1. Isaías fó sai profesia saida kona-ba Jesus, no tanbasá mak neʼe anima tebes ita?

PROFESIA neʼebé Isaías fó sai kona-ba Jesus Kristu fó anima no esperansa ba ita. Isaías fó sai katak Jesus sei “la tesi lia tuir deʼit buat neʼebé nia matan haree, no nia sei la fó dixiplina tuir deʼit buat neʼebé nia tilun rona. Nia sei tesi lia ba ema kiʼik sira ho loloos”. (Isaías [Yesaya] 11:3, 4) Tanbasá mak liafuan sira-neʼe anima tebes ita? Tanba ita hela daudauk iha mundu neʼebé nakonu ho hahalok diskriminasaun, ema sempre tesi lia kona-ba ema seluk tuir deʼit buat neʼebé sira-nia matan haree. Tan neʼe, ita presiza Jesus, nia mak Juis neʼebé perfeitu. Nia sei nunka tesi lia ba ita tuir deʼit buat neʼebé matan haree!

2. Jesus fó mandamentu saida mai ita, no ita sei koʼalia kona-ba saida iha lisaun neʼe?

² Iha moris loron-loron, ita sempre tesi lia kona-ba ema seluk. Maibé ita la hanesan ho Jesus, ita la perfeitu, tan neʼe tesi-lia neʼebé ita halo kona-ba ema seluk mós la perfeitu. Fasil ba ita atu tesi lia tuir deʼit buat neʼebé matan haree. Tan neʼe Jesus fó mandamentu ba ita: “Keta tesi lia tuir deʼit buat neʼebé imi haree, maibé tesi lia tuir dalan neʼebé loos.” (João 7:24) Sin, Jesus hakarak ita halo tuir nia atu la tesi lia ba ema seluk tuir deʼit buat neʼebé  matan haree. Iha lisaun neʼe, ita sei koʼalia kona-ba buat tolu neʼebé bele fó influénsia ba ita-nia opiniaun kona-ba ema seluk, neʼe mak: ema nia rasa ka nasionalidade, ema neʼe riku ka kiak, no idade. Iha situasaun ida-idak, ita sei haree oinsá mak ita bele halo tuir Jesus nia mandamentu neʼe.

3, 4. (a) Saida mak halo Pedro troka ninia hanoin kona-ba ema jentiu sira? (Haree dezeñu iha leten.) (b) Jeová hanorin koñesimentu foun saida ba Pedro?

³ Imajina toʼok apóstolu Pedro nia sentimentu bainhira nia tenke bá ema jentiu ida naran Cornélio nia uma iha Sezareia! (Apóstolu 10:17-29) Pedro sai boot iha komunidade neʼebé ema haree ema jentiu sira hanesan la moos. Maibé iha buat balu foin akontese neʼebé halo nia troka ninia hanoin. Porezemplu, nia foin hetan vizaun ida husi Maromak. (Apóstolu 10:9-16) Iha vizaun neʼe, Pedro haree animál oioin neʼebé la moos tau iha buat hanesan hena boot ida tun husi lalehan. Tuirmai nia rona lian ida neʼebé hatete ba nia: “Pedro, hamriik bá, oho no han!” Pedro lakohi halo tuir. Tuirmai, lian neʼe hatete: “Ó keta bolu buat neʼebé Maromak hamoos tiha ona nuʼudar buat foʼer.” Haree tiha vizaun neʼe Pedro seidauk komprende nafatin kona-ba vizaun neʼe. Maibé iha tempu neʼe kedas, ema neʼebé Cornélio haruka toʼo iha Pedro nia fatin. Espíritu santu dirije Pedro ba Cornélio nia uma, tan neʼe nia bá hamutuk ho ema sira-neʼe.

