1. Isaia ese Iesu be ede e perovetalaia toma, bona dahaka dainai una ese e hagoadadamu?

ISAIA ese eda Lohiabada Iesu Keriso e perovetalaia karana ese e hagoadadamu bona helaro e henidamu. Isaia na e peroveta Iesu na “basine hahemaoro, matana e itamu ḡaudia daidiai, bona lalona basine hadaia, taiana e kamonaimu herevadia daidiai.” To “mai kara maoromaorona ida ia ese ogoḡami taudia baine hahemaoro henidia.” (Isa. 11:3, 4) Dahaka dainai una ese e hagoadadamu? Badina ina tanobada na heinai heheni karadia amo e honu. Ta ura dikadikamu Hahemaoro Tauna ḡoevadaena baine lohia, ia na dia ita oromada amo be hahemaoromu!

2. Iesu ese e haḡanida dahaka baita kara, bona ina atikol ai dahaka baita herevalaimu?

² Dina ta ta ai ita ese taunimanima na ta hahemaoro henidiamu. To, ita na dia ḡoevadae tauda dainai, basita hahemaoro ḡoevaḡoevamu Iesu heḡereḡerena. Ita na ta itamu ḡaudia amo ta uramu baita hahemaoro. To, Iesu tanobada ai e nohova neganai, ina haheḡani e heni: “Ḡau oromadia amo basio hahemaoro, a ba hahemaoro ḡoevaḡoeva.” (Ioa. 7:24) E hahedinaraia  ḡoevaḡoevamu, Iesu na e uramu ia baita tohotohoa bona ma haida na toadia amo basita hahemaoro henidia. Ina atikol ai, taunimanima ese ma haida e hahemaoro henidiamu badidia toi baita herevalaimu: Idau bese, taḡa, bona laḡani. Unu badi ta ta baita herevalaimu neganai, Iesu ena haheḡani baita badinaia daladia namodia baita lalodia.

3, 4. (a) Dahaka e vara dainai aposetolo Petro ese ena lalohadai Idau Bese taudia ediai e haidaua? (Rau 8 ai laulau ba itaia.) (b) Iehova ese Petro e durua dahaka diba matamatana e lalopararalaia?

³ Mani a laloa, aposetolo Petro na e boiria Kaisarea ai Idau Bese tauna Korenelio ena ruma bainela neganai, ḡau momo e lalova. (Kara 10:17-29) Petro na ena negai e nohova Iuda taudia haida heḡereḡeredia, e laloava Idau Bese taudia na mimiro. To, enai e vara ḡaudia haida dainai ena lalohadai e haidaua. Heḡereḡere, ia na matahanai ta e abia. (Kara 10:9-16) Petro be dahaka e ita? Bosea hetomana ḡauna ta, lalonai na animal mai mirodia amo e honu, na e tua dobi ia vairanai bona guba amo gado ta ese e hamaoroa: “Petro e, a tore isi, avaladia, bavani.” Petro na se ura. Bena una guba amo e boi gadona ese e hamaoroa: “Dirava ese e haḡoevadia ḡaudia na basioto didika.” Petro na una matahanai amo e noga neganai, una gado ese e hamaoroa herevadia daidiai e lalohekwarahiva. Se daudau, Korenelio ena hesiai taudia e kau. Petro na lauma helaḡa amo hahekau herevana e abia murinai, unu hesiai taudia ida Korenelio ena ruma ela.

⁴ Bema Petro na taunimanima oromadia amo bema hahemaoro, Korenelio ena ruma ai basinema vareai. Iuda taudia na Idau Bese edia ruma ai asie vareaiva. To dahaka dainai Petro na ela, ena be heinai heheni karana na e varava? Petro na e itaia matahanaina bona lauma helaḡa ese e hagoadaia. Petro ese Korenelio ena hereva ibounai e kamonai murinai, ini e gwau toma: “Vada name diba momokani Dirava ese taunimanima oromadia se lalomu, a bese iboudiai lalodiai ia garina e garimu bona kara maoromaoro e karamu tauna na ia ese e lalo namo heniamu.” (Kara 10:34, 35) Petro enai una na diba matamatana​—una na mai anina bada! Edena dala ai Kristen taudia na taunimanima oromadia basie lalo karana ese baine durudia?

5. (a) Iehova na e uramu Kristen taudia be dahaka bae lalopararalaia? (b) Ena be hereva momokani na mai dibada, to dahaka lalohadai baita abia diba?

