1. Jesaja okwa hunganeke shike kombinga yaJesus, nomolwashike shoka tashi tsu omukumo?

EHUNGANEKO lyaJesaja kombinga yOmuwa gwetu, Jesus Kristus, otali tu tsu omukumo notali mbilipaleke omitima dhetu. Jesaja okwa hunganeke kutya Jesus “iha pangula pakutala kwomeho, ye iha tokola pakuuva omauvila, ihe ohu uthile oonakuhepa nuuyuuki.” (Jes. 11:3, 4) Omolwashike shoka tashi tsu omukumo? Omolwaashono otu li muuyuni wu udha okatongo. Atuheni otwa halelela Omupanguli omuyuuki, Jesus, ngoka kee na esiku e tu pangule pakutala nomeho!

2. Jesus okwe tu lombwela tu ninge shike, noshike tatu ka kundathana moshitopolwa shika?

² Esiku kehe ohatu pangula yalwe. Ihe molwaashono inatu gwanenena, ihatu pangula momukalo gu uka thiluthilu ngaashi Jesus. Tse ohatu nwethwa mo kwaashoka tu wete nomeho. Jesus sho a li kombanda yevi, okwa gandja elombwelo tali ti: “Inamu pangula ngaashi tamu tala nomeho, ihe panguleni epangulo lyu uka.” (Joh. 7:24) Osha yela kutya Jesus okwa hala tu kale twe mu fa nonokutya ina hala tu pangule yalwe tatu tala keholokopo lyawo. Moshitopolwa shika, otatu ka kundathana iinima itatu, mbyoka hayi nwetha mo aantu ya pangule yalwe shi ikolelela keholokopo lyawo. Iinima  mbyoka oyo: omuhoko, uuyamba nosho wo omimvo. Sho tatu kundathana kehe shimwe shomuyo, otatu ka tala komikalo moka tatu vulu okuulika kutya otatu vulika kelombwelo lyaJesus.

3, 4. (a) Oshike sha ningitha omuyapostoli Petrus a lundulule etaloko lye li na ko nasha naantu mboka kaaye shi Aajuda? (Tala kethano lyopetameko.) (b) Jehova okwa kwathele Petrus a uve ko oshili ompe yini?

³ Dhiladhila komaipulo ngoka omuyapostoli Petrus a li e na, sho a ithanwa a ye kuKesarea kegumbo lyaKornelius ngoka kee shi Omujuda. (Iil. 10:17-29) Ngaashi Aajuda yopethimbo lye, Petrus okwa putuka i itaala kutya aantu mboka kaaye shi Aajuda, oya nyata. Ihe opwa holoka oshinima shoka she mu ningitha a lundulule omadhiladhilo ge. Pashiholelwa, okwa li a mono emoniko pashikumithalonga. (Iil. 10:9-16) Memoniko ndyoka okwa mono mo shike? Okwa mono onguwo onene tayi zi megulu yi na iinamwenyo ya nyata, nopethimbo opo tuu mpoka, oku uvu ewi tali zi megulu tali ti: “Petrus, thikama, dhipaga iinamwenyo mbyoka e to li.’’ Petrus okwa tindi. Ewi ndyoka lya zi megulu olya ti kuye: “Shaa shoka Kalunga e shi yapula, ito vulu oku shi tala kutya oshi na oshidhila.” Konima sho a mono emoniko ndyoka, Petrus okwa li a kunkwa kwaashoka ewi lya li tali kambadhala oku mu lombwela. Manga a li ti ipula ngeyi, mboka ya tumwa kuKornelius oya thiki. Konima sho Petrus a wilikwa kombepo ondjapuki, okwa yi pamwe naatumwa mboka kegumbo lyaKornelius, hoka a lombwelwa a ye.

