1. Ọta akhasẹ nela Isaiah tale rẹji Jesu? Bezẹle nin ọnan da yi ọta izebhudu?

ỌTA akhasẹ nin Isaiah tale rẹji Jesu Kristi nin ebeanlẹn mhan wo mun mhan udu kore. Ọle yẹ ji mhan lẹn ghe ẹghe odalo dẹ wo mhẹn nin mhan. Isaiah tale ọbhi otọ ghe, Jesu “ida re ebi ọle gheghe daghe rẹ bhohiẹn, ọle ida yẹ re ebi ọle gheghe họn rẹ dia ọria. Ẹbho nan re ẹlo gbe a, ọle dẹ re uwedẹ nọn gbale rẹ bhu ele ohiẹn.” (Isa. 11:3, 4) Bezẹle nin ọnan da yi ọta izebhudu? Ranmhude, agbọn nin ẹbho da zọn egbe, nan da yẹ re ẹlo gbe ẹbho eso a, ọle mhan da nyẹnlẹn. Jesu mhan khua ẹlo ghe, ranmhude ọle ida re ebi ọle gheghe daghe rẹ bhu mhan ohiẹn.

2. Adia nela iJesu re nin mhan bhi John 7:24? Be imhan ha zilo nyan bhi ọne uhọnmhọn-ọta nan?

² Ukpẹdẹ-ukpẹdẹ mhan rẹ tẹmhọn ẹbho nin mhan miẹn. Ọkpakinọn, ranmhude ọbha gba nin mhan fo, mhan ida sabọ wo lẹn ọria fo beji Jesu rẹ lẹn ẹbho. Ebi ẹlo mhan daghe ọkpa mhan lẹnlẹn. Ọrẹyiriọ, ẹghe nin Jesu rẹ ha ribhi ọne otọ nan, ọle da yọle: “Hẹi ha bhohiẹn emhin beji uwẹ rẹ wo gheghe daghe ọle, ọkpakinọn, ha bhohiẹn bhi uwedẹ nọn gbale.” (John 7:24) Ọ wo khia bhi ẹlo ghe Jesu guanọ nin mhan re egbe khọkhọ ọle. Ọle iguanọ nin mhan ha nin ẹbho lu emhin beji mhan rẹ wo gheghe daghe ele. Bhi ọne uhọnmhọn-ọta nan, mhan dẹ zilo nyan emhin  ea nin ẹbho kẹ daghe rẹ bhohiẹn. Ene emhin hi: agbaẹbho nin ọria na vae, ebi ọne ọria mhọn igho sẹ yẹ, bi ebi ọria wanrẹ sẹ yẹ. Bha ji mhan zilo nyan ebi mhan ha rẹ re obọ rẹkhan ebi Jesu tale yẹ.

3, 4. (a) Be re iPeter fi uwedẹ nin ọle rẹ ghe eria ne iyi Jew denọ? (Fẹ adudu nọn ribhi eji a da munhẹn ghe.) (b) Emhin ọgbọn nela Osẹnobulua rẹkpa iPeter lẹn otọ ọle?

