1. Olsem wanem ol samting Jehova i wokim i kamapim klia pasin bilong em long givim samting?

JEHOVA i stap em yet inap longpela taim tru paslain long em i wokim ol samting, tasol em i no tingim em yet. Em i givim presen bilong laip long ol spirit na ol manmeri. Jehova em “God bilong amamas” na em i save givim ol gutpela samting long yumi. (1 Tim. 1:11; Jems 1:17) Em i laik bai yumi tu i stap amamas, olsem na em i skulim yumi long pasin bilong givim samting.—Rom 1:20.

2, 3. (a) Bilong wanem pasin bilong givim samting i save mekim yumi amamas? (b) Yumi bai skelim wanem ol samting long dispela stadi?

² God i wokim yumi i kamap olsem em yet. (Stt. 1:27) Olsem na yumi inap kamapim ol pasin bilong em. Sapos yumi laik stap amamas na pilim olsem laip bilong yumi i gat as bilong en, orait yumi mas bihainim eksampel bilong Jehova long tingim ol narapela na givim samting long ol. (Fili. 2:3, 4; Jems 1:5) Jehova i wokim yumi long kamapim dispela pasin, olsem na taim yumi givim samting long narapela, yumi save amamas. Maski yumi gat sin, yumi inap bihainim pasin bilong Jehova long givim samting.

³ Baibel i tokim yumi long olsem wanem yumi inap bihainim pasin bilong givim samting. Yumi ken tingim sampela tok em Baibel  i stori long en long pasin bilong givim samting. Yumi bai skelim olsem wanem pasin bilong givim samting i mekim na God i orait long yumi, na olsem wanem dispela pasin i helpim yumi long inapim wok God i givim long yumi. Na tu, yumi bai skelim olsem wanem pasin bilong givim samting inap mekim yumi stap amamas, na risen na yumi mas wok yet long kamapim dispela pasin.

4, 5. Olsem wanem Jehova na Jisas i stap gutpela eksampel long pasin bilong givim?

⁴ Jehova i laik bai yumi ol man i bihainim pasin bilong em, olsem na taim yumi givim samting long ol narapela, dispela i mekim em i amamas. (Efe. 5:1) God i wokim yumi gut tru, na tu, em i wokim ol naispela diwai na plaua samting, na dispela i soim olsem God i laik bai yumi stap amamas. (Sng. 104:24; 139:13-16) Olsem na taim yumi mekim ol samting bilong amamasim ol narapela, yumi givim ona long God.

⁵ Krais i stap gutpela eksampel long pasin bilong givim samting, olsem na ol Kristen i mas bihainim pasin bilong em. Jisas i tok: “Pikinini bilong man i no kam bilong ol man i mas helpim em, nogat, em i kam bilong helpim ol man na givim laip bilong em olsem pe bilong baim bek planti manmeri.” (Mat. 20:28) Aposel Pol i tokim ol Kristen: “Yupela i mas holim wankain tingting olsem Krais Jisas tu i bin holim. . . . Em i lusim olgeta samting em i bin holim na em i kamap olsem wanpela wokboi.” (Fili. 2:5, 7) Yumi wan wan i ken askim yumi yet olsem: ‘Mi inap givim bel tru long bihainim gutpela eksampel bilong Jisas?’—Ritim 1 Pita 2:21.

6. Long tok piksa bilong man Samaria, Jisas i laik skulim yumi long wanem samting? (Lukim piksa long kirap bilong stadi.)

⁶ Jehova bai amamas long yumi sapos yumi bihainim nambawan gutpela eksampel bilong em na Krais long tingim ol narapela, na mekim ol samting bilong helpim ol. Jisas i mekim tok piksa long man Samaria bilong soim olsem ol disaipel i mas mekim ol samting bilong helpim ol narapela, maski ol i bilong narapela ples. (Ritim Luk 10:29-37.) Tingim dispela askim we i kirapim Jisas long mekim tok piksa long gutpela man Samaria. Man Juda i askim em: “Dispela narapela mi mas laikim, em i husat?” Bekim bilong Jisas i kamapim klia olsem wankain olsem man Samaria yumi mas redi long mekim samting bilong helpim narapela, na God bai orait long yumi.

