1. Nĩ ũndũ ũrĩkũ Isaia aarathire wĩgiĩ Jesu? Na nĩkĩ ũndũ ũcio nĩ ũratwĩkĩra ngoro?

ISAIA nĩ atũcanjamũraga ngoro na agatũmĩrĩria kũgerera ũrathi wake wĩgiĩ Jesu Kristo. Oigire atĩ Jesu “ndagatuaga cira na gĩthiithi, o na kana arũithanie na ũndũ wa kũigua njukũ.” Na “athĩni akamatuagĩra cira na ũthingu.” (Isa. 11:3, 4) Ũndũ ũcio ũratwĩkĩra ngoro nĩkĩ? Tondũ tũratũũra thĩinĩ wa thĩ ĩiyũirũo nĩ mũthutũkanio. Nĩ twĩriragĩria mũno gũgakorũo na Mũcirithania mũkinyanĩru ũrĩa ũtagatũtuagĩra na maũndũ marĩa monekaga na maitho.

2. Nĩ ũndũ ũrĩkũ Jesu aatwathire twĩkage? Na tũkwarĩrĩria maũndũ marĩkũ gĩcunjĩ-inĩ gĩkĩ?

² O mũthenya nĩ tũtuagĩra andũ maũndũ-inĩ maingĩ. No tondũ tũtirĩ akinyanĩru, tũtingĩhota gũtua maũndũ ũrĩa kwagĩrĩire ta Jesu. Kaingĩ tũtuanagĩra na maũndũ marĩa monekaga na maitho. O na kũrĩ ũguo, hĩndĩ ĩrĩa Jesu aarĩ gũkũ thĩ, aarutire watho ũyũ: “Tigai gũtuanagĩra na maũndũ marĩa monekaga na maitho, ĩndĩ tuanagĩrai na ũthingu.” (Joh. 7:24) Ũndũ ũcio ũronania atĩ Jesu endaga twĩgerekanie nake harĩ kwaga gũtuanagĩra na maũndũ marĩa monekaga na maitho. Thĩinĩ wa gĩcunjĩ gĩkĩ, tũkwarĩrĩria maũndũ matatũ marĩa kaingĩ matũmaga andũ matuanĩre kũringana  na maũndũ marĩa marona na maitho, nĩmo rũrĩrĩ, ũtonga, na mĩaka. Tũkĩarĩrĩria o ũmwe wamo, nĩ tũkuona nĩ na njĩra irĩkũ tũngĩathĩkĩra watho wa Jesu.

3, 4. (a) Nĩ maũndũ marĩkũ maatũmire mũtũmwo Petero agarũrĩre muonere wake kwerekera andũ a Ndũrĩrĩ? (Rora mbica kĩambĩrĩria-inĩ gĩa gĩcunjĩ gĩkĩ.) (b) Jehova aateithirie Petero ataũkĩrũo nĩ ũndũ ũrĩkũ mwerũ?

³ Ta hũũra mbica maũndũ marĩa mũtũmwo Petero eeciragia hĩndĩ ĩrĩa eetirũo athiĩ Kaisarea kwa mũndũ wa Ndũrĩrĩ wetagwo Korinelio. (Atũm. 10:17-29) Petero aakũrĩte etĩkĩtie o ta Ayahudi arĩa angĩ atĩ andũ a Ndũrĩrĩ matiarĩ atheru. O na kũrĩ ũguo, nĩ harĩ maũndũ Petero onire magĩtũma agarũrĩre muonere ũcio. Kwa ngerekano, nĩ aakoretwo onio kĩoneki. (Atũm. 10:9-16) Onire kĩĩ? Aaikũrũkĩirio gĩtambaya kĩaiyũire nyamũ irĩ na thahu, naguo mũgambo kuuma igũrũ ũkĩmwĩra ũũ: “Petero, ũkĩra ũthĩnje ũrĩe!” Eerirũo ũguo maita matatũ no akĩrega biũ. O riita arega, mũgambo ũcio wamwĩraga “[atige] kuuga atĩ indo iria Ngai atheretie irĩ na thahu.” Hĩndĩ ĩrĩa kĩoneki kĩu gĩathirire, Petero nĩ aarigirũo mũno nĩ ũrĩa mũgambo ũcio weendaga kũmwĩra. O hĩndĩ ĩyo andũ arĩa maatũmĩtwo nĩ Korinelio magĩkinya. Petero nĩ aamũkĩrire ũtongoria wa roho mũtheru, makĩoyana na andũ acio na magĩthiĩ nginya mũciĩ gwa Korinelio.