⁵ Iehova ese Petro ena amo Kristen taudia iboudiai e durudia bae laloparara Ia ese taunimanima oromadia na se lalomu. Ia enai bese, tano, iduhu, eiava gado idauidau na dia ḡau badadia. To, Ia garina e garimu bona kara maorodia e karamu tauna eiava hahinena hari e abia daemu. (Gal. 3:26-28; Apok. 7:9, 10) Mai dibamu una na hereva momokanina. To bema o bada tanona eiava rumana ai heinai heheni karadia e varamu be ede bamona? Reana bo lalomu taunimanima oromadia na so lalomu, to kudoumu ai heinai heheni karana na baine mia diba. Ena be Petro ese ma haida e hadibadiava Iehova ese taunimanima oromadia na se lalova, to gabeai ia ese heinai heheni karana e hahedinaraia. (Gal. 2:11-14) Edena dala ai Iesu baita kamonai henia bona ma haida na toadia amo basita hahemaoro henidia?

6. (a) Dahaka ese baine duruda diba heinai heheni karadia baita dadarai? (b) Elda tadikaka ta ena hereva ese dahaka e hahedinaraia?

⁶ Namona na Dirava ena Hereva ai eda kara baita tahu namonamo, unu amo baita diba heinai heheni lalohadaidia o  hemamidia dounu ta dogotaomu eiava. (Sal. 119:105) Danu, ma haida edia heduru baita noi bema eda heinai heheni karadia e itamu eiava lasi, badina ita ese unu na asita itamu. (Gal. 2:11, 14) Reana unu kara na ta manadalai dainai asita lalopararamu ita na unu kara ta hahedinaraimu. Heḡereḡere, mani elda ta ese ful-taim hesiai ḡaukarana ai tadikaka ta bona adavana e herevalaidia karana aita laloa. Una tadikaka na idau bese amo bona haida ese una bese na asie ura heniava. Toana na elda tauna na se dibava ia na una bese e inai heniava. Ena sivarai lalonai, ia ese una tadikaka ena kara namodia momo e herevalai; to ena hereva dokonai eto: “Ena be ia na ina bese amo, to ena kara bona mauri dalana ese ma haida e durudiamu bae laloparara, ena be ta ena bese na idau, to una ese se hahedinaraiamu una bese taudia iboudiai edia kara eiava mauri dalana na dia namo.” Una ese dahaka e hadibadamu? Herevana dahaka maduna ta huamu, to namona na siboda eda kara baita tahu namonamo bona mai eda ura ida heduru baita abi, unu amo kudouda ai e miamu heinai heheni karana baita lalopararalaia. Dahaka danu baita kara diba?

7. Edena dala ai baita hahedinaraia diba eda lalokau ta habadaiamu?

⁷ Bema eda lalokau baita habadaiamu, heinai heheni karana na basita hahedinaraiamu. (2 Kor. 6:11-13) Oi be emu bese, tano, iduhu, bona gado tamona taudia mo o hebamo henidia hanaihanaimu, a? Bema oibe, emu lalokau ba habadaia na namo. Namona na idau bese taudia ba boiridia ba haroro hebou eiava emu ruma ai bavaniani hebou. (Kara 16:14, 15) Bema unu bo kara tomamu, kudoumu ai lalokau bo habadaiamu unu amo heinai heheni karana bo dadaraia dibamu. To ma dala haida ai ita ese haida na toadia amo ta uramu baita hahemaoro henidia. Mani taḡa aita herevalaia.

8. Levitiko 19:15 ena hereva heḡereḡerena, taḡa eiava ogoḡami taudia be ede baita lalodia toma?

⁸ Taḡa dainai ma haida baita lalodia kerere dibamu. Levitiko 19:15 na e tomu: “Basio hahemaoro koikoi: ogoḡami tauna basio bogaia hisi, bona taḡa tauna basio matauraia; kara maoromaoro ai dekemu taudia ba hahemaoro henidia.” To edena dala ai ta na ena taḡa eiava ogoḡami dainai baita laloa kerere diba?

9. Solomon be dahaka e herevalaia, bona una ese dahaka e hadibadamu?

⁹ Solomon na lauma helaḡa ese e hagoadaia dainai dia ḡoevadae taudia e herevalaidia. Hereva Lada-isidia 14:20 ai, ia na eto: “Ogoḡami tauna na ia dekena tauna ese danu se ura heniamu, a taḡa tauna turana na hutuma.” Ina aonega herevana ese dahaka e hadibadamu? Bema basita henahua tohomu, baita uramu mai edia kohu tadikakadia mo baita hebamo henidia a ogoḡami tadikakadia be lasi. Dahaka dainai mai edia kohu eiava asi edia kohu taudia baita hahemaoro henidia na mai ena dika?

