, andola oya mona omayambeko ogendji nenyanyu kaali shi okuyelekwa.

10, 11. Ongiini tatu vulu okugwanitha po iilonga yokuuvitha noyokuninga aantu aalongwa?

¹⁰ Kunena, Jehova okwa pa aapiya ye iilonga yokuuvitha noyokuninga aantu aalongwa. Opo tu gwanithe po iilonga mbyoka, otwa pumbwa okukala tu na ko nasha lela nayalwe. Otatu vulu owala okwiidhidhimikila iilonga mbika, ngele otu na einyengotompelo lyomondjila, ano tu hole Kalunga naantu ooyakwetu.

¹¹ Omimvo 2 000 nasha dha ka pita, Paulus okwa popi kutya ye nookuume ke yamwe yopothingo, oye li “aalongi pamwe naKalunga,” omolwiilonga yawo yokukuna nokutekela ombuto yoshili yUukwaniilwa. (1 Kor. 3:6, 9) Natse kunena otatu vulu okukala “aalongi pamwe naKalunga” mokukala hatu gandja nehalo ewanawa ethimbo lyetu, iiniwe yetu noonkondo dhetu tu kuthe ombinga miilonga yokuuvitha, mbyoka Kalunga e tu pa. Kashi shi tuu uuthembahenda uunene!

12, 13. Omayambeko geni haga zi miilonga yokuninga aantu aalongwa?

¹² Okukala hatu longitha ethimbo lyetu noonkondo dhetu miilonga yokuuvitha noyokuninga aantu aalongwa, ohaku tu etele enyanyu enene. Aamwatate naamwameme oyendji mboka ya li ye na aakonakonimbiimbeli taya humu komeho, otaya vulu oku mu lombwela kutya ohashi eta omayambeko ogendji. Enyanyu enene ohali zi mokumona nkene aantu ya nyanyukwa, sho taya tameke okuuva ko oshili, sho eitaalo lyawo tali koko, sho taya ningi omalunduluko nongele ya tameke okuuvithila yalwe. Jesus naye okwa li a nyanyukwa noonkondo, sho aauvithi 70 mboka a li a tuma ye ku uvithe ya “galuka yu udha enyanyu,” oshoka aantu oye ya pulakene. — Luk. 10:17-21, yelekanitha OB-1954.

¹³ Aauvithi muuyuni awuhe, ohaya kala ya nyanyukwa uuna ye wete nkene etumwalaka lyonkundana ombwanawa tali kwathele aantu ya lundulule oonkalamwenyo dhawo. Natu taleni koshiholelwa shomumwameme omugundjuka inaa hokanwa, Anna, ngoka a tamununa mo uukalele we, sho a tembukile koshitopolwa shomuEuropa lyokUuzilo,  hoka ku na ompumbwe enene yaauvithi. * Okwa nyola a ti: “Huka oku na oompito odhindji dhokutameka omakonakonombiimbeli, oshinima shoka ndi hole unene. Iilonga yokuuvitha ohayi nyanyudha ndje noonkondo. Uuna nda thiki megumbo, ihandi kala ndi na ethimbo lyokugandja eitulomo kungame mwene. Ohandi kala tandi dhiladhila kombinga yaamboka handi konakona nayo, ngaashi kombinga yoothina nuupyakadhi mboka ye li muyo. Opo nduno, tandi kongo omikalo moka tandi vulu oku ya tsa omukumo noku ya kwathela. Onda tompwa lela kutya ‘okugandja oku na elago ku vule okutaamba.’” — Iil. 20:35.

14. Nonando aantu owala aashona taya pulakene konkundana ombwanawa, ongiini tatu vulu okumona enyanyu muukalele?

¹⁴ Otatu vulu okumona enyanyu, mokupa aantu ompito ya pulakene ketumwalaka lyonkundana ombwanawa, nonando yo inaya hala okupulakena. Komeho gaayihe, iilonga yetu yokuuvitha kunena oya faathana naambyoka yomuhunganeki Hesekiel, ngoka a li a lombwelwa kuJehova taku ti: “Ya lombwela oohapu dhandje, ngele otaa pulakene nenge itaa pulakene.” (Hes. 2:7; Jes. 43:10) Kutya nduno aantu yamwe itaya taamba ko etumwalaka lyetu, Jehova okwa lenga oonkambadhala dhetu. (Lesha Aahebeli 6:10.) Omuuvithi gumwe oku ulike iikala iiwanawa shi na ko nasha noshinima shika. Okwa nyola kombinga yuukalele we a ti: “Tse otwa kunu, otwa tekele notwa galikana tu na etegameno kutya Jehova oye ta kokitha ohokwe yomuntu.” — 1 Kor. 3:6.   

15. Aantu oyendji ohayi inyenge ngiini uuna taya pewa sha, na einyengo lyawo oli na oku tu guma ngiini?

¹⁵ Jesus okwa hala tu kale twa nyanyukwa mokukala hatu gandja nehalo ewanawa. Okugandja ohaku ningitha aantu oyendji, yi inyenge momukalo omwaanawa. Okwe tu ladhipike a ti: “Gandjeni, Kalunga ote mu pe oshiyelekitho shoka tashi holola iilonga yeni iiwanawa, shu udha, sha thindwa, sha huwa, tashi tika e tashi tulwa mekolo lyeni. Oshoka oshiyelekitho shoka tamu shi yelekitha yakweni, osho Kalunga te ke mu yelekitha.” (Luk. 6:38) Odhoshili kutya uuna tatu gandja nehalo ewanawa haantu ayehe haya pandula. Ihe ngele yamwe oya pandula, otashi vulu shi ya inyengithe ya tameke okugandja. Onkee ano,  natu kale hatu gandja, nonando aantu otaye tu pandula nenge hasho. Ku shi kutya uuwanawa wu thike peni to ka ningila omuntu moku mu pa sha owala lumwe.

