ქოიჩქუნანო არძა ფაქტი?
„მორჩქილაფაშახ პასუხიშ მეჩამა უგუნურება დო დამცირება რე“ (იგავ. 18:13).
ობირეშეფი: 126, 95
1, 2. ა) მუშ უნარ ოკო გუვავითარათ დო მუშენ? ბ) მუს გუვარჩიენთ თე სტატიას?
ჭეშმარიტ ქრისტიანეფს მოსაჭირნა გუვავითარათ თიშ უნარ, ნამდა შევამოწმათ მეღებულ ინფორმაცია დო სწორ დასკვნეფ გეგშებღათ (იგავ. 3:21—23; 8:4, 5). თე უნარ ვა გუვავითარით-და, სატანა დო თიშ ქვეყნიერება აზროვნებას გილამლუანა (ეფეს. 5:6; კოლ. 2:8). მუშო ოკო რაგად, სწორ დასკვნეფს თიმწკუმა გიშებღანთ, მუჟამსით ფაქტეფ მარჩქვენუნა. იგავეფიშ 18:13-ს პკითხულენთ: „მორჩქილაფაშახ პასუხიშ მეჩამა უგუნურება დო დამცირება რე“.
2 თე სტატიას გუვარჩიენთ, მუშენ რე რთულ არძა ფაქტიშ გაგება დო სწორ დასკვნეფიშ გიშაღალა. თეწკუმა ართო, გუვარჩიენთ პრაქტიკულ ბიბლიურ პრინციპეფს დო მაგალითეფს, ნამუთ მიმეხვარებნა მეღებულ ინფორმაციაშ სწორაშე შეფასებას.
ირფელ ვედეჯერათ
3. მუშენ ოკო გიმიბრინუათ იგავეფიშ 14:15-ის მოჩამილ ბიბლიურ პრინციპი? (ქოძირით სურათ თე გვერდის).
3 ამდღა ინფორმაციას შხვადოშხვა საშვალებეფშე ბღებულენთ. ვებ-გვერდეფ, ტელევიზია დო შხვა მედია საშვალებეფ ქიანა ინფორმაციას მარზენა. თეს გეძინელ, ბრელ პიროვნება ინფორმაციას ღებულენს ელექტრონულ ფოსტაშ, ტელეფონიშ, მეგობრეფიშ დო ნაჩინებუეფიშ საშვალებათ. ამდღა ტყურა ინფორმაციაშ გავრცელება დო ფაქტეფიშ ფულუა ჩვეულებრივ მუდგარენ რე, ათეშენ, საჭირო რე კურცხას ვორდათ დო ყურადღებით გეგნვამოწმათ, მუ ინფორმაციას ბღებულენთ. ნამ ბიბლიურ პრინციპეფ მიმეხვარებნა თეშ კეთებას? იგავეფიშ 14:15-ის პკითხულენთ: „გამოცდილ ვა რენ ფერს, ირფელიშ ჯერს, წიმი იჯინენ ფერ, ოკვირ მუშ ნაბიჯეფს“.
4. მუჭო მიმეხვარებნა ფილიპელეფიშ 4:8, 9 ინფორმაციაშ გიშაგორუას დო მუშენ რე მნიშვნელოვან მიღდან სწორ ინფორმაცია? (ქოძირით ჩარჩო „მუსხირენ საშვალება, ნამუთ მიმეხვარებნა ზუსტ ფაქტეფიშ მეღებას“).