³ Asabọ miẹn Peter da wo ha kpokpo egbe ranmhude a yọle nin ọle ha khian uwa ọsi ọria nọn iyi Jew nọn ribhi Caesarea. Cornelius a tie ọnọn ọria. (Acts 10:17-29) Bezẹle nin Peter da ha kpokpo egbe? Ranmhude, rẹ na bhi egbe obhokhan ha vade, Peter rẹọbhọ ghe, ẹbho ne iyi Jew bha khia, beji ibhokhan iJew nekẹle yẹ rẹọ. Ọrẹyiri, emhin eso nin Peter daghe da re ọle fi ọkhọle denọ. Bhi ọsi ijiẹmhin, imianlo nin ọle miẹn. (Acts 10:9-16) Bhi ọne imianlo, a da re elanmhẹn kẹkẹ ne bha khia man ọlẹn. Ukpuru da na bhi okhun taman ọlẹn ghe nin ọle le ene elanmhẹn. Igba ea nin ọne ukpuru taman ọlẹn nin ọle le ene elanmhẹn, Peter da he. Ẹghe nin ọle rẹ ha he, ọne ukpuru ki taman ọlẹn nin ọle hẹi yẹ tale ghe emhin nin Osẹnobulua kpe khia bha khia. Ọle ki miẹn ọne imianlo fo, ọle da ha ria ebi ọne imianlo mundia nan. Bhi eji ọle da wo ha ria eria, ẹbho nin Cornelius je da sẹbhi eji ọle ye. Ẹlinmhin nọn khiale da ji Peter lẹn ghe Osẹnobulua guanọ nin ọle bu iCornelius, bhiriọ, Peter da dọnmhegbe rẹkhan ene ẹbho nin Cornelius je re.

⁴ Sade Peter bha ghe emhin beji Jehova rẹ ghe emhin nọn, ọle irẹ nabhi uwa nọnsi Cornelius, ranmhude, ibhokhan iJew i nabhi uwa ọsi ene iyi jew. Bezẹle nin Peter da ha khian uwa nọnsi Cornelius arẹmiẹn ele i ko lu emhin kugbe? Imianlo nin ọle miẹn, bi adia nin Ẹlinmhin nọn khiale re nanlẹn, ọle rẹkpa iPeter. Beji Peter ki kaehọ ebi Cornelius tale fo, Peter da taan unun an yọle: “Ọ gene mun mẹn ẹlo kore ghe Osẹnobulua izọn eria. Ọkpakinọn, bhi agbaẹbho nọn irẹ ha khin, ọria nọn mun ofẹn ọlẹn, nọn yẹ lu emhin nọn mhẹn, ọle Osẹnobulua miẹn ọbhi egbe.” (Acts 10:34, 35) Ọne emhin ọgbọn nan nin Osẹnobulua rẹkpa iPeter lẹn da wo ha ti Peter bhọ. Ọ yẹ wo rẹ so iKristiẹn rebhe ẹlẹnan.

5. (a) Be iJehova guanọ nin Kristiẹn rebhe lẹn otọ ọle? (b) Be ha sabọ ha re imhan bhi ọkhọle aharẹmiẹn mhan dọ lẹn sẹbhọ ghe Osẹnobulua izọn ọria?

⁵ Jehova da noo iPeter rẹ ji Kristiẹn rebhe lẹn ghe ọle izọn ẹbho. Ọiyi agbaẹbho nin ọria na vae la urolo nin ọle zẹ Jehova ghe. Ọria nọn irẹ khin nọn mun ofẹn Osẹnobulua, nọn yẹ lu ebe gbale, Osẹnobulua ki miẹn ọlẹn ọbhi egbe. (Gal. 3:26-28; Rev. 7:9, 10) Iriọ a da miẹn uwẹ rẹọbhọ ghe Osẹnobulua igene zọn ọria. Ọkpakinọn, asabọ miẹn agbaẹbho la azagba-uwa nan da zọn egbe uwẹ na vae. Bhirọ, ọ sabọ sẹyẹ ha re uwẹ bhi ọkhọle rẹ ha zọn ẹbho a ha rẹ miẹn uwẹ riale ghe uwẹ rẹban izọn-egbe. Peter nin Jehova noo rẹ rẹman ghe ọle izọn ọria soso da yẹ re izọn-egbe man akizẹbue. (Gal. 2:​11-14) Be imhan ha rẹ re obọ rẹkhan ọta nọnsi Jesu yẹ, ghe nin mhan hẹi ha re ebi mhan gheghe daghe bhi egbe eria rẹ bhu ele ohiẹn?

6. (a) Be ha sabọ rẹkpa mhan rẹ khọn izọn-egbe? (b) Be ọta nin ọwanlẹn ọkpa bhi ẹkẹ agbotu tale rẹman?

