1. Jesajaba tae-e Jesub xa ge kēbo tsî nēsa tae-i ǃaroma ra ǂkhâǃnâ da?

ǁÎB KĒBOS Jesub dis ǃnâ-ūb ge Jesajaba sida ǂgaoba ra khoakhoa tsî ǃâubasensa ra mā. Jesajab ge ge mî Jesub ge “mûra âb ra mû khami ǀgoraǃgâ tide; ǁîb ge ǁkhāti ǂgaera âb ra ǁnâu khami ǂgōǀau tide” xaweb ge “ǂhanu-aisib ǀkha nîra ǀgoraǃgâ” di. (Jes. 11:3, 4) Nēsa tae-i ǃaroma ra ǂkhâǃnâ da? ǃHaoǃnâbe ǀgoras xa ǀoa hâ ǃhūbaib ǃnâ da ûi hâ amaga. Hoa da ge ǀoasa kurusa ūhâ ǀgoraǃgâ-aoba ǃâu hâ hîna ai-īsib ai ǀgoraǃgâ da tideba.

2. Jesuba tae-e ge mîmāda î da dī tsî tae-e da nē ǁkhāǁkhāǃâs ǃnâ nî ǃhoaǃgao?

² Tsēs hoasa da ge khoena ra ǀgoraǃgâ. ǀOasa kurusa da ūhâ tama amaga da ge Jesub khami khoena ǃgâi ǀgaub ǃnâ a ǀgoraǃgâ ǁoa. Sida ge mûs ra mû xūn xa ra ǂgaeǂhapu-e. Jesub ge ǃhūbaib aib ge hâ io ge mî: “Tā mûs ǃoa ǀgoraǃgâ, î du ǂhanu-ai ǀgoraǃgâ-e ǀgoraǃgâ.” (Jhn. 7:24) Jesub ge ra ǂhâba î da ǁîb khami ī tsî khoena tā ai-īsib ai ǀgoraǃgâ. Nē ǁkhāǁkhāǃâs ǃnâ da ge ǃnona ǀgauga nî mû hîna ra ǁgauga khoen mati mûs ra mû xūn xa ra ǂgaeǂhapu-e  ǀgausa, nēs ge ǁîn ǃhaos, ǃkhūsib tsî kurigu tsîna ǃkhōǂgā hâ. Hoa ǃâdi ǃnâ da ge ǀgauga nî mû hîna da Jesub mîmāsa a ǁnâuǀnam ǁkhāga.

3, 4. (a) Mâ mâsiba ge ǃaroma îb apostel Petruba ǁîb ǂâi ǀgauba dawa Jodeǁî tama khoen ǃoagu? (Tsoatsoas ǃnâ hâ ai-īsiba mû re.) (b) Jehovaba mâ amaba Petruba ge ǁnâuǃā kai?

³ ǂÂi re apostel Petrub gere tsâ ǀgaub xa Kaesareasa ǃoab ge ǂgaihe o Korneliub omsa ǃoa. (ǃNǃkh. 10:17-29) ǂGui Jodeǁîn khamib ge Petruba ge ǂgom tsoatsoa Jodeǁî tama khoen ǃanu tama hâ di. Xaweb ge Petruba xūna ge hōǃâ hîna ge ǁîb ǂâi ǀgauba a dawana. Aiǁgauseb ge Petruba buruburuxa ǁhaposa ge hō. (ǃNǃkh. 10:9-16) Petruba tae-e ge mû? ǃAnuoǃnâ xamanina ūhâ lapib ge ge ǁgā tsî î ge domma ǀhomma xu ge mî: “Khâi, Petrutse, ǂā î ǂû” di. ǃNona ǃnādi kōseb ge Petruba ge ǂkhā. ǂKhāb gere ǃnādi hoade î ge domma ǀhomma xu gere mî “Elob go ǃanuǃanu xū-ets ge satsa ǃanuoǃnâ ti ǂgai tide.” ǁHaposa xub ge khâi o, ob ge Petruba gere ǂhâ nē dommi ge tae-e gere mîba bi ǂgaosa. Tsî î ge Korneliub di sîsabega ge hā. ǃAnu gagab xa daoǁgau-e hâseb ge Petruba ge aiǃgû tsî sîsabega Korneliub omsa ǃoa ge sao.

