1, 2. (a) Ke bokgoni bofe bjo bohlokwa bjo re swanetšego go ithuta go ba le bjona, gona ka baka la’ng? (b) Re tlo ithuta ka’ng sehlogong se?

KA GE re le Bakriste ba therešo, re swanetše go ithuta go ba le bokgoni bja go hlahlobišiša taba pele e le gore re tle re tsebe ge e ba taba e le nnete goba e le maaka. (Die. 3:21-23; 8:4, 5) Ge re ka se dire bjalo, re ipea kotsing ya gore Sathane le batho ba gagwe ba re aroše. (Baef. 5:6; Bakol. 2:8) Ke therešo gore ke feela ge re tseba ditaba ka botlalo moo re ka tsebago ge e ba taba e le nnete goba e le maaka. Ke ka baka leo Diema 18:13 e rego: “Ge motho a fetola taba pele a ka ekwa, o bontšha bošilo gomme o a inyatšiša.”

² Sehlogong se, re tlo ithuta ka dilo tše mmalwa tšeo di ka dirago gore re thatafalelwe ke go tseba ditaba ka botlalo le go tseba ge e ba taba e le nnete goba e le maaka. Le gona, re tlo ithuta le ka melao ya motheo ya ka Beibeleng le mehlala yeo e tlago go re thuša gore re kaonefatše bokgoni bja rena bja go hlahlobišiša ditaba gabotse.

3. Ke ka baka la’ng re swanetše go diriša molao wa motheo wo o lego go Diema 14:15? (Bona seswantšho se se lego ka mo godimo.)

³ Lehono batho ba botšwa dilo tše dintši. Dilo tšeo di hwetšwa Inthaneteng, thelebišeneng le mekerong e mengwe ya ditaba. Le  gona batho ba bantši ba hwetša melaetša ka e-mail, sms le ditaba tšeo di tšwago go bagwera ba bona. Ka ge go tletše mabarebare a mantši, re le Bakriste re swanetše go ba šedi ge go tliwa dilong tšeo re di theetšago. Ke nnete gore bagwera ba rena ba ka ba ba nyaka go re thuša, eupša go na le batho ba bangwe bao ba ratago go bolela ditaba tša go se be gona goba ba di fetoša mola le mola. Ke molao ofe wa motheo wa Beibele woo o ka re thušago? Diema 14:15 e re: “Mang le mang yo a se nago temogo o dumela mantšu ka moka, eupša yo bohlale o šetša dikgato tša gagwe.”

4. Bafilipi 4:8, 9 e ka re thuša bjang go kgetha seo re swanetšego go se bala, le gona ke ka baka la’ng go le bohlokwa gore re tsebe ditaba ka botlalo? (Bona le lepokisi leo le rego, “ Dilo tše Mmalwa Tšeo di ka re Thušago Gore re Tsebe Ditaba ka Botlalo.”)

⁴ E le gore re tsebe gore taba e itšego ke nnete goba ke maaka, re swanetše go tseba ditaba ka botlalo. Ka gona, re swanetše go tloga re kgetha ka šedi dilo tšeo re di balago. (Bala Bafilipi 4:8, 9.) Ga se ra swanela go senya nako ya rena re bogetše ditaba tša Inthaneteng goba re bala ditaba tšeo di se nago nnete tšeo di romelwago ka di e-mail goba di-sms. Go bohlokwa le go feta gore re se tsene diwepesaeteng tša bahlanogi. Morero wa bona o mogolo ke go aroša batho ba Modimo le go dira gore go bonagale eka dithuto tša rena ke maaka. Go theetša ditaba tšeo di se nago nnete go tla dira gore re se tsebe gore nnete ke efe. Le ka mohla o se ke wa nagana gore ditaba tšeo di se nago nnete di ka se go diriše diphošo.—1 Tim. 6:20, 21.