⁴ Korũo Petero nĩ aatuire maũndũ kũringana na kĩrĩa onaga na maitho, ndangĩaingĩrire gwa Korinelio mũciĩ. Ayahudi matiathiaga mĩciĩ ya andũ a Ndũrĩrĩ. Nĩ kĩĩ gĩatũmire Petero eke ũguo o na kũrĩ na mũthutũkanio ũcio watũũrĩte kuo? Kĩoneki kĩrĩa onete na kũũmĩrĩrio nĩ roho mũtheru nĩ gwatũmire agarũrĩre muonere wa maũndũ. Thutha wa gũthikĩrĩria maũndũ marĩa Korinelio aatarĩirie, hatarĩ nganja nĩ aahutirio ngoro nginya akiuga ũũ atongoretio nĩ roho: “Rĩu nĩ ndaũkĩirũo wega atĩ Ngai ndarĩ mũthutũkanio, no thĩinĩ wa ndũrĩrĩ ciothe, mũndũ ũrĩa ũmwĩtigĩrĩte na wĩkaga ũrĩa kwagĩrĩire nĩ etĩkĩrĩkaga nĩ we.” (Atũm. 10:34, 35) Na githĩ ũcio ndwarĩ ũtaũku mwerũ harĩ Petero na ũngĩarehire ũgarũrũku mũnene! Ũtaũku ũcio mwerũ wĩgiĩ kwaga mũthutũkanio ũngĩahutirie Akristiano atĩa?

5. (a) Jehova endaga Akristiano othe mataũkĩrũo nĩ ũndũ ũrĩkũ? (b) O na gũtuĩka nĩ tũĩ ũhoro wa ma-rĩ, nĩ ũndũ ũrĩkũ ũngĩkorũo ũtigarĩte ngoro-inĩ citũ?

⁵ Jehova eendaga gũteithia Akristiano othe kũgerera Petero mataũkĩrũo atĩ ndarĩ mũthutũkanio. Ndonaga mũndũ arĩ wa bata nĩ ũndũ wa rangi wake, rũrĩrĩ, bũrũri, kana rũthiomi rwake. Mũndũ o wothe ũmwĩtigagĩra na ageka ũrĩa kwagĩrĩire nĩ amwĩtĩkagĩra. (Gal. 3:26-28; Kũg. 7:9, 10) Hatarĩ nganja o nawe nĩ ũĩ atĩ ũguo nĩguo kũrĩ. Ĩ angĩkorũo ũkũrĩire thĩinĩ wa bũrũri kana mũciĩ wĩna andũ marĩ na mũthutũkanio? O na gũtuĩka no wĩcirie ndũrĩ na mũthutũkanio, kwahoteka ngoro-inĩ yaku nĩ gũtigarĩte mũthutũkanio. O na Petero nĩ aacokire akĩonania mũthutũkanio, o na gũtuĩka nĩwe waheetwo gĩtĩo gĩa kũguũria atĩ Jehova ndarĩ mũthutũkanio. (Gal. 2:11-14) Tũngĩthikĩrĩria Jesu atĩa nĩguo tũtige gũtuanagĩra na maũndũ marĩa monekaga na maitho?

6. (a) Nĩ kĩĩ kĩngĩtũteithia kweheria ũndũ o wothe wĩgiĩ mũthutũkanio ngoro-inĩ citũ? (b) Riboti ĩrĩa yandĩkirũo nĩ mũthuri ũmwe wa kĩũngano yonanirie ũndũ ũrĩkũ?

