1. Saida mak hatudu katak Jeová laran-luak tebes?

ANTES Jeová kria buat hotu-hotu, nia mesak deʼit. Maski nuneʼe, nia la hanoin deʼit ninia an. Nia deside atu kria kriatura seluk iha lalehan no rai hodi sira mós bele goza moris. Sin, Jeová nuʼudar “Maromak neʼebé kontente”, gosta atu fahe buat neʼebé diʼak. (1 Timóteo 1:11; Tiago 1:17) Jeová hanorin ita oinsá atu hatudu laran-luak tanba nia mós hakarak ita atu sai kontente.​—Roma 1:20.

2, 3. (a) Tanbasá mak hatudu laran-luak lori ksolok ba ita? (b) Ita sei koʼalia kona-ba saida iha lisaun neʼe?

² Maromak kria ema tuir ninia ilas. (Gênesis [Kejadian] 1:27) Neʼe katak Jeová kria ita ho hahalok sira neʼebé nia iha. Tan neʼe, atu hetan ksolok neʼebé loos no bensaun husi Jeová, ita presiza halo tuir ninia ezemplu hodi hatudu interese no laran-luak ba ema seluk. (Filipe 2:3, 4; Tiago 1:5) Tanbasá? Tanba neʼe mak dalan neʼebé Jeová kria ita. Maski ita la perfeitu, ita bele banati-tuir Jeová hodi hatudu hahalok laran-luak.

 ³ Iha lisaun neʼe ita sei haree saida mak Bíblia hanorin kona-ba laran-luak. Ita sei aprende tanbasá mak Jeová sente kontente hodi haree ita hatudu laran-luak, oinsá mak laran-luak bele ajuda ita atu halo serbisu neʼebé Jeová fó ba ita, no oinsá mak hahalok laran-luak liga ho haksolok. Ita mós sei koʼalia kona-ba tanbasá mak ita tenke kontinua hatudu laran-luak.

4, 5. Jeová no Jesus hatudu ezemplu saida mai ita kona-ba hahalok laran-luak?

⁴ Jeová hakarak ita banati-tuir nia, tan neʼe nia haksolok atu haree ita hatudu laran-luak. (Éfeso 5:1) Jeová kria ita iha dalan neʼebé kmanek tebes, no nia halo mundu neʼe ho buat furak oioin ba ita atu goza. Buat sira-neʼe hatudu katak Jeová hakarak tebes ema atu sai kontente. (Salmo [Mazmur] 104:24; 139:13-16) Tan neʼe mak bainhira ita halo ema seluk kontente, ita fó glória ba Jeová.

⁵ Jesus hatudu ezemplu neʼebé perfeitu ba ema kona-ba oinsá bele sai laran-luak, no ita hakarak banati-tuir ninia ezemplu. Jesus dehan katak Oan-Mane husi ema mai, “laʼós atu ema serbí nia, maibé atu serbí no atu fó nia moris hodi sosa fali ema barak”. (Mateus 20:28) Tan neʼe apóstolu Paulo fó laran-manas ba ema kristaun: “Kontinua hatudu hahalok neʼebé Kristu Jesus mós hatudu . . . Nia husik buat hotu neʼebé nia iha no sai nuʼudar atan ida.” (Filipe 2:5, 7) Husu ba ita-nia an: ‘Oinsá mak haʼu bele halo tuir liután Jesus nia ezemplu?’​—Lee 1 Pedro 2:21.

6. Jesus hanorin saida ba ita liuhusi ai-knanoik kona-ba ema Samaria neʼebé laran-diʼak? (Haree dezeñu iha leten.)

⁶ Jeová kontente hodi haree ita halo tuir ezemplu perfeitu neʼebé nia no Jesus hatudu ba ita. Ita presiza hatudu interese ba ema seluk no buka dalan oioin atu ajuda sira. Iha ai-knanoik kona-ba ema Samaria neʼebé laran-diʼak, Jesus hatudu katak importante tebes ba ninia dixípulu hotu atu fó ajuda ba ema seluk, maski ema neʼe mai husi rai neʼebé la hanesan. (Lee Lucas 10:29-37.) Sei hanoin-hetan ka lae, tanbasá mak Jesus konta istória neʼe? Neʼe tanba ema judeu ida husu ba nia: “Sé mak haʼu-nia maluk?” Resposta neʼebé Jesus fó, hanorin ita katak ita tenke hatudu laran-luak hanesan ema Samaria neʼe se ita hakarak halo kontente Jeová.

