1. Валэктэ, малы Иегова — шырыт сямо Инмар?

 КЫЛДЫТЫНЫ кутскемезлэсь азьло Иегова чылкак огназ вал, но со ачиз сярысь гинэ ӧз малпаськы. Инмар инмысь но музъем вылысь визьмо кылдытэмъёслы улон кузьмаз. «Бакельлыко Инмар», яке шудо Иегова Инмар, туж яратэ кузьымъёс кузьманы (1 Тим. 1:11; Иак. 1:17). Солэн потэ, ми но шудоесь мед луомы шуыса, соин ик со дышетэ милемыз шырыт сямо луыны (Рим. 1:20).

2, 3. а) Малы шырыт сям шудо каре? б) Мае ми эскеромы та статьяын?

² Библиын верамын: «Инмар адямиез Аслыз укшатыса кылдытӥз» (Ул.-выл. 1:27). Озьыен, ми Инмарлэн кадь сямъёсты возьматыны быгатӥськомы. Шудо луон понна, милемлы Иеговалэсь адӟем кароно — адямиосын тунсыкъяськоно но шырыт сямо луоно (Флп. 2:3, 4; Иак. 1:5). Малы? Малы ке шуоно Иегова милемыз озьы кылдытӥз. Ми тырбыдэстэмесь ке но, шырыт сямо Инмармылэсь адӟем карыны быгатӥськомы.

 ³ Та статьяын ми эскеромы, кызьы Инмарлэн Кылыз милемыз шырыт сямо луыны дышетэ. Озьы ик, ми вераськомы со сярысь, кызьы, шырыт сямо луыса, Иеговаез шумпоттоно но солэсь сётэм ужзэ быдэстоно. Со сяна, ми вераськомы на, малы шырыт сямо адямиос шудоесь но малы котьку со сямез возьматоно.

4, 5. Кыӵе пример возьматӥзы милемлы Иегова но Иисус шырыт сямо луон сярысь?

⁴ Иеговалэн потэ, адямиос солэсь адӟем мед карозы шуыса, соин ик, ми шырыт сяммес возьматӥськомы ке, со шумпотэ (Еф. 5:1). Солэн потэ, ми шудо мед луомы шуыса. Со сярысь вера со, кызьы ми кылдытэмын, кызьы кылдытэмын котырысьтымы дунне, кудӥз милемыз чебереныз но пӧртэмлыкеныз паймытэ (Пс. 103:24; 138:13—16). Соин ик, шырыт сяммес возьматыса но мукетъёсызлы шумпотон вайыса, ми Инмарез данъяськомы.

⁵ Зэмос христианъёс Христослэсь адӟем каро, кудӥз адямиослы самой умой пример возьматӥз, кызьы шырыт сямо луоно. Иисус вераз: «Адями Пи Ас вылаз ужатыны ӧз лыкты, Со Ачиз адямиослы ужаны-тыршыны, Аслэсьтыз лулзэ сётыса, троссэ сьӧлыкъёслэсь мозмытыны лыктӥз» (Матф. 20:28). Нош Павел христианъёсты ӧтиз: «Тӥ сыӵе ик мылкыдын улэ, кыӵе мылкыдын Иисус Христос улэ... Со Ассэ Ачиз покчи кариз, ляльчи кариськиз, адями луыса вордскиз» (Флп. 2:5, 7). Котькудӥзлы юано аслэсьтыз: «Быгатысал-а мон эшшо но умойгес Христослэн пытьы кузяз мыныны?» (Лыдӟе 1 Пётрлэсь 2:21.)

6. Малы дышетэмез потэ вал Иисуслэн пытьыетӥз мынӥсьёссэ, ӟеч сямо Самария мурт сярысь мадён вераса? (Учке статья кутсконысь суредэз.)

⁶ Ми Иеговаез шумпоттӥськомы, куке солэсь но Христослэсь адӟем кариськомы, кылсярысь, куке мукетъёсыз сярысь сюлмаськиськомы но малпаськомы, кызьы соослы юрттыны быгатомы. Ӟеч сямо Самария мурт сярысь мадён вераса, Иисус возьматӥз, солэн пытьыетӥз мынӥсьёс адямиослы юрттыны кулэ шуыса, учкытэк со шоры, кыӵеесь со адямиос. (Лыдӟе Лукалэсь 10:29—37.) Тодӥськоды на-а, малы Иисус со мадёнэз вераз? Одӥг еврей пиосмурт юаз солэсь: «Кин бен мынам матысе?» Иисус валэктӥз, милям Инмарез шумпоттэммы потэ ке, милемлы, ӟеч сямо Самария мурт кадь ик, шырыт сямо луоно шуыса.

