1, 2. (a) Mâ ǀgauba da nî ūhâ tsî tae-i ǃaroma? (b) Tae-e da nē ǁkhāǁkhāǃâs ǃnâ nî ǃhoaǃgao?

AMA Xristeǁîn ase da ge ǁnâu da ra xūna ǃgâise ǂōrisase ôaǃnâ tsî ǃgâi ǀamǂoasa nî hō. (ǂKhm. 3:21-23; 8:4, 5) Nēsa da ga dī tama ga ra io, ob ge ǁGâuaba sada ǂâi ǀgauba a ǂgaeǂhapu ǁkhā nē ǃhūbaib di dī xūn ǀkha. (Efe. 5:6; Kol. 2:8) ǁNās ǀkha da ge amaba da ga ra ǁnâu o ǀgui ǃgâi ǀamǂoasa nî ho. ǂKhoamîdi 18:13 ge ra ǁgau “ǁnâu tamab hâ hîa ga ǃereammi, ǁnābas ge ǁî ǃkhaisa gâresib tsî taob ase nîra ība.”

² Nē ǁkhāǁkhāǃâs ǃnâ da ge ǃgomsigu hîna amaba ôaǃnâs ǀkha ra ǃgû ǀhaoga nî ǃhoaǃgao. Nēsa da ra dī khami da ge hoaǃnâ-aixa Elobmîs tsoatsoadi tsî aiǁgaudi tsîna nî mû hîna a hui da ǁkhāde î da amaba ǂōrisase ôaǃnâ.

3. Tae-i ǃaroma da ǂKhoamîdi 14:15 ǃnâ hâ Elobmîs tsoatsoasa ǂâis ǃnâ nî ūhâ? (Tsoatsoas ǃnâ hâ ai-īsiba mû re.)

³ Nētsēn ge khoena ǂgui xūna a ǂan. Internets ǂhawegu, ai-īsiǂhôaǂgares tsî ǀnî hâ mediab xūn tsîn ge ǂguiǃnâgu xūna ra ǂhôa. ǂGui khoen ge emailan, sms an tsî ǂhôan ǃkhaiga xus tsîna ǃkharagagu ǂhôana ra hō. Khoen ǁnaetib ase ama tama xūna ra ǀgora ǃkhais ǃgao da ge kaise ǂhaikhari nî hâ tsî  ǁnâu da ga xū-e nî ôa ǃgao. Mâ Elobmîs tsoatsoasa da a sîsen-ū ǁkhā? ǂKhoamîdi 14:15 ge ra mî: “Gâreb ra mâ mîs hoasa ǂgom, xawe gā-aib ra ǃgûs âba ǃgaoǃgâ.”

4. Filipeǁîn 4:8, 9 tsîna mati a hui da ǁkhā tae-e da nî khomais tawa î ga ra hā o? Tae-i ǃaroma i a ǂhâǂhâsa ǂhanu ǂhôan ǀguina khomaisa? (Mû re “ Xūn hîna a hui da ǁkhān hoa amaba ǂans ǃgao” di hâ boksisa.)

⁴ ǃGâi mîǁguiba dīs ǃgao da ge aibe amaba nî ǂan. ǁNās ǀkha da ge kaise ǂōrisase nî ôaǃnâ tae-e da ra khomai tsî ǂgomsa. (Khomai re Filipeǁîn 4:8, 9.) Tā da ge sada ǁaeba ama tama xūna khomais ai nî ǁaeǁore, ǁnās ge emailna khomais tsîna ǃkhōǂgā hâ. ǂAnbasen da ge nî î da tā ǁnāǁgôa hâ khoen ra dī internets ǂhawegu ai hâ xūna sī khomai. ǁÎn ra ǂhâbas ge în Elob khoena amaba xū tsî ǁîna sao. Ama tama ǂhôana khomais ge a ǃaroma ǁkhā î da ǃgâi tama mîǁguiga dī. Ama tama ǂhôan ge ǃgâi tama ǀgaub ǃnâ ǂanbasen tama da ga ra io a tsâǀkhā da ǁkhā. Tsî sida ǂgaob tsî ǂâis tsîna a ǂgaeǂhapu ǁkhā.​—1Tim. 6:20, 21.

