1. Ezayi ye kiraya kuma juman lo sɛbɛ Yezu koo la? Mun na o b’an hakili sigi?

EZAYI ye kiraya kuma min sɛbɛ Yezu koo la, o b’an hakili sigi ani ka jigiya di an ma. A tun kɔnna k’a fɔ ko Yezu “tena kiti tigɛ ka kɛɲɛ n’a ɲaa ka yeta ye. A tena koo latigɛ ka kɛɲɛ n’a tulo ka mɛnta ye. A bena dɛsɛbagatɔw ka kiti tigɛ tilenninya la.” (Ezayi 11:3, 4). Mun na o b’an hakili sigi? O b’an hakili sigi sabu wolomani ka ca duniɲa kɔnɔ ani mɔgɔw be ni miiriya tilenbaliw ye u mɔgɔɲɔgɔnw koo la. O kama, an mako be Kititigɛla dafanin na min ye Yezu ye. A ɲɛɛ be min ye, a tɛna kiti tigɛ ka kɛɲɛ n’o dama ye abada!

2. Yezu ye cikan juman lo di an ma? An bena mun lo lajɛ barokun nin na?

² Loon o loon, an be koo dɔw miiri tɔɔw koo la. Nka, komi an tɛ mɔgɔ dafaninw ye i ko Yezu, an be min miiri mɔgɔw koo la, o bɛnnin tɛ tuma bɛɛ. An be min ye, o ka teli ka nɔɔ to an kan. O kama, tuma min na Yezu tun be dugukolo kan, a ye cikan di ko: “Aw kana koo yeta dama filɛ ka mɔgɔ jalaki. Nga, aw k’o kɛ ni tilenninya ye.” (Zan 7:24). A gwɛnin lo ko Yezu b’a fɛ an k’ale ladegi ani an kana an ka miiriyaw basigi koo yetaw dama kan. Adamadenw ka teli ka basigi koo nunu kan  ka kɛ ni miiriya dɔw ye u mɔgɔɲɔgɔnw koo la: mɔgɔ ka siya, nafolotiya wala fantanya ani mɔgɔ sanda. An bena o koo saba lo lajɛ barokun nin na. O koo kelen kelen bɛɛ la, an bena a filɛ an be se ka Yezu ka cikan sira tagama cogo tigitigi min na.

3, 4. a) Mun lo ye ciden Piyɛri lasun k’a ka miiriya yɛlɛma siya wɛrɛ mɔgɔw koo la? (Jaa lajɛ, barokun daminɛ na.) b) Jehova ye Piyɛri dɛmɛ ka faamuyali kura juman lo sɔrɔ?

³ Kɔrinɛyi tun tɛ Yahutu ye. Nka, Ala y’a ɲini Piyɛri fɛ a ka taga bɔ o cɛɛ ye Sezare. Miiri k’a filɛ o ye min kɛ Piyɛri la (Kɛw. 10:17-29). Piyɛri tun b’a miiri kabi a denmisɛn tuma ko minw tɛ Yahutuw ye, olu nɔgɔnin lo. A ka wagati la, Yahutu tɔɔw tun b’o lo miiri fana. Nka, koo dɔw y’a to Piyɛri y’a ka miiriya yɛlɛma. Ɲɛyirali fɛ, Ala ye yelifɛn dɔ yira a la (Kɛw. 10:9-16). A tun ye mun lo ye o yelifɛn kɔnɔ do? A ye fɛɛn dɔ jigitɔ ye ka bɔ sankolo la. O fɛɛn tun bɔnin be fani belebeleba ma ani bɛgɛnw ni kongosogo caaman tun b’a kɔnɔ. U tun saniyanin tɛ. O kɔ, a ye kumakan dɔ mɛn ka bɔ sankolo la ko: “Piyɛri, wili ka nunu dɔ faga k’a ɲimi.” Piyɛri banna. O kɔ, o kumakan y’a fɔ a ye ko: “Ala ye fɛɛn min saniya, i kan’a fɔ k’o ma ɲi ka dumu.” O yelifɛn kɔ, Piyɛri tun m’a lɔn o kuma kɔrɔ ye min ye. Dɔɔni o kɔ, Kɔrinɛyi ka ciradenw sera. Piyɛri tun ka ɲi ka min kɛ, hakili senu y’o yira a la. O kama, Piyɛri teliyara ka tugu Kɔrinɛyi ka ciradenw kɔ.

