1, 2. а) Мар карыны милемлы дышетсконо но малы со туж кулэ? б) Мае ми эскеромы та статьяын?

 ЗЭМОС христианъёслы дышетсконо басьтэм информациез эскерыны но валаны, оскымон-а со, ӧвӧл-а, но шонер малпанэ вуыны (Мад. 3:21—23; 8:4, 5). Солы ӧм ке дышетске, Шайтан но солэн дуннеез капчиен милемыз пӧялозы (Еф. 5:6; Кол. 2:8). Шонер малпанэ вуон понна, ваньзэ пыр-поч тодоно-эскероно. Мадёнъёсын 18:14 верамын: «Йылозяз-пумозяз кылзӥськытэк [яке тодытэк-валатэк] ответ сётӥсь мурт — укылтэм мурт, солы возьыт луыны кулэ».

² Ойдолэ эскеромы, малы куддыръя ваньзэ пыр-поч тодыны-эскерыны но шонер малпанэ вуыны капчи ӧвӧл. Та статьяын ми озьы ик учкомы Библиысь возетъёсты но примеръёсты, кудъёсыз юрттозы милемлы басьтэм информациез шонер эскерыны но валаны, оскымон-а со, ӧвӧл-а.

3. Малы милемлы Мадёнъёсысь 14:15 возетлэсь кылзӥськоно? (Учке статья кутсконысь суредэз.)

³ Туннэ туж трос информация. Телевидениысь, интернетысь но трос мукет интыосысь котьмар сярысь тодыны луэ. Со сяна, адямиослы туж трос электрон гожтэтъёс ысто эшъёссы но тодмооссы. Пӧяськон но шонертэм веранъёс туж ӵем пумисько бере, туж кулэ чакласькыны но ваньзэ пыр-поч эскерыны. Библиысь кыӵе возет юрттоз милемлы? Мадёнъёсын 14:15 верамын: «Укылтэм мурт котькыӵе но кыллы оске, нош визьнодо адями улон сюрес вылаз сак улэ».

4. Кызьы Филиппыослы 4:8, 9 возет юрттэ бырйыны, мае лыдӟоно? Малы шонерзэ тодыны тыршоно? (Учке озьы ик « Информация, кудӥзлы оскыны луэ» рамкаез.)

⁴ Шонер малпанэ вуон понна, милемлы ваньзэ пыр-поч тодоно-эскероно. Соин ик туж сак луоно, куке бырйиськомы, мае лыдӟоно, нош мае ӧвӧл. (Лыдӟе Филиппыослы 4:8, 9.) Кулэ ӧвӧл юнме дыр быдтыны, осконтэм сайтысь иворъёсты учкон понна яке электрон гожтэтъёс пыр ыстэм эскерымтэ информациез лыдӟон понна. Тужгес но палэнскыны кулэ сайтъёслэсь, кудъёсаз асьсэлэсь малпанъёссэс вӧлмыто зэмос йыбырттонлэсь палэнскемъёс. Соослэн одӥг ужпумзы — Инмарлэн ужась-тыршисьёсызлэсь осконзэс быдтыны но зэмлыкез мыдланьтыны. Эскерымтэ информация люкетэ шонер малпанэ вуыны. Ноку но уг яра малпаны, шонертэм информация мон вылын нокызьы но уз шӧдӥськы шуыса (1 Тим. 6:20, 21).

5. Мар веразы израиль пиослы музъемез учкыны-чакланы ыстэм дас воргоронъёс но кытчы со вуттӥз?

⁵ Пӧяса верам иворлы оскид ке, со шуг-секытэ вуттыны быгатоз. Тодады вае, кылсярысь, мар луиз Моисей улон нуналъёсы, куке Сӥзем музъемез учкыны-чакланы ыстэм дас кык воргоронъёс пӧлысь дасэз со музъем сярысь урод ивор вӧлмытӥзы (Лыд. 13:26—34). Соослэн бадӟыматыса верам кылъёссы Иеговалэн калыкезлэсь мылкыдзэ быдтӥзы (Лыд. 14:1—4). Нош малы? Калык со кылъёслы оскиз, луоз, малы ке шуоно учкыны-чакланы ыстэм воргоронъёс пӧлысь тросэз Сӥзем музъем сярысь уродзэ веразы. Нош Иисус Навинлэсь но Халевлэсь Сӥзем музъем сярысь верам умой кылъёссэс израиль пиос пелязы ик ӧз  понэ (Лыд. 14:6—10). Ваньзэ пыр-поч эскерем но Иеговалы оскиськем интые, калык урод веранъёслы оскиз. Макем со шонертэм вал!

6. Малы паймоно ӧвӧл, Иеговалэн калыкез сярысь пӧяса верамъёсты кылӥмы ке?

