1, 2. 1) Jméni xi tjínle kjoandosin nga sʼiaan, kʼoa ánni. 2) Jméni xi jchaa i̱ kjoaʼmiya jebi.

ÑÁ XI chjotale Cristo maa, tjínnele kjoásjaiyaa tsa ñaki kʼoatjín jmeni xi sʼejinná (Prov. 3:21-23; 8:4, 5). Nga̱ je Na̱i kao sonʼndele koaanle sikitsónjin josʼin nikjaʼaitsjeen (Efes. 5:6; Col. 2:8). Kʼianga sʼe̱jinná jotjínni kjoa tjínnele nda kjoásjaiyaa. Ya Proverbios 18:13 kʼoatso “kʼianga jngo chjota xi tokjoan nchja̱ nga tikje nrʼoéjinni jotjínni kjoa, to chjotachininí kʼoa nangi síkʼéjna yaole”.

² I̱ kjoaʼmiya jebi kui jchaa ánni nga ñʼai maniná nga sʼejinná jokjoantjínni kjoa. Nkjín kjoafaʼaitsjen xi tsjoá Biblia jchaa kao choa̱ xi koasenkaoná tsa kʼoatjín jmeni xi sʼejinná.

3. Ánni machjénni nga kjuintjenngiaa je kjoafaʼaitsjen xi nroatʼa Proverbios 14:15 (chótsenlai sén xi faʼaitʼa ibi).

³ Nichxin xi tiyoaa ndʼaibi, nʼio nkjín koya josʼin sʼejinniná jmeni xi ma, jolani xi ya faʼaitʼa Internet, televisión kʼoa xi kjaʼaísanile. Xi ijngosani, tjínkʼa chjota xi ya sʼejinnile jmeni xi ma kʼianga bʼéxkia correo electrónico, nga mensaje nikasénle kʼoa tsakuije̱ jmeni xi tso je miyole. Tonga kʼoati tjín chjota xi kui kaníbason jmeni xi tsín kʼoatjín kʼoa tsa je  síkitsónjin jotjínni kjoa. Kuinga tjínnenile kuenta sʼiaan tsa kʼoatjín jmeni xi bʼexkiaa kʼoa kao xi noʼyá. Jñánile kjoafaʼaitsjen xi tsjoá Biblia koasenkaoná. Ya Proverbios 14:15 itso: “Toʼyani xi tsín nkjín kon tomakjainyejele tojme énni, tonga je xi sínkjínle kon kosonnile josʼin binyá ndso̱ko̱”.

4. 1) Jósʼin basenkaoná jmeni xi tso Filipenses 4:8, 9 nga nda chjoéjiaan jmeni xi bʼexkiaa. 2) Ánni nga nʼio tjínnile kjoandosin nga kataʼyaa tsa ñaki kʼoatjín jmeni xi bʼexkiaa (kʼoati chótsenlai je rekuadro “ Xi basenkaoná nga ʼyaa jokjoantjínni kjoa”).

⁴ Kʼianga koa̱n chjoéjiaan xi ndatjín machjén nga sʼe̱jinná jotjínni kjoa. Kuinga nda chjoéjinñá jmeni xi bʼexkiaa (tʼexkiai Filipenses 4:8, 9). * Alikui koa̱n nga tokui si̱kʼayalee nichxinná jmeni xi ya Internet faʼaitʼa, correo electrónico, kʼoa tsakuije̱ mensaje xi to én kaníbason. Xi ijngosani, tsín koa̱n ya kuitjásʼeen je pájina xi ya Internet batío je chjota xi yátsʼi̱n binyále Niná. Nga̱ chjota jebi kui xi mele nga kjuinroajen kjoamakjainná kʼoa síkitsónjin xi kixi tjín. Kʼiatsa kui jebi kʼoéxkiaa kuijin xi chʼaotjín chjoéjiaan. Alikui kʼoasʼin si̱kjaʼaitsjeen nga tsín sikiʼaonná jmeni xi bʼexkiaa (1 Tim. 6:20, 21).

