1. ¿Néna xarhatasïni Jeoba eska intsïmpitiska imani ambe jimbo enga kueraaka?

ENGA Jeoba uénapka kueraani ambe ma, jandiajku jarhaspti. Peru enbesi de imajku pendienti pákuarhini jarhani, regalu ma úkuasti tanto espirituechani komu kʼuiripuechani paraksï úni tsípikua jatsini. Ima Tata Diosï máesti enga tsípikua jingoni irekajka ka tsitisïndi ambakiti ambe íntspini (1 Tim. 1:11, TNM; Sant. 1:17). Ístu, uékasïndi eskachi juchajtu tsípikua jingoni irekaaka, jimbojtsïnisï jorhendajti parachi intsïmpitiini (Rom. 1:20).

2, 3. a) ¿Andichisï felisijki engachi tsípikua jingoni intsïmpijka? b) ¿Ambechi exea ini artikulurhu?

² Tata Diosï kuerauasti kʼuiripuechani ísï eska ima na jásïka (Gén. 1:27). O sea, kueraastijtsïni parachi xarhatani na enga jásïika ima. Ísï jimbo, engachi uéjka felisiini ka agustu pʼikuarherani, jatsiskachi para seguirini imeri ejempluni engachi interesi páska máteruecha jimbo ka intsïmpitiinchi (Filip. 2:3, 4; Sant. 1:5). ¿Andi? Jimbokajtsïni Jeoba ísï kueraaska. Nájkirukachi no perfektueka, uákachi intsïmpitiini ísï eska ima.

³ Bibliajtsïni jorhendasïndi eskachi jatsiska para tsípikua jingoni intsïmpini. Ini artikulurhu, exeakachi máru ambe engajtsïni  Biblia arhijka i temeri. Exeakachi eska intsïmpitiini úsïnga eskajtsïni Jeoba jaiapanhintaaka ka ístu para kumplirini imani ánchikuarhitani engajtsïni ima enkargarika. Ístuchi exeaka eska intsïmpitiini ka felisiini sáno terokuntasïnga ka andichisï jatsi para no jurajkuni intsïmpitiini.

4, 5. ¿Náki ejemplujtsïni íntskuski Jeoba ka Jesusi parachi sési kámpini?

⁴ Jeoba uékasïndi eskachi ísïuaka eska ima, ka jimbosï sési pʼikuarherajti engachi sési kámpijka (Efes. 5:1). Meru xarharasïndi eska Jeoba uékasïnga eskachi felisiuaka. Ka inde ambe xarharasïndi na engajtsïni úka ka xáni uáni sési jásï ambe jimbo enga ima kueraaka (Sal. 104:24; 139:13-16). Ísï jimbo, kʼéri ambechi arhisïnga Jeobani engachi jánguarhintajka paraksï máteruecha felisiini.

⁵ Ambakiti kristianuechachi májkueni úsïnga eska Jesusi enga sési xarhataka asta nani jamberi uá ma kʼuiripu intsïmpitiini. Ima mismu uandaspti: “Ísï komueska Uájpa Achatiri na juka, no para marhuaminhani, sino para marhuatspini, ka íntspini imeri tsípikuani para uánikuechani euajpiantani” (Mateu 20:28). Jimbosï, apostuli Pablu arhiapti kristianuechani: “Ísï eratsi je chájtu eska Kristu Jesusi na eratsienga” enga “jurajku[pka] imeri tʼíntskuani ka niárani jindeni komueska jántspiri ma” (Filip. 2:5-7, TNM). Ísï jimbo, sésisïndi engachi kurhamarhikuarhijka: “¿Uá sánderuni sési seguirini Jesusiri ejempluni?” (arhinta je 1 Pedru 2:21).

6. ¿Ambejtsïni jorhendaski Jesusi ambakiti samaritanueri ilustrasioni jingoni? (Exe je dibujuni enga uénakuarhu jaka).

⁶ Uákachi úni eskajtsïni Jeoba jeiapanhintaaka engachi seguiriska imani ambakiti ejemplu engajtsïni ima ka imeri Uájpa xarhatachika. Para indeni ambe úni, jatsiskachi para interesi páni máteruecha jimbo ka exeni nénachi uá jarhuataani imani ambe jimbo engaksï uétarhinchani jauaka. Enga Jesusi uandantapka ilustrasioni ambakiti samaritanueri, xarhataspti eska erokuarhisïnga eskachi imeri chúxapaticha jánguarhintaaka xáni eskachi na uáka para jarhuataani máteruechani, no arhiparini nani uéjkiksï anapueni (arhinta je Lukasʌ 10:29-37). Ju je miáni eska Jesusi jimbosï uandantapka ini ilustrasionini jimboka judiu ma kurhamarhispka: “¿Néski juchiti besinu o prójimu?”. Ambe enga mókuntapka, xarhatasïndi eskachi jatsiska para listu jarhani ísï eska samaritanu parachi jarhuajpini, parajtsïni Jeoba úni jeiapanhintani.