7. (a) Satan i kamapim wanem tok long gaden Iden? (b) Olsem wanem yumi inap soim olsem yumi bilip tru olsem ol samting Jehova i tokim yumi long mekim ol i nambawan tru?

⁷ I gat planti risen na ol Kristen i mas kamapim pasin bilong givim samting. Olsem, tingim tok Satan i kamapim long gaden Iden. Em i tok olsem Adam na Iv na olgeta manmeri bai stap gut sapos ol i tingim laik bilong ol yet, na ol i no daun long God. Iv i bihainim laik bilong em yet long kamap wankain olsem God. Adam i tingim laik bilong em yet long amamasim Iv. (Stt. 3:4-6) Disisen bilong tupela i kamapim hevi. Pasin bilong tingim laik bilong yumi yet i no inap mekim yumi stap amamas. Taim yumi tingim ol narapela, yumi kamapim klia olsem yumi bilip tru olsem ol samting God i tokim yumi long mekim ol i nambawan tru.

8. Olsem wanem tok God i givim long namba 1 man na meri inap kirapim ol long tingim ol narapela?

⁸ Tok God i givim long namba 1 man na meri inap kirapim tupela long tingim ol narapela, maski ol yet i stap long gaden Iden. Jehova i blesim Adam na Iv na tokim ol long kamap planti na i go sindaun long olgeta hap bilong graun, na bosim olgeta samting  i stap long en. (Stt. 1:28) Man Bilong Wokim olgeta samting i tingim tru ol samting em i bin wokim. Olsem tasol, Adam na Iv i mas tingim ol tumbuna pikinini bai kamap bihain na olsem wanem ol inap stap amamas. Olgeta hap bilong graun i mas kamap ples paradais bambai olgeta tumbuna pikinini bilong Adam i ken stap amamas long en. Ol i mas wok gut wantaim na bai graun olgeta i kamap ples paradais.

9. Taim ol manmeri i skruim Paradais i go long olgeta hap bilong graun, bilong wanem dispela inap mekim ol i stap amamas?

⁹ Sapos Adam na Iv i no bin mekim sin, dispela graun bai pulap tru long ol stretpela manmeri, na ol bai wok bung wantaim Jehova long skruim Paradais i go long olgeta hap bambai ol i ken inapim laik bilong Jehova, na go insait long malolo bilong Em. (Hib. 4:11) Ating ol manmeri bai amamas tru long insait long dispela gutpela wok! Taim ol i soim olsem ol i tingim ol narapela, ol bai kisim planti blesing na ol bai pilim olsem laip bilong ol i gat as bilong en.

10, 11. Olsem wanem yumi ken inapim wok bilong yumi long autim tok na kamapim ol disaipel?

¹⁰ Long nau, Jehova i givim yumi wok bilong autim tok na kamapim ol disaipel. Sapos yumi laik inapim dispela wok, yumi mas tingim tru ol narapela. Sapos yumi gat pasin bilong laikim God na ol narapela, dispela bai strongim yumi long mekim dispela wok.

¹¹ Long taim bilong ol aposel, Pol i kolim em yet na ol wanwok bilong em olsem “ol wanwok bilong God” bikos ol i gat wok long planim sid bilong tok i tru bilong Kingdom na givim wara long en. (1 Kor. 3:6, 9) Yumi tu i stap olsem “ol wanwok bilong God” taim yumi yusim taim, strong, na ol samting yumi gat long autim tok, em wok God i givim long yumi. Dispela em gutpela blesing tru yumi kisim!

12, 13. Yumi kisim wanem ol blesing taim yumi kamapim ol disaipel?

