1． 关于耶稣，以赛亚预言乜嘢？点解呢个令我哋深感安慰？

 关于耶稣基督，以赛亚嘅预言向我哋保证话，耶稣“行审判唔会单凭眼见，责备人亦唔系只凭耳闻”，佢会“按正义审判卑微嘅人”。（以赛亚书11:3,4）呢个预言令我哋深感安慰。喺呢个充满歧视同偏见嘅世界，我哋真系需要一位唔会只凭眼见就作判断嘅完美审判官！

2． 耶稣吩咐我哋做乜嘢？呢篇课文会讨论乜嘢？

² 我哋每一日都会接触好多唔同嘅人。不过，因为我哋都唔完美，对其他人嘅睇法好容易会受外在因素所影响，唔能够好似耶稣噉作出完美嘅判断。耶稣喺地上嘅时候吩咐话：“唔好再凭外表判断人嘞。你哋判断人，要按照正义嘅标准嚟判断。”（约翰福音7:24）好明显，耶稣希望我哋效法佢，唔好以貌取人。不过，好多人都会根据种族、财富、年龄嚟衡量一个人。呢篇课文会讨论，喺呢三个方面，我哋点样做就系服从耶稣嘅吩咐。

3,4． （甲）乜嘢事令使徒彼得重新思考佢对外邦人嘅睇法？（请睇吓课文开头嘅图片）（乙）耶和华帮助彼得明白乜嘢？

³ 试想像吓，使徒彼得听到吩咐话要去凯撒里亚拜访外邦人哥尼流嗰阵，佢有乜嘢感受。（使徒行传10:17-29）彼得同当时嘅犹太人一样，自细就认为外邦人系不洁嘅。不过，以下嘅经历就使彼得重新思考呢个问题。彼得睇见一个异象。（使徒行传10:9-16）佢见到有块细麻布从天而降，入面有各种不洁嘅动物。天上有声音话：“彼得，起身，㓥嚟食喇！”彼得坚决拒绝咗。跟住，天上嘅声音就同佢讲：“上帝所洁净嘅，你唔可以再当做污秽。”彼得睇完异象之后觉得好困惑，唔明白上帝想传达乜嘢信息。喺呢阵时，哥尼流嘅使者就到咗。彼得从圣灵得到指引之后，就同使者一齐前往哥尼流嘅屋企。

⁴ 如果彼得只系根据事情嘅表面嚟作判断，佢就绝对唔会去哥尼流嘅屋企。犹太人对外邦人有根深蒂固嘅偏见，唔会入佢哋屋企，噉点解彼得愿意去呢？原因系，异象同圣灵嘅指引改变咗彼得嘅谂法。彼得听完哥尼流讲述事情嘅来龙去脉之后，受圣灵感动话：“而家我真系睇出上帝系唔偏心嘅，无论边个国族嘅人，只要敬畏佢，行正义，都蒙佢悦纳。”（使徒行传10:34,35）对彼得嚟讲，呢个真系一个意义深远、令人激动嘅新启示！唔应该对人有偏见呢个真理点样影响所有基督徒？

5． （甲）耶和华想所有基督徒明白乜嘢？（乙）我哋就算认识真理，可能仲系会有点样嘅态度？

⁵ 耶和华通过彼得帮助所有基督徒明白，佢系唔偏心嘅上帝。无论一个人属于乜嘢种族、民族、国族、部族或者讲乜嘢语言，只要敬畏上帝，行事正直，上帝都会接纳佢。（加拉太书3:26-28；启示录7:9,10）如果你喺一个充满偏见嘅环境长大，噉你会唔会因此受到影响呢？就算你觉得自己唔系一个偏心嘅人，不过喺你内心深处会唔会多多少少都对人怀有偏见呢？彼得深刻体会到上帝系唔偏心嘅，不过佢后来仲系一度偏心待人。（加拉太书2:11-14）我哋可以点样听从耶稣嘅吩咐，唔单凭一个人嘅外在因素判断人？