7. ¿Ambe uandaspi Satanasi jardini de Edenirhu ka nénachi xarhatasïni eska ambe enga Jeoba újka sánderu sésisïnga?

⁷ Kristianuechachi uánikua rasonichani jatsiaska parachi intsïmpitiini. Ma rasoni jindesti imani ambe jimbo enga Satanasi uandapka jardini de Edenirhu. ¿Andichisï ísï uandajki? Satanasi uandaspti eska Adani ka Ebani, ka ístu iámindu kʼuiripuechani, sánderu sési nikuapiringa engaksï imechajku pendienti pákuarhipiringa ka imecheri ambe orheta péraani enbesi de Tata Diosïni kurhajchani. Adani ka Ebajkusï pendienti pákuarhipti. Eba uékaspti ísïini eska Jeoba ka Adani sánderu uékaspti jaiapanherantani témbani enbesi de Jeobani (Gén. 3:4-6). Kánikua no sési jásï ambe niárasti úkuarhini imani ambe jimbo engaksï Adani ka Eba úpka. Jo, ma no úsïndi felisiini enga jandiajku pendienti pákuarhijka. Engachi intsïmpitika, xarhatasïngachi eskachi seguru jarhaska eska ambe engajtsïni Jeoba jorhendajka, jindeska ambe enga sánderu sési jaka para úni.

8. ¿Andiksïsï Adani ka Eba jatsipi para interesi páni máteruechani jimbo?

⁸ Nájkirukaksï Adani ka Eba tsimarhantku japka jardini de Edenirhu, instruksionicha enga Jeoba íntskuapka jatsipirindiksï para úni  eskaksï interesi pápiringa máteruecha jimbo. Tata Diosï újchakuraaspti ka arhiaspti eskaksï uánipiringa, eskaksï uinirapiringa Echerini ka ánchitani (Gén. 1:28). Ísï eska Kuerajpiri na pendienti jarhajka imeri kueraakata jimbo, imaksï jatsipirindi para exeni nénaksï úpirini imecheri desendienticha sési irekani. Paraksï iáminduecha agustu irekani paraisurhu, jatsisptiksï para úni eska iámu parhakpini paraisu máepiringa. I xáni kʼéri ánchikuarhita uétarhinchasïrendi eska iámu familia jarhuajpepiringa.

9. ¿Andiksïsï xáni felisipirini kʼuiripuecha enga paraisu kʼépiringa?

⁹ Engaksï Adani ka Eba no pekaripiringa, Echerirhuksï kʼuiripu perfektuecha irekapirindi. Paraksï kʼuiripu perfektuecha úni eska paraisu kʼépiringa, uétarhipirindi eskaksï májku kʼéri ánchikuarhipiringa imani ambe jingoni enga Jeoba uékenga úni ka ísïksï andajkuarhini ‘mintsikuastanhani’ (Ebr. 4:11). Iásïchi nomasi úsïnga eranhaskani na engaksï xáni felisipiringa. Ístu, Jeoba kánikua újchakuraapirindi engaksï intsïmpitipiringa ka interesi páni máteruecha jimbo.

10, 11. ¿Nénachi uá kumplirini ánchikuarhita jingoni para eianhpini ka disipulu uáni?

¹⁰ Iásï, Jeoba enkargariuasti ánchikuarhita ma imeri marhuarichani: predikarini ka disipulu uáni. Parachi kumplirini, jatsiskachi para meru interesi páni máteruecha jimbo. Nochi kuatantaaka indeni ambe úni jarhani engachi imani ambe jimbo úska enga sési jaka, uékani Jeobani ka prójimuni.

¹¹ Primeru siglurhu, apostuli Pablu uandaspti eska ima ka máteru kristianuechaksï jindespka Tata “Diosïri jarhuajpiricha” jimbokaksï ikarasïrenga ka itsï jatsikuni semiia jurhimbikuerini enga Tata Diosïri Reinuerika (1 Kor. 3:6, 9). Iásï, juchajtuchi uáka jindeni Tata “Diosïri jarhuajpiricha”. ¿Néna? Tsípikua jingoni íntspeparini juchari tiempu, jatsikuarhikua ambe ka uinhapikua parachi úni kumplirini imani ánchikuarhitani engajtsïni Jeoba enkargarika. ¡Xáni kʼéri kóntperata ma!

12, 13. ¿Náki kóntperatechantsï uandaapirini cha eskaksï jarhasïnga para disipulu uáni?