⁴ Piyɛri tun be min miiri tɔɔw koo la, n’a tun b’o basigi koo yetaw dama kan, a tun tɛna taga Kɔrinɛyi ka soo abada! Mun na do? Sabu Yahutuw tun tɛ sɔn ka taga siya wɛrɛ mɔgɔw ka soo. N’o lo, mun na Piyɛri tagara Kɔrinɛyi ka soo hali k’a sɔrɔ a tun be ni miiriya tilenbaliw ye siya wɛrɛ mɔgɔw koo la? Komi Piyɛri ye yelifɛn ye ani hakili senu y’a yira a la a ka ɲi ka min kɛ, o lo y’a ka miiriya yɛlɛma. Piyɛri y’a tulo malɔ ka Kɔrinɛyi lamɛn. O kɔ, hakili senu ye Piyɛri lasun a y’a fɔ ko: “Ne y’a lɔn sisan ko Ala te mɔgɔ bɔ mɔgɔ la, i mana kɛ siya o siya ye, n’i be siran Ala ɲa ka to ka tilenninyakow kɛ, i koo be diya a ye.” (Kɛw. 10:34, 35). O faamuyali kura ye Piyɛri dusu diya kosɔbɛ ani a tun bena nɔɔ to kerecɛnw bɛɛ kan! Cogo di do?

5. a) Jehova b’a fɛ kerecɛnw bɛɛ ka mun lo faamu? b) Hali n’an be tiɲɛn sira kan, an bele be se ka kɛ ni miiriya jumanw lo ye?

⁵ Piyɛri sababu fɛ, Jehova ye kerecɛnw bɛɛ dɛmɛ k’a faamu ko ale tɛ mɔgɔ bɔ mɔgɔ la. An ka siya, an bɔyɔrɔ ani an ka siyakan mana kɛ min o min ye, Jehova t’o lo jati. Nka, mɔgɔ o mɔgɔ be siran a ɲɛ ani ka koo ɲuman kɛ, o tigi lo koo ka di a ye (Gal. 3:26-28; Yir. 7:9, 10). N’a sɔrɔ i b’o kala ma ka ban. Nka, n’i lamɔna denbaya dɔ kɔnɔ wala jamana dɔ la, yɔrɔ min na mɔgɔw be ni miiriya tilenbaliw ye tɔɔw koo la do? N’a sɔrɔ i b’a miiri ko i tɛ mɔgɔ bɔ mɔgɔ la. Nka, a be se ka kɛ ko i bele be ni miiriya tilenbaliw ye mɔgɔ dɔw koo la. Hali Piyɛri yɛrɛ bele tun be ni miiriya tilenbaliw ye siya wɛrɛ mɔgɔw koo la. A do tun ye nɛɛma sɔrɔ ka mɔgɔw dɛmɛ k’a faamu ko Jehova tɛ mɔgɔ woloma (Gal. 2:11-14). Yezu ye cikan min di ko an kana koo yeta dama filɛ ka mɔgɔ jalaki, an be se k’o sira tagama cogo di?

6. a) Mun lo be se k’an dɛmɛ ka miiriya tilenbaliw bɔ an kɔnɔ? b) Balimacɛ dɔ ye min sɛbɛ a ka rapɔɔri kɔnɔ, o be mun lo yira?

