1. Waigu kusikusiahe ayugo pa ga Yekova gamahe?

WA VURA duhe nga Yekova adu nisako mbata fu ko tona kusa ahe, ko aaberãnga kina patiko sa te. Kuba gure, ko afu gu gamahe nga ga unga fu aboro gbiati amaraika. “Betedi Mbori” nga Yekova nakpinyemu kaa gama wene agamahe. (1 Tim. 1:11; Yak. 1:17) Na wa duhe nga ko naida gupai a nga ani du na ngbarago, ko nayugopai furani tipa ani du ni aboro gamahe.​—Rom. 1:20.

2, 3. (a) Tipagine du ani ti ni na ngbarago ho ani agamahe ni? (b) Gini apai ani nika sakapai tipaha?

² Mbori akusi aboro rogo kpiako yo. (Bam. P. 1:27) Gere nayugo gupai nga, ko akusi rani na agu asino du tiko. Tipa ka gbia ngbarago gbiati ga Mbori amaku, si naida ani pekefuo ga Yekova kpiapai nidu ani na nyemu kura aboro na kidu ni aboro gamahe. (Frp. 2:3, 4; Yak. 1:5) Tipagine? Si mbiko wo du Yekova akusi rani. Wa vura du ani ni kpakpa aboro, ani ima rengba ka wirika Yekova kidu ni aboro gamahe a.

³ Ziazia Kekeapai nayugo wai furani rengbe ani kadu ni aboro gamahe. Ani sakingo bete agu apai Ziazia Kekeapai ayugoho furani tipa gipai re. Ani nika bi wai padu ani ni aboro gamahe asa  gupai nga Mbori idi na ani na wai pa sonosa ani gi sino re narengbe ka undo rani ani mangi gu sunge Mbori nafuhe furani. Ani nika sakapai a tipa wai du padu ani ni aboro gamahe na ngbanya dagbaha na gaani ngbarago gbiati ndu gupai si aida ani naasonosa gu sino ti ni kindi nga ga gamahe.

4, 5. Gini akpiapai nga ga gamahe aYekova na Yesu namoihe fu rani?

⁴ Yekova naida gupai nga agu aboro ko akusiyo wiriki gako kpiapai, sidu, ko na ngbarago ho ani agamahe ni. (Ef. 5:1) Gu gene Mbori akusi rani ngbaha na gu bawene kpotosende ko akusihe na agu ahe dunduko du rogoho nayugo gupai ziazia nga ko naida ani du na ngbarago. (Tam. 104:24; 139:13-16) Sidu, ani nafu irisa fuko ho ani amanga nyanyaki asadatise ni ka sa kura aboro i du na ngbarago.

⁵ Ndikidi aKristano nawirika ga Kristo kpiapai, nga gu ko moi bawene kpiapai kisusi nga ga wai aboro narengbe kadu ni aboro gamahe. Yesu agumba gupai ni tiko nga: “Wiri boro aye nga i nimangi pa ko te, ko naye ka manga pa aboro, ka tumo dungu yo ni ungako.” (Mt. 20:28) Berewe a, gu mokedi nangia Pauro angarasi aKristano nga: “Oni dú na gi berã rogo roni yo re, nadu rogo Kristo Yesu yo a. . . Ko auka pa tiko ki du wa kina kanga.” (Frp. 2:5, 7) Ani dunduko ni basasa si aida ani sana tirani nga, ‘Ya mo mi rengbe ka pekafuo ga Yesu kpiapai sirisiri susi gu mi amangaha awere?’​—Oni gedi 1 Petero 2:21.

6. Ginipai Yesu ayuguhe furani rogo gu sanza yo nga ga boro Somorona? (Oni bi gu sura duti tonatonaha.)

⁶ Rago nangba ti Yekova na ani ho ani awirika gako kpiapai ni gbiati ga wiriko, nidu ani na nyemu kura aboro na kini gbata agene ka undo yo. Nirengo, rogo gu sanza yo nga ga boro Somorona, Yesu ayuguhe ziazia nga ko naida apefuoko naaundo kura aboro zavura aguyo du apai tipa yo kia. (Oni gedi Ruka 10:29-37.) Ya mo mo natingida gu sanahe nga gu nasa gupai nga Yesu tona ka gumba gu sanza nga ga boro Somorona? Boro Yuda asana ko nga: “Da nga kuare?” Ga Yesu karagapai nayugo gupai nga wakina gu boro Somorona re, si naida ani du ni aboro gamahe tipa ka sa gupai nga Mbori du na ngbarago na ani.