⁴ Se Pedro mak tesi lia tuir deʼit buat neʼebé matan haree, nia sei la bá Cornélio nia uma. Ema judeu nunka sama ema jentiu sira-nia uma. Entaun tanbasá mak Pedro bá? Maski nia hatudu hahalok diskriminasaun ba ema jentiu sira, maibé vizaun neʼebé nia haree no diresaun husi espíritu santu troka ninia hanoin. Bainhira Pedro koʼalia tiha ho Cornélio, nia dehan: “Agora haʼu hatene ho didiʼak katak Maromak la todan ba sorin, maibé iha nasaun hotu, Maromak simu ema hotu neʼebé taʼuk ba nia no halo buat loos.” (Apóstolu 10:34, 35) Koñesimentu foun neʼe halo Pedro hakfodak tebes. Maibé oinsá mak koñesimentu neʼe kona mós ema kristaun hotu?

5. (a) Jeová hakarak ema kristaun hotu atu komprende kona-ba saida? (b) Maski ita hatene ona lia-loos, maibé karik ita sei iha sentimentu saida?

⁵ Liuhusi Pedro, Jeová hakarak ajuda ema kristaun hotu atu komprende katak nia la todan ba sorin. Ba nia, ema husi rasa, nasionalidade, suku, ka língua la importante, nia simu ema hotu, naran katak ema hamtaʼuk nia no halo buat neʼebé loos. (Galásia 3:26-28; Apokalipse 7:9, 10) Karik Ita hatene ona kona-ba neʼe. Maibé oinsá se Ita sai boot iha nasaun ka família neʼebé ema sempre halo diskriminasaun ba ema seluk? Maski karik Ita hanoin Ita nunka iha hahalok todan ba sorin, maibé oinsá ho Ita-nia laran, Ita iha sentimentu uitoan kona-ba diskriminasaun ka lae? Maski Pedro ajuda tiha ema seluk hodi haree katak Maromak la todan ba sorin, nia sei hatudu nafatin hahalok diskriminasaun ba ema seluk. (Galásia 2:11-14) Entaun, oinsá mak ita bele halo tuir Jesus no la tesi lia tan ema seluk tuir deʼit buat neʼebé matan haree?

6. (a) Saida mak bele ajuda ita atu hasai hahalok diskriminasaun husi ita-nia laran? (b) Buat neʼebé irmaun ida hakerek iha ninia relatóriu hatudu sai saida kona-ba ninia an?

⁶ Ita presiza uza Maromak nia Liafuan atu analiza didiʼak ita-nia an se ita iha sentimentu ka hanoin kona-ba diskriminasaun ka lae. (Salmo [Mazmur] 119:105) Karik ita mós bele husu ita-nia belun diʼak atu fó-hatene se ita iha hahalok diskriminasaun ruma ka lae, tanba ita la hatene ita rasik iha  hahalok neʼe ka lae. (Galásia 2:11, 14) Dala ruma ita sai toman ona ho hahalok neʼe toʼo la sente katak ita iha duni hahalok diskriminasaun. Neʼe mak buat neʼebé akontese ba katuas kongregasaun ida. Nia hakerek daudauk relatóriu ba sukursál kona-ba kaben-naʼin ida neʼebé badinas tebes iha sira-nia knaar tempu-tomak. Laʼen neʼe mai husi rasa neʼebé ema barak la hafolin. Katuas neʼebé hakerek relatóriu fó sai buat barak neʼebé diʼak kona-ba laʼen neʼe, maibé nia dehan: “Maski nia mai husi [nasionalidade ida-neʼe], ninia hahalok no dalan neʼebé nia halaʼo ninia moris ajuda ema seluk atu haree katak, laʼós ema hotu husi [nasionalidade ida-neʼe], mak foʼer, iha hahalok no toman ladiʼak hanesan ema seluk husi rasa [neʼe].” Ita aprende saida husi irmaun neʼe? Maski ita kaer responsabilidade oioin iha Jeová nia organizasaun, ita presiza buka-hatene didiʼak ita-nia an no husu ajuda hodi haree ita iha nafatin hahalok diskriminasaun iha ita-nia laran ka lae. Ita presiza halo saida tan?