⁶ Nĩ tũrabatara gwĩthuthuria wega tũkĩhũthĩra Kiugo kĩa Ngai nĩguo tuone kana tũrĩ na mũthutũkanio ũtigarĩte ngoro-inĩ citũ. (Thab. 119:105) Ningĩ no tũbatare ũteithio kuuma kũrĩ andũ arĩa angĩ mangĩkorũo makĩona tũrĩ na tũmaũndũ tũronania tũrĩ na mũthutũkanio, o na angĩkorũo ithuĩ tũtirona ũguo. (Gal. 2:11, 14) No gũkorũo  tũmaũndũ tũu nĩ tũrikĩrĩte mũno thĩinĩ witũ ũũ atĩ tũtiramenya tũrĩ natuo. Kwa ngerekano, ta wĩcirie ũhoro wa mũthuri ũmwe wa kĩũngano waandĩkire riboti ĩgiĩ mũrũ wa Ithe witũ na mũtumia wake maarĩ ũtungata-inĩ wa hĩndĩ ciothe. Mũrũ wa Ithe witũ ũcio warĩ ũtungata-inĩ wa hĩndĩ ciothe oimĩte rũrĩrĩ-inĩ rũnini rwahũthĩtio nĩ andũ arĩa angĩ. Mũthuri ũcio wa kĩũngano ndaamenyaga atĩ we aarĩ na mũthutũkanio ngoro-inĩ kwerekera rũrĩrĩ rũu rũnini. Thĩinĩ wa riboti ĩyo nĩ aagwetire maũndũ maingĩ mega megiĩ mũrũ wa Ithe witũ ũcio, no akĩrĩkĩrĩria oigire ũũ: “O na gũtuĩka oimĩte [rũrĩrĩ-inĩ rũrũ], mĩtugo yake na mũikarĩre wake nĩ ũteithagia andũ mataũkĩrũo atĩ gũkorũo uumĩte [rũrĩrĩ-inĩ rũu] gũtionanagia atĩ no mũhaka ũikare ũrĩ na gĩko na ũrĩ wa kĩrathi gĩa thĩ, ta ũrĩa andũ aingĩ a [rũrĩrĩ rũu] maikaraga.” Tũreruta ũndũ ũrĩkũ? Gũtekũmakania maũndũ marĩa twĩhokeirũo, no mũhaka twĩthuthurie wega na tũkorũo twĩhaarĩirie gwĩtĩkĩra ũteithio nĩguo tuone ũndũ o wothe wĩgiĩ mũthutũkanio ũngĩkorũo ũtigarĩte ngoro-inĩ citũ. Nĩ atĩa ũngĩ tũngĩka?

7. Tũngĩonania atĩa atĩ nĩ tũrahingũra ngoro citũ biũ?

⁷ Tũngĩhingũra ngoro citũ biũ, mũthutũkanio no ũthire na wendo ũcoke handũ haguo. (2 Kor. 6:11-13) Hihi nĩ ũkoragwo na kamũtugo ga kwenda kũnyitanĩra tu na andũ a rũrĩrĩ rwanyu, bũrũri wanyu, kana arĩa mwaragia rũthiomi rũmwe? Angĩkorũo nĩguo, hingũra ngoro yaku. Na githĩ to wĩre mũndũ uumĩte rũrĩrĩ-inĩ rũngĩ kana bũrũri ũngĩ mũkahunjie nake kana ũmũnyite ũgeni gwaku mũciĩ mũrũme kanyamũ! (Atũm. 16:14, 15) Ũngĩkaga ũguo, ũkũiyũria ngoro yaku wendo nginya mũthutũkanio wage handũ ũngĩikara. No nĩ harĩ o maũndũ mangĩ tũkoragwo na mwerekera wa gũtuĩra arĩa angĩ namo kũringana na kĩrĩa tũrona na maitho. Rekei twarĩrĩrie ũtonga.

8. Kũringana na Maũndũ ma Alawii 19:15, ũtonga kana ũthĩni ũngĩhutia atĩa ũrĩa tuonaga andũ arĩa angĩ?

⁸ Ũtonga kana ũthĩni nĩ ũndũ ũngĩ ũngĩhutia ũrĩa tuonaga andũ arĩa angĩ. Maũndũ ma Alawii 19:15 [NW] yugaga: “Ndũkanathutũkanie mũndũ ũrĩa mũthĩni kana ũkorũo na kĩmenyano harĩ mũndũ ũrĩa mũtongu. Wagĩrĩirũo gũtuĩra mũndũ ũrĩa ũngĩ na kĩhooto.” No mũndũ gũkorũo arĩ mũtongu kana arĩ mũthĩni kũngĩhutia atĩa ũrĩa tũmuonaga?

9. Nĩ ũndũ ũrĩkũ Suleimani aandĩkire andũ mekaga? Na ũtũrutaga ũndũ ũrĩkũ?

⁹ Roho mũtheru nĩ watongoririe Suleimani kwandĩka ũndũ wa kĩeha andũ mekaga nĩ ũndũ wa kwaga gũkinyanĩra. Aandĩkire ũũ thĩinĩ wa Thimo 14:20: “Ngĩa ĩthũũragwo nĩ nginya mũndũ wa itũũra rĩao, no arata a gĩtonga nĩ aingĩ.” Thimo ĩyo ĩtũrutaga ũndũ ũrĩkũ? Tũngĩaga kwĩmenyerera, no twĩkore tũkĩenda gũkorũo tũrĩ arata a aarĩ na ariũ a Ithe witũ arĩa atongu, na twĩtheme arĩa athĩni. Nĩkĩ nĩ ũgwati gũtua kana mũndũ nĩ wa bata kũringana na indo iria arĩ nacio?

