1. Tlholo e bontšha bjang gore Jehofa o rata go nea?

LE GE Jehofa a be a le noši pele a ka bopa dilo tše dingwe, o be a sa nagane ka yena feela. O ile a bopa barongwa le batho gore le bona ba thabele bophelo. Jehofa, yena “Modimo yo a thabilego,” o rata go nea ba bangwe dilo tše dibotse. (1 Tim. 1:11; Jak. 1:17) Le gona ka ge a nyaka gore le rena re thabe, o re ruta gore re swanetše go nea ba bangwe dilo.​—Baroma 1:20.

2, 3. (a) Ke ka baka la’ng go rata go nea ba bangwe dilo go dira gore re thabe? (b) Re tlo ithuta ka’ng sehlogong se?

² Modimo o re bopile ka seswantšho sa gagwe. (Gen. 1:27) Seo se ra gore re ka kgona go ekiša dika tša gagwe goba semelo sa gagwe. Ka gona, e le gore re thabe le go kgotsofala, re swanetše go ekiša mohlala wa Jehofa ka go bontšha gore re na le taba le ba bangwe le ka go rata go nea. (Bafil. 2:3, 4; Jak. 1:5) Ka baka la’ng? Ka gobane Jehofa o re bopile ka tsela yeo. Le ge re se ra phethagala, re ka kgona go ekiša Jehofa tabeng ya go rata go nea.

³ Beibele e re botša seo re ka se dirago gore re rate go nea. Sehlogong se re tlo ithuta ka tše dingwe tša dilo tšeo Mangwalo a re rutago tšona tabeng ye. Re tlo bona kamoo go rata go nea go dirago  gore Modimo a re amogele, le kamoo go šoma ka thata gore re be le seka se go re thušago go dira modiro woo Modimo a re neilego wona. Le gona re tlo ithuta gore go rata go nea go sepedišana bjang le go dula re thabile le gore ke ka baka la eng re swanetše go šoma ka thata gore re be le seka se.

4, 5. Jehofa le Jesu ba re beetše mohlala ofe wa go rata go nea?

⁴ Jehofa o nyaka gore re mo ekiše, ka gona o a thaba ge re rata go nea. (Baef. 5:1) Go molaleng gore Jehofa o nyaka gore re thabe. Re bona seo tseleng yeo a re bopilego ka yona le kamoo a bopilego lefase ka tsela e botse le e kgahlišago gore re thabele bophelo. (Ps. 104:24; 139:13-16) Ka baka leo, re bontšha gore re a mo hlompha ge re dira gore ba bangwe ba thabe.

⁵ Bakriste ba therešo ba ekiša Kriste yoo a re beetšego mohlala wa kamoo motho a ka bontšhago gore o rata go nea. Jesu ka boyena o itše: ‘Morwa wa motho ga se a tlela go hlankelwa, eupša o tletše go hlankela le go nea moya wa gagwe gore e be topollo bakeng sa ba bantši.’ (Mat. 20:28) Ke ka baka leo moapostola Paulo a ilego a kgothaletša Bakriste gore: “Dulang le na le boemo bjo bja monagano bjo bo bego bo le go Kriste Jesu . . . O ile a itlhohlora a ba ka sebopego sa mohlanka.” (Bafil. 2:5, 7) Yo mongwe le yo mongwe wa rena o swanetše go ipotšiša gore: ‘Na nka latela mohlala wa Jesu kutšwanyana go feta kamoo ke šetšego ke dira ka gona?’​—Bala 1 Petro 2:21.

6. Jesu o re rutile thuto efe papišong ya Mosamaria wa kgaugelo? (Bona seswantšho seo se lego mathomong a sehlogo.)

⁶ Jehofa a ka re amogela ge re ka ekiša mohlala wa gagwe le wa Kriste. Re ka o ekiša ka go bontšha batho gore re na le taba le bona le ka go nyaka ditsela tša go ba thuša. Papišong yeo Jesu a ilego a bolela ka yona ya mabapi le Mosamaria wa kgaugelo, o ile a bontšha gabotse gore balatedi ba gagwe ba swanetše go dira sohle seo ba ka se kgonago gore ba thuše batho, go akaretša le bao e sego ba morafo wa gabo bona. (Bala Luka 10:29-37.) Na o sa gopola potšišo yeo e ilego ya dira gore Jesu a bolele papišo ye? Mojuda yo mongwe o ile a mmotšiša gore: “Ge e le gabotse, ke mang yo e lego moagišani wa ka?” Karabo ya Jesu e bontšha gore re swanetše go ekiša Mosamaria yoo ka gore re rate go nea ge e ba re nyaka gore Modimo a re amogele.