⁴ Petrub ga xūna ai-īsib ai ǀgui mû hâ o, ob ge tātsēs tsîna Korneliub oms ǃnâ ga ǂgâ tama hâ. Jodeǁîn ge Jodeǁî tama khoen omdi ǃnâ ge ǂgâ tama hâ i. Petruba tae-i ǃaroma ge aiǃgû ǃhaoǃnâbe ǀgores ge hâ i xawe? Petrub ge kaise ge tsâǀkhāhe ǁîb ǁhapos tsî ǃanu gagaba xub ge hō ǂkhâǃnâs xa. Korneliub tae-e ra mîsab ge ǃgâ toas khaoǃgâb ge Petruba tsâǀkhâhe hâse ge mî: “Amab ǃnâ ta ra hōǃâ, Elob khoe-i aisa ǃkhōǃoa tama ǃkhaisa; xawe mâ ǁae-i hoa-i ǃnâ ga ǁîba ǃaoǃgâ tsî ǂhanu-aisiba dī-i ge ǁîb di ǃkhōǃoasabe-e.” (ǃNǃkh. 10:34, 35) ǁÎb ge nēsa kaise ǃgâise ge ǁnâuǃā. Nē amaba mati Xristeǁîna ga tsâǀkhā hâ?

5. (a) Jehovaba hoa Xristeǁîn tae-e nî ǁnâuǃāsa ra ǂgao? (b) Amaba da a ǂan xawe î tae-e sida ǂgaob ǃnâ a omkhâisen ǁkhā?

⁵ Petrub ǃnâ-ūb ge Jehovaba hoa Xristeǁîna gere ǁnâuǃā kai ǁîb ǃhaoǃnâbe ǀgorasa ūhâ tama hâsa. ǁÎb ge ǃhaodi, ǃhūb tsî gowagu tsîn di ǃkharagaǃnâgusiga mû tama hâ. Khoen hîna Eloba ǃao tsî ǁîba ǃgâiba xūna ra dīn ge ǁîb xa ra ǃkhōǃoa-e. (Gal. 3:26-28; J.ǂHa. 7:9, 10) Sadu tsîn ge nēs a ama ǃkhaisa ra mûǂan. ǀNîsi du ga ǃhaoǃnâbe ǀgoras ǀoa hâ ǃhūb tamas ka io ǃās ǃnâ ga ra kai os? Sadu ge ǀnîsi ǃhaoǃnâbe ǀgorasa du ūhâ tama hâ khami ra tsâ xawe î ge sadu ǂgaob ǃnâ nē tsâsiga a omkhâisen ǁkhā. Petrub tsîn ge aiǂhanuba ge ūhâ i Jehovab ǃhaoǃnâbe ǀgorasa ūhâ tama ǃkhaisa ǂhaiǂhaisa xaweb ge ega ǁîb tsîna ǃhaoǃnâbe ǀgoras tsâsiga ge omkhâi. (Gal. 2:11-14) Mati da Jesuba nî ǃgâ tsî khoena tā ai-īsib ai nî ǀgoraǃgâ?

6. (a) Tae-e nî hui da ǃhaoǃnâbe ǀgorasa sida ǂgaoba xu ǃkhomǂûisa? (b) ǀNî ǃgâsaba tae-e ge xoa?