7. Кызьы шырыт сямо луон Инмарлэн кивалтыны правоез сярысь юанэн герӟаськемын?

⁷ Эшшо одӥг муг, малы шырыт сямо луоно, Инмарлэн кивалтыны правоез сярысь юанэн герӟаськемын, кудзэ Шайтан Едем садын ӝутӥз. Со вераз, Адам но Ева шудогес луозы шуыса, Инмарлэсь кылзӥськем интые, ас мыл потонъёссы сярысь малпаськизы ке. Ева ачиз сярысь малпаськиз но солэн Инмар кадь луэмез потӥз. Адам но ачиз сярысь малпаськиз но солэн, Инмарлы интые, Евалы ярамон луэмез потӥз (Ул.-выл. 3:4—6). Соослэн кутэм ужпумъёссы кышкыт бервылъёсы  вуттӥзы. Со возьматэ, ачид сярысь гинэ малпаськон адямиосты шудо уг кары шуыса. Нош шырыт сямо луыса, ми возьматӥськомы, милям Инмарлэсь кылзӥськыса улэммы потэ шуыса, малы ке шуоно со тужгес но умой улон сюрес.

8. Малы нырысетӥ адямиос мукетъёсыз сярысь сюлмаськыны кулэ вал?

⁸ Едем садын, Адам но Ева сяна, нокин ӧй вал ни ке но, Иегова Адамлы но Евалы мукетъёсыз сярысь сюлмаськыны уж сётӥз. Иегова соосты бакель кариз но нылпи вордыны, музъемез тырмытыны но сое райлы пӧрмытыны косӥз (Ул.-выл. 1:28). Адамлы но Евалы кулэ вал нылпиоссылэн шудзы сярысь малпаськыны но адӟем карыны Кылдытӥсьсылэсь, кудӥзлэн туж потэ вал, музъем вылын вань адямиос шудоесь мед луозы шуыса. Соослы, озьы ик соослэн нылпиоссылы но, быдэс музъемез райлы пӧрмытоно вал. Собыдӟа ужез быдэстон понна, быдэс семьялы огкылысь ужано вал.

9. Малы адямиос туж шудо луысалзы, музъемез райлы пӧрмытыса?

⁹ Иеговалэсь малпанзэ быдэстон понна но солэн каньыллыказ пырон понна, тырбыдэс пиосмуртъёслы но кышномуртъёслы Иеговаен валче ужано вал (Евр. 4:11). Малпалэ ай,  макем бадӟым шумпотон соос басьтысалзы, со тунсыко ужез быдэстыса! Асьсэлы пайда утчатэк, адямиос мукетъёсыз сярысь сюлмаськысалзы ке, соос трос бакель каронъёс басьтысалзы но туж шудо луысалзы.

10, 11. Мар юрттоз милемлы ӟеч иворез вераны но дышетскисьёсты дасяны?

¹⁰ Иегова аслаз ужась-тыршисьёсызлы уж сётӥз ӟеч иворез вераны но дышетскисьёсты дасяны. Со понна милемлы адямиос сярысь сюлмаськоно. Со ужез ми быдэстыны быгатомы, Инмарез но матысьёсмес яратыса гинэ.

¹¹ Апостол Павел ассэ но куд-ог эшъёссэ «Инмарлэн ужасьёсыз» шуыса нимаз, малы ке шуоно соос Эксэйлык сярысь зэмлыклэсь кидысъёссэ кизизы но соос вылэ ву киськазы (1 Кор. 3:6, 9). Ми но Инмарлэн ужасьёсыз луыны быгатомы, яке соин валче ужаны, жалятэк сётӥмы ке асьмелэсь дырмес, кужыммес но ваньбурмес, Эксэйлык сярысь ӟеч иворез веран понна. Со туж бадӟым дан!

12, 13. Кыӵе бакель каронъёс тӥ басьтӥськоды, дышетскисьёсты дасян уже пыриськыса?

