1. ¿Baʼax tu yaʼalaj Isaías yoʼolal Jesús, yéetel baʼaxten jach ku líiʼsik k-óol?

 PROFETA Isaíaseʼ tu yaʼalaj yoʼolal Jesús: «Maʼ bíin pʼis óolnak chéen tu yoʼolal baʼax ku tsikbaltaʼaliʼ, maʼ bíin pʼis óolnak chéen tu yoʼolal x-mukul tʼaanoʼobiʼ. Bíin pʼis óolnak utiaʼal le [óotsiloʼoboʼ]» (Isa. 11:3, 4). Le tʼaanoʼobaʼ jach ku líiʼsik k-óol. ¿Baʼaxten? Tumen yaʼab máakoʼob teʼ kʼiinoʼobaʼ ku juzgartaʼaloʼob chéen yoʼolal bix u yilaʼaloʼob. Le oʼolal k-tsʼíiboltik ka u juzgartoʼon Jesús, le Juez maʼatech u juzgar chéen yoʼolal bix u yilaʼal máakoʼ.

2. ¿Baʼax tu yaʼalaj Jesús ka k-beete, yéetel baʼax ken k-il teʼ xookaʼ?

² U suukileʼ k-tuklik wa baʼax yoʼolal baʼax ku beetik u maasil. Baʼaleʼ, tumen j-kʼebanoʼoneʼ, maʼ tu páajtal k-juzgartik u maasil tubeel, jeʼex u beetik Jesuseʼ. Toʼoneʼ maases k-juzgartik u maasil chéen yoʼolal bix u yilaʼal. Baʼaleʼ Jesuseʼ tu yaʼalaj: «Xuʼuluk a juzgareʼex chéen yoʼolal baʼax ka paktikeʼex, baʼaxeʼ juzgarneneʼex jeʼex unajeʼ» (Juan 7:24). Jeʼex túun k-ilkoʼ, Jesuseʼ u kʼáat ka k-beet jeʼex letiʼeʼ, maʼ unaj k-juzgartik u maasil chéen yoʼolal bix u yilaʼaliʼ. Teʼ xookaʼ yaan k-ilik óoxpʼéel baʼaloʼob jeʼel u beetik k-juzgartik maʼ maʼalob u maasileʼ: tuʼux u taal máak, yoʼolal u taakʼin wa yoʼolal u jaʼabil. Tiʼ cada junpʼéeleʼ yaan k-ilik bix jeʼel u páajtal k-beetik le baʼax tu yaʼalaj Jesusoʼ.

3, 4. 1) ¿Baʼaxten tu kʼexaj apóstol Pedro bix u yilik le j-táanxel luʼumiloʼoboʼ? (Ilawil le dibujo yaan tu káajbal le xookaʼ.) 2) ¿Máakalmáak le túumben kaʼansaj tsʼaʼab u yojéelt Pedro tumen Jéeobaoʼ?

³ Koʼox tuklik baʼax wal máan tu tuukul apóstol Pedro le ka aʼalaʼabtiʼ ka xiʼik tu yotoch Cornelio, juntúul máak maʼ judío kajaʼan tu kaajil Cesareaiʼ (Bax. 10:17-29). Jeʼex u maasil judíoʼobeʼ, Pedroeʼ líikʼ ichil máakoʼob ku yilkoʼob le máaxoʼob maʼ judíoʼob bey maʼ limpioʼob tu táan Dioseʼ. Baʼaleʼ tsʼaʼab u yil tumen Dios unaj u kʼexik bix u tuukul (Bax. 10:9-16). Tu yilaj u yéemel junpʼéel baʼal bey junpʼéel nuxiʼ nookʼ tuʼux ku chíikpajal baʼalcheʼob maʼ uts u jaantaʼaliʼ, ka tu yuʼubaj u yaʼalaʼal teʼ kaʼan ka u kíimsoʼob utiaʼal ka u jaantoʼ. Letiʼeʼ óoxtéen tu yaʼalaj maʼ ken u beete. Cada juntéen ka tu yaʼalaj maʼ ken u jaanteʼ, aʼalaʼabtiʼ: «Xuʼuluk a waʼalik éekʼtak le baʼaloʼob tsʼoʼok u limpiokíintaʼal tumen Diosoʼ». Ka tsʼoʼokeʼ Pedroeʼ xaʼakʼpajaʼan u tuukul, maʼ tu naʼatik baʼax u kʼáat u yaʼal le tʼaan tu yuʼuboʼ. Teʼ súutukoʼ kʼuch tʼanbil tumen junjaats máakoʼob túuxtaʼanoʼob tumen Cornelio. Pedroeʼ nuʼuktaʼab tumen le kiliʼich muukʼ utiaʼal ka xiʼik tu yéeteloʼoboʼ.

