1. Ano ang gintagna ni Isaias parte kay Jesus, kag ngaa makapalig-on ini?

ANG gintagna ni Isaias parte kay Ginuong Jesucristo makapalig-on kag nagahatag sa aton sing paglaum. Nagsiling si Isaias nga si Jesus indi “maghukom suno lang sa makita niya, ukon magsabdong suno lang sa mabatian niya. Magahukom sia sing matarong sa mga kubos.” (Isa. 11:3, 4) Ngaa makapalig-on ini? Bangod madamo subong sa kalibutan ang nagapakalain ukon nagapakanubo sa iban. Kinahanglan gid naton ang perpekto nga Hukom nga indi maghukom base lang sa iya makita sa aton!

2. Ano ang ginsugo ni Jesus sa aton, kag ano ang binagbinagon naton sa sini nga artikulo?

² Kada adlaw, may mahambal gid kita parte sa iban nga tawo. Pero bangod indi kita pareho kay Jesus nga perpekto, mahimo magsala ang aton opinyon ukon pagtamod. Madali kita maimpluwensiahan sang aton makita. Pero nagsugo si Jesus sang ari pa sia sa duta: “Untati ninyo ang paghukom suno sa inyo nakita, kundi maghukom kamo sing matarong.” (Juan 7:24) Gani gusto ni Jesus nga mangin pareho kita sa iya nga wala nagahukom sa iban base lang sa aton makita sa ila. Sa sini nga artikulo, binagbinagon naton ang tatlo nga makita pirme sang mga tawo nga makaimpluwensia sa ila opinyon: rasa ukon nasyonalidad,  manggad, kag edad. Sa kada isa sini, binagbinagon naton kon paano naton matuman ang ginsugo ni Jesus.

3, 4. (a) Ngaa nagbag-o ang pagtamod ni apostol Pedro sa mga Gentil? (Tan-awa ang piktyur sa umpisa sini nga artikulo.) (b) Ano ang bag-o nga kamatuoran nga gintudlo ni Jehova nga nahangpan ni Pedro?

³ Imadyina ang ginpamensar ni apostol Pedro sang ginpakadto sia sa Cesarea sa balay sang isa ka Gentil nga si Cornelio. (Binu. 10:17-29) Bangod Judiyo si Pedro, nagapati gid sia nga ang mga Gentil indi matinlo. Pero may mga natabo nga nagpabag-o sang iya pagpati. Halimbawa, may nakita sia nga palanan-awon halin sa Dios. (Binu. 10:9-16) Nakita ni Pedro nga nagapaubos halin sa langit ang daw malapad nga habol nga puno sang mga sapat nga indi matinlo. Dayon, may nabatian sia nga tingog nga nagsugo sa iya: “Tindog ka, Pedro. Mag-ihaw ka kag magkaon!” Malig-on nga nangindi si Pedro. Dayon, nabatian niya ang tingog nga nagasiling: “Indi na pagtawga nga nadagtaan ang mga butang nga natinluan na sang Dios.” Pagkatapos sini, nagpalibog si Pedro kon ano ang gusto ipahangop sang nabatian niya nga tingog. Nag-abot dayon ang mga mensahero nga ginpakadto ni Cornelio. Paagi sa balaan nga espiritu, ginsilingan si Pedro nga magkadto sa balay ni Cornelio, gani nag-upod sia sa mga mensahero.

⁴ Kon nagbase lang si Pedro sa iya nakita, indi gid sia magsulod sa balay ni Cornelio. Ang mga Judiyo wala gid nagasulod sa balay sang mga Gentil. Pero ngaa ginhimo ini ni Pedro wala sapayan sang pagtamod niya sa mga Gentil? Nagbag-o ang iya pagtamod bangod sang palanan-awon nga nakita niya kag sang pagtuytoy sang balaan nga espiritu. Sang mabatian niya ang ginsaysay ni Cornelio, nagsiling sia: “Nahangpan ko na gid karon nga ang Dios wala sing ginapasulabi, apang sa tagsa ka pungsod, nahamuot sia sa tawo nga nagakahadlok sa iya kag nagahimo sing matarong.” (Binu. 10:34, 35) Dalayawon gid ining bag-o nga kamatuoran nga nahangpan ni Pedro! Ano ang epekto sini sa tanan nga Cristiano?

5. (a) Ano ang gusto ni Jehova nga mahangpan sang tanan nga Cristiano? (b) Bisan pa nabal-an naton ang kamatuoran, ano nga balatyagon ang posible nga ara gihapon sa aton?