⁶ An ka ɲi ka basigi Ala ka Kuma kan k’an yɛrɛ sɛgɛsɛgɛ koɲuman walisa k’a lɔn n’an bele be ni miiriya tilenbali dɔw ye (Zab. 119:105). An fana be se k’an teri sɔbɛ dɔ ɲininga n’a y’a kɔrɔsi ko an be  ni miiriya tilenbaliw ye. Mun na an ka ɲi k’o kɛ do? Sabu a be se ka kɛ ko an be ni miiriya tilenbaliw ye ani an t’o kala ma (Gal. 2:11, 14). N’a sɔrɔ an delila o miiricogo la fɔɔ an t’o jati miiriya tilenbaliw ye tugun. Ɲɛyirali fɛ, balimacɛ dɔ be ni kunkanbaaraw ye ani a ye rapɔɔri sɛbɛ furuɲɔgɔn dɔw koo la k’a ci Betɛli ma. Mɔgɔw fanba tun be cɛman ka siya mafiɲɛya. A be komi o balimacɛ tun t’a kala ma ko ale yɛrɛ tun be ni miiriya tilenbaliw ye o siya koo la. A ka rapɔɔri kɔnɔ, a ye cɛman tɔgɔ ɲuman fɔ siɲɛ caaman. Nka, a y’a ka rapɔɔri kuncɛ ko: “Hali n’a ye [o siyamɔgɔ dɔ ye], a ka koow kɛcogo n’a ka ɲɛnamaya kɛcogo be tɔɔw dɛmɛ u k’a faamu ko hali n’i ye [o siyamɔgɔ dɔ ye], waajibi tɛ i ka kɛ mɔgɔ nɔgɔnin ani mɔgɔ gwansan ye i k’o siyamɔgɔw fanba be cogo min na.” O koo b’an dɛmɛ ka mun lo faamu? Kunkanbaara fɛɛn o fɛɛn kalifara an ma, an ka ɲi k’an yɛrɛ sɛgɛsɛgɛ koɲuman ani ka sɔn mɔgɔ wɛrɛ k’an dɛmɛ k’a lɔn miiriya tilenbali minw bele b’an kɔnɔ. An be se ka mun lo kɛ tugun?

7. An be se k’a yira cogo di ko an b’an balimaw kanu kosɔbɛ?

⁷ N’an b’an balimaw kanu kosɔbɛ, miiriya tilenbaliw tɛna sigiyɔrɔ sɔrɔ an kɔnɔ (2 Kor. 6:11-13). E ni minw ye siya kelen ye, e ni minw be bɔ jamana kelen na wala i be kaan kelen fɔ ni minw ye, yala i ka teli ka teriya kɛ n’olu dɔrɔn lo ye wa? N’o lo, a ɲini ka wagati kɛ ni mɔgɔ wɛrɛw ye fana. E ni balima minw bɔyɔrɔ tɛ kelen ye, i be se k’u weele aw be waajuli kɛ ɲɔgɔn fɛ. I be se fana k’u weele ka na dumuni kɛ wala ka ɲɛnagwɛ i ka soo (Kɛw. 16:14, 15). N’i y’o kɛ, i bena u kanu kosɔbɛ fɔɔ miiriya tilenbaliw tɛna sigiyɔrɔ sɔrɔ i kɔnɔ. An ka teli ka basigi koo yeta wɛrɛ juman kan ka kɛ ni miiriya tilenbali dɔw ye tɔɔw koo la? Sisan, an ka kuma nafolotigiya wala fantanya koo la.

8. Ka kɛɲɛ ni Levitiki 19:15 ye, mɔgɔ ka nafolotigiya wala a ka fantanya be se k’an ka miiriyaw yɛlɛma cogo di o tigi koo la?

⁸ Mɔgɔ ka nafolotigiya wala a ka fantanya be se ka nɔɔ to an ka miiriyaw kan. Levitiki 19:15 b’a fɔ ko: “Aw kana ben mɔgɔ wɛrɛ kan ka fantan dɛmɛ cogo bɛnbali la a ka fantanya kosɔn. Aw kana tiɲɛ di faama ma a ka faamaya kosɔn. Aw ka kiti tigɛ ni tilenninya ye.” Mɔgɔ ka nafolotigiya wala a ka fantanya be se k’an ka miiriyaw yɛlɛma cogo di o tigi koo la?

