1. მუ იწინასწარმეტყველ ესაიაქ იესოშ გურშენ დო მუშენ ელამკინანა თენა გურშა?

იესოშ გურშენ ესაიაშ ნარაგად წინასწარმეტყველება გურშა ელამკინანა დო იმენდის მარზენა. თიქ იწინასწარმეტყველ, ნამდა იესო „მეჯინათ ვა განსაჯენს დო ვართ ჸუჯიშ გუნაგონებუთ გიმაარგამენს“. თეშ მანგიორო, თინა „სამართლიანო განსაჯენს გაჭირებულეფს“ (ეს. 11:3, 4). თე სიტყვეფ გურშა ელამკინანა, მუშენდა ამდღარ მსოფლიო ეფშა რე გიშაკერძაფათ დო ართიანიშ გიშართუალათ. არძას ართ შურ მოლნა პჸუნდან თიცალ სრულყოფილ მოსამართლე, ნამუთ მეჯინათ დღას ვა განსაჯენს კოჩის.

2. მუ დავალება მუჩეს იესოქ დო მუს გუვარჩიენთ თე სტატიას?

² ჩქი ირ დღას შხვეფიშ გურშენ დასკვნეფ გიშამღუნა. მარა არასრულყოფილეფ ვორეთ, ათეშენ, იესოცალო სრულყოფილო ვეგშმაღინენა დასკვნეფ. ჩქინწკუმა გავლენა უღჷ თის, მუდგას თოლით ვორწყეთ. მუჟამსით იესო დედამიწას რდუნ, თქუ: „ვა განსაჯათ ართ მეჯინათ, სამართლიანო განსაჯით“ (იოან. 7:24). მუშო ოკო რაგად, იესოს ოკო, მივაჸუნათ თიშ მაგალითის დო ართ მეჯინათ ვეშვაფასათ შხვეფ. თე სტატიას გუვარჩიენთ სუმ მხარეს, სოდეთ ხალხის მეჯინათ გიშუღ დასკვნეფ: ეროვნება ვარდა ეთნიკურ წარმომავლობა, მატერიალურ მდგომარეობა დო ასაკი. სუმხოლო საკითხიშ გარჩიებაშ დროს ქობძირუნთ, მუჭო შემლებნა დევემორჩილათ იესოშ მითითებას პრაქტიკულო.

3, 4. ა) მუ მოვლენეფიშ უკულ თირუ მოციქულ პეტრექ აზროვნება უცხოტომელეფიშ გურშენ? (ქოძირით სურათ მა-9 გვერდის). ბ) მუ გაგებაფუ იეჰოვაქ პეტრეს?

³ წერმიდგინით, მუსხი მუდგარენშე შილებე ფიქრენდკო მოციქულ პეტრე, მუჟამსით თინა კესარეას, უცხოტომელ კორნელიუსიშ ჸუდეს რდუ (საქ. 10:17—29). მუჭოთ შხვა ებრაელეფინ თეშ, პეტრე ხოლო თიცალ გარემოს ირდუდ, სოდეთ უცხოტომელეფს უწმინდურებო თვალუნდეს. მარა მოციქულქ თიცალ სიტუაციას მოხვად, ნამუთიქ აზროვნება დათირაფუ. პეტრექ სასწაულებრივ ხილუა ძირჷ (საქ. 10:9—16). მუ ხილუა რდუ თენა? თიქ ქოძირ ნოჭკერ, ნამუთ ზეცაშე გიმიშ დო თექ რდუ არძანერ უწმინდურ ცხოველ. თე დროს ცაშე ხონარქ გისიმ: „პეტრე, გედირთჷ, დოჸვილ დო ოჭკუმ!“. პეტრექ სუმშა თქუ ვარია. სუმხოლოშა ზეციერ ხონარქ თის უწუ: „ნუმ დუძახუქ უწმინდურს თის, მუდგა ღორონთიქ განწმინდჷ!“. მუჟამსით გეგშაკურცხუნ, პეტრე თიშე ფიქრენდჷ, მუს ნიშნენდჷ თე ირფელ. თიმ წუთის პეტრეშა კორნელიუსიშ მაცნეეფქ ქუმორთეს. წმინდა შურშე ხემძღვანელობაშ მეღებაშ უკულ პეტრექ ქაჸუნ თინეფს კორნელიუსიშ ოძირაფშა.

