1, 2. (a) Sortu prenspari sani wi musu leri fu du, èn fu san ede? (b) San wi o luku na ini na artikel disi?

TE WI leki tru Kresten yere noso leisi wan tori, dan wi musu ondrosuku en bun fu kon sabi efu a tru noso efu a no tru (Odo 3:21-23; 8:4, 5). Efu wi no leri fu du disi, dan Satan nanga a grontapu fu en kan bruya wi denki (Ef. 5:6; Kol. 2:8). A no de fu taki dati na soso te wi sabi a heri tori, wi kan sabi efu a tru. Odo 18:13 e taki: „Te wan sma e gi piki fosi a yere wan tori, dan dati na wan don sani fu du. A o kisi syen.”

² Na ini na artikel disi wi o luku san kan meki en muilek gi wi fu kon sabi efu wan tori tru noso efu a no tru. Boiti dati, wi o luku wan tu rai nanga eksempre na ini Bijbel di kan yepi wi fu ondrosuku efu wan tori tru.

3. Fu san ede wi musu fiti a Bijbel rai na Odo 14:15? (Luku a prenki na a bigin fu na artikel.)

³ Na ini a ten disi bun furu fasi de fa wi kan kon sabi sani. Wi kan go tapu Internet, wi kan luku telefisi noso wi kan  arki radio. Furu sma e kisi omeni e-mail, nanga tra boskopu fu mati noso tra sma di den sabi bun. Son leisi a gersi leki wan kaba no e kon na den sani di wi kan kon sabi. Dati meki wi musu luku bun fu di son sma wani panya leitori fu espresi. Sortu Bijbel rai kan yepi wi fu luku efu den sani di wi yere tru? Odo 14:15 e taki: „Wan sma sondro ondrofeni e bribi ala san sma e taki, ma a koniwan e luku bun pe a e poti en futu.”

4. (a) Fa Filipisma 4:8, 9 kan yepi wi fu sabi san wi musu leisi? (b) Fu san ede a prenspari fu kon sabi efu wan tori tru? (Luku sosrefi a faki „ Pe yu kan feni nyunsu di yu kan frutrow?”)

⁴ Fu man teki bun bosroiti, dan wi musu sabi fa sani de trutru. Dati meki wi musu luku bun san wi e leisi. (Leisi Filipisma 4:8, 9.) Wi no musu lasi wi ten fu go leisi nyunsu na tapu website di wi no kan frutrow noso fu go leisi e-mail pe sma fruteri tori di den no ondrosuku bun. Wi musu luku bun spesrutu nanga website fu sma di fadon komoto na bribi. Den sma disi wani swaki a bribi fu Gado pipel èn den wani meki wi tweifri efu den sani di wi leri tru. Efu wi no sabi efu wan sani tru, dan wi no o man teki bun bosroiti. Noiti wi musu denki taki leitori no kan abi krakti na wi tapu.​—1 Tim. 6:20, 21.

5. Sortu takru nyunsu den Israelsma yere èn sortu krakti disi ben abi na den tapu?

⁵ A kan tyari takru bakapisi kon gi wi te wi e bribi sani di no tru. Fu eksempre, luku san pasa na ini a ten fu Moses di 10 fu den 12 man di ben go luku a Pramisi Kondre ben kon nanga takru nyunsu (Num. 13:25-33). Den fruteri wan lo sani di meki taki a pipel fu Yehovah kon frede èn lasi-ati (Num. 14:1-4). Fu san ede a pipel bribi den tori disi? Kande den ben denki taki den tori tru fu di 10 fu den 12 man ben e taki a srefi sani. Dati meki den no ben wani arki den bun sani di Yosua nanga Kaleb ben e fruteri den fu a kondre (Num. 14:6-10). Na presi taki a pipel pruberi fu kon sabi san tru èn frutrow tapu Yehovah, den bribi a takru nyunsu. Dati ben de wan don sani!

6. Fu san ede wi no musu skreki te sma e taki ogri fu Yehovah pipel?

⁶ Wi musu luku bun spesrutu te wi e yere noso e leisi nyunsu di abi fu du nanga a pipel fu Yehovah. Noiti wi musu frigiti taki Satan e taki ogri fu den reti-ati futuboi fu Gado (Openb. 12:10). Dati meki Yesus warskow wi taki gensman ben o ’lei gi wi èn den ben o taki ala sortu ogri’ fu wi (Mat. 5:11). Efu wi e si a warskow disi leki wan seryusu sani, dan wi no o skreki te sma e taki ogri fu Yehovah pipel.

7. San yu musu aksi yusrefi fosi yu seni wan e-mail noso wan tra boskopu gi sma?

⁷ Yu lobi seni e-mail gi sma noso tra boskopu nanga yepi fu telefon? Te yu leisi wan span tori noso wan ondrofenitori, dan kande yu wani de a fosi sma di e prati a tori gi trawan. Ma fosi yu seni so wan boskopu gi trawan, dan aksi yusrefi: ’Mi de seiker taki a tori di mi wani seni, tru? Mi sabi fa sani waka trutru?’ Efu yu no de seiker, dan sondro fu yu sabi yu kan panya wan leitori gi brada nanga sisa. Efu yu e tweifri, dan no seni a boskopu. Figi en puru!