7. Oinsá mak laran-luak liga ho buat neʼebé akontese iha jardín Eden?

⁷ Razaun ida tan tanbasá ita tenke hatudu hahalok laran-luak mak liga ho buat neʼebé akontese iha jardín Eden. Oinsá? Satanás hatete katak se Adão no Eva mak tau fokus ba sira rasik nia interese duké halo tuir Maromak, sira-nia moris sei sai kontente liután. Eva halo buat neʼebé hanoin an deʼit tanba nia hakarak sai hanesan Maromak. Adão mós hatudu hahalok hanoin an deʼit no nia hakarak halo kontente Eva liu fali halo kontente Maromak. (Gênesis [Kejadian] 3:4-6) Neʼe lori rezultadu neʼebé aat tebes. Hahalok hanoin an deʼit sei nunka lori ksolok. Maibé se ita mak laran-luak, ita hatudu katak ita fiar buat neʼebé Jeová husu ita atu halo mak diʼak liu hotu.

8. Tanbasá mak Adão no Eva presiza hanoin kona-ba ema seluk?

⁸ Maski Adão no Eva mesak deʼit iha jardín Eden, maibé sira presiza hanoin kona-ba ema seluk. Tanbasá? Tanba  Jeová fó ona knaar ba sira atu halo. Nia haruka sira atu halo mundu neʼe nakonu ho sira-nia oan no halo mundu tomak atu sai paraízu. (Gênesis [Kejadian] 1:28) Jeová hakarak ema hotu iha rai atu moris ho kontente, no Adão no Eva mós tenkesér hanoin kona-ba sira-nia oan nia interese neʼe. Jeová hakarak sira hotu atu serbisu hamutuk hodi halo mundu neʼe sai paraízu tanba projetu neʼe boot tebes!

9. Tanbasá mak halo mundu neʼe sai paraízu sei lori ksolok ba ema?

⁹ Se Adão no Eva la halo sala, mundu agora nakonu ho ema neʼebé perfeitu. Ema perfeitu mós presiza serbisu hamutuk ho Jeová atu bele halo mundu neʼe sai paraízu no kumpre Jeová nia hakarak sira. Imajina toʼok ksolok neʼebé sira sei hetan husi serbisu neʼe! Jeová mós sei fó bensaun barak ba sira tanba sira la hanoin an, maibé hatudu interese ba ema seluk.

10, 11. Oinsá mak ita bele kumpre ita-nia knaar atu haklaken no ajuda ema sai Jesus nia dixípulu?

¹⁰ Ohin loron, Jeová fó serbisu espesiál ba ita atu halo. Nia hakarak ita atu haklaken no ajuda ema sai Jesus nia dixípulu. Ita presiza hatudu interese ba ema hodi bele kumpre knaar neʼe. No mós, atu ita bele kontinua halo serbisu neʼe, ita tenke hatudu motivu neʼebé loos, neʼe mak domin ba Jeová no domin ba ema.

¹¹ Apóstolu Paulo refere ba ninia an no ema kristaun seluk iha ninia tempu hanesan “Maromak nia maluk serbisu-naʼin” tanba sira hotu haklaken no hanorin lia-loos ba ema. (1 Korinto 3:6, 9) Ohin loron ita mós bele sai “Maromak nia maluk serbisu-naʼin” liuhusi fó ita-nia tempu, forsa, no rikusoin ho laran-luak atu halo serbisu neʼebé Maromak fó ba ita. Ida-neʼe priviléjiu neʼebé boot tebes!

12, 13. Ajuda ema sai Jesus nia dixípulu fó kolen saida ba Ita?