⁴ პეტრეს დასკნეფ მეჯინათ გეგშუღუდკონ, დღას ვემნიშ კორნელიუსის ჸუდეშა. მუშენდა იუდეველეფ უცხოტომელეფიშ ჸუდეშა ვემნიშეს. თაშ ნამდა, მუშენ გინოდგჷ პეტრექ თე ნაბიჯ? თიწკუმა მანგარო იმოქმედ ნაძირეფ ხილუაქ დო წმინდა შურიშ ხემძღვანელობაქ. მუჟამსით კორნელიუსის ქუმურჩქილუ დო თე სიტუაციას ქიგნაჯინუნ, წმინდა შურშე შთაგონებათ თიქ თქუ: „ასე მართალო ვორწყექ, ნამდა ღორონც გიშაკერძაფა ვა უჩქჷ. არძა რჯულშე, მიდგას თიშ შიშ უღჷ დო სიმართლეს ორთუნ, მოსაწონ რე თიშო“ (საქ. 10:34, 35). თე სიახლე პეტრეშო მანგარ სახიოლო რდუ დო თე ირფელ არძა ქრისტიანწკუმა იმოქმედენდჷ. მორთ, ქობძირათ მუჭო.

5. ა) მუ ოკო იეჰოვას არძა ქრისტიანს გაგებაფუას? ბ) მუ შილებე გურშა მაფდან ინოხვილირ, თიშ უმკუჯინუო, ნამდა მიჩქნა იეჰოვა გიშაკერძაფილ ვა რე?

⁵ იეჰოვაქ პეტრეშ მაგალითით ქუგაგებაფუ ქრისტიანეფს, ნამდა თინა გიშაკერძაფილ ვა რე. ღორონთშო ვა უღჷ მნიშვნელობა მუ ეროვნებაშ რე კოჩ, ნამ ეთნიკურ ჯგუფიშ წარმომადგენელ რე ვარდა ნამ ნინაშა იჩიებ. არძა პიროვნება, კოჩ დო ვარ ოსურ, მიდგას ღორონთიშ შიშ უღჷ დო ორთჷ თის მუთ სწორ რენ, მოსაწონ რე თიშო (გალ. 3:26—28; გამოცხ. 7:9, 10). მუშო ოკო რაგად, ჩქი მიჩქუნა თენა. მარა მუქ შილებე მოხვადას თი დროს, მუჟამსით თიცალ ოჯახის ვარდა გარემოს ირდუდით, სოდეთ გიშაკერძაფას გიმირჩქინანდეს? შილებე ფიქრენდათ, ნამდა ვეგმირჩქინანთ გიშაკერძაფას, მარა იშენით გურს გაფდან თე თვისება ინოხვილირ. მართალ რე, პეტრეშ საშვალებათ იეჰოვაქ შხვეფს ქაძირუ, ნამდა ვა რე გიშაკერძაფილ, მარა უმოს გვიანო მოციქულქ იშენით გეგმირჩქინ თე თვისება (გალ. 2:11—14). მუჭო შემლებნა ვურჩქილათ იესოს დო მეჯინელო ვეშვაფასათ შხვეფ?

6. ა) მუ მიმეხვარებნა გურშე გეგშიპოთათ გიშაკერძაფა? ბ) მუშ გურაფა შემლებნა ართ პასუხიშმგებელ ჯიმაშ წერილშე?