6． （甲）乜嘢可以帮助我哋消除内心嘅偏见？（乙）一个负有职责嘅弟兄嘅报告显示乜嘢？

⁶ 我哋要按照上帝嘅话语仔细察验自己，睇吓自己系咪对人怀有偏见。（诗篇119:105）另外，我哋都需要接受其他人嘅帮助，因为其他人比我哋自己更容易睇出我哋系咪有偏见嘅态度。（加拉太书2:11,14）可能我哋已经有一啲根深蒂固嘅偏见，只系自己冇意识到。请留意以下嘅事例。一个负有职责嘅弟兄写咗一份关于一对热 心参与全时服务嘅夫妻嘅报告。丈夫嚟自一个好多人都睇唔起嘅少数民族。写报告嘅弟兄睇嚟冇意识到自己对呢个少数民族怀有偏见，虽然佢喺报告入面称赞呢个丈夫，不过佢话：“［呢个民族］嘅大多数人都好邋遢，过住下等嘅生活，但系呢个弟兄通过自己嘅言行同生活方式帮助其他人明白，［佢嘅民族］唔系人人系噉样嘅。”你有冇睇出问题喺边度？无论我哋担任乜嘢职责，都一定要仔细察验自己，并愿意接受其他人嘅帮助，噉我哋先至能够睇出我哋内心系咪存有偏见嘅态度。除此之外，我哋仲可以点样做？

7． 我哋可以点样开阔心胸？

⁷ 我哋开阔心胸，就可以用爱心取代偏见。（哥林多后书6:11-13）你系咪只系习惯同嗰啲种族、民族、国族、部族或者语言同自己一样嘅人亲密来往？如果系噉，就要开阔心胸。你可以邀请嗰啲同你背景唔一样嘅人做传道工作，或者邀请佢哋去你屋企食饭、交往。（使徒行传16:14,15）噉样做，你就可以弃绝偏见嘅态度，使自己嘅内心充满爱。而家，请睇吓另一个可能会使我哋以貌取人嘅因素。

8． 利未记19:15指出，我哋作判断嘅时候容易受乜嘢因素影响？

⁸ 物质财富往往会影响我哋对其他人嘅睇法。利未记19:15话：“唔可以偏护穷人，亦都唔可以袒护大人物，要大公无私噉审判同胞。”一个人嘅经济状况会点样影响我哋对佢嘅睇法？

9． 所罗门讲出乜嘢现实情况？我哋从佢所讲嘅话学到乜嘢？

⁹ 喺圣灵推动之下，所罗门讲出一个现实嘅情况。喺箴言14:20，佢话：“贫寒嘅人，连同胞都厌恶佢；富裕嘅人，就有好多朋友。”呢句箴言教导我哋乜嘢？如果我哋唔小心，就会疏远贫穷嘅弟兄姊妹，净系亲近嗰啲富有嘅。点解单系用物质财富嚟衡量一个人嘅价值系好危险嘅事？

10． 雅各提醒基督徒要提防乜嘢？

¹⁰ 如果我哋用唔同嘅态度对待富裕同贫穷嘅弟兄姊妹，噉我哋就系对会众成员划分等级嘞。喺1世纪，某啲会众曾经因为呢个问题而产生分裂，所以门徒雅各提醒当时嘅基督徒要小心提防。（请读雅各书2:1-4）今日，我哋都必须保持警惕，唔好俾呢种思想影响基督徒会众。我哋可以点样避免根据一个人嘅经济状况嚟判断对方？

11． 一个人所拥有嘅财物会唔会影响佢同耶和华嘅关系？请解释。

¹¹ 我哋要用耶和华嘅观点去睇弟兄姊妹。耶和华唔会因为一个人贫穷或者富有就觉得佢特别宝贵。我哋同耶和华嘅关系永远都唔系通过我哋拥有嘅财物嚟决定嘅。虽然耶稣曾经提到，“富有嘅人好难进入天上嘅王国”，不过佢噉样讲，意思唔系话有钱人一定入唔到天上嘅王国。（马太福音19:23） 另一方面，耶稣亦都话：“你哋贫穷嘅人有福嘞，因为上帝嘅王国系你哋嘅。”（路加福音6:20）不过，呢句话嘅意思唔系话，所有嘅穷人都会遵行耶稣嘅教导，得到特别嘅祝福。其实好多穷人都冇跟从耶稣。结论就系，我哋唔应该凭一个人拥有嘅财物嚟判断佢同耶和华嘅关系。

12． 关于富人同穷人，我哋从相关经文学到乜嘢？

¹² 耶和华赐俾我哋咁多弟兄姊妹，佢哋当中有贫有富，不过都全心事奉耶和华。经文劝勉嗰啲富有嘅人“唔好心高气傲，亦都唔好指望无定嘅财富，而系要指望……上帝”。（请读提摩太前书6:17-19）另外，圣经提醒上帝嘅所有子民，无论贫穷定系富有，都要小心贪爱钱财呢种精神。（提摩太前书6:9,10）我哋用耶和华嘅观点嚟睇弟兄姊妹，就唔会按照佢哋财富嘅多少去判断佢哋。不过，我哋又可唔可以根据年龄嚟判断人呢？等我哋嚟睇吓。