⁶ Тужгес но сак луоно, куке ми Иеговалэн калыкез сярысь иворъёсты кылӥськомы яке лыдӟиськомы. Малы? Эн вунэтэ, Шайтан Инмарлэсь оскымон ужась-тыршисьёссэ «янгыше уськытӥсь» луэ шуыса (Усьт. 12:10). Соин Иисус азьло ик вераз, зэмлыклы пумитъяськисьёс милемыз урод кылъёсын юнме куаретозы шуыса (Матф. 5:11). Иисуслэсь верам кылъёссэ санэ понӥськомы ке, Иеговалэн калыкез сярысь пӧяса верамъёсты кылыса, ми ум пайме.

7. Мар сярысь малпаськоно ивор ыстэмлэсь азьло?

⁷ Яратӥськоды-а тӥ эшъёстылы яке тодмоостылы электрон гожтэтъёс гожъяны? Нош луэ-а озьы, кыӵе ке тунсыко ивор кылыса яке лыдӟыса, тӥ соку ик со сярысь мукетъёсызлы вераны дыртӥськоды? Соку, ивор ыстэмдылэсь азьло, юалэ асьтэлэсь: «Тодӥсько-а мон, со зэм шуыса? Мон сое пыр-поч эскери-а?» Уд ке тодӥське, со зэм шуыса, но сое ӧд ке эскере, асьтэос но сое валатэк, вын-агайёс но сузэр-апайёс пӧлын шонертэм ивор вӧлмытыны быгатоды. Соин ик эн дыртэ эскерымтэ иворез ыстыны, ӵуше сое.

8. Мар каро куд-ог шаеръёсын зэмлыклы пумитъяськисьёс но кызьы ми, асьмеос но сое валатэк, соослы юрттыны быгатомы?

⁸ Вань на мукетыз муг, малы эскерытэк ивор ыстыны кышкыт. Куд-ог шаеръёсын Инмарлы ужаны-тыршыны милемлы быдэсак эрик уг сёто яке ужмес дугдытыны тыршо. Зэмлыклы пумитъяськисьёс юри кыӵе ке  ивор вӧлмытыны быгато, ми кышканлы мед сётскомы яке ог-огмылы оскемысь мед дугдомы шуыса. Тани, кылсярысь, мар луиз Совето Союзын. КГБ кыл вӧлмытӥз, кенешын куд-огез кыл кутӥсь вын-агайёс Иеговалэсь калыксэ вузазы шуыса a. Тросэз оскизы со пӧяськонлы но Инмарлэн организациысьтыз кошкизы. Макем со ӝож! Туж шумпотоно, берлогес тросэз берытскизы шуыса. Но куд-огъёсызлэн «осконзылэн инъетэз куашказ» (1 Тим. 1:19). Мар кароно, туннэ со выллем югдур медаз кылды шуыса? Умойтэм яке эскерымтэ иворез эн вӧлмытэ. Эн оске ваньмызлы, мае кылӥськоды. Со интые, эскере, тодэм иворды зэм шуыса.

9. Мар эшшо люкетэ на шонер малпанэ вуыны?

⁹ Шонер малпанэ вуыны секыт, куке тодэм информация быдэсак ӧвӧл, яке солэн оглюкетэз гинэ зэм. Луэ-а иворез зэм шуыса лыдъяны, отын 10 процентэз гинэ шонер верамын ке? Сыӵе иворез тодыса, мар кароно, милемыз пӧяны медаз быгатэ шуыса? (Еф. 4:14).

10. Малы израиль пиос вын-агайёсынызы ожмаськыны малпазы но мар соосты вир кисьтонлэсь утиз?

¹⁰ Ойдолэ тодамы ваёмы, мар луиз Иисус Навин улон нуналъёсы израиль пиосын, кудъёсыз Иорданлэн шундыпуксён палаз улӥзы (Иис. Н. 22:9—34). Соос кылӥзы, Иорданлэн шундыӝужан палаз улӥсь израиль пиос (Рувим пиос, Гад пиос, Манассия выжылэн ӝыны люкетэз) Иордан вӧзы курбон сётон инты лэсьтӥзы шуыса. Одӥг ласянь со зэм вал. Иорданлэн шундыпуксён палаз улӥсь израиль пиос шонертэм малпанэ вуизы. Соос малпазы, вын-агайёссы Иеговалы пумит ӝутскизы шуыса, но соослы пумит ожен мыноно кариськизы. (Лыдӟе Иисус Навинлэсь 22:9—12.) Но ожен мынэмзылэсь азьло соос отчы оскымон пиосмуртъёсты ыстӥзы, соос ваньзэ пыр-поч мед тодозы-эскерозы шуыса. Мар тодӥзы со пиосмуртъёс? Рувим пиос, Гад пиос но Манассия выжылэн ӝыны люкетэз зэмзэ ик курбон сётон инты лэсьтӥзы, но курбонъёс сётъян понна ӧз, со адӟись-тодытӥсь мед луоз шуыса лэсьтӥзы. Соослэн потэ вал, нылпиоссы мед тодозы, соослэн атайёссы но Иеговалы оскымон ужазы-тыршизы шуыса. Макем шумпотӥзы, луоз, Иорданлэн шундыпуксён палаз улӥсь израиль пиос, вын-агайёссылы пумит ожен ӧз мынэ, нош нырысь ваньзэ пыр-поч чаклазы-эскеризы шуыса!