9. Solomani ye tiɲɛn kuma jumanw lo sɛbɛ? O kumaw be mun lo yira an na?

⁹ Hakili senu ye Solomani lasun ka tiɲɛn kuma dɔw sɛbɛ adamaden dafabaliw koo la. A y’a fɔ Talenw 14:20 kɔnɔ ko: “Dɛsɛbagatɔ koo ka go, hali a tɔɲɔgɔn ye. Nga nafolotigi teriw kɔni ka ca.” O kumaw be mun lo yira an na do? U b’a yira ko n’an m’an yɛrɛ kɔrɔsi, balima minw ye nafolotigiw ye, an be se k’a ɲini ka teriya kɛ n’olu ye ani k’an mabɔ fantanw na. Mun na farati b’a la ka mɔgɔ jati ka kɛɲɛ n’a bololafɛnw dama ye?

10. Zaki ye kerecɛnw lasɔmi koo juman lo la?

¹⁰ N’an t’an balimaw minɛ cogo kelen na sabu u ye fantanw wala nafolotigiw ye, o be se ka na ni farali ye kafo kɔnɔ. Saan kɛmɛkulu fɔlɔ la, o kɛra kafo dɔw kɔnɔ ani Zaki ye kerecɛnw lasɔmi o koo la (Zaki 2:1-4 kalan). An t’a fɛ farali ka kɛ an ka kafo kɔnɔ. O la, an be se ka mun lo kɛ walisa an kana an balimaw minɛ ka kɛɲɛ n’u bololafɛnw ye?

11. Ni mɔgɔ ye fantan wala nafolotigi ye, yala o lo b’a yira ko a be jɛnɲɔgɔnya ɲuman kɛra ni Jehova ye wa? A ɲɛfɔ.

¹¹ An b’a fɛ k’an balimaw jati i ko  Jehova b’u jati cogo min na. Mɔgɔ koo tɛ diya Jehova ye kosɔbɛ sabu a tigi ye nafolotigi wala fantan ye. An tɛ jɛnɲɔgɔnya ɲuman kɛ ni Jehova ye sabu bololafɛnw ka ca an fɛ kosɔbɛ wala an ye fantan ye. Yezu y’a fɔ ko: “Nafolotigi donko ka gwɛlɛ sankolo masaya la.” Nka, a m’a fɔ ko nafolotigi tɛ se ka don sankolo Masaya la (Mat. 19:23). Yezu y’a fɔ fana ko: “Aw minw ye fantanw ye, aw dagamunin lo, bari Ala ka masaya y’aw ta ye.” (Luka 6:20). Nka, o kumaw kɔrɔ tɛ ko fantanw bɛɛ ye dugaba sɔrɔ ani ko u ye mɛnni kɛ Yezu fɛ. Fantan caaman yɛrɛ ma sɔn Yezu ka kalanw ma. O b’a yira ko an tɛ se k’a miiri ko mɔgɔ be jɛnɲɔgɔnya ɲuman kɛra ni Jehova ye sabu a ye fantan wala nafolotigi ye.

12. Bibulu be ladili jumanw lo di fantanw ni nafolotigiw ma?

¹² Nafolotigiw ni fantanw be yen Jehova sagokɛlaw cɛma. Nka, u bɛɛ be Jehova kanu ani u be baara kɛ a ye n’u dusukun bɛɛ ye. Bibulu b’a fɔ nafolotigiw ye ko “u kana u jigi la o fɛɛn tɛmɛta nunu [o kɔrɔ, nafolo] kan, nga u k’u jigi la Ala kan.” (1 Timote 6:17-19 kalan). Bibulu be Ala sagokɛlaw bɛɛ jija, fantanw fara nafolotigiw kan, ko u kana wari kanu (1 Tim. 6:9, 10). Tiɲɛn na, n’an b’an balimaw jati i ko Jehova b’u jati cogo min na, fɛɛn b’u fɛ wo, fɛɛn t’u fɛ wo, an tɛna basigi o dama kan k’u jati cogo dɔ la. Nka, u sanda do? Yala an ka ɲi ka basigi o kan k’u jati cogo dɔ la wa? An k’o lajɛ.