⁶ ჩქინ დამოკიდებულება თის ოკო შევადარათ, მუთ ღორონთიშ სიტყვაშე დიბგურეთ დო თეგვარო, ქიგებგენთ ქომღუნა დო ვარ გიშაკერძაფაშ თვისება (ფსალმ. 119:105). თეს გეძინელ, შილებე შხვეფქ ხოლო ქოძირან ჩქინწკუმა თე თვისება დო ქიმმეხვარან გივორჯგინათ თის, თიშ უმკუჯინუო, ნამდა ჩქი ვა ვამჩიენთ თეს ჩქინ დუც (გალ. 2:11, 14). შილებე გიშაკერძაფაშ გრძნობა თეშ მაფდან გავითარებულ, ნამდა შურო ვა ვა ბგინაფლენდათ თეს. მაგალთო, ართ პასუხიშმგებელ ჯიმაქ ბეთელშა ოკო ონჯღონკო ართ წყვილიშ განცხადება სრულ დროთ პიონერულ მსახურებაშ გურშენ. ქომონჯ ართ-ართ ეთნიკურ უმცირესობაშ წარმომადგენელ რდუ, ნამუსით შხვეფ გლახა თოლით უჯინედეს. მუჭოთ გიმორჩქინდუნ, თე პასუხიშმგებელ ჯიმა გიშაკერძაფილ რდუ თე  ეთნიკურ უმცირესობაწკუმა დო შუროთ ვა გინაფლენდჷ თეს. მუშ წერილს პასუხიშმგებელ ჯიმაქ ბრელ ჯგირ თქუ მაჟია ჯიმაშ გურშენ, მარა ბოლოს გეუძინ: „თიშ უმკუჯინუო, ნამდა თე ჯიმა [თე ეროვნებაშ] რენ, თიშ ქცევეფ დო ცხოვრებაშ წეს ოხვარ შხვეფს თიშ გაგებას, ნამდა [თე ენთიკურ ჯგუფიშ წევრი რდენ] ვა ნიშნენს, უსუფთაო დო დაბალ დონეშ ცხოვრებაშ წეს გიღდას, მუჭოთ თენა ბრელ [თიშ ეროვნებაშ] წევრის უღჷ“. მუშ გურაფა შემლებნა თე შემთხვევაშე? ვა უღჷ მნიშვნელობა მუ პასუხიშმგებლობა მიღნა, ჩქი ოკო შევამოწმათ ჩქინ დუდ დო მზათ ვორდათ მიბღათ მოხვარა, ნამდა ქობძირათ ხომ ვა რე ინოსკილადირ გიშაკერძაფა ჩქინ გურს. ხოლო მუშ კეთება შემლებნა?

7. მუჭო ვოძირათ, ნამდა შურ დო გურით მიჸორა შხვეფ?

⁷ ჩქი დღას ვეგშაბგორუნთ მითინს დო ვეგმიფრჩქინანთ გიშაკერძაფას, მუჟამსით მთელ შურ დო გურით ქიპჸოროფუანთ შხვეფს (2 კორ. 6:11—13). წესო ხომ ვაიღუნა ხვალე თიცალ ხალხწკუმა გიღდან ურთიერთობა, მით თქვან ნინაშა იჩიებ, თქვან ეროვნებაშ ვარდა ეთნიკურ ჯგუფიშ წარმომადგენელ რე? თაშ ქორენ-და, დრო რე გეფართოვათ. შეილებნა მსახურებაშა მიდართათ თი და დო ჯიმალეფწკუმა, მისით განსხვავებულ წარსულ უღჷ, ვარდა ჸუდეშა ქუდაპეჯათ თინეფ დო ართო გატარათ დრო (საქ. 16:14, 15). თაშ ქიმიქციებუთ-და, გურს ჸოროფათ ეიფშანთ დო გიშაკერძაფაშო ადგილ ვა დოსკიდუ. ხოლო რე შხვა მხარე, სოდეთ შილებე შხვეფ მეჯინათ შევაფასათ. მორთ, ქიფჩუათ მატერიალურ მდგომარეობაშ გურშენ.

8. მუჭოთ ლევიანეფიშ 19:15-შე იძირენ, მუჭო შილებე იმოქმედას შხვაშ ქონებაქ ვარდა სიღარიბექ ჩქინწკუმა?

⁸ ხოლო ართ ფაქტორ, ნამუსით ჩქინწკუმა გავლენა უღუნ, მატერიალურ მდგომარეობა რე. ლევიანეფიშ 19:15-ის ინოჭარ: „ვეგმირჩქინა გიშაკერძაფა, ვესხუნუა მდიდარ ღარიბშა. სიმართლეთ განსაჯ სქან ჯიმა“. მუჭო შილებე შხვაშ მატერიალურ მდგომარეობაქ ვარდა სიღარიბექ იმოქმედას ჩქინწკუმა?

9. მუ ჭარ სოლომონქ დო მუს ბგურაფლენთ თავრეშე?