⁴ Le judíoʼoboʼ junpuliʼ maʼatech u yookloʼob tu yotoch le j-táanxel luʼumiloʼoboʼ. Le oʼolal wa ka seguernak u tuukul Pedro kaʼach beyoʼ, bejlaʼa maʼ kun bin tu yotoch Cornelioeʼ. ¿Baʼaxten túun biniʼ? Yoʼolal le baʼax tsʼaʼab u yil tumen Diosoʼ bey xan yoʼolal u nuʼuktaj le kiliʼich muukʼoʼ. Ka tu yuʼubaj baʼax tu yaʼalaj Cornelioeʼ, Pedroeʼ péeknaj u yóoleʼ ka tu yaʼalaj: «Beoraaʼ tsʼoʼok in kʼuchul in naʼateʼ Dioseʼ mix máak jelaʼan u paktik, baʼaxeʼ tiʼ tuláakal kaajeʼ ku kʼamik jeʼel máax u chʼaʼamaj saajkil tiʼ yéetel ku beetik baʼax utseʼ» (Bax. 10:34, 35). Le túumben kaʼansaj tsʼaʼab u yojéelt Pedrooʼ jach yaan u yáantik tuláakal le máaxoʼob tsaypachtik Cristooʼ. ¿Baʼaxten k-aʼalik lelaʼ?

5. 1) ¿Baʼax u kʼáat Jéeoba ka u naʼat tuláakal máaxoʼob meyajtik? 2) ¿Baʼax jeʼel u yúuchultoʼon kex k-ojel mix máak jelaʼan u paktaʼal tumen Dioseʼ?

⁵ Yoʼolal le baʼax aʼalaʼab tiʼ Pedrooʼ, Jéeobaeʼ tu yáantaj le máaxoʼob meyajtik u naʼatoʼoboʼ, letiʼeʼ mix máak jelaʼan u paktik. Utiaʼal letiʼeʼ minaʼan u jelaʼanil mix máak kex yaanal u kaajal, u luʼumil, u chʼiʼibal wa u idioma. Ku kʼamik le xiiboʼob yéetel le koʼoleloʼob ku beetkoʼob baʼax uts tu tʼaanoʼ (Gal. 3:26-28; Apo. 7:9, 10). U jaajileʼ bejlaʼeʼ tuláakloʼon k-ojel lelaʼ yéetel k-tuklikeʼ tak toʼoneʼ maʼatech k-ilik jelaʼanil u maasil. Baʼaleʼ wa líikʼoʼon ichil junpʼéel familia jelaʼan u yilik u maasileʼ, maʼ xaaneʼ láayliʼ bey k-beetik ichil k-puksiʼikʼaloʼ. Tak Pedro, le máax áant u maasil u naʼatoʼob mix máak jelaʼan u paktaʼal tumen Dioseʼ, juntéenjeakeʼ tu yeʼesaj láayliʼ jelaʼan u paktik u maasileʼ (Gal. 2:11-14). Le oʼolaleʼ, ¿bix jeʼel k-beetik le baʼax tu yaʼalaj utiaʼal maʼ k-juzgartik u maasil chéen yoʼolal bix u yilaʼaloʼoboʼ?