⁶ Elobmîs ǃnâ-ū da ge nî ôaǃnâsen î da mû ǃhaoǃnâbe ǀgoras ǂâidi tamas ka io tsâsiga da ūhâsa. (Psa. 119:105)  Nau khoen hîna ǃhaoǃnâbe ǀgoras ǀgauga sida ǃnâ ra mûna xu da ge huiba a hōǁkhā. (Gal. 2:11, 14) Nē ǀgaugu ge sida ǃnâ ǃgamse a hâ ǁkhā sida a mûǂan ǁoase. Aiǁgause, ǀgui ǃgâsab ge khoe-aogu ra hîna ǀoasase Jehovaba ra ǃoaba ra xa ge xoa. Aob ge ǃhaos hîna ǃgôaǁnâ-e hâsa xu gere hā. Nē ǃgâsab ge aitsama ge mûǂan tama hâ i ǃhaoǃnâbe ǀgorasab ūhâ ǃkhaisa. ǁÎb ge ǂgui ǃgâi xūna nē aob xa ge xoa xawe ǀams ai ge mî: “Nē ǃhaosa xub hâ xawe î ge ǁîb tanisen ǀgaub tsî ûi ǀgaub tsîna khoena ra ǁnâuǃā kai, nē ǃhaosa xu hās ge ǂâibasen tama hâ ǀurixa ûib nē ǃhaos khoen ra ûiba da ge nî ûi di.” Mû î du ra nēs tae-e ra ǂâibasensa? ǂGui ǁgaumâide da ga ūhâ xawe da ge nî ôaǃnâsen tsî māsenxase hō da ra huiba nî ǃkhōǃoa î da ǃhaoǃnâbe ǀgorasa sida ǂgaoga xu ǃkhomǂûi. Xawe tae-i tsîna da noxoba a dī ǁkhā?

7. Mati da nî ǁgau sida ǂgaoba da ǁkhowa-am hâsa?

⁷ Sida ǂgaoba da ga ra ǁkhowa-am o, o î ge ǀnamma ǃhaoǃnâbe ǀgorasa nî ǃkhōǃkhuni. (2Kor. 6:11-13) Sadu ǃhaos, ǃhūb tsî gowab tsîna ra ǃhoa khoen ǀkha ǀgui du ra hâ? ǁNāti î ga ra ī o ǀnî hâ ǀhōsana ôa re. ǀNî hâ khaoǃhūba xu hâ khoena aoǁnâ sîsen-e ǃoa ǁkhau re tamas ka io sadu omsa ǃoa în sadu ǀkha ǂûǀhao. (ǃNǃkh. 16:14, 15) Nēsa du ga ra dī o, o du ge ǀnammi xa nî ǀoa sadu ǂgaob ǃnâ tsî ǃhaoǃnâbe ǀgorasa ūhâ tide. Xawe ǀnî ǁaega da ge ǀnî xūn tawa î ga ra hā o, o khoen ai-īsigu tamas ka ion ra mûsen ǀgaub ai ra ǀgoraǃgâ. Hā re î da khoe-i ǃkhūsib xa ǃhoa.

8. Levitikus 19:15 ǃoagu khoe-i ǃkhūsib tamas ka io ǀgâsasiba mati ǁî-e da ra mû ǀgauba ra tsâǀkhā?

⁸ ǃKhūsib ge ǀgui ǀgaub hîna sida khoena ra mû ǀgauba a tsâǀkhā ǁkhāba. Levitikus 19:15 ge ra mî: “ǀGoraǃgâs ǃnâ du ge ǂhanuoǃnâse sîsen tide, ǀgâsaba huis kas, ǀgapi khoeba kōs kas hoas ǀkha. Xawets ge ǂhanuse sa ǀgūkhoeb di ǁhōba nîra sîsenǂam.” Xawe khoe-i ǃkhūsib tamas ka io ǀgâsasiba ǁî-e da ra mû ǀgauba mati nî tsâǀkhā?

