1. Etɛ Ezayíi ka ɖɔ ɖ’ayǐ dó Jezu wu? Etɛwu xó enɛ ka dó wusyɛn lanmɛ nú mɛ?

EZAYÍI gbɔn nǔɖɔɖ’ayǐ e é wlan dó Aklunɔ mǐtɔn Jezu Klisu wu é jí, bo dó wusyɛn lanmɛ nú mǐ, lobo lɛ́ vɔ́ jiɖe na mǐ. Ezayíi ɖɔ ɖ’ayǐ ɖɔ Jezu kún na “kpɔ́n lee è ɖè ɔ dó ɖɔhwɛ xá mɛ [ó],” lé “é ko sè xó ɖé kpowun ɔ, é [kún] nɔ zé dó ɖɔhwɛ [ó].” É na “dó hwɛjijɔ nú wamamɔnɔ.” (Eza. 11:3, 4) Etɛwu xó enɛ ka dó wusyɛn lanmɛ nú mɛ? Ðó mǐ ɖò gbɛ̀ e mɛ mɛ ɖiɖe ɖó vo kpo linlin agɔ ɖiɖó dó mɛ wu kpo gɔ́ é ɖé mɛ wutu. Mǐ bǐ jló tawun bo na ɖó Hwɛɖɔtɔ́ e nǔ bǐ vɔ ɖ’ewu, bɔ é ma na zɔn dó nǔ e ɖò wěxo é jí bo dá hwɛ nú mǐ gbeɖé ǎ é.

2. Etɛ Jezu ka ɖegbe nú mǐ ɖɔ mǐ ni wà? Etɛ jí mǐ ka na ɖɔ xó dó ɖò xota elɔ mɛ?

² Ayihɔngbe ayihɔngbe wɛ mǐ nɔ mɔ xó ɖɔ dó mɛ ɖevo lɛ wu. Amɔ̌, ɖó mǐ nyí gbɛtɔ́ hwɛhutɔ́ wutu ɔ, mǐ nɔ kpéwú bo nɔ ɖɔ xó dó ye wu ɖò ali e sɔgbe é nu Jezu ɖɔhun ǎ. Nǔ e nukún mǐtɔn lɛ mɔ é nɔ jló na wà nǔ dó mǐ wu. Amɔ̌, hwenu e Jezu ɖò ayikúngban jí é ɔ, é ɖegbe nú mǐ ɖɔ: “Mi ni ma nɔ zɔn dó nǔ e ɖò wěxo é jí dó dá hwɛ ó, loɔ, mi ni nɔ ɖɔ hwɛ jlɔjlɔ.” (Jaan 7:24) É ɖò wɛn ɖɔ Jezu jló ɖɔ mǐ ni cí emi ɖɔhun bo ma nɔ zɔn dó nǔ e nukún mǐtɔn lɛ mɔ é wu, bo dá hwɛ nú mɛ ɖevo lɛ ó. Ðò xota elɔ mɛ ɔ, mǐ na ɖɔ xó dó nǔ e ɖò  wěxo bɔ gbɛtɔ́ lɛ nɔ zɔn d’eji dó dá hwɛ nú mɛ é atɔn jí, ye wɛ nyí: sinmɛ agbaza tɔn alǒ akɔ, dɔkun kpo xwè kpo. Ðò akpáxwé lɛ ɖokpo ɖokpo mɛ ɔ, mǐ na gbéjé ali tawun tawun e nu mǐ na setónú nú Jezu ɖè lɛ é kpɔ́n.

3, 4. (a) Etɛ lɛ ka jɛ, bo zɔ́n bɔ mɛsɛ́dó Piyɛ́ɛ vɔ́ linlin e é ɖó dó mɛ e ma nyí Jwifu ǎ lɛ é wu é gbéjé kpɔ́n? (Kpɔ́n ɖiɖe e ɖò bǐbɛ̌mɛ é.) (b) Nugbǒ yɔyɔ̌ ɖevo tɛ Jehovah ka d’alɔ Piyɛ́ɛ bɔ é mɔ nukúnnú jɛ wu?