6. 1) ¿Baʼax jeʼel u yáantkoʼon utiaʼal ka xuʼuluk k-juzgartik u maasil chéen yoʼolal bix u yilaʼaloʼobeʼ? 2) ¿Baʼax tu yeʼesaj le baʼax tu tsʼíibtaj juntúul sukuʼunoʼ?

⁶ Utiaʼal k-ilik wa láayliʼ jelaʼan k-paktik u maasileʼ, unaj k-ilik wa táan k-tsʼáaik ichil k-kuxtal le baʼax k-kanik teʼ Bibliaoʼ (Sal. 119:105). Tsʼoʼoleʼ jeʼel u páajtal k-kʼáatik tiʼ juntúul k-amigo wa ku yilik bey jach séeb k-jáan juzgartik wa máax chéen yoʼolal bix u yilaʼaleʼ (Gal. 2:11, 14). Maʼ xaaneʼ maʼatech k-tsʼáaik cuenta, tumen bey suukil k-beetkoʼ. Koʼoneʼex ilik baʼax úuch tiʼ juntúul sukuʼun tsʼaʼan junpʼéel nojoch meyaj u beet ichil u kaajal Jéeoba, letiʼeʼ tu túuxtaj junpʼéel informe yoʼolal juntúul sukuʼun yéetel u yatan ku xupkubaʼob u meyajtoʼob Dios. U yíicham le kiikoʼ ku taal tiʼ junpʼéel  chʼiʼibal maʼ nojochiʼ yéetel jach ku mixbaʼalkúuntaʼal tumen u maasil. Le sukuʼun túuxt le informeoʼ, maʼ u tsʼáa cuenta wa láayliʼ ku mixbaʼalkúuntik le máakoʼob ku taaloʼob teʼ chʼiʼibal jeʼeloʼ. Kex yaʼab baʼaloʼob maʼalobtak tu tsʼíibtaj yoʼolal le sukuʼunoʼ, tu tsʼookeʼ tu yaʼalaj: «Kex tiʼ le chʼiʼibal u taaloʼ, le bix u kuxtaloʼ ku yáantik u maasil u naʼateʼ, jeʼel u páajtal u pʼáatal limpioileʼ yéetel u maʼalobtal u kuxtal, kex maʼ bey kuxlik u maasil teʼ chʼiʼibal jeʼeloʼ». ¿Baʼax ku yáantkoʼon k-il lelaʼ? Kex jeʼel baʼalak meyajil ka tsʼaʼabaktoʼon ichil u kaajal Dioseʼ, kʼaʼabéet k-jach ilik baʼax yaan t-puksiʼikʼal yéetel k-chaʼik k-áantaʼal utiaʼal u xuʼulul k-juzgartik u maasil chéen yoʼolal bix u yilaʼaloʼob. ¿Baʼax uláakʼ unaj k-beetik?

7. ¿Bix jeʼel k-jeʼekʼabtik k-puksiʼikʼal utiaʼal k-yaabiltik le sukuʼunoʼoboʼ?

⁷ Wa k-jeʼekʼabtik k-puksiʼikʼal utiaʼal k-yaabiltik le sukuʼunoʼoboʼ, maas maʼ ken k-juzgartoʼob chéen yoʼolal bix u yilaʼaloʼob (2 Cor. 6:11-13). ¿K-máansik wa tiempo chéen yéetel le máaxoʼob tʼanik k-idioma, yanoʼob ichil k-chʼiʼibal, wa chéen yéetel le ku taaloʼob teʼ luʼumil tuʼux k-taaloʼ? Wa beyoʼ unaj k-ilik k-bisikba yéetel tuláakal u jejeláasil sukuʼunoʼob. Jeʼel u páajtal k-invitartikoʼob ka jóokʼkoʼob kʼaʼaytaj t-éetel, ka xiʼikoʼob janal t-otoch wa chéen utiaʼal k-múul antal tu yéeteloʼob (Bax. 16:14, 15). Wa k-beetik beyoʼ yaan k-maas yaabiltikoʼob. Baʼaleʼ uláakʼ baʼal jeʼel u beetik k-juzgartik maʼ maʼalob le sukuʼunoʼoboʼ letiʼe taakʼinoʼ.