⁵ Gingamit ni Jehova si Pedro para buligan ang tanan nga Cristiano nga mahangpan nga wala Sia sing ginapasulabi. Indi importante sa iya ang aton rasa, nasyonalidad, tribo, ukon lenguahe. Nahamuot ang Dios sa bisan sin-o nga nagakahadlok sa iya kag nagahimo sing matarong. (Gal. 3:26-28; Bug. 7:9, 10) Sigurado nga nabal-an mo na ini. Pero basi nagdaku ka sa isa ka lugar ukon pamilya nga may ginapasulabi. Bisan pa nga sa pensar mo wala ka sing ginapasulabi, posible ayhan nga may ginapasulabi ka gihapon sa imo tagipusuon? Natabo ini kay Pedro. Bisan pa ginbuligan niya ang iban nga mahangpan nga wala sing ginapasulabi si Jehova, sang ulihi may ginpasulabi man sia. (Gal. 2:11-14) Ano ang himuon naton para matuman naton ang ginsugo ni Jesus nga indi maghukom base lang sa aton makita?

6. (a) Paano naton dulaon ang indi maayo nga panimuot sa aton tagipusuon? (b) Base sa ginsiling sang isa ka gulang, ano nga panimuot ang ara sa iya tagipusuon?

⁶ Para mabal-an naton kon may ginapasulabi kita sa aton tagipusuon, ipaanggid naton ang aton panimuot sa natun-an naton sa Pulong sang Dios. (Sal. 119:105) Mahimo man naton pamangkuton ang iban kon may nakita sila sa aton nga indi maayo nga panimuot nga wala naton matalupangdan. (Gal. 2:11, 14) Basi naandan na naton ini nga  panimuot amo nga balewala lang ini sa aton. Amo ini ang natabo sa isa ka gulang nga nagkomento parte sa mapisan nga mag-asawa nga nagaalagad sing bug-os tion. Ginapakanubo sang iban ang rasa sang bana. Wala matalupangdan sang gulang nga amo man sini ang iya pagtamod. Madamo sia sing ginsiling nga maayo parte sa bana, pero gindugang niya ini: “Bisan pa [amo sini ang iya rasa], maayo ang iya batasan kag paagi sang pagkabuhi, indi pareho sang kalabanan [sa sini nga rasa]. Gani makita sang iban nga indi tanan [sa sini nga rasa] mahigko kag indi maayo ang pagkabuhi.” Ano ang matun-an naton sa sini? Bisan ano man ang aton responsibilidad sa organisasyon, dapat naton usisaon ang aton kaugalingon kag dapat handa kita magpabulig para mabal-an kon may ginapasulabi kita sa aton tagipusuon. Ano pa ang himuon naton?

7. Paano naton mapakita nga mainabyanon kita sa tanan?

⁷ Kon tinguhaan naton nga mangin mas mainabyanon, buslan sang gugma ang aton indi maayo nga panimuot. (2 Cor. 6:11-13) Gusto mo lang bala makig-upod sa pareho mo sing rasa, nasyonalidad, tribo, ukon lenguahe? Tinguhai man nga makig-abyan sa iban. Puede mo agdahon ang mga utod nga sarisari sing ginhalinan para updan ka sa pagbantala. Puede mo man sila imbitaron sa inyo balay para magkaon ukon maglingawlingaw. (Binu. 16:14, 15) Kon himuon mo ini, mapuno sing gugma ang imo tagipusuon kag madula ang imo indi maayo nga panimuot. Pero may isa pa nga makita naton sa iban nga makaimpluwensia sa aton pagtamod sa ila. Binagbinagon naman naton ang manggad.

8. Suno sa Levitico 19:15, paano naton mahimo tamdon ang iban kon manggaranon sila ukon imol?

⁸ Mahimo nga ginatamod naton ang iban base sa ila kahimtangan sa materyal. Ang Levitico 19:15 nagasiling: “Indi ninyo pagpasulabihon ang imol nga tawo, kag indi ninyo pagpaboran ang manggaranon nga tawo. Dapat kamo maghukom nga may hustisya sa inyo isigkatawo.” Pero paano maimpluwensiahan ang aton pagtamod sa iban kon manggaranon sila ukon imol?

9. Ano ang ginsulat ni Solomon nga matuod nga nagakatabo, kag ano ang ginatudlo sini sa aton?

⁹ Gintuytuyan si Solomon sang balaan nga espiritu para isulat ang matuod nga nagakatabo sa indi perpekto nga mga tawo. Sa Hulubaton 14:20, nagsiling sia: “Ang imol ginakaugtan bisan sang iya mga kaingod, apang ang manggaranon madamo sing abyan.” Ano ang ginatudlo sini sa aton? Kon indi kita maghalong, basi gusto lang naton makig-abyan sa mga utod nga manggaranon kag indi sa mga imol. Ngaa indi gid maayo nga tamdon naton ang iban base lang sa ila manggad?

