1. Йеговӕ хӕларзӕрдӕ ке ӕй, е цӕмӕй бӕрӕг ӕй?

АДТӔЙ уӕхӕн рӕстӕг, ӕма Дун-дуйней Йеговӕй ӕндӕр неке адтӕй. Ӕма уӕд исфӕндӕ кодта иннетӕн дӕр цард балӕвар кӕнун, ӕма сфӕлдиста уӕларвон изӕдти ӕма зӕнхӕбӕл цӕрӕг адӕни. «Амондгун Хуцау» Йеговӕ уарзуй иннетӕн хуарздзийнадӕ кӕнун (1 Тим. 1:11; Иак. 1:17). Йегови фӕндуй, цӕмӕй мах дӕр амондгун уӕн, ӕма нӕ уомӕ гӕсгӕ ахур кӕнуй хӕларзӕрдӕдзийнадӕбӕл (Ром. 1:20).

2, 3. а) Хӕларзӕрдӕ адӕймаг амондгун цӕмӕн фӕууй? б) Аци статьяй цӕмӕ ӕркӕсдзиан?

² Хуцау адӕймаги ӕхемӕ гӕсгӕ сфӕлдиста, гъома ӕхемӕ ци менеугутӕ ес, уӕхӕн менеугути хӕццӕ (Райд. 1:27). Ӕма цӕмӕй ӕцӕг амондгун цард кӕнӕн ӕма Йегови арфӕдзийнӕдтӕй хайгин уӕн, уой туххӕй гъӕуама Йегови хузӕн хӕларзӕрдӕ уӕн (Фил. 2:3, 4; Иак. 1:5). Цӕмӕн? Уомӕн ӕма Йегови фӕндон уӕхӕн адтӕй. Кӕд ӕнӕнхӕст ан, уӕддӕр нӕ бон ӕй Йегови хузӕн хӕларзӕрдӕ ун.

 ³ Аци статьяй ӕркӕсдзиан, хӕларзӕрдӕдзийнадӕбӕл нӕ ка ахур кӕнуй, цалдӕр уӕхӕн хабармӕ Библийӕй. Базондзиан, Йеговӕн ӕхцӕуӕн цӕмӕн фӕууй, хӕларзӕрдӕ ку фӕууӕн, уӕд. Удта ма базондзиан, еци менеуӕг нин куд ӕнхус кӕндзӕй, Йеговӕ нин ци куст баихӕс кодта, уой ӕнхӕст кӕнун. Уомӕй уӕлдай ма ӕркӕсдзиан, хӕларзӕрдӕ адӕймаг амондгун цӕмӕн фӕууй ӕма нӕ еци менеуӕгбӕл идарддӕр дӕр архайун цӕмӕн гъӕуй, уомӕ дӕр.

4, 5. Йеговӕ ӕма Йесо хӕларзӕрдӕ ке ’нцӕ, уой куд бавдистонцӕ, ӕма сӕ нӕ бон куд ӕй фӕнзун?

⁴ Йегови фӕндуй, цӕмӕй мах дӕр уой хузӕн хӕларзӕрдӕ уӕн, ӕма ин уотемӕй ӕ зӕрдӕ рохс кӕнӕн (Еф. 5:1). Уомӕй уӕлдай ма ӕй фӕндуй, цӕмӕй адӕн амондгун цард кӕнонцӕ. Е бӕрӕг ӕй, куд дессаги конд ан, удта зӕнхӕбӕл алцидӕр куд рӕсугъд сфӕлдиста, уомӕй (Пс. 104:24; 139:13–16). Мадта иннетӕн хуарздзийнадӕ кӕнунбӕл ку архайӕн, уӕд уомӕй Йеговӕн кадӕ хӕсдзиан.

