1. Yini lesikhombisa kutsi Jehova uyephana?

JEHOVA abengaticabangeli yena kuphela ngisho noma asengakawadali emazulu nemhlaba. “Nkulunkulu lojabulako” Jehova uyatsandza kupha bantfu tipho letinhle. (1 Thim. 1:11; Jak. 1:17) Ngenca yekutsi ufuna natsi sijabule, usifundzisa kutsi sibaphe labanye.​—Rom. 1:20.

2, 3. (a) Kungani kupha kusenta sijabule? (b) Sitawucoca ngani kulesihloko?

² Nkulunkulu wadala bantfu ngemfanekiso wakhe. (Gen. 1:27) Sadalwa saba nebuntfu lobufana nebakhe futsi kufanele simlingise. Kuze sijabule futsi senetiseke, kufanele silingise sibonelo saJehova ngekutsi sibatsandze labanye futsi sibaphe ngalokusuka enhlitiyweni. (Fil. 2:3, 4; Jak. 1:5) Kungani? Kungoba Jehova wasidala saba ngumfanekiso wakhe. Ngisho noma sinesono, singakhona kulingisa Jehova futsi siphane.

 ³ LiBhayibheli liyasichazela kutsi singabapha njani labanye ngalokusuka enhlitiyweni. Ase sicoce ngetifundvo lesingatitfola eBhayibhelini letimayelana nekupha. Sitawubona kutsi kupha labanye kungasenta njani kutsi sitfole umusa waNkulunkulu nekutsi kungasisita njani sente umsebenti Nkulunkulu lasinike wona. Sitawuphindze sihlole nekutsi kupha kungasenta njani sijabule kanye nekutsi kungani kufanele siphe labanye.

4, 5. Jehova naJesu basibekele njani sibonelo sekupha?

⁴ Jehova ufuna kutsi bantfu bamlingise, ngako uyajabula nangabe sipha labanye. (Ef. 5:1) Jehova ufuna kutsi sijabule. Loku kubonakala ngalokucacile ngoba usidale ngendlela lemangalisako futsi wadala umhlaba kanye netintfo letinhle letikuwo. (Hla. 104:24; 139:13-16) Ngako nangabe silwela kwenta labanye bajabule, sisuke sijabulisa Jehova.

⁵ EmaKhristu eliciniso alingisa Khristu lowasibekela sibonelo lesihle kakhulu sekutsi siphane. Jesu watsi: “Ngobe neNdvodzana yemuntfu ayizange itele kutewusetjentelwa, kodvwa yetela kutewuba yinceku nekunikela ngemphefumulo wayo kutsi ube yinhlawulo yalabanyenti.” (Mat. 20:28) Kungako nemphostoli Pawula ancenga emaKhristu watsi: “Hlalani ninalomcondvo naKhristu Jesu labenawo.  . . watidzela, waba njengesigcili futsi waba ngumuntfu.” (Fil. 2:5, 7) Ngamunye wetfu wenta kahle ngekutibuta: ‘Ngingakhona yini kulandzela sibonelo saJesu edvutane kwendlula indlela lengenta ngayo nyalo?’​—Fundza 1 Phetro 2:21.

6. Ngusiphi sifundvo Jesu lasifundzisa sona kulomfanekiso wemSamariya? (Buka sitfombe lesisekucaleni kwalesihloko.)

⁶ Singatfola umusa waJehova nangabe silingisa sibonelo sakhe kanye nesaKhristu ngekutsi siyinake inhlalakahle yalabanye siphindze sinakekele tidzingo tabo. Jesu wakhombisa kutsi kubalulekile kwenta njalo ngesikhatsi asho umfanekiso wemSamariya. (Fundza Lukha 10:29-37.) Wafundzisa balandzeli bakhe kutsi basite tonkhe tinhlobo tebantfu. Uyakhumbula yini kutsi kungani Jesu asho lomfanekiso? Kungobe indvodza lengumJuda yambuta kutsi: “Ngubani vele longumakhelwane wami?” Imphendvulo yaJesu isikhombisa kutsi njengalomSamariya, kufanele sikulungele kupha labanye nangabe sifuna kutfola umusa waJehova.

7. Singakhombisa njani kutsi siyakholelwa kutsi indlela yaJehova yekwenta tintfo ngiyo lekahle?

⁷ Lokwenteka ensimini yase-Edeni kungulesinye setizatfu letisenta siphane. Sathane watsi bo-Adamu na-Eva bebatawuphila imphilo lejabulisako nangabe bangamlaleli Jehova futsi batinake bona. Eva bekanebugovu futsi bekafuna kufana naNkulunkulu. Adamu naye bekanebugovu ngobe bekafuna kujabulisa Eva kunekutsi ajabulise Nkulunkulu. (Gen. 3:4-6) Loko kwaba nemiphumela lebuhlungu. Kuyacaca kutsi umuntfu ngeke ajabule nangabe anebugovu. Kodvwa nangabe site bugovu futsi sipha labanye, sisuke sikhombisa kutsi siyakholelwa kutsi indlela yaJehova yekwenta tintfo ngiyo lekahle.

