1. Ana yakupanganyikwa yikulosya umboni wamtuli wakuti Yehofa ali jwakoloŵa magasa?

PANA ndaŵi jele Yehofa jwaliji jikajikape. Jwalakwe jwapelece umi ku yakupanganyikwa yalunda yausimu soni kwa ŵandu. Yehofa “Mlungu jwakusangalala,” akusanonyela kupeleka yindu yambone. (1 Tim. 1:11; Yak. 1:17) Jwalakwe akusasakasoni kuti tuŵeje ŵakusangalala. Pa ligongo lyeleyi, akusatujiganya kuŵa ŵakoloŵa magasa.—Alo. 1:20.

2, 3. (a) Ligongo cici kupeleka kukusatutendekasya kuŵa ŵakusangalala? (b) Ana citulijiganye cici mungani ajino?

² Mlungu ŵampanganyisye mundu m’ciwanicisyo cakwe. (Gen. 1:27) Gopolela kuti Mlungu ŵatupanganyisye kuti tulosyeje ndamo jakwe, jakoloŵa magasa. Kuti tuŵe ŵakusangalala soni ŵakwikutila, tukusosekwa kuyaga cisyasyo ca Yehofa mwakwanonyela ŵandu ŵane soni kuŵa ŵakoloŵa magasa. (Afil. 2:3, 4; Yak. 1:5) Ligongo cici? Ligongo lyakuti mwacinonyelo, Yehofa ŵapanganyisye ŵandu m’litala lyeleli. Atamose kuti tuli ŵangali umlama,  mpaka tukombole kusyasya koloŵa magasa kwa Yehofa.

³ Baibulo jikusatusalila yampaka tutende kuti tuŵe ŵakoloŵa magasa. Kwende tulole yampaka tulijiganye kutyocela m’Malemba yakwamba nganiji. Citulijiganye ligongo lyakwe Yehofa akusasangalala patukuŵa ŵakoloŵa magasa. Citulijiganyesoni mwele koloŵa magasa kukusatukamucisya kutenda masengo gaŵatupele Yehofa soni ligongo lyakwe tukusaŵa ŵakusangalala patukulosya ndamoji. Soni citutagulilane ligongo lyakwe tukusosekwa kwendelecela kuŵa ŵakoloŵa magasa.

4, 5. Ana Yehofa soni Yesu atupele cisyasyo camtuli cakuŵa ŵakoloŵa magasa?

⁴ Yehofa akusasaka kuti tumsyasyeje jwalakwe mwakuŵa ŵakoloŵa magasa. Yeleyi yikusamtendekasya kuŵa jwakusangalala. (Aef. 5:1) Yehofa akusasaka kuti tusangalaleje. Tukuti m’yoyo ligongo lyakuti ŵatupanganyisye m’litala lyapajika, soni ŵatupele cilambo cakusalala mwaŵaŵisilemo cilicose kuti tusangalaleje naco. (Sal. 104:24; 139:13-16) M’yoyo, patukulingalinga kwatendekasya ŵane kuŵa ŵakusangalala, tukusaŵa tuli mkumcimbicisya Yehofa.

⁵ Aklistu ŵasyesyene akusamsyasya Yesu, juŵatupele cisyasyo cambone ca mwampaka tuŵele ŵakoloŵa magasa. Pakuŵeceta ya jwalakwe msyene, jwatite, “Mwanace jwa mundu nganayika kukutumicilidwa nambo kukutumicila soni kukupeleka umi wakwe kukwawombola ŵandu ŵajinji.” (Mat. 20:28) Ndumetume Paulo jwalimbikasisye Aklistu kuti, “Akole nganisyo syelesi syele Klistu Yesu ŵakwete . . . Jwalakwe jwalesile yosope yajwakwete nikuŵa mpela kapolo.” (Afil. 2:5, 7) Jwalijose jwetuwe akusosekwa kuliwusya kuti, ‘Ana mpaka nguye cisyasyo ca Yesu kupunda mwangutendelamu?’​—Aŵalanje 1 Petulo 2:21.

6. Pakamulicisya masengo citagu ca Msamaliya jwacanasa, ana Yesu ŵatujiganyisye cici? (Alole ciwulili cacili kundanda kwa nganiji.)