⁴ Andola Petrus okwa li a pangula pakutala nomeho, ando kegumbo lyaKornelius ina ya ko. Aajuda kaya li haya ende momagumbo gaantu mboka kaaye shi Aajuda. Omolwashike Petrus a tokola a ye, nonando muye omwa li okatongo? Omolwaashoka okwa li i inyengithwa lela kemoniko ndyoka a mono nokeshilipaleko ndyoka a pewa kombepo ondjapuki. Konima sho a pulakene kuKornelius, Petrus okwa ti: “Ngame ngashingeyi onde shi tseya kutya Kalunga aantu ayehe ohe ya tala ye thike pamwe. Ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini.” (Iil. 10:34, 35) Euvoko ndika epe, Petrus okwa li e li nyanyukilwa noonkondo. Mbela oshili ndjoka oya li tayi ka guma ngiini Aakriste ayehe?

5. (a) Jehova okwa hala Aakriste ayehe ya uve ko shike? (b) Nonando otu shi oshili, oshike tashi vulika shi kale mutse?

⁵ Jehova okwa li a longitha Petrus a kwathele Aakriste ayehe ya uve ko kutya Ye ke na okatongo. Jehova okwa tala ko aantu ye thike pamwe, kutya nduno oyolwaala luni, oyoshigwana shini, oyomuhoko guni nenge oyelaka lini. Omuntu kehe kutya nduno omulumentu nenge omukiintu, ngele oha tila Kalunga noha longo uuyuuki, ote mu taamba ko. (Gal. 3:26-28; Eh. 7:9, 10) Odhoshili kutya oshinima shoka nangoye oto tsu kumwe nasho! Ihe ongiini ngele owa putukila moshilongo nenge megumbo moka mu na okatongo? Otashi vulika wu wete ho tala ko aantu ye thike pamwe, ihe momutima gwoye omu na ngaa iikala yokatongo. Nokuli naPetrus ngoka a li a pewa uuthembahenda wokukwathela aantu ya tseye kutya Jehova ohe ya tala ko ye thike pamwe, lwanima muye omwe ki iyakela iikala yokatongo. (Gal. 2:11-14) Ongiini tatu vulu okupulakena kuJesus nokukala itaatu pangula aantu mokutala keholokopo lyawo?

6. (a) Oshike tashi vulu oku tu kwathela tu vudhe mo iikala yokatongo momitima dhetu? (b) Olopota yomumwatate gwoshinakugwanithwa oya holola shike?

⁶ Opo tu mone ngele mutse omu na iikala yokatongo, otwa pumbwa okwiikonakona nawa metsokumwe nOohapu dhaKalunga. (Eps. 119:105) Otashi vulika wo twa pumbwa ekwatho lyayalwe mboka ye wete mutse mu na iikala yokatongo,  nonando otu wete kaatu yi na. (Gal. 2:11, 14) Otashi vulika iikala mbyoka ya kakatela mutse, nonando katu shi wete. Pashiholelwa, omumwatate gumwe gwoshinakugwanithwa, okwa li a gandja olopota kombinga yoshiholelwa oshiwanawa shaaihokani yamwe mboka ye li miilonga yethimbo lyu udha. Omusamane okwa za momuhoko ngoka gwa li gwa dhinika kuyalwe. Aniwa omumwatate gwoshinakugwanithwa ka li e wete kutya naye oku na iikala yokatongo momutima gwe, kombinga yankene a tala ko omuhoko ngoka. Molopota ye, okwa popi iinima oyindji iiwanawa kombinga yomusamane ngoka, nopehulilo okwa nyolwa ta ti: ‘Nonando omusamane nguka ogwomomuhoko nguka, omikalo dhe nonkalamwenyo ye oya kwathela yalwe ya uve ko kutya ngele omuntu ogwomomuhoko nguka, itashi ti naanaa kutya okwa nyata, okwa hepa noku na okukaliwa kokule naye.’ Mbela oshitsa owu shi wete? Kutya nduno otu na iinakugwanithwa ya tya ngiini, natu ikonakone nawa nokukala tu na ehalo lyokutaamba ko ekwatho, opo tu vule okumona ngele otu na okatongo momitima dhetu. Oshike ishewe tatu vulu okuninga?