8. Kungani bo-Adamu na-Eva bekufanele babacabangele labanye?

⁸ Nkulunkulu waniketa bo-Adamu na-Eva ticondziso lebetitawubenta babacabangele  labanye, ngisho noma bebahlala bodvwa ensimini yase-Edeni. Jehova wababusisa futsi wabakhutsata kutsi batalane bandze, bagcwalise umhlaba, bawuncobe. (Gen. 1:28) UMdali bekafisa kutsi tidalwa takhe tijabule, ngako bo-Adamu na-Eva bekufanele batimisele kujabulisa bantfwana babo. Umhlaba wonkhe bekufanele bawente ube liPharadisi kuze kuzuze titukulwane ta-Adamu. Lomndeni lobewukhula bekufanele ubambisane kuze ukhone kwenta lomsebenti lomkhulu.

9. Kungani kwenta umhlaba wonkhe ube lipharadisi bekutawenta bantfu bajabule?

⁹ Bantfu labete sono bekufanele basebente naJehova kuze bente intsandvo yakhe futsi bente wonkhe umhlaba ube lipharadisi. Nabenta njalo bebatawungena ekuphumuleni kwakhe. (Heb. 4:11) Cabanga ngendlela lebekujabulisa kuphindze kwenetise ngayo kwenta lomsebenti. Kutidzela kute banakekele inhlalakahle yalabanye bekutawubenta batfole tibusiso letinyenti kanye nekwenetiseka.

10, 11. Singawenta njani umsebenti wekushumayela newekwenta bafundzi?

¹⁰ Lamuhla Jehova unikete bantfu bakhe umsebenti wekushumayela kanye newekwenta bafundzi. Kuze sikhone kwenta lomsebenti, kufanele siyikhatsalele mbamba inhlalakahle yalabanye. Sitawukhona kuphumelela kulomsebenti nangabe sitsandza Jehova kanye nabomakhelwane betfu.

¹¹ Pawula watsi yena kanye nalamanye emaKhristu ‘batisebenti letikanye naNkulunkulu,’ ngobe bebashumayela futsi bafundzisa labanye emaciniso. (1 Khor. 3:6, 9) Natsi lamuhla singaba “tisebenti letikanye naNkulunkulu” nangabe sinikela ngekutitsandzela ngesikhatsi setfu, emandla etfu kanye netintfo lesinato kuze sisekele umsebenti wekushumayela. Leli lilungelo lelikhulu kakhulu!

12, 13. Ngumuphi umphumela longawutfola nawenta umsebenti wekwenta bafundzi?

¹² Siyajabula nangabe sisebentisa sikhatsi setfu nemandla etfu emsebentini wekushumayela newekwenta bafundzi. Bazalwane nabodzadze labanyenti lababe nelilungelo lekuchuba tifundvo teliBhayibheli letitfutfukako batsi kute lokunye lokujabulisa kakhulu kwendlula kwenta lomsebenti. Sijabula kakhulu nasibona indlela bantfu labajabula ngayo nabawacondza emaciniso laseBhayibhelini, baba nekukholwa lokucinile, benta tingucuko letitsite ekuphileni kwabo, futsi bacala kutjela labanye ngaloko lebakufundzako. NaJesu wajabula kakhulu ngesikhatsi bafundzi labangu-70 lebebayoshumayela  “babuya bajabulile” ngenca yemiphumela lemihle lebebayitfolile.​—Luk. 10:17-21.

¹³ Bazalwane nabodzadze labasemhlabeni wonkhe bayajabula nababona indlela umlayeto weliBhayibheli lobasita ngayo bantfu kutsi bashintje kuphila kwabo. Cabanga ngalokwenteka ku-Anna * longudzadze losemusha lowaya kuyokhonta endzaweni lenesidzingo lesikhulu e-Eastern Europe. Utsi: “Ngiyajabula ngobe kumelula kutfola tifundvo teliBhayibehli kulendzawo. Esikhundleni sekutsi nangifika ekhaya ngicabange ngetinkinga tami, ngiyaye ngicabange kakhulu ngebantfu lengifundza nabo liBhayibheli, tinkinga labanato kanye netintfo letibakhatsatako. Ngifuna tindlela lengingabasita ngato ngiphindze ngibakhutsate. Sengiciniseka mbamba kutsi ‘kunenjabulo lenyenti ekupheni kunasekwemukeleni.’”​—Imis. 20:35.