¹² Fó ita-nia tempu no forsa ho laran-luak hodi haklaken no hanorin sei lori ksolok neʼebé boot. Irmaun-irmán barak neʼebé iha ona oportunidade atu fó estuda Bíblia ba ema, sira konkorda kona-ba neʼe. Ita kontente tebes hodi haree ita-nia estudante sira haksolok bainhira sira buka-hatene saida mak Bíblia hanorin, sira-nia fiar aumenta, halo mudansa ba sira-nia moris, no hahú fó sai fali ba ema seluk kona-ba buat neʼebé sira aprende. Jesus mós sente hanesan neʼe bainhira ninia dixípulu naʼin-70 neʼebé nia haruka bá haklaken “fila ho haksolok” tanba sira hetan rezultadu neʼebé diʼak.​—Lucas 10:17-21.

¹³ Ita-nia irmaun-irmán sira iha mundu tomak mós haksolok bainhira sira haree Bíblia nia mensajen ajuda ema hadiʼa  sira-nia moris. Porezemplu, irmán joven ida naran Anna hakarak halo serbisu liután ba Jeová. * Tan neʼe nia muda ba fatin ida iha Europa parte leste neʼebé presiza liután haklaken-naʼin. Nia dehan: “Iha fatin neʼe, iha oportunidade barak atu estuda Bíblia ho ema, no haʼu gosta tebes. Haklaken fó ksolok boot tebes ba haʼu. Bainhira haʼu fila husi haklaken, haʼu la iha tempu atu hanoin kona-ba haʼu-nia an deʼit. Haʼu hanoin kona-ba problema no preokupasaun sira neʼebé estudante Bíblia sira hasoru. Haʼu buka dalan oioin atu fó laran-manas ba sira no ajuda sira. Halo nuneʼe ajuda haʼu hodi haree katak ‘kontente liu atu fó duké simu’”.​—Apóstolu 20:35.

14. Oinsá mak Ita bele hetan ksolok maski ema lakohi rona?

¹⁴ Maski ema lakohi rona kuandu ita haklaken, ita bele sente kontente tanba ita fó oportunidade ba sira atu rona kona-ba Bíblia nia mensajen. Jeová hakarak ita halo buat neʼebé hanesan nia husu Ezequiel atu halo: “Ó tenke fó sai haʼu-nia liafuan ba sira maski sira rona ka la rona.” (Ezequiel [Yehezkiel] 2:7; Isaías [Yesaya] 43:10) Tan neʼe, maski ema simu ka la simu, Jeová hafolin ita-nia hakaʼas-an sira. (Lee Ebreu 6:10.) Irmaun ida koʼalia kona-ba ninia serbisu haklaken hodi dehan: “Ita kuda ona, rega ona, no halo ona orasaun, hein deʼit Jeová mak sei halo fini sira-neʼe moris.”​—1 Korinto 3:6.

15. Ema barak sente oinsá kona-ba laran-luak neʼebé ita hatudu ba sira, no tanbasá mak ita la bele rende an atu hatudu hahalok neʼe?

¹⁵ Jesus mós hakarak ita atu hatudu laran-luak tanba neʼe bele halo ita sai kontente. Kuandu ita hatudu laran-luak ba ema seluk, neʼe sei book sira atu hatudu fali laran-luak ba ita. Tan neʼe mak nia fó laran-manas ba ita hodi dehan: “Fó ba ema seluk, no sira mós sei fó ba imi. Ho laran-diʼak sira sei fakar iha imi-nia bolsu, doko tan, hanehan tun, no sai nakonu liu. Basá buat neʼebé imi sukat ba ema, nuneʼe mós ema sei sukat ba imi.”  (Lucas 6:38) Ita hatene katak laʼós ema hotu hafolin laran-luak neʼebé ita hatudu ba sira. Tan neʼe, maski sira la agradese, hatudu nafatin laran-luak. Ita la bele hatene liuhusi hahalok laran-luak neʼebé simples sei lori rezultadu saida.

