1. Jesaya o ile a bolela’ng e sa le pele ka Jesu, gona ke ka baka la’ng mantšu a gagwe a kgothatša?

MANTŠU ao Jesaya a ilego a a bolela mabapi le Morena wa rena Jesu Kriste a kgothatša kudu. Jesaya o boletše e sa le pele gore Jesu o be “a ka se ahlole go ya ka seo a se bonago ka mahlo feela goba go fo kgalema go ya ka seo a se kwelego ka ditsebe tša gagwe.” Eupša “o tla ahlola babotlana ka toko.” (Jes. 11:3, 4) Ke ka baka la’ng mantšu a a kgothatša? Ke ka gobane lefaseng le go tletše kgethollo e bile ga go na toka. Ka moka ga rena re fela pelo ya go tlo ba le Moahlodi yo a phethagetšego. Ka baka la’ng? Ka gobane ga a tlo re ahlola go ya ka seo a se bonago.

2. Jesu o re laetše gore re dire’ng, gona re tlo ithuta ka’ng sehlogong se?

² Letšatši le lengwe le le lengwe re ahlola batho go ya ka seo re se bonago. Eupša ka ge re se ra phethagala ga re kgone go ahlola go swana le Jesu. Gantši re ahlola batho go ya ka seo re se bonago. Eupša ge Jesu a be a le mo lefaseng o ile a laela balatedi ba gagwe gore: “Tlogelang go ahlola ka ponagalo ya ka ntle, eupša le ahlole ka kahlolo ya go loka.” (Joh. 7:24) Go molaleng gore Jesu o nyaka gore re mo ekiše ka go se ahlole ba bangwe go ya ka seo re se bonago. Ka gona, sehlogong se re tlo ithuta ka dilo tše tše tharo tšeo gantši di dirago gore batho ba ahlole ba bangwe go ya ka seo ba se bonago:  (1) Morafo goba lefelo leo motho a tšwago go lona, (2) gore motho ke mohumi goba ke modiidi le (3) gore motho o na le mengwaga e mekae. Ge re dutše re ithuta taba ye, re tlo bona kamoo re ka bontšhago gore re kwa taelo ya Jesu maemong ao ka moka.

3, 4. (a) Ke ditiragalo dife tšeo di ilego tša thuša moapostola Petro gore a se sa kgetholla batho bao e sego Bajuda? (Bona seswantšho seo se lego mathomong a sehlogo.) (b) Jehofa o ile a thuša Petro go kwešiša’ng?

³ Nagana kamoo moapostola Petro a ilego a ikwa ka gona ge a be a laelwa gore a ye Kesarea ntlong ya Koronelio yo e bego e se Mojuda. (Dit. 10:17-29) Go swana le Bajuda ba bangwe ba mehleng ya gagwe, Petro le yena o be a dumela gore motho yo e sego Mojuda o be a se a hlweka. Eupša go na le dilo tšeo di bego di sa tšwa go direga tšeo di ilego tša dira gore Petro a se sa nagana bjalo. Ka mohlala, o be a sa tšwa go bona pono e makatšago. (Dit. 10:9-16) O ile a bona’ng? O ile a bona sebjana sa mohuta o itšego se fologa bjalo ka lešela le legolo la linene le theošetšwa lefaseng. Ke moka a kwa lentšu le re: “Tsoga Petro, o hlabe o je!” Na o ile a ja? Aowa, o ile a gana ka makga a mararo. Nako le nako ge Petro a be a gana go ja, lentšu leo le tšwago legodimong le be le mmotša gore: “Kgaotša go bitša dilo tšeo Modimo a di hlwekišitšego gore di šilafetše.” Ka morago ga gore Petro a bone pono yeo, ga se a ka a kwešiša seo lentšu leo le bego le nyaka go mmotša sona. Ge a be a sa gakanegile, banna bao ba romilwego ke Koronelio ba ile ba tsena. Ka morago ga gore Petro a hwetše tlhahlo ya moya o mokgethwa, o ile a sepela le banna bao go ya ntlong ya Koronelio.