5. Baisiraele ba ile ba theetša pego efe ya maaka, gona seo se ile sa ba kgoma bjang?

⁵ Go tshepa ditaba tša maaka go kotsi. Ka mohlala, ela hloko seo se ilego sa direga mehleng ya Moshe ge dihlodi tše 12 di be di rometšwe go yo hlola Naga ya Kholofetšo. Ge di boa, tše 10 tša tšona di ile tša tliša pego e mpe. (Num. 13:25-33) Pego ya tšona yeo e bego e feteletše e bile e tšhoša e ile ya nyamiša batho ba Jehofa. (Num. 14:1-4) Ke ka baka la’ng Baisiraele ba ile ba ikwa ka tsela yeo? Mohlomongwe ba ile ba nagana gore ka ge dihlodi tše dintši di tlišitše pego e mpe, di swanetše go ba di bolela nnete. Ba ile ba gana go theetša pego e botse yeo e ilego ya tlišwa ke dihlodi tše pedi tša go botega e lego Joshua le Kalebe. (Num. 14:6-10) Go e na le gore ba kwe ditaba ka botlalo gomme ba bote Jehofa, ba ile ba kgetha go dumela pego e mpe. Ruri seo e be e le bošilo!

6. Ke ka baka la’ng re sa swanela go tšhoga ge re ekwa dipego tše mpe ka Dihlatse tša Jehofa?

⁶ Re swanetše go ba šedi kudu ge re ekwa batho ba bolela dilo tše mpe ka Dihlatse tša Jehofa. Ga se ra swanela go lebala gore Sathane ke molatofatši wa batho ba botegago ba Modimo. (Kut. 12:10) Ke ka baka leo Jesu a ilego a lemoša gore batho bao ba lwago le rena ba tla “bolela mohuta o mongwe le o mongwe wa selo se sebe” ka rena. (Mat. 5:11) Ge e ba re ka kwa temošo yeo, re ka se tšhoge ge re ekwa batho ba bolela dilo tše mpe ka Dihlatse tša Jehofa.

7. Pele re romela molaetša, re swanetše go ipotšiša’ng?

⁷ Na o rata go romela bagwera ba gago melaetša? Ge o bone taba yeo e sa tšwago go bontšhwa ditabeng goba o ekwa phihlelo e itšego, na o ka ikwa go swana le mmegi wa ditaba yo a nyakago gore e be yena wa pele yo a ntšhago ditaba? Ge e ba go le bjalo, pele o ka romela molaetša woo, ipotšiše gore: ‘Na ke tloga ke kgodišegile gore taba yeo ke nyakago go e romela batho ba bangwe ke nnete? Na ke tseba ditaba ka botlalo?’ Ge e ba o sa kgodišega, o ka phatlalatša ditaba tša maaka go bana beno o sa lemoge. Ge e ba o belaela, gona o se ke wa romela molaetša woo, go e na le moo o phumole.

8. Ke’ng seo batho bao ba re ganetšago ba ilego ba se dira dinageng tše dingwe, gona re ka dirišana bjang le bona re sa lemoge?

⁸ Go na le kotsi e nngwe ya go kitimela go romela melaetša. Dinageng tše dingwe, mošomo  wa rena o thibetšwe goba ga re dumelelwe go dira dilo tše itšego. Batho bao ba re ganetšago dinageng tše bjalo ba ka phatlalatša ditaba tšeo di ka dirago gore re tšhoge goba re se sa tshepana. Nagana ka seo se ilego sa direga ge mmušo wa Soviet Union o be o sa buša. Maphodisa a ka sephiring ao a tsebjago e le ma-KGB, a ile a phatlalatša mabarebare a gore bana babo rena ba go tuma ba tlogetše mokgatlo wa Jehofa. * Bana babo rena ba bantši ba ile ba tshepa dipego tšeo tša maaka, gomme seo se ile sa dira gore ba tlogele mokgatlo wa Jehofa. Ruri seo se a nyamiša! Re leboga gore ka morago ba bantši ba ile ba boa, eupša ba bangwe ba ile ba yela sa ruri. Tumelo ya bona e ile ya senyega go swana le sekepe seo se robegilego. (1 Tim. 1:19) O ka dira’ng gore tumelo ya gago e se ke ya senyega? O se ke wa phatlalatša dipego tšeo di se nago nnete. O se ke wa no ba madumelatšohle. Kgonthišetša gore o tseba ditaba ka botlalo.