8. San gensman du na ini son kondre èn fa wi ben kan yepi den sondro fu wi sabi?

⁸ Wan tra reide de fu san ede a no  bun fu seni e-mail noso tra boskopu gi sma sondro fu denki. Na ini son kondre lanti e gens a wroko fu wi noso den tapu en. Kande na ini den kondre dati den gensman e panya leitori fu meki wi kon frede noso fu meki taki wi no e frutrow makandra moro. Luku san ben pasa na a ten fu a Sovyet-Unie. Den KGB skowtu di ben e wroko kibrikibri na ini a kondre, ben e panya lei taki son brada di abi frantwortu ben drai baka gi Yehovah pipel. * A sari taki furu brada nanga sisa bribi den lei dati èn dati meki den gowe libi na organisâsi fu Yehovah. Koloku taki furu fu den drai kon baka, ma sonwan fu den no kon noiti moro. Den leitori dati pori a bribi fu den (1 Tim. 1:19). Fa wi kan sorgu taki dati no miti wi? Wi no musu panya wan tori efu wi no sabi efu a tru èn efu a e meki sma denki takru fu a pipel fu Yehovah. No bribi ala sani di yu e yere, ma luku efu a tori tru.

9. San na wan tra sani di kan meki en muilek fu sabi efu wan tori tru?

⁹ Son leisi wan pisi nomo fu wan tori tru èn son leisi sma no e fruteri a heri tori. Disi kan meki en muilek tu fu sabi efu wan tori tru noso efu a no tru. Awinsi afu fu wan tori tru, toku wi no kan frutrow en. Fa wi kan sorgu taki sma no e kori wi nanga den sortu tori disi?​—Ef. 4:14.

10. Fu san ede den Israelsma ben wani go feti nanga den brada fu den, ma san yepi den fu no du dati?

¹⁰ Luku san pasa nanga den Israelsma di ben e tan na a west-sei fu Yordan-liba, na ini a ten fu Yosua (Yos. 22:9-34). Den ben yere taki den Israelsma na a owstusei fu Yordan-liba (a lo fu Ruben, Gad nanga na afu lo fu Manase) meki wan bigi altari na sei a liba. A pisi dati fu a tori ben tru, ma dati no ben de a heri tori. A sani disi meki taki den Israelsma na a west-sei fu a liba ben e denki taki den brada fu den na a owstusei fu a liba opo densrefi teige  Yehovah. Dati meki den kon makandra fu go feti nanga den. (Leisi Yosua 22:9-12.) Koloku taki fosi den go feti, den seni wan tu edeman fu go aksi san ben e pasa. San den man disi kon sabi? Den Israelsma fu a lo fu Ruben, Gad nanga na afu lo fu Manase no meki na altari fu tyari ofrandi, ma fu meki ala sma sabi taki den ben e dini Yehovah. Den Israelsma na a west-sei fu a liba ben musu fu breiti taki den no go feti nanga den brada, ma taki den teki a ten fu kon sabi a heri tori.

11. (a) Sortu ogri ben miti Mefiboset? (b) Fa David ben kan sorgu taki dati no pasa?

¹¹ A kan pasa wan leisi taki sma e panya wan tori fu wi aladi den no sabi fa sani waka trutru. Luku na eksempre fu Kownu David nanga Mefiboset. David du bun gi Mefiboset èn a gi en a heri gron fu Saul, a granpapa fu Mefiboset (2 Sam. 9:6, 7). Ma bakaten wan sma kon fruteri David wan sani fu Mefiboset di no ben tru. Sondro fu ondrosuku a tori, David bosroiti fu teki a heri gron fu Mefiboset baka (2 Sam. 16:1-4). Di David taki bakaten nanga Mefiboset, a si taki a meki wan fowtu èn a gi Mefiboset afu fu a gron fu en baka (2 Sam. 19:24-29). Ma a sani disi no ben abi fu pasa efu David ben teki en ten fu kon sabi a heri tori.

12, 13. (a) San Yesus du di sma ben e fruteri lei fu en? (b) San wi kan du efu sma e panya lei fu wi?

¹² Ma san yu kan du efu sma e panya lei fu yu? Na dati ben pasa nanga Yesus èn nanga Yohanes a Dopuman. (Leisi Mateyus 11:18, 19.) San Yesus du? A no go lasi en ten nanga en krakti fu go sori sma taki den tori dati no tru. Na presi fu dati a taigi sma fu luku san a e du èn san a ben e leri den. Dati meki a ben taki: „Na den bun sani di wan sma e du, e sori taki a koni.”

¹³ Wi kan leri wan prenspari sani fu Yesus. Son leisi sma kan taki sani fu wi di no tru noso den e taki sani fu wi di kan pori wi nen. Kande wi ben o wani du wan sani fu sori taki den tori dati no tru. San wi ben kan du? Efu wan sma e fruteri lei fu wi, dan wi kan libi na wan fasi di o meki taki sma no o bribi den lei dati. Na eksempre fu Yesus e sori wi taki te wi e tyari wisrefi na wan bun fasi, dan sma o si taki den lei di trawan e fruteri fu wi no tru.

