1. Kiko ta proba ku Yehova ta generoso?

PROMÉ ku Yehova a kuminsá ku kreashon, e tabata su so, pero e no tabata pensa riba su mes so. Al kontrario, el a disidí di duna bida na otro kriaturanan inteligente, tantu spiritual komo humano. Yehova gusta duna kos bon, i p’esei e ta “e Dios felis.” (1 Tim. 1:11; Sant. 1:17) Anto komo ku Yehova ke pa nos tambe ta felis, e ta siña nos pa ta hende generoso, esta, hende ku ta gusta kompartí.—Rom. 1:20.

2, 3. (a) Dikon nos ta felis ora nos ta duna generosamente? (b) Kiko nos lo analisá den e artíkulo akí?

² Dios a traha hende den su imágen. (Gén. 1:27) Es desir, el a krea nos ku e kualidatnan ku e tin. Pues, si nos ke ta felis, nos tin ku sigui e ehèmpel di Yehova. Nos por hasi esei ora nos mustra interes den nos próhimo i ora nos kompartí loke nos tin generosamente. (Flp. 2:3, 4; Sant. 1:5) Dikon? Simplemente pasobra ta asina Yehova a krea nos. Apesar ku nos ta imperfekto, nos por imitá Yehova su generosidat.

³ Beibel ta siña nos kon pa ta hende generoso. Den e artíkulo akí, nos lo repasá algun lès ku Beibel ta siña nos tokante  generosidat. Ademas, nos lo mira kon ser generoso ta yuda nos haña e aprobashon di Dios i tambe kumpli ku e trabou ku el a duna nos. Anto nos lo analisá kon nos generosidat ta konektá ku nos felisidat i dikon nos tin ku sigui demostrá e kualidat akí.

4, 5. Ki ehèmpel di generosidat Yehova i Hesus a pone pa nos?

⁴ Yehova ke pa nos imit’é, i p’esei e ta felis ora nos ta generoso. (Efe. 5:1) E ke pa nos tambe ta felis. Esei ta masha bisto na e manera maravioso ku el a traha nos i na e kantidat grandi di kosnan bunita ku el a traha riba tera. (Sal. 104:24; 139:13-16) Pues, ora nos ta hasi esfuerso pa hasi otro hende felis, nos ta onra Yehova.

⁵ Kristiannan berdadero ta imitá Hesus, ya ku el a demostrá perfektamente kon un hende por ta generoso. Hesus mes a bisa: “E Yu di hende no a bini pa ser sirbí, sino pa sirbi i pa duna su alma komo reskate a kambio di hopi hende.” (Mat. 20:28) P’esei, apòstel Pablo a animá kristiannan: “Mantené den boso e aktitut mental akí ku tabatin tambe den Kristu Hesus, . . . el a entregá tur loke e tabatin i a tuma un kondishon di esklabo.” (Flp. 2:5, 7) Ta bon pa kada un di nos puntra nos mes: ‘Kon mi por sigui e ehèmpel di Hesus mas mihó ainda?’—Lesa 1 Pedro 2:21.

6. Ki lès Hesus a siña nos ku e ilustrashon di e bon samaritano? (Wak e promé plachi.)

⁶ Nos por haña Yehova su aprobashon si nos ta imitá e ehèmpel perfekto di dje i Hesus. Pa hasi esei, nos mester ta interesá den e bienestar di otro hende i buska maneranan pa yuda nan ku loke nan tin mester. Den e ilustrashon di e bon samaritano, Hesus a mustra bon kla ku e ta ferwagt ku su disipelnan lo hasi tur loke nan por pa duna otro hende un man, sin importá di unda nan ta bini. (Lesa Lukas 10:29-37.) Bo ta kòrda dikon Hesus a konta e ilustrashon ei? Pasobra un hòmber hudiu a puntr’é: “Ma ken realmente ta mi próhimo?” E kontesta di Hesus ta mustra ku meskos ku e samaritano nos mester ta dispuesto pa duna generosamente si nos ke tin e aprobashon di Dios.

7. Ki kuestion Satanas a lanta den Hòfi di Eden, i kon nos ta mustra ku nos ta konvensí ku Yehova su manera di hasi kos ta esun mihó?

⁷ Kristiannan tin motibu di sobra pa ta generoso. Un di nan ta ku generosidat ta konektá ku e kuestion ku Satanas a lanta den Hòfi di Eden. Kon asina? Wèl, Satanas a pretendé ku Adam ku Eva—i indirektamente, henter humanidat—lo tabata muchu mas felis si nan a konsentrá riba nan mes i hasi loke nan ke en bes di obedesé Dios. Eva tabata egoista i kier a bira manera Dios. Adam tabata egoista i kier a agradá su kasá mas ku Dios. (Gén. 3:4-6) Awe nos tur por mira e resultado di nan desishon. Egoismo no ta hiba na felisidat. Al kontrario, e ta kousa desaster. Pero ora nos ta generoso i ta pensa riba otro hende, nos ta mustra ku nos ta konvensí ku Dios su manera di hasi kos ta esun mihó.