9. Ke selo sefe se sengwe seo se dirago gore go se be bonolo go tseba ditaba ka botlalo?

⁹ Selo se sengwe seo se ka dirago gore re se tsebe ge e ba taba e le nnete goba e le maaka, ke go kwa dipego tšeo di nago le nnete ya go se felele. Taba yeo e se nago nnete ya go felela e kotsi. Re ka phema bjang go arošwa ke ditaba tša maaka tšeo di ka bago di na le nnetenyana ka gare?​—Baef. 4:14.

10. Ke ka baka la’ng Baisiraele ba be ba le kgauswi le go yo hlasela bana babo bona, gona ba ile ba phema seo bjang?

¹⁰ Nagana ka seo se ilego sa diragalela Baisiraele bao ba bego ba dula ka bodikela bja Noka ya Jorodane mehleng ya Joshua. (Josh. 22:9-34) Ba ile ba kwa pego ya gore Baisiraele bao ba bego ba dula ka bohlabela bja Noka ya Jorodane (e lego moloko wa Rubeni le wa Gada gotee le seripa sa ba moloko wa Manase) ba agile aletare e kgolo kgauswi le Noka ya Jorodane. Pego yeo e be e le nnete eupša e be e se ya felela. Baisiraele bao ba bego ba dula ka bodikela bja Noka ya Jorodane ba ile ba phetha ka gore bana babo bona ba hlanogetše Jehofa, ka gona ba ile ba nyaka go lwa le Baisiraele bao ba dulago ka bohlabela bja Noka ya Jorodane. (Bala Joshua 22:9-12.) Eupša sa go thabiša ke gore pele ba ka ya go yo hlasela bana babo bona, ba ile ba romela banna bao ba botegago gore ba yo kwa ditaba ka botlalo. Ke’ng seo banna bao ba ilego ba se hwetša? Ba ile ba hwetša  gore Baisiraele ba moloko wa Rubeni le wa Gada gotee le seripa sa ba moloko wa Manase ba be ba se ba aga aletare yeo go direla medimo ya maaka dihlabelo. Eupša ba be ba agile aletare yeo e le segopotšo sa gore nakong e tlago batho ka moka ba tsebe gore le bona e be e le bahlanka ba botegago ba Jehofa. Ruri Baisiraele bao ba swanetše go ba ba ile ba thaba gore ga se ba kitimela go hlasela bana babo bona, eupša ba ile ba nyaka ditaba ka botlalo pele.

11. (a) Mefiboshethe o ile a swarwa bjang ka go hloka toka? (b) Dafida nkabe a ile a phema bjang go swara Mefiboshethe ka go hloka toka?

¹¹ Go ka direga gore batho ba phatlalatše ditaba tšeo di nago le nnete ya go se felele ka wena, gomme seo sa go kweša bohloko. Nagana ka seo se ilego sa diragalela Mefiboshethe. Kgoši Dafida o ile a bontšha Mefiboshethe botho ka go mo nea tšhemo ka moka yeo e bego e le ya rakgolo wa gagwe e lego Saulo. (2 Sam. 9:6, 7) Lega go le bjalo, ka morago Dafida o ile a kwa pego e sa kgahlišego ka Mefiboshethe. Ntle le gore Dafida a nyakišiše pele ka taba yeo, o ile a amoga Mefiboshethe dilo ka moka tša gagwe. (2 Sam. 16:1-4) Ka morago ga gore Dafida a bolele le Mefiboshethe, o ile a lemoga phošo ya gagwe gomme a bušetša Mefiboshethe dilo tša gagwe ka moka. (2 Sam. 19:24-29) Eupša ge nkabe Dafida a ile a nyaka go tseba ditaba ka botlalo pele, nkabe a ile a se sware Mefiboshethe ka go hloka toka.

