1. Мар вераз Исаия Иисус сярысь но малы солэн кылъёсыз милемлы оскон сёто?

 ИСАИЯЛЭН Иисус Христос сярысь азьпалзэ ивортонэз милемлы оскон сётэ. Исаия Иисус сярысь вераз: «Аслаз синъёсыныз адӟыса гинэ, Со судить уз кары, пельёсыныз кылыса гинэ, Со ужъёсты уз быдэсъя. Куанеръёсты шонерлыко судить кароз» (Ис. 11:3, 4). Малы та азьпалзэ ивортон сюлэмъёсмес шунтэ? Малы ке шуоно та дуннеын ӵем дыръя адямиосты, вылтуссы шоры учкыса, улӥё-вылӥё каро. Милемлы туж кулэ тырбыдэс Судья, Иисус, кудӥз адямиосты, «аслаз синъёсыныз адӟыса гинэ», судить уз кары!

2. Мар карыны косӥз Иисус? Мае ми эскеромы та статьяын?

² Котькуд нунал ми кин ке но сярысь мар ке но малпаськомы. Но ми Иисус кадь тырбыдэсэсь ӧвӧл, соин ик ӵем янгышаськомы. Ми дышемын судъяны соя, мае адӟиськомы. Нош куке Иисус музъем вылын вал, со вераз: «Вылтусъя судить эн каре, шонерлыко судэн судить каре» (Иоанн 7:24). Иисуслэн потэ вал, ми солэсь адӟем мед каромы но адямиосты вылтуссыя судить медам каре шуыса. Та статьяын ми эскеромы, кызьы адямилэн кыӵе калыкысь потэмез, ваньбурез но арлыдыз  шӧдӥське со вылын, кызьы ми со шоры учкиськомы. Котькудзэ таос пӧлысь нимысьтыз эскерыкумы, ми малпаськомы, кызьы Иисуслэсь кылзӥськыны быгатомы.

3, 4. а) Малы Пётр мукет калыкысь потэм адямиос шоры учконзэ воштӥз? (Учке статья кутсконысь суредэз.) б) Кыӵе зэмлыкез валаны юрттӥз Иегова Пётрлы?

³ Кӧня малпанъёс Пётрлэн йыраз соку ик берганы кутскизы, куке солы косэмын вал Кесарияе, мукет калыкысь потэм Корнилий доры мыныны! (Ап. уж. 10:17—29). Мукет еврейёсты сямен, Пётрез пичи дырысеныз ик мукет калыкысь потэм адямиосты чылкыттэм шуыса лыдъяны дышетӥзы. Но улонысьтыз куд-ог учыръёс Пётрез учконъёссэ воштыны косӥзы. Кылсярысь, Пётрлы Инмарлэсь адӟон сётэмын вал (Ап. уж. 10:9—16). Со адӟиз, кызьы со доры ӝӧккышет лэзиське, кудаз чылкыттэм пудоос вал, но инмысь тазьы верась куара кылӥз: «Султы, Пётр, ванды но си». Пётр чутрак пумит луиз. Соку инмысь куара солы шуиз: «Мае Инмар дун-чылкыт кариз, сое тон чылкыттэм шуыса эн лыдъя». Та адӟонэз адӟемез бере Пётр малпаськыны кутскиз, мае меда инмысь куара солы вераны тыршиз. Соку со доры Корнилийлэн ыстэм адямиосыз лыктӥзы. Святой дух пыр сётэм косонлэсь кылзӥськыса, Пётр соку ик соосын ӵош Корнилий доры мынӥз.

⁴ Пётр адямиос сярысь судить карысал ке соослэн кыӵе калыкысь потэмзыя гинэ, со ноку но Корнилий доры ӧй мынысал. Малы ке шуоно еврейёс мукет калыкысь адямиос доры уг пырало вал. Мар меда юрттӥз Пётрлы мур пыӵам сямзэ вормыны? Солэн сюлмаз мур пыӵаз адӟон но со, кыӵе косон сётэмын вал солы святой дух пыр. Корнилийлэсь верамзэ кылэмез бере со шуиз: «Зэмзэ ик табере валасько, Инмар адямиосты вылтус шоры учкыса улӥё-вылӥё уг кары. Котькуд калык пӧлысь Солэсь кышканэн, шонерлыко улӥсь муртъёс Солы кельшымонэсь-ярасесь луо» (Ап. уж. 10:34, 35). Макем шумпотӥз Пётр, та иворез кылыса! Кызьы со ивор вань христианъёс вылын шӧдӥськыны кулэ вал?