⁴ Ge nkabe Petro a ile a ahlola Koronelio go ya ka ponagalo ya gagwe ya ka ntle, o be a ka se tsoge a tsene ntlong ya gagwe. Bajuda ba be ba sa tsene ka dintlong tša batho bao e sego Bajuda. Bjale Petro o thušitšwe ke eng gore a se sa ba le kgethollo? O ile a thušwa ke pono yeo a e bonego gotee le tlhahlo ya moya o mokgethwa. Ka morago ga gore Koronelio a anegele Petro gore go diragetše eng, taba yeo e ile ya kgoma Petro kudu ke moka a re: “Bjale gona ke kwešiša gabotse gore Modimo ga a bebe sefahlego, eupša setšhabeng se sengwe le se sengwe motho yo a mmoifago gomme a dira se se lokilego o a amogelega go yena.” (Dit. 10:34, 35) Petro o ile a thoma go kwešiša gore Jehofa ga a na kgethollo. Taba ye e be e tlo ama Bakriste bjang?

5. (a) Jehofa o nyaka gore Bakriste ka moka ba kwešiše eng ka yena? (b) Gaešita le ge re tseba gore Jehofa ga a na kgethollo, re ka ba re sa na le bothata bofe?

⁵ Jehofa o ile a diriša Petro go ruta Bakriste ka moka gore ga a na kgethollo. Jehofa ga a na taba gore re tšwa morafong ofe, nageng efe, setšong sefe goba gore re bolela leleme lefe. Eupša o amogela motho le ge e le ofe yo a mmoifago le yo a dirago seo se mo kgahlago. (Bagal. 3:26-28; Kut. 7:9, 10) O ka ba o dumela gore taba ye ke nnete. Eupša go thwe’ng ge e ba moo o goletšego gona goba ka lapeng la geno go be go na le kgethollo? Gona bjale o ka ba o ipotša gore ga o sa na kgethollo. Eupša mohlomongwe o sa na le yona ka pelong. Gaešita le ge Petro a ile a thuša ba bangwe go kwešiša gore Modimo ga a kgetholle batho, eupša ka morago o ile a kgetholla ba bangwe. (Bagal. 2:11-14) Re ka bontšha bjang gore re kwa taelo ya Jesu ya gore re tlogele go ahlola ba bangwe go ya ka seo re se bonago?

6. (a) Re ka thušwa ke’ng go tloša kgethollo ka moka ka dipelong tša rena? (b) Pego yeo mogolo yo mongwe a ilego a e ngwala e bontšhitše gore o na le bothata bofe?

⁶ Re swanetše go diriša Beibele go itlhahloba. E tla re thuša go bona ge e ba re sa na le kgethollo ka pelong. (Ps. 119:105) Le gona batho ba bangwe ba ka re thuša go bona ge e ba re na le kgethollo, gaešita le ge rena re sa ipone.  (Bagal. 2:11, 14) Mohlomongwe mekgwa yeo ya kgethollo e šetše e metše ka dipelong tša rena moo e lego gore ga re sa e lemoga. Ka mohlala, mogolo yo mongwe o ile a ngwala pego yeo e yago ofising ya lekala mabapi le banyalani bao ba lego tirelong ya nako e tletšego. Batho ba be ba nyatša setšo sa gabo ngwanabo rena yoo a lego tirelong ya nako e tletšego. Eupša go bonagala mogolo yo a bego a ngwala pego yeo a be a sa lemoge gore le yena o tšeela setšo seo fase. Le ge a ile a ngwala pego e botse ka ngwanabo rena yoo, eupša mafelelong a pego yeo o ile a re: “Le ge ngwanešo e le [leina la morafo], eupša mekgwa ya gagwe le tsela yeo a phelago ka yona e thuša ba bangwe go kwešiša gore ge motho e le wa setšo se [sa gabo ngwanabo rena] ga se gore ke lešaedi e bile ga se gore ga a na mekgwa, le ge ba bantši ba setšo seo ba tumile ka gore ba bjalo.” Re ithuta’ng tabeng ye? Go sa šetšwe gore re na le ditokelo dife ka mokgatlong wa Jehofa, ka moka ga rena re swanetše go itlhahloba gomme re amogele keletšo gore e kgone go re thuša go tloša kgethollo ka moka ka dipelong tša rena. Ke’ng se sengwe gape seo se ka re thušago?