⁶ Be imhan ha rẹ sabọ lẹn yẹ si ọ sẹyẹ re imhan bhi ọkhọle rẹ ha zọn ẹbho? Baibo la sabọ rẹkpa mhan. Ọkhẹke nin mhan ha re ọle fẹ egbe mhan ghe ẹghe rebhe. (Ps. 119:105) Ọ yẹ khẹke nin mhan miẹn urẹkpa ọsi ẹbho ọbhi egbe ranmhude, ele sabọ daghe uwedẹ nin mhan rẹ re izọn-egbe man a ha rẹ miẹn mhan bha daghe ọle. (Gal. 2:11, 14) Asabọ miẹn mhan bhọ bha lẹn ghe mhan zọn-ẹbho ranmhude, eji a da zọn ẹbho mhan da wanre. Bhi ọsi ijiẹmhin, bha ji mhan tẹmhọn ebi ọwanlẹn ọkpa bhi ẹkẹ agbotu tale rẹji okhuo bi ọdọ ne lu iwẹnna ọkanẹfan ọsi ẹghe rebhe. Agbaẹbho nan re ẹlo gbea, ọle ọne ọdọ nan vae. Ọne  ọwanlẹn nan bha lẹn ghe ọle sẹyẹ re ọkhọle rẹ zọn eria ne na bhi ọne agbaẹbho nan vae. Ọle da wo tẹmhọn ọne ọdọ nọnsẹn. Ọkpakinọn, ọne ọwanlẹn da yẹ yọle: “Arẹmiẹn ghe ọne [agbaẹbho nan] ọle na vae, ebi ọle rẹ lu emhin yẹ, bi uwedẹ iẹnlẹn nọnsọle wo rẹkpa ọrebhe lẹn ghe, ọiyi ọrebhe ne na bhi ọne agbaẹbho vae wo ditọan, la wo nyẹnlẹn bọsi ọnọn bha lẹn ejaye, arẹmiẹn ghe iriọ ene bunbun bhi enin rẹ nyẹnlẹn.” Be mhan miẹn luẹ bhi ọnan? Ihe nọn irẹkhin nin mhan ye, ọkhẹke nin mhan ha gbẹlokotọ fẹ egbe mhan ghe nọnsẹn. Ọ yẹ khẹke nin mhan ha miẹn urẹkpa ọsi ẹbho ọbhi egbe. Mhan ha lu ọnan, ọ ki rẹkpa mhan rẹ lẹn si izọn egbe sẹyẹ re imhan bhi ọkhọle la si ọ iribhọ. Emhin ọbhebhe nela ọkhẹke nin mhan lu rẹ khọn izọn-egbe?

7. Be imhan ha rẹ rẹman yẹ ghe ọkhọle rebhe mhan rẹ re oyẹẹ man?

⁷ Mhan ha re ọkhọle rebhe rẹ ha re oyẹẹ man, ọ iyẹ da ha ribhi ọkhọle nọnsẹmhan rẹ ha zọn ẹbho. (2 Cor. 6:11-13) Ẹbho nin bha ko zẹ urolo ọkpa, la ẹbho nin bha ko na bhi agbaẹbho ọkpa vae, ele ọkpa uwẹ be deba muobọ? Ahamiẹn iriọ uwẹ lu, ọkhẹke nin uwẹ fidenọ ha deba ẹbho rebhe muobọ. Uwẹ sabọ tie ẹbho ne na bhi agbaẹbho ọbhebhe vae nin bha ko dọ tẹmhọn Osẹnobulua. Uwẹ sabọ yẹ datie ele nin ele dọ le ebale bhi uwa nọnsi uwẹ, la nin bha ko re egbe re ahoho. (Acts 16:14, 15) Uwẹ ha lu iriọ, oyẹẹ ki gba ọkhọle nọnsi uwẹ, izọn-egbe iyẹ da ha ribhi ẹkẹ ọle. Emhin ọbhebhe yẹ ribhọ nọn ha sabọ rẹ mhan ha bhu ẹbho hiẹn beji ẹlo mhan rẹ gheghe daghe ele, ọle hi, ebi ele fe sẹ yẹ. Bha ji mhan zilo nyan ọnan.

