1. E fakamaoni mai pefea i mea ne faite a te uiga kaimalie o Ieova?

E TIGA eiloa ne nofo tokotasi eiloa a Ieova mai mua o faite ne ia a mea katoa, ne seki mafaufau eiloa a ia ki a ia eiloa. E ‵kese mai i ei, ne tuku mai ne ia te meaalofa ko te ola ki mea ola katoa a ia ne faite, tino faka-te-agaga mo tino faka-te-foitino. A “te Atua fiafia,” ko Ieova, e fiafia o tuku mai ne ia a mea ‵lei. (1 Timo. 1:11; Iako. 1:17) Kae ona ko te mea e manako foki a ia ke fia‵fia tatou, e akoako ne ia tatou ke uiga kaima‵lie.—Loma 1:20.

2, 3. (a) Kaia e fakafiafia i ei a te tuku atu o ‵tou mea? (e) Ne a mea ka sau‵tala tatou ki ei?

² Ne faite ne te Atua a tino ki tena fakatusa. (Kene. 1:27) Tela la, ne faite eiloa tatou ke fakaasi atu ne tatou ana uiga. Kae ko te mea ke maua te fiafia mo te lotomalie, e ‵tau o tau‵tali tatou ki te fakaakoakoga a Ieova mai te fia‵fia ki nisi tino kae fai pelā me ne tino uiga kaima‵lie. (Fili. 2:3, 4; Iako. 1:5) Kaia? E manino ‵lei me ne alofa a Ieova o faite a tino i te auala tenā. Faitalia ‵tou tulaga sē ‵lei katoatoa, e mafai o manuia tatou i te fakaakoako atu ki te uiga kaimalie o Ieova.

³ E fakaasi mai i te Tusi Tapu a te auala e mafai ei ne tatou o fai pelā  me ne tino uiga kaima‵lie. Ke onoono nei tatou ki nisi akoakoga e akoako mai i te Tusi Tapu e uiga ki te mataupu tenei. Ka lavea ne tatou a te auala e iku atu ei a te uiga kaimalie ki te taliaga a te Atua kae ko te auala ke ati aka ne tatou te uiga tenei e fesoasoani mai ke fakataunu ne tatou te tiute ne tuku mai ne te Atua. Ka suke‵suke foki tatou ki te sokoga i te va o te uiga kaimalie mo te ‵tou fia‵fia penā foki mo te pogai e ‵tau ei o ati aka ne tatou a te uiga tenei.

4, 5. Ne a fakaakoakoga o te uiga kaimalie ne tuku mai ne Ieova mo Iesu?

⁴ E manako eiloa a Ieova ko tino kolā ne faite ne ia ke fakaakoako atu ki a ia, tela la e fakafiafia ki a ia māfai e uiga kaima‵lie tatou. (Efe. 5:1) E fakamaoni faka‵lei atu mai te auala ne faite ei tatou pelā foki mo te gali o te ‵tou enivaelomene me e manako te Atua ke fia‵fia a tino. (Sala. 104:24; 139:13-16) Tela la, e faka‵malu ne tatou a ia māfai e taumafai tatou o fakafiafia a nisi tino.

⁵ A Kelisiano ‵tonu e fakaakoako ki a Keliso, telā ne tuku mai ne ia se fakaakoakoga ‵lei katoatoa ki te auala e mafai ei ne se tino o uiga kaimalie. Ne fai mai eiloa a Iesu, penei: “E pelā mo te Tama a te tagata, ne seki vau ke tavini mai a tino ki a ia, kae ke tavini atu ki tino kae tuku atu foki tena ola e pelā me se togiola mō tino e tokouke.” (Mata. 20:28) Tela la, ne fakamalosi atu te apositolo ko Paulo ki Kelisiano, penei: “Ke fakatumau te kilokiloga tenei i otou mafaufau e pelā eiloa mo Keliso Iesu . . . Ne tiaki ne ia ana mea katoa kae fai mo fai se pologa.” (Fili. 2:5, 7) E ‵tau mo tatou taki tokotasi o fesili ifo ki a tatou eiloa penei, ‘E mata, e mafai o tautali fakapilipili malosi atu au i te fakaakoakoga a Iesu i lō te mea ko oti ne fai ne au?’—Faitau te 1 Petelu 2:21.

