1. Пахампар Исай Йесой туххӕй ци загъта ӕма нин е нӕ нифс цӕмӕн федар кӕнуй?

ПАХАМПАР Исай Киристей туххӕй ци пахампарадӕ загъта, е нин дӕттуй нифс. Исай загъта, зӕгъгӕ, «цӕстӕй ци уина, уомӕ гӕсгӕ нӕ кӕндзӕй тӕрхон ӕма, гъосӕй ци игъоса, уомӕ гӕсгӕ нӕ кӕндзӕй уайдзӕф», фал кӕндзӕй «ӕнӕхӕран тӕрхон» (Исай 11:3, 4). Аци дзурдтӕ нин нифс цӕмӕн дӕттунцӕ? Уомӕн ӕма мах цӕрӕн, адӕн кӕрӕдземӕ ӕнӕнвӕрсон цӕстӕй кӕми кӕсунцӕ ӕма ӕндаг бакастмӕ гӕсгӕ кӕми тӕрхон кӕнунцӕ, уӕхӕн дуйней. Уомӕ гӕсгӕ нӕ ӕцӕгӕйдӕр гъӕуй Йесой хузӕн ӕнхӕст Тӕрхонгӕнӕг, уомӕн ӕма е ӕндаг бакастмӕ гӕсгӕ некӕд тӕрхон кӕндзӕй!

2. Киристе нин ци бафӕдзахста ӕма аци статьяй цӕбӕл радзордзиан?

² Алли бон дӕр адӕни туххӕй нӕуӕг еститӕ базонӕн ӕма е рабӕрӕг уй, ци цӕстӕй сӕмӕ фӕккӕсӕн, уобӕл. Фал мах Киристей хузӕн ӕнхӕст нӕ ан, ӕма нӕ сагъӕстӕ дӕр ӕнӕнхӕст ӕнцӕ. Адӕймаг цӕхуӕндӕр гъудимӕ  ӕрцӕуй, ӕ цӕститӕ ци уинунцӕ, уомӕ гӕсгӕ. Фал Йесо ба ӕ фӕдбӕлдзӕугути фӕдзахста: «Ӕндаг бакастмӕ гӕсгӕ мабал тӕрхон кӕнтӕ, фал раст тӕрхон кӕнтӕ» (Иоан. 7:24). Бӕрӕг ӕй, Йесой уотӕ ке фӕндадтӕй, цӕмӕй мах дӕр уой хузӕн иннетӕн ӕндаг бакастмӕ гӕсгӕ ма тӕрхон кӕнӕн. Аци статьяй ӕркӕсдзиан, адӕймагмӕ цӕхуӕн цӕстӕй фӕккӕсӕн, уобӕл арӕхдӕр цӕхуӕн ӕртӕ гъуддаги рабӕрӕг унцӕ, уомӕ: цӕхуӕн адӕнихаттӕй ӕй, цӕйбӕрцӕ ӕхца имӕ ес ӕма ци кари ӕй. Аци гъуддӕгтӕбӕл дзоргӕй ӕркӕсдзиан, нӕ бон куд ӕй Киристей фӕдзӕхст ӕнхӕст кӕнун.

3, 4. а) Петур, дзиуиттаг ка н’ адтӕй, уонӕмӕ ӕ цӕстингас куд раййивта? (Кӕсӕ хузӕмӕ статьяй райдайӕни.) б) Йеговӕ Петурӕн ци балӕдӕрун кодта?

