1, 2. a) Bõe n segd n lebg d minungu, la bõe yĩnga? b) Bõe yell la d na n gom sõs-kãnga pʋgẽ?

TÕND sẽn yaa kiris-neb hakɩɩkã, segdame tɩ d sã n wʋm kibar fãa bɩ d tags neer n ges d sã n tõe n tẽeme. D tog n maoome n bɩɩs yam-kãnga, tɩ lebg d minungu. (Yel. 3:21-23; 8:4, 5) Sã n pa rẽ, a Sʋɩtãan ne a dũniyã na n tõog n belg-d-la nana-nana tɩ d tẽ goam sẽn pa sɩda. (Efɛ. 5:6; Kol. 2:8) Sẽn na yɩl n bãng d sã n segd n tẽe kibar d sẽn wʋme, yaa tɩlɛ tɩ d reng n fees n bãng a vɩʋʋgã fãa. Yel-bũn 18:13 yetame: “Ned sã n ka kelg n tɩg n yaool n leoke, a wilgda a yalemdo, la a na n paama yãnde.”

² Sõs-kãnga pʋgẽ, d na n yãa bũmb kẽer sẽn kɩt tɩ yɩl n bãng yell vɩʋʋgo, n tõog n yãk d sẽn tog n maanegã pa nana wã. D na n yãa Biiblã sagls a wãn sẽn tõe n sõng-do, la neb kẽer kibay me sẽn be Biiblã pʋgẽ. Rẽ fãa na n sõng-d lame tɩ d sã n wʋm kibar fãa bɩ d tags neer n ges d sã n tõe n tẽeme.

3. Bõe yĩng tɩ d segd n tũ Yel-bũn 14:15 sẽn yetã? (Ges-y fotã sẽn be yĩngrã.)

³ Rũndã-rũndã, kibayã yita zĩig fãa. Ẽnternetã pʋgẽ, tele  wã pʋgẽ, zʋrno-rãmbẽ wã, la zĩis a taaba. D mitins la d zo-rãmb toond-d-la mesaaz-rãmb ne taablɛt-rãmbã la portaabl-dãmbã maasem. Yaa sɩd tɩ bãmb rata tõnd neere. Baasgo, d segd n maanda gũusgu, bala neb n be n yelgd kibay sẽn pa sɩda. Rẽ n so tɩ d sã n wʋm kibar fãa bɩ d segd n maag d yĩng n fees n gese. Biiblã sagl-bʋg n tõe n sõng-d rẽ wɛɛngẽ? Ad Yel-bũn 14:15 sẽn yete: “Zɩt tẽeda bũmb ning fãa a sẽn wʋme, la yam soab maanda gũusg ne a yel-manesmã fãa.”

4. Bõe la Filip-rãmb 4:8, 9 yeta, tɩ tõe n sõng tõnd tɩ d bãng n yãk d sẽn karemdã? Bõe yĩng tɩ d pa segd n tẽ kibar yaare? (Ges-y zĩ-gũbrã “ Siglgã sẽn maande, tɩ d tõe n paam kibay sẽn yaa sɩda”.)

⁴ D sã n dat n bãng n yãk yam, yaa tɩlɛ tɩ d tik kibay sẽn yaa sɩda. Rẽ n so tɩ d segd n maan gũusg wʋsgo, n bãng n yãk bũmb nins d sẽn karemdã. (Karm-y Filip-rãmb 4:8, 9.) D segd n gũusa ne sɩt-rãmb nins sẽn taasd kibay d sẽn pa tõe n bãng sã n yaa sɩdã, la kibay nins nebã sẽn yelgd ne mesaaz-rãmb maasmã karengo, bala sãamda sẽkã. Sẽn yɩɩd fãa, d segd n zãaga d meng ne sɩdã kɩɩsdbã sɩt wɛɛb rãmbã. Bala, b raab yaa b koms Wẽnnaam nin-buiidã tẽebo, la b golem Biiblã goamã. Ned sã n tik kibay sẽn pa sɩd n na n yãk yam, a yam-yãkrã pa tõe n yɩ sõma ye. Woto wã, ra tol-y n tags-y tɩ kibay sẽn pa sɩd pa tõe n maan yãmb bũmb ye.—1 Tɩm. 6:20, 21.