8. Bon mirá, dikon Adam ku Eva mester a pensa riba otro hende?

⁸ Adam ku Eva tabata nan dos so den Hòfi di Eden, pero bon mirá, e instrukshonnan ku Yehova a duna nan mester  a laga nan pensa riba e bienestar di otro hende tambe. Yehova a bendishoná Adam ku Eva i a bisa nan pa yena e tera ku hopi yu i transform’é den un paradeis. (Gén. 1:28) Meskos ku e Kreador tabata masha interesá den e bienestar di su kreashon, asina e promé mayornan lo mester tabata interesá den e felisidat di e yunan ku nan lo a haña. Nan tabatin e trabou di hasi henter e tera un paradeis pa e desendientenan di Adam por a disfrutá di dje. Esei lo tabata un proyekto inmenso ku lo a rekerí kooperashon di henter e famia ku lo a sigui krese.

9. Dikon e trabou di hasi henter e tera un paradeis lo a hasi hende felis?

⁹ Pa hende perfekto por a hasi henter e tera un paradeis, nan lo mester a kooperá plenamente ku e propósito di Yehova, i di e manera ei nan lo a drenta su sosiegu. (Heb. 4:11) Imaginá kon felis hende lo a sinti nan ku e trabou ei! Nan lo a haña hopi bendishon di Yehova i sinti gran satisfakshon, ya ku nan lo a duna generosamente na bienestar di otro hende.

10, 11. Kon nos por kumpli ku e trabou di prediká i hasi disipel?

¹⁰ Awe, Yehova a duna su pueblo e trabou di prediká i hasi disipel. Pa kumpli ku e trabou ei, nos mester ta realmente interesá den e bienestar di otro hende. Nos ta logra perseverá den e trabou ei solamente si nos tin e motivashon korekto, esta, si nos ta stima Dios i stima nos próhimo.

¹¹ Den promé siglo, Pablo a bisa ku é ku algun otro kristian tabata “kompañero di trabou di Dios,” pasobra nan tabata prediká i siña hende e bèrdat di Reino. (1 Kor. 3:6, 9) Awe, nos tambe por ta “kompañero di trabou di Dios.” Kon? Esei ta ora nos ta usa nos tempu, rekursonan i energia generosamente pa kumpli ku e trabou di prediká ku Dios a duna nos pa hasi. Ki un tremendo privilegio!

12, 13. Segun bo, kiko ta e rekompensanan di e trabou di hasi disipel?

¹² Nos ta sinti nos masha felis ora ku generosamente nos ta duna di nos tempu i energia na e trabou di prediká i hasi disipel. Hopi ruman ku tabatin e privilegio di dirigí estudionan di Beibel progresivo ta bisa ku masha poko aktividat ta duna nan asina tantu satisfakshon. Ta un plaser pa mira kon kara di e studiantenan ta bria ora nan ta komprondé loke Beibel ta siña realmente, nan fe ta krese, nan ta hasi kambio den nan bida i ta kuminsá konta otro hende loke nan ta siñando. Hesus tambe a sintié masha felis ora ku e 70 disipelnan ku el a manda bai prediká “a bini bèk kontentu” debí na e bon eksperensianan ku nan tabatin.—Luk. 10:17-21.

 ¹³ Rònt mundu, publikadónan ta alegrá ora nan mira e bon efekto ku e mensahe di e bon notisia tin riba bida di hende. Por ehèmpel, un ruman muhé yòn soltero ku yama Anna kier a hasi mas den e sirbishi di Yehova. Pues, el a bai biba den un region di Ost Europa kaminda tin mester di mas publikadó. * El a skirbi: “Loke mas mi ta gusta ta ku tin hopi hende ku ke studia Beibel. Mi sirbishi ta hasi mi masha felis. Ora mi yega kas, mi no tin tempu pa pensa riba mi problemanan. Mi ta keda pensa riba e hendenan ku mi ta studia kuné, riba nan problemanan i nan preokupashonnan. Mi ta pensa kon mi por animá nan i yuda nan na un manera práktiko. Awor mi ta konvensí ku ‘tin mas felisidat den duna ku den risibí.’”—Echo. 20:35.

14. Kon bo por disfrutá di e predikashon asta ora hende no ta skucha?

¹⁴ Nos por sinti nos bon ku nos a duna hende e oportunidat di aseptá e bon notisia, aunke nan skohe pa no skucha. Al fin i al kabo, nos trabou ta kasi meskos ku esun di profeta Ezekiel. Yehova a bis’é: “Ma abo, bisa nan mi palabranan, sea ku nan skucha òf laga di skucha.” (Eze. 2:7; Isa. 43:10) Pues, asta si algun hende no balorá nos mensahe, nos sa ku Yehova sí ta balorá nos esfuerso. (Lesa Hebreonan 6:10.) Un ruman hòmber a demostrá un bon aktitut relashoná ku esaki. El a skirbi lo siguiente tokante su sirbishi: “Nos a planta, nos a muha i nos a hasi orashon ku e speransa ku Yehova lo laga e interes krese.”—1 Kor. 3:6.