5. Tae-i ǁgai ǂhôasan ge Israelǁaesa ǁnâu tsî nēsa mati ǁîna ge tsâǀkhā?

⁵ Ama tama ǂhôa-e ǂgoms ge kaise a ǁkhōǁkhōsa. Aiǁgause Moseb ǁaeb ǃnâ ge ī xū-i xa ǂâi re. Moseb ǁaeb ǃnâ gu ge 12 ǃkhē-aoga ge sî-e î gu mîmâisa ǃhūba sī kō, xawe gu 10 ga ǃgâi tama ǂhôana ge hau. (Num. 13:25-33) ǁÎgu di ǃhoa ǀgaub ge ǃās ǃgâi tama hâ tsî a ǁgai di ge ǁnâusen. Tsîs ge nēsa Jehovab ǁaesa kaise ge ǃao kai. (Num. 14:1-4) Khoena tae-i ǃaroma ge ǃao? ǁÎn ge ǂhôasa ge hau khoegu ge ǂgui i ǃkhais ǃgao ge ǃao tsî ǁîgu ge mî xūna ge ǂgom. Tsîn ge ǁîna nēs ǀkha Josuab tsî Kaleb tsîn ge hau ǃgâiǂhôasa ge ǁnâu ǂgao tama hâ i. (Num. 14:6-10) Amaban ôa ǃgao tsî Jehovab ai nî ǂgomaiǂnûis xan ge ǁîna ǂhanu tama ǂhôa-e ǃgâsa ge ǁhûi. Nēb ge kaise ge gâre i ǀgauba.

6. Tae-i ǃaroma da ǃhuri tide ǃgâi tama xūn ga Jehovab di ǃoaba-aon xa ga ra ǂhôa-e o?

⁶ ǂHaikhari da ge nî hâ î da tā khoen ga Jehovab di khoen xa ga ra xoa ǂhôana khomai. Tā ǀuru re ǁGâuab ge Elob di ǂgomǂgomsa ǃoaba-aona ra ǂhumi ǂgari-am. (J.ǂHa. 12:10) ǁNās ǀkhab ge Jesuba ge ǃkhâikhom tsî ge mî mâǃoa-aon ge “ǂhumib ǀkha hoa ǂkhaba xūna” sida ǃoagu nî mî di. (Mat. 5:11) Nē ǃkhâikhomsa da ga ǂgaob ǀkha ga ra ūbasen o, o da ge ǃhuri tide ǃgâi tama xūn ga Jehovab di ǃoaba-aon xa ga ra ǂhôa-e o.

7. Sms tamas ka io emailsa du nî sîs aiǃâ du, tae-e nî dī?

⁷ Sadu tsîna a ǃgâiba-e email an tsî sms an tsîna sadu ǀhōsana sîbasa? ǁNās ǀkha du ge sadu tsîna ǀnîsi xū-e du ga ai-īsiǂhôaǂgares ai ǁnâu tamas ka io ga ra khomai o ǀnîsi ra tsâ nē ǂhôa-e khoena mîbasa. Xawe ǁnā sms tamas kai o emailsa du nî sîs aiǃâ, dîsen re: ‘Nē ta ra mî ǂgao ǂhôa-e ama-e? Hoa amaba ta a ǂan?’ Amaba du ga ra ǀū io, o du ge sado īǁkhā î ga ra o ama tama xūna a ǂhôa ǁkhā ǀhaohâb ǁanin ǁaegu. ǁNās ǃaroma hoa amaba du ga ra ǀū io, o nē sms tamas ka io emailsa ǀariǂui re.