¹² Taim yumi givim taim na strong bilong yumi long autim tok na kamapim disaipel, dispela i mekim yumi amamas tru. Planti bratasista husat i bin helpim planti Baibel sumatin na ol i wok long kamap strong long bilip, ol i tok dispela i givim ol bikpela amamas. Yumi amamas tru taim ol man i kliagut long ol tok i tru, kamap strong long bilip, mekim ol senis, na taim ol i tokim ol narapela long tok i tru. Jisas i bin salim 70 disaipel i go autim tok, na em i amamas tru taim “ol i kam bek na ol i amamas” long gutpela wok ol i mekim.—Luk 10:17-21.

¹³ Ol pablisa long olgeta hap bilong graun i amamas tru long lukim ol manmeri i harim gutnius na dispela i helpim ol. Tingim ekspiriens bilong Anna, em yangpela singel sista. Em i go helpim wok autim tok long wanpela hap long Isten Yurop we i sot long ol pablisa. * Anna i tok: “Planti rot i op long kirapim ol Baibel stadi, olsem na mi laikim tru wok  autim tok long dispela hap. Wok autim tok i givim mi bikpela amamas. Taim mi bisi tru long helpim ol narapela long kisim save long tok i tru, dispela i mekim na mi no tingim ol hevi bilong mi. Mi save tingim ol hevi bilong ol lain mi stadi wantaim ol, na mi painim ol rot bilong strongim na helpim ol. Mi bilip tru olsem ‘amamas bilong givim samting i winim amamas bilong kisim samting.’”—Apo. 20:35.

14. Maski ol man i harim o nogat, bilong wanem yu mas amamas yet long autim tok?

¹⁴ Yumi inap painim kain kain rot long autim gutnius long ol manmeri maski ol i no laik harim. Wok bilong yumi long nau i wankain olsem bilong profet Esekiel. Jehova i tokim em: “Maski ol i harim tok bilong yu o nogat, yu mas tokim ol long olgeta tok mi givim yu.” (Ese. 2:7; Ais. 43:10) Maski ol man i harim tok o nogat, Jehova i amamas long gutpela wok yumi mekim. (Ritim Hibru 6:10.) Wanpela pablisa i soim gutpela eksampel long pasin bilong givim bel long autim tok. Em i stori long wok autim tok bilong em, na em i tok: “Yumi planim, givim wara, na beten long Jehova i ken kirapim man long laikim tok i tru.”—1 Kor. 3:6.

15. (a) Pasin bilong givim samting inap kirapim planti manmeri long mekim wanem? (b) Maski ol i harim o nogat, yumi mas mekim wanem?

¹⁵ Jisas i laik bai yumi stap amamas taim yumi givim samting long ol narapela. Planti manmeri i save amamas taim yumi givim samting long ol. Jisas i tok: “Bihainim pasin bilong givim ol samting long ol man, na ol bai givim ol samting long yupela. Ol bai kapsaitim planti samting tru i go long laplap bilong yupela na ol bai i sakim i go daun na seksekim na pulapim inap long em i kapsait. Pasin yupela i mekim long ol man, ol bai mekim wankain pasin long yupela.” (Luk 6:38) Em tru olsem i no olgeta man i amamas long tok yumi autim. Tasol taim sampela i putim yau long tok yumi autim, dispela inap kirapim ol narapela tu long putim yau. Olsem na maski ol man i amamas long harim o nogat, yumi mas wok yet long autim tok. Ol wok yumi mekim inap kamapim gutpela samting.