8. Jeʼex u yaʼalik Levítico 19:15, ¿baʼax oʼolal jeʼel k-juzgartik u maasileʼ?

⁸ Uláakʼ baʼal jeʼel u beetik k-juzgartik maʼ maʼalob le sukuʼunoʼoboʼ letiʼe taakʼinoʼ. Le oʼolal le Bibliaoʼ ku yaʼalik: «Maʼ unaj a chʼaʼik óotsilil tiʼ juntúul máak chéen tumen óotsiliʼ mix unaj a tsʼáaikaba tu favor juntúul máak chéen tumen ayikʼaliʼ. Unaj a beetik baʼax justo le kéen a juzgart a wéet máakiloʼ» (Lev. 19:15, TNM). Yaan horaeʼ jeʼel k-juzgartik wa máax chéen tumen yaan taakʼin tiʼeʼ wa tumen minaʼan tiʼ.

9. ¿Baʼax tu yaʼalaj Salomón suuk u beetaʼal, yéetel baʼax ku kaʼansiktoʼon?

⁹ Yáanal u nuʼuktaj le kiliʼich muukʼoʼ, Salomoneʼ tu tsʼíibtaj le baʼax ku beetik máak yoʼolal le kʼebanoʼ: «Óotsileʼ ku chʼaʼkʼuxtaʼal tak tumen u yéet bisajbáail; ayikʼaleʼ maʼ tu bineltik máax láakʼintik» (Pro. 14:20). ¿Baʼax ku kaʼansiktoʼon le tekstoaʼ? Ku kaʼansiktoʼoneʼ wa maʼ k-kanáantikbaeʼ jeʼel k-bisikba chéen yéetel le máaxoʼob yaan taakʼin tiʼoboʼ. Baʼaleʼ ¿baʼaxten maʼ maʼalob ka k-bisba yéetel u maasil chéen yoʼolal le baʼaxoʼob yaantiʼoboʼ?

10. ¿Baʼax tu yaʼalaj Santiago maʼ unaj u beetaʼaliʼ?

¹⁰ Wa k-juzgartik u maasil yoʼolal u taakʼineʼ jeʼel k-beetik u jatskuba le sukuʼunoʼob teʼ múuchʼuliloʼ. Lelaʼ bey u beetik kaʼach jujuntúul sukuʼunoʼob teʼ yáax siglooʼ (xok Santiago 2:1-4). Maʼ unaj k-chaʼik u beetaʼal t-múuchʼulil lelaʼ. ¿Baʼax jeʼel u yáantkoʼon utiaʼal maʼ u yúuchleʼ?

11. ¿Chéen wa yoʼolal le baʼaxoʼob yaantoʼon ku biskuba Jéeoba t-éeteloʼ?

¹¹ Unaj k-ilik k-sukuʼunoʼob jeʼex u yilaʼaloʼob tumen Jéeobaeʼ. Letiʼeʼ maʼatech u maas yaabiltikoʼon tumen ayikʼaloʼon wa tumen óotsiloʼon. Tsʼoʼoleʼ maʼ kun xuʼulul u biskuba t-éetel chéen yoʼolal le bukaʼaj baʼaloʼob yaantoʼonoʼ. Jesuseʼ tu yaʼalaj: «Istikyaj jeʼel u yokol juntúul ayikʼal máak tu Reinoil kaʼaneʼ». Baʼaleʼ lelaʼ maʼ u kʼáat u yaʼal wa jach junpuliʼ maʼ tu páajtaliʼ (Mat. 19:23). Letiʼeʼ tu yaʼalaj xan: «Teʼex máax óotsileʼexeʼ, kiʼimak a wóoleʼex, tumen a tiaʼaleʼex u Reino Dios» (Luc. 6:20). Baʼaleʼ maʼ táan  u yaʼalik wa tuláakal le óotsiloʼob kun kʼamik le maʼalob péektsiloʼ. Yaʼab tiʼ le óotsiloʼoboʼ maʼ tu beetubaʼob u disipuloʼobiʼ. Lelaʼ ku kaʼansiktoʼoneʼ maʼ tu páajtal k-aʼalik wa yaabiltaʼan wa máax tumen Jéeoba chéen yoʼolal le baʼaxoʼob yaantiʼoʼ.