14. Yini lengasenta sijabule ngisho nobe bambalwa bantfu labalalela tindzaba letimnandzi?

¹⁴ Singatfola injabulo nasiniketa bantfu litfuba lekuva tindzaba letimnandzi ngisho noma bakhetsa kungatilaleli. Umsebenti wetfu lamuhla uyafana nemsebenti lebewentiwa ngumphrofethi Hezekeli, Jehova latsi kuye: “Kufanele wena ukhulume emavi ami kubo, nome bayakulalela nome abakulaleli.” (Hez. 2:7; Isa. 43:10) Jehova uyajabula ngemetamo lesiyentako ngisho noma bantfu bangasilaleli. (Fundza Hebheru 6:10.) Mayelana nemsebenti wekushumayela, lomunye umzalwane watsi: “Tsine siyahlanyela, sinisele, bese sithantazela kutsi Jehova akhulise.”​—1 Khor. 3:6.

15. Kufanele siphe nangabe bantfu babonga kuphela yini? Chaza.

¹⁵ NjengaJehova, Jesu ufuna sijabule. Bantfu labanyenti bayajabula nasibapha. Jesu watsi: “Phanini labanye, nani  nitawuphiwa. Batawunipha lokunyenti kakhulu, lokungagcishwa kugcwale konkhe leningaphatsa ngako. Ngobe ngendlela lenibaphatsa ngayo labanye nani nitawuphatfwa ngayo.” (Luk. 6:38) Kuliciniso kutsi akusibo bonkhe bantfu labatawujabula nangabe siphana. Kodvwa nangabe siphana, singakhutsata nalabanye kutsi nabo baphane. Chubeka wephana ngisho noma kubonakala ngatsi bantfu ababongi ngoba kungenteka loko kusite bantfu labanyenti.

16. Ngubaphi bantfu lokufanele sibaphe, futsi kungani?

¹⁶ Bantfu labephanako abaphi ngobe bafuna kuzuza lokutsite. Jesu watsi: “Nawente lidzili, mema labeswele, labakhubatekile, tinchute netimphumphutse, futsi utawujabula ngekutsi ngeke bakumeme.” (Luk. 14:13, 14) LiBhayibheli litsi: “Lowephanako naye uyawubusiswa.” Liphindze litsi: “Ubusisiwe umuntfu lonakekela lobutsakatsaka.” (Taga 22:9; Hla. 41:1) Kufanele siphe labanye ngoba sijabula kakhulu nangabe sibasita.

17. Ngutiphi tindlela tekupha letingasenta sijabule?

¹⁷ Ngesikhatsi Pawula acaphuna emavi aJesu latsi “kunenjabulo lenyenti ekupheni kunasekwemukeleni” bekangasho kupha ngetintfo letibonakalako kuphela, kodvwa bekasho nekukhutsata, kucondzisa kanye nekusita labo labadzinga lusito. (Imis. 20:31-35) Pawula wasifundzisa ngemavi nangetento kutsi kubalulekile kupha labanye sikhatsi setfu, emandla etfu, sibanake siphindze sibatsandze.

18. Yini leshiwo bacwaningi labanyenti ngekupha?

¹⁸ Bacwaningi batfole kutsi kupha kwenta bantfu bajabule. Lesinye sihloko satsi bantfu bajabula kakhulu nangabe bentela labanye tintfo letinhle. Bacwaningi batsi kuphila kwetfu kuba nenjongo nasisita labanye. Tati titsi bantfu benta umsebenti wekuvolontiya kute bative baphilile futsi bajabulile. Loko akumangalisi ngoba Jehova uMdali wetfu lositsandzako utsi kupha kukwenta ujabule.​—2 Thim. 3:16, 17.

19, 20. Yini lekwenta ufune kupha labanye?

¹⁹ Kungaba matima kuhlale sinemoya wekupha nangabe labanye bantfu batinaka bona kuphela. Noma kunjalo, Jesu watsi imiyalo lemikhulu kunayo yonkhe kutsi utsandze Jehova Nkulunkulu wakho ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho, nangawo onkhe emandla akho futsi kufanele utsandze makhelwane wakho njengobe utitsandza wena. (Mak. 12:28-31) Njengobe sesifundzile kulesihloko, labo labatsandza Jehova bayamlingisa. Jehova naJesu bayephana futsi basikhutsata kutsi sibalingise ngoba loku kutasenta sitfole injabulo sibili. Nangabe setama kuba nemoya wekupha nasikhonta Nkulunkulu siphindze sisite nabomakhelwane betfu, sitawujabulisa Jehova futsi loku kutawuzuzisa tsine kanye nalabanye.

²⁰ Asingabati kutsi uyatikhandla kute usite labanye, ikakhulukati labo labahlobene nawe ekukholweni. (Gal. 6:10) Nangabe uchubeka wenta njalo, utawujabula futsi labanye bantfu batakutsandza. Umbhalo weTaga 11:25 utsi: “Umuntfu lowephanako, lanako kuyandza; lona lonatsisa lowomile naye uyawunatsiswa.” Ekuphileni kwetfu kanye nasemsebentini wekushumayela sinematfuba lamanyenti ekupha ngenhlitiyo levulekile. Esihlokweni lesilandzelako sitawucoca ngaloko.