³ Dǒ nukún mɛ bo kpɔ́n linlin ɖěɖee na ko wá ayi mɛ nú Piyɛ́ɛ, hwenu e è ylɔ ɛ wá Kɔnɛyi e ma nyí Jwifu ǎ é xwégbe ɖò Sezalée é. (Mɛ. 10:17-29) Jwifu hwe ɔ nu tɔn lɛ ɖɔhun ɔ, Piyɛ́ɛ sù kpo linlin ɔ kpo ɖɔ mɛ e ma nyí Jwifu ǎ lɛ é nyí mɛ blíblí. Amɔ̌, nùɖé lɛ jɛ bo zɔ́n bɔ Piyɛ́ɛ vɔ́ linlin e é ɖó é gbéjé kpɔ́n. Ði kpɔ́ndéwú ɔ, Piyɛ́ɛ mɔ nǔmimɔ jiwǔ ɖé. (Mɛ. 10:9-16) Etɛ é ka mɔ? É mɔ nǔ avɔ ɖaxó ɖɔhun ɖé gosin jǐ wá dò ɖò nukɔn tɔn, bɔ kanlin blíblí lɛ gɔ́ mɛ, b’ɛ sè gbè ɖé sín jixwé ɖɔ: “Piyɛ́ɛ! Site, hu, bo ɖu.” Azɔn atɔn wɛ Piyɛ́ɛ gbɛ́ dó nùjɔnǔ mɛ. Nú é vɛ́ ko gbɛ́ ɔ, gbè ɔ nɔ gosin jixwé bo nɔ ɖɔ n’i ɖɔ “nǔ e Mawu ɖɔ è hɛn ɔ, è na ɖu ɔ, hwɛ ma ɖɔ é vɛ́ mɛ ó.” Ee Piyɛ́ɛ fɔ́n gudo é ɔ, nǔ e gbè ɔ ɖò tintɛnkpɔn wɛ bo na ɖɔ n’i é bú vo d’è. Enɛ gudo tlolo ɔ, mɛ e Kɔnɛyi sɛ́dó lɛ é wá. Ee gbigbɔ mímɛ́ xlɛ́ ali Piyɛ́ɛ gudo é ɔ, é hwlɛndo bo xwedó mɛ e è sɛ́dó lɛ é yì Kɔnɛyi xwé.

⁴ Enyi Piyɛ́ɛ ko zɔn dó nǔ e ɖò wěxo é jí bo na dá hwɛ nú Kɔnɛyi wɛ ɔ, é na byɔ xwé tɔn gbè gbeɖé ǎ. Jwifu lɛ nɔ byɔ mɛ e ma nyí Jwifu ǎ lɛ é xwé ǎ kpowun bɔ xó fó. Piyɛ́ɛ ɖó linlin agɔ e jinjɔn ayǐ ɖò ayi tɔn mɛ lɛ é có, etɛwu é ka hwlɛndo bo xwedó mɛ lɛ yì Kɔnɛyi xwé? Nǔmimɔ e Piyɛ́ɛ mɔ é kpo ganjɛwu e gbigbɔ mímɛ́ na ɛ é kpo wà ɖagbe n’i tawun. Ee Piyɛ́ɛ ɖótó nǔ e Kɔnɛyi ɖɔ é gudo é ɔ, é ɖò wɛn ɖɔ tan ɔ sɔ́ akpàkpà ɛ, bɔ é ɖɔ xó elɔ lɛ e gbigbɔ mímɛ́ sɔ́ dó ayi mɛ n’i é: “Un mɔ dìn nugbǒ ɖɔ Mawu kún nɔ ɖè mɛɖé ɖó vo ɖò mɛɖé mɛ ó. Loɔ, ɖò akɔta ɖebǔ mɛ ɔ, mɛ e nɔ ɖó sísí n’i, bo nɔ xwedó hwɛjijɔ ɔ, mɛ enɛ sín nǔ nɔ nyɔ́ nukún tɔn mɛ.” (Mɛ. 10:34, 35) Nukúnnúmɔjɛnǔmɛ yɔyɔ̌ e Piyɛ́ɛ ɖó é sɔ́ akpàkpà ɛ tawun, bo ka lɛ́ hɛn nyɔna e è ma sixu jlɛ́ ǎ lɛ é wá. Nɛ̌ nugbǒ enɛ e kúnkplá mɛmaɖeɖóvo é ka na wà ɖagbe nú Klisanwun lɛ bǐ gbɔn?

5. (a) Etɛ wu Jehovah ka ba ɖɔ Klisanwun lɛ bǐ ni mɔ nukúnnú jɛ? (b) Mǐ ko tuùn nugbǒ ɔ có, etɛ ka sixu nɔ ma ko vɔ sín ayi mǐtɔn mɛ?