7. Re ka bontšha bjang gore re rata batho ba bangwe?

⁷ Ge re ka leka ka thata go rata batho, re ka se sa ba le kgethollo. (2 Bakor. 6:11-13) Na o tlwaetše go gwerana feela le batho ba setšo sa geno, morafo wa geno goba bao ba bolelago leleme la geno? Ge e ba karabo ya gago e le ee, itlwaetše go gwerana le bana babo rena le dikgaetšedi ba ditšong tše dingwe. O ka mema batho ba ditšo tše dingwe ka lapeng la gago goba wa kgopela go šoma le bona tšhemong. (Dit. 16:14, 15) Seo se tla go thuša go tloša kgethollo ka moka ka pelong ya gago, gomme wa dula o rata batho. Eupša go sa na le dilo tše dingwe tšeo di ka dirago gore re ahlole ba bangwe go ya ka seo re se bonago. Ga bjale a re boleleng ka go ahlola motho go ya ka gore ke mohumi goba ke modiidi.

8. Lefitiko 19:15 e bontšha bjang gore re ka ahlola motho go ya ka gore ke mohumi goba ke modiidi?

⁸ Selo se sengwe seo se ka dirago gore re ahlole ba bangwe go ya ka seo re se bonago ke ge re lebelela gore ke bahumi goba ke badiidi. Lefitiko 19:15 e re: “Le se ke la swara mmotlana ka go beba sefahlego, le gona le se ke la šia sefahlego sa motho yo mogolo setšhabeng. Le ahlole mogagabo lena ka toka.” Eupša go tla bjang gore dilo tšeo motho a nago le tšona di dire gore re mo ahlole go ya ka seo re se bonago?

9. Solomone o ile a ngwala mabapi le selo sefe se se nyamišago seo batho ba se dirago, gona seo se re ruta’ng?

⁹ Jehofa o ile a laela Solomone gore a ngwale ka selo se se nyamišago seo batho ba sa phethagalago ba se dirago. Go Diema 14:20 o ngwadile gore: “Modiidi o hloiwa le ke wa gabo, eupša bagwera ba mohumi ke ba bantši.” Temana ye e re ruta’ng? E re ruta gore ge e ba re sa hlokomele, re ka thoma go gwerana feela le bana babo rena ba go ba le sa bona, ra feleletša re se sa na taba le ba go diila. Ke ka baka la’ng go le kotsi go ahlola ba bangwe go ya ka seo ba nago le sona?

10. Jakobo o ile a lemoša Bakriste ka bothata bofe?

¹⁰ Bothata bja go ahlola ba bangwe go ya ka seo ba nago le sona ke gore seo se ka dira gore go be le dihlophahlopha ka phuthegong. Seo se ile sa direga ka diphuthegong tša lekgolong la pele la mengwaga, gomme Jakobo o ile a lemoša Bakriste ka bothata bjo. (Bala Jakobo 2:1-4.) Ga se ra swanela go ba le dihlophahlopha ka phuthegong. Re ka thušwa ke’ng gore re se ke ra ahlola ba bangwe go ya ka seo ba nago le sona?

11. Na seo motho a nago le sona se ama tswalano ya gagwe le Jehofa? Hlalosa.

¹¹ Ka ge Jehofa a sa kgetholle bana babo rena, le rena ga se ra swanela go ba kgetholla.  Motho ga a bohlokwa go Jehofa ka gobane e le mohumi goba e le modiidi. Tswalano ya rena le Jehofa ga se ya ithekga ka gore re na le sa rena goba ga re na selo. Ke nnete gore Jesu o boletše gore “go tla ba thata go mohumi gore a tsene Mmušong wa magodimo,” eupša ga se a re ga go kgonege gore mohumi a tsene Mmušong wa magodimo. (Mat. 19:23) Ka lehlakoreng le lengwe, Jesu o itše: “Go thaba lena badiidi, gobane Mmušo wa Modimo ke wa lena.” (Luka 6:20) Eupša se ga se bolele gore batho ka moka bao ba bego ba diila ba ile ba amogela molaetša wa Jesu gomme seo sa dira gore Jehofa a ba šegofatše. Badiidi ba bantši ga se ba ka ba amogela molaetša wa Jesu. Ntlha e bohlokwa še: Re ka se ahlole motho ra re o na le tswalano e botse le Jehofa goba ga a na yo feela ka go lebelela seo a nago le sona.