³ Расагъӕс кӕнӕ, апостол Петури сӕри цӕйбӕрцӕ сагъӕстӕ адтӕй, дзиуиттаг ка н’ адтӕй, уӕхӕн лӕг Корнилиййи хӕдзарӕмӕ ӕрвист ку ’рцудӕй, уӕд (Гъуд. 10:17–29). Иннӕ дзиуиттӕгти хузӕн Петур дӕр федарӕй ӕууӕндтӕй, дзиуиттаг ка н’ адтӕй, етӕ цъумур адӕнбӕл нимад ке ’нцӕ. Фал ибӕл ци хабӕрттӕ ӕрцудӕй, уони фӕсте ба ӕндӕрхузи сагъӕс кӕнун райдӕдта. Еу хабар е адтӕй, ӕма ин Хуцау цӕстӕбӕлуайӕн фӕууинун кодта (Гъуд. 10:9–16). Петур фӕууидта арвӕй кӕттаги хузӕн цидӕр ӕрцӕйцӕугӕ ӕма ибӕл аллихузи цӕрӕгойтӕ. Уой фӕсте ба арвӕй ӕригъустӕй: «Петур, исистӕ, равгӕрдӕ си ӕма бахуӕрӕ!» Ӕртӕ хатти Петур нӕ бакумдта ӕма ӕртӕ хатти дӕр фегъосидӕ: «Хуцау ци искӕдзос кодта, уой цъумур мабал хонӕ». Еци цӕстӕбӕлуайӕнӕй Петур неци балӕдӕрдтӕй, цалинмӕ Корнилийӕй ӕрвист лӕгтӕ не ’рцудӕнцӕ, уӕдмӕ. Хуцауи сугъдӕг хъаурӕ Петури баразӕнгард кодта еци лӕгти хӕццӕ Корнилиййи хӕдзарӕмӕ фӕццӕун.

⁴ Петур ӕндаг бакастмӕ гӕсгӕ ку тӕрхон кодтайдӕ, уӕд Корнилиййи хӕдзарӕмӕ некӕд бацудайдӕ. Дзиуиттӕгтӕ некӕд бацудайуонцӕ, ӕндӕр адӕнихаттӕй ка адтӕй, уони хӕдзарӕмӕ. Мадта Петур цӕмӕн рандӕ ’й? Кӕд е дӕр, дзиуиттаг ка н’ адтӕй, уонӕмӕ ӕнӕнвӕрсон каст кодта, уӕддӕр еци цӕстӕбӕлуайӕни ӕма сугъдӕг хъаури разамунди фӕрци ӕ зундахаст раййивта. Корнилиймӕ ку байгъуста, уӕдта загъта: «Нур ӕй ӕцӕгӕй балӕдӕрдтӕн, Хуцау ке неке гъолон кӕнуй, фал алли адӕнихаттӕй ӕ зӕрдӕмӕ цӕуй, ка си тӕрсуй ӕма рӕстӕй ка цӕруй, уӕхӕн адӕймаг» (Гъуд. 10:34, 35). Еци нӕуӕг хабар Петури деси куд нӕ бафтудта, ӕма ма иннӕ киристӕнттӕбӕл дӕр фӕббӕрӕг ӕй. Цума куд?

5. а) Йеговӕ ӕгас киристӕнттӕн дӕр ци лӕдӕрун кӕнуй? б) Рӕстдзийнадӕ зонгӕй дӕр нӕмӕ еуӕй-еухатт цӕхуӕн менеугутӕ разиннуй?

⁵ Петури фӕрци Йеговӕ еугур киристӕнттӕн дӕр балӕдӕрун кодта, адӕнӕй ке неке хецӕн кӕнуй, уой. Йеговӕн си уӕлдай нӕййес, цӕхуӕн адӕнихаттӕй кенӕ бӕстӕй ан, кенӕ ба цӕхуӕн ӕвзагбӕл дзорӕн, е. Ку си тӕрсӕн ӕма раст ци ӕй, уой ку кӕнӕн, уӕд ни арази уодзӕй (Гал. 3:26–28; Рарг. 7:9, 10). Ӕвӕдзи, дӕуӕн е нӕуӕг гъуди нӕй. Фал, ка ’й зонуй, исирӕзтӕ, ӕндӕр адӕнихӕттитӕмӕ ӕнӕнвӕрсон цӕстӕй кӕми кӕсунцӕ, уӕхӕн бӕсти кенӕ бийнонти.  Кӕд дӕмӕ уотӕ кӕсуй, ӕма дӕбӕл е нӕ фӕббӕрӕг ӕй, уӕддӕр кӕмӕдӕрти ба, гӕнӕн ес, ӕма ӕнӕнвӕрсон каст фӕккӕнис. Фиццаг ӕноси киристӕнттӕ ’й Петури фӕрци балӕдӕрдтӕнцӕ, Хуцау адӕни ке нӕ хецӕн кӕнуй, уой, фал Петур ба уӕддӕр, дзиуиттаг ка н’ адтӕй, уонӕмӕ идарддӕр дӕр ӕнӕнвӕрсон цӕстӕй кӕстӕй (Гал. 2:11–14). Мадта нӕ бон куд ӕй Киристей фӕдзӕхстмӕ гӕсгӕ архайун, ӕма иннетӕн сӕ бакастмӕ гӕсгӕ ма тӕрхон кӕнун?