⁵ Нӕ бон ма ӕй Киристей дӕр фӕнзун. Е ӕ цардӕй бавдиста, хӕларзӕрдӕ адӕймаг цӕхуӕн гъӕуама уа, уой. Йесо загъта: «Адӕймаги Фурт дӕр уой туххӕй не ’рцудӕй, цӕмӕй ин лӕггадӕ кӕнонцӕ, фал цӕмӕй ӕхуӕдӕг балӕггадӕ кӕна ӕма ӕ уод ратта берети балхӕнуни туххӕй» (Матф. 20:28). Апостол Павел Киристӕнтти разӕнгард кодта: «Йесо Киристе куд гъуди кодта, уотӕ гъуди кӕнтӕ сумах дӕр... [Е] ӕхе алцӕмӕйдӕр фӕццох кодта ӕма иссӕй цагъари хузӕн» (Фил. 2:5, 7). Алке бон дӕр ни ӕй ӕхе бафӕрсун: «Киристей къахвӕдтӕбӕл цӕугӕй мӕ бон ци ӕй фӕххуӕздӕр кӕнун?» (Бакӕсӕ 1 Петури 2:21.)

6. Йесо ци самариаг лӕги хабар ракодта, уомӕй цӕбӕл ахур кӕнӕн? (Кӕсӕ хузӕмӕ статьяй райдайӕни.)

⁶ Нӕ бон ӕй Йеговӕ ӕма Киристей хузӕн хӕларзӕрдӕ ун, иннетӕбӕл ку сагъӕс кӕнӕн, удта син гъуддагӕй ку ӕнхус кӕнӕн, уӕд. Уотемӕй ни Йегови зӕрдӕ рохс кӕндзӕй. Е куд ӕхсидзгӕ ’й, уой Киристе хуарз балӕдӕрун кодта, самариаг лӕги хабар ку ракодта, уӕд. (Бакӕсӕ Лукай 10:29–37.) Йесо ӕ фӕдбӕлдзӕугути ахур кодта иннетӕн ӕнхус кӕнун, ка фӕнди ӕма кӕцӕй фӕнди ма уонцӕ, уӕддӕр. Гъуди ма ’й кӕнис, Йесо еци хабар цӕмӕн радзурдта, уой? Уомӕн ӕма ӕй еу дзиуиттаг лӕг бафарста: «Ке гъӕуама уарзон, еци иннетӕ ка ’нцӕ?» Йесойӕн ӕ дзуаппӕй бӕрӕг ӕй, мах дӕр самариаг лӕги хузӕн хӕларзӕрдӕ ке гъӕуама уӕн, цӕмӕй ни Йегови зӕрдӕ рохс кӕна.

7. Йеговӕ нӕ куд ахур кӕнуй, е тӕккӕ хуӕздӕр ке ӕй, уой нӕ бон куд ӕй ӕвдесун? Ба ’й лӕдӕрун кӕнӕ.

⁷ Хӕларзӕрдӕ ке гъӕуама, уӕн, е ма бӕрӕг ӕй, Едеми дзӕхӕрадони ци хабар ӕрцудӕй, уомӕй дӕр. Сайтан куд загъта, уомӕ гӕсгӕ Адам ӕма Евӕ амондгундӕр адтайуонцӕ, Хуцаумӕ ку нӕ игъустайуонцӕ ӕма ӕрмӕстдӕр сӕхе сагъӕс ку кодтайуонцӕ, уӕд. Евӕ ӕхе сагъӕс ракодта ӕма ’й бафӕндадтӕй Хуцауи хузӕн исун. Адам дӕр фулдӕр ӕхе сагъӕс кодта, ӕма ӕй ӕ уоси зӕрдӕ балхӕнун фӕндтадтӕй, Хуцауи зӕрдӕ рохс кӕнун нӕ, фал (Райд. 3:4–6). Е хуарзӕй ке нецӕмӕ ӕркодта,  уой ба абони уинӕн. Айдагъ ӕхе сагъӕс ка кӕнуй, уӕхӕн адӕн амондгун некӕд фӕуунцӕ. Фал хӕларзӕрдӕ ку уӕн, уӕд уомӕй ӕвдесдзиан, Йеговӕ нӕ куд ахур кӕнуй, е тӕккӕ хуӕздӕр ке ӕй.

8. Фиццаг дууӕ адӕймаги иннети сагъӕс цӕмӕн гъӕуама кодтайуонцӕ?