8. Be iLeviticus 19:15 rẹ rẹkpa mhan rẹ lẹn ẹlo nọn khẹke nin mhan ha rẹ ha ghe eria ne fe bi eria ne bha fe yẹ?

⁸ Ẹlo nela ọkhẹke nin mhan rẹ ha ghe eria ne fe bi eria ne bha fe? Leviticus 19:15 yọle: “Bha hẹi ha zọn ene bha fe. Sẹyẹ, bha hẹi wo gheghe ha mun ene fe kalo. Bha ha bhu ọbo bha ohiẹn bhi uwedẹ nọn gbale.” Be bhọ ẹbho rẹ nin ibo ele lu emhin yẹ ranmhude ẹfe?

9. Ọta nela iSolomon gbẹn ọbhi otọ? Be mhan miẹn luẹ bhi ọne ọta?

⁹ Ọta ọso ribhọ nin Ẹlinmhin nọn Khiale noo iSolomon rẹ gbẹn ọbhi otọ rẹji eria ne bha gba fo. Ọne ọta ribhi Proverbs 14:20. Enin yọle: “Ọria nọn bha fe, ẹmhọn ọlẹn iti ene nyẹlẹn sikẹ ọle bhọ. Ọkpakinọn, imọẹ ọsi ọria nọn fe wo bunbun.” Ọne ẹmhọn nan wo ba bhi egbe a! Be bhọ mhan miẹn luẹ bhi ọne ebe ọsi Proverb nan? Ebi mhan miẹn luẹ hi, mhan bha da gbẹlokotọ, mhan ki ha nin ibhio mhan ne fe ọkpa muobọ, ọkpakinọn, mhan ki ha re ẹlo gbe ibhio mhan ne bha fe a. Okhẹnan ribhọ sade ẹfe mhan ghe rẹ lẹn ọria nọn ghanlẹn. Be bhọ hi ọne okhẹnan?

10. Emhin nela James nin odibo tale ghe ọ si ẹmhọn re bhi ẹkẹ agbotu bhi ore nin ọhẹnhẹn?

¹⁰ Ahamiẹn beji ọria fe sẹ mhan rẹ nanlẹn lu emhin, mhan ki ha si uwa-egbea re bhi ẹkẹ agbotu. James nin odibo da tale ghe emhin nọn sẹ inian ka si ẹmhọn re bhi ẹkẹ agbotu bhi ore nin ọhẹnhẹn. (Tie James 2:1-4.) Ọkhẹke nin mhan gbẹlokotọ nin emhin nọn sẹ inian hẹi sunu bhi agbotu ne sẹmhan ẹlẹnan. Be ha rẹkpa mhan nin mhan hẹi ha ghe ẹfe rẹ nin ẹbho lu emhin?