6. Se a te akoakoga ne akoako mai ne Iesu mai tena tala fakatusa e uiga ki te Samalia alofa? (Ke onoono ki te ata i te kamataga.)

⁶ E mafai o maua ne tatou a te taliaga a Ieova mai te fakaakoako atu ki a ia mo fakaakoakoga ‵lei katoatoa a Keliso, mai te ‵sala atu ki ‵lei o nisi tino penā foki mo auala ke tausi atu ki olotou manakoga. E tonu, i te tala fakatusa o te Samalia alofa, ne fakaasi faka‵lei mai ne Iesu me manako a ia ko ana soko ke toka o fesoasoani atu ki nisi tino, ke oko foki loa ki tino mai tulaga kese‵kese o te olaga. (Faitau te Luka 10:29-37.) E mata, e masaua ne koe te fesili telā ne fakamalosi aka ei a Iesu ke fai atu ne ia te tala o te Samalia alofa? Ne fesili atu se tino Iutaia ki a ia: “Ko oi la toku tuakoi?” E fakaasi mai i te tali a Iesu me e pelā mo te tino Samalia, e ‵tau mo tatou o loto fia‵fia o tuku atu a mea mo te kaimalie, māfai e ma‵nako tatou ke maua te taliaga a te Atua.

7. Se a te sokoga o te ‵tou uiga kaimanako io me ko te uiga kaimalie ki te kinauga telā ne sae aka i te kamataga?

⁷ E uke ‵ki eiloa a pogai ‵lei e ‵tau ei mo Kelisiano o uiga kaima‵lie. E pelā me se fakaakoakoga, a te uiga tenei e isi sena sokoga ki te kinauga telā ne fakasae aka ne Satani i te fatoaga o Etena. E pefea la? Ne fai ‵tonu mai a Satani me i a Atamu mo Eva—e aofia i ei a tino katoa—e ‵lei fakafia atu māfai e ‵saga tonu loa latou ki a latou eiloa kae ke fakamuamua olotou manakoga totino i lō te faka‵logo ki te Atua. Ne kaimanako eiloa a Eva ke ‵pau a ia mo te Atua. Ne fakaasi atu ne Atamu se manakoga kaimanako ke fakafiafia atu ki a Eva. (Kene. 3:4-6) E fakamaoni faka‵lei atu ne tatou a te ikuga o lā fakaikuga ne fai. A te kaimanako e se iku atu ki te fiafia; kae ko te suā feitu aka. A te uiga kaimalie se fakaasiga o te ‵tou loto tali‵tonu me i auala o te Atua ke fai a mea, ko te ‵toe auala ‵lei eiloa.

8. Kaia ne ‵tau ei mo te tauavaga muamua o fakaasi atu te uiga kaimalie?

⁸ Ne tuku atu ne te Atua ki te tauavaga muamua a fakatonuga kolā ne ‵tau o mafau‵fau lāua ki ei mō te ‵lei o nisi tino, e tiga eiloa ko lāua fua  tokolua i te fatoaga o Etena. Ne fakamanuia ne Ieova a Atamu mo Eva kae ne fakamalosi ne ia lāua ke fanafanau, fakatokouke kae faka‵fonu te lalolagi ki lā tama‵liki. (Kene. 1:28) E pelā eiloa mo te fiafia malosi o te Atua ki te ‵lei o ana mea ne faite, ne ‵tau foki mo te tauavaga muamua o fia‵fia ki lā tama‵liki kolā e seki fa‵nau mai. Ne ‵tau o faka‵solo atu a te palataiso ki te lalolagi kātoa mō te ‵lei o tama a Atamu. A te galuega lasi tenei e manakogina ke ga‵lue fakatasi i ei a tena kāiga telā ko gasolo aka faeloa o tokouke.