10. Ano nga problema ang ginsiling ni Santiago?

¹⁰ Kon hukman naton ang iban base sa ila manggad, mahimo nga may pasulabihon na kita sa kongregasyon. Nagsiling si disipulo Santiago nga nagresulta ini sa pagbahinbahin sang pila ka kongregasyon sang unang siglo. (Basaha ang Santiago 2:1-4.) Dapat gid naton panikasugan nga indi ini matabo sa aton mga kongregasyon subong. Paano naton malikawan nga hukman ang iban base lang sa aton makita sa ila?

11. Nagadepende bala sa materyal nga ginapanag-iyahan sang isa ang iya kaangtanan kay Jehova? Ipaathag.

¹¹ Dapat naton tamdon ang aton mga kauturan pareho sa pagtamod ni Jehova sa ila. Para kay Jehova, hamili ang isa ka tawo indi bangod manggaranon sia ukon imol. Ang aton kaangtanan kay Jehova wala nagadepende sa kadamuon sang materyal nga aton ginapanag-iyahan. Matuod, nagsiling si Jesus  nga “mabudlay para sa manggaranon nga tawo nga magsulod sa Ginharian sang langit,” pero wala sia magsiling nga imposible ini. (Mat. 19:23) Nagsiling man si Jesus: “Malipayon kamo nga mga imol, kay inyo ang Ginharian sang Dios.” (Luc. 6:20) Pero indi buot silingon sini nga ang tanan nga imol magapamati kay Jesus kag may espesyal nga pagpakamaayo. Madamo nga imol ang wala magsunod kay Jesus. Gani, indi naton masiling nga ang kaangtanan sang isa kay Jehova nagadepende sa materyal nga iya ginapanag-iyahan.

12. Ano ang ginasiling sang Kasulatan sa mga manggaranon kag sa mga imol?

¹² Ang aton mga kauturan, manggaranon man ukon imol, nagapalangga kay Jehova kag nagaalagad sa iya sing bug-os tagipusuon. Ginasilingan sang Kasulatan ang mga manggaranon nga “indi pag-ipahamtang ang ila paglaum sa wala sing kapat-uran nga manggad, kundi sa Dios.” (Basaha ang 1 Timoteo 6:17-19.) Nagapaandam man ang Pulong sang Dios sa tanan nga katawhan ni Jehova, manggaranon kag imol, nga indi paghigugmaon ang kuarta. (1 Tim. 6:9, 10) Kon tamdon naton ang aton mga kauturan pareho sa pagtamod ni Jehova sa ila, indi naton sila paghukman base sa kon ano nga materyal ang ara sa ila ukon ang wala sa ila. Pero puede bala naton basihan ang edad sa paghukom sa iban? Tan-awon naton.

13. Ano ang ginatudlo sa aton sang Kasulatan parte sa pagtahod sa mga tigulang?

¹³ Pirme kita ginalaygayan sang Kasulatan nga magtahod sa mga tigulang. Ang Levitico 19:32 nagasiling: “Magtindog kamo sa atubangan sang ubanon, kag tahuron ninyo ang tigulang nga tawo, kag magkahadlok kamo sa inyo Dios.” Ang Hulubaton 16:31 nagasiling man nga “ang ubanon nga ulo isa ka korona sang katahom kon yara ini sa dalanon sang pagkamatarong.” Ginlaygayan man ni Pablo si Timoteo nga indi maghambal sing matigdas sa tigulang nga lalaki kundi kabigon niya ang tigulang nga utod bilang iya amay. (1 Tim. 5:1, 2) Bisan pa may awtoridad si Timoteo sa sining tigulang nga mga utod, dapat niya sila pakitaan sing kaluoy kag pagtahod.

14. San-o mahimo nga dapat naton laygayan ukon disiplinahon ang mas magulang sa aton?

¹⁴ Pero ano abi kon ang isa ka tigulang hungod nga nagapakasala ukon nagaimpluwensia sa iban nga maghimo sang isa ka butang nga wala nagapahamuot kay Jehova? Indi ini pagpalampason ni Jehova bangod lang tigulang na ang nakasala. Talupangda ang prinsipio sa Isaias 65:20: “Ang makasasala pakamalauton bisan 100 ka tuig na ang iya edad.” Pareho man sa sini ang prinsipio sa palanan-awon ni Ezequiel. (Ezeq. 9:5-7) Dapat ang pinakaimportante sa aton amo ang pagtahod kay Jehova nga Dios, ang Dumaan sang mga Adlaw. (Dan. 7:9, 10, 13, 14) Kon ginatahod naton sia, indi kita mahadlok sa pagtadlong sa isa nga dapat laygayan, ano man ang iya edad.—Gal. 6:1.