14, 15. Fu san ede a no bun fu frutrow tapu wisrefi?

¹⁴ Soleki fa wi si, dan a kan muilek fu kon sabi efu wan tori tru. Ma wan tra sani di kan meki en muilek gi wi, na den sondu firi fu wi. Kande wi e dini Yehovah furu yari kaba èn kande wi kon abi furu ondrofeni nanga koni. Kande tra sma e lespeki wi fu di wi e teki koni bosroiti. Ma a sani disi kan tron wan problema gi wi?

¹⁵ Iya, a kan tron wan problema efu wi e bigin frutrow tumusi furu tapu wisrefi. Son leisi den firi fu wi nanga a fasi fa wi e si sani kan meki wi denki taki wi e frustan wan tori bun, aladi wi no sabi ala sani. Wi musu luku bun nanga a sani disi. Bijbel e warskow wi fu no frutrow tapu wi eigi frustan.​—Odo 3:5, 6; 28:26.

16. Taki fu na eksempre na ini a paragraaf èn fruteri san Tom e prakseri.

¹⁶ Luku na eksempre disi. Kon meki wi taki dati Tom, wan owruman di abi  furu ondrofeni, de na ini wan restaurant wan neti èn a e si taki John, wan tra owruman, e sidon na wan tafra nanga wan uma di no de en wefi. Tom e si fa den tu sma e lafu, den e prisiri èn den e brasa. A e bigin broko en ede moro. Kande a e prakseri: ’John o broko trow nanga en wefi? San o pasa nanga John en wefi? Fa fu den pikin fu John?’ Tom ben si kaba fa brokotrow e tyari furu sari kon. Fa yu ben o firi efu yu ben si den sani disi?

17. San Tom kon sabi bakaten èn san wi kan leri fu disi?

¹⁷ Ma a tori no kaba. Aladi Tom e denki taki John e waka gi en wefi, a no sabi ala sani. Moro lati a neti dati Tom e bel John. Prakseri fa Tom ben firi di John fruteri en taki na en sisa di e tan na ini wan tra foto ben kon luku en. Na omeni yari John no ben si en sisa. Fu di en sisa ben o de na ini a foto wan tu yuru nomo, meki na ini a restaurant wawan John ben kan miti en fu nyan wan sani. En wefi no ben man go. Koloku taki Tom no go fruteri tra sma san a ben e denki. San disi e leri wi? Awinsi o furu ondrofeni wan Kresten abi na ini a libi, toku te a si wan sani a musu du muiti fu kon sabi fa sani de trutru.

18. San kan meki taki wi bribi den ogri di sma e taki fu wan brada noso sisa?

¹⁸ Wan tra sani di kan meki en muilek gi wi fu kon sabi fa sani de trutru, na te wi no man feni en nanga wan brada noso wan sisa. Efu wi ben o tan prakseri a sani di a sma du nanga wi, dan a kan taki wi no o frutrow en moro. Sobun, te wi ben o yere sma e taki ogri fu so wan brada noso sisa, dan kande wi o wani bribi den wantewante. San disi e leri wi? Efu wi no lobi wan brada noso sisa, dan wi kan go denki takru fu en, aladi wi no sabi ala sani fu en (1 Tim. 6:4, 5). Efu wi no wani denki takru fu trawan, dan wi musu luku bun nanga takru firi soleki bita-ati nanga dyarusu. Noiti wi musu frigiti taki Yehovah wani taki wi musu lobi wi brada nanga sisa èn taki wi musu gi den pardon nanga wi heri ati.​—Leisi Kolosesma 3:12-14.

19, 20. (a) Sortu Bijbel rai o yepi wi fu kon sabi efu wan tori tru? (b) San wi o luku na ini a tra artikel?

¹⁹ Na ini a ten disi a no makelek fu kon sabi san tru èn san no tru fu di so furu sma e prati nyunsu di no tru, èn den no e fruteri a heri tori. Boiti dati, wi eigi sondu firi kan meki en muilek gi wi fu sabi fa sani de trutru. San kan yepi wi? Wi musu gebroiki den rai di Bijbel e gi wi. Wan fu den rai na taki a de wan don sani fu gi piki tapu wan tori, aladi wi no sabi fa sani de trutru (Odo 18:13). Wan tra Bijbel rai e sori wi taki wi no musu bribi ala san sma e taki (Odo 14:15). Èn awinsi wi e dini Yehovah furu yari kaba, wi musu luku bun taki wi no e frutrow tapu wi eigi frustan (Odo 3:5, 6). Den Bijbel rai disi kan yepi wi fu kon sabi efu wan tori tru. Disi o yepi wi fu no bribi leitori èn fu teki koni bosroiti.

²⁰ Ma tra sani kan meki en muilek gi wi fu kon sabi fa sani de trutru. Wi leki libisma abi a gwenti fu luku nomo san wi ai e si te wi e krutu sani. Na ini a tra artikel, wi o luku na ini sortu situwâsi wi kan meki a fowtu disi èn fa wi kan wai pasi gi dati.