7. Waigu ani ayugo gupai nga ani ima ida kuti gupai nga ga Yekova gene mangaapai ngba kisusi? Oni sakingo rogoyo.

⁷ Kura dungu nduapai kinaho berewe si aida aKristano du ti ni ni aboro gamahe. Ni kpiapai, gi sino re na ngbaya dagbaha na gupai Satana akusihe ati Edene yo. Wai duhe wo? Satana agumba gupai nga Adamu na Eva​—kodihe na aboro dunduko​—ima rengba kadu na ngbarago ka si du nga i namaa gayo nyemupai mbatayo fu giasangba Mbori. Eva amangipai mbiko gari gbangbati tipa kadu wakina Mbori. Adamu amangipai ni gbangbati tipa ka fu ngbarago fu Eva. (Bam. P. 3:4-6) Sangbana gayo diaberã adu ni kina gbegberẽhe. Si ziazia nga, gu sino nga ga gbangbati ayengo na ngbarago te. Ni du ani ni aboro gamahe, ani nayugo gaani kido kuti gupai nga ga Mbori gene mangaapai ngba kisusi.

8. Tipagine si aaida bambata arogotise berẽpa kura aboro ti ni?

⁸ Mbori afu gu rugaapai fu bambata arogotise nga gu narengbe ka sa yo i berẽ pa kura aboro, wa si avura du nga i adu ni sayo ati Edene yo. Yekova afu maku fu Adamu na Eva na ki ya fuyo, i zugo azugo, ki hiisi kpotosende, kini zogoho. (Bam. P. 1:28) Si aidi Adamu na Eva du na nyemu gupai nga  awiriyo du na ngbarago kina wai Yekova aaida aboro auru kpotosende dunduko du na ngbarago. Ko akpinyemu gupai nga Adamu na Eva gbiati atitako mangisunge sa ka sa kpotosende dunduko ni paradizo. Gi sunge re aaida na bakere kodatise wa gayo aborokporo nikaa kio kina kumbatayo.

9. Tipagine pa kiiso Paradizo arengbe ka ye ti ni na ngbarago?

⁹ Wa i adu ni rengberengbe yo, tipa ka sa kpotosende ni paradizo si aidi i mangisunge sa na Yekova tipa ka digiso gupai ko akpinyemuhe, mangayo ho wo arengbe ka sa yo i rimi ku rogo ga Mbori zereda. (Eb. 4:11) Oni berẽnga pa wai ka gi sunge re adu ni wenehe na ni pa ngbarago! Pa berã yo pa kura aboro arengbe ka ye na amaku gbiati bakere ngbarago fuyo.

10, 11. Waigu rengbe ani ka mangasunge tungusapai na kini sa aboro ni abawiriki?

¹⁰ Areme, Yekova ima fu gu sunge fu gako aboro nga ga tungusapai na kini sa aboro ni abawiriki. Tipa ka digiso gi sunge re, si naida ani du na nyemu aboro. Ani rengbe ka manga gipai re sa kina gu ka ani du na ruru bipai​—nyemuse tipa Mbori na nyemuse tipa akuarani.

¹¹ Rogo bambata kama agarã, Pauro ape gupai nga ko gbiati gu kura aboro ko anaamangasunge na yo angia “ga Mbori abadiasunge” mbiko gu sunge i aamangaha nga ga rũhe na tuda gu tunga rengo nga ga Kindo. (1 Kor. 3:6, 9) Areme a, ani rengbe kadu ni “ga Mbori abadiasunge” ni fu ani gaani regbo, ahe, gbiati ome tipa gu sunge tungusapai Mbori nafuhe fura ni. Nga gi bakere pa momu!

12, 13. Gini amosoro duti sunge sa aboro ni abawiriki?