11. а) Кызьы Мемфивосфейлы пумит шонертэм уж лэсьтэмын вал? б) Мар кароно вал Давидлы, сыӵе учыр медаз кылды шуыса?

¹¹ Куддыръя тазьы луыны быгатэ: кин ке ми сярысь кыӵе ке ивор вӧлмытэ, кудӥзлэн оглюкетэз гинэ зэм. Эскеромы Давидлэсь но Мемфивосфейлэсь учырзэс. Давид ӟеч уж лэсьтӥз, куке Мемфивосфейлы Саул песятаезлэсь вань бусыоссэ берыктӥз (2 Экс.  9:6, 7). Берлогес Давидлы Мемфивосфей сярысь уродзэ веразы. Ваньзэ пыр-поч тодытэк-эскерытэк, Давид солэсь вань ваньбурзэ талаз (2 Экс. 16:1—4). Нош Мемфивосфеен вераськемез бере Давид валаз, янгышаз шуыса, но талам ваньбурезлэсь оглюкетсэ берыктӥз (2 Экс. 19:24—29). Малпаськытэк лэсьтэм интые, Давид ваньзэ эскерыны дыр шедьтысал ке, сокем шонертэм уж ӧй лэсьтысал.

12, 13. а) Мар кариз Иисус, куке со сярысь кыл вӧлдӥзы? б) Кызьы ми солэсь адӟем карыны быгатӥськомы?

¹² Мар тӥ карыны быгатоды, кин ке тӥ сярысь кыл вӧлдэ ке? Сыӵе югдуре шедизы Иисус Христос но Иоанн Пылатӥсь. (Лыдӟе Матфейлэсь 11:18, 19.) Мар кариз Иисус, куке со сярысь кыл вӧлдӥзы? Со ӧз тыршы оскытыны адямиосты, со сярысь верам шонертэм шуыса. Со интые Иисус ӧтиз саклыксэс висъяны солы, мар со кариз но малы дышетӥз. Иисус вераз, визьлыклэн нылпиосыз, яке ужъёсыз, визьлыклэсь шонер луэмзэ возьмато шуыса.

¹³ Иисуслэн примерез милемыз тросэзлы дышетыны быгатэ. Куддыръя ми кылӥськомы, кин ке но милемыз тэрга но ми сярысь шонертэм вера шуыса. Соку милям сое ӝоггес тупатэммы но ӟеч ниммес берыктэммы потэ, дыр. Мар кароно сыӵе учыре? Кин ке ми сярысь кыл вӧлдэ ке, милемлы улоно озьы, нокин но вӧлдыса верам кыллы медаз оскы шуыса. Кызьы адӟиське Иисуслэн примерысьтыз, асьмеды умой воземмы котькыӵе пӧяськонэз шарае поттыны быгатэ.

14, 15. Малы кышкыт визьмы вылэ оскиськыны?

¹⁴ Кызьы ми адӟимы, эскерымтэ ивор шонер малпанэ вуыны люкетэ. Но вань на мукетыз люкетӥсь шуг-секыт — милям тырбыдэстэм луэммы. Оло нош, ми трос аръёс ӵоже Иеговалы ужаськомы-тыршиськомы ини. Со дыр ӵоже ми визьмогес но шӧдӥсь-валасьгес луимы, но мукетъёсыз гажало милемыз, ми котьку малпаськыса ваньзэ лэсьтӥськомы шуыса. Со туж умой. Но со кышкытлык вайыны уг быгаты-а?

¹⁵ Быгатэ, ми ортчыт трос визьмы вылэ оскиськиськомы ке. Ми сётскыны быгатомы малпанъёсмылы но шӧдонъёсмылы. Куддыръя малпаны быгатомы, ми ваньзэ валаськомы шуыса, но зэмзэ ке верано, ваньзэ пыр-поч ум тодӥське. Со туж кышкыт! Библия алэ милемыз: «Визьмыд вылэ эн пыкиськы» (Мад. 3:5, 6; 28:26).

16. Вералэ ресторанысь малпам югдурез. Кыӵе дыртыса лэсьтэм йылпумъянэ вуиз Том?