6. а) Ци нин банхус кӕндзӕй ӕнӕнвӕрсон миутӕ ӕд едӕгтӕ истонун? б) Еу хестӕр нӕлгоймагӕн ӕ финстӕгӕй ци рабӕрӕг ӕй?

⁶ Ӕнӕнвӕрсон каст ескӕмӕ кӕнӕн ӕви нӕ, уой базонуни туххӕй нӕ гъӕуй Хуцауи Дзурди фӕрци нӕ зӕрдӕмӕ арф никкӕсун (Пс. 119:105). Нӕ бон ма ӕй нӕ хуарз ӕмбӕлтти дӕр бафӕрсун, ӕнӕнвӕрсон миутӕ нӕмӕ уинунцӕ ӕви нӕ, уобӕл (Гал. 2:11, 14). Уӕхӕн гъудитӕ адӕймаги зӕрди уотӕ арф ниббадунцӕ, ӕма сӕ хатгай ӕхуӕдӕг дӕр нӕбал фӕууинуй! Уӕхӕн хабар ӕрцудӕй еу хестӕр нӕлгоймагбӕл. Еухатт филиалмӕ ниффинста, зингзӕрдӕй ӕнхӕстрӕстӕг ка лӕггадӕ кодта, еу уӕхӕн лӕг ӕма уоси туххӕй. Лӕг ци адӕнихаттӕй адтӕй, уонӕмӕ беретӕ ӕнӕнвӕрсон каст кодтонцӕ. Хестӕр нӕлгоймаг еци ӕнсувӕри туххӕй берӕ хуарз цидӕртӕ ниффинста, фал ма удта бафтудта: «Кӕд [еци адӕнихаттӕй] ӕй, уӕддӕр ӕхе куд даруй ӕма цӕхуӕн цард кӕнуй, уомӕй ӕвдесуй, [еци адӕнихатмӕ] ке хауис, е уобӕл дзорӕг ке нӕма ӕй, ӕма ӕнӕмӕнгӕй гъӕуама цъумур уай, [уонӕй] сӕ фулдӕр цӕхуӕн ӕнцӕ, уӕхӕн». Аци хабар нин цӕбӕл дзорӕг ӕй? Йегови организаций нин цӕйбӕрцӕфӕнди ихӕстӕ ма уа, уӕддӕр нӕ фӕгъгъӕуй, иннетӕ нин ци дзорунцӕ, уомӕ сӕрниллӕгӕй байгъосун, цӕмӕй нӕмӕ цидӕриддӕр ӕнӕнвӕрсон миутӕ ес, уони исбӕрӕг кӕнӕн. Уомӕй уӕлдай ма нӕ бон ци ӕй кӕнун?

7. Нӕ бон куд ӕй нӕ зӕрдитӕ уӕрӕх райгон кӕнун?

⁷ Нӕ зӕрдитӕ иннетӕн «уӕрӕх [ку] райгон кӕнӕн», уӕд си уарзондзийнадӕ ӕнӕнвӕрсон миутӕн бунат нӕбал ниууадздзӕй (2 Кор. 6:11–13). Дӕ рӕстӕг арӕхдӕр ке хӕццӕ ферветис? Дӕхе адӕнихаттӕй ка ӕй кенӕ дӕу ӕвзагбӕл ка дзоруй, уони хӕццӕ? Кӕд уотӕ ’й, уӕд дӕ зӕрдӕ уӕрӕхдӕр райгон кӕнӕ. Зӕгъӕн, дӕ бон ӕй аллихузи хуӕртӕ ӕма ӕнсувӕрти хӕццӕ игъосун кӕнунмӕ цӕун кенӕ сӕ иуазӕгуати ӕрбахонун (Гъуд. 16:14, 15). Уотӕ ку архайай, уӕд дӕ зӕрди ӕнӕнвӕрсон миутӕн бунат нӕбал байзайдзӕй. Нур ба ӕркӕсӕн, адӕймаг ӕндаг бакастмӕ гӕсгӕ цӕмӕн фӕттӕрхон кӕнуй ӕндӕр уӕхӕн гъуддагмӕ.

