1． 乜嘢表明耶和華係慷慨嘅上帝？

 喺創造萬物之前，耶和華係全宇宙唯一嘅個體。不過，佢冇只係諗住自己，反而將生命呢份寶貴嘅禮物賜俾天使同人類。耶和華係“快樂嘅上帝”，佢樂意賜人各樣美善嘅恩賜。（提摩太前書1:11；雅各書1:17）佢亦都好希望我哋快樂，所以教導我哋要向人表現慷慨。（羅馬書1:20）

2,3． （甲）點解我哋慷慨施與會感到快樂？（乙）呢篇課文會討論乜嘢？

² 耶和華按照自己嘅形像創造人類。（創世記1:27）呢個意味住，我哋可以反映出佢嘅特質。耶和華設計人嘅時候，使人可以效法佢嘅榜樣，並通過關心人、向人表現慷慨而得到快樂同滿足。（腓立比書2:3,4；雅各書1:5）所以，我哋就算唔完美，都可以學習上帝點樣慷慨待人。

³ 呢篇課文會討論，聖經點樣教導我哋向人表現慷慨。我哋會睇吓表現慷慨可以點樣使上帝嘅心歡喜，同 埋培養呢種特質點樣幫助我哋執行上帝交託嘅工作。我哋亦都會分析慷慨同快樂有乜嘢關係，以及點解我哋要繼續培養慷慨呢種特質。

4,5． 耶和華同耶穌喺慷慨方面為我哋立下乜嘢榜樣？

⁴ 耶和華希望我哋效法佢，向人表現慷慨。我哋噉樣做，就可以令佢嘅心歡喜。（以弗所書5:1）耶和華奇妙噉創造人類同美麗嘅地球，呢一切表明佢好希望我哋快樂。（詩篇104:24；139:13-16）所以，我哋努力幫助人得到快樂，就可以榮耀上帝。

⁵ 耶穌基督喺表現慷慨方面立下完美嘅榜樣，所以真基督徒都應該效法佢。耶穌話：“人子嚟到，唔係要受人服事，而係要服事人，並且獻出生命，作為好多人嘅贖價。”（馬太福音20:28）使徒保羅亦都勸勉基督徒話：“基督耶穌懷有點樣嘅精神，你哋都要懷有點樣嘅精神。……［佢］徹底捨棄自己，以奴隸嘅形態，成為人。”（腓立比書2:5,7）每個人都可以問吓自己：“我喺跟從耶穌方面係咪可以做得更好？”（請讀彼得前書2:21）

6． 耶穌通過好心嘅撒馬利亞人嘅比喻教導我哋乜嘢？（請睇吓課文開頭嘅圖片）

⁶ 我哋效法耶和華同耶穌嘅完美榜樣，盡力關心同幫助人，就可以令耶和華嘅心歡喜。當一個猶太人問耶穌邊個係佢要愛嘅人嗰時，耶穌就講咗好心嘅撒馬利亞人嘅比喻。（請讀路加福音10:29-37）耶穌通過呢個比喻教導門徒，就算其他人嘅背景同自己唔同，都要盡力幫助佢哋。呢個表明，如果我哋想蒙上帝悦納，就要效法嗰個撒馬利亞人，慷慨待人。

7． 我哋點樣做就表明自己確信上帝嘅做事方式係最好嘅？

⁷ 基督徒應該慷慨待人嘅另一個理由同伊甸園嘅事件有關。撒但聲稱，亞當同夏娃如果反叛上帝，只顧滿足自己嘅私慾，就會更加快樂。撒但所講嘅話其實亦都針對全人類。夏娃順應自己嘅慾望行事，想變得好似上帝一樣，而亞當亦都同樣順應私慾，想取悦夏娃過於取悦上帝。（創世記3:4-6）佢哋所作嘅決定造成悲慘嘅後果。呢個清楚表明，自私嘅精神唔會使人幸福快樂。我哋表現無私慷慨嘅精神，就可以表明我哋確信上帝嘅做事方式係最好嘅。