8. ǀNî ǃhūgu ǃnân sida mâǃoa-aona tae-e ra dī? Tsî mati da ǀūǃgâse ǁîn di ǂhôan ǃnâ a ǁhao ǁkhā?

⁸ ǀNîhâ ǁkhōǁkhōsa xū-i ge noxoba hâ ǂâi tamase emails tamas ka io smsa sîsa. ǀNî ǃhūgu ǃnâ i ge sida aoǁnâ  sîsen-e mā-am-e tama hâ. Sida mâǃoa-aon ge ǁnās ǀkha ama tama xūna a xoa ǁkhā tsîs ge ǁnāsa sida a ǃao kai ǁkhā tsî ǂhauǃnâxasiba ǃgâsan ǁaegu a khôa ǁkhā. Soviet Unions ǃnâ ge ī xū i xa ǂâi re. KGB di a ǂansa ǀapaǃnamgu ge gere ǂhôa Jehovab di khoen ǁaegu î ge ǀnîna ǃgâsana a gaxaǃnâsa. * ǂGuin ge nē ǂhôan ǃnâ ge ǂgom tsî nēs ǀkha Jehovab di ǀapeǂhumisa xu ge doe. Nēs ge ge tsûsa i. Xawe nēn hoan ǂam-ain ge ǀnîna ǀapeǂhumisa ǃoa ge oaǀkhī naun ge hâhâ xawe. ǁÎn ǂgoms ge ge ǂkhabu. (1Tim. 1:19) Nēti i tsūtsūsa mâsiba xu da mati a ǂgōsen ǁkhā? ǁGai xūna ra ǃhoa tamas ka io ra ǂhôa xūna xu da ge nî ūbēsen. Tā gârese tanisen re. Hoaǁae hoa amaba ǂan ǃhoa du nîs aiǃâ.

9. Mâ ǃgomsib tsîna hâ ǂhanu ǃgāsasib hōs ǃaroma?

⁹ ǀOasase du hoana ǂan tama hâ ǃnāsa ǃgāsasiba ǂgoms ge ǃgâi tama ǀamǂoasa ūhâ. ǃNaeǃkhais hîna 10 persent-e a amas ge 100 persent-e ama tama ǂhôan ǃoa a daoǁgau ǁkhā. Tae-e da a dī ǁkhā, î da tā ama tama ǃnaeǃkhaidi xa ǂhumi ǂhôab ǃoa daoǁgau-e?​—Efe. 4:14.

10. Israelǁaesa tae-e ge tsūdi ǁkhā ǁîn ǃgâsan ǃoagu?

¹⁰ ǂÂi re tae-i ge Israelǁaes hîna ge Josuab di tsēdi ǃnâ Jordanǃāb di huriǂoas ǀkhāb ai ǁan hâ în ǀkha a īsa. (Jos. 22:9-34) ǁÎn ge ge ǁnâu Israelǁaes (Gadi ǁaes, Rubenni ǁaes tsî Manaseb di ǃkhare ǃhaos) hîna ge aiǂoas ǃnâ ǁan hâ în ge kai altarsa Jordanǃāb tawa a omsa. Nē ǂhôas di ǃâ-i ge ge ama i. Nē ǀoasa tama ǃgāsasiba ǁnâus khaoǃgân ge huriǂoas ǀkhāb ai ǁan hâna ge ǂgom ǁîn ǃgâsan go Jehovaba a mâǃoa di. Tsîn ge nēs ǀkha Israelǁaes hîna ge huriǂoas Jordanǃāb dis ǃnâ ǁan hâ îna toroba ǁnān hîna aiǂoas ǃnâ ǁan hân ǃoagu ge tsoatsoa. (Khomai re Josuab 22:9-12.) Xawen ge ǃkham  tsoatsoan nîs aiǃâ ǂgomǂgomsa aoga ge sî, î gu hoa amaba aibe sī ǁnâu. Nē aoga tae-e ge ǁkhāǁkhāsen? ǁÎgu ge ge ǁkhāǁkhāsen Gadi ǁaes, Rubenni ǁaes tsî Manaseb di ǃkhare ǃhaos tsîn ge altarsa a omsa ǁguibadi ǃgaos ose xawe ǂâiǂâisens ǃaroma. Nē altars ge ge omhe în hoa khoena hānîǁaeb ǃnâ ǂâihō ǁîn tsîn ge Jehovaba ǂgomǂgomsase gere ǃoabasa. Matikōses ge Israelǁaesa gere ǂkhî, ǁîn ǃgâsanan ge ǀoasa ǂhôan ǃgao ǃkham ū tama hâ io, xawen ge ǁîna ǁaeba ge ū hoa amaba ǂan ǃgaosa.