⁸ Кӕд Адам ӕма Евӕ Едеми дзӕхӕрадони дууемӕй цардӕнцӕ, уӕддӕр сӕ гъудӕй иннетӕбӕл сагъӕс кӕнун. Цӕмӕн? Уомӕн ӕма син Йеговӕ баихӕс кодта цӕуӕт уадзун ӕма зӕнхӕй дзенет рауайун кӕнун (Райд. 1:28). Адам ӕма Еви гъӕуама фӕндадтайдӕ сӕ сувӕллӕнттӕн амондгун цард искӕнун, Йегови куд фӕндадтӕй зӕнхӕбӕл алли адӕймаги дӕр амондгун искӕнун, уотӕ. Йегови фӕндонмӕ гӕсгӕ Адам ӕма Евӕ гъӕуама сӕ цӕуӕти хӕццӕ ӕгас зӕнхӕй дӕр дзенет рауайун кодтайуонцӕ. Е хъӕбӕр устур куст адтӕй!

9. Зӕнхӕбӕл дзенет кӕнгӕй адӕн амондгун цӕмӕн адтайуонцӕ?

⁹ Цӕмӕй ӕнхӕст адӕн Хуцауи фӕндон кӕронмӕ исӕнхӕст кодтайуонцӕ ӕма ӕгас зӕнхӕй дӕр дзенет рауайун кодтайуонцӕ, уой туххӕй ма сӕ Йегови хӕццӕ ӕмгуст кӕнун дӕр гъудӕй. Уотемӕй Хуцауи «ӕнцойадӕмӕ бацудайуонцӕ» (Дзиуит. 4:11). Расагъӕс кӕнӕ, еци кустӕй сӕ зӕрдӕ куд рохс  кодтайдӕ ӕма син цӕйбӕрцӕ цийнӕдзийнадӕ хастайдӕ! Айдагъ сӕхе нӕ, фал иннети сагъӕс дӕр ку кодтайуонцӕ, уӕд син Йеговӕ дӕр арфӕ кодтайдӕ.

10, 11. Хуарз хабар игъосун кӕнун ӕма ахуркӕнуйнӕгтӕ цӕттӕ кӕнуни ихӕс цӕй фӕрци ӕнхӕст кӕндзиан?

¹⁰ Абони Йеговӕ ӕ адӕнӕн баихӕс кодта хуарз хабар игъосун кӕнун ӕма ахуркӕнуйнӕгтӕ цӕттӕ кӕнун. Ӕма цӕмӕй еци гъуддаги ӕнтӕстгун уӕн, уой туххӕй гъӕуама адӕнбӕл сагъӕс кӕнӕн. Идарддӕр дӕр нӕ еци кусти архайунмӕ гъӕуама разӕнгард кӕнонцӕ дууӕ гъуддаги: Йегови ке уарзӕн ӕма адӕни ке уарзӕн, е.

¹¹ Нӕ эри фиццаг ӕноси Павел ӕхе ӕма иннӕ киристӕнтти исхудта «Хуцауи ӕмкосгутӕ», уомӕн ӕма игъосун кодтонцӕ ӕма адӕнӕн рӕстдзийнадӕ амудтонцӕ (1 Кор. 3:6, 9). Мах дӕр Хуцауи хӕццӕ ӕмгуст кӕндзиан, ци куст нин баихӕс кодта, уоми нӕ рӕстӕг, нӕ хъауритӕ ӕма не ’хца ку не ’вгъау кӕнӕн, уӕд. Уой мах устур кадӕбӕл нимайӕн!

12, 13. Ахуркӕнуйнӕгтӕ цӕттӕ кӕнуни гъуддаг цӕхуӕн арфӕдзийнӕдтӕ хӕссуй, уой туххӕй дӕ бон ци ӕй зӕгъун?