12, 13. (a) Jesu o ile a dira’ng ge batho ba be ba bolela maaka ka yena? (b) Re swanetše go dira’ng ge e ba batho ba bolela maaka ka rena?

¹² O ka dira’ng ge motho yo mongwe a ka phatlalatša maaka ka wena? Jesu le Johane Mokolobetši ba ile ba lebeletšana le bothata bjoo. (Bala Mateo 11:18, 19.) Jesu o ile a dira’ng ge batho ba be ba bolela maaka ka yena? Ga se a ka a senya nako ya gagwe goba a hlwa a itapiša ka go ikemelela. Go e na le moo, o ile a kgothaletša batho gore ba iponele seo e lego nnete ka seo a bego a se dira le go se ruta. Go etša ge Jesu a boletše, “bohlale bo hlatselwa ka mediro ya bjona gore bo lokile.”​—Mat. 11:19.

¹³ Go na le thuto e bohlokwa yeo re swanetšego go ithuta yona tabeng ye. Ka dinako tše dingwe batho ba ka bolela dilo tše mpe ka rena. Re ka duma eka re ka dira se sengwe gore leina la rena le hlatswege. Ee, go na le selo seo re ka se dirago. Ge e ba batho ba bolela maaka ka rena re swanetše go phela ka tsela yeo e tla dirago gore go se be le motho yo a ka tshepago maaka ao. Go etša ge Jesu a re beetše mohlala, ge e ba re itshwara gabotse batho ba tla bona gore seo batho ba bangwe ba se bolelago ka rena ke maaka.

14, 15. Ke ka baka la’ng re se ra swanela go ithekga ka tlhaologanyo ya rena?

¹⁴ Ga go bonolo go hwetša ditaba ka botlalo e le gore re tsebe ge e ba taba e le nnete goba e le maaka. Bothata bjo bongwe ke gore ga se ra phethagala. Re ka ba re na le mengwagangwaga re hlankela Jehofa ka go botega e bile re na le bokgoni bja go nagana goba re na le temogo. Goba re ka ba re hlomphiwa kudu ka ge re na le bokgoni bja go bona dilo gabotse. Eupša na seo le sona e ka ba bothata?

¹⁵ Ee, re ka thoma go ithekga ka tlhaologanyo ya rena. Maikwelo a rena le dikgopolo tša rena di ka thoma go laola tsela yeo re naganago ka yona. Re ka thoma go ikwa eka re ka kgona go lebelela boemo gomme ra bo kwešiša gaešita le ge re sa tsebe ditaba ka botlalo. Ruri seo se kotsi! Beibele e re lemoša ka mo go kwagalago gore re se ithekge ka tlhaologanyo ya rena.​—Die. 3:5, 6; 28:26.

16. Mohlaleng wo, go ile gwa direga’ng ka lebenkeleng la go jela, gona Tom o ile a kitimela go phetha ka go re’ng?

¹⁶ Mohlala wo o bontšhago gore re ka wela kotsing ya go ithekga ka tlhaologanyo ya rena  ke wo: A re re ka letšatši le lengwe, Tom e lego mogolo yo a nago le phihlelo, o bona John yoo le yena e lego mogolo phuthegong ya bona, a dutše le mosadi yo mongwe yoo e sego mosadi wa gagwe ka lebenkeleng la go jela. Ke moka Tom a tšhoga. O bona John le mosadi yoo ba sega, ba iketlile e bile ba gokarelana. Tom o thoma go tshwenyega gomme o ipotšiša gore: Na John le mosadi wa gagwe ba tlo hlalana? Go tlo direga’ng ka bana ba bona? Tom o be a ehlwa a bona dilo tša go swana le tše di direga. Wena o be o tla ikwa bjang ge nkabe o le Tom?