8. Левити 19:15 ци финст ес, уомӕй нӕ бон ци ӕй базонун?

⁸ Мӕгур адӕймагмӕ ӕма гъӕздуг адӕймагмӕ арӕх ӕмхузӕн цӕстӕй нӕ фӕккӕсӕн. Левити 19:15 финст ӕй: «Мӕгур адӕймагмӕ ӕнӕнвӕрсон каст ма кӕнтӕ ӕма кадгин адӕймаги фарс ма уотӕ. Иннетӕн рӕстӕй тӕрхон кӕнтӕ». Мӕгур ӕма гъӕздуг адӕймагмӕ арӕх фӕйнӕхузи цӕстӕй цӕмӕн ракӕсӕн?

9. Соломон цӕхуӕн гъуди загъта ӕма нӕ е цӕбӕл ахур кӕнуй?

⁹ Ӕмбесӕндти 14:20 сугъдӕг хъаури  разамундӕй Соломон ниффинста: «Мӕгури ӕ хеуон дӕр нӕ уарзуй, гъӕздугӕн ба берӕ ӕмбӕлттӕ фӕууй». Цума нӕ аци дзурдтӕ цӕбӕл ахур кӕнунцӕ? Лӕмбунӕг ку нӕ уӕн, уӕд уотӕ рауайдзӕй, ӕма мах дӕр нӕхе бӕтдзиан, гъӕздугдӕр ка ӕй, еци ӕнсувӕртӕбӕл, мӕгурдӕр ка ӕй, уонӕй ба нӕхе еуварс дардзиан. Адӕймаг мӕгур ӕй ӕви гъӕздуг, уомӕ кӕсун тӕссаг цӕмӕн ӕй?

10. Иаков киристӕнтти цӕхуӕн гъуддаги туххӕй фӕдзахста?

¹⁰ Хуӕртӕ ӕма ӕнсувӕрти гъӕздугутӕ ӕма мӕгуртӕбӕл ку дехтӕ кӕнӕн, уӕд, уой туххӕй, гӕнӕн ес, ӕма ӕмбурд дӕр ниддехтӕ уа. Уотӕ рауаидӕ фиццаг ӕноси ӕмбурдти дӕр, ӕма Иаков дӕр киристӕнтти уой туххӕй фӕдзахста. (Бакӕсӕ Иакови 2:1–4.) Мах гъӕуама не ’мбурд уӕхӕн зундахастӕй гъӕуай кӕнӕн. Мадта нӕ бон ци ӕй кӕнун, цӕмӕй иннетӕн сӕ есбонмӕ гӕсгӕ ма тӕрхон кӕнӕн?

11. Адӕймаг Йеговӕмӕ цӕйбӕрцӕбӕл хӕстӕг ӕй, е цума ӕ есбонӕй кӕнгӕ ӕй? Ба ’й лӕдӕрун кӕнӕ.