5. Bõe la tẽn-gũusdbã wʋsg wa n yeele, la maana Israyɛll nebã bõe?

⁵ Kibay sẽn pa sɩd tõe n waa ne yel-beedo. D tẽeg bũmb sẽn maan a Moyiiz wakatẽ wã. Tẽn-gũusdb 12 wã b sẽn da tʋm tɩ b tɩ gilg n ges kãabg tẽngã sẽn lebg n wa wã, bãmb 10 n togs kibay sẽn pa sɩda. (Sõd. 13:25-33) B zẽna yɛlã, hal tɩ koms a Zeova nin-buiidã raood zãnga. (Sõd. 14:1-4) Bõe yĩng tɩ koms nebã raoodo? Tõe tɩ nin-buiidã tagsame tɩ neb wʋsgã sẽn yeelã la sɩda. Kɩtame tɩ b pa sak n na n kelg a Zozuwe ne a Kalɛɛb goamã sẽn da yaa sɩdã ye. (Sõd. 14:6-10) B pa bao n na n fees n bãng sẽn yaa sɩdã, la b teeg a Zeova ye. B maana yalemdo, n tẽ sẽn pa sɩdã.

6. Bõe yĩng tɩ d sã n wʋm kibay sẽn sãamd a Zeova nin-buiidã yʋʋr bɩ pa segd n ling-du?

⁶ Segdame tɩ d gũus ne kibayã d sẽn wʋmdã, sẽn yɩɩd fãa sã n yaa kibar sẽn gomd a Zeova nin-buiidã yelle. D ra yĩm tɩ Biiblã yeelame t’a Sʋɩtãan yaa a soab ning sẽn dõt sẽn tũud-b a Zeova wã ye. (Vẽn. 12:10) A Zeezi me ra pĩnd n yeelame tɩ bɛɛbã na n ‘sa n sãama’ tõnd yʋʋre. (Mat. 5:11) D sã n tẽegd rẽ, na n sõngame tɩ d sã n wa wʋm kibay sẽn sãamd a Zeova nin-buiidã yʋʋre, bɩ ra ling-d ye.

7. Nand tɩ d tool ned mesaaz d sẽn paame, bõe la d segd n sok d menga?

⁷ Yãmb yaa ned sẽn wae n dɩkd kibay nins y sẽn paamdã n toond y mitinsi, la y zo-rãmb bɩ? Y sã n paam kiba-paalle, y yãgdame n na n tool-a neb a taaba, wa kiba-kɩt sẽn dat n yɩ pipi n togs a sẽn wʋm bɩ? Gũus-y-yã! Nand tɩ y tool ned mesaaz y sẽn paame, sok-y y meng yaa: ‘M kɩsa sɩd tɩ b sẽn yeelã yaa sɩd bɩ? Bõe n wilgd tɩ m sẽn wʋmã yaa sɩda?’ Y sã n pa mi sã n yaa sɩd bɩ ziri bɩ y gũusi, bala tõe tɩ yaa ziri la y na n sõng n yelg d tẽed-n-taasã sʋka. Y yam sã n yooda, bɩ y ra tool ye. Yẽes-y-yã!

8. Tẽns kẽere, bõe la d bɛɛbã maan-yã, la wãn to la d tõe n sõng-b n ka bãnge?

⁸ D sã n yɩ yãg-yãg n tool ned mesaaz d sẽn paame, tõe n waa ne yell a to me. Tẽns kẽere, d pa tar sor n na n tũ d  tũudmã wa d sẽn date, wall b pʋd n gɩdga d tũudmã. Tẽn-kãens pʋsẽ, d bɛɛbã tõe n wʋga kibay n yelge, sẽn na yɩl n fʋʋs tõndo, wall n kɩt tɩ d pa le kɩs taab sɩd ye. D tẽeg bũmb ning sẽn maan pĩnd Iniyõ Sovietik soolmẽ wã. Polɩɩs-rãmb nins b sẽn boond tɩ kazebe (KGB) wã yelga kibay, n yetẽ t’a Zeova Kaset rãmb b sẽn da mi sõma zãmba a Zeova nin-buiidã. * Bʋko, wʋsg tẽe kiba-kãens n welg n bas a Zeova siglgã. Zu-noogo, wʋsg wa n lebg n waame, la kẽer pa tol n le wa a Zeova nengẽ ye. B tẽebã kell n sãamame. (1 Tɩm. 1:19) Bõe la d tõe n maan tɩ yel-beed a woto ra wa paam-do? Ra n sak-y n yelg-y kibay sẽn pa ned yʋ-noogo, wall kibar y sẽn pa mi sã yaa sɩd bɩ ziri ye. Ra n tẽ-y bũmb ning fãa y sẽn wʋm ye. Bao-y n bãng-y y sẽn wʋmã sã n yaa sɩda.