17. Ke’ng seo Tom a ilego a se tseba ka morago, gomme seo se re ruta’ng?

¹⁷ Eupša emanyana. Le ge Tom a ile a kitimela go phetha ka gore John ga a botegele mosadi wa gagwe, na o be a tseba ditaba ka botlalo? Mantšiboeng a lona letšatši leo, Tom o ile a founela John. Ruri Tom o ile a imologa ge a ekwa gore mosadi yoo a bego a na le Tom e be e le kgaetšedi ya gagwe, yo a bego a dula kgole le bona gomme o be a mo etetše. Ba be ba na le mengwaga ba sa bonane. Ka ge a be a iphetela toropong yeo, John e bile yena feela a ilego a kgona go yo kopana le yena lebenkeleng la go jela. Mosadi wa gagwe o ile a se kgone go ba le bona. Tom o ile a thaba gore o be a se a tšwa a phatlalatša seo a bego a se nagana. Re ithuta’ng mohlaleng wo? Re ithuta gore go sa šetšwe gore re na le nako e kaakang re le Bakriste, ga se gore go ba le phihlelo go tla dira gore re dule re tseba ditaba ka botlalo.

18. Ke’ng seo se ka dirago gore re tshepe dilo tše di sa kgahlišego tšeo di bolelwago ka ngwanabo rena?

¹⁸ Bothata bjo bongwe bjo bo ka dirago gore re se tsebe ge e ba taba e le nnete goba e le maaka, ke ge re ka se kwešišane le ngwanabo rena ka phuthegong. Ge e ba re ka dulela go nagana ka taba ya gore ga re kwešišane, re ka thoma go belaela ngwanabo rena yoo. Ka gona, ge e ba re ka kwa dilo tše di sa kgahlišego ka ngwanabo rena yoo, re ka kitimela go di tshepa. Re ithuta’ng tabeng ye? Re ithuta gore ge e ba re ka thoma go hloya bana babo rena, re ka fihlelela diphetho tše fošagetšego ka bona le ge re sa tsebe ditaba ka botlalo. (1 Tim. 6:4, 5) Ka gona ga se ra swanela go dumelela lehloyo le mona di gola ka dipelong tša rena. Re se ke ra lebala gore Jehofa o nyaka gore re rate bana babo rena le dikgaetšedi gomme re ba lebalele go tšwa pelong.​—Bala Bakolose 3:12-14.

19, 20. (a) Ke melao efe ya motheo yeo e tlago go re thuša gore re lebeledišiše taba pele re fihlelela phetho? (b) Re tlo ithuta ka’ng sehlogong se se latelago?

¹⁹ Lehono, ga go bonolo go tseba ditaba ka botlalo le go fihlelela phetho ya maleba ka gobane ga se ra phethagala, e bile bontši bja ditaba tšeo di lego gona di na le nnete yeo e sego ya felela. Ke’ng seo se ka re thušago? Re swanetše go tseba melao ya motheo ya Beibele e bile re e diriše. O mongwe wa melao yeo ke gore go fetola taba o se wa tšwa o ekwa ditaba ka botlalo ke bošilo. (Die. 18:13) Molao o mongwe wa motheo wa Beibele o re gopotša gore re se ke ra no dumela dilo ka moka tšeo re di kwago ntle le go ba le bohlatse. (Die. 14:15) Le gona sa mafelelo ke gore go sa šetšwe gore re na le nako e kaakang re le Bakriste, re swanetše go hlokomela gore re se ithekge ka tlhaologanyo ya rena. (Die. 3:5, 6) Melao ya motheo ya Beibele e tla re šireletša ge e ba re ekwa feela ditaba tšeo di nago le nnete gore re tsebe ge e ba taba e le nnete goba e le maaka.

²⁰ Eupša go na le lebaka le lengwe gape leo le ka dirago gore go se be bonolo gore re tsebe ditaba ka botlalo. Ka ge re sa phethagala, re na le bothata bja go ahlola dilo go ya ka seo re se bonago. Sehlogong se se latelago, re tlo ithuta ka maemo ao go ona re ka ahlolago dilo go ya ka seo re se bonago. Ke moka ra ithuta le kamoo re ka phemago seo.