⁶ Patukukuya cisyasyo ca Yehofa soni Yesu, Yehofa akusaŵa jwakusangalala. Tukusatenda yeleyi mwakwaganicisya ŵane soni kulola yampaka tutende pakwakamucisya. Yesu, kupitila m’citagu cakwe ca Msamaliya jwa canasa, jwagombelecesye kuti ŵakumkuya ŵakwe akusosekwa kwakamucisyaga ŵane, atamose kuti ali ŵakulekangana kwakutyocela. (Aŵalanje Luka 10:29-37.) Ana akukumbucila ciwusyo caŵawusisye Ayuda cacamtendekasisye kuti Yesu asale citaguci? Caliji cakuti, “Ana ŵani ŵali mjangu jusyesyene?” Kwanga kwa Yesu kukulosya kuti naga tukusaka kumsangalasya Mlungu, tukusosekwa kuŵa ŵakusacilila kwapaga ŵane mwakoloŵa magasa mpela muŵatendele Msamaliya jula.

7. Ana mpaka tulosye camtuli kuti tukusakulupilila kuti Mlungu akusatenda yindu m’matala gambone?

⁷ Aklistu akwete magongo gakupikanika gakuŵela ŵakoloŵa magasa. Mwambone, ndamo jeleji jikusakamulana ni ngani jaŵajitandikasisye Satana mumgunda wa Edeni. Camtuli? Satana jwasasile kuti Adamu ni Hawa akaliji ŵakusangalala mnope ligongo lyakutenda yindu yakulinonyela m’malo mwakupikanila Mlungu. Hawa jwasakaga kulandana ni Mlungu. Kweleku kwaliji kulinonyela. Nombenajo Adamu jwalosisye kulinonyela pakusaka kwasangalasya ŵamkwakwe, Hawa. (Gen. 3:4-6) Yaŵasagwileyi yayikasisye yipwetesi. Kulinonyela kwangamtendekasya mundu kuŵa jwakusangalala. Naga tukuŵa ŵakoloŵa magasa, tukusalosya kuti tukusakulupilila kuti Mlungu akusatenda yindu m’matala gambone.

8. Ligongo cici Adamu ni Hawa ŵasosekwe kuŵa ni mtima wakwaganicisya ŵane?

⁸ Mlungu ŵalipele liŵasa lyandanda masengo gagakatendekasisye kuti aganicisyeje ya ŵane,  atamose kuti ŵaliji jika mumgunda wa Edeni. Yehofa ŵasalile Adamu ni Hawa kuti aŵelekane, agumbasye cilambo capasi, soni aciloleleje. (Gen 1:28) Yehofa jwasakaga kuti yakupanganyikwa yakwe yiŵeje yakusangalala. M’yoyosoni, Adamu ni Hawa ŵasosekwe kuti asacilileje kuti ŵanace ŵawo caŵe ŵakusangalala, atamose kuti ŵaliji mkanapagwe. Pasosekwe kuti cilambo cosope ciŵe paladaiso kuti Adamu ni ŵanace ŵakwe caŵe ŵakusangalala. Gelega galiji masengo gamakulungwa mnope.

9. Ligongo cici ŵandu akaliji ŵakusangalala ligongo lyakamula masengo gakucitendekasya cilamboci kuŵa Paladaiso?

⁹ Ligongo lyakuti jemanjaji ŵakwete umlama, ŵasosekwe kamula masengo mwakamulana ni Yehofa kuti akwanisye kucitendekasya cilambo kuŵa paladaiso soni kuti akwanilisye masengo ga Yehofa. Mwakutenda yeleyi, akakombwele kwinjila m’cipumulisi ca Yehofa. (Aheb. 4:11) Masengoga gakaliji gakusangalasya kwabasi. Yehofa akapele majali gejinji ligongo lyakuŵa ŵangalinonyela soni kwaganicisya ŵane.

10, 11. Ana mpaka tukwanilisye camtuli masengo gakulalicila soni kupanganya ŵakulijiganya?

¹⁰ Masiku agano, Yehofa ŵapele ŵandu ŵakwe masengo gakulalicila soni kupanganya ŵakulijiganya. Kuti tukombole kamula masengoga, tukusosekwa kwanonyelaga mnope ŵane. Naga tukusamnonyela Mlungu soni ŵandu, tucijendelecela kamula masengoga.

¹¹ Paulo jwasasile kuti jwalakwe ni Aklistu acimjakwe ŵaliji “ŵamasengo acimjakwe ŵa Mlungu” ligongo jemanjaji ŵalalicilaga soni kwajiganya ŵandu ya usyesyene. (1 Akoli. 3:6, 9) Masiku agano, m’wejisoni mpaka tuŵe “ŵamasengo acimjakwe ŵa Mlungu” patukukamulicisya masengo ndaŵi jetu, yindu yetu, soni macili getu pa masengo ga Mlungu gakulalicila. Welewu uli upile wekulungwa kwabasi.

12, 13. Ana masengo gakupanganya ŵakulijiganya gakusayikasya majali gamtuli?