7. Go ba le boithati go tswalana bjang le seo se ilego sa direga kua serapeng sa Edene?

⁷ Lebaka le lengwe leo le swanetšego go dira gore re rate go nea le tswalana le seo se ilego sa direga kua serapeng sa Edene. Sathane o ile a re Adama le Efa, go akaretša le batho ka moka, ba be ba tla thaba ge ba be ka dira seo ba se ratago go e na le gore ba kwe Modimo. Efa o ile a bontšha boithati ka go nyaka go swana le Modimo. Adama yena o ile a bontšha boithati ka go nyaka go thabiša Efa. (Gen. 3:4-6) Ka moka ga rena re kgona go bona ditlamorago tša diphetho tša bona. Boithati ga bo dire gore motho a thabe, eupša bo tliša manyami feela. Ge re rata go nea, re bontšha gore re tloga re kgodišegile gore tsela ya Modimo ya go dira dilo ke yona e kaonekaone.

8. Ke ka baka la’ng Adama le Efa ba be ba swanetše go naganela batho ba bangwe?

⁸ Gaešita le ge Adama le Efa e be e le bona feela serapeng sa Edene, nkabe ba ile ba naganela batho ba bangwe. Ka baka la’ng? Ka gobane Jehofa o be a ba neile mošomo wa gore ba be le bana gomme ba dire lefase paradeise.  (Gen. 1:28) Adama le Efa nkabe ba ile ba nyaka gore bana bao ba bego ba tla ba le bona ba thabe, go no swana le ge Jehofa a nyaka gore batho ka moka mo lefaseng ba thabe. Adama le bana ba gagwe ba be ba swanetše go dira lefase ka moka paradeise e le gore ba tle ba ipshine ka bophelo. Mošomo woo e be e tla ba o mogolo!

9. Ke ka baka la’ng go fetoša lefase ka moka paradeise go be go tla dira gore batho ba thabe?

⁹ E le gore batho bao ba phethagetšego ba kgone go fetoša lefase ka moka gore e be paradeise, ba be ba tlo swanelwa ke go dirišana le Jehofa go phethagatšeng merero ya gagwe, ka go re’alo ba tsena boikhutšong bja gagwe. (Heb. 4:11) Ruri ba be ba tla thabela go dira modiro woo! Ge nkabe batho bao ba ile ba šoma ka thata e le gore ba bangwe ba tle ba holege, Jehofa o be a tla ba šegofatša kudu.

10, 11. Re ka phetha bjang modiro wa go bolela ditaba tše dibotse le go dira barutiwa?

¹⁰ Lehono Jehofa o neile batho ba gagwe modiro wa go botša ba bangwe ditaba tše dibotse le go dira barutiwa. E le gore re phethe modiro wo, re swanetše go rata go thuša ba bangwe. Re ka dula re dira modiro wo ge feela re rata Modimo le baagišani ba rena.

¹¹ Lekgolong la pele la mengwaga C.E., Paulo o ile a re yena le ba bangwe bao a bego a šoma le bona ke “bašomigotee le Modimo,” ka ge ba be ba tšea karolo modirong wa go bjala peu ya therešo le go e nošetša. (1 Bakor. 3:6, 9) Le rena lehono re ka ba “bašomigotee le Modimo” ge re diriša nako ya rena, dilo tša rena le matla a rena modirong wo a re neilego wona wa go bolela ditaba tše dibotse. Ruri ye ke tokelo e kgolo kudu!

12, 13. Modiro wa go dira barutiwa o re hola bjang?