13. Bibulu be mun lo fɔ mɔgɔkɔrɔbaw minɛcogo koo la?

¹³ Bibulu b’a fɔ an ye siɲɛ caaman ko an ka mɔgɔkɔrɔbaw bonya. Levitiki 19:32 b’a fɔ ko: “Aw ka mɔgɔkɔrɔba jati, ka kunsigigwɛtigi boɲa. Aw ka siran ne, aw ka Ala ɲa fana.” Talenw 16:31 b’a fɔ fana ko: “Kunsigigwɛ ye kunkɔrɔtafɛn ye, [n’a] be sɔrɔ tilenninyasira le kan.” Ka fara o kan, Pol ye Timote ladi ko a kana kuma gwɛlɛ fɔ cɛkɔrɔba ma, nka, a k’a jati a facɛ ye (1 Tim. 5:1, 2). Hali ni Timote tun be ni kunkanbaara dɔw ye kafo kɔnɔ, a tun ka ɲi ka makari o mɔgɔkɔrɔbaw la ani k’u bonya.

14. Tuma juman na a bɛnnin lo an ka mɔgɔkɔrɔba dɔ ladi wala k’a kolo?

¹⁴ Nka, ni mɔgɔkɔrɔba dɔ tugura ka jurumu kɛ wala n’a ye koo dɔ kɛ min man di Jehova ye do? Ni mɔgɔ tugura ka jurumu kɛ, Jehova tɛna a ɲɛɛ tugu o kan sabu a tigi ye mɔgɔkɔrɔba ye ani a ka kan ni bonya ye. Sariyakolo min be sɔrɔ Ezayi 65:20 (NW) kɔnɔ, o b’an dɛmɛ k’a faamu ko “jurumukɛla bena jati mɔgɔ danganin ye, hali n’a sii sera saan kɛmɛ ma.” O sariyakolo ɲɔgɔn be sɔrɔ Ezekiyɛli ka yelifɛn na (Ezek. 9:5-7). Min kɔrɔtanin lo kosɔbɛ, o ye ka bonya la Jehova kan ale min ka kɔrɔ ni danfɛnw bɛɛ ye (Dan. 7:9, 10, 13, 14). O la, n’a bɛnnin lo, an tɛna siran ka mɔgɔ dɔ ladi wala k’a kolo, a tigi sanda mana kɛ min o min ye.—Gal. 6:1.

15. Ciden Pol b’an dɛmɛ cogo di k’a faamu ko kanbelew ka kan ni bonya ye?

¹⁵ Nka kanbele minw be kafo kɔnɔ do? Olu man kan ni bonya ye wa? U ka kan ni bonya ye. Ciden Pol ye lɛtɛrɛ dɔ sɛbɛ Timote ma ko: “Kan’a to mɔgɔ si k’i dɔgɔya i ka denmisɛnya kama, nga siraɲuman yira u la, i ka kumacogo, n’i ka taamacogo fɛ, i ka mɔgɔ kanucogo, n’i ka lanaya, an’i ka senuya fɛ.” (1 Tim. 4:12). Tuma min na Pol y’o lɛtɛrɛ ci Timote ma, n’a sɔrɔ Timote tun be ni saan 30 ɲɔgɔn lo ye. O n’a ta bɛɛ, Pol tun ye kunkanbaarabaw kalifa a ma. An m’a  lɔn fɛɛn min kama a y’o ladili di Timote ma. Nka a mana kɛ min o min ye, a ka kumaw b’a yira ka gwɛ ko an man ɲi ka kanbelew mafiɲɛya u sanda kosɔn. Miiri k’a filɛ Yezu sera ka min bɛɛ kɛ a ka cidenya baara la, k’a sɔrɔ a sii tun ma tɛmɛ saan 33 kan.