5. Jmé én xi tsín nda tso kisʼejinle je chjota israelita, kʼoa jósʼin kichomani.

⁵ Kʼiatsa kui koa̱nkjainná jmeni xi tsín ñaki kʼoatjín, kjoa kuichomani. Si̱kjaʼaitsjenla jmeni xi koan kʼianga kisikasén Moisés je xi 12 chjota xi kikotsenché je ʼNde jña tsakʼinle nga kʼoaile. Te koanni xi tsín nda tso én jaʼaikao (Núm. 13:25-33). Kisikʼatoné choa̱le jmeni xi kitso kʼoa kui jebi xi kisikinroájen kon je chjota israelita (Núm. 14:1-4). Tsakui nichxin i̱sʼin kisikjaʼaitsjen: “Tsa ngisa nkjín mani xi kʼoatjíotso, kʼoajintjín kjoaixi”. Kʼoa kuinga tsín kuenta kisʼinni jmeni xi kitso je Josué kao Caleb (Núm. 14:6-10). ʼNdele nga je Jeobá sinʼiotʼa kʼoa koasjaiyasa jmeni xi tsakʼinle, tosaa tokui koankjainle jmeni xi kinrʼoé.

6. Ánni nga tsín tokʼoakoa̱nniná tsa jme xi kuinóʼyá tʼatsʼe naxinandále Niná.

⁶ Machjén nga si̱kuindalee yaoná kʼianga kui noʼyá xi tsín ndatjín tʼatsʼe naxinandále Niná. Kuenta sʼiaan nga je Na̱i énndiso tíbáne ʼndeʼnde je choʼndale Niná (Apoc. 12:10). Kʼoa je Jesús kʼoakitso nga je xi kontra tjíoná énndiso koanená (Mat. 5:11). Kʼiatsa kuenta sʼiaan jmeni xi kitso Jesús, alikuijin tokʼoakoa̱nná kʼiatsa chʼaosʼin kʼoaxki̱ je naxinandále Niná.

7. Jméni xi chjónangilee yaoná nga kjesa jme xi bʼeyanajmíjián, tsa correo electrónico kʼoa tsa mensaje ni̱kasén.

⁷ A nʼio tsjoachaa nga jme xi bʼeyanajmiá, nga correo electrónico nikasén kʼoa tsa mensaje nikasénlee je miyoná. Kʼiatsa jme xi sʼejinná kʼoa tsa jme xi noʼyá, a tokjoan bʼeyanajmílee xi kjaʼaí. Kʼianga kjesa jme xi nikasénjián, chjónangilee yaoná jebi: “A ʼbeña nga ñaki kʼoatjín jebi. A tjínjinna jokjoantjínni”. Kʼiatsa tsín ʼyaa jokjoantjínni kjoa, énndisojin cha̱nibasoán. Kuinga tsín ndatjínni tsa kʼoasʼiaan.

8. 1) Jméni xi tjíosʼín kʼa xi kontra tjíoná jña xin ʼnde. 2) Jósʼin bʼainganʼiolee je xi kontraná mani.

⁸ Kʼiatsa tokjoan si̱kasén ijngokʼá je correo electrónico kʼoa tsa je mensaje xi  faʼainá alikui ndasʼin bichómani. Tjín ʼnde jñani tsín tjoʼndele je ndsʼee nga tsoyason. Tsakui nichxin je chjota xi jtikená énndiso ska̱nibason nga kuinyaxkónle je ndsʼee kʼoa nga to jao sa̱tío kon. Si̱kjaʼaitsjenla jme xi koan ya Unión Soviética. Je policía énndiso kiskanibason nga kʼoakitso nga nʼio nkjín ndsʼee xi yátsʼi̱n tsakinyále Jeobá. * Nʼio nkjín xi koankjainle kʼoa kisikjinle je naxinandále Niná. Nkjín xi jaʼaikatiojin ijngokʼani tonga tjín xi tsín tikʼoakisʼinni, nga̱ kinroajen je kjoamakjainle (1 Tim. 1:19). Jméni xi sʼiaan nga tsín kʼoakatamaa. Kuinga tsín koa̱n si̱kasén ijngokʼañá tsa mensaje faʼainá kʼoa tsa tsín ʼyaa jotjínni kjoa. Alikui tokjoan katamakjainná jmeni xi ʼminá, tosa títjonkjoanla kjoásjaiyaa tsa ñaki kʼoatjín.