¹² Tsela e nngwe ya go nea ke ka go diriša nako ya rena le matla a rena go bolela ditaba tše dibotse le go dira barutiwa. Ge re dira dilo tše re tlo thaba kudu. Batho ba bantši bao ba kilego ba thuša ba bangwe go ithuta Beibele ba a tseba gore go bona motho a amogela therešo go thabiša kudu. Re thaba kudu ge re bona barutwana ba rena ba Beibele ba thaba ge ba thoma go kwešiša seo ba ithutago sona, tumelo ya bona e thoma go gola, ba dira diphetogo maphelong a bona gomme ba thoma go botša ba bangwe seo ba ithutago sona. Jesu le yena o ile a thaba kudu ge barutiwa ba gagwe ba 70 bao a bego a ba romile ba “boa ba thabile” ka ge batho ba ile ba theetša molaetša wa bona.​—Luka 10:17-21.

¹³ Bana babo rena le dikgaetšedi lefaseng ka moka ba thaba kudu ge ba bona kamoo batho ba holegago ka gona ge ba tseba ditaba tše dibotse. Nagana ka Anna, e lego kgaetšedi yo e sa lego mofsa e bile a sego a nyalwa. O ile a oketša nako yeo a e fetšago a ruta batho Beibele ka go hudugela ka Bohlabela bja Yuropa  moo go nyakegago bagoeledi ba oketšegilego. * O ngwadile gore: “Ke kgahlwa ke gore mo go na le batho ba bantši bao nyakago go ithuta Beibele. Ke thabela go ruta batho Beibele. Ge ke fihla gae, ga ke na nako ya go nagana ka mathata a ka. Ke nagana ka mathata a bao ke ba rutago Beibele le dilo tšeo di ba tshwenyago. Ke nyaka ditsela tšeo nka ba kgothatšago ka tšona le dilo tšeo nka di dirago gore ke ba thuše. Le gona ke kgodišegile gore ‘go na le lethabo le legolo go neeng go feta go amogeleng.’”​—Dit. 20:35.

14. Ke’ng seo se ka dirago gore o thabele go bolela ditaba tše dibotse gaešita le ge batho ba sa rate molaetša wa rena?

¹⁴ Re thabišwa ke gore re nea batho sebaka sa gore ba ikgethele gore ba nyaka go theetša ditaba tše dibotse goba ga ba nyake. Ge e le gabotse, lehono modiro wa rena o swana le wa moporofeta Hesekiele yoo Jehofa a ilego a re go yena: “O ba botše mantšu a ka, go sa šetšwe gore ba a kwa goba ba a gana.” (Hesek. 2:7; Jes. 43:10) Go sa šetšwe gore batho ba a re theetša goba ga ba re theetše, Jehofa o tšeela godimo maiteko ao re a dirago. Re a tseba gore le ka mohla Jehofa a ka se lebale maiteko ao re a dirago. (Bala Baheberu 6:10.) Ngwanabo rena yo mongwe o ile a bontšha gore o kwešiša taba ye gabotse. O ile a ngwala mabapi le modiro wa gagwe wa go botša ba bangwe ditaba tše dibotse gore: “Re bjetše, ra nošetša gomme ra rapela gore Jehofa a godiše peu yeo re e bjetšego.”​—1 Bakor. 3:6.

15. Na re swanetše go nea ge feela batho ba re leboga? Hlalosa.

¹⁵ Jesu o nyaka gore re thabe ka go nea ba bangwe. Batho ba bantši ba a thaba ge o ba nea dilo. Ke ka baka leo Jesu a itšego: “Tlwaelang go fa gomme batho ba tla le fa. Ba tla le tšhelela memenong ya diaparo tša lena kelo e botse, yeo e katetšwego, yeo e hlokgoseditšwego le ya go falala. Gobane kelo yeo le elago ka yona, le lena ba tla le elela ka yona.” (Luka 6:38) Ke therešo gore ga se ka mehla  batho ba tlago go go leboga ge o ba nea dilo. Eupša ge ba bangwe ba leboga, le bona ba tla rata go nea. Ka gona, wena tšwela pele o nea go sa šetšwe gore batho ba a go leboga goba ga ba go leboge. O ka se tsebe gore go nea ga gago go tla hola ba bangwe bjang.