9. Bõe me n tõe n kɩt tɩ kibar pa sɩda?

⁹ Wakat ning me, d tõe n wʋma kibare, mik pa sɩd zãnga, wall b togs n kellame. Kibay a woto me kɩtdame tɩ bãng n yãk f sẽn tog n maanegã pa nana ye. Baa kibar pa ziri zãnga, wall b sẽn togs n kellã yaa bilf bala, kẽesda ned moogo. Bõe la d na n maan tɩ b ra tõog n belg-d ne kibay a woto buudã?—Efɛ. 4:14.

10. Bõe n kɩt tɩ Israyɛll neb naan n yik zabr ne b saam-biisi, la bõe n yɩ yellã tɩɩm?

¹⁰ A Zozuwe wakatẽ wã, bũmb la Israyɛll neb nins sẽn da tɩ be Zʋrdẽ kʋɩlgã rʋʋnd a to wã naan n maane, tɩ d tõe n dɩk yam a pʋgẽ. (Zoz. 22:9-34) B wa n wʋmame tɩ Israyɛll neb nins sẽn be rʋʋnd a ye wã mee tẽn-kug-kẽeng kʋɩlgã noore. Ra yaa Rubɛn nebã ne Gaad nebã la Manase buudã pʋɩ-sʋkã. Israyɛll buud a taabã sẽn wʋmã ra yaa sɩda, la ra pa kibarã zãng ye. Kɩtame tɩ b yãk yam n na n tɩ zab ne b saam-biisã sẽn be rʋʋnd a to wã, bala b tagsame tɩ yaa a Zeova la b kɩɩs-yã. (Karm-y Zozoe 22:9-12.) Zu-noogo, b reng n tʋma rap tɩ b na n tɩ  sok n wʋm yellã vɩʋʋgo. Bõe la b tɩ bãnge? B bãngame tɩ Rubɛn nebã ne Gaad nebã la Manase buudã pʋɩ-sʋkã sẽn me tẽn-kugrã pa sẽn na n kʋʋd maand ye. Yaa sẽn na yɩl tɩ yɩ kaset tɩ bãmb me naag n yaa a Zeova nin-buiidu. Ad b sũy yɩɩ noog b sẽn deng n bao n na n wʋm yellã vɩʋʋgo, n pa yɩ yãg-yãg n yik zabr ne b saam-biisã!

11. a) Wãn to la b maan a Mefibosɛt kɛgre? b) Wãn to la a Davɩɩd ra tõe n gil yel-kãnga?

¹¹ Wakat ninga, nebã tõe n yelgda yɛl kẽer tõnd zugu, tɩ yaool n pa sɩd zãnga, wall yaa sẽn togs n kelle. A buud paama a Mefibosɛte. Rĩm a Davɩɩd ra maana a Sayull yageng a Mefibosɛt neere, n dɩk a Sayull pʋtã fãa n kõ-a. (2 Sãm. 9:6, 7) La daar a ye, b wa n togsa a Davɩɩd yɛl kẽere, n kãneg a Mefibosɛte. A Davɩɩd sẽn wʋmã, a pa bao n na n bãng sã n yaa sɩd ye. A reega a Mefibosɛt sẽn da so wã fãa. (2 Sãm. 16:1-4) A Davɩɩd sẽn wa n kelg a Mefibosɛtã, a bãngame tɩ yẽ tudgame. A lebsa a Mefibosɛt paoongã pʋɩ-sʋka. (2 Sãm. 19:25-30) A Davɩɩd sã n da reng n bao n na n bãng yellã vɩʋʋg sõma, n pa yɩ tao-tao n tẽ a sẽn wʋmã bala, a Mefibosɛt ra pa na n nams yel-kɛgr a woto yĩng ye.

12, 13. a) B sẽn da rõd a Zeezi wã, a maana wãna? b) Ned sã n yelg bũmb sẽn pa sɩd tõnd zugu, bõe la d tõe n maane?