8． 亞當同夏娃從耶和華嘅吩咐可以睇出乜嘢？

⁸ 雖然一開始喺伊甸園入面只有亞當同夏娃兩個人，不過，耶和華吩咐佢哋要繁衍增多，遍滿地面，開拓大地。（創世記1:28）佢哋從耶和華嘅吩咐可以睇出，自己所做嘅事會影響到整個人類大家庭。耶和華希望地上所有人都享有幸福快樂嘅生活。亞當同夏娃都應該效法耶和華，為佢哋將 來嘅子孫後代着想。當樂園擴展至整個地球嘅時候，全人類都可以安居其中。亞當、夏娃如果冇反叛上帝，就可以同佢哋嘅後代一齊合作，共同成就呢項規模龐大嘅工作。

9． 點解地球成為樂園可以令全人類享有幸福快樂嘅生活？

⁹ 為咗成就耶和華嘅旨意，使地球成為樂園，完美嘅人類要同耶和華一齊工作。噉樣，佢哋就可以得享上帝嘅安息。（希伯來書4:11）呢個真係一項令人心滿意足嘅工作！耶和華會因為佢哋無私噉獻出自己造益他人而大大賜福俾佢哋。

10,11． 我哋可以點樣執行傳道教人嘅工作？

¹⁰ 今日，耶和華交託俾佢子民一項重要嘅工作，就係傳道並幫助人成為基督徒。為咗執行呢個任務，我哋要真誠噉關心其他人。我哋只有懷住正確嘅動機，愛耶和華同其他人，先至可以堅持不懈噉執行呢項工作。

¹¹ 喺公元1世紀，保羅將自己同一啲親密嘅朋友稱為“上帝嘅同工”，因為佢哋傳講並教導人王國真理。（哥林多前書3:6,9）今日，我哋表現慷慨，通過獻出自己嘅時間、精力同資財嚟執行上帝嘅傳道工作，亦都可以成為“上帝嘅同工”。呢個真係好大嘅殊榮！

12,13． 幫助人成為基督徒可以帶嚟乜嘢福分？

¹² 我哋慷慨噉運用自己嘅時間同精力參與傳道教人嘅工作，可以得到好大嘅喜樂。好多弟兄姊妹見到聖經學生不斷進步，都認為冇其他事可以比呢項工作更能够令自己深感滿足。當我哋見到聖經學生受真理打動、信心不斷增長、喺生活上作出改變、開始向其他人分享真理嗰時，内心感到非常喜樂。耶穌曾經差派70個門徒去向人傳道。呢啲門徒因為地區反應良好，就“歡歡喜喜返到嚟”。耶穌亦都因為佢哋而得到好大嘅喜樂。（路加福音10:17-21）

¹³ 世界各地嘅傳道員都好開心見到王國真理使好多人嘅生活得以改善。我哋嚟睇吓一個叫做安娜 *嘅年 輕獨身姊妹嘅經歷。佢擴大服務，搬去東歐一個需求更大嘅傳道地區。佢話：“我喺呢度好開心，因為有好多機會可以揾到聖經學生。傳道工作帶俾我好大嘅喜樂。我返到屋企嗰時，根本冇時間去諗自己嘅難題。我諗嘅係聖經學生，以及佢哋嘅困難同憂慮。我諗辦法鼓勵佢哋，亦都諗吓可以點樣有效噉幫助佢哋。‘施與比接受更快樂’呢句話講得真係一啲都冇錯。”（使徒行傳20:35）

14． 即使傳道地區嘅人對真理反應冷淡，我哋都可以點樣從傳道工作得到快樂？

¹⁴ 就算傳道對象唔願意聽好消息，我哋都可以因為自己已經盡力傳講真理而感到快樂。喺以西結嘅日子，好多人唔聽耶和華嘅警告。不過，耶和華吩咐以西結話：“無論佢哋聽抑或唔聽，你都要將我嘅話講俾佢哋知。”（以西結書2:7；以賽亞書43:10）今日，耶和華亦都俾咗我哋同樣嘅任務。雖然有啲人對我哋傳講嘅信息冇興趣，但耶和華好珍視我哋付出嘅努力。（請讀希伯來書6:10）一個弟兄對傳道工作有好好嘅態度，佢話：“我哋栽種、淋水，而且懷住希望，祈求上帝幫助嗰啲對真理感興趣嘅人喺屬靈上不斷成長。”（哥林多前書3:6）