4 სწორ გადაწყვეტილებეფ მიბღათინ, ზუსტ ფაქტეფ ოკო მიჩქუდან. თეს გეძინელ, ყურადღებით ოკო გიშებგორათ მუს პკითხულენთ (წეკითხით ფილიპელები 4:8, 9). * ჩქი ოკო ვა ვოდინუათ დრო საეჭვო ინტერნეტ გვერდეფიშ გოჯინას დო თიცალ იმეილეფიშ კითხირს, სოდეთ გინომოწმებულ ვა რენ ფერ ინფორმაცია რე მოჩამილ. განსაკუთრებით დუდ ოკო ევუჩილითუათ განდგომილეფიშ ვებ-გვერდეფს. თინეფიშ მთავარ მიზან რე ღორონთიშ ხალხის რწმენა აკურღვან დო ჭეშმარიტებაშ გურშენ სწორ ვა რენ ფერ ინფორმაცია გავრცელან. არასწორ ინფორმაციაქ შილებე გლახა შედეგეფშა მემჸონან. ირიათო ქორშუდან, ნამდა ტყურა ინფორმაციას შეულებ თქვან გურ დო გონებაწკუმა გლახათ იმოქმედას (1 ტიმ. 6:20, 21).
5. მუ არასწორ ინფორმაცია მირჩქილუეს ისრაელეფქ დო მუჭო იმოქმედ თექ თინეფწკუმა?
5 ტყურა ინფორმაციაშ დაჯერებაქ შილებე საზიანო შედეგეფშა მემჸონან. მაგალთო, ქიგიშინით მუქ მოხვად მოსეშ დროს, მუჟამსით 12 მზვერავ დუნაპირებ ქიანაშა ამბეშ მაღალშა მიდაშკვეს. თინეფშე 10 მზვერავქ გლახა ამბე მიღჷ (რიცხ. 13:25—33). მოძინელ ნარაგადიქ დო არასწორ ინფორმაციაქ იეჰოვაშ ხალხის გურ გუტახ (რიცხ. 14:1—4). მუშენ უღდეს ისრაელეფს თეცალ რეაქცია? შილებე იფიქრესკო, რახანს მზვერავეფიშ უმენტაშიქ გლახა ამბე მიღუნ, თენა სწორ ინფორმაცია რდუ. ისრაელეფქ ვა მურჩქილუეს სანდო კათას, იესო ნავეშ სქუას დო ქალებ იეფუნეშ სქუას, მიდგაქ თინეფს სწორ ინფორმაცია გინოჩეს (რიცხ. 14:6—10). თიშ მანგიორო, ნამდა ფაქტეფ უგორდესკო დო იეჰოვაშ ნდობა გეგმურჩქინდესკონ, გინოჭყვიდეს არასწორ ინფორმაცია დეჯერესკო. თენა დასურო უგუნურ საქციელ რდუ!
6. მუშენ ოკო ვა გამკვირდან, მუჟამსით იეჰოვაშ მოწმეეფიშ გურშენ გლახა ამბეს ქიგებგენთ?
6 ჩქი განსაკუთრებულ სიფრთხილე ოკო გიმიფრჩქინათ, მუჟამსით იეჰოვაშ მოწმეეფიშ გურშენ ინფორმაციას იფრჩქილუაფუთ. ირიათო ქორშუდან, ნამდა სატანა ღორონთიშ ხალხის ბრალს გედვანს (გამოცხ. 12:10). ათეშენ იესოქ გუმაფრთხილეს, ნამდა მუშ მოწინააღმდეგეეფ „არძანერ უბადობას“ ქეკმაბრალენდეს (მათ. 5:11). თე გაფრთხილებას სერიოზულო მიბღენთ-და, ვა გამკვირდუნა, მუჟამსით იეჰოვაშ მოწმეეფიშ გურშენ გლახა ამბეს ქიგებგენთ.
7. მუ კითხვეფშე ოკო დეფიფქრათ, სოიშახ შხვეფს იმეილს ვარდა მესიჯეფს ვუჯღონანთ?
7 შილებე ხშირას ვუჯღონანთ მეგობრეფს იმეილეფს დო მესიჯეფს. მუჟამსით ახალ ამბეს ვარდა საინტერესო შემთხვევას ბგებულენთინ, შელებე მოკოდან ხეთეშე ქუგვოგებაფუათ შხვეფს. მარა თეშ კეთებაშახ, ჯგირ იჸუაფ დეფიფქრათ თეცალ კითხვეფშე: ქუვორექო დარწმუნებულ, ნამდა თე ინფორმაცია დასურო სწორ რე? ქომჩქუნო არძა ფაქტი? დარწმუნებულ ვა ვორეთ-და, შილებე ტყურაშ გავრცელებას შევუნწყუათ ხე, ათეშენ უჯგუშ რე, დობლასათ თეცალ ინფორმაცია დო მითინს ვეგნვუჯღონათ თინა.