7. Ongiini tatu vulu okuulika kutya otwe egululila yalwe omitima dhetu?

⁷ Ngele otwa egululile yalwe omitima dhetu, itatu ke ya tongola, ihe otatu ka kala tu ya hole lela. (2 Kor. 6:11-13) Mbela owu na ondjigilile yokweendathana owala naamboka ye na olwaala lwa fa lwoye, yuukwashigwana woye, yomuhoko gwoye nenge yelaka lyoye? Ngele osho, kambadhala wo okweendathana naantu yomomaputuko galwe. Ongiini ngele owa kambadhala okulonga pamwe nayo muukalele nenge wu ya hiye kegumbo lyoye mu lye pamwe? (Iil. 16:14, 15) Ngele owe shi ningi, oto ka kala wu ya hole noonkondo, pehala lyoku ya tongola. Ihe opu na omikalo dhilwe moka tatu vulu okutongola yalwe mokutala keholokopo lyawo. Natu ka kundathaneni ngashingeyi kombinga yiinima yopamaliko.

8. Shi ikolelela kuLevitikus 19:15, ongiini uuyamba nenge oluhepo tayi vulu okuguma etaloko lyetu li na ko nasha nayalwe?

⁸ Oshinima shimwe shoka hashi gumu etaloko lyetu li na ko nasha nayalwe, iinima yopamaliko. Levitikus 19:15 otayi ti: “Inamu popila ohepele nenge mu game komuyamba; utheni eutho lyu uka.” Ihe ongiini uuyamba womuntu nenge oluhepo lwe, tayi vulu okuguma etaloko lyetu li na ko nasha naye?

9. Oshili yini yinikitha oluhodhi Salomo a nyola, notayi tu longo shike?

⁹ Ombepo ondjapuki oya li yi inyengitha Salomo, a nyole oshili yinikitha oluhodhi kombinga yaantu inaaya gwanenena. Omayeletumbulo 14:20 otayi ti: “Oohepele oye tondike nokaashiinda yawo, ihe ookuume kaayamba oyendji.” Omayeletumbulo ngaka otage tu longo shike? Ngele inatu kotoka, otashi vulika tu kale twa hala okupanga uukuume naamwatate mboka aayamba nokukala kokule naamboka ya hepa. Omolwashike sha nika oshiponga okupangula yalwe shi ikolelela kwaashoka ye na?

10. Uupyakadhi wuni wa popiwa kuJakob?

¹⁰ Ngele otwa kala tatu pangula yalwe shi ikolelela kwaashoka ye na, otatu vulu okweeta etopoko megongalo. Omulongwa Jakob okwa londodha kutya uupyakadhi mbuka owa li we eta etopoko momagongalo gomethelemimvo lyotango. (Lesha Jakob 2:1-4.) Inatu etha uupyakadhi mbuka wu holoke megongalo lyetu kunena. Ongiini tatu vulu okuyanda okupangula yalwe shi ikolelela keholokopo lyawo?

11. Mbela omaliko gomuntu oga guma ekwatathano lye naJehova? Shi yelitha.

¹¹ Otwa pumbwa okutala ko aamwatate ngaashi Jehova e ya tala ko. Omuntu kehe oku na ongushu momeho gaJehova, ihe hamolwuuyamba we nenge oluhepo lwe. Ekwatathano lyetu naJehova kali na siku li ikolelele kiinima yopamaliko mbyoka tu na nenge koluhepo lwetu.  Onkee ano, oshoshili sho Jesus a ti kutya “omuyamba oku na uudhigu okuya mOshilongo shegulu,” ihe ina tya kutya ita vulu. (Mat. 19:23) Jesus okwa ti wo kutya: “Aanelago one mboka mwa hepa, oshoka Oshilongo shaKalunga osheni.” (Luk. 6:20) Shika itashi ti kutya aantu ayehe mboka ya li ya hepa oya yambekwa noya li ya pulakene kelongo lyaJesus. Oyendji mboka ya hepa kaya li ya pulakene. Oshitsa oshi li mpano kutya itatu vulu okupangula ekwatathano lyomuntu ndyoka e na naJehova shi ikolelela kiinima ye yopamaliko.