7. Ita bele halo saida deʼit hodi hatudu katak ita ‘loke luan ita-nia laran’?

⁷ Se ita mak ‘loke luan ita-nia laran’, ita bele troka hahalok diskriminasaun ho domin. (2 Korinto 6:11-13) Ita-nia toman atu ransu ho ema mak oinsá? Ita-nia toman mak atu ransu deʼit ho ema neʼebé mai husi Ita-nia rasa, nasionalidade, suku, ka língua ka lae? Se nuneʼe, koko atu ransu ho ema seluk tan. Ita bele konvida irmaun no irmán sira neʼebé mai husi rasa seluk atu haklaken hamutuk. Ka Ita bele konvida sira bá uma atu han ka ransu hamutuk. (Apóstolu 16:14, 15) Neineik-neineik Ita-nia laran sei enxe nakonu ho domin toʼo la iha tan fatin ba hahalok diskriminasaun. Agora mai ita koʼalia buat ida tan neʼebé bele halo ita tesi lia ba ema seluk tuir deʼit buat neʼebé matan haree.

8. Oinsá mak Levítico 19:15 hatudu katak ema nia riku ka kiak bele influénsia dalan neʼebé ita haree sira?

⁸ Dala ruma ema nia riku ka kiak bele influénsia dalan neʼebé ita haree sira. Eskritura iha Levítico 19:15 dehan: “Imi labele hatudu hahalok todan ba sorin kuandu tesi-lia. Imi labele todan ba sorin ba ema kiak ka apoia deʼit ema riku. Imi tenke tesi-lia ba imi-nia maluk tuir justisa.”

9. Salomão fó sai realidade triste saida kona-ba ema, no neʼe hanorin saida mai ita?

⁹ Maibé, oinsá mak ema nia riku ka kiak bele influénsia dalan neʼebé ita haree sira? Espíritu santu leno Salomão hodi fó sai realidade neʼebé triste kona-ba ema, hodi dehan: “Ema neʼebé kiak, ninia viziñu sira odi nia, maibé ema riku iha kolega barak.” (Provérbios [Amsal] 14:20) Eskritura neʼe hanorin saida mai ita? Se ita la kuidadu, ita bele hili atu sai kolega deʼit ho irmaun-irmán sira neʼebé riku no lakohi habelun ho ema neʼebé kiak. Tanbasá mak perigu tebes atu fihir ema tuir deʼit sasán neʼebé sira iha?

10. Tiago fó avizu ba ema kristaun sira kona-ba problema saida?

¹⁰ Se ita mak fihir irmaun-irmán sira tuir deʼit sasán neʼebé sira iha, neʼe bele sobu kongregasaun nia unidade. Neʼe mak buat neʼebé akontese ba kongregasaun balu iha apóstolu sira-nia tempu, no Tiago tenke fó avizu ba kongregasaun sira-neʼe. (Lee Tiago 2:1-4.) Ita la bele husik hahalok neʼe atu fahe kongregasaun nia unidade. Entaun, oinsá mak ita bele hasees an atu la tesi lia kona-ba ema seluk tuir deʼit buat neʼebé matan haree?

11. Ema nia relasaun ho Jeová iha ligasaun ho osan ka sasán hira mak nia iha ka lae? Esplika toʼok.

¹¹ Ita tenke haree irmaun-irmán sira tuir Jeová nia haree. Ema ida iha folin ba Jeová  laʼós tanba nia riku ka kiak. Ita-nia relasaun ho Jeová la iha ligasaun ho osan ka sasán hira mak ita iha. Maski Jesus hatete katak “susar duni ba ema riku atu tama iha Ukun lalehan nian”, maibé nia la hatete katak sira sei nunka tama. (Mateus 19:23) Iha parte seluk, Jesus mós hatete: “Kontente ba imi neʼebé kiak, tanba Maromak nia Ukun mak imi-nian.” (Lucas 6:20) Maibé neʼe la dehan katak ema kiak hotu sei rona ba Jesus no halo tuir ninia hanorin. Iha ema barak neʼebé kiak mós lakohi tuir Jesus. Realidade mak, ita la bele tesi lia kona-ba ema nia relasaun ho Jeová liuhusi sasán neʼebé nia iha ka la iha.