8. მუს ორთნა ჩქინ მოწინააღმდეგეეფ ნამთინე ქიანას დო მუჭო შილებე გურუგუჩამუო ხე ქეშუნწყუათ თინეფს?
8 არსებენს ხოლო ართი საშიშროება, ნამუთ იმეილეფიშ დო მესიჯეფიშ ხეთეშე გინოჯღონუას მოჸუნს. ნამთინე ქიანას ჩქინ საქმიანობა შეზღუდულ ვარდა ვარიებულ რე. თეცალ ქიანეფს ჩქინ მოწინააღმდეგეეფქ შილებე შეგნებულო გავრცელან ინფორმაცია, ნამდა დუმოშკურნუან ვარდა ართიან შკას ეჭვი დომთასან. მაგალთო, დეფიფქრათ მუნერ სიტუაცია რდუ ყოფილ საბჭოთა კავშირს. „კგბ“ ავრცელენდ ჭორს, ნამდა ნამთინე ჯიმაქ, მიდგას ბრელ იჩინენდუნ, ქიდიტუ ორგანიზაცია. * სანარღოთ, ბრელქ ქიდეჯერ თე ტყურა ინფორმაცია დო ქიდიტუ ორგანიზაცია. უმოს გვიანო უმენტაშიქ კინ დირთ ორგანიზაციაშა, მარა ნამთინექ ვემიკორინუ თეშ კეთება. თინეფს ტყურა ინფორმაციაქ რწმენა მეუდინუ (1 ტიმ. 1:19). მუჭო შემლებნა დუდ ევუჩილითუათ თეცალ შედეგის? დღას ვა გავრცელათ უარყოფით დო გინომოწმებულ ვარენ ფერ ინფორმაცია. გეგნამოწმით ფაქტეფ დო ვედეჯერათ ირფელ, მუდგას გეგონენთ.
დაუზუსტებელ ინფორმაცია
9. მუქ შილებე მეცილან სწორ ინფორმაციაშ მეღებას?
9 სწორ დასკვენეფიშ კეთებას მოცილნა გვერდო სწორ ვარენ ფერ ვარდა არძა ფაქტი ვა რე მოჩამილინ ფერ ინფორმაცია. მუშო ოკო რაგად, თეცალ ინფორმაციაშა ვენდებე. მუშ კეთება შემლებნა, ნამდა ვემეფჩირთათ დო ვედებჯერათ თიცალ ინფორმაცია, ნამუთ გვერდო სწორ რე ვარდა არძა ფაქტი ვა რე მოჩამილ? (ეფეს. 4:14).
10. მუშენ გინოჭყვიდეს ისრაელეფქ, ქეჩხუპესკო მუნეფიშ ჯიმალეფს, მარა მუქ მეხვარ თინეფს, დუთირდესკო თე გადაწყვეტილება?