⁵ Jehovah gbɔn Piyɛ́ɛ jí bo d’alɔ Klisanwun lɛ bǐ nú ye ni mɔ nukúnnú jɛ wu ɖɔ Emi kún nɔ ɖè mɛɖé ɖó vo ɖò mɛɖé mɛ ó. É nɔ sɔ́ ayi ɖó vogbingbɔn e ɖò sinmɛ agbaza tɔn, akɔ tɔn, tò tɔn, hɛnnu tɔn alǒ gbè lɛ tɔn mɛ é jí ǎ. Sunnu alǒ nyɔnu ɖebǔ e nɔ ɖó sísí nú Mawu lobo nɔ xwedó hwɛjijɔ é sín nǔ nɔ nyɔ́ nukún tɔn mɛ. (Ga. 3:26-28; Nǔɖe. 7:9, 10) É ɖò wɛn ɖɔ a tuùn ɖɔ xó enɛ nyí nugbǒ. Amɔ̌, nú a ka sù ɖò tò ɖé mɛ, abǐ xwé ɖé gbè bɔ è nɔ ɖó linlin agɔ dó mɛ ɖevo lɛ wu ɔ ka lo? A sixu mɔ ɖɔ emi kún nɔ ɖè mɛɖé ɖó vo ɖò mɛɖé mɛ ó, amɔ̌, ɖò ayi gɔngɔn towe mɛ ɔ, linlin agɔ ɖiɖó dó mɛ ɖevo lɛ wu ka ko vɔ bǐ ǎ. Piyɛ́ɛ e è jɔwu bɔ é xlɛ́ lee Jehovah ma nɔ ɖè mɛɖé ɖó vo ɖò mɛɖé mɛ ǎ gbɔn é tlɛ wá ɖó linlin agɔ dó mɛ ɖevo lɛ wu ɖò nukɔnmɛ. (Ga. 2:11-14) Nɛ̌ mǐ ka sixu ɖótó Jezu, bo ɖó nǔ e ɖò wěxo é wu jí zinzɔn dó dó dá hwɛ nú mɛ ɖevo lɛ te gbɔn?

6. (a) Etɛ ka sixu d’alɔ mǐ bɔ mǐ na hɔn ɖɔ nú linlin agɔ ɖiɖó dó mɛ ɖevo lɛ wu sín ayi mǐtɔn mɛ? (b) Etɛ gbeɖiɖó nɔví sunnu agbanɖotananɔ ɖé tɔn ka xlɛ́?

⁶ Mǐ na zán Xó Mawu tɔn bo na gbéjé mǐɖée kpɔ́n ganji, bo na kpɔ́n ɖɔ linlin agɔ alɔkpa ɖebǔ ɖiɖó dó mɛ ɖevo lɛ wu kpó ɖò ayi mǐtɔn mɛ vlafo à jí. (Ðɛh. 119:105) Mǐ sixu lɛ́ ɖó hudo alɔdo e kpé é tɔn sín mɛ ɖěɖee ɖó ayi wu ɖɔ mǐ ɖó linlin agɔ dó mɛ ɖevo lɛ wu é gɔ́n; mǐdɛɛ lɛ ka tlɛ sixu nɔ ma ɖó ayi wu ɖɔ nǔ nyí mɔ̌. (Ga. 2:11, 14) Bɔya  linlin mɔhunkɔtɔn lɛ ko dó ɖɔ dò tawun ɖò ayi mǐtɔn mɛ bɔ mǐ ɖó ayi wu ǎ. Ði kpɔ́ndéwú ɔ, nɔví sunnu agbanɖotananɔ ɖé ɖò azɔ̌ e asú kpo asì kpo e ɖó walɔ ɖagbe bo ɖò sinsɛnzɔ́ hwebǐnu tɔn mɛ é ɖé wà é sín gbè ɖó wɛ. Asú ɔ gosin akɔ e mɛ lɛ nɔ yawu sɔ́ nukún kpɛví dó kpɔ́n é ɖé mɛ. É cí ɖɔ nɔví sunnu agbanɖotananɔ e ɖò gbè ɔ ɖó wɛ é ɖesunɔ kún tuùn ɖɔ emi ɖó linlin agɔ dó akɔ mɔhun wu ó ɖɔhun. Ðò gbeɖiɖó tɔn mɛ ɔ, é ɖɔ nǔ ɖagbe gègě dó asú ɔ wu; bo ka wá sú ta na bo ɖɔ: “É gosin [akɔ enɛ] mɛ có, nǔwiwa tɔn lɛ kpo lee é nɔ zán gbɛ̀ tɔn gbɔn é kpo d’alɔ mɛ ɖevo lɛ bɔ ye mɔ nukúnnú jɛ wu ɖɔ è [gosin akɔ enɛ] mɛ kún xlɛ́ dandan ɖɔ è na nɔ blìblí jí, alǒ zán hɛntɔ́nɔgbɛ lee mɛ e gosin [akɔ enɛ] mɛ lɛ é gègě nɔ zán gbɛ̀ gbɔn é ɖɔhun ó.” A ka ɖó ayi nùkplɔnmɛ ɔ wu à? Mǐ na bo ɖó azɔ̌ ɖebǔ ɖò agun mɛ ɔ, mǐ ɖó na nɔ gbéjé mǐɖée kpɔ́n céɖécéɖé, lobo na ɖò gbesisɔmɛ bo na yí gbè nú alɔ e è na dó mǐ é, bonu mǐ na mɔ tɛn dó tuùn nú linlin agɔ kpɛví ɖé vɔ́vɔ́ ɖò ayi mǐtɔn mɛ à jí. Nǔ ɖevo tɛ mǐ ka sixu lɛ́ wà?