¹⁶ Пуктомы син азямы таӵе югдурез. Одӥг ӝытэ Том нимо тӧро ресторанэ мыныса сиськыны малпаз. Отын со кышнояськем Джон нимо тӧроез адӟиз, кудӥз кыӵе ке кышномуртэн ӝӧк сьӧрын пуке вал. Соос серекъяса, мар ке но тунсыкоез сярысь вераськыса, пуко вал, нош одӥг пол ӟыгырскизы но. Том туж паймиз! Йыраз кышкыт малпанъёс берганы кутскизы: Джон кышноеныз люкиськыны уг малпа-а? Мар луоз кышноеныз но нылпиосыныз? Том одӥг пол гинэ ӧз  адӟылы ни, кызьы семьяосын та выллем шуг-секытъёс кылдылӥзы. Нош мар тӥ малпасалды, Том интыын луысалды ке?

17. Мае тодӥз Том? Малы дышетыны быгатэ милемыз та учыр?

¹⁷ Эн дыртэ. Том соку ик малпаз ке но, Джон мукет кышномуртэн юмша шуыса, ваньзэ пыр-поч тодэ вал-а со? Со ӝытэ ик Том Джонлы жингыртӥз. Солы туж возьыт луиз, куке со тодӥз, ресторанысь кышномурт Джонлэн сузэрез шуыса, но со ӝамдэлы гинэ лыктылэм. Соос трос аръёс ӧз адӟиське ни. Солэн туж ӧжыт дырыз вал, соин ик соос ресторанын пумиськыса сиськыны вераськизы. Нош Джонлэн кышноез лыктыны быгатымтэ. Шумпотоно, Джон сярысь кылдэм малпанъёссэ Том мукетъёсызлы ӧз вера шуыса. Озьыен, Иеговалы трос аръёс ӵоже ужамы-тыршимы ини ке но, милемлы котьку нырысь ик ваньзэ пыр-поч эскероно.

18. Мар милемлы люкетыны быгатэ огъя оскисьмы шоры шонер учкыны?

¹⁸ Мар эшшо люкетыны быгатэ на шонер малпанэ вуыны? Пӧртэм луэменымы сэрен кенешысь кинэн ке тупамтэос. Огъя оскисенымы тупамтэосмы сярысь ялан малпаськимы ке, ми со шоры чакласькыса учкыны кутскомы, вылды. Нош со сярысь мае ке уродзэ кылыса, ми солы оскомы, дыр. Кыӵе йылпумъян лэсьтыны луоз? Мукет христианъёслы йыркуръяськиськомы яке соослы вожъяськиськомы ке, ми соос шоры шонертэм учкомы (1 Тим. 6:4, 5). Озьы медаз луы шуыса, милемлы сыӵе шӧдонъёсынымы нюръяськоно. Тодамы возёно, ми вын-агайёсмес вань сюлмысьтымы яратыны но соосты простить карыны кулэ шуыса. (Лыдӟе Ефесъёслы 4:2, 32.)

19, 20. а) Библиысь кыӵе возетъёс юрттозы милемлы басьтэм информациез шонер эскерыны но валаны, оскымон-а со, ӧвӧл-а, но шонер малпанэ вуыны? б) Мае ми эскеромы мукетаз статьяын?

¹⁹ Ваньзэ пыр-поч тодыны но сое ваньзэ шонер валаны капчи ӧвӧл, малы ке шуоно ми тырбыдэстэмесь но али туж трос шонертэм, эскерымтэ но ӝыныез гинэ шонер верам информация. Мар юрттоз милемлы? Библиысь возетъёсты тодон но соосты улонамы пыртон. Одӥгез возет тодамы вайытэ, йылозяз-пумозяз кылзӥськытэк, яке ваньзэ пыр-поч тодытэк-валатэк, ответ сётыны визьмо ӧвӧл но возьыт шуыса (Мад. 18:14). Мукетыз возет котькыӵе но кыллы оскемлэсь алэ (Мад. 14:15). Со сяна, кӧня гинэ ми Иеговалы медам ужалэ-тырше, милемлы уг яра визьмы вылэ оскиськыны (Мад. 3:5, 6). Библиысь возетъёс утёзы милемыз но юрттозы басьтэм информациез шонер эскерыны но валаны, оскымон-а со, ӧвӧл-а, шонер малпанэ вуыны но визьмо ужпумъёс кутыны.

²⁰ Вань на мукетыз шуг-секыт — адями сярысь, солэн вылтусыз шоры учкыса, вераны. Мукетаз статьяын ми эскеромы, кыӵе умойтэм бервылъёсы вуттыны быгатэ со сям, но тодомы, мар юрттоз сыӵе бервылъёслэсь палэнскыны.