5. а) Кыӵе кулэ луись зэмлыкез тодытэмез потэ Иеговалэн вань христианъёслы? б) Кыӵе шӧдонъёсмы кылдыны быгато, ми со зэмлыкез тодӥськомы ке но?

⁵ Пётрлэн примерез вылын Иегова вань христианъёслы возьматӥз, со, вылтус шоры учкыса, адямиез улӥё-вылӥё уг кары шуыса. Со уг учкы, кыӵе калыкысь адями, кыӵе выжыысь со потэмын но кыӵе кылын вераське. Солы яра котькуд адями, кудӥз солэсь кышканэн но шонерлыко улэ (Гал. 3:26—28; Усьт. 7:9, 10). Веранэз ӧвӧл, тӥ быдэсак соин соглаш. Нош тӥ будӥды ке отын, кытын туж учко, кыӵе калыкысь потэмын адями? Оло нош, тӥляд семьяяды но сое туж чаклазы? Тӥ асьтэ сярысь малпаськоды ке но, нокинэ но вылтусызъя судить уд кариське шуыса, кытын ке но мур сюлмады сыӵе сямды ватскемын луыны быгатэ. Пётр гинэ но, кудӥз мукетъёсызлы валаны юрттӥз, Иегова, вылтус шоры учкыса, адямиез улӥё-вылӥё уг кары шуыса, берлогес ачиз  мукетъёсыз шоры озьы учкыны кутскиз (Гал. 2:11—14). Мар юрттоз милемлы Иисуслэсь кылзӥськыны но, адямиослэн кыӵе калыкысь потэмзы шоры учкытэк, улыны?

6. а) Мар кароно, адямиослэсь кыӵе калыкысь потэмзэс чаклан сяммес сюлмысьтымы выжытэм быдтон понна? б) Кыӵе сямыз кыре потӥз одӥг тӧролэн?

⁶ Милемлы туж кулэ эскерыны асьмелэсь сюлэммес, ӧз кыльы-а отчы адямиослэсь кыӵе калыкысь потэмзэс чаклан сям. Сое эскерыны милемлы юрттоз Инмарлэн Кылыз (Пс. 118:105). Ми асьмеос ум ке шӧдӥське, сыӵе сяммы вань шуыса, юаны луоз вын-агаймылэсь яке сузэр-апаймылэсь, ӧз шӧды-а со, ми адямиез кыӵе калыкысь луэмезъя судить кариськомы шуыса (Гал. 2:11, 14). Куддыръя со сям сюлме сокем мур пыӵа, адями ачиз но уг вала, солэн сыӵе сямыз кылемын шуыса. Эскеромы таӵе примерез. Одӥг тӧро филиалэ вань дырзэс сётыса ужась-тыршись кузпалъёс сярысь гожтэт гожтӥз. Картэз потэмын вал ӧжыт лыдъем калыкысь, кудӥз шоры тросэз адямиос вылтӥяськыса учко вал. Со тӧро ачиз но уг вала вал, шӧдске, со калыкысь адямиосты уг яраты шуыса. Гожтэтаз со вын-агайлэсь трос умой сямъёссэ пусйиз, но со дыре ик гожтӥз: «Со... [таӵе калыкысь] ке но, солэн улэмез но ассэ воземез шоры учкыса, мукет адямиос валало... [та калык пӧлын но] вань чылкыт улӥсь но умой сямо адямиос, мае уд вера соос пӧлысь тросэз сярысь». Малы дышетэ милемыз та пример? Иеговалэн организацияз котькыӵе уж милемлы оскемын мед луоз, милемлы кулэ сюлэммес пыр-поч эскерыны но мукетъёсызлэсь юрттэтсэс басьтыны, валан понна, ӧз кыльы-а милям адямиослэсь кыӵе калыкысь потэмзэс чаклан сяммы. Мар эшшо карыны ми быгатысалмы на?