9. Jmésani xosíkaoná nga tsín sʼe̱jinniná jokjoantjínni kjoa.

⁹ Sakʼoaa tsínni kʼoatjín jmeni xi tonoʼyá kʼianga tsín sʼejinyejená jotjínni kjoa, kʼoa tsakui nichxin koa̱nkjainná jmeni xi kʼuínná. Jméni xi sʼiaan nga tsín kʼoakatamaa (Efes. 4:14).

10. 1) Ánni nga me tije kiskanni je chjota israelita. 2) Jmé xi tsakinyakao nga tsínni kiskan.

¹⁰ Kataʼyala jmeni xi koan nichxin kjoatse ya naxinandá Israel kʼianga tsakʼejna Josué (Jos. 22:9-34). Je chjota israelita xi tsakatio ya xingoatʼale xo̱ngá Jordán, kisʼejinle nga je ntje̱le Rubén, Gad kʼoa xi basen ntje̱le Manasés nga jngo sonxta tsakʼénda. Tonga tsín kisʼejinyejele jotjínni kjoa. Kʼoa kʼoakitso nga je chjota israelita xi sonxta tsakʼénda nga yátsʼi̱n tsakinyále Jeobá, kʼoa tsakationda nga kao je skaan (tʼexkiai Josué 22:11, 12). * Nga kjesa fikjánjin, kisikasén chjota xi tsakásjaiya jokjoantjínni kjoa kʼoa kʼiaani kisʼejinle nga je ndsʼe̱ tsínkui xá tsakʼéndani sonxta nga cho̱ tsjoátʼa. Nga kui xá kisindani xjáo jebi nga skoe̱ je xtile xi koatio nga koa̱nskanni nga kʼoati  choʼndale Jeobá ma. Nga kʼoasʼin tsakásjaiya jokjoantjínni kjoa, ndajin kisatio kon nga tsínni kiskan kao je ndsʼe̱.

11. 1) Ánni nga tsín kixi tíjnani jmeni koantʼain je Mefibóset. 2) Jméni xi tjínnele kisʼin tsakai je David.

¹¹ Kʼoati maa tsanda ñá, sakʼoaa tsín sʼejinyejená jokjoantjínni kjoa. Kataʼyala jokoan je rey David kao Mefibóset. Je David kitsjoanile Mefibóset je nangi xi tsʼe Saúl, xi pajchále koanni (2 Sam. 9:6, 7). Tonga nga jeki nichxin, je David alikui nda tso én xi kisʼejinle. Tsín tsakásjaiya jotjínni kjoa kʼoa tokjoan tsakjáʼale ngayeje jmeni xi kisʼele je Mefibóset (2 Sam. 16:1-4). Kʼianga tsakjákaonajmí David je Mefibóset koanjinle nga tsín kixi tjín jmeni xi kisʼin kʼoa kitsjoa choanile je nangile (2 Sam. 19:24-29). Alikuijin kʼoakisʼin je David kʼiatsa títjonkjoanla tsakásjaiya jotjínni kjoa.

12, 13. 1) Jmé xi kisʼin je Jesús kʼianga énndiso kisʼene. 2) Jméni xi sʼiaan kʼiatsa kui sʼe̱né jmeni xi tsín kʼoatjín.