⁹ იგავეფიშ 14:20-ის პკითხულენთ მეფე სოლომონიშ სიტყვეფს, ნამუთ თიქ წმინდა შურიშ ხემძღვანელობათ არასრულყოფილ კათაშ გურშენ ჭარ: „ღარიბ კოჩ მუშ ჯიმას ხოლო ჯოგჷ, მარა მდიდარს ბრელ მეგობარ ჸუნს“. მუს ბგურაფლენთ თე იგავშე? ფრთხილას ვეპჸუაფუთ-და, შილებე ღარიბ ჯიმალეფწკუმა ურთიერთობაშე ვარია ქოფთქუათ დო მდიდარ ჯიმალეფწკუმა უმოს ხოლოშიან ურთიერთობა ქიდეპკინათ. მუშენ რე ოშკურანჯ მატერიალურ მდგომარეობათ ხალხიშ შეფასება?

10. მუ პრობლემაშ გურშენ აფთრხილენდჷ მოციქულ იაკობი ქრისტიანეფს?

¹⁰ და დო ჯიმალეფს ქონებათ ქუვაფასენთ-და, თეთ კრებაშა გორთუალას გემშიბღანთ. თეცალ პრობლემა რდუ პირველ საუკუნეს ნამთინე კრებას, ნამუშ გურშენ მოციქულ იაკობიქ გაფრთხილ ქრისტიანეფ (წეკითხით იაკობი 2:1—4). * ფრთხილას ოკო ვორდათ, ნამდა თეცალ პრობლემაქ ჩქინ კრებეფს ხოლო ვამაშუან. მუშ კეთება შემლებნა, ნამდა ქონებათ ვეშვაფასათ შხვეფი?

11. ქორენო იეჰოვაწკუმა ურთიერთობა მატერიალურ ქონებაშა დამოკიდებულ? გენწყით.

¹¹ და დო ჯიმალეფს იეჰოვაშ თოლით ოკო ვუჯინათ. ღორონთ პიროვნებას მატერიალურ მდგომარეობათ ვაფასენს. იეჰოვაწკუმა ჩქინ  ურთიერთობა თიშა ვა რე დამოკიდებულ, მუსხი ფარა ვარდა ქონება მიღნა. მართალ რე, იესოქ თქუ: „მდიდარ კოც გუჭირდუ ღორონთიშ სამეფოშა მინულა“. მარა თენა თის ვა ნიშნენს, თეცალ მუდგარენ შეიოლებერ ვა რე (მათ. 19:23). იესოქ თეცალ სიტყვეფ ხოლო თქუ: „ბედნერეფ რეთ ღარიბეფ, მუშენდა თქვან რე ღორონთიშ სამეფო“ (ლუკ. 6:20). მარა თენა თის ვა ნიშნენდჷ, ნამდა არძა ღარიბ ქიმირჩქილუანდჷ იესოშ გურაფეფს დო მიღენდჷ განსაკუთრებულ კურთხევეფს. მუჭოთ ბიბლიაშე იძირენ, ბრელ ღარიბიქ ვემირჩქილუ იესოშ სიტყვეფ. თავრეშე იძირე, ნამდა იეჰოვაწკუმა ურთიერთობა მატერიალურ ქონებაშა ვა რე გერსხილ.

12. მუ რჩევას არზენს ბიბლია ღორონთიშ არძა მსახურს?

¹² ღორონთიშ ორგანიზაციას ბრელ და დო ჯიმა პჸუნა, მუჭოთ ღარიბეფ თეშ მდიდარეფ ხოლო, მიდგას უჸორს იეჰოვა დო მთელ გურით ომსახურ თის. ბიბლია მდიდარეფს ელუჩანს, ღორონთიშ იმენდ უღდან დო ვართ ხოლო ქონებაშ (წეკითხით 1 ტიმოთე 6:17—19). * თეწკუმა ართო, ბიბლია აფრთხილენს ღორონთიშ არძა მსახურს, მუჭოთ მდიდარეფს თეშ ღარიბეფს ხოლო, ნამდა ვა უღდან ფარაშ ჸოროფა (1 ტიმ. 6:9, 10). მუჟამსით და დო ჯიმალეფს იეჰოვაშ თოლით ვუჯინეთინ, ვა მაღვენუნა თიშ ცდუნება, მატერიალურ მდგომარეობათ შევაფასათ თინეფ. მარა მუშ რაგად შილებე ასაკშენ? ქორენო სწორ ასაკით შევაფასათ შხვეფ?