10 ჩქი ბრელ მუთუნიშ გურაფა შემლებნა ისრაელეფიშ მაგალითშე, მით იესო ნავეშ სქუაშ დროს მალწყარ იორდანეშ დასავლეთ მხარეს ცხოვრენდეს (იეს. 22:9—34). თინეფქ ქიგეგეს, ნამდა მალწყარ იორდანეშ აღმოსავლეთით მახორუ ისრაელეფს (რეუბენიშ დო გადიშ ტომეფ დო მენაშეშ გვერდ ტომს) გოხოლუას დიდ სამსხვერპლო აფდეს შენებულ. თე ინფორმაცია გვერდო მართალ რდუ. დაუზუსტებელ ინფორმაციაშ შედეგო, დასავლეთ ნაწილს მახორუ ისრაელეფქ იფიქრეს, ნამდა აღმოსავლეთის მახორუ ისარელეფქ ოჭიშ ქურთინუეს იეჰოვას, ათეშენ ჩხუპ გეგმუცხადეს თინეფს (წეკითხით იესო ნავეს ძე 22:9—12). * საბედნეროთ, ჩხუპიშ დოჭყაფაშახ, მუსხირენ საიმენდო კოჩ მიდაშკვეს, ნამდა გეგმირკვისკო არძა ფაქტი. მუ გეგეს თინეფქ? რეუბენიშ დო გადიშ ტომეფს დო მენაშეშ გვერდ ტომს სამსხვერპლო შხვა ღორონთეფიშ ოთაყვანებელო ვაფდეს შენებულ. თინეფქ თე სამსხვერპლო თიშენ აშენეს, ნამდა ირ კოჩის ქუგუგებუდკო იეჰოვაშ ართგურ თაყვანიშმცემლეფ რდესინ. ისრაელეფ გახარებულეფ იჸუაფდეს თით, ნამდა გეგმირკვის არძა ფაქტი დო დაუზუსტებელ ინფორმაციაშ შედეგო, ვეჩხუპეს მუნეფიშ ჯიმალეფს.
11. ა) მუ უსამართლობას შეხვად მეფიბოშეთიქ? ბ) მუშ კეთება შეულებუდ დავითის, ნამდა მეფიბოშეთ თეცალ უსამართლობაშ მსხვერპლი ვა ჸოფედკო?
11 მინშა ჩქი ხოლო შილებე პირადო შეფხვადათ უსამართლობას, მუშენდა შილებე გვერდო ტყურა ინფორმაცია გამვრცელან. დეფიფქრათ მეფიბოშეთიშ დო დავითიშ მაგალითშე. მეფე დავითიქ ჯგირო მექცუ მეფიბოშეთის დო დურთინუ არძა დიხა, ნამუთ მუშ ბაბუშ, საულიშ რდუ (2 სამ. 9:6, 7). უმოს გვიანო, დავითიქ გლახა ინფორმაცია ქიგეგ მეფიბოშეთიშ გურშენ. მეფეს ვეგნუმოწმებ ნარაგად დო თის გემდუღ ქონება (2 სამ. 16:1—4). მუჟამსით დავითიქ მეფიბოშეთის ქუდურაგადუნ, ქიმეხვად მუშ შეცდომას დო დურთინუ ქონებაშ გვერდ (2 სამ. 19:24—29). თეცალ უსამართლობა ვა მოხვადუდ, მუჟამსით დავით ვეჩქარენდჷ, გეგნამოწმენდჷ არძა ფაქტის დო დაუზუსტებელ ინფორმაციაშ შედეგო ვემიღენდჷ თეცალ გადაწყვეტილებას.
12, 13. ა) მუჭო იქციებუდ იესო, მუჟამსით ხალხ თიშ გურშენ ტყურას იჩიებუდ? ბ) მუჭო ოკო მიფქცუათ, მუჟამსით ჩქინ გურშენ ტყურა ინფორმაციას ავრცელენა?
12 მუშ კეთება შეილებნა, თქვან გურშენ ტყურა ინფორმაციას ქავრცელენან-და? თეცალ პრობლემას იესო დო იოანე ნათლიშმცემელ ხოლო შეხვადუდეს (წეკითხით მათე 11:18, 19). * იესო მთელ მუშ დროს დო ენერგიას დუდიშ დაცვებელო ვახარჯენდჷ. თეშ გინაწონს, თინა ხალხის ოხვარუდ, ყურადღება ქიმიაქცისკო ფაქტეფს — თის, მუდგას ორთუდ დო ოგურუანდჷ. იესოქ თქუ: „სიბრძნეშ სიმართლეს საქმეეფ ოძირანს“ (მათ. 11:19).