¹² Jméni xi sʼiaan kʼiatsa kui sʼe̱né jmeni xi tsín kʼoatjín. Kʼoakoantʼain je Jesús kao Juan Bautista (tʼexkiai Mateo 11:18, 19, TNM). * Jókisʼin je Jesús nga énndiso kisʼene. ʼNdele nga tokui sikʼayale nichxinle nga sitoánntjai yaole, tosaa kʼoakitsole je chjota nga kui kuenta katasʼín jmeni xi kisʼin, jmeni xi kitso kʼoa kao jmeni xi tsakakóya. I kitso: “Je kjoachjine kao xále ʼyanile nga ñaki kʼoatjín”.

¹³ Choa̱ jebi nʼio tse xi bakóyaná. Tsakui nichxin chʼaosʼin sikʼaxki̱ná je chjota, kʼoa tsa chʼaosʼin kuinchja̱ni xi tʼatsaan tojoni nga chʼaosʼin kʼoaxkiaa. Jméni xi koa̱n sʼiaan. Kʼiatsa ʼya xi énndiso ska̱nibason xi tʼatsaan, tosa koakoá nga tsín kʼoatjín kʼoa ndasʼin koanngínkoaa yaoná. Tojo kisʼin je Jesús, kʼiatsa kʼoatisʼin koanngínkoaa yaoná, koakoñá nga to énndiso xi kaníbason chjota xi tʼatsaan.

14, 15. Ánni nga tsín to yaoná si̱nʼiotʼañá.

¹⁴ Tojosʼin tiʼyaa, ñʼai ma sakʼoaná nga sʼejinná jokjoantjínni kjoa. Ijngosa koya anni nga ñʼai maniná kuinga chjotajée maa. Tobʼelañá, tsa jenkjín nó nga choʼndale Jeobá maa, kʼoa tsa nda ninkjínlee tokoán jmeni xi nʼia, tsakui nichxin koakoná kjoaxkóntokon je xi ngikʼa. Jebi tsakui nichxin kʼoati jngo che̱n kʼónya.

¹⁵ Kʼiatsa to yaoná si̱nʼiotʼaa kʼoa tokui kjuinñá nga jetjínná kjoafaʼaitsjen alikui ndasʼin kuichomani. Kui xosikaoná nga kʼoakuixónñá nga ʼyaa jokjoantjínni kjoa ninga tsínni nda tjínjinná. Jebi alikui kixi tíjna. Nga̱ je Biblia itso: “Ali tokuijin ’mini josʼin machoyali” (Prov. 3:5, 6; 28:26).

16. Jméni xi koan ya jñani kjen je chjota, kʼoa jméni xi tokjoan kisikjaʼaitsjen je Tomás.

¹⁶ Jñá nroani nga sakʼoa tsín ndasʼin nikjaʼaitsjeen. Cha̱niyala jkoaa choa̱ jebi: Je Tomás, xi chjotajchínga sʼin tíjna, yaa tíjna jñani kjen chjota. Tokʼoamale nga be je Juan, xi kʼoati chjotajchínga sʼin tíjna, nga jngo chjoón tíkjenkao. Kʼoa tsjoa tjíole nga jao, bijno kʼoa saʼnda tsoakjá xínkjín. Je  Tomás kʼoasʼin síkjaʼaitsjen nga tíbʼanachale je chjoónle Juan kʼoa itso xi síkjaʼaitsjen: “A tsjión tsokʼoa xínkjín. Jókoa̱nni je ʼndíxtile”. Nʼio síkjáojin je Tomás, nga̱ jenkjín kʼa nga kui kjoa bʼéndajin. Tsa ñálani xi kui tsaʼyaa, tsakui nichxin kʼoatisʼin kinikjaʼaitsjeen joni je Tomás.

 17. 1) Jméni xi kisʼejinle je Tomás. 2) Jmé xi bakóyaná jebi.

