1,2． （甲）我哋要培养乜嘢重要嘅能力？点解？（乙）呢篇课文会讨论乜嘢？

 作为基督徒，我哋应该学识辨别资讯嘅真确性，从而作出正确嘅判断。（箴言3:21-23； 8:4,5）如果我哋冇培养呢种辨识力，我哋嘅思想就好容易会受到撒但同世界嘅影响。（以弗所书5:6；歌罗西书2:8）当然，我哋要了解事实，先可以得出正确嘅结论。正如箴言18:13话：“未听到事实就回应，唔单止愚蠢，而且失礼。”

² 呢篇课文会分析，有乜嘢因素会妨碍我哋获知事实同作出正确嘅判断。同时，我哋会讨论一啲有助于我哋提高辨识力嘅圣经原则同事例。

3． 点解我哋要将箴言14:15嘅原则应用出嚟？（请睇吓课文开头嘅图片）

³ 今日系一个信息爆炸嘅时代。互联网、电视同其他媒体为我哋提供数之不尽嘅资讯。好多人亦都从亲友嗰 度收到大量嘅电邮同信息。因为好多资讯都含有错误嘅内容或者失实嘅报道，我哋的确要保持警惕，对所听到嘅事要有辨识力。乜嘢圣经原则可以帮到我哋？箴言14:15话：“天真无知嘅人，凡话都信；精明审慎嘅人，步步留心。”

4． 腓立比书4:8,9点样帮助我哋明智噉选择阅读嘅资讯？点解辨别资讯嘅真确性好重要？（另外请睇附栏“ 获得可靠资讯嘅几个途径”）

⁴ 我哋知道真实嘅情况，先可以作出良好嘅判断。所以，我哋一定要小心选择阅读嘅资讯。（请读腓立比书4:8,9）我哋唔应该浪费时间去浏览可疑嘅互联网新闻或者阅读电邮当中未经证实嘅报道，特别要远离叛道者所设立嘅网站。呢啲网站歪曲事实，诋毁上帝嘅子民。我哋轻信一啲唔可靠嘅信息就会作出错误嘅决定。千祈唔好低估误导人嘅信息对你头脑同内心造成嘅影响。（提摩太前书6:20,21）

5． 以色列人听到乜嘢错误嘅报告？佢哋受到乜嘢影响？

⁵ 听信错误嘅报道会带嚟严重嘅后果。请睇一个事例。喺摩西嘅日子，被派去侦察应许之地嘅十二个探子当中，有十个人返嚟之后都作出消极嘅报告。（民数记13:25-33）佢哋夸大、失实嘅言词令耶和华嘅子民灰心丧气。（民数记14:1-4）点解民众有噉嘅反应？民众可能觉得，既然大多数探子都有一致嘅报告，噉佢哋讲嘅肯定系啱嘅。就算约书亚同迦勒带嚟真实、积极嘅报告，民众都唔愿意听。（民数记14:6-10）民众冇信赖耶和华，亦都冇辨别报告嘅真确性，反而选择相信嗰啲消极嘅报告。真系愚蠢！

6． 我哋如果听到一啲关于耶和华子民嘅荒谬报道，点解唔需要感到震惊？

⁶ 我哋睇到一啲同耶和华子民有关嘅报道嗰时，就要特别小心。我哋要记住，撒但一直喺度指控上帝嘅忠仆。（启示录12:10）所以耶稣提醒话，反对者会“用各种邪恶嘅话诬蔑”佢嘅门徒。（马太福音5:11）我哋如果留意呢个提醒，喺听到一啲有关耶和华子民嘅荒谬言论嗰时，就唔会感到震惊。

7． 我哋发送电邮或者信息之前要考虑乜嘢？

⁷ 你系咪好钟意发电邮或者信息俾你嘅亲友？如果系嘅话，当你睇到一个最新嘅消息或者听到一个不可思议嘅事件嗰阵，你可能会好兴奋，好似一个新闻记者噉想第一时间报道呢件事。不过，喺你发信息之前，请问吓自己：“我系咪肯定呢个消息系真实嘅呢？我有冇了解事情嘅全貌？”如果你未肯定就将信息发咗出去，噉无意中可能就会喺弟兄姊妹之间散播虚假嘅消息。如果你唔肯定消息嘅真伪，就应该删除，而唔系发送。