¹² Игъосун кӕнуни гъуддаги нӕ рӕстӕг ӕма нӕ хъауритӕ ку не ’вгъау кӕнӕн, уӕд нин еци куст берӕ цийнӕдзийнадӕ хӕсдзӕй. Иннети хӕццӕ Библи ӕнтӕстгунӕй ка ахур кӕнуй, уӕхӕн хуӕртӕ ӕма ӕнсувӕртӕ фӕззӕгъунцӕ, зӕгъгӕ, нӕ цийнӕн кӕрон дӕр нӕ фӕууй, ке хӕццӕ ахур кӕнӕн, етӕ Библий ахурӕдтӕ лӕдӕрун ку райдайунцӕ, ӕууӕндундзийнадӕ сӕмӕ ку фӕззиннуй, сӕ царди ӕййивддзийнӕдтӕ ку искӕнунцӕ ӕма ци базудтонцӕ, уой иннетӕн дзорун ку райдайунцӕ, уӕд. Йесо дӕр хъӕбӕр цийнӕ кодта, 70 ахуркӕнуйнаги игъосун кӕнуни фӕсте цийнӕгӕнгӕй ку ӕрбаздахтӕнцӕ ӕма сӕбӕл ци хабӕрттӕ ӕрцудӕй, уой ин ку дзурдтонцӕ, уӕд (Лук. 10:17–21).

¹³ Ӕгас зӕнхӕбӕл дӕр хуӕртӕ ӕма ӕнсувӕртӕн устур цийндзийнадӕ хӕссуй, Библий хабар адӕни цард хуӕздӕрӕрдӕмӕ куд ӕййевуй, уой уинун. Зӕгъӕн, еу ӕригон хуӕрӕ Анни * фӕндадтӕй ӕ лӕггадӕ фӕффулдӕр кӕнун ӕма рандӕ ’й, Скӕсӕн Европи игъосунгӕнгутӕ кӕми нӕ фагӕ кодта, уӕхӕн рауӕнмӕ. Аннӕ зӕгъуй: «Ами мин, Библи ахур кӕнун ке фӕндуй, уӕхӕн адӕн иссерун берӕ ӕнцондӕр ӕй. Мӕ лӕггадӕ мин устур цийнӕ хӕссуй. Хӕдзарӕмӕ ку ’рбацӕун, уӕд ми мӕхе зиндзийнӕдтӕ райронх унцӕ, уомӕн ӕма фӕссагъӕс кӕнун, Библи ке хӕццӕ ахур кӕнун, уонӕбӕл – сӕ зиндзийнӕдтӕбӕл ӕма син мӕ бон банхус кӕнун, удта сӕ бафедар кӕнун куд ӕй, уобӕл. Нур ӕй никки хъӕбӕрдӕр лӕдӕрун, „райсунӕй раттун амондгундӕр гъуддаг [ке] ӕй“» (Гъуд. 20:35).

14. Нӕ бон куд ӕй цийнӕгӕнгӕй игъосун кӕнун, адӕн нӕмӕ ку нӕ игъосонцӕ, уӕддӕр?

¹⁴ Адӕн нӕмӕ ку нӕ игъосонцӕ, уӕддӕр нӕ бон ӕй цийнӕгӕнгӕй игъосун кӕнун, уомӕн ӕма уотемӕй адӕнӕн фадуат дӕттӕн, цӕмӕй хуарз хабар фегъосонцӕ. Йегови фӕндуй, цӕмӕй мах дӕр ӕнхӕст кӕнӕн, Йезекилӕн ци ниффӕдзахста, уой: «Ду син гъӕуама дзорай мӕ дзурдтӕ, игъосонцӕ ӕви ма игъосонцӕ, уӕддӕр» (Йез.  2:7; Ис. 43:10). Ци хабар игъосун кӕнӕн, уомӕ адӕн цийфӕнди цӕстӕй ма ракӕсонцӕ, уӕддӕр нин Йеговӕ нӕ хъиамӕтӕн устур аргъ кӕнуй. (Бакӕсӕ Дзиуиттӕгтӕмӕ 6:10.) Еу ӕнсувӕр ӕ лӕггади туххӕй загъта: «Мах аразӕн, дон кӕнӕн ӕма Йеговӕмӕ ковӕн, цӕмӕй адӕймаги фулдӕр базонун бафӕндӕуа» (1 Кор. 3:6).