¹² Kuŵa ŵakoloŵa magasa pakamulicisya masengo ndaŵi soni macili getu pa masengo gakulalicila soni kupanganya ŵakulijiganya kukusayikasya cisangalalo. Yeleyi ni yakusaŵeceta abale ni alongo ŵakusatendesya majiganyo ga Baibulo gakwawula pasogolo. Mwambone, tukusasangalala patukwawona ŵakulijiganya Baibulo ŵetu ali mkupikanicisya usyesyene, ali mkukula mwausimu, kucenga umi wawo soni pakutanda kwasalila ŵane yakulijiganyayo. Nombenajo Yesu, jwasangalele panyuma pakuti ŵakulijiganya ŵakwe ŵakwana 70 ŵaŵatumisye kukulalicila, ‘ŵawusile ali mkusangalala’ ligongo lya yindu yambone yaŵasimene nayo.—Luk. 10:17-21.

¹³ Abale ni alongo akusaŵa ŵakusangalala pakuwuwona utenga wa ngani syambone uli mkucenga umi wa ŵandu. Agambe ganicisya yayamtendecele Anna, mlongo jwacisikana jwangalombedwa. * Mlongoju jwajonjecesye undumetume wakwe mwakusamila kumkuli wakusosecela  ŵakulalicila ŵajinji m’cilambo cine ca ku Europe. Jwalakwe jwalembile kuti, “Akuno kwana upile wakutendesya majiganyo gejinji. Yeleyi yikusiyisangalasya. Undumetumewu ukusandendekasya kuŵa jwakusangalala. Pambujile ku nyumba, ngangusakola ndaŵi jaganicisya ya yakusawusya yangu. Mmalo mwakwe ngusaganicisya ya yakusawusya yakusasimana nayo ŵandu ŵangusalijiganya nawo Baibulo. Ngusalola yampaka ndende kuti nalimbikasye soni kwakamucisya. Apano ndili jwakusimicisya kuti yisyene ‘kupeleka kukusamtendekasya mundu kuŵa jwakusangalala kulekangana ni kupocela’”—Mase. 20:35.

14. Ana mpaka tupate camtuli cisangalalo patukulalicila, atamose kuti ŵandu ŵajinji nganaŵa apikanile utenga wetu?

¹⁴ Tukusaŵagasoni ŵakusangalala patukwapa ŵandu upile wakupikanila utenga wa ngani syambone atamose kuti mpaka asagule kupikanila kapena iyayi. Masiku agano undumetume wetu uli mpela wa jwakulocesya Esekiyele. Yehofa ŵamsalile Esekiyele kuti, “Mkasalile jemanjajo maloŵe gangu, cinga cakapikanile kapena iyayi.” (Esek. 2:7; Yes. 43:10) Atamose kuti ŵane nganaŵa ayamicile utenga ŵatukusalalicila, Yehofa akasayamicila kulipeleka kwetu. (Aŵalanje Ahebeli 6:10) Jwakulalicila jwine pakwamba ya undumetume wakwe jwatite, “M’we tupandile, tujitilile, soni tukupopela ni cikulupi cakuti Yehofa cakusye lung’wanu lwa ŵandu ŵeleŵa.”—1 Akoli. 3:6.

15. Ana tukusosekwa kuŵa ŵakoloŵa magasa ligongo lyakuti ŵandu akutuyamicila? Alondesye.

¹⁵ Yesu akusasaka kuti tuŵeje ŵakusangalala mwakuŵa ŵakoloŵa magasa. Ŵandu ŵajinji akusalingalinga kuŵa ŵakoloŵa magasa. Jwalakwe jwatite, “Mŵeje ŵakupeleka, nombe ŵandu cacimpa. Cacimkusulila m’misaku mwenu ni mpimo wambone, wegumbale, wecinyindile, soni wakwasicila. Pakuŵa mpimo umkwapimila nawo ŵane, cacimpimilasoni uwowo.” (Luk. 6:38) Patukulosya ndamo jakoloŵa magasaji, ngaŵa kuti ŵandu wosope taciyamicila, nambope ŵandu ŵane tacilola yambone yatukwatendela, nombe nawo taciŵa ŵakoloŵa magasa. Atamose yikuwoneka kuti ŵanduwo ngakulosya kuyamicila, nambope m’weji tukusosekwa kuŵa ŵakoloŵa magasa. Koloŵa magasa kwetu, atamose  kamo, mpaka kuŵe ni yakuyicisya yambone.