12. Aantu mboka aayamba nosho wo oohepele otaya longwa shike kOmanyolo?

¹² Oshi li eyambeko kutse, sho tu na aamwatate naamwameme oyendji kutya nduno aayamba nenge oohepele, mboka ye hole Jehova notaye mu longele nomutima aguhe. Omanyolo otaga lombwele aantu mboka aayamba “yaa inekele iinima mbyoka tayi hulu po, ihe naa inekele Kalunga.” (Lesha 1 Timoteus 6:17-19.) Pethimbo opo tuu mpoka, Oohapu dhaKalunga otadhi ladhipike aapiya ye ayehe kutya nduno aayamba nenge oohepele, ya kale ya kotoka kaaya kale ye hole iimaliwa. (1 Tim. 6:9, 10) Odhoshili kutya ngele otwa kala twa tonata nokutala ko aamwatate ngaashi Jehova he ya tala ko, itatu ke ya pangula shi ikolelela kwaashoka ye na nenge kaaye na. Ihe ongiini kombinga yomimvo dhomuntu? Mbela oshi li nawa tu pangule yalwe shi ikolelela komimvo dhawo? Natu ke shi taleni.

13. Omanyolo otage tu longo shike kombinga yokusimaneka aakokele?

¹³ Omanyolo otage tu lombwele tu simaneke aakokele. Levitikus 19:32 otayi ti: “Simanekeni aakulupe, ne mu yele aakuluntu yoomvi. Tileni Kalunga keni.” Omayeletumbulo 16:31 otayi tu lombwele sha faathana tayi ti: “Oomvi dhokomutse odho oshishani shuulenga; otashi adhika mondjila yuuyuuki.” Paulus naye okwa li a lombwele Timoteus kaa gande omusamane omukokele, ihe e mu tale ko e li he. (1 Tim. 5:1, 2) Nonando Timoteus okwa li e na oonkondopangelo, okwa li e na okuungaunga nawa naamwatate aakokele nonesimaneko.

14. Omonkalo yini tayi opalele tashi vulika tu gandje omayele ngoka ga pumbiwa komuntu ngoka e tu vule?

¹⁴ Ekotampango ndyoka olya kwatela mo ishewe shike? Pashiholelwa, otatu ka kala tu uvite ngiini ngele omukokele okwa yono owina nenge ta humitha komeho oshinima shoka inaashi hokiwa kuJehova? Jehova ite ke mu pangula shi ikolelela keholokopo lye, ye ite ki idhimbika eyono lyowina, molwaashoka owala omuntu omukuluntu. Tala kekotampango ndika tali adhika muJesaja 65:20: “Ngoka ta si inaa thikitha omimvo ethele, otaku ka tiwa okwa thingwa.” Niitya yimwe, omuyoni ota thingwa, nonando oku kale e na omimvo ethele. Ekotampango lya faathana otali adhika wo memoniko lyaHesekiel. (Hes. 9:5-7) Onkee ano, shoka sha simanenena osho kutya natu simaneke aluhe Jehova Kalunga, ngoka ta kala e na omwenyo sigo aluhe. (Dan. 7:9, 10, 13, 14) Ngele otwe shi ningi, itatu ka tila okupukulula omuntu ngoka a pumbwa okupukululwa kutya nduno oku na omimvo ngapi. — Gal. 6:1.

15. Oshike tatu ilongo komuyapostoli Paulus kombinga yokusimaneka aamwatate aagundjuka?

¹⁵ Ongiini kombinga yaamwatate aagundjuka mboka ye li megongalo? Mbela owe ya tala ko ngiini? Omuyapostoli Paulus okwa li a nyolele omulumentu omugundjuka, Timoteus, a ti: “Inapu kala nando ogumwe te ku dhini molwaasho omugundjuka, ihe kala omuholelwa kooitaali moohapu, momikalo, mohole, meitaalo nomuuyogoki.” (1 Tim. 4:12) Pethimbo Paulus ta nyola oohapu ndhoka, Timoteus otashi vulika opo owala a gwanitha omimvo 30 nasha. Nonando ongawo, okwa li a pewa oshinakugwanithwa sha simanenena kuPaulus. Shika otashi tu longo shike? Katu na okupangula aamwatate aagundjuka shi ikolelela komimvo dhawo. Inatu  dhimbwa kutya Omuwa gwetu, Jesus, okwa li a tameke okuuvitha kombanda yevi, sho e na omimvo 33.