9. Kaia e mafai eiloa o iku atu a te faka‵sologa o te Palataiso ki te fiafia?

⁹ Ko te mea ke faka‵solo atu ne tāgata mo fāfine ‵lei katoatoa a te Palataiso ki te lalolagi kātoa, ne manakogina eiloa ke ga‵lue fakatasi latou mo Ieova ke fakataunu i ei ana fuafuaga, kae ke ulu atu ki tena koga malōlō. (Epe. 4:11) Mafaufau aka la ki te fakamalie loto o te galuega tenei! A te tuku atu o latou mo te loto fia‵fia mō te ‵lei o nisi tino ne mafai eiloa o maua ne latou mai i ei a fakamanuiaga e uke mo te lotomalie sili.

10, 11. E mafai pefea o fakataunu ne tatou te fakatonuga ke talai kae fai a soko?

¹⁰ I aso nei, ne tuku mai ne Ieova ke fai ne ana tino a te galuega talai mo te faiga o soko. Ke fakataunu a te fakatonuga tenā, e ‵tau o ‵saga atu tatou ki te ‵lei o nisi tino. E mafai o kufaki tatou i te galuega tenei māfai e maua ne tatou te kilokiloga tonu—te alofa ki te Atua mo ‵tou tuakoi.

¹¹ I te senitenali muamua T.A., ne taku ne Paulo a ia eiloa mo ana taugasoa ‵pili e pelā me ne “tino ga‵lue a te Atua” ona ko te olotou tiute i te ‵tokiga mo te fakasiusiuga o te fuaga o te munatonu e uiga ki te Malo. (1 Koli. 3:6, 9) I aso nei, e mafai foki o fai tatou mo “tino ga‵lue a te Atua” mai te tuku atu mo te kaima‵lie a ‵tou taimi, kope, mo ‵tou malosi ke fakataunu te fakatonuga mai te Atua ke talai atu. A te mea tenei se tauliaga gali ‵ki!

12, 13. Ne a ikuga ‵gali e mafai o maua mai te faiga o soko?

¹² A te loto fia‵fia o tuku atu ‵tou taimi mo ‵tou malosi ke talai kae fai a soko e maua eiloa i ei te fiafia lasi. E tokouke a tino kolā ne fai ne latou a a‵koga faka-te-Tusi Tapu kolā e ga‵solo ki mua ne fakaasi mai ne latou a te fakamalie loto o te galuega tenā. Se mea fakafiafia ke lavea atu te fia‵fia o tino taki tokotasi māfai ko malama‵lama latou i muna‵tonu faka-te-agaga, gasolo aka ki luga te lotou fakatuanaki, fai a ‵fuliga, kae kamata o fakaasi atu ne latou a te munatonu ki nisi tino. E pelā foki mo Iesu, ne maua ne ia te fiafia lasi i te taimi ne “toe ‵foki” atu te toko 70 tino talai kolā ne uga ne ia ke olo atu o talai mo ikuga fakafia‵fia ne maua ne latou.—Luka 10:17-21.

¹³ E fia‵fia eiloa a tino talai i te lalolagi kātoa ke lavea atu te auala e pokotia i ei a olaga o tino i se auala ‵lei ona ko te fekau o te tala ‵lei. Mafaufau ki te tala o Anna, se tuagane talavou kae nofo taka, telā ne fakalauefa atu tena galuega talai mai te fanatu o tavini i te feitu ki saegala o Eulopa telā e manakogina malosi i ei a tino talai. *  “E uke ‵ki a avanoaga ke fai a akoga faka-te-Tusi Tapu i konei, kae ko oko eiloa i toku fiafia,” ne tusi mai tou fafine. “E maua ne au te fiafia lasi mai te galuega talai. Kafai e foki atu au ki te fale, e seai se taimi ke mafaufau au ki a au eiloa. E mafaufau eiloa au ki tino kolā e fai ne au olotou akoga—olotou fakalavelave mo manava‵sega. E ‵sala atu au ki auala ke fakamalosi aka latou kae fesoasoani atu ki a latou i auala aoga. Kae ne kamata o loto talitonu au me ‘e sili atu te fiafia o te tino telā e tuku atu ana mea i lō te maua ne ia.’”—Galu. 20:35.