12. Beibele e nea bahumi le badiidi keletšo efe?

¹² Ka phuthegong go na le bana babo rena bao ba humilego leo bao ba diilago, eupša ka moka ga bona ba rata Jehofa le go mo hlankela ka pelo ka moka. Beibele e eletša bao ba humilego gore “ba se holofele mahumo a sa kgonthišegego, eupša ba holofele Modimo.” (Bala 1 Timotheo 6:17-19.) Le gona e eletša Bakriste ka moka, bahumi le badiidi, gore ba se ke ba rata tšhelete. (1 Tim. 6:9, 10) Ge re ka lebelela bana babo rena ka tsela yeo Jehofa a ba lebelelago ka yona, re ka se ba kgetholle go ya ka seo ba nago le sona. Eupša go thwe’ng ka go ahlola ba bangwe go ya ka mengwaga ya bona? Na re ka kgona go ahlola motho gabotse ka go no lebelela mengwaga ya gagwe? A re kweng.

13. Mangwalo a re ruta’ng tabeng ya go hlompha batho ba bagolo?

¹³ Go na le Mangwalo a mmalwa ao a re eletšago gore re hlomphe batho ba bagolo. Ka mohlala, Lefitiko 19:32 e re: “O eme pele ga moriri o mopududu, o hlomphe motšofadi gomme o boife nna Modimo wa gago.” Diema 16:31 le yona e re: “Hlogo e putswa ke mphapahlogo wa botse ge e hwetšwa tseleng ya go loka.” Le gona Paulo o ile a eletša Timotheo gore a se ke a kgalema monna yo mogolo ka matla, eupša a bolele le yena bjalo ka tatagwe. (1 Tim. 5:1, 2) Le ge Timotheo a be a na le matla a itšego a go nea banna bao ditaelo, o be a swanetše go ba hlompha le go bolela le bona gabotse.

14. Ke neng moo re ka swanelwago ke go nea motho yo mogolo keletšo?

¹⁴ A re re motho yo mogolo o dira sebe ka boomo goba o kgothaletša batho go dira selo seo se sa kgahlego Jehofa, na re swanetše go no homola ka gore mangwalo a re re hlomphe batho ba bagolo? Jehofa ga a ahlole go ya ka seo a se bonago e bile a ka se lese go otla motho yo a dirilego sebe feela ka gore ke yo mogolo. Hlokomela molao wa motheo wo o lego go Jesaya 65:20, wo o rego: “Modiradibe yena gaešita le ge a na le nywaga e lekgolo o tla rogakwa.” Molao woo wa motheo o gona le ponong ya Hesekiele. (Hesek. 9:5-7) Ka gona, sa bohlokwa kudu ke gore re dule re hlompha Jehofa Modimo, yena Motala wa Mabaka. (Dan. 7:9, 10, 13, 14) Ge re hlompha Jehofa, gona re ka se tšhabe go nea motho keletšo ge a e hloka, go sa šetšwe gore o na le mengwaga e mekae.​—Bagal. 6:1.

15. Re ithuta’ng go moapostola Paulo mabapi le go hlompha bana babo rena ba bafsa?

¹⁵ Go thwe’ng ka bana babo rena ba bafsa? O ba lebelela bjang? Moapostola Paulo o ile a ngwalela Timotheo yo e bego e le mofsa lengwalo a re: “Anke go se be le motho yo a nyatšago bofsa bja gago. Ka mo go fapanego, go ba botegago eba mohlala go boleleng, boitshwarong, leratong, tumelong le tshekegong.” (1 Tim. 4:12) Go ka direga gore ge Paulo a be a ngwala lengwalo le, Timotheo o be a na le mengwaga e ka bago e 30. Lega go le bjalo, Paulo o ile a nea Timotheo maikarabelo a magolo ka phuthegong. Ka gona se se re ruta taba e bohlokwa. Ga se ra swanela go ahlola bana babo rena  ba bafsa feela go ya ka mengwaga ya bona. Le gona re swanetše go gopola gore gaešita le Jesu o ile a phetha bodiredi bja gagwe mo lefaseng ge a be a le mengwageng ya bo-30.