16, 17. a) Diinan mɔgɔkɔrɔw b’a latigɛ cogo di ni balimacɛ dɔ be saratiw dafa ka kɛ kɔrɔsigi ciden wala diinan mɔgɔkɔrɔ ye? b) Cogo juman na an ka miiriya ani jamana ka landakow be se ka Bibulu ka fɔta sɔsɔ?

¹⁶ Jamana dɔw la, mɔgɔw tɛ bonya la kanbelew kan. O kama, diinan mɔgɔkɔrɔ dɔw t’a fɛ kanbelew ka kɛ kɔrɔsigi cidenw wala diinan mɔgɔkɔrɔw ye hali n’u be saratiw dafa. Yala mɔgɔ ka ɲi ka kɛ ni sanda dɔ ye ka sɔrɔ ka kɛ kɔrɔsigi ciden wala diinan mɔgɔkɔrɔ ye wa? Diinan mɔgɔkɔrɔw ka ɲi k’a to u hakili la ko Bibulu t’o fɔ (1 Tim. 3:1-10, 12, 13; Titi 1:5-9). Ni diinan mɔgɔkɔrɔ dɔ ye sariya sigi o koo la ka kɛɲɛ ni jamana ka landakow ye, a tɛ Bibulu ka sariyaw labatora. Diinan mɔgɔkɔrɔw ka ɲi ka basigi Bibulu ka sariyaw lo kan k’a filɛ ni kanbelew be saratiw dafa. Nka, u man ɲi ka basigi u yɛrɛ ka miiriya wala u ka jamana ka landakow kan.—2 Tim. 3:16, 17.

¹⁷ Ni diinan mɔgɔkɔrɔw tɛ basigi Bibulu ka sariyaw kan, u be se ka balimacɛw bali u ka kɛ kɔrɔsigi cidenw wala diinan mɔgɔkɔrɔw ye hali k’a sɔrɔ u be saratiw dafa. Jamana dɔ la, kunkanbaaraba tun kalifara kɔrɔsigi ciden setigi dɔ ma. Diinan mɔgɔkɔrɔw yɛrɛ tun sɔnna a ma ko a be Bibulu ka saratiw dafa. Nka, u m’a tɔgɔ di walisa a ka kɛ diinan mɔgɔkɔrɔ ye. Mun na do? Sabu diinan mɔgɔkɔrɔ dɔw ka miiriya la, a ye denmisɛn ye halibi. A be komi mɔgɔ caaman be ni o miiriya ɲɔgɔn ye yɔrɔ caaman na duniɲa kɔnɔ. O kama, a kɔrɔtanin lo kosɔbɛ an ka basigi Bibulu kan sanni ka basigi an yɛrɛ ka miiriya wala jamana ka landakow kan. O la, an bena Yezu ka cikan labato ani an tɛna basigi koo yetaw dama kan ka mɔgɔ jalaki.

18, 19. Mun lo bena an dɛmɛ k’an balimaw jati i ko Jehova b’u jati cogo min na?

¹⁸ Jehova tɛ mɔgɔ bɔ mɔgɔ la. Hali n’an ye mɔgɔ dafabaliw ye, an be se ka tɔɔw jati i ko Jehova b’u jati cogo min na (Kɛw. 10:34, 35). O kama, Ala ka ladili minw be sɔrɔ a ka Kuma kɔnɔ, an k’an janto u la tuma bɛɛ. N’an b’o ladiliw sira tagama, an bena se ka Yezu ka cikan nin labato: “Aw kana koo yeta dama filɛ ka mɔgɔ jalaki.”—Zan 7:24.

¹⁹ Yanni dɔɔni, an ka Masacɛ Yezu Krista bena kiti tigɛ adamadenw bɛɛ kan cogo tilennin na. A ɲɛɛ be min ye ani a tulo be min mɛn, a tɛna kiti tigɛ ka kɛɲɛ n’o ye (Ezayi 11:3, 4). O wagati bena diya yɛrɛ le!