15. Ano ang matun-an naton kay apostol Pablo parte sa pagtahod sa bataon nga mga utod nga lalaki?

¹⁵ Paano mo naman ginatamod ang bataon nga mga utod nga lalaki sa kongregasyon? Nagsulat si apostol Pablo kay Timoteo: “Indi pagtuguti nga may magpakanubo sang imo pagkapamatan-on. Sa baylo, mangin halimbawa ka sa mga matutom sa imo paghambal, paggawi, gugma, pagtuo, kag katinlo.” (1 Tim. 4:12) Sang ginsulat ini ni Pablo, mahimo nga mga 30 anyos si Timoteo. Pero ginhatagan sia ni Pablo sing mabug-at nga mga responsibilidad. Ano ang matun-an naton sa sini? Indi kita  maghukom sa bataon nga mga utod base lang sa ila edad. Dumdumon naton nga ginhimo ni Ginuong Jesus ang iya ministeryo sa duta sang treintahon pa lang sia.

16, 17. (a) Paano nagadesisyon ang mga gulang kon bala kalipikado na ang isa ka utod nga mangin ministeryal nga alagad ukon gulang? (b) Paano mangin supak sa ginasiling sang Kasulatan ang opinyon ukon kultura sang isa?

¹⁶ May pila ka kultura nga nagapakanubo sa bataon nga mga lalaki. Bangod sini, mahimo nga wala ginarekomendar sang mga gulang sa kongregasyon ang kalipikado nga bataon nga mga utod nga lalaki bilang ministeryal nga alagad ukon gulang. Pero dapat dumdumon sang tanan nga gulang nga wala ginasiling sang Kasulatan ang espesipiko nga edad sang isa ka lalaki para marekomendar sia nga ministeryal nga alagad ukon gulang. (1 Tim. 3:1-10, 12, 13; Tito 1:5-9) Kon ipatuman sang isa ka gulang ang espesipiko nga edad bangod sang ila kultura, wala niya ginasunod ang Kasulatan. Dapat ibase sa Pulong sang Dios ang pagrekomendar sa bataon nga mga lalaki, indi sa opinyon ukon kultura sang isa.—2 Tim. 3:16, 17.

¹⁷ Binagbinaga ang epekto sini nga pagtamod nga wala nabase sa Kasulatan. Bangod sini, mahimo nga indi matangdo ang kalipikado nga mga utod. Halimbawa, sa isa ka pungsod, may isa ka masaligan nga ministeryal nga alagad nga ginhatagan sing mabug-at nga mga responsibilidad. Nag-ugyon ang mga gulang sa ila kongregasyon nga nalab-ot na sining bataon nga utod ang kalipikasyon sang isa ka gulang suno sa Kasulatan, pero wala sia ginrekomendar. Ang pila ka madugay na nga mga gulang nagsiling nga kabata pa sang iya hitsura amo nga indi pa sia bagay mangin gulang. Gani wala matangdo ini nga utod bangod lang sang iya hitsura. Bisan pa natabo ini sa isa lang ka pungsod, ginapakita sang mga report nga kinaandan na ini nga pagtamod sa madamo pa nga lugar. Gani dapat gid kita magbase sa Kasulatan, indi sa aton kultura ukon opinyon. Paagi sa sini, matuman naton ang ginsugo ni Jesus nga indi maghukom base lang sa aton makita.

18, 19. Ano ang dapat naton himuon para mangin pareho kay Jehova ang aton pagtamod sa iban?

¹⁸ Indi kita perpekto, pero matun-an naton nga mangin pareho kay Jehova ang aton pagtamod sa iban. (Binu. 10:34, 35) Gani dapat naton padayon nga pamatian ang mga pahanumdom sang Pulong sang Dios. Kon sundon naton ini, matuman gid naton ang ginsugo ni Jesus nga indi maghukom base lang sa aton makita.—Juan 7:24.

¹⁹ Malapit na hukman sang aton Hari, nga si Jesucristo, ang tanan nga tawo. Magahukom sia sing matarong, kag indi base sa iya lang makita ukon mabatian. (Isa. 11:3, 4) Makalilipay gid ini nga palaabuton!