13. მუს მოგურუანა ბიბლია ხანშა მიშულირეფიშ პატიცემაშენ?

¹³ ბიბლიას ხშირას რე მოშინაფილ, ნამდა პატი ოკო ფცათ ხანშა მიშულირეფს. ლევიანეფიშ 19:32-ს ჭარ: „ჭაღარას კუჩხშა გემწუდირთ, ხანშა მიშულირს ყურადღება ქიმიაქცი დო გოშკურდას სქან ღორონთშა“. იგავეფიშ 16:31 იჩიებ: „ჭაღარა სისკვამეშ გვირგვინ რე, მუჟამსით თინა სიმართლეშ შარაშ რე“. მოციქულ პავლექ ტიმოთეს ელუჩ, ხანშა მიშულირეფს გენჭირელო ვემეჩკო რჩევა; თიქ თინეფს მუმაცალო ოკო მექცუკო (1 ტიმ. 5:1, 2). მართალ რე, ტიმოთეს გარკვეულ ძალაუფლება უღუდ ხანშამიშულირ ჯიმალფწკუმა, მარა თის გურშა მეუღუდ თინეფიშ გაჭირება დო პატიცემას გიმირჩქინანდჷ.

14. მუჟამ შილებე დემესაჭირან ჩქინდე უნჩაშ პიროვნებაშა რჩევაშ მეჩამაქ?

¹⁴ მუშ რაგად შილებე, მუჟამსით ხანშა მიშულირ შეგნებულო აშენს ვარდა თიცალ მუდგარენს ორთჷ, მუთ იეჰოვაშო ვა რე მოსაწონ? იეჰოვა თოლს ვა წკურუნს, მუჟამსით პიროვნება შეგნებულო აშენს, ვა უღჷ მნიშვნელობა, მუ ასაკიშ რე თინა. ესაიაშ 65:20-ის საინტერესო პრინციპ რე მოჩამილ: „ცოდაშ მაკეთებელ, ოშ წანერ რდასინ ხოლო, ჭყელ იჸუაფ“. თეცალ პრინციპ რე მოჩამილ ეზეკიელიშ ხილუას ხოლო (ეზეკ. 9:5—7). თაშ ნამდა, ჩქინო მთავარ ოკო რდას, გეგმიფრჩქინათ იეჰოვა ღორონთიშ პატიცემა (დან. 7:9, 10, 13, 14). თაშ ქიმიფქციებუთ-და, ვემმერიდებნა პიროვნებაშა საჭირო რჩევაშ მეჩამა, ვა უღჷ მნიშვნელობა, მუ ასაკიშ რე თინა (გალ. 6:1).

15. მუს ბგურაფლენთ ახალგაზრდეფიშ პატიცემაშ გურშენ მოციქულ პავლეშ მაგალითშე?

¹⁵ მუშ რაგად შილებე კრებას ახალგაზრდა ჯიმალეფშენ? მუშო ოკო რაგად, ჩქი თინეფს ხოლო ოკო ფცათ პატი. პავლე მოციქულქ ახალგაზრდა ტიმოთეს მეჭარ: „მითინქ ვა დოიჭყას ჟიშე ჯინა სქან ახალგაზრდობაშ გურშენ. ართგურეფშო მაგალით რდა რაგადის, საქციელს, ჸოროფას, რწმენას დო სიწმინდეს“ (1 ტიმ. 4:12). ტიმოთე შილებე სოდგარენ 30 წანერ რდუკო, მუჟამსით პავლექ თე სიტყვეფ მეჭარ. ასაკიშ უმკუჯინუო, მოციქულქ თის მნიშვნელოვან პასუხიშმგებლობეფ  დავალ. თავრეშე თის ბგურაფლენთ, ნამდა ახალგაზრდეფ მუნეფიშ ასაკით ვეშვაფასათ. ვაგმოჭყორდან, ნამდა ჩქინ უფალ იესო 33 წანერ რდუ, მარა თე დროშო მნიშვნელოვან საქმეეფ აფუდ კეთებულ.

16, 17. ა) მუჭო ოკო გინოჭყვიდან პასუხიშმგებელ ჯიმალეფქ, ქაკმაყოფილენს დო ვარ პიროვნება მომსახურეთ ვარდა უხუცესო მსახურებაშ მოთხოვნეფს? ბ) მუჭო შილებე პირად აზრიქ ვარდა ჩქინ კულტურას გავრცელებურ შეხედულებეფქ მეცილან ბიბლიურ ნორმეფიშ მეჸუნას?