¹⁷ Tonga a ñaki tjínjinle je Tomás jokjoantjínni kjoa nga kʼoasʼin kisikjaʼaitsjenni. Nga tikuini nitje̱n kinchjaale Juan, kʼiaani kisʼejinle nga ndichjani ma je xi tíkjenkao, xi jekjoannkjín nó kiskajinni. Nga tongotjo kicho ndichja kʼoasʼin tsakʼéndajin nga ñatjen koakjen, kʼoa je chjoónle Juan alikui kʼoakoanle nga ki. Je Tomás ñaki nda kisʼe kon. Xi nda kisʼin kuinga tsín ʼya xi tsakʼéyanajmíle jme xi tsabe. Jméni xi bakóyaná jebi. Kui bakóyaná ninga jekjoannkjín nó nga Jeobá tinixálee, nʼio tjínle kjoandosin nga títjonkjoanla kjoásjaiyaa jotjínni kjoa nga kjesa kʼoabixónjián tsa kʼoatjín kʼoa tsa mai.

18. Jméni xosikaoná nga tokjoan koa̱nkjainniná josʼin tíbʼaxki̱ je ndsʼee.

¹⁸ Tsa tsín nda mangínkoaa je ndsʼee, tsakui nichxin ñʼai koa̱nná nga jchaa tsa kʼoatjín kʼoa tsa mai jmeni xi tíʼmile. Nga tsín ndasʼin mangínkoaa yaa kjuinroani nga tsín ndasʼin si̱kʼaxkiaa kʼoa koa̱nkjainná josʼin tíbʼaxki̱. Kʼoa tsakui nichxin tokjoan koa̱nkjainná jmeni xi kuinóʼyá xi tʼatsʼe. Jebi kui bakóyaná kʼiatsa kʼoéngijtiaa tokoán kao je ndsʼee tokjoan kʼoajin kuixoán ninga tsín ʼyaa jotjínni kjoa (1 Tim. 6:4, 5). Nga tsín kʼoakatamaa, alikui kʼoaiʼndee nga kjoaxintokon kao kjoachi̱ni̱ katasʼejnajin je ni̱ma̱ná. Si̱kjaʼaitsjeen nga tjínnele tsjoacha koaan je ndsʼee kʼoa nga si̱chatʼalee (tʼexkiai Efesios 4:2, 32). *

19, 20. 1) Jñánile je kjoafaʼaitsjen xi tsjoá je Biblia xi koasenkaoná nga nda kjoásjaiyaa jmeni xi sʼejinná. 2) Jméni xi chótʼayajiaan ya kjoaʼmiya xi ijngo.

¹⁹ I̱ kjoaʼmiya jebi jan koya kaʼyaa anni nga ñʼai maniná nga sʼejinná jokjoantjínni kjoa. Xi títjon, kuinga tsínni ñaki kʼoatjín jmeni xi sʼejinná. Xi majaoni, nga sakʼoa to énndisoni. Kʼoa xi majanni, kuinga chjotajée maa. Tonga jméni xi koasenkaoná nga nda sʼe̱jinná jokjoantjínni kjoa. Kuinga kjuintjenngiaa je kjoafaʼaitsjen xi tsjoá je Biblia. Tobʼelañá, kʼoatso nga je chjota “xi tokjoan nchja̱ nga tikje nrʼoéjinni jotjínni kjoa, to chjotachininí kʼoa nangi síkʼéjna yaole” (Prov. 18:13). Ijngosa koya xi koasenkaoná kuinga tsín tokjoan katamakjainná jmeni xi noʼyá (Prov. 14:15). Kʼoa tsín tokui kjuinñá josʼin nikjaʼaitsjeen (Prov. 3:5, 6). Je kjoafaʼaitsjen xi tsjoá je Biblia basenkaoná nga títjonkjoanla fasjaiyaa tsa kʼoatjín kʼoa tsa mai jmeni xi noʼyá kʼoa nga kui chjoéjiaan xi ndatjín.

²⁰ Ijngosa koya xi chótʼayajiaan kuinga tokui mangínñá josʼin matsen xi ngikʼa. Ya kjoaʼmiya xi ijngo, jan koya jchaa anni nga kʼoasʼeni tokoán, kʼoa kʼoati jchaa jméni xi sʼiaan nga tsín kʼoasʼin si̱kjaʼaitsjeen.