12. ¿Baʼax ku yaʼalik le Biblia tiʼ le ayikʼaloʼob yéetel tiʼ le óotsiloʼoboʼ?

¹² Ichil le máaxoʼob meyajtik Jéeoba yéetel chúukaʼan óolaloʼ, yanoʼobeʼ ayikʼaloʼob yéetel yanoʼobeʼ óotsiloʼob. Le Bibliaoʼ ku yaʼalik tiʼ le máaxoʼob ayikʼaloʼoboʼ «maʼ unaj u kʼubik u yóoloʼob tiʼ le ayikʼaliloʼob ku xuʼululoʼoboʼ, baʼaxeʼ tiʼ Dios» (xok 1 Timoteo 6:17-19). Tsʼoʼoleʼ ku yaʼalik tiʼ tuláakal le máaxoʼob meyajtik Dios, le ayikʼaloʼob yéetel le óotsiloʼoboʼ, ka u kanáantubaʼob utiaʼal maʼ u yaabiltikoʼob le taakʼinoʼ (1 Tim. 6:9, 10). Wa k-ilik le sukuʼunoʼob jeʼex u yilaʼaloʼob tumen Jéeobaoʼ, maʼ ken k-juzgartoʼob chéen yoʼolal le baʼaxoʼob yaantiʼoboʼ. Baʼaleʼ ¿maʼalob wa ka k-juzgartoʼob chéen yoʼolal u jaʼabiloʼob? Koʼoneʼex ilik.

13. ¿Bix u yaʼalik le Biblia unaj k-tratartik le sukuʼunoʼob tsʼoʼok u yantal u jaʼabiloʼoboʼ?

¹³ Le Bibliaoʼ yaʼab u téenel ku yaʼalik ka k-eʼes tsiikil tiʼ le máaxoʼob tsʼoʼok u yantal u jaʼabiloʼoboʼ. Levítico 19:32, ku yaʼalik: «Waʼalen utiaʼal a tsikik juntúul nuxib. Eʼes tsiikil tiʼ a Dios». Proverbios 16:31, ku yaʼalikeʼ «u sakil u tsoʼotsel joʼoleʼ junpʼéel [corona] náajaltaʼan yéetel junpʼéel maʼalob kuxtal». Apóstol Pablo xaneʼ tu yaʼalaj tiʼ Timoteo maʼ unaj u kʼeyik juntúul máak tsʼoʼok u yantal u jaʼabiliʼ, baʼaxeʼ tu yaʼalajtiʼ: «Tʼan jeʼex a tʼanik a taataeʼ» (1 Tim. 5:1, 2). Kex tsʼaʼan páajtalil kaʼach tiʼ Timoteo yóokʼol le sukuʼunoʼob yaan u jaʼabiloʼoboʼ, unaj u yeʼesik tsiikil yéetel u chʼaʼik óotsilil tiʼob.

14. ¿Baʼaxten yaan kʼiineʼ ku kʼaʼabéettal u tsolnuʼuktaʼal juntúul sukuʼun tsʼoʼok u yantal u jaʼabil?