14. Faitalia me ne nai tino fua e ‵saga tonu mai ki te tala ‵lei, e mafai pefea o fakatumau ne koe te fiafia i te galuega talai?

¹⁴ E mafai o maua ne tatou a te fiafia mai te tuku atu ki tino a te avanoaga ke ‵saga mai ki te fekau o te tala ‵lei faitalia foki me filifili ke sē faka‵logo mai latou. A te tonuga loa, a te galuega e fai ne tatou i aso nei e ‵pau eiloa mo te galuega a te pelofeta ko Esekielu, telā ne fai atu a Ieova ki ei: “E ‵tau mo koe o faipati atu aku pati ki a latou, faitalia me faka‵logo latou io me ikai.” (Eseki. 2:7; Isa. 43:10) Kafai foki loa e se talia ne nisi tino te ‵tou fekau, e loto fakafetai eiloa a Ieova ki ‵tou taumafaiga ne fai. (Faitau te Epelu 6:10.) Ne fakaasi mai ne se tino talai e tokotasi se kilokiloga ‵lei e uiga ki te mea tenei. Ne tusi mai tou tagata e uiga ki tena galuega talai, “Ne ‵toki ne tatou, fakasiusiu, kae ‵talo atu mo te fakamoemoega me ka fai ne Ieova ke ola aka.”—1 Koli. 3:6.

15. E mata, e ‵tau o fakaasi atu ne tatou a te uiga kaimalie māfai fua e fia‵fia mai a tino ki a tatou?

¹⁵ E manako a Iesu ke maua ne tatou a te fiafia mai te uiga kaima‵lie. E tokouke a tino e fia‵fia ki tino uiga kaima‵lie. “Fakamasani o tuku atu ki nisi tino kae ka tuku atu ne tino ki a koutou,” ne fakamalosi mai a ia. “Ka ‵ligi atu ne latou ki otou gatu se fua ‵lei, e teke ke ī ki lalo, e lulugina, kae ma‵ligi foki ki tua. Me ko te fua telā e fua atu ne koutou, ka fua mai foki ne latou ki a koutou.” (Luka 6:38) E tonu, e se ko tino katoa e tali fiafia mai ne latou a tatou, kae kafai e fai latou penā, e mafai eiloa o lavea atu te lotou fia‵fia i te auala e ‵saga mai ei latou. Tela la, ke tumau i te tuku atu o mea mo te kaimalie faitalia me e fia‵fia mai a tino io me ikai. E se iloa ne koe te mea  ‵lei ne fai ne koe mai te fakaasi atu fua o se faifaiga kaimalie.

16. Ko oi e ‵tau o fakaasi atu ki ei te uiga kaimalie, kae kaia?

¹⁶ A tino kolā e fakaasi tonu atu ne latou te uiga kaimalie e se tuku atu olotou mea ko te mea fua ke toe taui atu. Tenei eiloa te mea ne mafaufau ki ei a Iesu i te taimi ne akoako atu ei a ia, penei: “Kafai e fai sau ‵kaiga, ‵kami mai a tino ma‵tiva, tino ‵pili, tino vae ma‵sei, mo tino ‵kivi; kae ka fiafia eiloa koe, me e seai ne olotou mea ke toe taui atu ki a koe.” (Luka 14:13, 14) “A te tino kaimalie ka fakamanuiagina,” ne tusi mai se tino tusitala. Ne fai mai te suā tino: “A te tino kaimalie ka fakamanuiagina, me e tufa atu ne ia ana meakai ki tino ma‵tiva.” (Faata. 22:9; Sala. 41:1) E tonu, e ‵tau o tuku atu ne tatou a mea me ne maua ne tatou te fiafia mai te fesoasoani atu ki nisi tino.