16. Okaantu yeni tu na okugandja nehalo ewanawa, nomolwashike?

¹⁶ Odhoshili kutya aantu mboka haya gandja nehalo ewanawa, ihaya gandja shaashi ya hala okugalulilwa sha. Shoka osho Jesus a li e na momadhiladhilo, sho a longo aantu a ti: “Hiya oohepele, iitiningili, iilema naaposi. Nena oto kala wa yambekwa, oshoka mbaka kaye na sha shoku ku pa.” (Luk. 14:13, 14) Omunyoli gumwe gwOmbiimbeli okwa ti: “Omunamutimahenda ota yambekwa.” Ye gulwe okwa ti: “Aanelago oomboka ye na oshimpwiyu noohepele.” (Omayel. 22:9; Eps. 41:1) Eeno, otu na okukala hatu gandja, oshoka otatu ka mona enyanyu, uuna tatu kwathele yalwe.

17. Omikalo dhini dhokugandja tadhi vulu oku tu etela enyanyu?

¹⁷ Sho Paulus a totha oohapu dhaJesus ndhoka tadhi ti kutya “okugandja oku na elago ku vule okutaamba,” ka li owala ta popi kombinga yiinima yopamaliko, ihe okwa li ta popi wo kombinga yokutsa omukumo, yokupukulula nokukwathela yalwe. (Iil. 20:31-35) Shoka Paulus a popi nokwa ningi, otashi tu longo tu kale hatu iyamba, ano tu longithe ethimbo lyetu, oonkondo dhetu, olukeno lwetu nohole yetu.

18. Aapekapeki oyendji oya popya shike kombinga yokugandja?

¹⁸ Aapekapeki yuunongononi wopankalathano, nayo oye shi mona kutya okugandja ohaku etele omuntu enyanyu. Opu na oshitopolwa shimwe sha ti: “Aantu oya popya kutya ohaya kala ya nyanyukwa unene, konima ngele ya ningile yalwe uuwanawa.” Aapekapeki oya ti kutya okukwathela yalwe okwa simana, oshoka ohaku ningitha omuntu a kale e na onkalamwenyo “tayi ti sha noyi na elalakano, shaashi ohaku gwanitha po oompumbwe dhe dha simanenena.” Olundji aapekapeki ohaye shi popi kutya aantu ohaya kutha ombinga miilonga yokwiiyamba, opo ya kale ye na uukolele nenyanyu. Oshinima shoka oshoshili noitashi tu kumitha, shaashi Omushiti gwetu omunahole, Jehova, okwe shi popya nale kutya okugandja nehalo ewanawa ohaku eta enyanyu. — 2 Tim. 3:16, 17.

19, 20. Omatompelo geni wu na tage ku ningitha wu kale wa hala okugandja nehalo ewanawa?

¹⁹ Ohashi kala oshidhigu kutse okugandja nehalo ewanawa, uuna tu li mokati kaantu mboka yi ihole yo yene. Jesus okwa popi kutya iipango iinene iyali oyo, okukala tu hole Jehova nomutima gwetu aguhe, nomwenyo gwetu aguhe, nomadhiladhilo getu agehe nonoonkondo dhetu adhihe. Omanga oshitiyali, okukala tu hole yakwetu ngaashi twi ihole tse yene. (Mark. 12:28-31) Ngaashi twe shi mono moshitopolwa shika, mboka ye hole Jehova ohaye mu holele. Jehova naJesus ohaya gandja nehalo ewanawa kuyalwe. Onkee ano, oya hala natse tu ninge sha faathana, oshoka otashi ke tu etela enyanyu lyashili. Ngele otwa kambadhala okugandja nehalo ewanawa kuJehova nokaantu ooyakwetu, otatu ke mu simanekitha. Otashi ke tu etela wo uuwanawa nosho wo yalwe.

²⁰ Kapu na omalimbililo kutya shoka osho nale to kambadhala okuninga wu kwathele yalwe, unene tuu aamwatate naamwameme. (Gal. 6:10) Ngele owa tsikile oku shi ninga, oto ka kala wu holike noto ka pandulwa. Shimwe ishewe, oto ka kala wa nyanyukwa. Omayeletumbulo 11:25 otayi ti: “Omwenyo ngoka tagu yambeke, otagu kutithwa, naangoka ta hekeleke, ota hekelekwa wo.” Odhoshili kutya otatu vulu okuulika olukeno, okugandja nehalo ewanawa nosho wo okwiiyamba momikalo odhindji. Otashi ke tu petha wo ondjambi, uuna tatu shi ulike mOnkalamwenyo yopaKriste niilonga yetu yokuuvitha. Moshitopolwa tashi landula, otatu ka kundathana omikalo dhilwe moka tatu vulu oku shi ninga.