16. Ana tukusosekwa kuŵa ŵakoloŵa magasa kwa ŵani, soni ligongo cici?

¹⁶ Kusala yisyene ŵandu ŵakoloŵa magasa ngakusapeleka yindu pakusaka kuti apate kanekakwe. Yesu jwatite, “Pamlinganyisye cindimba, mwaŵilanjeje ŵandu ŵakulaga, ŵalemale soni ŵangalola. Kaneko cimciŵa ŵakusangalala, ligongo nganakola campaka am’wucisye.” (Luk. 14:13, 14) Baibulo jikusati, “Jwakupeleka mwakoloŵa magasa cacipocela mbote.” Jikusasalasoni kuti, “Jwana upile jwalijose jwakumganicisya mundu jwakutuluka.” (Mis. 22:9; Sal. 41:1) Yisyene, tukusosekwa kuŵa ŵakoloŵa magasa ligongo tukusaŵa ŵakusangalala patukwakamucisya ŵane.

17. Ana ni matala gapi gakupelecela gampaka gatutendekasye kuŵa ŵakusangalala?

¹⁷ Paulo pajwakamwile maloŵe ga Yesu gakuti, “Kupeleka kukusamtendekasya mundu kuŵa jwakusangalala kulekangana ni kupocela,” jwalakwe nganagopolelaga kuti tukusosekwa kwapaga ŵane yakusosecela yakucilupe, nambo tukusosekwasoni kwalimbikasyaga, kwapaga cikamucisyo ca m’Baibulo soni yine yampaka asosecele. (Mase. 20:31-35) Kupitila m’maloŵe gakwe soni yitendo yakwe, Paulo jwatujiganyisye kusosekwa kwakuŵa ŵakoloŵa magasa pakukamulicisya masengo ndaŵi jetu, macili getu, lung’wanu lwetu, soni cinonyelo cetu.

18. Ana ŵakuwungunya ŵajinji akusasala yamtuli pakwamba yakuŵa ŵakoloŵa magasa?

¹⁸ Ŵakuwungunya ŵakusalijiganya ndamo sya ŵandu ŵakopocele kuti kupeleka kukusatendekasya ŵandu kuŵa ŵakusangalala. Mwakamulana ni ŵakuwungunyaŵa, ŵandu akusasala kuti akusaŵa ŵakusangalala ligongo lyakwatendela yindu yambone ŵandu ŵane. Ŵakuwungunya akusaŵeceta kuti patukwakamucisya ŵane, tukusalipikana kuti umi wetu ukwete cakulinga. Acinamatetule ŵane akusaŵeceta kuti ŵandu akusakamula masengo gakulipeleka kuti akole cilu cambone soni kuti aŵe ŵakusangalala. Yeleyi ngayikutusimonjesya ligongo lyakuti Mkupanganya jwetu jwacinonyelo, Yehofa, akusaŵeceta kuti ndaŵi syosope kupeleka kukusatutendekasya kuŵa ŵakusangalala.—2 Tim. 3:16, 17.

19, 20. Ana akusaka kutenda cici kuti aŵeje ŵakoloŵa magasa?

¹⁹ Mpaka yiŵe yakusawusya kwendelecela kuŵa ŵakoloŵa magasa ligongo lyakuti tukutama ni ŵandu ŵangaganicisya ŵane. Nambope, Yesu jwaŵecete kuti malamusi gaŵili gekulungwa gali kumnonyela Yehofa ni mtima wosope, umi wetu wosope, nganisyo syetu syosope, soni macili getu gosope nambosoni kwanonyela acimjetu mpela mwatukusalinonyelela acimsyene. (Mak. 12:28-31) Mpela mwatuyiwonele munganiji, ŵandu ŵakusamnonyela Yehofa akusajigalila cisyasyo cakwe. Yehofa soni Yesu ali ŵakoloŵa magasa. Jemanjaji akusatulimbikasya kuti tuŵeje ŵakoloŵa magasa, ligongo patukutenda yeleyi tukusaŵaga ŵakusangalala. Naga tukulingalinga kulosya ndamo jakoloŵa magasa patukutenda yindu ya Mlungu kapena ni ŵane, yicitendekasya kuti Yehofa apocele ucimbicimbi soni yicitukamucisya m’weji ni ŵandu ŵane.

²⁰ Ngatukukayicila kuti atesile kala yakakombwele pakwakamucisya ŵandu ŵane, mnopemnope ŵakulupilila acimjawo. (Aga. 6:10) Naga akwendelecela kutenda yeleyi, ŵandu cacayamicila soni kwanonyela, nambosoni wawojo caciŵa ŵakusangalala. Pa Misyungu 11:25 pakusati, “Mundu jwakupeleka mwakoloŵa magasa cacipocela mbote, soni mundu jwakwakamucisya acimjakwe nombe najo tacipocela cikamucisyo.” Kupeleka mwangalinonyela soni kuŵa ŵakoloŵa magasa mpaka tukulosye m’matala gakulekanganalekangana. Mpaka tukulosye mu mbali sine sya umi wetu wa Ciklistu soni mu undumetume. Ngani jakuyicisya tucitagulilana mbali syelesi.