¹² Соос, кинъёс кужымзэс жалятэк тодытон уже пырисько но дышетскисьёсты дасяло, туж бадӟым шумпотон басьто. Со сярысь вераны быгато тросэз вын-агайёс но сузэр-апайёс, кудъёсызлэн туж умой Библия дышетонъёссы вал. Кылъёс уд шедьты вераны, макем бадӟым шумпотон басьтӥськод, куке адӟиськод, кызьы ӝуатско синъёссы адямиослэн, кудъёсыз Библиысь зэмлыкез валаны кутско, кызьы соослэн осконзы будэ, кызьы улонзы воштӥське но кызьы соос зэмлыкез мукет адямиослы вераны кутско. Иисус но туж шумпотӥз, куке солэн 70 дышетскисьёсыз, кудъёссэ со ӟеч иворез вераны ыстӥз, «шумпотыса берытскизы», малы ке шуоно соослэн ужзы азинлыко вал (Лука 10:17—21).

¹³ Быдэс дунне вылысь вын-агайёс но сузэр-апайёс шумпото, куке адӟо, кызьы зэмлык адямиослэсь улонзэс умой пала воштэ. Тани Анна a нимо бызьымтэ егит сузэрлэн примерез. Со ужпум кутӥз тросгес пыриськыны тодытон уже но Европае улыны мынӥз, отчы, кытын ивортӥсьёс уг тырмо. Со гожтэ: «Татын капчиен Библия дышетон кутскыны луэ, но со туж умой! Ужан-тыршон мыным туж бадӟым шумпотон вае. Куке мон дорам бертӥсько, мынам дыры ӧвӧл аслам шуг-секытъёсы сярысь малпаськыны. Мон малпаськисько соос сярысь, кинъёсын Библиез дышетӥсько, малпасько, кызьы соосты юнматыны но маин соослы юрттыны быгато. Табере мон ас вылам шӧдӥ, „басьтон сярысь, сётыны умойгес“ шуыса» (Ап. уж. 20:35).

14. Мар юрттэ тӥледлы ужан-тыршонын шумпотон басьтыны, ӟеч иворез туж ӧжытэз кылзэ ке но?

¹⁴ Ужан-тыршон милемлы шумпотон ваёз, ми адямиослы луонлык сётӥмы ке ӟеч иворез кылыны, учкытэк со шоры, кылзозы-а соос сое, уз-а. Милесьтым ужмес ӵошатыны луэ Иезекииль пророклэн уженыз. Иегова солы шуиз: «Соослы Мынэсьтым  кылъёсме вера, кылзӥськозы-а соос, уз-а» (Иез. 2:7; Ис. 43:10). Адямиос ӟеч иворез уг кылзо ке но, Иегова милесьтым тыршеммес дунъя. (Лыдӟе Еврейёслы 6:10.) Та пумысен туж умой пример возьматӥз одӥг вын-агай. Тани мар со гожтӥз ужан-тыршон сярысь: «Ми мерттӥськомы, ву киськаськомы, Иеговалы вӧсяськиськомы но оскиськомы, со будэтоз шуыса» (1 Кор. 3:6).

15. Кулэ-а милемлы шырыт сямо луыны соку гинэ, куке милемлы тау каро? Валэктэ.

¹⁵ Иисуслэн потэ, шырыт сяммес возьматыса, ми шудоесь мед луомы шуыса. Шырыт сям трос адямиослы кельше. Иисус вераз: «Сётэлэ, тӥледлы но сётӥськоз: тыр мертэтэн мертаса, сэзъяса, туйылыса, пачыл карыса тӥледлы, тӥляд кияды сётӥськоз. Уго кыӵе мертэтэн мерталоды, сыӵеен ик тӥледлы но мертаськоз» (Лука 6:38). Зэм, вань адямиос шырыт сямо луэммы понна тау уз шуэ. Но адями милесьтым тыршеммес дунъя ке, тау карись сюлмыз солэсь но мылкыдзэ ӝутоз мукет адямиослы шырыт сямзэ возьматыны. Озьыен, адямиос тау каро-а яке уг-а, сётэмысь эн дугдэ. Ноку уд тодӥськы, мар быдӟа пайда вайыны быгатэ пунэмен номыр возьматэк лэсьтэм одӥг гинэ уж.

16. Малы милемлы шырыт сямо луоно?