12. Eskritura fó konsellu saida ba ema neʼebé riku no kiak?

¹² Iha Jeová nia povu nia leet, ema balu riku no ema balu kiak. Maibé sira hotu hadomi Jeová no serbí nia ho laran tomak. Eskritura fó konsellu ba sira neʼebé riku atu “la tau fiar ba sira-nia riku, maibé tau fiar ba Maromak”. (Lee 1 Timóteo 6:17-19.) Maromak nia Liafuan mós fó avizu ba Jeová nia atan hotu neʼebé riku no kiak katak, perigu tebes atu hadomi osan. (1 Timóteo 6:9, 10) Se ita mak iha hanoin neʼebé hanesan Jeová kona-ba ita-nia irmaun-irmán sira, ita sei la tesi lia kona-ba sira tuir deʼit buat neʼebé sira iha ka la iha. Maibé oinsá kona-ba idade? Diʼak atu tesi lia tuir ema nia idade ka lae?

13. Eskritura sira hatete saida kona-ba hatudu respeitu ba ema neʼebé idade liu ita?

¹³ Bíblia haruka ita atu hatudu respeitu ba ema neʼebé idade liu ita. Eskritura iha Levítico 19:32 hatete: “Imi tenke hatudu respeitu ba ema neʼebé fuuk mutin, no imi tenke hafolin katuas sira, no imi tenke hamtaʼuk imi-nia Maromak.” Eskritura iha Provérbios 16:31 hatete katak “fuuk mutin mak hanesan koroa furak ba ema sira neʼebé nafatin laʼo iha dalan neʼebé loos”. No apóstolu Paulo mós hatete ba Timóteo atu la bele kritika ema katuas sira, maibé haree sira hanesan aman. (1 Timóteo 5:1, 2) Maski Timóteo iha podér balu neʼebé boot liu irmaun idade sira-neʼe, maibé nia tenke hatudu laran-diʼak no respeitu ba sira.

14. Iha situasaun saida mak la sala atu korrije ema neʼebé idade liu ita?

¹⁴ Maibé, oinsá se ema neʼebé idade liu ita halo sala ho neon ka habelar buat neʼebé Jeová la gosta? Jeová sei la taka matan ba ema neʼebé halo sala ho neon, maski ema neʼe idade ka iha pozisaun. Haree toʼok prinsípiu husi Isaías 65:20 neʼebé hatete: “Ema neʼebé halo sala sei mate tanba hetan malisan, maski ho idade tinan atus ida.” Iha vizaun neʼebé Ezequiel haree mós fó sai prinsípiu neʼebé hanesan. (Ezequiel [Yehezkiel] 9:5-7) Buat neʼebé importante liu hotu mak atu hatudu respeitu ba Jeová, Naʼi husi Horiuluk Kedas. (Daniel 7:9, 10, 13, 14) Se ita mak hatudu respeitu ba Jeová, ita sei la taʼuk atu korrije ema neʼebé halo sala, maski nia idade boot ka kiʼik.​—Galásia 6:1.

15. Ita aprende saida husi apóstolu Paulo kona-ba hatudu respeitu ba irmaun sira neʼebé idade kiʼik liu ita?

¹⁵ Oinsá kona-ba irmaun sira neʼebé idade kiʼik liu ita? Ita presiza hatudu respeitu ba sira ka lae? Sin. Apóstolu Paulo hatete ba Timóteo: “Keta husik ema ida la respeitu ó tanba ó joven. Maibé, sai nuʼudar ezemplu ba ema laran-metin sira liuhusi ó-nia koʼalia, no iha buat neʼebé ó halo, iha ó-nia domin, fiar, no hahalok moos.” (1 Timóteo 4:12) Bainhira Paulo hakerek karta neʼe, karik Timóteo sei tinan 30, maibé Paulo fó responsabilidade importante balu ba nia atu tau matan. Neʼe hanorin saida mai ita? Ita  la bele tesi lia kona-ba irmaun sira neʼebé idade kiʼik liu ita tuir sira-nia idade. Porezemplu, Jesus kumpre buat barak tebes iha rai antes nia toʼo tinan 33!