¹² Kánikuachi sési pʼikuarherasïnga engachi tsípikua jingoni úrajka juchari tiempu ka uinhapikuani eianhpikuarhu. Uánikua erachicha engaksï Bibliaeri ambe jorhentpijka, uandasïndiksï eska inde ambe úni, jindeska ambe ma enga sánderu sési pʼikuastaajka. Kánikua sési pʼikuarherakuarhisti exeni na enga tsípinharhijka kʼuiripu ma enga kurhangujka Bibliaeri jurhimbikua ambe, na enga kʼéjka imeri jakajkukua, na enga mójtakujka imeri irekuani ka na enga uénajka uandontskuarhini máteruecha jingoni ambe enga jorhenguarhijka. Jesusi sési pʼikuarheraspti engaksï 70 imeri chúxapaticha enga aianhpikuarhu axaapka, “kʼuanhatsinta[pkaksï] tsípiparini” jimboka sési nikuaspka (Luk. 10:17-21).

¹³ Ma parhakpinirhu, eianhpirichaksï tsípisïndi exeni na enga xáni jarhuatajka eianhperakua Reinueri ambe imecheri irekuarhu. Ju je exeni  Anaeri ejempluni, uátsï ma enga Europa mótsika, jima engaksï uétarhini jaka eianhpiricha. * Ima uandasïndi: “Kánikua tsípisïnga engaksï xáni uánikua kʼuiripuecha jiókuarhijka Bibliaeri jorhentperakuani. Aianhpikuarini sési pʼikuastasïndi. Engani niántajkia juchini, no tiempu jatsisïnga parani juchiti problemecheri ambe eratsini jarhani. Pendienti jarhasïnga juchiti estudiuechani jimbo, imecheri problemecha ka uandanhiatechani jimbo. Jirinhasïnga néna uinhaperantaani ka jarhuataani. Niáraska sánderu jakajkuni eska ‘sánderu sésis[ka] intsïmpini, ka eska intsïmbinhani’” (Uku. 20:35).

14. Nájkiruka namunitu kʼuiripujku jiókuarhijka mensajini, ¿nénachi uá tsípini pʼikuarherani eianhperakuarhu?

¹⁴ Nájkirukajtsïni kʼuiripu no kurhajchaaka, sésichi pʼikuarherasïnga jarhuataani jiókuarhini ambakiti ambe. Esmasi, iásï juchari ánchikuarhita sáno májkuenisti eska ima enga profeta Esekieli intsïnhapka. Jeoba arhispti: “Jatsiskari para aianguani juchiti uandakuechani, ia sea engaksïni kurhajchaaka o nómbe” (Ezeq. 2:7; Is. 43:10). Jamberiksï máru kʼuiripuecha no jukaparharajti ambe engachi eianhpijka, peru Tata Diosï kʼóru jukaparharasïndi engachi xáni jánguarhintajka (arhinta je Ebreu 6:10). Aianhpiri ma uandaspti: “Ikaraskachi, itsï jatsikuskachi ka kómarhiskachi mintsikaparini eska Jeoba uáka eska nema uékaaka sánderu mítini” (1 Kor. 3:6).

15. ¿Ambeksï úsïni kʼuiripuecha engachi tsípikua jingoni újka ambe ma imechani jimbo, ka néna marhuasïni ambe engachi újka?

¹⁵ Jesusi uékasïndi eskachi tsípikua jingoni irekaaka ka jimbojtsïnisï arhijti: “Íntspi je ka ísïjtsï chájtu intsïnhataaka. Sési tsʼéritatspi je, ka ísïjtsï chájtu sési tsʼeritaminhantaaka, ka medidantsï sési jeianhaminhantani asta tsïjtsïmitaraminhantani jamberi, jimboka ima mismu medidani jimbo engajtsï jimbo tsʼéritatspiaka, imani jimbojtsï tsʼéritaminhantaaka” (Luk. 6:38). Uánikuaksï sési jiókuarhisïndi engachi jarhuatajka. Ísïsti, no iáminduechaksï jiókuarhisïndi imani ambe engachi tsípikua jingoni íntsaajka, peru imecha engaksï jiókuarhijka, úsïndi eskaksï imajtu májkueni intsïmpitiuaka. Ísï jimbo, ju je intsïmpitiini nájkiruka ísï xarharaka eska kʼuiripu no jukaparharasïnga. Nochi mítiska na xáni  uá jarhuataani engachi sapichitu ambejku úska máteruecha jimbo.

16. ¿Nénchi jatsiski para sési kámani, ka andi?