10. Nĩ thĩna ũrĩkũ Jakubu aaririe ũhoro waguo?

¹⁰ Tũngĩtuagĩra andũ kũringana na indo iria marĩ nacio, tũngĩkorũo tũkĩgayũkania kĩũngano na irathi. Mũtũmwo Jakubu nĩ oigire atĩ thĩna ũcio nĩ wagayũkanagia ciũngano imwe karine-inĩ ya mbere. (Thoma Jakubu 2:1-4.) No mũhaka twĩmenyerere mũno nĩguo tũtigetĩkĩrie mwĩcirĩrie ũcio ũthũkie ciũngano citũ. Tũngĩrũa atĩa na mwĩcirĩrie ta ũcio wa gũtuĩra andũ kũringana na maũndũ marĩa maroneka na maitho?

11. Hihi ũrata wa mũndũ na Jehova wĩhocetie harĩ indo iria arĩ nacio? Taarĩria.

¹¹ Twagĩrĩirũo kuona aarĩ na ariũ a Ithe witũ ta ũrĩa Jehova amonaga. Mũndũ ndakoragwo arĩ wa bata maitho-inĩ ma Jehova tondũ atĩ nĩ mũtongu kana nĩ mũthĩni. Gũtirĩ hĩndĩ ũrata witũ na Jehova ũgaakorũo  wĩhocetie harĩ indo iria tũrĩ nacio kana iria tũtarĩ. O na gũtuĩka Jesu nĩ oigire atĩ “ũgaakorũo ũrĩ ũndũ mũritũ harĩ mũndũ mũtongu gũtonya Ũthamaki-inĩ wa igũrũ,” ndoigire gũtingĩhotekeka. (Mat. 19:23) Ningĩ Jesu no oigire: “Gũkena-rĩ, nĩ inyuĩ athĩni nĩ gũkorũo Ũthamaki wa Ngai nĩ wanyu.” (Luk. 6:20) O na kũrĩ ũguo, ũguo ti kuuga atĩ andũ othe athĩni nĩ maarathimĩtwo na njĩra ya mwanya na nĩ maamũkagĩra morutani ma Jesu. Athĩni aingĩ matiatindanĩire. Ũndũ ũcio ũratũruta atĩ tũtingĩhota gũthima ũrata wa mũndũ na Jehova kũringana na indo iria arĩ nacio.

12. Nĩ ũtaaro ũrĩkũ Maandĩko maheete andũ arĩa atongu na arĩa athĩni?

¹² Nĩ tũrathimĩtwo na aarĩ na ariũ a Ithe witũ aingĩ atongu na athĩni, mendete Jehova na mamũtungatagĩra na ngoro yothe. Maandĩko meraga arĩa atongu “matikaigage mwĩhoko wao harĩ ũtonga ũrĩa ũtamenyagĩrũo, ĩndĩ mehokage Ngai.” (Thoma 1 Timotheo 6:17-19.) Ningĩ Kiugo kĩa Ngai kĩraga andũ othe a Ngai, marĩ atongu kana marĩ athĩni, methemage kwenda mbeca. (1 Tim. 6:9, 10) Tũngĩonaga aarĩ na ariũ a Ithe witũ ta ũrĩa Jehova amonaga tũtirĩmatuagĩra kũringana na kĩrĩa marĩ nakĩo kana kĩrĩa matarĩ. Ĩ nakuo gũtuĩra mũndũ nĩ ũndũ wa mĩaka ĩrĩa arĩ nayo? Hihi nĩ twagĩrĩirũo gwĩka ũguo? Rekei tuone.