¹⁴ ¿Kux túun wa ku kʼebantal juntúul sukuʼun tsʼoʼok u yantal u jaʼabil wa ku joʼopʼol u yaʼalik tiʼ u maasil ka u beet baʼax maʼ uts tu tʼaan Diosiʼ? Jéeobaeʼ maʼ ken u chéen il baʼax ku beetik chéen tumen tsʼoʼok u yantal u jaʼabil. Tuukulnakoʼon tiʼ baʼax ku yaʼalik le Bibliaaʼ: «Kex cien años yaan tiʼ juntúul máak ku beetik baʼax maʼ maʼalobeʼ yaan u taal junpʼéel maldición tu yóokʼol» (Isa. 65:20, TNM). Lelaʼ bey xan u yeʼesik le baʼax tsʼaʼab u yil Ezequieloʼ (Eze. 9:5-7). Le oʼolal toʼoneʼ unaj k-ilik k-eʼesik tsiikil tiʼ Jéeoba, le Máax jach úuch yanakoʼ (Dan. 7:9, 10, 13, 14). Bey túunoʼ maʼ unaj k-sajaktal k-tsol u nuʼuk tiʼ mix máak kex jeʼel bukaʼaj u jaʼabileʼ (Gal. 6:1).

15. ¿Baʼax k-kanik tiʼ apóstol Pablo yoʼolal bix unaj u yilaʼal le táankelmoʼoboʼ?

¹⁵ ¿Bix unaj k-ilik le táankelmoʼoboʼ? Koʼoneʼex ilik baʼax aʼalaʼab tiʼ Timoteo tumen apóstol Pablo: «Maʼ a chaʼik tiʼ mix máak ka u mixbaʼalkúunt a táankelmil, baʼaxeʼ yéetel le baʼaxoʼob ka beetkoʼ eʼes tiʼ le máakoʼob chúukaʼan u yóoloʼob bix unaj u tʼaanoʼob, bix unaj u kuxtaloʼob, bix unaj u yeʼeskoʼob yaabilaj, bix unaj u yeʼeskoʼob fe, yéetel bix jeʼel u kuxtaloʼob ich kiliʼichileʼ» (1 Tim. 4:12). Ka tsʼíibtaʼab le tʼaanoʼob tumen Pabloaʼ, Timoteoeʼ tsʼoʼok maas tiʼ 30 años tiʼ. Baʼaleʼ Pabloeʼ tu tsʼáaj nukuch meyajoʼob u beete. U jaajileʼ maʼ k-ojel baʼax oʼolal tu yaʼalaj tiʼ Timoteo lelaʼ, chéen baʼaleʼ ku kaʼansiktoʼoneʼ maʼ unaj k-tuklik wa le táankelmoʼoboʼ maʼ tu páajtal u beetkoʼob wa baʼax meyajil teʼ múuchʼuliloʼ. Kʼaʼajaktoʼoneʼ Jesuseʼ chéen junpʼíit maas tiʼ treinta años yaantiʼ ka tu beetaj le meyaj túuxtaʼab u beet tumen u Taataoʼ.

16, 17. 1) ¿Bix u yilik le ancianoʼob wa yaan u recomendarkoʼob juntúul sukuʼun u beet u siervo ministerialil wa u ancianoiloʼ? 2) ¿Baʼaxten maas unaj u beetaʼal le baʼax ku yaʼalik le Bibliaoʼ?