¹¹ Мах гъӕуама не ’нсувӕртӕмӕ Йегови цӕстӕй кӕсӕн. Йеговӕ ба адӕймагӕн, ци имӕ ес, уомӕ гӕсгӕ нӕ фӕййаргъ кӕнуй. Йегови хуарзӕнхӕ иссердзиан ӕви нӕ, е ӕхца кенӕ есбонӕй кӕнгӕ нӕй. Киристе загъта: «Зин уодзӕй гъӕздугӕн уӕларвон паддзахадӕмӕ  бацӕун». Фал уотӕ нӕ загъта, ӕма уомӕн ӕппундӕр гӕнӕн нӕ уодзӕй (Матф. 19:23). Уомӕй уӕлдай ма загъта: «Амондгун айтӕ, мӕгуртӕ, уомӕн ӕма сумах ӕй Хуцауи паддзахадӕ» (Лук. 6:20). Фал е дӕр уобӕл дзорӕг нӕй, ӕма мӕгуртӕ еугурӕйдӕр рацудӕнцӕ Киристей фӕдбӕл ӕма уӕлдай арфӕдзийнӕдтӕй исхайгин ӕнцӕ. Ӕцӕгӕйдӕр, адӕймагмӕ цӕйбӕрцӕ ӕхца ӕма есбон ес, е Йеговӕмӕ куд хӕстӕг ӕй, уой бӕрӕггӕнӕн нӕй.

12. Библий гъӕздугутӕн дӕр ӕма мӕгуртӕн дӕр цӕхуӕн фӕдзӕхститӕ ес?

¹² Абони Йегови адӕни астӕу ес гъӕздугутӕ дӕр ӕма мӕгуртӕ дӕр. Фал етӕ ӕгасӕйдӕр Йегови уарзунцӕ ӕма ин зӕрдиагӕй лӕггадӕ кӕнунцӕ. Библи гъӕздугутӕн зӕгъуй, цӕмӕй «сӕ зӕрдӕ, ӕууӕнкӕ кӕбӕл нӕййес, еци гъӕздугдзийнадӕбӕл ма даронцӕ, фал Хуцаубӕл». (Бакӕсӕ 1 Тимофеймӕ 6:17–19.) Уомӕй уӕлдай ма Библи Йегови лӕггадгӕнгути, гъӕздугути дӕр ӕма мӕгурти дӕр, фӕдзӕхсуй, цӕмӕй ӕхцауарзагӕ ма исуонцӕ (1 Тим. 6:9, 10). Нӕ хуӕртӕ ӕма ӕнсувӕртӕмӕ Йегови цӕстӕй ку кӕсӕн, уӕд син нӕ тӕрхон кӕндзиан, ци сӕмӕ ес кенӕ сӕмӕ ци нӕййес, уомӕ гӕсгӕ. Фал адӕймаг ци кари ӕй, уомӕ гӕсгӕ ба тӕрхон кӕнун раст адтайдӕ? Ӕркӕсӕн уомӕ дӕр.

13. Хестӕртӕн кадӕ кӕнуни туххӕй Библий ци финст ес?

¹³ Библи нӕ фӕдзӕхсуй, цӕмӕй хестӕрти нимайӕн. Левити 19:32 финст ӕй: «Уорссӕр адӕймаги рази исистисӕ ӕма зӕрондӕн кадӕ кӕнӕ. Тӕрсӕ дӕ Хуцауӕй». Ӕмбесӕндти 16:31 ба финст ӕй: «Адӕймагӕн ӕ уорс сӕр ӕй рӕсугъд кадиходӕ, рӕстдзийнади надбӕл ку уа, уӕд». Апостол Павел дӕр Тимофеййи фӕдзахста, цӕмӕй каргун нӕлгоймӕгтӕн карзӕй ма уайдзӕф кодтайдӕ, фал сӕ хӕццӕ фӕлмӕнӕй дзурдтайдӕ, фурт ӕ фиди хӕццӕ куд фӕдздзоруй, уотӕ (1 Тим. 5:1, 2). Ӕма кӕд фӕстӕдӕр Тимофеймӕ цӕхуӕндӕр бартӕ фӕззиндтӕй, уӕддӕр гъӕуама хестӕр ӕнсувӕртӕн кадӕ кодтайдӕ ӕма сӕ хӕццӕ фӕлмӕнӕй дзурдтайдӕ.

14. Махӕй хестӕр ка ӕй, уой бараст кӕнун кӕд багъӕуй?