8． 某啲地区嘅反对者会点样做？我哋点样做，就可能无意中协助咗反对者？

⁸ 将未经证实嘅电邮同信息转发出去系好危险嘅。我哋嘅工作喺某啲地区受到限制或禁止。呢啲地区嘅反 对者可能不怀好意噉利用一啲虚假消息，使我哋产生恐惧或者彼此猜疑。请睇吓喺前苏联发生过嘅事。国安会嘅秘密警察散播谣言话，好多带头嘅弟兄出卖咗耶和华嘅子民。 * 好多人都信以为真，结果离开耶和华嘅组织。庆幸嘅系，好多人后来都返翻会众。不过，有啲人就信心尽毁，唔再支持正确嘅崇拜。（提摩太前书1:19）我哋可以点样避免有咁可悲嘅后果？就系唔好散播负面或者未经证实嘅消息，唔好乜嘢事都轻易相信，要确保自己已经了解事情嘅全貌。

9． 另一个使我哋唔容易作出正确判断嘅原因系乜嘢？

⁹ 半真半假嘅话或者片面嘅信息系令我哋好难作出正确判断嘅另一个原因。如果一个信息只有一部分系啱嘅，就好容易会误导人。我哋可以点样避免俾呢啲信息呃到？（以弗所书4:14）

10． 点解以色列人差啲就互相残杀？呢件事点样解决？

¹⁰ 请睇吓喺约书亚嘅日子，住喺约旦河东西两岸嘅以色列人之间所发生嘅事。（约书亚记22:9-34）西岸嘅以色列人听到一个消息话，东岸嘅以色列人，即系吕便人、迦得人同玛拿西半个部族嘅人，喺约旦河边起咗一座又大又壮观嘅坛。呢个消息的确系真实嘅，但并唔全面。西岸嘅以色列人一听到呢个消息，就以为东岸嘅同胞背叛咗耶和华，于是聚集埋一齐，准备攻打佢哋嘅弟兄。（请读约书亚记22:9-12）庆幸嘅系，佢哋发动攻击之前，派出一啲可靠嘅男子做代表，去全面了解呢件事。实情系点嘅呢？嚟 自吕便、迦得同玛拿西半个部族嘅以色列人唔系为咗献祭而起嗰座坛嘅。佢哋只系想用呢个坛作为凭证，使后人知道佢哋都系崇拜耶和华嘅人。好在西岸嘅以色列人用咗啲时间去了解事实，如果唔系，佢哋就会因为一个片面嘅消息就手足相残。

11． （甲）米非波设点样受到唔公正嘅对待？（乙）大卫点样做，就可以避免犯呢个错？

¹¹ 你可能因为一啲同自己有关嘅半真半假或者片面嘅信息而受到唔公正嘅对待。请睇吓大卫王同米非波设嘅事例。大卫慷慨、仁慈噉对待米非波设，将属于佢爷爷扫罗嘅土地都归还俾佢。（撒母耳记下9:6,7）不过后来，大卫听到一啲关于米非波设嘅负面消息。大卫冇证实消息，就决定夺去米非波设嘅所有产业。（撒母耳记下16:1-4）最终大卫有机会向米非波设了解情况，知道自己误会咗佢，就将部分财产俾翻佢。（撒母耳记下19:24-29）但系，如果大卫先查明实情，而唔系根据片面之词鲁莽行事，就唔会发生呢件唔公正嘅事。

12,13． （甲）耶稣遭受诋毁嗰时点样做呢？（乙）如果有人散播同我哋有关嘅谣言，我哋可以点样做？

¹² 你有冇试过俾人诋毁？耶稣同施浸者约翰都有过噉样嘅经历。（请读马太福音11:18,19）耶稣点样做呢？佢冇将所有时间同精力都用嚟为自己辩护，反而鼓励民众睇清事实，留意佢嘅言行同教导。正如耶稣所讲，“智慧系由行为嚟证实嘅”。（马太福音11:19）

¹³ 我哋可以从耶稣身上学到宝贵嘅一课。有时，其他人可能会无理噉指责或者批评我哋，甚至诋毁我哋，使我哋名声受损。我哋可以点做呢？如果有人散播同我哋有关嘅谣言，我哋就要用自己嘅生活方式证明佢哋所讲嘅唔系事实。的确，就好似耶稣立下嘅榜样噉，如果我哋为人正直，嗰啲半真半假嘅话同错误嘅指控就会不攻自破。