9. Salomoba tae-i amaba ge xoa tsî nēsa tae-e ra ǁkhāǁkhā da?

⁹ ǃAnu gagab ge Salomoba ge ǂkhâǃnâ îb amaba ǀoasa kurusa ūhâ tama khoen xa xoa. ǂKhoamîdi 14:20 ǃnâb ge Salomoba ge xoa: “ǀGâsab ra ǁîb di khoexa khoeb on xa ǁkhanhe, xawe ǀnamsaben ǃkhūkhoeb din ge a ǀoasa.” Nē ǂkhoamîsa tae-e ra ǁkhāǁkhā da? ǂAn tama da ga ra io, o da ge ǃkhū hâ ǃgâsan ǀkha ǀhōsagusisa ūhâsa nî tura tsî ǀgâsana nî ǂkhābē. Tae-i ǃaroma i a ǁkhōǁkhōsa khoena ǁîn ūhâ xūn ǃoagu ǀgoraǃgâsa?

10. Jakobuba tae-e ge ǃkhâikhom?

¹⁰ Khoena da ga ūn hâ xūn ǃoagu ga ra ǀgoraǃgâ o, o da ge ǀgorasa ǀhaohâb ǃnâ a kuru tsoatsoa ǁkhā. Jakobub ge ge ǃkhâikhom nēs ge ǂgui ǀhaohâga ǃkharuge ǁaeb ǃnâ gere ǀgora amaga. (Khomai re Jakobub 2:1-4.) ǂKhaikari da ge nî hâ î-i nē ǂâi ǀgauba tā sida ǀhaohâgu ǃnâ nētsē hâ. Mati da khoe-e ai-īsib ai ǀgoraǃgâsa xu nî ǂgōsen?

11. Khoe-i ūhâ xūna mati ǁî-i ǀhōsagusisa Jehovab ǀkha a tsâǀkhā ǁkhā? ǁGuiǃā re.

 ¹¹ Sida ǃgâsana da ge Jehovab ra mû ni khami nî mû. Khoe-i ge Jehovab aiǃâ ǀō-aisa tama hâ ǃkhū tamas ka io, i a ǀgâsa ǃkhais ǃgao. Sida ǀhōsagusis Jehovab ǀkha da ūhâs ge matikō xūna da ūhâs tamas ka io ūhâ tama hâsa xu hâ tama hâ. Ama as ge Jesub ge ge mî “ǃgom i asa, ǃkhū hâ-i gaosib ǀhommi dib ǃnâ nî ǂgâsa” xaweb ge ge mî tama hâ i ǁî-i ge a ǂgâ ǁoa di. (Mat. 19:23) Xaweb ge Jesuba ge mî: “ǃGâiǃō hâ du ge sadu ǀgâsado, sadu dib a Elob gaosiba xui-ao.” (Luk. 6:20) Nēs ge ge ǂâibasen tama hâ i hoa ǀgâsa khoen ǀkhae-e hâ tsî Jesub ǁkhāǁkhāsa nî ūǃoa di. ǂGui ǀgâsa khoen ge ge ūǃoa tama hâ i. Hâ a ǃkhais ge khoe-i ǀhōsagusis Jehovab ǀkha i ūhâs ge ǁî-i ūhâ xūna xu hâ tama hâ.

12. Xoade tae-i ǀapemāde ǃkhū hân tsî ǀgâsan tsîna ra mā?

¹² ǀKhaesa da ge a ǂgui ǃgâsana da ūhâ ǃkhais ǃgao, ǃkhū hân tsî ǀgâsan hîna Jehovaba a ǀnam tsî ǁîba ǂgaoba xu ra ǃoabana. Xoadi ge ǃkhū hâ ǃgâsan ǃoa ra mî: “În tā ǃguri, în ǁkhāti tā mâǁapo tama ǃkhūsib ai ǂgomaiǂnûi, în ûitsama Elob, ǃkhū hâse hoana ǂûs ǃoa ra mā dab ai ǂgomaiǂnûi.” (Khomai re 1 Timoteub 6:17-19.) Elobmîs ge Elob khoen hoana ra ǃkhâikhom în ǂkhaikari hâ tsî tā mari-e ǀnam. (1Tim. 6:9, 10) Sida mûde da ga ǁkhowa-am tsî sida ǃgâsana Jehovab ra mû nî khami ga ra mû o, o da ge ǁîna ūn hâ xūn ai ǀgoraǃgâ tide. O khoe-i kurigu? Nēs ǃoagu da khoena nî ǀgoraǃgâ? Hā re î da kō.