16. Yumi mas holim wanem tingting taim yumi givim samting long ol narapela?

¹⁶ Ol man bilong givim samting long narapela i no tingting long kisim bek samting.  Jisas i tok: “Taim yu wokim wanpela kaikai, singautim ol lain i stap rabis, ol lain i gat bagarap long bodi, ol lek nogut, na ol aipas. Na yu bai amamas, long wanem, ol i no gat samting bilong bekim bek long yu.” (Luk 14:13, 14) Wanpela man bilong raitim Baibel i tok: “Bikpela i save mekim gut long man i amamas long givim ol samting long ol arapela man.” Narapela man i tok: “Man i save tingim ol rabisman na i helpim ol, dispela man i ken amamas.” (Snd. 22:9; Sng. 41:1) Tru tumas, yumi mas givim ol samting long ol arapela, taim yumi mekim olsem yumi bai amamas taim yumi helpim ol.

17. Yumi inap mekim wanem ol samting na dispela bai mekim yumi stap amamas?

¹⁷ Pol i mekim wankain tok olsem Jisas i mekim, em i tok: “Amamas bilong givim samting i winim amamas bilong kisim samting.” Dispela tok i makim pasin bilong givim ol samting long sait bilong skin, na tu, taim yumi mekim tok bilong strongim narapela, na stiaim na helpim ol man i nidim helpim. (Apo. 20:31-35) Toktok na pasin bilong aposel Pol i skulim yumi long yusim gut taim na strong bilong yumi long helpim narapela, na tu, yumi mas redi long harim tingting bilong ol na laikim ol.

18. Planti saveman i tok wanem long pasin bilong givim samting long ol narapela?

¹⁸ Sampela saveman i painimaut olsem pasin bilong givim i save mekim man i amamas. Wanpela atikol i tok: “Ol manmeri i kisim bikpela amamas moa taim ol i mekim ol samting bilong helpim ol narapela.” Ol saveman i tok, em i bikpela samting long helpim ol narapela bikos dispela i helpim ol man long “pilim olsem laip bilong ol i gat as bilong en na em samting yumi olgeta i mas mekim.” Olsem na planti saveman i tok ol manmeri i mas volantia long helpim ol narapela bambai ol i ken lukautim helt bilong ol na stap amamas. Ol manmeri husat i luksave olsem Baibel em Tok bilong Jehova, em Krieta bilong yumi, ol i wanbel long tok em ol saveman i kamapim.—2 Tim. 3:16, 17.

19, 20. I gat wanem ol risen na yumi mas kamapim pasin bilong givim samting?

¹⁹ Yumi inap pilim hatwok long kamapim pasin bilong givim samting bikos yumi stap namel long ol manmeri i tingim laik bilong ol yet. Tasol Jisas i tok 2-pela nambawan lo i winim ol narapela lo em olsem, yumi mas laikim Jehova long bel olgeta, laip olgeta, na tingting na strong olgeta bilong yumi. Na tu, yumi mas laikim ol narapela olsem yumi laikim yumi yet. (Mak 12:28-31) Dispela stadi i skulim yumi olsem ol manmeri i laikim Jehova i mas bihainim pasin bilong em. Jehova i gat pasin bilong givim samting long ol narapela, na Jisas tu i mekim wankain. Tupela i kirapim yumi long mekim wankain pasin bikos dispela bai mekim yumi amamas tru. Sapos yumi wok strong long kamapim pasin bilong givim samting long God na ol narapela, yumi bai givim ona long Jehova na dispela bai helpim yumi na ol narapela.

²⁰ Tru tumas, yumi olgeta i wok strong long helpim ol narapela na moa yet em ol wanbilip. (Gal. 6:10) Sapos yumi wok yet long mekim olsem, ol narapela bai laikim yumi na amamas long yumi, na yumi tu bai amamas. Sindaun 11:25 i tok: “Man bilong givim samting bilong helpim ol arapela man, em yet bai i kisim planti samting. Sapos yu helpim ol arapela man bai ol i helpim yu tu.” Long ol samting yumi mekim long wan wan de na long wok autim tok bilong yumi, gutpela samting inap kamap taim yumi tingim ol narapela, mekim gutpela pasin, na givim samting long ol. Long neks stadi, yumi bai stori long sampela rot yumi inap givim samting bilong helpim ol narapela.