7. Nɛ̌ mǐ ka sixu xlɛ́ ɖɔ mǐ ɖó wanyiyi ɖaxó gbɔn?

⁷ Enyi mǐ ɖó wanyiyi ɖaxó ɔ, mǐ na na tɛn wanyiyi enɛ bɔ é na nɔ linlin agɔ ɖiɖó dó mɛ ɖevo lɛ wu sín tɛnmɛ. (2 Kɔ. 6:11-13) A ɖó aca bo nɔ dó gbɛ̌ xá mɛ ɖěɖee ɖó sinmɛ agbaza tɔn ɖokpo ɔ, gosin akɔ ɖokpo ɔ mɛ, tò ɖokpo ɔ mɛ, hɛn ɖokpo ɔ nu, alǒ nɔ dó gbè ɖokpo ɔ hwi ɖɔhun lɛ é kɛɖɛ wɛ à? Nǔ nyí mɔ̌ hǔn, ɖǒ wanyiyi ɖaxó. Etɛwu a ma ka na ylɔ mɛ ɖěɖee gosin ninɔmɛ ɖevo lɛ mɛ lɛ é bɔ ye na w’azɔ̌ xá we ɖò sinsɛnzɔ́ ɔ mɛ, alǒ ylɔ ye bonu ye ni wá ɖu nǔ alǒ nɔ kpɔ́ xá we ɖò xwé towe gbè ǎ? (Mɛ. 16:14, 15) Enyi a bló mɔ̌ ɔ, wanyiyi na gɔ́ ayi towe mɛ kaka bɔ linlin agɔ ɖiɖó dó mɛ ɖevo lɛ wu sɔ́ na mɔ tɛn ɖò ayi towe mɛ ǎ. Amɔ̌, ali ɖevo lɛ nu tíìn bɔ mǐ nɔ jló na zɔn dó nǔ e ɖò wěxo lɛ é wu dó ɖó hwɛ nú mɛ ɖevo lɛ ɖè. Mi nú mǐ ni ɖɔ xó dó dɔkun jijɛ wu.

8. Sɔgbe xá Levíi ví lɛ 19:15 ɔ, nɛ̌ dɔkun e mɛɖé jɛ é, alǒ wamamɔnɔ e mɛɖé nyí é ka sixu wà nǔ dó nukún e mǐ nɔ sɔ́ dó kpɔ́n ɛ na é wu gbɔn?

⁸ Dɔkun jijɛ nyí nǔ ɖevo e sixu wà nǔ dó nukún e mǐ nɔ sɔ́ dó kpɔ́n mɛ ɖevo lɛ na é wu é. Levíi ví lɛ 19:15 ɖɔ: “Mi ɖò hwɛ ɖɔ wɛ hǔn, mi ma kpɔ́n wamamɔnɔ nukúnta dó ɖɔhwɛ ó, mi ma ka kpɔ́n dɔkunnɔ nukúnta dó ɖɔhwɛ ó. Mi xwedó hwɛjijɔ dó ɖɔhwɛ.” Amɔ̌, nɛ̌ dɔkun e mɛɖé jɛ é, alǒ wamamɔnɔ e mɛɖé nyí é ka sixu wà nǔ dó nukún e mǐ nɔ sɔ́ dó kpɔ́n ɛ na é wu gbɔn?