15. Хуарздзийнадӕ, ӕрмӕстдӕр аргъ ин ка кӕнуй, уонӕн гъӕуама кӕнӕн? Ба ’й лӕдӕрун кӕнӕ.

¹⁵ Киристей дӕр фӕндуй, цӕмӕй хӕларзӕрдӕ уӕн, уомӕн ӕма уой фӕрци амондгун уодзиан. Хӕларзӕрдӕ ку уӕн, уӕд нӕмӕ иннетӕ дӕр хӕларзӕрдӕ уодзӕнцӕ. Уомӕ гӕсгӕ нӕ Йесо разӕнгард кӕнуй: «Дӕттетӕ, ӕма уин дӕтдзӕнцӕ. Уӕ рони уин ӕркӕндзӕнцӕ рӕдауӕй, ӕрнӕмдзӕнцӕ ӕй, сцӕгъддзӕнцӕ ӕй ӕма ’й уотӕ байдзаг кӕндзӕнцӕ, ӕма ма си кӕлгӕ дӕр кӕндзӕй. Уомӕн ӕма уӕхуӕдтӕ ци барӕнӕй барайтӕ, уӕхӕн барӕнӕй бардзӕнцӕ сумахӕн дӕр» (Лук. 6:38). Ке зӕгъун ӕй гъӕуй, адӕн дин дӕ хуарзӕн алкӕд нӕ аргъ кӕндзӕнцӕ. Фал идарддӕр дӕр хуарздзийнадӕ кӕнӕ, уотӕ дӕмӕ ку кӕса ӕма ин неке аргъ кӕнуй, уӕддӕр. Дӕ еунӕг хуарз гъуддаг цӕйбӕрцӕ пайда ӕрхӕсдзӕй, уой зонгӕ дӕр нӕ бакӕндзӕнӕ.

16. Иннетӕн хуарздзийнадӕ кӕнунмӕ нӕ ци гъӕуама разӕнгард кӕна?

¹⁶ Ӕцӕгӕйдӕр, хӕларзӕрдӕ адӕймаг хуарздзийнадӕ кӕнгӕй фӕстӕмӕ нецӕмӕ фенгъӕлмӕ кӕсуй. Йесо дӕр уомӕ гӕсгӕ загъта: «Кувд ку кӕнай, уӕд ӕрбахонӕ мӕгурти, сахъатгунти, къулухти ӕма хъӕрӕути. Ӕма уӕд уодзӕнӕ амондгун, уомӕн ӕма дин етӕ  дӕ хуарздзийнадӕ цӕмӕй бафедонцӕ, е сӕмӕ нӕййес» (Лук. 14:13, 14). Библи зӕгъуй: «Цӕстуарзон адӕймаг уодзӕй арфӕгонд». Удта ма си финст ес: «Амондгун ӕй, мӕгури ка ӕргъуди кӕнуй, еци адӕймаг» (Ӕмб. 22:9; Пс. 41:1). Мадта иннетӕн ке ӕнхус кӕнӕн, е нин гъӕуама цийнӕ хӕсса.

17. Адӕймаги амондгун цӕхуӕн хуарз гъуддӕгтӕ кӕнунцӕ?

¹⁷ Павел Киристей дзурдтӕ ку загъта, райсунӕй раттун амондгундӕр гъуддаг ӕй, зӕгъгӕ, уӕд айдагъ ӕхца кенӕ дзаумӕутти кой нӕ кодта. Нӕ бон ма ӕй иннети нифс федар кӕнун, Библий унаффитӕ син ӕвдесун, удта син ӕнӕуой естӕмӕй дӕр ӕнхус кӕнун (Гъуд. 20:31–35). Апостол Павел ӕ дзурдтӕй дӕр ӕма ӕ гъуддӕгтӕй дӕр бавдиста, куд ӕхсидзгӕ ӕй, нӕ рӕстӕг, нӕ хъауритӕ ӕма нӕ уарзондзийнадӕ иннетӕн ма ’вгъау кӕнун.

18. Хуарздзийнадӕ кӕнуни туххӕй ахургӕндтӕй беретӕ ци дзорунцӕ?