¹⁶ ნამთინე კულტურას მეღებულ ვა რე ახალგაზრდეფიშ პატიცემა. თეცალ დროს შილებე უხუცესეფქ რეკომენდაცია ვემეჩან ახალგაზრდა ჯიმალეფს მომსახურეთ ვარდა უხუცესო ქიმსახურან, თიშ უმკუჯინუო, ნამდა აკმაყოფილენა ბიბლიურ მოთხოვნეფს. არძა უხუცესის ოკო შუდას, ნამდა ბიბლიას ვა რე მოჩამილ კონკრეტულ ასაკ, მუჟამ ოკო დენიშნას პიროვნებაქ მომსახურეთ ვარდა უხუცესო (1 ტიმ. 3:1—10, 12, 13; ტიტ. 1:5—9). უხუცეს ვემეჸუნს ბიბლიურ ნორმეფს, მუჟამსით მუშ კულტურას მეღებულ ნორმეფით ადგინენს წესის. ახალგაზრდეფ პირად შეხედულებეფით ვარდა ჩქინ კულტურას გავრცელებულ წესეფით ვარინ, ბიბლიურ ნორმეფით ოკო შევაფასათ (2 ტიმ. 3:16, 17).

¹⁷ მომსახურეთ ვარდა უხუცესო დანიშნებაშ დროს პასუხიშმგებელ ჯიმალეფ ბიბლიურ ნორმეფს ვემეჸუნან-და, თინეფქ შილებე ეცილან თი ჯიმალეფიშ დანიშნებას, მით აკმაყოფილენა მოთხოვნეფს. მაგალთო, ართ ქიანას, მომსახურე ჯიმა ჯგირო ასრულენდჷ მენდებულ პასუხიშმგებლობეფს. თიშ კრებაშ უხუცესეფ ფიქრენდეს, ნამდა თე ახალგაზრდა ჯიმა აკმაყოფილენდჷ უხუცესო მსახურებაშ მოთხოვნეფს, მარა ნამთინე ხანშა მიშულირ ჯიმაქ ვემეჩ თის რეკომენდაცია. თინეფიშ აზრით, თე ჯიმა უხუცესობაშო ნაბეტან ახალგაზრდათ იძირედ დო სანარღოთ, ხვალე თე მიზეზიშ გურშენ ვა დანიშნეს. თენა ხვალე ართ მაგალით რე, მარა ანგარიშეფშე იძირე, ნამდა თეცალ აზროვნება მსოფლიოშ ბრელ ქიანას რე გავრეცლებურ. დასურო, მნიშვნელოვან რე, თეცალ დროს ბიბლიას მივენდათ დო ვართ ხოლო პირად აზრის ვარდა ჩქინ კულტურას გავრცელებურ შეხედულებეფს. ხვალე თეგვარო დევემორჩილებუთ იესოშ მითითებას დო მეჯინელო ვეშვაფასენთ შხვეფს.

18, 19. მუ ოკო ვაკეთათ, ნამდა შხვეფს იეჰოვაშ თოლით ვუჯინათ?

¹⁸ მართალ რე, არასრულყოფილეფ ვორეთ, მარა იეჰოვაცალო, ჩქი ხოლო შემლებნა ვეგშაბგორათ მითინ (საქ. 10:34, 35). მარა თეშო საჭირო რე, ჩქინ ყურადღება ირიათო ღორონთიშ სიტყვას მოჩამილ რჩევეფშა მაფდან გინოღალირ. ბიბლიურ რჩევეფიშ გიმორნაფა მიმეხვარებნა, დევემორჩილათ იესოშ მითითებას დო მეჯინათ ვეშვაფასათ მითინ (იოან. 7:24).

¹⁹ მალას ჩქინ მეფე, იესო ქრისტე მთელ კაცობრიობას ღორონთიშ სამართლიან ნორმეფით გასამართლენს დო ვართ ხოლო თით, მუდგას ორწყე ვარდა ირჩქილე (ეს. 11:3, 4). ჩქი შურდოგურით ველუთ თე დროშ მოულას!