9. Nugbǒ e blawu é tɛ Salomɔ́ɔ ka wlan? Etɛ enɛ ka kplɔ́n mǐ?

⁹ Gbigbɔ mímɛ́ sísɛ́ Salomɔ́ɔ bɔ é wlan nugbǒ elɔ e blawu é dó gbɛtɔ́ hwɛhutɔ́ lɛ wu. Ðò Nùnywɛxó 14:20 mɛ ɔ, é ɖɔ: “Mɛ bǐ nɔ gbɛ́ wǎn nú wamamɔnɔ kaka jɛ mɛ tɔn lɛ jí; dɔkunnɔ sín xɔ́ntɔn lɛ ka nɔ sukpɔ́.” Etɛ nùnywɛxó enɛ ka kplɔ́n mǐ? Nú mǐ ma ɖò acéjí ǎ ɔ, mǐ sixu jló na dó gbɛ̌ xá nɔví e jɛ dɔkun lɛ é, lobo ka ɖó wǔ zɔ nú nɔví ɖěɖee nyí wamamɔnɔ lɛ é. Etɛwu é ka nyí awovinú ɖesu ɖɔ mǐ ni zɔn dó dɔkun e mɛ ɖevo lɛ ɖó é kɛɖɛ jí dó ɖɔ ɖɔ ye xɔ akwɛ?

10. Tagba tɛ xó Jaki ka ɖɔ?

¹⁰ Enyi mǐ nɔ zɔn dó dɔkun e nɔví lɛ jɛ é wu dó ɖó hwɛ nú ye ɔ, mǐ sixu dɔn kínklán wá agun ɔ mɛ. Ahwanvu Jaki gb’akpá nú mɛ ɖɔ tagba mɔhunkɔtɔn klán agun ɖé lɛ ɖò xwè kanweko nukɔntɔn ɔ mɛ. (Xà Jaki 2:1-4.) Mǐ ɖó na ɖò acéjí bo na na tɛn linlin mɔhun bɔ é na wà nǔ dó agun mǐtɔn lɛ wu ɖò égbé ǎ. Nɛ̌ mǐ ka sixu fun ahwan xá nǔ e ɖò wěxo é wu jí zinzɔn dó dó dá hwɛ nú mɛ gbɔn?

11. Nǔ e mɛɖé ɖókan é wɛ na zɔ́n bɔ é kpo Jehovah kpo na ɖó kancica ɖagbe à? Tinmɛ.

¹¹ Mǐ ɖó na nɔ kpɔ́n nɔví mǐtɔn lɛ lee Jehovah nɔ kpɔ́n ye gbɔn é. Mɛɖé nɔ xɔ akwɛ nú Jehovah ɖó é nyí dɔkunnɔ alǒ wamamɔnɔ wutu ǎ. Kancica e mǐ ɖó xá Jehovah é na sín  lě dò mǐ jɛ dɔkun sɔ, alǒ lee mǐ nyí wamamɔnɔ sɔ é wu gbeɖé ǎ. Nugbǒ wɛ ɖɔ Jezu ɖɔ ɖɔ “axɔsuɖuto [jixwé] tɔn mɛ byɔbyɔ na vɛwǔ nú dɔkunnɔ lɛ tlala,” amɔ̌, é ɖɔ ɖɔ ye kún na kpéwú ó ǎ. (Mat. 19:23) Ðò alɔ ɖevo mɛ ɔ, Jezu lɛ́ ɖɔ: “Nǔ nyɔ́ nú mi mɛ e nyí wamamɔnɔ lɛ, ɖó midɛɛ lɛ jí wɛ Mawu na ɖu axɔsu ɖè.” (Luk. 6:20) Amɔ̌, enɛ ko xlɛ́ ɖɔ wamamɔnɔ lɛ bǐ jí wɛ è kɔn nyɔna bunɔ ɖé dó bɔ ye yí gbè nú nùkplɔnmɛ Jezu tɔn ǎ. Wamamɔnɔ gègě gbɛ́ wɛn ɔ. Nùkplɔnmɛ ɔ wɛ nyí ɖɔ: Mǐ na kpɔ́n nǔɖokan mɛɖé tɔn kpowun bo zɔn d’ewu, bo ɖɔ ɖɔ kancica lě wɛ ɖò é kpo Jehovah kpo tɛntin ǎ.