13. Xoade tae-e ra ǁkhāǁkhā da kaira ǃgâsana ǃgôasiba ǁgaus xa?

¹³ Elobmîs ge ra mîba da î da kaira khoena ǃgôasiba ǁgau. Levitikus 19:32 ge ra mî: “ǀHai ǀûn â-i-i aiǃâts ge nîra khâi, tsîts ge kaikhoe-e nîra ǃgôa, sa Elobats nî ǃaoǃgâ xui-ao; tita ge ǃKhūta.” Tsî ǂKhoamîdi 16:31 tsîn ge ra mî: “ǀHaiadanasib ge a anisa kron, ǁîb ra ǂhanu-aisib di daob ai hōhe.” Paulub ge Timoteuba ge mîba îb tā kaira ǃgâsaga ǃgâi tama ǀgaub ǃnâ hâ-ū xawe dadasab ase ǃkhōǃoagu. (1Tim. 5:1, 2) Timoteub ge kaira ǃgâsagu xa ǀgapi ǃharosa ūhâ i xaweb ge ǁîga khoexaǃnâsib tsî ǃgôasib tsîn ǀkha gere hâ-ū.

14. Mâ mâsiba nî ǃaroma î da kaira ǃgâsana ǁnama?

¹⁴ Xawe nēsa da mās kōse nî ǁnâuǀnam? Aiǁgause, kaira ǃgâsa î ga ǂan î a hîna ga ra ǁore os tamas ka io Jehovab ǃoa ai ǃgâi tama xū-e ga ra dī o? Jehovab ge ai-īsib ǃoagu ǀgoraǃgâ tide tsî khoe-e kaira i a amaga ǀgoraǃgâ tide. Jesajab 65:20 ge ra mî: “ǁOre-aob ǀguikaidisi kurixab” ga ra xawe nî ǁnamahe di. Nē tsoatsoas ge Esegieli kēbos ǃnâs tsîna hâ. (Ese. 9:5-7) Xawe kaise a ǂhâǂhâsas ge Jehova Eloba ǃgôasiba ǁgausa. (Dan. 7:9, 10, 13, 14) Nēsa da ga ra dī o, o da ge ǃao tide nau khoena huisa ǃgâi tama xū-e i ga ra dī o.​—Gal. 6:1.

15. Pauluba xu da tae-e ra ǁkhāǁkhāsen ǃgôasiba ǁgaus xa?

¹⁵ O ǂkham ǃgâsagu ǀhaohâb ǃnâ hâ gu? ǁÎga da mati ra mû? Apostel Paulub ge ge mî: “Khoe-i xare-e a-i sa ǂkhamsisa tā ǃharaxū; î ǂgom  hâna aiǁgause ība mîs ǃnâ, tanisens ǃnâ, ǀnammi ǃnâ, gagas ǃnâ, ǂgoms ǃnâ, îǂhôasib ǃnâ.” (1Tim. 4:12) Paulub ge nē mîde a xoa ǁaeb ǃnâb ge Timoteuba ǁîb 30 di ǃnâ ge hâ i. Xaweb ge Pauluba ǁîba ǂgui ǁgaumâide ge mā. Nē ǁnamas ge kaise a ǂhanu. ǂKham ǃgâsaga da ge tā ǁîgu kurigu ǃoagu nî ǀgoraǃgâ. ǂÂis ǃnâ da ge nî ūhâ Jesub tsîn ge ǁîb ǃhūbaise ǁgaumâisa ǁîb 30 di ǃnâb hâ hîna gere dī.