13 თავრეშე მნიშვნელოვან გაკვეთილს ბგურაფლენთ. მინშა შილებე ჩქინ გურშენ ხოლო გლახა მუდგარენ ქოთქუან. მუშო ოკო რაგად, თეცალ დროს მირჩქინდუნა სურვილ, დუვამტკიცათ სიმართლე, ნამდა დეფცვათ ჩქინ რეპუტაცია. მუშ კეთება შემლებნა თე დროს? მუჭოთ იესოშ მაგალითშე ბძირითინ, ჩქინ საქმეეფით დო ქრისტიანულ ცხოვრებათ ოკო ვოძირათ არძას, ნამდა მუდგას ჩქინ გურშენ იჩიებნან, სინამდვილეს სწორ ვა რე.
ზედმეტო ხომ ვანდუთ თქვან დუც?
14, 15. მუჭო შილებე ჩქინ დუდშა მენდებაქ პრობლემათ გინმართან?
14 მუჭოთ ბძირითინ, ართ-ართ პრობლემა, ნამუთ სწორ დასკვნეფიშ კეთებას მოცილნა, დაუზუსტებელ ფაქტეფ რე. მაჟია დიდ პრობლემა, ჩქინ არასრულყოფილება რე. შილებე იეჰოვას წანეფ რე ართგურო ვომსახურუთ დო ფიქრიშ დო გარჩიებაშ ჯგირ უნარ მაფდან გავითარებულ. შილებენო თექ პრობლემათ გინმართან?
15 მუშო ოკო რაგად, ჩქინ დუდის ზემდეტო მივენდებუთ-და, თენა მახეთ გინმართუნა. ჩქინ აზროვნებაწკუმა შილებე იმოქმედას ემოციეფქ დო პირად აზრიქ. შილებე ფიფქრენდათ, ნამდა არძა ფაქტ ვამჩქუნან თიშ უმკუჯინუო, სიტუაციას ბოლოშა ქინვანჭუთ. მარა ბიბლია მაფრთხილენა, ნამდა ვემვენდათ ჩქინ გონებას (იგავ. 3:5, 6; 28:26).
16. მუ სიტუაციას შეხვად ტომიქ დო მუ იფიქრჷ თიქ?
16 მორთ, წერმიბდგინათ თეცალ სიტუაცია. ართ ონჯუას ტომიქ, ნამუთ ბრელ ხან რე უხუცესო მსახურენსინ, რესტორანს ქოძირ შხვა უხუცეს სახელო ჯონი, მიდგარენ ოსურწკუმა ართო. თინეფ იძიცანა, რაგადანა დო ართიან გეგნოჯუნეს. ტომის მანგარო ვემეწონ თე სიტუაციაქ დო თეცალ კითხვეფქ გურჩქინდჷ: ხომ ვეკურღვანს ჯონის თეცალ საქციელ ოჯახის? მუჭო იმოქმედენს თენა თიშ ჩილ დო სქუაწკუმა? ტომის ადრე ხოლო უძირ თეცალ გურიშ გუმატახალ სიტუაციეფ. თქვა მუს იფიქრენდით თეცალ სიტუაციას?
17. მუ ფაქტეფ გეგჷ მოგვიანებით ტომიქ დო მუს ბგურაფლენთ თავრეშე?
17 მორთ, ვეფჩქარათ დასკვნეფიშ კეთება. მართალ რე, ტომიქ ხეთეშე გეგნოჭყვიდ, ნამდა ჯონიქ ოსურს უღალატ, მარა ქუჩქუდუო თის არძა ფაქტ? უმოს გვიანო, თიმ ონჯუას ტომიქ ჯონის დურეკ. წერმიდგინით, მუჭო ახიოლედ თის, მუჟამსით ქიგეგენდჷ, ნამდა თე ოსურ ჯონიშ და ჸოფე, ნამუთ შხვა ქალაქის ცხოვრენდჷ. თინეფს ბრელ ხან რდუ ართიან ნაძირეფ ვაფდეს. თინა მუსხირენ საათით რდუ ქალაქშა მოულირ, ათეშენ ჯონის თიშ ძირაფა ხვალე რესტორანს შეულებუდ. ჯონიშ ოსურს ვეშიალებუ თინეფწკუმა ართო ჸოფედკო. საბედნეროთ, ტომის შხვეფშა ვა უთქუალ, მუთ ძირუნ. მუშ გურაფა შემლებნა თავრეშე? მნიშვნელობა ვა უღჷ მუსხი ხან რე იეჰოვას ვომსახურუთ, სწორ დასკვნეფიშ კეთებას გამოცდილება ვარინ, ზუსტ ფაქტეფიშ გაგება მიმეხვარებნა.