¹⁶ Зэмзэ ик шырыт сямо адямиос номыр пунэмен уг возьмало. Со сярысь Иисус таӵе кылъёсын вераз: «Куное ӧтчаськыкуд, кураськисьёсты, сӧсырмемъёсты, чутъёсты, синтэмъёсты ӧть. Шудо луод: тынад ӟечедлы соос пунэмзэ ӟечен берыктыны уз быгатэ»  (Лука 14:13, 14). Инмарлэн святой духезлэн кивалтэмез улсын Библиын таӵе кылъёс гожтэмын вал: «Гажась-жалясь мурт бакель каремын луоз» но «Шудо, кин куанер сярысь сюлмаське!» (Мад. 22:9; Пс. 40:2). Зэм, кин мукетъёсызлы юрттэ, со зэмзэ ик шудо.

17. Кызьы шырыт сяммес возьматыны быгатомы?

¹⁷ Иисуслэсь «Басьтон сярысь, сётыны умойгес» кылъёссэ вераса, Павеллэн возьматэмез потэ вал, мукетъёсызлы ваньбуренымы юрттэм сяна, милемлы озьы ик кулэ соосты юнматыны, Библиысь визь-кенешъёс сётъяны но мукет амалъёсын юрттыны (Ап. уж. 20:31—35). Кылъёсыныз но ужъёсыныз Павел дышетӥз, макем кулэ шырыт сямо луыны — мукетъёссэ яратыны, соослы дырмес но саклыкмес висъяны но юрттӥськыны.

18. Мар верало тросэз тодосчиос шырыт сям сярысь?

¹⁸ Кызьы верало тодосчиос, кудъёсыз адямилэсь ассэ воземзэ эскеро, шырыт сямо адямиос шудоесьгес. Одӥг статьяын верамын вал, «соос, кинъёс мукет адямиослы мае ке умойзэ каризы, асьсэды трослы шудогес шӧдӥзы» шуыса. Тодосчиос верало, мукетъёсызлы юрттыса, ми шӧдӥськомы, улонмы юнме уг ортчы шуыса. Соин ик, тазалыкез юнматон но шудогес луон понна, ӧнерчиос ӵем дыръя ӵекто мукетъёсызлы юрттыны. Ми ум паймиське, шырыт сям шудэн герӟаськемын шуыса, малы ке шуоно со сярысь кемалась гожтэмын вал ини Инмарлэн Кылаз (2 Тим. 3:16, 17).

19, 20. Малы тӥляд шырыт сямо луэмды потэ?

¹⁹ Ми котырын асьсэ сярысь гинэ малпаськись адямиос уло бере, шырыт сямо луыны капчи ӧвӧл. Но Иисус вераз, вань шуыса кык самой бадӟым курон-косонъёс — со Иеговаез вань сюлмын, вань лулын, вань визьмын, вань кужмын яратыны но матысьтэ астэ ачид кадь ик яратыны (Марк 12:28—31). Кызьы ми тодӥмы та статьяысь, Иеговаез яратӥсь адямиос солэсь адӟем карыны тыршо. Иегова но Иисус мукетъёсызлы шырыт сямзэс возьмато, но соослэн потэ, ми но шырыт сяммес мед возьматомы шуыса, малы ке шуоно шырыт сям зэмзэ ик шудо каре. Иеговалы но адямиослы мае ке лэсьтыса но пунэмен номыр возьматэк, ми Инмарез данъяломы, мукетъёсызлы юрттомы но асьмеос шудогес луомы.

²⁰ Веранэз ӧвӧл, тӥ ваньзэ кариськоды ини, мукетъёсызлы юрттон понна, тужгес но огъя оскисьёстылы (Гал. 6:10). Азьланяз но озьы лэсьтӥды ке, котырысьтыды адямиос тӥледыз одно ик яратозы, гажалозы но тӥ шудо луоды. Мадёнъёсын 11:25 верамын: «Ӟеч уж лэсьтӥсь тыр луоз, кин мукетъёслэсь сюзэс юзматэ, солэсь аслэсьтыз но сюзэ юзматозы». Улонамы но ужан-тыршонамы трос амалъёс вань, кызьы ми быгатомы мукетъёсызлы сюлмысь юрттыны, шырыт сяммес возьматыны но мукетъёсызлы ӟеч ужъёс лэсьтыны. Куд-огзэ соос пӧлысь ми эскеромы мукетаз статьяын.