15. Kon hopi hende ta reakshoná riba nos aktonan di generosidat, i esei lo mester influensiá nos manera di trata otro hende?

¹⁵ Meskos ku Yehova, Hesus tambe ke pa nos ta felis. Nos por ta felis ora nos ta generoso. Ta p’esei el a animá nos: “Kustumbrá duna, i hende lo duna boso. Nan lo basha den boso skochi un midí kompleto, bon primí, bon sagudí i ku ta basha over. Pasobra ku e midí ku boso ta midi, nan lo midi pa boso.” (Luk. 6:38)  Klaru ku ora nos ta generoso, no ta tur hende lo aseptá ku gratitut loke nos ta ofresé. Pero bo generosidat lo por motivá esnan ku sí ta gradisidu pa nan tambe mustra generosidat, i esei por pone otronan sigui nan ehèmpel. P’esei kustumbrá duna, sea ku hende ta apresiá esei òf nò. Bo no sa nunka ki bon bo por logra ku un simpel akto di generosidat.

16. Ku ken nos mester ta generoso, i dikon?

¹⁶ Hende ku di bèrdat ta generoso no ta duna pa nan haña bèk. P’esei Hesus a bisa: “Ora bo pone un bankete, invitá hende pober, mankaron, koho i siegu; i lo bo ta felis, pasobra nan no tin nada pa paga bo bèk.” (Luk. 14:13, 14) Beibel ta bisa: “Esun ku ta generoso lo ta bendishoná,” òf felis, i tambe “bendishoná ta esun ku ta kòrda riba e pobernan.” (Pro. 22:9; Sal. 41:1) Sí, nos mester duna pasobra ta un plaser pa yuda otro hende.

17. Kiko ta e kosnan ku nos por duna pa nos por ta felis?

¹⁷ Ora Pablo a sita e palabranan di Hesus, esta, ku “tin mas felisidat den duna ku den risibí,” e no tabata referí na solamente dunamentu di kos material, sino tambe na dunamentu di animashon, guia i yudansa na hende den nesesidat. (Echo. 20:31-35) I Pablo a siña nos ku palabra i ku echo ku ta importante pa nos ta generoso ku nos tempu, nos energia, nos atenshon i nos amor.

18. Kiko hopi investigadó i eksperto a bisa tokante dunamentu?

¹⁸ Investigadónan ku ta studia komportashon humano tambe a deskubrí ku dunamentu ta hasi hende felis. Segun un artíkulo, hende ta bisa ku nan ta sinti nan hopi mas felis despues ku nan hasi un bon obra pa otro hende. Segun investigadónan, ora nos yuda nos próhimo, nos ta sinti ku nos bida tin mas nifikashon i propósito pasobra esei ta satisfasé un nesesidat humano básiko. P’esei, ekspertonan hopi biaha ta rekomendá hende pa hasi trabou boluntario pa nan por ta mas salú i felis. Esei no ta un sorpresa pa nos, ya ku nos amoroso Kreador, Yehova, semper a bisa den su Palabra ku dunamentu ta hasi nos felis.—2 Tim. 3:16, 17.

19, 20. Dikon bo ke ta generoso?

¹⁹ Pero no ta fásil pa sigui demostrá generosidat ora bo ta rondoná pa hende egoista ku ta pone nan propio interes promé. Ma Hesus a bisa ku e dos mandamentunan di mas importante ta pa stima Yehova ku henter nos kurason, alma, mente i forsa i pa stima nos próhimo meskos ku nos mes. (Mar. 12:28-31) Manera nos a mira den e artíkulo akí, hende ku ta stima Yehova ta imit’é. Tantu Yehova komo Hesus ta gusta duna, i nan ta animá nos pa hasi meskos, pasobra esei lo hasi nos realmente felis. Nos esfuerso pa ta generoso den loke nos ta hasi pa Dios i pa nos próhimo, lo trese onor pa Yehova i lo benefisiá nos mes i otro hende.

²⁰ Sin duda, bo ta hasiendo bo bèst kaba pa yuda bo próhimo, foral bo rumannan den fe. (Gal. 6:10) Si bo sigui hasi esei, otro hende sigur lo gradisí bo i stima bo pa esei, i lo bo ta felis. Proverbionan 11:25 ta bisa: “E hende generoso lo prosperá, i esun ku duna di bebe tambe lo haña di bebe.” Klaru ku den nos bida di tur dia i den nos sirbishi kristian tin hopi manera ku nos por ta generoso i amabel, i ku nos por yuda otro hende. E siguiente artíkulo lo trata algun di nan.