10. Iakobo ese dahaka hekwakwanai e herevalaia?

¹⁰ Bema ma haida edia kohu daidiai baita hahemaoromu, kongrigeisen baita hapararaia dibamu. Hahediba tauna Iakobo ese e hahedinaraia aposetolo edia negai una hekwakwanai ese kongrigeisen haida e hapararadia. (Iakobo 2:1-4 ba duahi.) Hari ina negai namona na baita henahua toho, una lalohadai ese eda kongrigeisen na basine hapararaia. Edena dala ai ma haida toadia amo baita hahemaoro karana baita dadaraia?

11. Edena dala ai ta ena taḡa ese ena hetura karana Iehova ida baine hanamoa eiava baine hadikaia diba? Mani a herevalaia.

¹¹ Tadikakada na Iehova ese e lalodiamu heḡereḡerena baita lalodia. Ta na dia ena taḡa eiava ogoḡami dainai Iehova ese e laloa badamu. Eda hetura karana Iehova ida na  baine goada diba, ena be ita na taḡa tauda eiava ogoḡami tauda. Momokani, Iesu na eto, “taḡa tauna na guba basileiana iduarana ai baine heloge” eiava baine hekwarahi, to se gwa basine vareai diba. (Mat. 19:23) Danu, Iesu na eto: “Ogoḡami taumui be nanamo, badina be Dirava ena basileia na umui emui.” (Luka 6:20) To, una anina na dia ogoḡami taudia iboudiai ese Iesu ena hahediba herevadia bae abi dae bona hahenamo badana bae abi. Ogoḡami taudia momo na asie kamonai. Mai anina bada ḡauna na ina: Ta na ena kohu amo Iehova e hetura heniamu karana dainai basita hahemaoro henia.

12. Baibul ese taḡa bona ogoḡami taudia be dahaka e hadibadia?

¹² Ta moalemu badina eda tadikaka bona taihu momo, taḡa bona ogoḡami taudia, na mai kudoudia idoinai ida Iehova e lalokau heniamu bona e hesiai heniamu. Baibul ese taḡa taudia e hadibadiamu, “asie mia daudaumu kohudia na basie laro, a Mauri Diravana mo bae laroa.” (1 Timoteo 6:17-19 ba duahi.) Danu, Baibul ese Dirava ena taunimanima iboudiai, taḡa bona ogoḡami taudia, e hadibadiamu moni iura henina karana ai nahuadia bae toho. (1 Tim. 6:9, 10) Momokani, tadikakada na Iehova ese e itadiamu heḡereḡerena baita itadiamu neganai, edia taḡa eiava ogoḡami dainai basita hahemaoro henidiamu. To, ta laḡanina be ede bamona? Laḡanina dainai baita hahemaoro henia be maoro, a? Mani aita itaia.

13. Baibul ese burukadia imatauraidia karana ai dahaka e hadibadamu?

¹³ Nega momo Baibul ese e hadibadamu burukadia baita matauraidia. Levitiko 19:32 na eto: “Tau burukana vairanai ba tore isi; iahu ba matauraia; emu Dirava garina ba gari.” Danu, Hereva Lada-isidia 16:31 ese e hadibadamu, “hui buruka na havava ḡauna mai hairaina; noho maoromaoro dainai e varamu.” Bona Paulo ese Timoteo e hadibaia tau badana ta basine gwauraia dika, to baine kara henia tamana na heto. (1 Tim. 5:1, 2) Ena be Timoteo na mai ena siahu unu tadikaka badadia baine naridia, to namona na mai ena hebogahisi bona hemataurai ida baine kara henidia.

14. Edena nega ai taunimanima badana ta baita durua eiava baita matahakani henia na maoro?

¹⁴ To, una hahekau herevana be ede baita badinaia toma? Heḡereḡere, bema taunimanima badana ta na mai ena ura ida kara dikana ta baine karaia eiava Iehova ese se moalelaiamu ḡauna ta baine durua, ena kara baita durua be namo, eiava? Iehova ese ta na dia toana amo baine hahemaoro henia eiava mai ena ura ida e kara dikamu tauna na basine lalonamo heniamu ena be laḡanina na bada. Isaia 65:20 ena hahekau herevana mani a laloa: “Laḡani sinahu-ta basine haḡuḡurudia tauna na kara dika tauna bae gwauraia.” Hahekau herevana unuhetomana ta na Esekiel ena matahanai ai e hahedinaraia. (Ese. 9:5-7) Una dainai, ḡau badana na hanaihanai Ḡauka eiava Iehova Dirava baita matauraia. (Dan. 7:9, 10, 13, 14) Unu baita kara tomamu neganai, basita garimu sisiba baine abi tauna baita durua totona, ena be laḡanina na bada eiava maraḡi.​—Gal. 6:1.