7. Кызьы возьматоно, милям сюлэммы паськыт усьтэмын шуыса?

⁷ Ми сюлэммес мукетъёсыз понна паськыт усьтӥмы ке, яратон отысь адямиез улӥё-вылӥё карон сяммес быдтоз (2 Кор. 6:11—13). Кельше-а тӥледлы дырдэс ортчытъяны соосын гинэ, кинъёс тӥ кадь калыкысь, выжыысь потэмын яке тӥледын одӥг кылын верасько? Кельше ке, тырше мукетъёсызлы но дырдэс висъяны. Ӧте пӧртэм вын-агайёсты но сузэр-апайёсты ӵош тодытон уже пыриськыны яке ас дорады куное (Ап. уж. 16:14, 15). Соку тӥ соосты яратоды, но сюлмады вылтус шоры учкыса улӥё-вылӥё карон сямлы инты уз кыльы ни. Али ойдолэ эскеромы мукетсэ, мар шӧдӥськыны быгатэ со вылын, кызьы ми адями шоры учкиськомы,— адямилэн ваньбурез.

8. Левитын 19:15 верамъя, кызьы адямилэн ваньбурез герӟаськемын соин, кызьы ми со шоры учкиськомы?

⁸ Куддыръя ми адямиез солэн ваньбурезъя судить кариськомы. Левитын 19:15 верамын: «Куанер адями азьын эн чеберъяськы, сӥё-дано муртлы кельшыны эн тыршы; матысьтэ судить кариськод ке, шонер судить кар».

9. Кыӵе ӝож зэмлыкез гожтӥз Соломон но мар сярысь милемлы малпаськоно?

⁹ Нош кызьы адямилэн ваньбурез шӧдӥське со вылын, кызьы ми адями  шоры учкиськомы? Святой духлэн кивалтэмез улсын Соломон тырбыдэстэм адямиос сярысь ӝож зэмлыкез гожтӥз: «Куанер-начар улӥсез матысьёсыз но синазькыль каро, нош узырлэн трос эшъёсыз луо» (Мад. 14:20). Малы со милемыз дышетэ? Сак ӧм луэ ке, милям узыр вын-агайёсын эшъяськеммы потоз, нош куанеръёсызлэсь палэнскыны кутскомы. Малы кышкыт адямиосты судить карыны соя, кӧня соослэн коньдонзы?

10. Кыӵе шуг-секыт сярысь гожъяз Иаков?

¹⁰ Адямиосты ваньбурзыя гинэ судить каримы ке, со кенешын люкиськонъёслы вуттыны быгатоз. Сыӵе югдур кылдӥз нырысетӥ даурын куд-ог кенешъёсын, но со сярысь гожъяз Иаков. (Лыдӟе Иаковлэсь 2:2—4.) Туж кулэ чакласькыны, сыӵе югдур милям кенешъёсамы медаз кылды шуыса. Мар кароно, мукетъёссэ ваньбурзыя судить карыны кутсконтэм вылысь?

11. Герӟаськемын-а Иеговаен кусыпъёсмы соин, кӧня милям коньдонмы? Валэктэ.

¹¹ Мукетъёсыз шоры Иеговалэн синмыныз учконо. Инмар котькыӵе адямиез дунъя но уг учкы, узыр-а со, куанер-а. Иеговаен кусыпъёсмы герӟаськемын ӧвӧл соин, кӧня милям коньдонмы. Иисус вераз: «Секыт узыр муртлы Ин Эксэйлыке пырыны» (Матф. 19:23). Но солэн та кылъёсыз  уг возьмато, узыр мурт Эксэйлыке пырыны уз быгаты шуыса. Озьы ик Иисус вераз на, куанер муртъёс шудоесь шуыса, малы ке шуоно соослэн Инмар эксэйлыксы вань (Лука 6:20). Но Иисуслэн та кылъёсыз но уг возьмато, вань куанер муртъёс солэсь кылзӥськизы но кыӵе ке нимысьтыз бакель каронъёс басьтӥзы шуыса. Тросэз куанер адямиос солэсь иворзэ санэ ӧз понэ. Озьыен, адямилэн Иеговаен кусыпъёсыз сярысь, солэн узыр яке куанер луэмез шоры учкыса, судъяны уг луы.