17. Ne a vaegā auala e fakaasi atu ei ne tatou te uiga kaimalie telā e maua i ei te fiafia?

¹⁷ I te taimi ne siki mai ei ne Paulo a pati a Iesu me “e sili atu te fiafia o te tino telā e tuku atu ana mea i lō te maua ne ia,” ne seki fakasino atu fua a Paulo ki te tukuatuga o mea faka-te-foitino kae e penā foki a fakamalosiga, takitakiga, mo te fesoasoani ki tino kolā e ma‵nako ki ei. (Galu. 20:31-35) E auala i pati mo te fakaakoakoga a Paulo, ne akoako mai ei ne ia ki a tatou a te tāua ke tuku atu ‵tou taimi, malosi, mafaufau mo ‵tou a‵lofa.

18. Ne a pati a tino ‵poto e tokouke e uiga ki te kaimalie?

¹⁸ Ne lavea aka ne tino kolā e suke‵suke ki olaga o tino, me i te uiga kaimalie e fai ne ia ke fia‵fia a tino. E ‵tusa mo se fakamatalaga e tasi, e fai mai me “maua ne tino a te fiafia māfai e fakaasi atu ne latou a uiga atafai ki nisi tino.” E fai mai a tino suke‵suke me kafai e fesoasoani atu tatou ki nisi tino, e lagona ne tatou me e aoga kae fakamalie loto a ‵tou olaga. Tela la, e mafau‵fau a nisi tino ‵poto me e fai ne tino a galuega fakavolenitia ko te mea ke maua ne latou te malosi ‵lei mo te fiafia. E tonu, a te mea tenei e sē se mea fou ki tino kolā e talia ne latou te Tusi Tapu, me ne fai mai faeloa te ‵tou Mafuaga alofa ko Ieova, me i te tino kaimalie se tino fiafia.—2 Timo. 3:16, 17.

19, 20. Ne a pogai e manako ei koe ke fakaasi te uiga kaimalie?

¹⁹ E mafai o faigata ke fakatumau te uiga kaimalie māfai e ‵nofo tasi tatou mo tino kolā e fakamuamua ne latou a olotou manakoga totino i lō nisi tino. Kae ne fai mai ne Iesu a fakatonuga tāua e lua, ke a‵lofa ki a Ieova mo ‵tou loto kātoa, ‵tou ola kātoa, mafaufau, mo ‵tou malosi kae ke a‵lofa foki ki ‵tou tuakoi e pelā mo ‵tou a‵lofa ki a tatou eiloa. (Male. 12:28-31) E pelā mo te mea ne lavea ne tatou i te mataupu tenei, a latou kolā e a‵lofa ki a Ieova e fakaakoako ki a ia. E tuku atu ne Ieova a mea ki tino, kae e penā foki a Iesu. Kae e fakamolemole mai lāua ke fai ne tatou a te mea tenā, me e fai ei ke fia‵fia tonu tatou. Kafai e taumafai tatou o fakaasi atu a te uiga kaimalie tenei i ‵tou faifaiga ki te Atua mo ‵tou tuakoi, ka avatu eiloa ne tatou a te fakaaloalo ki a Ieova kae ka aoga ki a tatou mo nisi tino.

²⁰ E seai se fakalotolotolua me ko oti ne taumafai koe o fesoasoani atu ki nisi tino, maise eiloa a taina tali‵tonu. (Kala. 6:10) Kafai e tumau koe i te fai penā, e mautinoa eiloa me ka alofagina kae loto fakafetai koe, kae ka maua ne koe a te fiafia. “A te tino kaimalie ka manuia,” ko pati i te Faataoto 11:25, “kae ko so se tino e fakamalosi ne ia nisi tino ka maua ne ia a fakamalosiga.” E tonu, a te tuku atu o ‵tou mea mo te fia‵fia, atafai kae kaima‵lie e mafai o fakaasi atu i auala mo feitu e uke i ‵tou ola faka-Kelisiano mo te galuega talai, kae ka maua ne tatou a ikuga fakafiafia. Ka fakamatala mai i te suā mataupu a auala konei.