¹⁸ Адӕймаги уодигъӕдӕ ка ӕртасуй, еци ахургӕндтӕ дӕр зӕгъунцӕ, хӕларзӕрдӕ адӕймаг амондгундӕр ке фӕууй. Еу статьяй куд финст адтӕй, уомӕ гӕсгӕ иннетӕн хуарз ести ка ракӕнуй, етӕ сӕхемӕ амондгундӕр фӕккӕсунцӕ. Ахургӕндтӕ куд зӕгъунцӕ, уомӕ гӕсгӕ иннетӕн ка ӕнхус кӕнуй, етӕ сӕ цардӕй зӕрдӕрохс фӕуунцӕ ӕма ’й фӕллӕдӕрунцӕ, дзӕгъӕли ке нӕ цӕрунцӕ, уой. Уотӕ дӕр ма фӕззӕгъунцӕ, ӕма уӕхӕн адӕнӕн се ’нӕнездзийнадӕ дӕр хуӕздӕр фӕууй. Ке зӕгъун ӕй гъӕуй, махмӕ еци дзурдтӕ дессаг нӕ кӕсунцӕ, уомӕн ӕма нӕ уарзӕгой Сфӕлдесӕг Йеговӕ Хуцау нӕ рагӕй нурмӕ дӕр ахур кӕнуй, райсунӕй раттун амондгундӕр гъуддаг ке ӕй (2 Тим. 3:16, 17).

19, 20. Хӕларзӕрдӕ ун дӕ цӕмӕн фӕндуй?

¹⁹ Айдагъ ӕхе сагъӕс ка кӕнуй, уӕхӕн адӕни астӕу цӕргӕй зин ӕй идарддӕр дӕр иннетӕн хуарздзийнадӕ кӕнун. Фал нин Йесо дууӕ ӕхсидзгӕ гъуддаги бафӕдзахста: Йегови уарзун ӕгас зӕрдӕй, ӕгас уодӕй, ӕгас зундӕй ӕма ӕгас хъауритӕй, удта иннети уарзун нӕхе куд уарзӕн, уотӕ (Мар. 12:28–31). Аци статьяй куд фӕууидтан, уотемӕй Йегови ка уарзуй, етӕ ’й алли гъуддаги дӕр фӕнзунцӕ. Йеговӕ ӕма Йесо ӕнцӕ хӕларзӕрдӕ, ӕма мах дӕр уомӕ разӕнгард кӕнунцӕ, уомӕн ӕма ’й зонунцӕ, уотемӕй амондгундӕр ке уодзиан. Хуцауи ӕма адӕни туххӕй хуарздзийнадӕ кӕнунбӕл ку архайӕн, уӕд уомӕй Йегови кадгин кӕнӕн, удта уотемӕй нӕхецӕн дӕр ӕма иннетӕн дӕр пайда хӕссӕн.

²⁰ Ке зӕгъун ӕй гъӕуй, иннетӕн хуарздзийнадӕ кӕнунбӕл ӕнӕуой дӕр архайис, уӕлдайдӕр ба нӕ хуӕртӕ ӕма не ’нсувӕртӕн (Гал. 6:10). Ӕма идарддӕр дӕр уотӕ ку кӕнай, уӕд дӕ адӕн уарздзӕнцӕ ӕма ди боз уодзӕнцӕ, удта дӕхуӕдӕг дӕр амондгун уодзӕнӕ. Библи зӕгъуй: «Рӕдау адӕймаг бафсӕддзӕй хуарздзийнӕдтӕй, ӕма иннетӕн дон ка не ’вгъау кӕнуй, уомӕн ӕй ӕхецӕн дӕр нӕ бавгъау кӕндзӕнцӕ» (Ӕмб. 11:25). Айдагъ нӕхе сагъӕс ке нӕ кӕнӕн ӕма хӕларзӕрдӕ ке ан, уой нӕ бон ӕй нӕ цардӕй дӕр ӕма нӕ лӕггадӕй дӕр ӕвдесун. Куд, уобӕл ба дзурд цӕудзӕй иннӕ статьяй.