18. მუ დროს შილებე ჯიმაშ გურშენ არასწორ დასკვნეფ გეგშებღათ?
18 სწორ დასკვნეფიშ კეთებას შილებე უთანხმოებეფქ ხოლო მეცილან. მუჟამსით ირიათო თი განსხვავებეფშე ფიფქრენთ, მუთ ჩქინ შქას რენ, შილებე ჯიმას ეჭვიშ თოლით ქუდვუჭყათ ჯინა. თეგვარო, მუჟამსით ჯიმაშე უარყოფით ინფორმაციას ბგებულენთინ, შილებე მანგარო მოკოდან თეშ დაჯერება. მუშ გურაფა შემლებნა თავრეშე? მუჟამსით ჯიმაშ გურშენ, ირიათო გლახას ფიფქრენთინ, შილებე არასწორ დასკვნეფ გეგშებღათ, ნამუთ ფაქტებშა ვა რე გერსხილ (1 ტიმ. 6:4, 5). თაშ ნამდა, ჩქი საშვალება ოკო ვემეფჩათ ჩქინ დუც ირიათო გლახა იფიფქრათ ჩქინ ჯიმაშე. თეშ გინაწონს, ვაგმოჭყორდან ოკო ჩქინ მოვალეობაქ, მიჸორდან ჯიმალეფ დო მთელ გურით ვაპატუათ თინეფს (წეკითხით კოლოსელები 3:12—14). *
ბიბლიურ პრინციპეფ დოფთხილანა
19, 20. ა) ნამ ბიბლიურ პრინციპეფ მიმეხვარებნა სწორ დას
19 ამდღა რთულ რე სანდო ინფორმაციაშ გორუა დო თინეფიშ გინომოწმება, მუშენდა ინფორმაციაშ უმენტაშ სრულ ვა რე დო გვერდო ტყურა რე. თეს გეძინელ, ჩქი არასრულყოფილფ ვორეთ. მუ მიმეხვარებნა თეცალ დროს? ჩქი ოკო მიჩქუდან დო გიმიბრინუათ ბიბლიურ პრინციპეფ. ართ-ართ პრინციპ თინა რე, ნამდა ფაქტეფიშ მორჩქილაფაშახ პასუხიშ მეჩამა უგუნურება რე (იგავ. 18:13). შხვა ბიბლიურ პრინციპშე ბგებულენთ, ნამდა უცფას ოკო ვედიბჯერათ ირფელ (იგავ. 14:15). დო ბოლოს, მნიშვნელობა ვა უღჷ მუსხი ხან რე ქრისტიანეფ ვორეთ, კურცხას ოკო ვორდათ, ნამდა ჩქინ გონებას ვემვენდათ (იგავ. 3:5, 6). ბიბლიურ პრინციპეფ თიმწკუმა დოფთხილანა, მუჟამსით ინფორმაციას საიმენდო წყაროშე დობგორუნთ, მუთ მიმეხვარებნა სწორ დასკვნეფ დო გადაწყვეტლებეფ მიბღათ.
20 მარა რე ხოლო ართ საფრთხე, ნამდა დასკვნეფ ართ მეჯინათ გუვაკეთათ. უკულიან სტატიას გუვარჩიენთ, თი სიტუაციეფს, მუჟამსით შილებე თე შეცდომა დუშვათ დო ქობძირუნთ, მუჭო ევუჩილითუათ თის დუდ.