16, 17. (a) Bagolo ba ka thušwa ke’ng go bona ge e ba ngwanabo rena a swanelega go ba mohlanka wa bodiredi goba mogolo? (b) Setšo le tsela yeo motho a bonago dilo ka yona di ka thulana bjang le Beibele?

¹⁶ Ditšong tše dingwe batho ba nyatša masogana. Seo se ka dira gore bagolo ka phuthegong ba dikadike go bolelela ngwanabo rena yo mofsa yo a swanelegago, gore e be mohlanka wa bodiredi goba mogolo. Eupša bagolo ka moka ba swanetše go gopola gore ga go na moo Beibele e re botšago gore monna o swanetše go bolelelwa a na le mengwaga e mekae gore e be mohlanka wa bodiredi goba mogolo. (1 Tim. 3:1-10, 12, 13; Tito 1:5-9) Ge e ba mogolo a šala setšo morago tabeng ye, gona ga a latele seo Mangwalo a se bolelago. Bagolo ga se ba swanela go diriša dikgopolo tša bona goba setšo ge ba nyaka go bolelela ngwanabo rena, eupša ba swanetše go hlahlwa ke Lentšu la Modimo.​—2 Tim. 3:16, 17.

¹⁷ Ge bagolo ba sa diriše Beibele ge ba nyaka go kgetha ngwanabo rena yo a swanelegago gore e be mohlanka wa bodiredi goba mogolo, ba ka no se mo kgethe le ge a swanelega. Ka mohlala, nageng e itšego mohlanka wa bodiredi yo a swanelegago o be a neilwe maikarabelo a magolo ka phuthegong. Le ge bagolo ka moka ba be ba dumelelana gore ngwanabo rena yo o fihlelela dinyakwa ka moka tša go ba mogolo, ba ile ba se mmolelele gore e be mogolo. Bothata bo be bo le kae? Bagolo ba bangwe bao ba godilego ba be ba re ngwanabo rena yo o bonagala e le monyenyane gore e ka ba mogolo. Ka manyami, ngwanabo rena yoo o ile a se kgethwe go ba mogolo feela ka baka la mengwaga ya gagwe. Le ge se se diregile nageng yeo, eupša dipego di bontšha gore dinageng tše dintši go na le bothata bjo bo swanago. Ka gona go bohlokwa kudu gore re diriše Beibele e sego setšo sa rena goba tsela yeo rena re bonago dilo ka yona. Ge re ka diriša Beibele re tla be re bontšha gore re kwa taelo ya Jesu ya gore re tlogele go ahlola ba bangwe go ya ka seo re se bonago.

18, 19. Re swanetše go dira’ng gore re lebelele ba bangwe ka tsela yeo Jehofa a ba lebelelago ka yona?

¹⁸ Ke nnete gore ga se ra phethagala eupša re ka kgona go ithuta go lebelela ba bangwe ka tsela yeo Jehofa a ba lebelelago ka yona. (Dit. 10:34, 35) Eupša seo ga se papadi, re swanetše go dira maiteko le go dula re ikgopotša seo Beibele e se bolelago ka kgethollo. Ge re ka dira bjalo, re tla kgona go kwa taelo ya Jesu ya gore re tlogele go ahlola ba bangwe go ya ka ponagalo ya ka ntle.​—Joh. 7:24.

¹⁹ Kgauswinyane go tla be go buša Kgoši ya rena e lego Jesu Kriste. A ka se ahlole go ya ka seo a se bonago ka mahlo feela goba seo a se kwago ka ditsebe tša gagwe eupša o tla ahlola batho ka moka ka toko. (Jes. 11:3, 4) Ruri re fela pelo ya gore nako yeo e fihle!