16. Tanbasá mak ita hakarak hatudu laran-luak ba ema seluk?

¹⁶ Ema neʼebé hatudu laran-luak fó laʼós hodi hein atu simu fali buat ruma. Jesus dehan: “Kuandu ó halo festa, konvida ema kiak, ain-kudeʼik, matan-delek, no ema aleijadu seluk; no ó sei haksolok, tanba sira la iha kbiit atu selu fali ó.” (Lucas 14:13, 14) Bíblia mós dehan: “Ema neʼebé laran-luak sei hetan bensaun”, no “ksolok ba ema neʼebé hanoin ema kiʼik sira”. (Provérbios [Amsal] 22:9; Salmo [Mazmur] 41:1) Sin, ita tenke hatudu laran-luak tanba ita hakarak tebes atu fó ajuda ba ema seluk.

17. Fó iha dalan saida deʼit mak bele halo ita haksolok?

¹⁷ Bainhira Paulo temi fali Jesus nia liafuan neʼebé dehan “kontente liu atu fó duké simu”, nia la koʼalia deʼit kona-ba fó sasán. Maibé mós kona-ba fó laran-manas, matadalan, no fó ajuda ba ema neʼebé presiza ajuda. (Apóstolu 20:31-35) Liuhusi buat neʼebé Paulo hatete no halo, nia hanorin mai ita katak, importante tebes atu fó ho laran-luak ita-nia tempu, forsa, atensaun, no domin.

18. Peskizadór barak hatete saida kona-ba hatudu laran-luak?

¹⁸ Peskizadór sira neʼebé estuda kona-ba ema nia hahalok mós hatete katak, fó halo ema kontente. Tuir relatóriu ida, ema hatete katak bainhira halo buat neʼebé diʼak ba ema seluk, sira sente kontente liután. Peskizadór sira hatete, se ita fó ajuda ba ema seluk, ita bele sente ita-nia moris iha folin. Tan neʼe, matenek-naʼin balu fó sujestaun ba ema atu halo serbisu voluntáriu hodi bele iha saúde neʼebé diʼak liu no kontente liután. Ita la hakfodak ho komentáriu sira-neʼe tanba ita-nia Kriadór Jeová sempre hatete katak fó sei halo ita kontente.​—2 Timóteo 3:16, 17.

19, 20. Tanbasá mak Ita hakarak hatudu laran-luak?

¹⁹ Se ema seluk mak hanoin an deʼit, dala ruma susar ba ita atu kontinua hatudu hahalok laran-luak. Maibé Jesus fó-hanoin ba ita katak, mandamentu rua neʼebé boot liu mak atu hadomi Jeová ho laran, moris, neon, no forsa tomak no atu hadomi ema seluk hanesan ita-nia an rasik. (Marcos 12:28-31) Iha lisaun neʼe ita aprende ona katak ema neʼebé hadomi Jeová hakarak banati-tuir nia. Jeová no Jesus laran-luak tebes, no sira hakarak ita atu halo tuir sira-nia ezemplu, tanba neʼe bele halo ita kontente husi laran. Se ita mak hakaʼas an atu hatudu laran-luak liuhusi buat neʼebé ita halo ba Maromak no ema, ita sei fó glória ba Jeová no mós lori benefísiu ba ita-nia an no ema seluk.

²⁰ Karik Ita hakaʼas an daudaun atu hatudu laran-luak no ajuda ema seluk, liuliu Ita-nia irmaun-irmán sira. (Galásia 6:10) Se Ita mak kontinua atu halo buat sira-neʼe, ema sei agradese no hadomi Ita, no Ita sei hetan ksolok. Bíblia dehan: “Ema laran-luak sei moris diʼak, no ema neʼebé fó kmaan ba ema seluk, nia rasik mós sei simu kmaan.” (Provérbios [Amsal] 11:25) Iha ita-nia moris no serbisu haklaken, iha dalan oioin neʼebé ita bele fó ba ema seluk, hatudu laran-diʼak no laran-luak. Ita sei koʼalia kona-ba dalan balu ita bele halo nuneʼe iha lisaun tuirmai.