15. Aposetolo Paulo ena amo eregabe tadikakadia imatauraidia karana ai dahaka ta dibamu?

¹⁵ Kongrigeisen ai eregabe tadikakadia be ede bamona? Ede o lalodia tomamu? Aposetolo Paulo ese eregabe tauna Timoteo e tore henia, eto: “Ta basine dadaraimu oi na eregabe mo dainai. A hereva ai, kara ai, lalokau ai, abidadama ai, lalo-ḡoevaḡoeva ai, kamonai taudia edia ihaḡoina tauna ai baola.” (1 Tim. 4:12) Paulo ese unu hereva e tore negana ai, Timoteo laḡanina na reana 30 heḡereḡerena. To, Paulo ese maduna badadia haida e henia. Ena be una sisiba na  mai badinai e gwauraia, to anina na hedinarai ḡoevaḡoeva. Namona na eregabe tadikakadia na laḡanidia daidiai basita hahemaoro henidia. Baita helalotao, eda Lohiabada Iesu na laḡanina 30 heḡereḡerena tanobada ai ena hesiai ḡaukara e karaia.

16, 17. (a) Edena dala ai elda taudia na bae diba bema tadikaka ta na heḡereḡere hesiai tauna eiava elda ai bainela? (b) Edena dala ai siboda eda lalohadai eiava eda gabu taudia edia lalohadai ese Baibul ena hereva bae hadikaia diba?

¹⁶ Tano haida ai, taunimanima ese eregabe tataudia na asie lalodia badamu. Una dainai, kongrigeisen elda haida na asie uramu eregabe tadikakadia na hesiai taudia eiava elda maduna bae henidia, ena be unu eregabe na heḡereḡere una maduna bae huaia. Namona na elda taudia na bae helalotao, Baibul na se gwa ta na laḡanina hida ai hesiai tauna eiava elda ta ai bainela. (1 Tim. 3:1-10, 12, 13; Tito 1:5-9) Bema elda ta na ena gabu taudia edia lalohadai dainai taravatu ta baine atoa, ia ese Baibul ena hereva na se badinaiamu. Namona na elda taudia ese eregabe tataudia na Baibul ena taravatu heḡereḡerenai bae haerodia, dia sibodia edia lalohadai eiava edia gabu taudia edia lalohadai bae badinaia.​—2 Tim. 3:16, 17.

¹⁷ Bema elda taudia ese Baibul ena taravatu basie badinaiamu, una ese be koudiamu tadikaka goadadia na hesiai taudia eiava elda ai bae halaodia totona. Tano ta ai, hesiai tauna ta na maduna badadia haida e henia. Ena be ena kongrigeisen eldadia na e lalotamona una eregabe tadikakana na elda tauna ese baine badina Baibul taravatudia na e badina, to asie abia hidi elda tauna ai bainela totona. Elda burukadia haida na e laloava una tadikaka na matamata dainai elda ai bainela na dia heḡereḡere. Idia ese una tadikaka na toana dainai asie abi hidi. Ena be una na ekspiriens tamona mo, to ripoti haida ese e hahedinaraiamu tano momo ai una na e varamu. Ḡau badana na Baibul ena hereva baita badinaia, dia siboda eda lalohadai eiava eda gabu taudia edia lalohadai baita badina. Una dala amo Iesu baita kamonai henia bona ma haida na toadia amo basita hahemaoro henidia.

18, 19. Dahaka ese baine duruda unu amo ma haida na Iehova ese e lalodiamu heḡereḡerena baita lalodia?

¹⁸ Ena be ita na dia ḡoevadae tauda, to namona na ma haida na Iehova ese e lalodiamu dalana heḡereḡerenai baita lalodia. (Kara 10:34, 35) To namona na hanaihanai baita ḡaukara goada Dirava ena Hereva amo e maimu hahediba herevadia baita badina totona. Unu baita kara tomamu neganai, Iesu ena haheḡani baita badinaiamu, taunimanima na oromadia amo basita hahemaoro henidia.​—Ioa. 7:24.

¹₉ Kahirakahira eda King, Iesu Keriso, ese taunimanima iboudiai baine hahemaoro henidia, dia e itamu ḡaudia daidiai eiava e kamonaimu herevadia daidiai, to mai kara maoromaorona ida baine hahemaoro. (Isa. 11:3, 4) Una na nega namo hereana!