11. (a) Mefiboseta mati ǃhaoǃnâbe ǀgorasa ge hōǃâ? (b) Daviba mati nē ǀgorasa xu ga ǂgōsen hâ?

¹¹ Sida tsîn ge ǀnîsi hoase da amaba a ǀū mâsiba a hōǃgâ ǁkhā. Gao-aob Davib tsî Mefiboseti tsîn di aiǁgaus xa ǂâi re. Gao-aob Davib ge khoexaǃnâ tsî māxa ǀgauga Mefiboseti ǃoagu ge ǁgau tsî ǁîba ǁîb kai ǁgûb Sauli di xūn hoana ge mā. (2Sam. 9:6, 7) Xaweb ge Daviba ega ǃgâi tama xūna Mefiboseti xa ge ǁnâu. Tsîb ge Daviba hoa amabab ǂan tama hâ hîna Mefiboseta xū hoa xūna ge ū. (2Sam. 16:1-4) Davib ge ega Mefiboseti ǀkha a ǃhoa o, ob ge ge mûǂan hoan ama tama hâsa tsîb ge ǁnās ǀkha ǁîb xūn hoana ge mā oa. (2Sam. 19:24-29) Davib ge nē tsūba ga ǃaroma tama hâ, aibeb ga hoa amaba ǂōrisase ôaǃnâ hâ o.

12, 13. (a) Jesuba mati ǃgâi tamase ǀgoraǃgâhesa ge sîsenǂam? (b) Tae-e da a dī ǁkhā khoen ga ama tama xūna sada xa ga ra ǃhoa mâ o?

¹² O sadu ga ǂhanuoǃnâse ga ra ǀgoraǃgâ-e os? Jesub tsî Johaneb ǁĀǁnâ-aob tsîn ge ǁnāti i ǃgomsiba ge hōǃgâ. (Khomai re Mateub 11:18, 19.) Jesuba mati nēsa ge sîsenǂam? ǁÎb ge ǁîb ǁaeb tsî ǁkhāsib tsîna ǁkhaubasens ai ge sîsen-ū tama hâ i. Xaweb ge khoena ge ǂkhâǃnâ în aibe ǃhoan nîs aiǃâ hoa amaba ǂan. Jesub ge ge mî, ‘gā-aisib ge dīgu ǃnâ-ū ra mûhe’.​—Mat. 11:19.

¹³ Nēba xu da ge xū-e a ǁkhāǁkhāsen ǁkhā. Khoen ge ǀnî ǁaegu ai ama tama tamas ka io ǃgâi tama xūna sida xa a mî ǁkhā. Hoa da ge ǁnās ǀkha ǀnîsi ǂhanu-aise da nî ǀgoraǃgâ-e ǃkhaisa ra ǃâubasen tsî ra ǁkhore sada ǀonsa ǃanuǃanusa. Xawe xū-i ge hâ dī ǁkhā da a-e. Khoe-i ga sada xa ama tama xūna ga ra ǃhoa mâ o, o da ge sada dīgu ǃnâ-ū nî ǁgau sada ǁnāti-i ǀgauga ūhâ tama hâsa. Jesub aiǁgausa xu da ge a ǁkhāǁkhāsen ǁkhā tsî ǂhauǃnâ Xristeǁî ûiǀgaub tsîn ge ama tama ǂhôana xu a ǁkhauba da ǁkhā.