¹⁶ Ima enga mintsita jingoni intsïmpijka, no erokuarhini jarhasïndi eska intsïnhantaaka ambe ma. Jesusi mítitixapti ini ambe, jimbosï uandapti: “Sino engari tʼu prebeniriaka ma tʼirekua, mejori kombidaria imechani engaksï pobriika ka ístu imechani engaksï tokojtaka o imechani engaksï nómindu újka xanharani ka sieguechani, ka ísïri sánderu sési uéraaka [o tsípiaka], jimbokaksïni imecha no uáka meiamuntani” (Luk. 14:13, 14). Biblia uandasïndi eska ima enga intsïmpitiuaka, kóntperatechani intsïnhauaka ka ístu uandasïndi eska felisisïnga ima enga sési kájka imechani engaksï uétarhinchani jarhajka (Prov. 22:9; Sal. 41:1). Meru ísïsti, intsïmpitiskachi jimboka jarhuataani máteruechani kánikua sési pʼikuarherakuarhisïnga.

17. ¿Ambechi uá íntspini parachi felisiini?

¹⁷ Enga Pablu ménderu uandapka imani ambe enga Jesusi uandapka eska “sánderu sésis[ka] intsïmpini, ka eska intsïmbinhani” no solu arhikuekaxapti íntspini jatsikuarhikua ambe, sino ístu uinhaperpintani, arhistatspini ka jarhuatani imani enga uétarhinchani jauaka (Uku. 20:31-35). Ambe enga Pablu uandapka ka úni, jorhendastijtsïni eskachi jatsiska para intsïmpitiini, úraparini juchari tiempu, uinhapikua, pendienti jarhani ka uékani máteruechani.

18. ¿Ambeksï uandasïni uánikua inbestigadoricha?

¹⁸ Inbestigadoricha engaksï kʼuiripuecheri jánguani ambe exejka (sociólogos) ístuksï uandasïndi eska intsïmpitiini, úsïnga eskachi felisiuaka. Seguni artikulu ma, kʼuiripuechaksï uandasïndi eskaksï sánderu felisisïnga engaksï ambakiti ambe újka máteruecha jimbo. Ísï eskaksï inbestigadoricha na uandajka, jarhuataani máteruechani úsïndi eskachi sési pʼikuarheraaka jimbokachi ambakiti ambe úsïnga enga kʼuiripu ma meru uétarhinchajka. Asta imecha engaksï mítikuka, arhijpisïndiksï eska para úni ambe ma máteruecha jimbo, úkusïnga eska kuerpu no xáni pʼamenchakua ambe pʼiuaka ka para sánderu agustu pʼikuarherani. I ambejtsïni no ísku pakatasïndi juchantsïni engachi mítitini jaka eska Biblia Jeobaeri Karakateska, juchari Kueraajpiriri enga uékpitika (2 Tim. 3:16, 17).

19, 20. ¿Náki rasonichanchi jatsiaski parachi intsïmpitiini?

¹⁹ Irekani kʼuiripuecha jingoni engaksï uarhisika, uáti eska úkua jukaaka seguirini jarhani intsïmpitiini. Peru Jesusi uandaspti eska tsimani juramukuecha engaksï sánderu jukaparhakueka, jindeska uékani Jeobani iámindu mintsita, eratsikua, alma ka uinhapikua jingoni, ka uékani prójimuni eska májkumindu na uékakuarhijka (Mar. 12:28-31). Eskachi na exekia ini artikulurhu, ima engaksï xénchajka Tata Diosïni, jánguarhintasïndiksï májkueni úni eska ima. Jeoba ka imeri Uájpa, intsïmpitistiksï ka arhisïndijtsïni eskachi juchajtu májkueni uáka, jimbokachi ísï uáka meru felisiini. Engachi jánguarhintaska intsïmpitiini imani ambe jimbo engachi Tata Diosïni jimbo újka ka kʼuiripuecha jimbo, kʼéri ambechi arhiaka Jeobani ka juchantsïni mismu sési nicheati ka ístu máteruechani.

²⁰ Jo, iáiasïchi jánguarhintaxakaia jarhuataani kʼuiripuechani ka sánderia juchari erachichani (Gal. 6:10). Engachi no kuatantaska, jamberiksï kʼuiripuecha agradeseriuati ka xénchantsïni indeni ambe jimbo ka juchachi felisiuaka. Proverbios 11:25 arhisïndi: “Ima kʼuiripuni enga intsïmpitika sési nikuati ka enga sési pʼikuastpiaka, imajku sési pʼikuarheraati”. Juchari irekuarhu ka eianhpikuarhu, jarhasti uánikua ambe engachi uáka úni máteruechani jimbo komu intsïmpitiini, sési kámpini ka uandanhiani máteruecha jimbo. Máteru artikulurhu, exeakachi máru ambe.