16, 17. (a) Katuas sira uza saida atu deside katak irmaun ida kumpre kritériu ka lae atu serbí nuʼudar atan ba kongregasaun ka katuas? (b) Oinsá mak ema rasik nia opiniaun ka kultura bele kontra Bíblia nia matadalan?

¹⁶ Iha kultura balu, ema ladún hatudu respeitu ba mane sira neʼebé idade kiʼik liu sira. Tan neʼe mak katuas kongregasaun balu sente seidauk bele atu rekomenda irmaun neʼebé sei joven atu serbí nuʼudar atan ba kongregasaun ka katuas, maski irmaun neʼe kumpre ona kritériu sira. Maibé Bíblia nunka hatete katak irmaun ida tenke toʼo tinan hira mak foin bele serbí nuʼudar atan ba kongregasaun ka katuas. (1 Timóteo 3:1-10, 12, 13; Tito 1:5-9) Se katuas ida mak halo lei hanesan neʼe tanba ninia kultura, nia la halo tuir Maromak nia Liafuan. Katuas sira la bele tesi lia kona-ba irmaun neʼebé idade kiʼik liu sira, tuir sira rasik nia hanoin ka kultura, maibé sira tenke uza Maromak nia Liafuan bainhira atu rekomenda irmaun ruma.​—2 Timóteo 3:16, 17.

¹⁷ Se irmaun katuas sira la halo tuir Bíblia nia matadalan atu foti atan ba kongregasaun ka katuas, sira bele hanetik irmaun sira neʼebé kumpre ona kritériu atu serbí iha kongregasaun. Iha rai ida, iha atan ba kongregasaun neʼebé kaer responsabilidade ho didiʼak, no katuas sira konkorda katak nia kumpre duni kritériu sira husi Bíblia atu sai katuas kongregasaun. Maibé katuas balu dehan katak, irmaun neʼe haree sei joven liu atu sai katuas, tan neʼe sira la rekomenda nia. Triste tebes irmaun neʼe la sai katuas tan deʼit nia haree sei joven. Karik iha rai barak, irmaun sira iha hanoin hanesan neʼe. Importante tebes ba ita atu sadere ba Bíblia, duké sadere ba ita rasik nia opiniaun ka kultura. Neʼe mak dalan ida deʼit atu halo tuir Jesus no la tesi lia ba ema tuir buat neʼebé ita haree.

18, 19. Saida mak bele ajuda ita atu haree ema seluk hanesan Jeová haree sira?

¹⁸ Ita la perfeitu, maibé ita bele aprende nafatin atu la halo diskriminasaun ba ema seluk, no haree ema hanesan Jeová haree sira. (Apóstolu 10:34, 35) Tan neʼe, ita tenke fó atensaun beibeik ba avizu sira husi Maromak nia Liafuan. Se ita halo tuir avizu sira-neʼe, ita halo tuir duni Jesus nia mandamentu atu la “tesi lia tuir deʼit buat neʼebé [ita] haree”.​—João 7:24.

¹⁹ Lakleur tan ita-nia Liurai Jesus Kristu sei tesi lia ba ema hotu. Ninia tesi-lia sei bazeia ba Maromak nia matadalan neʼebé loos, laʼós tuir deʼit buat neʼebé nia haree ka rona. (Isaías [Yesaya] 11:3, 4) Ita hein namanas atu haree tempu furak neʼe iha futuru!