1． 關於耶穌，以賽亞預言乜嘢？點解呢個令我哋深感安慰？

 關於耶穌基督，以賽亞嘅預言向我哋保證話，耶穌“行審判唔會單憑眼見，責備人亦唔係只憑耳聞”，佢會“按正義審判卑微嘅人”。（以賽亞書11:3,4）呢個預言令我哋深感安慰。喺呢個充滿歧視同偏見嘅世界，我哋真係需要一位唔會只憑眼見就作判斷嘅完美審判官！

2． 耶穌吩咐我哋做乜嘢？呢篇課文會討論乜嘢？

² 我哋每一日都會接觸好多唔同嘅人。不過，因為我哋都唔完美，對其他人嘅睇法好容易會受外在因素所影響，唔能够好似耶穌噉作出完美嘅判斷。耶穌喺地上嘅時候吩咐話：“唔好再憑外表判斷人嘞。你哋判斷人，要按照正義嘅標準嚟判斷。”（約翰福音7:24）好明顯，耶穌希望我哋效法佢，唔好以貌取人。不過，好多人都會根據種族、財富、年齡嚟衡量一個人。呢篇課文會討論，喺呢三個方面，我哋點樣做就係服從耶穌嘅吩咐。

3,4． （甲）乜嘢事令使徒彼得重新思考佢對外邦人嘅睇法？（請睇吓課文開頭嘅圖片）（乙）耶和華幫助彼得明白乜嘢？

³ 試想像吓，使徒彼得聽到吩咐話要去凱撒里亞拜訪外邦人哥尼流嗰陣，佢有乜嘢感受。（使徒行傳10:17-29）彼得同當時嘅猶太人一樣，自細就認為外邦人係不潔嘅。不過，以下嘅經歷就使彼得重新思考呢個問題。彼得睇見一個異象。（使徒行傳10:9-16）佢見到有塊細麻布從天而降，入面有各種不潔嘅動物。天上有聲音話：“彼得，起身，劏嚟食喇！”彼得堅決拒絶咗。跟住，天上嘅聲音就同佢講：“上帝所潔淨嘅，你唔可以再當做污穢。”彼得睇完異象之後覺得好困惑，唔明白上帝想傳達乜嘢信息。喺呢陣時，哥尼流嘅使者就到咗。彼得從聖靈得到指引之後，就同使者一齊前往哥尼流嘅屋企。

⁴ 如果彼得只係根據事情嘅表面嚟作判斷，佢就絶對唔會去哥尼流嘅屋企。猶太人對外邦人有根深蒂固嘅偏見，唔會入佢哋屋企，噉點解彼得願意去呢？原因係，異象同聖靈嘅指引改變咗彼得嘅諗法。彼得聽完哥尼流講述事情嘅來龍去脈之後，受聖靈感動話：“而家我真係睇出上帝係唔偏心嘅，無論邊個國族嘅人，只要敬畏佢，行正義，都蒙佢悦納。”（使徒行傳10:34,35）對彼得嚟講，呢個真係一個意義深遠、令人激動嘅新啟示！唔應該對人有偏見呢個真理點樣影響所有基督徒？

5． （甲）耶和華想所有基督徒明白乜嘢？（乙）我哋就算認識真理，可能仲係會有點樣嘅態度？

⁵ 耶和華通過彼得幫助所有基督徒明白，佢係唔偏心嘅上帝。無論一個人屬於乜嘢種族、民族、國族、部族或者講乜嘢語言，只要敬畏上帝，行事正直，上帝都會接納佢。（加拉太書3:26-28；啟示錄7:9,10）如果你喺一個充滿偏見嘅環境長大，噉你會唔會因此受到影響呢？就算你覺得自己唔係一個偏心嘅人，不過喺你内心深處會唔會多多少少都對人懷有偏見呢？彼得深刻體會到上帝係唔偏心嘅，不過佢後來仲係一度偏心待人。（加拉太書2:11-14）我哋可以點樣聽從耶穌嘅吩咐，唔單憑一個人嘅外在因素判斷人？