^ აბზ. 4 ფილ. 4:8, 9: 8 ბოლოს ჯიმალეფ, მუთ ჭეშმარიტ რე, მუთ სერიოზულ ყურადღებას იმსახურენს, მუთ მართალ რე, მუთ წმინდა რე, მუთ ჸოროფაშ ღირს რე, მუთ მოსაწონ რე, მუთ ზნეობრივ დო ცქვაფაშ ღირს რე, თიშე იფიქრით. 9 აკეთით თინა, მუთ ჩქიმდე გიგურუაფნა, მეიღებნა, მოირჩქილუაფნა დო გიძირნა, დო მშვიდობაშ ღორონთ თქვანწკუმა იჸუაფ.
^ აბზ. 8 ქოძირით 2004 წანაშ „წელიდწდეული“, გვ. 111, 112 (ინგლ.) დო 2008 წანაშ „წელიდწდეული“, გვ. 133—135.
^ აბზ. 10 იეს. 22:9—12: 9 დირთეს რეუბენიშ სქუალეფქ, გადიშ სქუალეფქ დო მენაშეშ ტომიშ გვერდიქ ქანაანიშ დიხაშე, შილოშე, ქიდიტეს ისრაელიშ სქუალეფ დო მიდართეს გალაადშა, მუნეფიშ ოკვირდუ დიხაშა; ქიდიხორეს თექ იეჰოვაშ ბრძანებათ, ნამუთ მოსეშ პიჯით გეგეს. 10 მუჟამსით ქიმერთეს იორდანეშ მხარეშა, ქანაანიშ დიხაშან, რეუბენიშ სქუალეფქ, გადიშ სქუალეფქ დო მენაშეშ ტომიშ გვერდიქ იორდანეწკუმა დიდ სამსხვერპლო აშენეს. 11 ქიგეგეს თენა ისრაელიშ შხვა სქუალეფქ დო თქუეს: „რეუბენიშ სქუალეფს, გადიშ სქუალეფს დო მენაშეშ ტომიშ გვერდის სამსხვერპლო აუშენებ იორდანეშ მხარეს, ქანაანიშ დიხას, ისრაელიშ სქუალეფიშ მხარეს“. 12 ქიგეგეს თენა ისრაელიშ სქუალეფქ დო მთელ კრებულქ შილოს დიშაყარ, ნამდა ქეჩხუპესკო თინეფს.
^ აბზ. 12 მათ. 11:18, 19: 18 ქუმორთ იოანექ, ვართ ჭკუმუნს, ვართ შუნს დო ხალხი იჩიებ, დემონ ჸუნსია. 19 ქუმორთ კოჩიშ სქუაქ, ჭკუმუნს დო შუნს, მარა ხალხი იშენით იჩიებ: „ურძღაფ დო შუმას გინოჸუნელ კოჩ, გინაგაფალეფიშ ემაკორობალეფიშ დო ცოდამეფიშ მეგობარი“. სიბრძნეშ სიმართლეს საქმეეფ ოძირანს.
^ აბზ. 18 კოლ. 3:12—14: 12 ათეშენ გეგმირჩქინით სათუთ გრძნობეფ — გაჭირებაშ გურშა მეღალა, სიჯგირა, თანდაბლობა, ლიბ ხასიათ დო მოთვინება, მუჭოთ ღორონთიშ რჩეულეფ, წმინდა დო საჸოროფო ადამიანეფ. 13 მუთვინით დო მთელ გურით ქაპატით ართიანს, მითინშა ჩიულიშ მიზეზ ქოიღუნან-და. მუჭოთ იეჰოვაქ გაპატის მთელ გურითინ თეშ, თქვა ხოლო ქაპატით ართიანს. 14 თეს გეძინელ, ეიფშით გურ ჸოროფათ, მუშენდა თინა სრულყოფილ კავშირ რე, ნამუთ ართო ეკმოფშაყარანა.