¹² Ned sã n yelgd yɛl yãmb zug n na n sãam y yʋʋre, y maanda wãna? A buud paama a Zeezi ne a Zãmbatiis me. (Karm-y Matye 11:18, 19.) A Zeezi maana wãna? A pa bao n na n gilg n wilg nebã tɩ yaa rõdga, n sãam a sẽk la a bao yaams ye. A pʋd n wilga nebã tɩ b ges yẽ tʋʋm-tʋmdɩ wã la bũmb nins yẽ sẽn zãmsd nebã. A yeelame tɩ “yam tʋʋm-sõama n wilgd yam sẽn yaa a soaba.”

¹³ D tõe n dɩka yam a Zeezi mak-sõngã pʋgẽ. Wakat ninga, neb tõe n wɩda tõndo, wall b togs yɛl sẽn pa sɩd tõnd zugu, n sãam d yʋʋre. D tõe n data ne d sũur fãa tɩ sɩdã puki, n baood d sẽn na n maanega, n wilg tɩ b sẽn yeelã pa sɩd ye. Bũmb n be d sẽn tõe n maan bɩ? N-ye! Ned sã n dõd tõndo, d tõe n basame tɩ d tʋʋm-tʋmdɩ wã la d manesmã wilg tɩ yaa ziri. B sẽn dõd a Zeezi t’a tall manesem ningã wilgdame tɩ b sã n togsd yɛl sẽn pa sɩd zãng tõnd zugu, d tʋʋm-tʋmdɩ wã na n wa kɩtame tɩ nebã bãng tɩ pa sɩd ye.

14, 15. Bõe yĩng tɩ d pa segd n teeg d meng tɩ looge?

¹⁴ D yãame tɩ wakat ninga, yɩl n bãng kibar b sẽn togs-d sã n yaa sɩd bɩ ziri, pa nana ye. D sẽn pa zems zãngã me kɩtame tɩ tolg n yaa zu-loɛɛga. Wala makre, tõe tɩ d tũuda a Zeova hal sẽn kaoose, tɩ rẽ kɩt tɩ d yamã vẽen yɛl kẽer wɛɛngẽ. Tõe meng tɩ nebã pẽgd-d lame, d sẽn tagsd tɩ bɩ yell fãa pʋgẽ wã yĩnga. La wãn to la tõe n yɩ bẽdga?

¹⁵ D tõe n wa teega d meng tɩ loog nugu. D tõeeme n wa rat n welg yell fãa ne d mengã tagsg la d yamã. Tõe tɩ d wa tagsdẽ tɩ baa d pa mi yell vɩʋʋgo, d wʋmda a võor sõma. Yaool n tõe n wã-d lame! Biiblã keoogda tõndo, n yetẽ tɩ d ra teeg d meng bãngre, la d ra teeg d meng tɩ loog nug me ye.—Yel. 3:5, 6; 28:26.

16. Makrã d sẽn dɩkã pʋgẽ, bõe n maan rɛstorã wã pʋgẽ, la a Toma tagsg yɩɩ wãna?

¹⁶ D rɩk makre. La pa kibar sẽn yaa sɩd ye. Daar a ye zaabre, kãsem-soab  yʋʋr sẽn boond t’a Toma kẽnga rɛstorã pʋgẽ, n tɩ yã kãsem-soab a to yʋʋr sẽn boond t’a Zã t’a zĩ ne paga. Ra pa a pagã ye. B ra sõsdame la b laadẽ, hal tɩ b sũur noom ne taaba. B wa n mobga taab menga. Yellã namsa a Toma, hal t’a zoe n sokd a meng yaa: ‘Pa na n baas ne a Zã rãmb kãadmã kaoob sɩda? A pagã ne a kambã na n maana wãna?’ A ra zoe n yãa yel-kãngã buud naoor wʋsgo. Sã n da yaa yãmb la a Toma, bõe la y na n tagse?