11. Emhin nin mhan mhọn dẹ sabọ rẹso ikolu nin mhan be iJehova ko mhọnlẹn? Gbotọle fanọan.

¹¹ Ọkhẹke nin mhan ha ghe ibhio mhan beji Jehova rẹ ghe ele. Ọiyi ọria fe la ọle bha fe re ọle ghan bhi ẹlo nọnsi Osẹnobulua. Emhin nin mhan mhọnlẹn la emhin nin mhan imhọnlẹn ida sabọ reso ikolu nin mhan bi Jehova ko mhọnlẹn. Jesu bha tale ghe ene fe ida sabọ na ọbhi Agbejele nọnsi Osẹnobulua. Ebi ọle tale hi, ọ dẹ nọnghọ ele rẹ nab họ. (Matt. 19:23) Sẹyẹ, Jesu  da yọle: “Eghọnghọn hi ọsi bha, ibha ne imhọn emhin soso ranmhude ọsẹbha Agbejele nọnsi Osẹnobulua khin.” (Luke 6:20) Ọne ọta nọnsi Jesu nan bha rẹman ghe eria ne bha fe rebhe dẹ wo miẹn erọnmhọn bhi obọ Osẹnobulua. Ene bunbun bhi ẹwẹ ele bhọ bha miẹn Jesu ọbhi egbe. Ebe imhan ta hi, ọiyi ẹmhin nin mhan mhọn ha re ikolu nin mhan be Jehova ko mhọlẹn deziẹn.

12. Adia nela iBaibo re nin ene fe bi ene bha fe?

¹² Ẹsele nọn khua nọn ghe, mhan mhọn ibhio mhan nin ikpea bi ikhuo ne fe bi ene bha fe, ne re ọkhọle rebhe hoẹmhọn iJehova yẹ ha ga ọle. Baibo taman ene fe ghe, nin ele hẹi mun udu nyan ẹfe nọnsele, ọkpakinọn nin ele mun udu nyan iJehova. (Tie 1 Timothy 6:17-19.) Baibo yẹ taman ẹbho rebhe ne ga iJehova, ene fe bi ene bha fe ghe, nin ele gbẹlokotọ nọnsẹn nan da miẹn ghe, ele bha manman hoẹmhọn igho. (1 Tim. 6:9, 10) Ọkhẹke nin mhan ha ghe ẹbho beji Jehova rẹ ghe ele. Bhiriọ, mhan ida ha ghe emhin nin ele mhọnlẹn la emhin nin ele imhọnlẹn rẹ bhu ele ohiẹn. Sokpan, ọ be khẹke nin mhan ha re eka ikpe nin ọria ye rẹ bhu ọle ohiẹn? Bha ji mhan zilo nyan ọlẹn.

13. Be iBaibo rẹ rẹman yẹ ghe ọkhẹke nin mhan ha mun ekpẹn nin ene dọnmanlẹn?

¹³ Ẹghe rebhe iBaibo rẹ taman mhan ghe nin mhan ha mun ekpẹn nin ene diọn mhan. Leviticus 19:32 yọle: “Kpanọn mundia nin ọria nọn ki fun edẹn. Ọkhẹke nin uwẹ ha mun ekpẹn nin ọria nọn ki dọnmanlẹn. Ọ yẹ khẹke nin uwẹ ha mun ofẹn Osẹnobulua. Imhẹn hi Jehova.” Proverbs 16:31 da yẹ yọle: “Inian edẹn diabe ukparu nọn mhọn-ose ọsi ojie, sade uwedẹ nọn khiale a rẹ fun ọlẹn.” Paul da yẹ taman iTimothy ghe, nin ọle ha re ekpẹn rẹ nin ene dọnmanlẹn lu emhin, nin ọle yẹ ha ghe ele bọsi aba. (1 Tim. 5:1, 2) Arẹmiẹn ghe ihe nin Timothy ye khua okhun gbera ọsi ene ikpea ne dọnmanlẹn nan, ọkhẹke nin ọle ha mun ekpẹn nin ele yẹ re ẹkẹ ẹjẹjẹ nin ele lu emhin.

14. Ẹghe nela ọ rẹ khẹke nin mhan rẹ dia ọria nọn diọn mhan?