¹⁴ Фал, зӕгъӕн, хестӕртӕй еске тӕрегъӕди надбӕл ниллӕудтӕй кенӕ Йегови зӕрдӕмӕ ка нӕ цӕуй, уӕхӕн гъуддӕгти сӕрбӕл дзоруй. Йеговӕ уӕхӕн адӕймагӕн ӕ тӕрегъӕдтӕмӕ цийфӕнди цӕстӕй нӕ кӕсдзӕй, цийфӕнди кари ма уа, уӕддӕр. Исаййи 65:20 финст ӕй: «Тӕрегъӕдгун адӕймагбӕл сӕдӕ анзи дӕр ку цӕуа, уӕддӕр ӕлгъист ӕрцӕудзӕй». Уӕхӕн гъуди ма ес, Йезекил ци цӕстӕбӕлуайӕн фӕууидта, уоми дӕр (Йез. 9:5–7). Мах фиццагидӕр гъӕуама нимайӕн Хуцауи, «рагидзамантӕй фӕстӕмӕ Ка ӕй», уой (Дан. 7:9, 10, 13, 14). Ӕма уӕд нӕ бон уодзӕй, бараст кӕнун ке гъӕуй, еци адӕймагӕн банхус кӕнун, цийфӕнди кари ма уа, уӕддӕр (Гал. 6:1).

15. Апостол Павел ӕригон ӕнсувӕртӕмӕ ци цӕстӕй кастӕй, уомӕй цӕбӕл ахур кӕнӕн?

¹⁵ Ӕригон ӕнсувӕрти туххӕй ба ци ес зӕгъӕн? Ӕригон ке ’нцӕ, уой туххӕй, син минкъийдӕр кадӕ кӕнгӕ ’й? Апостол Павел Тимофеймӕ финста: «Ӕригон ке дӕ, уой туххӕй дӕмӕ ӕнӕнвӕрсон каст макӕд маке кӕнӕд. Фал дзурдӕй, уагӕ ӕма ӕгъдауӕй, уарзондзийнадӕй,  ӕууӕндундзийнадӕй ӕма кӕдзосдзийнадӕй фӕнзуйнаг уо, еузӕрдон ка ӕй, уонӕн» (1 Тим. 4:12). Павел аци дзурдтӕ ку ниффинста, уӕд Тимофейбӕл, ӕвӕдзи, еу 30 анзи цудӕй. Фал ин Павел уӕддӕр берӕ ӕхсидзгӕ гъуддӕгтӕ баихӕс кодта. Е цӕбӕл дзорӕг ӕй? Ӕригон ӕнсувӕртӕн сӕ карӕмӕ гӕсгӕ гъӕуама ма тӕрхон кӕнӕн. Расагъӕс кӕнӕ, Киристебӕл 33 анземӕй ӕндӕр нӕ цудӕй, уотемӕй ба цӕйбӕрцӕ гъуддӕгтӕ искодта!

16, 17. а) Хестӕр нӕлгоймӕгтӕ куд исбӕрӕг кӕнунцӕ, ӕнсувӕр кӕстӕреуӕггӕнӕг ӕнсувӕрӕй кенӕ хестӕр нӕлгоймагӕй лӕггадӕ кӕнунмӕ цӕттӕ ӕй ӕви нӕ, уой? б) Адӕймаги гъудитӕ кенӕ бунӕттон ӕгъдӕуттӕ, хатгай, Библий ци финст ес, уой нихмӕ куд фӕуунцӕ?

¹⁶ Еуӕй-еу адӕнихӕттити ӕгъдӕуттӕмӕ гӕсгӕ ӕригӕнттӕн кадӕ нӕ фӕууй. Уой туххӕй еуӕй-еу хестӕр нӕлгоймӕгтӕ ӕригон ӕнсувӕртӕн барӕ нӕ фӕддӕттунцӕ, цӕмӕй кӕстӕреуӕггӕнӕг ӕнсувӕрӕй кенӕ хестӕр нӕлгоймагӕй лӕггадӕ кӕнонцӕ, кӕд цӕттӕ фӕуунцӕ, уӕддӕр. Фал Библий некӕми финст ес, ӕнсувӕр цӕхуӕндӕр карӕмӕ ке гъӕуама исхъӕрта, цӕмӕй ӕ бон уа кӕстӕреуӕггӕнӕг ӕнсувӕрӕй кенӕ хестӕр нӕлгоймагӕй лӕггадӕ кӕнун (1 Тим. 3:1–10, 12, 13; Тит. 1:5–9). Еци гъуддӕгтӕ се ’гъдӕуттӕмӕ гӕсгӕ ка ӕвзаруй, еци хестӕр нӕлгоймӕгтӕ Хуцауи Дзурдмӕ гӕсгӕ нӕ архайунцӕ. Хестӕр нӕлгоймӕгтӕ ӕригон ӕнсувӕртӕн, се ’гъдӕуттӕмӕ кенӕ сӕхе гъудимӕ гӕсгӕ гъӕуама ма тӕрхон кӕнонцӕ, фал Хуцауи Дзурди амундтӕмӕ гӕсгӕ (2 Тим. 3:16, 17).