15． 點解我哋唔應該只係向嗰啲感激我哋嘅人表現慷慨？

¹⁵ 耶穌希望我哋向人表現慷慨並從中得到快樂。佢鼓勵我哋話：“要經常向人施與，你哋就必會蒙施與。人必會將十足嘅分量，連搖帶按，倒入你哋嘅衫袋，直到滿瀉。你哋用乜嘢量器量俾人，人就會用乜嘢量器量翻俾你哋。”（路加福音6:38）當然，唔係人人都會接受我哋嘅好意，不過好 多人會感激我哋慷慨對待佢哋，並受到推動向其他人表現慷慨。無論對方係咪感激我哋，我哋都應該繼續慷慨待人。話唔定我哋某一次嘅慷慨舉動會帶嚟美好嘅結果。

16． 乜嘢推使我哋向人表現慷慨？

¹⁶ 真正慷慨嘅人唔會期望對方回報自己。耶穌話：“你設宴嘅時候，要請貧窮嘅、傷殘嘅、跛腳嘅、盲眼嘅，噉樣你就有福嘞，因為佢哋冇乜嘢可以報答你。”（路加福音14:13,14）聖經話：“慷慨嘅人必然蒙福”。另一節經文話：“關懷寒微人嘅人真係有福！”（箴言22:9；詩篇41:1）的確，我哋應該向人施與，因為我哋幫助人就會得到喜樂。

17． 點樣嘅施與會使你快樂？

¹⁷ 耶穌講過：“施與比接受更快樂。”當保羅引述耶穌呢番話嗰陣，佢所講嘅唔係只係物質上嘅施與，亦都包括鼓勵、指引同幫助嗰啲有需要嘅人。（使徒行傳20:31-35）保羅通過自己嘅所言所行向我哋表明，付出自己嘅時間、精力去關愛其他人的確好重要。

18． 關於表現慷慨，一啲研究人員點樣講？

¹⁸ 有啲社會科學研究人員亦都發現，慷慨大方嘅人通常會更快樂。佢哋發表嘅文章指出，人主動為其他人做好事，自己都會感到開心。佢哋又提到，幫助他人嘅行為滿足咗人類嘅基本需要，可以使我哋嘅人生充滿意義。佢哋建議，一個人如果想更加健康、快樂，就應該多啲參與志願服務。當然，我哋對呢啲研究結果唔會覺得出奇，因為仁愛嘅創造主耶和華好早之前就講過，施與會使我哋更快樂。（提摩太後書3:16,17）

19,20． 向人表現慷慨點樣使你得益？

¹⁹ 如果身邊嘅人只係顧住自己，噉我哋就唔容易向佢哋表現慷慨嘞。不過耶穌話，最大嘅兩條誡命係，要全心、全意、全智、全力愛耶和華同埋要愛人如己。（馬可福音12:28-31）就好似呢篇課文所講嘅，一個人如果愛耶和華，就會效法佢。耶和華同耶穌都樂意向人施與，佢哋亦都鼓勵我哋噉樣做，因為我哋可以從中得到真正嘅快樂。我哋盡力表現慷慨，就可以榮耀耶和華，並造益自己同其他人。

²⁰ 相信你已經盡力向人表現慷慨，特别係對我哋嘅弟兄姊妹。（加拉太書6:10）如果你繼續努力噉樣做，大家一定會好愛你、感激你所付出嘅一切，而你自己亦都會感到好快樂。正如箴言11:25所講：“慷慨嘅人，必得豐盈；大方滋潤人嘅，必蒙大方滋潤。”下一篇課文會討論，喺生活同傳道方面，我哋可以通過邊啲方式無私噉獻出自己，表現慷慨嘅精神。