¹⁴ Be ọkhẹke nin mhan lu sade ọria nọn dọnmalẹn muegbe gbe obọ ra uhi nọnsi Jehova, la sade ọle re obọ ọbhi emhin nọn bha gba? Ọiyi ebi ọria dia yẹ Jehova rẹ bhu ọle ohiẹn. Bhiriọ, ọria ha mun egbe gbe obọ ra uhi nọnsọle, Jehova ida gheghe wo ze ọle obọ, ranmhude ọne ọria ki dọnmanlẹn. Isaiah 65:20 tale ghe ihẹn ọsi ọria nọn lu khọlọ, aharẹmiẹn ọle sẹbhi ikpe egbọ-isẹn. Adia nọn yẹ di inian, ọle a taman Ezekiel bhi imianlo. (Ezek. 9:5-7) Ọkhẹke nin mhan ha mun ekpẹn nọn khua nin Jehova, ranmhude ọle ọdiọn bhi ọne agbọn nan rebhe. (Dan. 7:9, 10, 13, 14) Mhan ha lu ọnan, ofẹn ida mun mhan rẹ ha dia ọria nọn bha lu nọnsẹn aharẹmiẹn ghe ọne ọria diọn mhan.—Gal. 6:1.

15. Be imhan miẹn luẹ bhi obọ iPaul nin odibo bhi ẹmhọn ekpẹn nan mun nin elasẹre?

¹⁵ Ene elasẹre ne ribhi ẹkẹ agbotu kii? Ẹlo nela uwẹ rẹ ghe ele? Paul da taman iTomothy yọle: “Hẹi ji ọria re ẹlo gbe uwẹ a ranmhude usẹn-obhokhan uwẹ khin. Sokpan, ha yi ijiẹmhin esili rẹji ene ga nọnsẹn bhi uwedẹ nin uwẹ rẹ talọ, bhi uwedẹ nin uwẹ rẹ lu emhin, bhi uwedẹ nin uwẹ rẹ re oyẹẹ mhan, bhi uwedẹ nin uwẹ rẹ mhọn urẹọbhọ, bi bhi uwedẹ nin uwẹ rẹ khia.” (1 Tim. 4:12) Asabọ miẹn ọbha sẹ bue gbe nin Timothy gbera ikpe ọgban, ẹghe nin Paul rẹ gbẹn ọne ebe nan ji ọle. Ọrẹyiriọ, Paul da re ọle ọbhi ihe nọn khua. Be imhan miẹn luẹ bhi ọnan? Ọbha khẹke nin mhan ha re ẹlo gbe elasẹre a, ranmhude ele bha sẹ manman wanre. Ọkhẹke nin mhan yere ghe, Jesu Kristi bha sẹ wanre sẹbhi ikpe ẹgbọ-eva ẹghe nin ọle rẹ lu iwẹnna oga nin ọle lu bhi ọne otọ nan.

16, 17. (a) Be ọkhẹke nin ene ewanlẹn bhi agbotu ka ha lu ọkuẹsẹ ele re ọria ọbhi ihe ọsi ọwanlẹn la bhi ọsi ene zẹ sikẹ ele? (b) Ijiẹmhin nela rẹman ghe Baibo ọkhẹke nin ewanlẹn ha noo rẹ fẹ ene elasere ghe?

 ¹⁶ Bhi agbaẹbho eso, ẹbho imun ẹkpẹn nin usẹn ibhokhan. Ranmhude ọnan, ọ sabọ ha nọghọ ene ewanlẹn rẹ ne usẹn ibhokhan ọbhi ihe ọsi ọwanlẹn bhi ẹkẹ agbotu la ọsi ene zẹ sikẹ ene ewanlẹn. Ọkhẹke nin ene ewanlẹn yere ghe, Baibo bha ta eka ikpe nin ọria ha wanre sẹ ọkuẹsẹ a re ọle ọbhi ihe ọsi ọwanlẹn bhi ẹkẹ agbotu la ọsi ene zẹ sikẹ ene ewanlẹn. (1 Tim. 3:1-10, 12, 13; Titus 1:5-9) Ahamiẹn ghe ebi a rẹ lu emhin yẹ bhi agbaẹbho ene ewanlẹn lu rẹkhan, ọnan rẹman ghe ele ire obọ rẹkhan Baibo. Baibo ọkhẹke nin ene ewanlẹn ha noo rẹ fẹ elasẹre ghe ahamien ele ho nin ele re ene elasere ọbhi ihe. Ọiyi ebi ele ria bhi ọkhọle la ebi ele rẹ lu emhin yẹ bhi agbaẹbho nọnsele ele ha rẹ fẹ ele ghe.—2 Tim. 3:16, 17.