17. Makrã d sẽn dɩkã pʋgẽ, bõe la a Toma wa n bãnge, la rẽ kõta tõnd yam-bʋgo?

¹⁷ A Toma yẽ yɩɩ tao-tao n tags t’a Zã zãmbda a pagã. La rẽ yĩnga, a ra mii yellã vɩʋʋg bɩ? A wa n boola a Zã baraare, n bãng tɩ pag ning sẽn da be rɛstorã wã pʋgẽ ne-a wã yaa a tão sẽn be tẽn-zãrga. B sẽn pa yã taab yaa yʋʋma. A tãoã ra wẽneg n loogda lɛɛr a wãn poor bala, tɩ rẽ kɩt tɩ b kong n seg taab rɛstorã wã pʋgẽ. La a Zã pagã pa tõog n wa ye. A Toma sẽn wʋm woto wã, a yɩɩrã saame. Zu-noogã yaa a sẽn pa rɩk n gom ne neb a taabã. Yam-bʋg la d tõe n dɩke? Baa d sẽn tũ a Zeova n kaoos to-to, yaa tɩlɛ tɩ yell fãa pʋgẽ bɩ d bao n bãng a vɩʋʋgo.

18. Bõe n tõe n wa kɩt tɩ d tẽ bũmb d tẽed-n-taag zugu, tɩ yaool n pa sɩda?

¹⁸ D sã n yã bũmbu, wall d wʋma bũmb d tẽed-n-taag zugu, tɩ tõnd ne yẽ yaool n pa noom woto, rẽ me tõe n kɩtame tɩ yɩ toog tɩ d tags neer n ges d sã n tõe n tẽeme. D sã n tagsd tõnd ne nin-kãng mo-yõsã yell wakat fãa, tõe n kɩtame tɩ d wa pa le tolg n kɩs-a sɩda, n maand sãmbs ne-a. D sã n wa wʋm bũmb sẽn pa a yʋ-noogo, d tõe n yɩɩ tao-tao n tẽ, n pa bao n na n bãng sã n yaa sɩd ye. Woto wilgda tõnd bõe? D sã n maand sũ-kẽk ne d tẽed-n-taaga, tõe n kɩtame tɩ d sã n wa yã bɩ n wʋm a yell bɩ d yɩ tao-tao n tẽ, n pa bao n na n bãng sã n yaa sɩd bɩ ziri ye. (1 Tɩm. 6:4, 5) Bũmb sẽn na n sõng-d yaa d sẽn na n mao tɩ sũ-kiir la tags-kɛg ra be d sũurẽ wã ye. D tẽegd wakat fãa t’a Zeova ratame tɩ tõnd nong d tẽed-n-taasã, n kõt-b sugr ne d sũur fãa.—Karm-y Efɛɛs-rãmb 4:2, 32.

19, 20. a) D sã n wʋm kibare, Biiblã sagl-bʋs n tõe n sõng-d tɩ d bãng d sẽn segd n maanega? b) Bõe yell la d na n gom sõsg ning sẽn pʋgdã pʋgẽ?

¹⁹ Rũndã-rũndã, d sã n paam kibare, yɩl n tags neer n bãng sã n yaa sɩd bɩ ziri yaa toogo. Bõe yĩnga? Bala kibayã wʋsg pa sɩd zãnga, wall yaa b sẽn togs n kelle. Sẽn paase, d yaa neb sẽn pa zems zãnga. La bõe n tõe n sõng-do? Biiblã tara sagls sẽn tõe n sõng-do. Wala makre, Biiblã yetame tɩ d sã n ka kelg n tɩg n yaool n leoke, yaa yalemdo. (Yel. 18:13) Biiblã leb n sagend-d lame tɩ d ra tẽ bũmb ning fãa d sẽn wʋme, n pa reng n bao n bãng sã n yaa sɩd ye. (Yel. 14:15) Baa d sẽn tũ a Zeova n kaoos to-to fãa, d segd n gũusame, n da wa teeg d meng tagsg ye. (Yel. 3:5, 6) Biiblã saglsã tõe n sõng-d lame, tɩ yell fãa pʋgẽ bɩ d maan gũusgu, n deng n bao n bãng a vɩʋʋgo, n tõog n yãk d sẽn na n maanegã.

²⁰ La bũmb a to me n tõe n kɩt tɩ yɩ toog tɩ d bãng yell sã n yaa sɩd bɩ ziri. Yaa ninsaal sẽn nong n tikd ninã sẽn ne wã n bʋʋd yɛlã. Sõsg ning sẽn pʋgdã pʋgẽ, d na n yãa bũmb kẽer nebã sẽn nong n tikd n bʋʋd yɛlã, la bũmb nins sẽn tõe n sõng-d tɩ d ra wa maan woto ye.