13． 关于尊敬年长嘅人，圣经点样教导我哋？

¹³ 圣经多次教导我哋要尊敬年长嘅人。利未记19:32话：“要喺白发嘅人面前起立，要关怀老人，要敬畏你嘅上帝。”箴言16:31又话：“人若行走正义嘅道路，白发就系华美嘅冠冕。”保罗亦都劝勉提摩太唔好严厉责备年长嘅弟兄，对佢哋要好似对待自己嘅父亲噉。（提摩太前书5:1,2）虽然提摩太比呢啲年长嘅弟兄负有更多职责，不过佢仲系体恤同尊敬佢哋。

14． 乜嘢情况下，我哋可能要劝告或管教比我哋年长嘅人？

¹⁴ 如果某个年长嘅基督徒故意犯罪，或者提倡某啲耶和华唔钟意嘅事，我哋应该点样做呢？我哋会唔会畏缩而唔敢指出佢嘅错误呢？耶和华唔会因为对方系个长者就纵容佢犯罪。请留意以赛亚书65:20背后嘅原则：“活到一百岁而犯罪嘅，必受咒诅。”以西结嘅异象亦都表达咗类似嘅原则。（以西结书9:5-7）所以，我哋最尊敬嘅应该系万古常在者耶和华上帝。（但以理书7:9,10,13,14）如果我哋记得呢点嘅话，噉无论一个人年纪几大，当佢需要被纠正嘅时候，我哋就会有勇气向佢提出劝告。（加拉太书6:1）

15． 点解我哋应该尊重年轻嘅弟兄？

¹⁵ 会众入面年轻嘅弟兄又点呢？你点睇佢哋？使徒保罗写信俾年轻嘅提摩太话：“唔好俾人睇小你年轻。要喺讲话、行为、爱心、信心、贞洁方面，做忠信嘅人嘅榜样。”（提摩太前书4:12）保罗写呢啲话嗰时，提摩太可能只系三十岁出头。不过，保罗就委派佢担任重要嘅职责。无论保罗基于乜嘢原因讲呢番话，我哋都可以从中学到，千祈唔好因为弟兄年轻就睇小佢哋。唔好忘记，耶稣喺三十几岁嘅时候，已经担负重任，执行地上嘅传道工作。

16,17． （甲）长老考虑推荐某个弟兄嘅时候，应该以乜嘢为根据？（乙）乜嘢例子表明，个人观点或者文化传统可能会同圣经有抵触？

 ¹⁶ 可能喺我哋嘅文化入面，年轻男子通常唔容易受人尊重。如果系噉，即使一个年轻弟兄符合资格，会众嘅长老都可能唔会推荐佢做助理仆人或长老。所有长老都应该谨记，圣经冇规定一个人要到几岁先至可以受推荐做助理仆人或长老。（提摩太前书3:1-10,12,13；提多书1:5-9）如果一个长老喺呢方面跟从文化传统，或者自己定规条，噉佢就系冇听从圣经嘅指引嘞。我哋考虑年轻弟兄系咪符合资格嗰时，一定要以圣经为标准，而唔系根据个人观点或者文化传统。（提摩太后书3:16,17）

¹⁷ 请谂吓，呢种唔符合圣经观点嘅文化传统点样妨碍符合资格嘅弟兄担任更多职责。喺某个国家，有个助理仆人负有一啲重要嘅职责，而且执行得好好。虽然会众嘅长老都同意，呢个年轻嘅弟兄符合圣经当中对长老列出嘅要求，不过最终都冇推荐呢个弟兄做长老。有啲年长嘅长老坚持认为，呢个弟兄睇起嚟太年轻，可能其他人唔会尊重佢。结果，呢个弟兄只系因为年轻就冇被推荐，真系好可惜。其实，呢个只系其中一个事例。报告显示，世界唔同地区嘅会众都普遍存在呢个问题。我哋的确应该仰赖上帝嘅话语，而唔系自己嘅文化传统或个人观点！我哋噉样做，就系听从耶稣嘅吩咐，唔会只凭眼见作判断。

18,19． 我哋用耶和华嘅观点去睇其他人，就需要点样做？

¹⁸ 耶和华唔会对人有偏见。虽然我哋唔完美，不过都可以效法耶和华，用佢嘅观点去睇其他人。（使徒行传10:34,35）所以，我哋必须不断留意圣经嘅提醒。我哋噉样做，就会听从耶稣嘅吩咐，唔会凭 “外表判断人”。（约翰福音7:24）

¹⁹ 好快，我哋嘅君王耶稣基督会审判全人类。佢嘅审判系基于上帝嘅正义标准，而唔系单凭佢嘅所见所闻，呢个的确系我哋所期待嘅！（以赛亚书11:3,4）