16, 17. (a) Ongiini aakuluntugongalo taya vulu okumona kutya omumwatate okwa gwana okulangekwa po e li omuyakuligongalo nenge omukuluntugongalo? (b) Ongiini omuthigululwakalo nenge etaloko lyopaumwene tayi vulu okukala ompinge nOmanyolo?

¹⁶ Otashi vulika twa za meputuko moka aalumentu aagundjuka ya dhinika. Ngele osho, otashi vulika aakuluntugongalo ya kakadhale okupopya ngele omumwatate omugundjuka okwa gwana okulangekwa po e li omuyakuligongalo nenge omukuluntugongalo. Aakuluntugongalo ayehe oye na okudhimbulukwa kutya Omanyolo inaga popya kondandalunde kutya omumwatate oku na okulangekwa po e li omuyakuligongalo nenge omukuluntugongalo, okuza pomimvo ngapi. (1 Tim. 3:1-10, 12, 13; Tit. 1:5-9) Ngele omukuluntugongalo okwa tula po ompango yi ikolelela komuthigululwakalo, osha yela kutya ke li metsokumwe nOmanyolo. Odhoshili kutya aamwatate aagundjuka oye na okukonakonwa metsokumwe nOohapu dhaKalunga, ihe hametsokumwe nomithigululwakalo nenge nomataloko gopaumwene. — 2 Tim. 3:16, 17.

¹⁷ Omataloko gopamithigululwakalo ngoka kaage li metsokumwe nOmbiimbeli, oga ningitha aamwatate mboka ya gwana okulangekwa po, kaaya langekwe po. Pashiholelwa, moshilongo shimwe, omuyakuligongalo gumwe okwa li i inekelelwa iinakugwanithwa ya simana. Nonando aakuluntugongalo megongalo lyawo oya li ya zimine kutya okwa gwanitha po iitegelelwa yopamanyolo yokulangekwa po e li omukuluntugongalo, ka li a langekwa po. Aakuluntugongalo yontumba aakuluntu, oya li ya tindi kutya omumwatate omushona noonkondo a langekwe po e li omukuluntugongalo. Shinikitha oluhodhi, omumwatate ngoka ka li a langekwa po, omolweholokopo lye. Nonando shika oshimoniwa owala shimwe, otashi ulike kutya okudhiladhila kwa tya ngawo, ohaku gumu oyendji koombinga noombinga. Onkee ano, osha simana lela okwiikolelela kOmanyolo, pehala lyokwiikolelela komithigululwakalo nokomataloko gopaumwene. Ngoka ogwo owala omukalo tatu vulu okuvulika kuJesus notwaa pangule aantu mokutala keholokopo lyawo.

18, 19. Oshike tu na okuninga, ngele otwa hala tu tale ko yalwe ngaashi Jehova he ya tala ko?

¹⁸ Nonando inatu gwanenena, otatu vulu okwiilonga okutala ko aantu ngaashi Jehova ngoka kee na okatongo. (Iil. 10:34, 35) Ihe otashi tu pula tu ninge oonkambadhala tu kaleke momadhiladhilo Oohapu dhaKalunga. Ngele otwe shi ningi, otatu ka hwepopala mokuvulika kelombwelo lyaJesus, ndyoka tali ti kutya inatu pangula yalwe shi ikolelela keholokopo lyawo. — Joh. 7:24.

¹⁹ Masiku, Omukwaniilwa gwetu, Jesus Kristus, ota ka pangula aantu ayehe, hapakutala kwomeho nenge pakuuva omauvila, ihe ota ka pangula pauyuuki. (Jes. 11:3, 4) Uuthembahenda owu thike peni!