13. Bibilia ĩtũrutaga atĩa ũhoro-inĩ wĩgiĩ gũtĩa andũ arĩa akũrũ?

¹³ Bibilia nĩ ĩtwĩraga kaingĩ tũtĩage arĩa akũrũ. Maũndũ ma Alawii 19:32 yugaga: “[Ũkagĩra nĩ ũndũ wa] mũthuri ũragĩa mbuĩ, na ũtĩage gĩthiithi kĩa mũndũ ũrakũra, ũgĩĩtigagĩre Ngai waku.” O na Thimo 16:31 ĩtwĩraga atĩ “kĩongo kĩrĩ mbuĩ nĩ thũmbĩ ĩrĩ ũgemu; kuoneka kĩonekaga na njĩra ya ũthingu.” Nake Paulo nĩ eerire Timotheo ndakanakũũme mũrũ wa Ithe witũ mũkũrũ, no amuonage ta arĩ ithe. (1 Tim. 5:1, 2) Timotheo nĩ aagĩrĩirũo kũhe ariũ a Ithe witũ acio akũrũ gĩtĩo na kũmacaĩra, o na gũtuĩka nĩ eehokeirũo kũmatongoria na gĩkĩro kĩna.

14. Nĩ hĩndĩ ta ĩrĩkũ ũngĩkorũo ũrĩ ũndũ mwagĩrĩru gũtaara kana kũrũnga mũndũ o na angĩkorũo nĩ mũkũrũ gũtũkĩra?

¹⁴ O na kũrĩ ũguo-rĩ, hihi twagĩrĩirũo kũhũthagĩra ũtaaro ũcio hĩndĩ ciothe? Kwa ngerekano-rĩ, hihi nĩ twagĩrĩirũo kũnyitanĩra na mũndũ mũkũrũ angĩkorũo nĩ arehia akĩendaga kana nĩ aragathĩrĩria ũndũ ũtakenagia Jehova? Jehova ndagatuanĩra kũringana na maũndũ marĩa maroneka na maitho na ndakaaga gũtuĩra mũndũ wĩhagia akĩendaga atĩ tondũ nĩ mũkũrũ. Ta rora ũndũ ũrĩa ũgwetetwo thĩinĩ wa Isaia 65:20 ĩrĩa yugaga: “Mũndũ mwĩhia, o na angĩgakinyia mĩaka igana, [nĩ akaanyitwo nĩ kĩrumi, NW].” Nĩ harĩ ũndũ ũngĩ o ta ũcio ũgwetetwo thĩinĩ wa kĩoneki kĩa Ezekieli. (Ezek. 9:5-7) Kwoguo hĩndĩ ciothe twagĩrĩirũo gwĩciragia ũrĩa tũngĩtĩa Ũrĩa-ũtũire-ho-kuuma-o-tene, na nĩwe Jehova. (Dan. 7:9, 10, 13, 14) Tweka ũguo, tũtirĩtigagĩra kũrũnga mũndũ ũrabatara kũrũngwo gũtekũmakania arĩ na mĩaka ĩigana.—Gal. 6:1.

15. Nĩ ũndũ ũrĩkũ tũreruta kuuma kũrĩ Paulo wĩgiĩ gũtĩa ariũ a Ithe witũ ethĩ?

¹⁵ Ĩ nao ariũ a Ithe witũ ethĩ arĩa marĩ kĩũngano-inĩ ũmonaga atĩa? Timotheo arĩ mwĩthĩ aandĩkĩirũo ũũ nĩ mũtũmwo Paulo: “Ndũkanareke mũndũ o na ũrĩkũ akũire atĩ tondũ ũrĩ mwĩthĩ. Handũ ha ũguo, tuĩka kĩonereria harĩ arĩa ehokeku ũhoro-inĩ wa kwaria, mĩthiĩre, kuonania wendo, wĩtĩkio, na ũtheru.” (1 Tim. 4:12) Kwahoteka Timotheo ndaakinyĩtie mĩaka 35 rĩrĩa Paulo aamwandĩkĩire ũguo. O na kũrĩ ũguo, Paulo nĩ aamwĩhokeire mawĩra maritũ. Gũtekũmakania kĩrĩa gĩatũmaga Paulo amũhe ũtaaro ũcio, nĩ harĩ ũndũ wa bata tũreruta. Tũtiagĩrĩirũo o na hanini gũtuĩra ariũ a Ithe witũ ethĩ kũringana na mĩaka yao. Twagĩrĩirũo  kũririkanaga atĩ o na Jesu, Mwathani witũ, aatungatire gũkũ thĩ arĩ na thĩ wa mĩaka mĩrongo ĩtatũ na ĩna.