¹⁷ Bezẹle nọn bha da khẹke nin ene ewanlẹn bhi agbotu ha ghe ebi a rẹ lu emhin yẹ bhi agbaẹbho ọkuẹse ele re elasẹre ọbhi ihe? Ahamiẹn ebi a rẹ lu emhin yẹ bhi agbaẹbho ele fẹghe, ele ida sabọ re elasẹre ọbhi ihe, arẹmiẹn ghe ọne elasẹre wanre sẹ. Bhi agbaẹbho ọkpa, ọ mhọn elasẹre ọkpa nọn zẹ sikẹ ene ewanlẹn. Ọne elasẹre nan wo manman lu iwẹnna nọn khẹke bhi ẹkẹ agbotu. Ene ewanlẹn bhi agbotu da reọbhọ ghe, ọne elasẹre nan ki wanre si ọne ha kiẹn ọwanlẹn bhi agbotu beji Baibo ta. Sokpan, ele bha ki re ọle ọbhi ihe ọsi ọwanlẹn. Ewanlẹn eso da yọle ghe ọne elasẹre nan khere gbe nọn dọ kiẹn ọwanlẹn bhi agbotu. Ranmhude ọnan ele bha yẹ re ọle ọbhi ihe ọsi ọwanlẹn. Ọiyi ọne elasere ọkpa ọse sunu je. Iria eria nọn dia inian sabọ yẹ ha sunu bhi ije kẹkẹ bhi ọne agbọn nan. Ọkhẹke nin mhan ha fẹghe ebi Baibo ta rẹji ẹmhọn ne dia inian, ọiyi ebe ribhi ọkhọle mhan la ebe a rẹ lu emhin yẹ bhi agbaẹbho nọnsẹmhan mhan ha fẹghe! Mhan ha lu ọnan, ọ ki rẹman ghe mhan re obọ rẹkhan ebi Jesu ta. Ọ ki yẹ rẹman ghe imhan ibhu ọria ohiẹn beji ẹlo mhan gheghe rẹ daghe ele.

18, 19. Be imhan ha lu nin mhan ha da sabọ ha ghe ẹbho beji Jehova rẹ ghe ele?

¹⁸ Imhan lẹnmhin ghe mhan bha gba fo. Ọrẹyiriọ, mhan dẹ yẹ sabọ ha ghe ọria bhi uwedẹ nin Jehova rẹ ghe ọria. (Acts 10:34, 35) Ọnan yi ebe a lu osukpa. Ẹdẹdẹ mhan ha rẹ ha lu ọle. Mhan ki yẹ a tie iBaibo ẹdẹdẹ nan da sabọ lẹn ebi Osẹnobulua guanọ. Mhan a ha re obọ rẹkhan ene emhin nan, ọ ki rẹman ghe mhan re obọ rẹkhan adia nọnsi Jesu nọn yọle nin mhan hẹi ha bhohiẹn beji mhan rẹ gheghe daghe emhin.—John 7:24.

¹⁹ Obhi ẹghe khere ki kẹre nin Jesu Kristi nin Ojie nọnsẹmhan ha rẹ dọ bhu ẹbho ohiẹn. Ọle ida re ebi ọle gheghe daghe la ebi ọle gheghe họn rẹ bhohiẹn. Ọle ida bhohiẹn eku. Ibhohiẹn nọn gbale ọle ha bhu. (Isa. 11:3, 4) Ọnan dẹ wo mẹn bhi ẹlo!