16, 17. (a) ǀHaohâb ǃûi-aoga tae-e ra kō ǃgâsaba gu ga ǀhaohâb ǃûi-aob tamas ka io ǀhaohâb hui-aob ase ǁgaumâi o? (b) Sida ǃhaos tsî sida ǂâi ǀgaub tsîna mati Elobmîsa xu a ǀkhara ǁkhā?

¹⁶ ǀNîsi da ge ǃhaosa xu ra hā hîna ǂkhamkhoega ra ǃgôaǁnâsa. ǁNās ǀkha gu ge ǂkham ǃgâsaga ra ǃao ǀhaohâb ǃûi-aogu tamas ka io ǀhaohâb hui-aogu ase ǁgaumâihesa. Hoa ǀhaohâb ǃûi-aogu ge ǂâis ǃnâ nî ūhâ kurigu ǂganhe tama hâsa ǃgâsaga ǀhaohâb ǃûi-aogu tamas ka io ǀhaohâb hui-aogu ase ǁgaumâihesa. (1Tim. 3:1-10, 12, 13; Tit. 1:5-9) ǀHaohâb ǃûi-aob ga ǁîb ǃhaos ǃoagu hâ ǁgaraga ga ra ūhâ o, ob ge ǁîba Elobmîs ǃoagu tanisen tama hâ. ǂKham ǃgâsagu ge ǁîgu ǃhaos ǃoagu ǁgaumâihe tide xawe matikōse gu Elobmîsa ra saos kōse.​—2Tim. 3:16, 17.

¹⁷ Hā re î da kō nē ǀgaub mati ǃgâsaga a ǃkhō-oa ǁkhā ǀgauba. ǀNî ǃhūb ǃnâ î ge ǀhaohâb hui-aoba ǂgui ǁgaumâide ge māhe. ǀHaohâb ǃûi-aogu ge ge ǂan i nē ǃgâsab ge Elobmîs tsoatsoade ūhâ di xaweb ge ge ǁgaumâihe tama hâ i. ǀNî kaira ǀhaohâb ǃûi-aogu ge gere tsâ nē ǃgâsab ge noxoba a ǂkham ǀhaohâb ǃûi-aob ase ǁgaumâihesa di. Nē ǃgâsab ge ge ǁgaumâi-e tama hâ i, ǁîb a ǂkham amaga. ǀGui aiǁgaus ǀguis a xawe î ge nē ǂâi ǀgauba ǂgui khoena, ǂgui ǃhūgu ǃnâ tsâǀkhā hâ. Kaise i ge a ǂhâǂhâsa Elobmîs tsoatsoadi ai ǂgomaiǂnûisa sida ǃhaos ais ose. Nē ǀgaub ǃnâ da ge Jesuba ra ǁnâuǀnam tsî khoena ai-īsib ai ǀgoraǃgâ tide.

18, 19. Tae-e da nî dī î da khoena Jehovab ra mû nî khami mû?

¹⁸ ǀOasa kurusa da ūhâ tama hâ xawe da ge nî ǁkhāǁkhāsen î da khoena Jehovab ra mû nî khami mû. (ǃNǃkh. 10:34, 35) Nēs ge kaise a ǃgom dīsa xawe da ge hoaǁae Elobmîsa xu nî ǂâiǂâiǃnâsen. Nēs xa da ga ra ǂâiǂâiǃnâsen o, o da ge Jesub mîmâisa nî dīǀoaǀoa khoena ai-īsib ai tā ǀgoraǃgâsa.​—Jhn. 7:24.

¹⁹ ǀGūǁaeb ge sida Gao-aob Jesuba hoa khoena nî ǀgoraǃgâ, ai-īsib ais ose xawe ǃgâi ǀgaub ǃnâ. (Jes. 11:3, 4) Nēs ge kaise nî ǂoaǂamsa i.