12. Etɛ Mawuxówema ɔ ka kplɔ́n dɔkunnɔ kpo wamamɔnɔ kpo bǐ?

¹² Nyɔna ɖaxó wɛ é nyí ɖɔ mǐ ɖó nɔví sunnu kpo nɔví nyɔnu kpo gègě, dɔkunnɔ kpo wamamɔnɔ kpo, bɔ ye ka yí wǎn nú Jehovah bo nɔ sɛ̀n ɛ kpo ayi yetɔn bǐ kpo. Mawuxówema ɔ kplɔ́n nǔ mɛ ɖěɖee nyí dɔkunnɔ lɛ é ɖɔ “ye ma sɔ́ nukúnɖiɖo yetɔn ɖó dɔkun enɛ lɛ jí ó; ɖó è sixu ganjɛ dɔkun enɛ lɛ wu ǎ. Loɔ, ye ni sɔ́ nukúnɖiɖo yetɔn ɖó Mawu jí.” (Xà 1 Timɔtée 6:17-19.) Ðò hwe ɖokpo ɔ nu ɔ, Xó Mawu tɔn gb’akpá nú Mawu sɛntɔ́ lɛ bǐ, dɔkunnɔ kpo wamamɔnɔ kpo ɖɔ ye ni cɔ́ yeɖée dó wǎn yí nú akwɛ wu. (1 Tim. 6:9, 10) Nugbǒ ɔ, enyi mǐ hun nukún mǐtɔn lɛ, bo kpɔ́n nɔví mǐtɔn lɛ lee Jehovah nɔ kpɔ́n ye gbɔn é ɔ, mǐ na zɔn dó nǔ e ye ɖó alǒ ye ma ɖó ɖò agbaza lixo ǎ lɛ é jí kpowun dó dá hwɛ nú ye ǎ. Bɔ nǔ e kàn mɛɖé sín xwè é ka lo? É ka na nyɔ́ ɖɔ mǐ ni zɔn dó enɛ wu bo dá hwɛ nú mɛ ɖevo lɛ wɛ à? Mǐ ni kpɔ́n.

13. Etɛ Mawuxówema ɔ ka kplɔ́n mǐ dó sísí ɖiɖó nú mɛxomɔ lɛ wu?

¹³ Hwɛhwɛ wɛ Biblu nɔ kplɔ́n mǐ ɖɔ mǐ ni nɔ ɖó sísí nú mɛxomɔ lɛ lee é jɛxa gbɔn é. Levíi ví lɛ 19:32 ɖɔ: “Mi mɔ mɛxo, hwa ɖò ta ɔ, mi na nɔ site kpo sísí kpo. Mi na ɖó sísí nú nyɛ Mawu mitɔn.” Nùnywɛxó 16:31 kplɔ́n nǔ ɖokpo ɔ mǐ ɖɔ “jɛ̌gbakún ɖɛkpɛ tɔn ɖé wɛ hwa nyí, ɖò hwenu e mɛ e ta é ɖè é ɖò nǔjlɔjlɔwiwa li jí é.” [nwt] Pɔlu dó wusyɛn lanmɛ nú Timɔtée ɖɔ é ni ma nɔ sɔ́ gbè syɛnsyɛn dó gbɛ́ nǔ nú mɛxomɔ ɖé ó, loɔ, é ni nɔ kpɔ́n mɛxomɔ mɔhun dó mɔ tɔ́ ɖé. (1 Tim. 5:1, 2) Timɔtée ɖó acɛ dó nɔví mɛxomɔ lɛ jí ɖó bǎ ɖé mɛ có, é wà nǔ xá ye kpo wuvɛ̌sexámɛ kpo lobo lɛ́ ɖó sísí nú ye.

14. Ninɔmɛ tɛ mɛ é ka sɔgbe ɖɔ mǐ ni ɖè wě xá mɛ e nyí mɛxo hú mǐ é, alǒ gbɛ́ nǔ n’i ɖè?

¹⁴ Amɔ̌, bǎ tɛ mɛ mǐ ka ɖó na zán nugbodòdó enɛ ɖó? Ði kpɔ́ndéwú ɔ, enyi mɛxomɔ ɖé sɔ́ jlǒ dó hu hwɛ, alǒ nɔ gudo nú nǔ e Jehovah gbɛ́ wǎn na é ɖé ɔ, mǐ ɖó na mɔ ɖɔ é ɖò dandan ɖɔ mǐ ni jɛhun dó jǐ tɔn wɛ à? Jehovah nɔ kpɔ́n nǔ e ɖò wěxo é dó dá hwɛ ǎ, é ka na lɛ́ mɔ hwɛjijɔ nú mɛ e sɔ́ jlǒ dó hu hwɛ é, ɖó é nyí mɛxomɔ ɖé kpowun wu ǎ. Ðǒ ayi nugbodòdó e ɖò Ezayíi 65:20 mɛ é wu: “Enyi hwɛhutɔ́ na bo tlɛ ɖó xwè kanweko ɔ, è na dónu i.” [nwt] È ɖè nugbodòdó ɖokpo enɛ ɔ xlɛ́ ɖò nǔmimɔ Ezekiyɛli tɔn mɛ. (Ezek. 9:5-7) Enɛ wu ɔ, nǔ nukɔntɔn e na nɔ ɖu ayi mɛ nú mǐ hwebǐnu é wɛ nyí ɖɔ mǐ ni ɖè sísí xlɛ́ Mɛxo Azǎn lɛ tɔn ɔ, Jehovah Mawu. (Dan. 7:9, 10, 13, 14, nwt) Enyi mǐ wà mɔ̌ ɔ, xɛsi na ɖi mǐ cobonu mǐ na ɖè wě e sín hudo mɛɖé ɖó é xá ɛ ǎ, enyi mɛ ɔ na bo tlɛ ɖó xwè ɖebǔ ɔ nɛ.​—Ga. 6:1.