16. Ke’ng seo se swanetšego go dira gore re rate go nea ba bangwe?

¹⁶ Batho bao ba neago ba bangwe dilo ka go tšwa pelong ga ba ba nee e le gore le bona ba tle ba newe selo se itšego. Jesu o be a naganne ka taba ye ge a be a re: “Ge o dira monyanya, o laletše badiidi, digole, dihlotša le difofu, wena o tla thaba gobane bona ga ba na seo ba tlago go go bušetša sona.” (Luka 14:13, 14) Mongwadi yo mongwe wa Beibele o itše motho yo a ratago go nea ba bangwe o tla šegofatšwa. Mongwadi yo mongwe yena o itše: “Go thaba le ge e le mang yo a šetšago mmotlana.” (Die. 22:9; Ps. 41:1) Ruri re swanetše go nea ka gobane re a thaba ge re thuša batho ba bangwe.

17. Ke ditsela dife tše dingwe tša go nea tšeo di ka dirago gore re thabe?

¹⁷ Ge Paulo a be a tsopola mantšu a Jesu ao a rego “go na le lethabo le legolo go neeng go feta go amogeleng,” o be a sa bolele feela ka dilo tše di bonagalago, eupša o be a bolela le ka go nea ba bangwe kgothatšo, tlhahlo le thušo ge ba e hloka. (Dit. 20:31-35) Moapostola Paulo o re rutile le ka mohlala wa gagwe gore re swanetše go thuša ba bangwe re diriša nako ya rena le matla a rena. Le gona re swanetše go ba hlokomela le go ba rata.

18. Banyakišiši ba bantši ba re’ng ka go rata go nea?

¹⁸ Banyakišiši ba bangwe le bona ba hweditše gore go nea go dira gore batho ba thabe. Sehlogong se sengwe banyakišiši ba boletše gore, “batho ba ikwa ba thabile kudu ka morago ga gore ba direle ba bangwe dilo tše dibotse.” Ba re go thuša ba bangwe go dira gore motho a ikwe a na le morero bophelong. Ke ka baka leo gantši ditsebi di kgothaletšago batho go ithaopela go direla setšhaba mediro e itšego gore ba phele gabotse le go dula ba thabile. Se ga se re makatše ka gobane Mmopi wa rena yo lerato e lego Jehofa ke kgale a boletše gore go nea go dira gore re thabe.​—2 Tim. 3:16, 17.

19, 20. Ke ka baka la’ng o nyaka go nea ba bangwe?

¹⁹ Ge re phela le batho bao ba sa ratego go nea, seo se ka re dira gore re thatafalelwe ke go tšwela pele re rata go nea ba bangwe. Eupša Jesu o itše taelo ya pele go ditaelo ka moka ke gore motho a rate Jehofa ka pelo ka moka, moya ka moka, monagano ka moka le ka matla ka moka gomme ya bobedi ke ya gore motho a rate moagišani wa gagwe ka mokgwa wo a ithatago ka wona. (Mar. 12:28-31) Go etša ge re bone sehlogong se, bao ba ratago Jehofa ba a mo ekiša. Jehofa le Jesu ba rata go nea. Le gona ba re kgothaletša gore re ba ekiše ka gobane seo se tla dira gore re thabe. Ge e ba ka mehla re ka leka ka thata go rata go nea ba bangwe gotee le go nea Modimo, re tla dira gore Jehofa a retwe gomme ra holega le go hola ba bangwe.

²⁰ Ga go pelaelo gore o šetše o dira sohle seo o ka se kgonago gore o nee ba bangwe, kudukudu badumedigotee le wena. (Bagal. 6:10) Ge e ba o ka tšwela pele o dira seo, batho tla go rata kudu gomme seo se tla go dira gore o thabe. Diema 11:25 e re: “Moya o fago kudu o tla nontšhwa gomme yo a nwešago ba bangwe meetse ba kgolwa le yena o tla nwešwa meetse a kgolwa.” Ke therešo gore Jehofa o tla re šegofatša ge e ba re nea ba bangwe go tšwa pelong e bile re ba bontšha botho ka ditsela tše di fapafapanego. Sehlogong se se latelago re tlo bolela ka tše dingwe tša ditsela tšeo re ka neago ka tšona.