14, 15. Sida ǁnâuǃāb ai ǂgomaiǂnûisa mati a ǃnui kai ǁkhā?

¹⁴ Ama ǂhôana ôaǃnâ tsî ǂhanu ǀamǂoasa hōs ge kaise nî ǃgom. ǀOasa kurusa da ūhâ tama hâ ǃkhais tsîn ge ra ǃgom kai. ǀNîsi da ge Jehovaba ǂgomǂgomsase ǂgui kuriga ra ǃoaba. Tsî da ge ǁnās ǀkha ǀnîsi ǃgâi ǂâi ǀgaub tsî ǂhanuse ǀgoraǃgâs tsîna ge ǁkhāǁkhāsen. Tsî da ge khoen xas tsîna ǀnîsi sada ǀgoraǃgâ ǀgaub ǃgao ǃgôa-e hâ. Xawe ǁnā ǂâi ǀgaub ge ǃnuis ase a īǁkhā.

¹⁵ Sida ǁnâuǃāb ai kaise ǂgomaiǂnûis ge ǃnuis ase a ība da ǁkhā. Sida tsâsib tsî ǂansen da a ǀgaub tsîn ge sida ǁnâuǃāba a ǂgaeǂgui ǁkhā. ǀNîsi da ge nēti a tsâ tsoatsoa ǁkhā, mâsiba kō tsî ta ge tita a ǁnâuǃā ǁkhā tae-i asa hoa amaba ta a ǀū xawe. Nēb ge kaise ǁkhōǁkhōsa ǂâi ǀgauba. Elobmîs ge ra  ǃkhâikhom da î da tā sida ǁnâuǃāb ai ǂgomaiǂnûi.​—ǂKhm. 3:5, 6; 28:26.

16. Nēb ge restaurants tawa a mû xū-i xab ge Toma tae-e ǀnai ǂâi tsoatsoa?

¹⁶ Nē mâsib xa ǂâi re. ǀNî ǃuib ge ǀhaohâb ǃûi-aob hîna Tom di ǀon hâba restaurants tawab ge sī o, o Johaneb hîna ǃgame hâ tsî ǁîb tsîna a ǀhaohâb ǃûi-aoba ge mû ǀnî khoes ǀkhab ǂôa hîna. Tomi ge nē khoera ǁkhoaxase ǀguiba ra âi ǀgauba ra kō. Tsîs ge nēsa ǁîba kaise ra ǂhani. Nēs ge amase ǃgame ǀgorasa nî ǃaroma. Tae-e Johaneb taras ǀkha nî ī? O Johaneb ǀgôan? Tomi ge ǀnai nēti i mâsiba mû tsâ hâ. Sado mati ga tsâ hâ nēti i xū-e du ga mû hâ o?

17. Nē ǃnaeǃkhaisa xub ge Toma tae-e ǁkhāǁkhāsen tsî nēsa tae-e sida ra ǁkhāǁkhā?

¹⁷ Xawe aibe ǁnam re. Tomi ge ǃhaese ge ǂâi Johaneb ǀnî hâ khoesa ǁîb taras xōǀkhā ūhâ di, xawe nētib ge ǂâi tsoatsoas aiǃâ Toma hoa amaba ǂan-e? Tomi ge ǁnā tsēs ǂûs ai Johaneba sī ge bel. Tomi ge ǀnîsi kaise taob xa gere ǁō ǂgao, ǁnâub ge o nē khoes a Johaneb ǃgâsa tsîs go ǁîsa sari hâ isa. ǁÎra ge ǂgui kuriga ge mûgu tama hâ i. ǀHape ǁaebas ge ǃās ǃnâ hâ tama hâ i amagab ge Johaneba restaurants tawa ǁîsa sī ge ǀhao-ū. ǁÎb taras ge ge sī ǁoa i. Tomi ge ǁîb ama tama ǀamǂoasa khoe-e ge mîba tama hâ i. Tae-e da nēsa xu ra ǁkhāǁkhāsen? ǂGui kuriga da ga ra Xristeǁî-i xawe da ge hoaǁae, hoa amaba nî ǂan.