15. Etɛ mɛsɛ́dó Pɔlu ka kplɔ́n mǐ dó sísí ɖiɖó nú nɔví sunnu winnyawinnya lɛ wu?

¹⁵ Bɔ nɔví sunnu winnyawinnya e ka ɖò agun ɔ mɛ lɛ é ka lo? Nukún tɛ a ka na sɔ́ dó kpɔ́n ye na? Mɛsɛ́dó Pɔlu wlan sɛ́dó Timɔtée e ɖò winnyawinnya mɛ é ɖɔ: “Ma lɔn nú mɛɖé mɔ yɔkpɔvu towe, bo ɖó hwɛ nú we ó. Loɔ, nyǐ kpɔ́ndéwú nú nùɖitɔ́ hàtɔ́ lɛ, bo nyí kpɔ́ndéwú ɖò xóɖiɖɔ mɛ, bo nyí kpɔ́ndéwú ɖò zinzan kpo wanyiyi kpo mɛ, bo nyí kpɔ́ndéwú ɖò nùɖiɖi kpo gbɛ̀ mímɛ́ e a nɔ zán ɔ kpo mɛ.” (1 Tim. 4:12) Hwenu e Pɔlu wlan xó elɔ lɛ é ɔ, Timɔtée sixu ko ɖó xwè 30 vɛlɛɛ. Amɔ̌, Pɔlu  ka sɔ́ azɔ̌ d’así n’i b’ɛ na kpé nukún dó azɔ̌ kpinkpɛn lɛ wu. É na bo nyí hwɛjijɔ ɖebǔ wu wɛ é ɖè wě enɛ xá ɛ ɔ, nùkplɔnmɛ e ɖ’emɛ é ɖò wɛn. Mǐ ɖó na zɔn dó xwè nɔví sunnu winnyawinnya lɛ tɔn wu kpowun dó wà nǔ xá ye ǎ. Mǐ ɖó na flín ɖɔ Aklunɔ Jezu ɖesunɔ ɔ, xwè 30 vɛlɛɛ jɛn é ɖó cobo ka kpé nukún dó sinsɛnzɔ́ ɔ wu gbɔn ayikúngban ɔ bǐ jí.

16, 17. (a) Nɛ̌ mɛxo lɛ ka nɔ wà gbɔn bo nɔ tuùn ɖɔ nɔví sunnu ɖé jɛxa bo na nyí devizɔwatɔ́ alǒ mɛxo agun tɔn? (b) Nɛ̌ aca alǒ linlin mǐɖesunɔ tɔn lɛ ka sixu jɛ agɔ dó Biblu gbɔn?

¹⁶ Mǐ sixu ɖò xá e mɛ è ɖó aca bo nɔ sɔ́ nukún kpɛví dó kpɔ́n mɛ winnyawinnya lɛ na é mɛ. Enɛ wu ɔ, mɛxo agun tɔn lɛ sixu xò nǔ kpɔ́n bo gɔn azɔ̌ sɔ́ d’así nú nɔví sunnu winnyawinnya e jɛxa bo na nyí devizɔwatɔ́ sinsɛnzɔ́wiwa tɔn alǒ mɛxo lɛ é. Amɔ̌, mɛxo lɛ bǐ ɖó na flín ɖɔ Biblu kún ɖɔ ɖɔ xwè ɖě jɛn sunnu ɖé ɖó na ɖó cobɔ è na sɔ́ azɔ̌ d’así n’i b’ɛ na nyí devizɔwatɔ́ sinsɛnzɔ́wiwa tɔn, alǒ mɛxo ó. (1 Tim. 3:1-10, 12, 13; Ti. 1:5-9) Enyi mɛxo agun tɔn ɖé kpɔ́n dó aca xá ɔ mɛ tɔn wu, bo sɔ́ sɛ́n ɖé ɖ’ayǐ ɔ, é ɖò nǔ wà sɔgbe xá Biblu wɛ ǎ. Linlin mɛɖesunɔ tɔn alǒ aca xá ɔ mɛ tɔn wɛ è ɖó na zán dó da nɔví sunnu winnyawinnya lɛ kpɔ́n ǎ, loɔ, Xó Mawu tɔn wɛ è na zán dó da ye kpɔ́n.​—2 Tim. 3:16, 17.