¹² Pa fu ani gaani regbo na ome tipa sunge tungusapai na sunge sa aboro ni abawiriki naye na bakere ngbarago. Dungu agu aboro nagbia gu momu nga ga wirika Ziazia Kekeapai na aboro nagumba gipai re. Bakere ngbarago du ti bi gu boro du na nyemupai ni nirugu tini na gu rengo nga ga toro, kini sono rogo idapase, kini mangi aˈariapai, na kini tona yugo gu rengo ni nawirikihe fu kura boro. Yesu agbia bakere ngbarago a ho agu abatungusipai 70 ko akedi yo ayega ni na “ngbarago” mbiko gu wene sangbanapai i agbiaha.​—Rk. 10:17-21.

¹³ Abatungusipai rogo zegino dunduko na ngbarago ka bi wai wene pangbanga aˈaria ga boro raka ni wenehe. Oni bingo gu kpiapai nga ga wirina ni nakuparanga du rimori nga Anna, nga gu ri nakiisi gari sunge tungusapai ni ga ri kaa mangasunge tungusapai Putu yo rogo gu ba du na bakere zingo abatungusipai rogoho. * Ri ake gupai nga, “Bakere momu du herẽ tipa ka wisigo Ziazia Kekeapai na aboro, na rago nangba tire mbiko gipai re. Mi nagbia bakere ngbarago ti gimi sunge. Ho mi ayego ni ku kporo yo, regbo  naadunga bere kaa berã kina kurii gimi kparapai te. Mi naaberã tipa agu aboro mi awisigo Ziazia Kekeapai na yo​—gayo akpakarapai na gayo abakabangirise. Mi naagbata gene ka ngarasayo na ka undo yo rogo mangimangipai yo. Mi ima ye ki idi kuti gupai nga ‘gu ngbarago boro agbiaha ho ní agamahe ni, si kii kisusi gu ní agbiaha ho boro afu he ni funi, NW.’”​—Amo. 20:35.

14. Wai du rengbe mo ka gbia ngbarago ka si vura du vurũ nga badungu aboro aadianga wene pangbanga kugume te?

¹⁴ Ani rengbe ka gbia ngbarago nifu ani momu fu aboro tipa i gi wene pangbanga ka i avuranga ka degatuyo kutini ya. Gu kurapai berewe nga, gaani sunge areme wakina gu nangia ga gu nebi nangia Yezekere, nga gu ko Yekova aya fuko: “Mo ki gumba gimi apai fu yo, watadu i agia ha watadu i aka pa gia ha.” (Yeze. 2:7; Yes. 43:10) Ka si vura du vurũ nga kura aboro adianga gaani pangbanga kugume te, Yekova nabi gu ome abi ani amangaha na nyanyakipaha. (Oni gedi AEbere 6:10.) Batungusipai sa ayugu wene bipai nibipa gipai re. Ko akepai tipa gako sunge tungusapai nga, “Ani ima rũ he, ki tudi he, na ki mangi kparakpee na kidu na gu maabangirise nga Yekova nika zugasi gu nyemupai azugasi nga ga aboro.”​—1 Kor. 3:6.

15. Wai du badungu aboro nidu ho ani afu gamahe ni fuyo, na ya mo si naida padu yo wo du na maapai kurii gaani mangaapai?

¹⁵ Yesu naida gupai nga ani gbia ngbarago ti du ani ni aboro gamahe. Badungu aboro ninaamanga pai amanga wenengai ho i agamahe ni fuyo. Ko angarasi rani ki ya, “Oni fu he, i ki fu he fu roni. Si ki rengbe gbe, i asi he asi, nizigizo ho, si ki niuka auka, kina wo i ka fu he fu roni. Bambiko na gu moduka oni ka nduka he na ni, i anduka he na kina ha fu roni berewe.” (Rk. 6:38) Rengo ngaha nga, anga aboro dunduko nayugo tambuahe ho ani agamahe ni fuyo te, ono ho du kura aboro adu ni na tambuahe, pa gama mo he fuyo ima rengba ka fõngbaduyo yo i du a ni aboro gamahe. Sidu, mo naagamahe agama kindi fu aboro, singia i nayugo tambuahe tipaha watadu i ayugongo ho te. Ka mo vura fu gamahe gbua kandara sa fu boro, mo ainongo gu bawenepai rengbehe ka mangaha te.