18. Sida ǀgoraǃgâ ǀgauba mati a tsâǀkhāhe ǁkhā?

¹⁸ ǀNî hâ ǃgomsib hîna da a ūhâ ǁkhāb ge sida ǃgâsa-i ǀkha da ga ra ǁnâusāgu o. Sida ga ǃgomsib ai ǀgui ga ra kō o, o da ge ǀnîsi sada ǃgâsa-e ǃgâi tama mûs ǀkha a kō tsoatsoa ǁkhā. Tsî da ge sada tsîna ǁnās ǀkha nē ǃgâsa-i ǁgai ǀgauga ūhâsa a ǂgom ǁkhā. Tae-e da a ǁkhāǁkhāsen ǁkhā? Ama tama ǂhôan xa ǂâis ge a ǃaroma ǁkhā, î da sida ǃgâsana ǀgoraǃgâ tsoatsoa ama tama hâ ǂhôan ǃaroma. (1Tim. 6:4, 5) Nēsa xu ǁkhaubasens ǃgao da ge tā nî mā-am î-i ǃhuib tsî surib tsîna ǃnomaǃkhō sida ǂgaob ǃnâ. Nē ǃgâi tama ǂhôana ǃkhōǃkhōs xa da ge sada ǁgui-aisa nî mûǂan, sida ǃgâsana ǀnam tsî ǂgaoba xu ǀûbasa.​—Khomai re Koloseǁîn 3:12-14.

19, 20. (a) Mâ Elobmîs tsoatsoade nî hui da ǂhôana ǃgâise ôaǃnâs ǃnâ? (b) Tae-e da sao ra ǁkhāǁkhāǃâs ǃnâ nî ǃhoaǃgao?

¹⁹ Amaba ôaǃnâs ge kaise a ǃgom nētsē. Khoen hoaǁae ama tama xūna ra ǂhôa amaga tsî ǀoasa kurusa da ūhâ tama hâ ǃkhais ǃgaos tsîna. Tae-e nî hui da nēsa ǃkhams ǃnâ? Elobmîs tsoatsoade ǂan tsî da ge nî sîsenǂui sida ûib ǃnâ. ǀGui Elobmîs tsoatsoas ge ra ǁgau, gâresib ge hoa xūna du a ǀū hîna ǃereamsa. (ǂKhm. 18:13) ǀNî Elobmîs tsoatsoas ge ra ǃkhâikhom, tā da ge mâ mî-i hoa-e nî ǂgom. (ǂKhm. 14:15) Tsî ǀûnis ai, matikō ǂans tamas ka io matikō gaxuse da ǁāǁnâhe hâ xawe da ge tā sida ǁnâuǃāb ai nî ǂgomaiǂnûi. (ǂKhm. 3:5, 6) Elobmîs tsoatsoadi ge nî hui da î da hoa amaba da ga ra ǂan o ǀgui ǃgâi ǀamǂoasa hō tsî ǃgâi mîǁguigu tsîna dī.

²⁰ Xawe ǀnî ǃgomsib ge noxoba nî hâhâ. Supu î ge a xū-e mûs ra mû khami ǀgoraǃgâsa. Sao ra ǁkhāǁkhāǃâs ǃnâ da ge nēs xa hoaǃnâ-aixase hâ ǃgomsiga nî ǃhoaǃgao tsî ǀgaugu tsîna nî mû mati da nēsa a sîsenǂam ǁkhā ǀgausa.