¹⁷ Mǐ ni kpɔ́n lee aca e ma sɔgbe xá Biblu ǎ lɛ é xwixwedó sixu zɔ́n, bɔ è gɔn azɔ̌ sɔ́ d’así nú nɔví sunnu e jɛxa lɛ é gbɔn é. Ðò tò ɖokpo mɛ ɔ, è sɔ́ azɔ̌ kpinkpɛn lɛ d’así nú devizɔwatɔ́ sinsɛnzɔ́wiwa tɔn e jɛxa ganji é ɖé. Mɛxo e ɖò nɔví sunnu winnyawinnya ɔ sín agun mɛ lɛ é yí gbè ɖɔ nɔví sunnu ɔ ɖó jijɔ e Mawuxówema ɔ ɖɔ ɖɔ mɛxo agun tɔn ɖé ɖó na ɖó lɛ é ɖó bǎ ɖé mɛ có, ye ka sɔ́ ɛ bonu é nyí mɛxo ǎ. Mɛxo agun tɔn mɛxomɔ ɖé lɛ zyan vǎ d’eji ɖɔ nɔví sunnu ɔ kpó ɖò winnyawinnya mɛ dín, bɔ mɛ ɖevo lɛ na kpɔ́n ɛ dó mɔ mɛxo. É blawu ɖɔ ye gbɔ azɔ̌ sɔ́ d’así nú nɔví sunnu enɛ ɖó lee ye nɔ kpɔ́n ɛ gbɔn é wu. Kpɔ́ndéwú ɖokpo kpowun wɛ nyí enɛ, gbeɖiɖó lɛ xlɛ́ ɖɔ linlin mɔhun lɛ ɖò nǔ gbà wɛ ɖò akpáxwé gbɛ̀ ɔ tɔn gègě. É ɖò taji ɖɔ mǐ ni ganjɛ Biblu wu hú ɖɔ mǐ ni ganjɛ aca, alǒ linlin mǐɖesunɔ tɔn lɛ wu. Ali ɖokpo e nu mǐ na setónú nú Jezu bo na gɔn nǔ e ɖò wěxo e wu zɔn dó dó dá hwɛ nú mɛ é nɛ.

18, 19. Enyi mǐ jló na kpɔ́n mɛ ɖevo lɛ lee Jehovah nɔ kpɔ́n ye gbɔn é ɔ, etɛ é ka nɔ byɔ ɖò mǐ sí?

¹⁸ Mǐ nyí gbɛtɔ́ hwɛhutɔ́ có, mǐ sixu kplɔ́n bo na nɔ ɖè mɛɖé ɖó vo ǎ Jehovah ɖɔhun. (Mɛ. 10:34, 35) Amɔ̌, é na byɔ gǎndido tɛgbɛ tɔn ɖé ɖò mǐ sí, bɔ mǐ na lɛ́ hɛn nùflínmɛ e ɖò Xó Mawu tɔn mɛ lɛ é ayi mɛ hwebǐnu. Nú mǐ zán nùflínmɛ enɛ lɛ ɔ, mǐ na yì nukɔn ɖò tónúsíse nú gbeɖiɖe Jezu tɔn e ɖɔ ɖɔ mǐ ni ma nɔ zɔn dó nǔ e ɖò wěxo é jí dó dá hwɛ nú mɛ ó é mɛ.​—Jaan 7:24.

¹⁹ Zaanɖé dìn ɔ, Axɔsu mǐtɔn Jezu Klisu na dá hwɛ nú gbɛtɔ́ lɛ bǐ, é ka na zɔn dó nǔ e ɖò wěxo é, alǒ nǔ e tó tɔn sè é wu bo wà mɔ̌ ǎ, loɔ, é na dá hwɛ jlɔjlɔ. (Eza. 11:3, 4) É na jiwǔ kpɔ́n!