16. Ada si aida ani naagamahe fuyo, na tipa-gine?

 ¹⁶ Ndikidi aboro gamahe naagamanga he fu aboro mbiko gupai nga aboro gamuhe fuyo kubaha te. Gipai re aima du berã Yesu yo ho ko aya ni wẽ: “Ho mo ka mbakada pumbo ni mo yambu rungorungo aboro, na terengeterenge aboro, na airavurari. Mo ki du ni boro maku; bambiko he be yo ka fu mosoro foro te.” (Rk. 14:13, 14) Ziazia Kekeapai naya, “Gu boro [nagamahe] i afú maku afu fu ni.” Si nape gupai berewe a nga: “Boro maku nga gu ni naberã pa rurungbura boro.” (Snz. 22:9; Tam. 41:1) Nirengo, si naida ani du ni aboro gamahe, bambiko ani nagbia ngbarago agbia ti undo aboro.

17. Gini agene rengbe mo ka fu gamahe ngbaha si ki ye na ngbarago foro?

¹⁷ Ho Pauro agumba agu afugo Yesu ni nga, “fu he ngba ti dia ha” watadu gu ngbarago boro agbiaha ho ní agamahe ni, si kii kisusi gu ní agbiaha ho boro afu he ni funi, Pauro aafuranga sa tipa kina fu ahe nga ga borose te, ono ko aafura a tipa fu ngarasaro, rugute, gbiati undo fu agu aboro naidaha. (Amo. 20:31-35) Rogo fugo yo na rogo mangapai yo, gu mokedi nangia Pauro ayugu gupai furani nga si naida ani fu tirani, naida ka ya, ka fu gaani regbo, ome, berã, gbiati nyemuse.

18. Ginipai badungu abawetekeapai agumbaha nibipa fu gamahe?

¹⁸ Agu abawetekeapai nawisigo sino aboro ima bi gupai nga fu gamahe nasa aboro asa i du na ngbarago. Ringbisihe kuti kura kekeapai sa, “aboro ninaape gupai nga i nagbia bakere ngbarago ho i amanga weneapai ni fu kura aboro.” Abawetekeapai naape gupai nga undo kura aboro na nyanyakipaha gbe, bambiko si nasa boro ni “bi gupai nga gani raka na rogoyo ti ni na ndupai kinaho ni araka ti ni.” Sidu, abangbasia abainipai ninaafu gu berãpai dedede nga aboro futiyo tipa sunge kadu wenengai ti kpotoyo na ki kiisi gayo ngbarago. Gipai re airiwongo ti agu aboro idipa Ziazia Kekeapai ni Fugo gu Boro nambakadi aboro, nga Yekova te.​—2 Tim. 3:16, 17.

19, 20. Gini nduapai duho si aida mo du ti ni ni boro gamahe?

¹⁹ Si ima rengba kadu ni mbumbuhe kaa gamahe agama kindi ho du ani ni dagba agu aboro naamaa kina gayo nyemupai mbatayo fu ga kura aboro. Ono tie, Yesu agumba gupai nga abakumba rugute ue nga, ani kpinyemu Yekova na kpotorani yo dũ, na mbisimorani dũ, na gaani berã dũ, na omerani dũ, na berewe, ani kpinyemu akuarani wa ani akpi nyemu tirani. (Mk. 12:28-31) A wa ani nabihe rogo gi kekeapai re, agu aboro kpinyemu Yekova nawirika gako kpiapai. AYekova na Yesu nagamahe agama fu aboro. Na i nangarasa rani nga ani mangi kina gu bangisapai re a, bambiko mangaha wo nika fu ndikidi ngbarago furani. Ka ani mangi asadatise nyanyaki kadu ni aboro gamahe fu Mbori na fu akuarani, ani nika fu irisa fu Yekova na si nika undo rani gbiati kura aboro a.

²⁰ Zanga kapa, mo namanga asadatise amanga nyanyaki kaa undo aboro, gbe akuaro aidipase. (Gara. 6:10) Ka mo amangaha wo kindi, mo nika duadu ni gu boro aboro nakpinyemu ni na kini bi ni na nyanyakipa ni, na ni sangbana gipai re, mo nika du na ndikidi ngbarago. Asanza 11:25 naya, “Iragamahe azuga azuga gbe, ono i nisuka age ku akoro akura ra yo.” Rengo ngaha nga, dungu agene duho rengbe ani ka fuhe ngbaha zanga gbangbati, na ki yugu gu sino nga ga gamahe. Gu kekeapai ngbefuo gere nika sakapai tipa bete agu agene re.