12. Малы дышетэ Библия узыръёссэ но, куанеръёссэ но?

¹² Иеговалэн калыкез пӧлын трос вын-агайёс но сузэр-апайёс — узыръёсыз но, куанеръёсыз но,— кудъёсыз Иеговаез ярато но вань сюлмысьтызы солы ужало-тыршо. Библия ӧте узыръёссэ, соос «бырись-бытмись узырлык вылэ медаз оскиське», нош «улэп Инмар вылэ мед оскиськозы» шуыса. (Лыдӟе 1 Тимофейлы 6:17—19.) Со дыре ик со Инмарлэсь вань ужась-тыршисьёссэ — узыръёссэ но, куанеръёссэ но — коньдонэз яратонлэсь алэ (1 Тим. 6:9, 10). Зэм, вын-агайёсмы шоры Иеговалэн синмыныз учкимы ке, ми соосты судить ум каре соя гинэ, марзы соослэн вань яке ӧвӧл. Нош мар вераны луоз арлыд сярысь? Луэ-а адямиез арлыдызъя судъяны? Ойдолэ тодомы.

13. Библия верамъя, кызьы учконо соос шоры, кинъёс арлыдзыя милесьтым бадӟымгес?

¹³ Библиын трос пол верамын, ми гажаны кулэ шуыса соосты, кинъёс арлыдзыя милесьтым бадӟымгес. Левитын 19:32 верамын: «Пурысьтам мурт пыриз ке, султы, пересь муртэ сӥлы кар, Инмаредлэсь кышка». Со выллем малпан гожтэмын Мадёнъёсын 16:31: «Пурысьтам йырси — со данлыкен пиштӥсь венец изьы, шонерлыко улонлэн сюрес вылтӥз мынӥсьлы со сётӥське». Апостол Павел но ӧтиз Тимофеез, со аслэсьтыз бадӟымгес вын-агайёсты медаз пыкылы, нош мед гажалоз шуыса (1 Тим. 5:1, 2). Тимофей со вын-агайёслы визь-кенешъёс сётъяны кулэ вал ке но, со соосты гажаны но соосын ассэ лякытэн возьыны кулэ вал.

14. Кыӵе учырын луоз визь-кенеш сётыны арлыдын милесьтым бадӟымгес муртлы?

¹⁴ Нош арлыдызъя милесьтым бадӟым мурт юри сьӧлыка яке мылкыдэз ӝутэ ке карыны сое, мар Иеговалы уг кельшы? Соку Иегова, солэн арлыдыз шоры учкыса, сьӧлыкъёсыз шоры синзэ уг ворса. Учке, мар гожтэмын Исаиялэн 65:20: «Сю аресэ вуэм сьӧлыко мурт каргамын луоз». Со выллем возет Иезекиильлэн адӟоназ но вань (Иез. 9:5—7). Нырысь ик ми гажаны кулэ «пумтэм нуналъёс Улӥсез», Иегова Инмарез (Дан. 7:9, 10, 13, 14). Соку, кулэ луиз ке, ми ум кышкалэ визь-кенеш сётыны солы, кин милесьтым арлыдын бадӟымгес (Гал. 6:1).

15. Апостол Павеллэсь кылъёссэ лыдэ басьтыса, кызьы учконо егит вын-агайёс шоры?