16, 17. (a) Athuri magĩrĩirũo gũtua atĩa kana mũrũ wa Ithe witũ nĩ agĩrĩire gũtuĩka ndungata kana mũthuri wa kĩũngano? (b) Nĩ na njĩra ĩrĩkũ mawoni maitũ kana ma ũndũire witũ mangĩtũma twĩke mũgarũ na Maandĩko?

¹⁶ No gũkorũo thĩinĩ wa ũndũire wanyu anake nĩ mahũthagio. Angĩkorũo nĩguo, athuri a kĩũngano no mahũthĩrĩrie kuuga mũrũ wa Ithe witũ mwĩthĩ ũhingĩtie ithimi cia Kĩĩmaandĩko amũrũo atuĩke ndungata ya kĩũngano kana mũthuri wa kĩũngano. Athuri a kĩũngano othe magĩrĩirũo kũririkanaga atĩ Maandĩko matiugĩte mũndũ agĩrĩirũo gũkorũo akinyĩtie mĩaka ĩigana nĩgetha atuĩke ndungata kana mũthuri wa kĩũngano. (1 Tim. 3:1-10, 12, 13; Tit. 1:5-9) Mũthuri wa kĩũngano angĩthondeka watho wĩhocetie harĩ ũndũire, ndangĩkorũo agĩka kũringana na Maandĩko. Ariũ a Ithe witũ ethĩ maagĩrĩire gũthimwo na Kiugo kĩa Ngai, no ti na mawoni ma mũndũ kana ma ũndũire.—2 Tim. 3:16, 17.

¹⁷ Ta wĩcirie ũrĩa mawoni ta macio matarĩ ma Kĩĩmandĩko mangĩhingĩrĩria ariũ a Ithe witũ arĩa makinyanĩirie ithimi. Bũrũri-inĩ ũmwe ndungata ĩmwe ya kĩũngano yarĩ na ũhoti mũnene wa gwĩka maũndũ nĩ yehokeirũo maũndũ maritũ kĩũngano-inĩ. O na gũtuĩka athuri a kĩũngano nĩ metĩkanĩirie atĩ mũrũ wa Ithe witũ ũcio mwĩthĩ nĩ aahingĩtie ithimi cia Kĩĩmandĩko cia gũtuĩka mũthuri wa kĩũngano, matioigire amũrũo. Athuri amwe maikangĩtie matukũ moigire atĩ ndangĩatuĩkire mũthuri wa kĩũngano tondũ onekaga arĩ mwĩthĩ mũno. Nĩ ũndũ wa kĩeha kuona atĩ mũrũ wa Ithe witũ ũcio aagire kwamũrũo nĩ ũndũ wa kuoneka arĩ mwĩthĩ. O na gũtuĩka ũyũ no ũndũ ũmwe twagweta, riboti kuuma kũndũ na kũndũ ironania atĩ mwĩcirĩrie ũyũ ũrĩ kũndũ kũingĩ thĩinĩ wa thĩ. Na githĩ ti ũndũ wa bata mũno kũhũthagĩra Maandĩko handũ ha kũrũmagĩrĩra mawoni maitũ kana ma ũndũire witũ! Gwĩka ũguo nĩ gũgũtũteithia gwathĩkĩra Jesu na gũtiga gũtuanagĩra na maũndũ marĩa maroneka na maitho.

18, 19. Twagĩrĩirũo gwĩka atĩa nĩgetha tuonage andũ arĩa angĩ ta ũrĩa Jehova amonaga?

¹⁸ O na gũtuĩka tũtirĩ akinyanĩru, no twĩrute kuonaga andũ arĩa angĩ ta ũrĩa Jehova amonaga, handũ ha kũmathutũkania. (Atũm. 10:34, 35) No no nginya twĩrutanĩrie mũno na tũikare tũkĩririkanagio nĩ Kiugo kĩa Ngai. Twahũthĩra iririkania icio, tũgũthiĩ na mbere gwathĩkĩra watho wa Jesu ũrĩa ũtwĩrĩte tũtige gũtuanagĩra na maũndũ marĩa maroneka na maitho.—Joh. 7:24.

¹⁹ Ihinda rĩtarĩ kũraihu, Mũthamaki witũ Jesu Kristo nĩ egũtuĩra andũ othe ciira, na ndekũmatuĩra kũringana na maũndũ marĩa arona na maitho kana marĩa araigua na matũ, no nĩ na njĩra ya kĩhooto. (Isa. 11:3, 4) Na githĩ ũcio ndũgakorũo ũrĩ ũndũ mwega mũno!