¹⁷ Бӕрнон ӕнсувӕртӕ Библий уагӕвӕрдтӕмӕ гӕсгӕ ку нӕ фӕййархайунцӕ, кӕстӕреуӕггӕнӕг ӕнсувӕртӕ кенӕ хестӕр нӕлгоймӕгти нисан кӕнгӕй, уӕд уони туххӕй берӕ ӕнсувӕртӕ нисангонд не ’рцӕунцӕ. Зӕгъӕн, еу бӕсти кӕстӕреуӕггӕнӕг ӕнсувӕр ӕ ихӕстӕ дзӕбӕх ке ӕнхӕст кодта, уомӕ гӕсгӕ хестӕр нӕлгоймӕгтӕ исарази ’нцӕ, еци ӕнсувӕр Библий уагӕвӕрдтӕмӕ гӕсгӕ хестӕр нӕлгоймагӕй лӕггадӕ кӕнунмӕ цӕттӕ ке ӕй. Фал еу каргун хестӕр нӕлгоймаг ба загъта, ӕгӕр ӕригон ма ӕй, зӕгъгӕ, ӕма нӕ исарази ӕй. Гъигагӕн, еци ӕригон ӕнсувӕри, хестӕр нӕлгоймагӕй не ’снисан кодтонцӕ ӕрмӕстдӕр е ’ндаг бакасти туххӕй. Ӕма уотӕ айдагъ еу бӕсти нӕй. Хъӕбӕр ӕхсидзгӕ ’й, цӕмӕй фиццагидӕр Библий амундтӕмӕ гӕсгӕ архайӕн, ӕма нӕ зӕрдӕ нӕхебӕл кенӕ бунӕттон ӕгъдӕуттӕбӕл ма дарӕн. Уотемӕй Киристей фӕдзӕхстмӕ гӕсгӕ архайдзиан, ӕма иннетӕн сӕ бакастмӕ гӕсгӕ нӕбал тӕрхон кӕндзиан.

18, 19. Ци нин банхус кӕндзӕй не ’нсувӕртӕмӕ Йегови цӕстӕй кӕсун?

¹⁸ Кӕд ӕнӕнхӕст ан, уӕддӕр нӕ бон ӕй иннетӕмӕ Йегови цӕстӕй кӕсун, ӕма ӕнӕнвӕрсон каст макӕмӕ кӕнун (Гъуд. 10:34, 35). Гъӕуама Хуцауи Дзурди уагӕвӕрдтӕ алкӕддӕр нӕ зӕрдӕбӕл дарӕн. Ӕма сӕ ку ӕнхӕст кӕнӕн, уӕд архайдзиан Киристей фӕдзӕхстмӕ гӕсгӕ, «ӕндаг бакастмӕ гӕсгӕ мабал тӕрхон кӕнтӕ», зӕгъгӕ (Иоан. 7:24).

¹⁹ Тагъд рӕстӕги нӕ Паддзах, Йесо Киристе, ӕгас адӕнӕн дӕр тӕрхон кӕндзӕй. Ӕма син тӕрхон кӕндзӕй Хуцауи раст уагӕвӕрдтӕмӕ гӕсгӕ, цӕстӕй ци уина ӕма гъосӕй ци игъоса, уомӕ гӕсгӕ нӕ, фал (Ис. 11:3, 4). Еци дессаги рӕстӕгмӕ хъӕбӕр ӕнгъӕлмӕ кӕсӕн!