¹⁵ Нош мар вераны луоз егит вын-агайёс сярысь? Кызьы тӥ соос шоры учкиськоды? Тани мар гожъяз апостол Павел егит Тимофейлы: «Нокин но тонэ, пинал-еж шуыса, санэ  понытэк медаз улы; вераськонэд, улонэд, яратонэд, духен улонэд, осконэд, дун-чылкыт улонэд оскись калыклы адӟем карымон мед луоз» (1 Тим. 4:12). Соку Тимофейлы ог 30 арес вал, вылды. Озьы ке но, Павел солы бадӟым уж оскиз. Озьыен, егитгес вын-агайёсты, соослэн арлыдзы шоры учкыса, судъяно ӧвӧл. Со сяна, тодамы возёно, куке Иисус Христос ӟеч иворез вераса ветлӥз, солы 33 арес гинэ вал шуыса.

16, 17. а) Мар вылэ пыкиськыса, тӧроос ужпум куто, кулэ-а гожтыны гожтэт, вын-агай тӧро яке кенешлы юрттӥсь луыса ужаны-тыршыны ярамон луэ шуыса? б) Кызьы ужпум кутон вылын шӧдӥськыны быгато адямилэн учконъёсыз но калык сямъёс?

¹⁶ Куд-ог калыкъёс пӧлын егит пиосмуртъёсты гажан сямзы ӧвӧл. Соин ик куддыръя тӧроос уг дырто, егит вын-агай тӧро яке кенешлы юрттӥсь луыса ужаны-тыршыны ярамон луэ шуыса, гожтэт гожтыны, со куронъёслы тупа ке но. Вань тӧроослы тодазы возёно, Библиын верамын ӧвӧл шуыса, кӧня арескысен пиосмуртэз тӧро яке кенешлы юрттӥсь карыны луэ (1 Тим. 3:1—10, 12, 13; Тит. 1:5—9). Тӧроос калык сямъёслы сюлмазы пыӵаны лэзё но арлыд пумысен асьсэос куронъёс пукто ке, соос Библиысь куронъёсъя уг лэсьто. Егит вын-агайёс шоры учконо озьы, кызьы дышетэ Инмарлэн Кылыз, нош учконо ӧвӧл озьы, кызьы аслад потэ яке кызьы дышето калык сямъёс (2 Тим. 3:16, 17).

¹⁷ Эскеромы мукет учырез. Одӥг шаерын кенешлы юрттӥсь туж быгатыса быдэстэ вал кенешын солы оскем ужез. Солэн кенешысьтыз тӧроос адӟо вал, со Библиысь куронъёслы тупа шуыса, но тӧро луыса ужаны-тыршыны ярамон луэ шуыса гожтэт ӧз гожтэ. Куд-огъёсыз арлыдын бадӟымгес тӧроос валэктӥзы, малы соос сыӵе гожтэт ӧз гожтэ. Соос веразы, со вын-агай туж егит адӟиське но солэсь кылъёссэ санэ уз понэ шуыса. Жаляса верано луэ, вылтусызлы луыса, вын-агаез тӧро ӧз каре. Та выллем учыръёс ӵем уг пумисько ке но, кызьы возьмато отчётъёс, пӧртэм шаеръёсысь трос тӧроос егит вын-агайёс шоры озьы учко. Туж кулэ чакланы, калык сямъёс но ас малпанъёсмы вылэ пыкиськыса ужпум кутэм интые, Библия вылэ пыкиськыса ужпум мед кутомы шуыса. Соку гинэ ми быгатомы Иисуслэсь кылзӥськыны но вылтусъя судить карытэк улыны.

18, 19. Мар юрттоз милемлы мукетъёсыз шоры Иеговалэн синмыныз учкыны?

¹⁸ Ми тырбыдэстэмесь ке но, быгатӥськомы адями шоры Иеговалэн синмыныз учкыны но вылтусъя судить карытэк улыны (Ап. уж. 10:34, 35). Но со понна котьку санэ пононо сое, мар вера Библия. Озьы ми Иисуслэн кылъёсызлэсь кылзӥськыны быгатомы (Иоанн 7:24).

¹⁹ Ӝоген милям Эксэймы, Иисус Христос, вань адямиосты шонерлыко судить карыны кутскоз. Со, синъёсыныз адӟыса но пельёсыныз кылыса гинэ, судить уз кары, со, Инмарлэн шонерлыко возетъёсыз вылэ пыкиськыса, судить кароз (Ис. 11:3, 4). Макем со дыр умой луоз!