14,15． 点解我哋唔应该过度自信？

¹⁴ 我哋每个人都唔完美，同埋唔容易得到可靠嘅资讯，呢啲因素都使我哋好难作出正确嘅判断。如果我哋已经忠贞事奉耶和华好多年，系咪就可以信靠自己嘅经验呢？我哋可能已经培养咗良好嘅思考力同辨识力，亦都可能因为有良好嘅判断力而受人敬重。但系，呢啲优点会唔会成为我哋嘅绊脚石呢？

¹⁵ 事实上，如果我哋变得过度自信，我哋嘅情感同个人谂法可能就会影响我哋嘅思维模式。可能我哋未了解事情嘅全貌，就以为自己已经明白一切。噉样做的确好危险！圣经清楚提醒我哋，唔好依靠自己嘅聪明。（箴言3:5,6； 28:26）

16． 喺以上假设嘅事例中，发生乜嘢事？汤姆当时作咗乜嘢结论？

¹⁶ 请想象以下嘅情况。汤姆系一 个有经验嘅长老。有一晚，佢喺一个餐厅见到另一个长老约翰同一个女子一齐食饭。汤姆见佢哋有讲有笑，又拥抱，睇起嚟好亲密，就觉得好愕然。佢心谂：“如果俾约翰嘅太太知道，会点样呢？佢哋会唔会离婚？佢哋嘅仔女点算呢？” 汤姆曾经见过类似嘅事情发生，结果都系妻离子散，所以佢越谂就越唔安乐。如果换转系你，又会点谂呢？

17． 汤姆后来知道乜嘢事实？我哋从中学到乜嘢？

¹⁷ 不过要先谂吓，汤姆咁快就断定约翰对太太不忠，佢系咪已经全面了解事实？就喺当晚，汤姆打电话俾约翰问清楚呢件事。原来嗰个女子系约翰嘅亲妹，两兄妹已经好耐冇见过面。因为妹妹住喺另一个城市，今次啱啱好经过呢度，只会逗留几个钟，所以约翰只可以同佢见吓面，简单食餐饭。不过由于某啲原因，约翰嘅太太冇办法同佢哋一齐。汤姆知道真相之后觉得好安心，亦都庆幸自己冇将内心嘅猜测同其他人讲。我哋从中学到乜嘢？就算我哋成为基督徒已经好多年，都唔能够单凭经验行事，因为我哋嘅经验代替唔到事实。

18． 我哋同其他人喺性格上有冲突，可能会点样影响我哋嘅判断力？

¹⁸ 我哋同弟兄姊妹喺性格上有冲突，可能会妨碍我哋对事情作出正确嘅判断。如果我哋只系一味留意彼此嘅差异，就会用怀疑嘅眼光嚟睇弟兄姊妹。噉样，我哋可能会轻信嗰啲关于弟兄姊妹嘅负面消息。从呢一点我哋学到乜嘢呢？如果我哋对弟兄姊妹心怀怨恨，可能未了解事情嘅全貌就对佢哋妄加判断。（提摩太前书6:4,5）我哋要小心，唔好俾嫉妒控制我哋嘅头脑，以致失去判断力。愿我哋时刻紧记，耶和华希望我哋关爱弟兄姊妹，并甘心宽恕佢哋。（请读歌罗西书3:12-14）

19,20． （甲）乜嘢圣经原则有助于我哋辨别资讯嘅真确性？（乙）你决心点样做？

¹⁹ 今日，呢个世界充斥住好多劣质同失实嘅报道，加上我哋都唔完美，所以我哋想获取可靠嘅信息并作出正确嘅判断，一啲都唔容易。乜嘢可以帮助我哋？就系要明白并实践圣经原则。其中嘅原则包括：未全面了解事实就下定论系自招羞辱嘅愚蠢行为；（箴言18:13）凡事都唔好未经查证就信以为真；（箴言14:15）无论我哋事奉耶和华几长时间，都唔应该依靠自己嘅聪明。（箴言3:5,6）如果我哋通过可靠嘅渠道嚟获取资讯，然后以此作出良好嘅判断同明智嘅决定，噉我哋就系运用圣经原则嚟保护自己嘞。

²⁰ 但系，仲有一个因素令我哋好难睇清事实，就系我哋好容易只凭眼见就作判断。下一篇课文会分析，我哋喺边啲方面可能会犯呢个错误，同埋可以点样避免。