 ¹⁶ Yaan tuʼuxeʼ maʼatech u chʼaʼabal en cuentail le táankelmoʼoboʼ. Teʼ múuchʼuliloʼob beyaʼ, maʼ xaaneʼ le ancianoʼoboʼ maʼatech u jáan recomendartikoʼob utiaʼal u beetik u siervo ministerialiloʼob wa u ancianoiloʼob kex ku beetkoʼob tuláakal baʼax ku kʼáataʼal. Le ancianoʼoboʼ unaj u kʼaʼajskoʼobeʼ le Bibliaoʼ maʼatech u yaʼalik jaypʼéel años unaj u yantal tiʼ juntúul sukuʼun utiaʼal u tsʼaʼabal u beet le meyajoʼobaʼ (1 Tim. 3:1-10, 12, 13; Tito 1:5-9). Wa juntúul anciano ku yaʼalik baʼax unaj u beetaʼal chéen tumen bey suukaʼanil teʼ tuʼux kajaʼanoʼ, maʼ táan u beetik le baʼax ku yaʼalik le Bibliaoʼ. Le ancianoʼoboʼ maas unaj u meyajtiʼob le Biblia utiaʼal u yilkoʼob wa yaan u tsʼáaikoʼob junpʼéel meyaj u beet le táankelmoʼoboʼ, maʼ unaj u juzgartikoʼob chéen yoʼolal baʼax suukaʼan u beetaʼal teʼ tuʼux kajaʼanoʼoboʼ wa chéen yoʼolal bix u tuukuloʼob (2 Tim. 3:16, 17).

¹⁷ Wa le ancianoʼob maʼatech u chaʼik u nuʼuktaʼaloʼob tumen baʼax ku yaʼalik le Bibliaoʼ, maʼ xaaneʼ maʼ ken u recomendartoʼob le táankelmoʼob u beet u siervo ministerialiloʼob wa u ancianoiloʼob kex u tsʼaamaj u yóoloʼob u meyajtoʼob Diosoʼ. Tiʼ junpʼéel luʼumileʼ, juntúul siervo ministerialeʼ tsʼaʼan jujunpʼéel meyaj u beet teʼ múuchʼuliloʼ. Kex le ancianoʼob tsʼoʼok u yilkoʼob ku beetik tuláakal le baʼax ku kʼáataʼal utiaʼal u tsʼaʼabal u beet u ancianoiloʼ maʼ tu recomendartoʼobiʼ. Jujuntúul ancianoʼob tsʼoʼok u yantal u jaʼabiloʼobeʼ tu yaʼaloʼobeʼ jach paal utiaʼal ka tsʼaʼabak u beet u ancianoil. Jeʼex k-ilkoʼ maʼ tsʼaʼab u beet u ancianoil chéen yoʼolal u jaʼabiliʼ. Lelaʼ chéen junpʼéel baʼax uchaʼan, baʼaleʼ le informeʼob ku túuxtaʼaloʼ ku yeʼesik bey u tuukul yaʼab ancianoʼoboʼ. Le oʼolal jach unaj k-beetik baʼax ku yaʼalik le Bibliaoʼ maʼ chéen baʼaloʼob k-tuklikiʼ wa baʼaloʼob suuk u beetaʼaliʼ. Beyoʼ yaan k-beetik le baʼax tu yaʼalaj Jesusoʼ yéetel maʼ ken k-juzgart u maasil chéen yoʼolal bix u yilaʼaliʼ.

18, 19. ¿Baʼax unaj k-beetik utiaʼal k-ilik u maasil jeʼex Jéeobaeʼ?

¹⁸ Kex kʼebanoʼoneʼ jeʼel u páajtal k-ilik u maasil jeʼex u yilaʼaloʼob tumen Jéeobaeʼ (Bax. 10:34, 35). Le oʼolaleʼ mantatsʼ unaj k-kʼaʼajsik baʼax ku yaʼalik le Biblia utiaʼal k-tsʼáaik ichil k-kuxtaloʼ. Beyoʼ k-beetik le baʼax tu yaʼalaj Jesús utiaʼal maʼ k-juzgartik u maasil chéen yoʼolal bix u yilaʼaloʼoboʼ (Juan 7:24).

¹⁹ Maʼ kun xáantaleʼ k-rey Jesucristoeʼ yaan u juzgartik yéetel justicia tuláakal máak, maʼ kun juzgar chéen yoʼolal baʼax ku yilik mix chéen yoʼolal baʼax ku yuʼubik (Isa. 11:3, 4). ¡Bukaʼaj jatsʼutsil kéen úuchuk lelaʼ!