6． （甲）乜嘢可以幫助我哋消除内心嘅偏見？（乙）一個負有職責嘅弟兄嘅報告顯示乜嘢？

⁶ 我哋要按照上帝嘅話語仔細察驗自己，睇吓自己係咪對人懷有偏見。（詩篇119:105）另外，我哋都需要接受其他人嘅幫助，因為其他人比我哋自己更容易睇出我哋係咪有偏見嘅態度。（加拉太書2:11,14）可能我哋已經有一啲根深蒂固嘅偏見，只係自己冇意識到。請留意以下嘅事例。一個負有職責嘅弟兄寫咗一份關於一對熱 心參與全時服務嘅夫妻嘅報告。丈夫嚟自一個好多人都睇唔起嘅少數民族。寫報告嘅弟兄睇嚟冇意識到自己對呢個少數民族懷有偏見，雖然佢喺報告入面稱讚呢個丈夫，不過佢話：“［呢個民族］嘅大多數人都好邋遢，過住下等嘅生活，但係呢個弟兄通過自己嘅言行同生活方式幫助其他人明白，［佢嘅民族］唔係人人係噉樣嘅。”你有冇睇出問題喺邊度？無論我哋擔任乜嘢職責，都一定要仔細察驗自己，並願意接受其他人嘅幫助，噉我哋先至能够睇出我哋内心係咪存有偏見嘅態度。除此之外，我哋仲可以點樣做？

7． 我哋可以點樣開闊心胸？

⁷ 我哋開闊心胸，就可以用愛心取代偏見。（哥林多後書6:11-13）你係咪只係習慣同嗰啲種族、民族、國族、部族或者語言同自己一樣嘅人親密來往？如果係噉，就要開闊心胸。你可以邀請嗰啲同你背景唔一樣嘅人做傳道工作，或者邀請佢哋去你屋企食飯、交往。（使徒行傳16:14,15）噉樣做，你就可以棄絶偏見嘅態度，使自己嘅内心充滿愛。而家，請睇吓另一個可能會使我哋以貌取人嘅因素。

8． 利未記19:15指出，我哋作判斷嘅時候容易受乜嘢因素影響？

⁸ 物質財富往往會影響我哋對其他人嘅睇法。利未記19:15話：“唔可以偏護窮人，亦都唔可以袒護大人物，要大公無私噉審判同胞。”一個人嘅經濟狀況會點樣影響我哋對佢嘅睇法？

9． 所羅門講出乜嘢現實情況？我哋從佢所講嘅話學到乜嘢？

⁹ 喺聖靈推動之下，所羅門講出一個現實嘅情況。喺箴言14:20，佢話：“貧寒嘅人，連同胞都厭惡佢；富裕嘅人，就有好多朋友。”呢句箴言教導我哋乜嘢？如果我哋唔小心，就會疏遠貧窮嘅弟兄姊妹，淨係親近嗰啲富有嘅。點解單係用物質財富嚟衡量一個人嘅價值係好危險嘅事？

10． 雅各提醒基督徒要提防乜嘢？

¹⁰ 如果我哋用唔同嘅態度對待富裕同貧窮嘅弟兄姊妹，噉我哋就係對會衆成員劃分等級嘞。喺1世紀，某啲會衆曾經因為呢個問題而産生分裂，所以門徒雅各提醒當時嘅基督徒要小心提防。（請讀雅各書2:1-4）今日，我哋都必須保持警惕，唔好俾呢種思想影響基督徒會衆。我哋可以點樣避免根據一個人嘅經濟狀況嚟判斷對方？

11． 一個人所擁有嘅財物會唔會影響佢同耶和華嘅關係？請解釋。

¹¹ 我哋要用耶和華嘅觀點去睇弟兄姊妹。耶和華唔會因為一個人貧窮或者富有就覺得佢特别寶貴。我哋同耶和華嘅關係永遠都唔係通過我哋擁有嘅財物嚟決定嘅。雖然耶穌曾經提到，“富有嘅人好難進入天上嘅王國”，不過佢噉樣講，意思唔係話有錢人一定入唔到天上嘅王國。（馬太福音19:23） 另一方面，耶穌亦都話：“你哋貧窮嘅人有福嘞，因為上帝嘅王國係你哋嘅。”（路加福音6:20）不過，呢句話嘅意思唔係話，所有嘅窮人都會遵行耶穌嘅教導，得到特别嘅祝福。其實好多窮人都冇跟從耶穌。結論就係，我哋唔應該憑一個人擁有嘅財物嚟判斷佢同耶和華嘅關係。

12． 關於富人同窮人，我哋從相關經文學到乜嘢？

¹² 耶和華賜俾我哋咁多弟兄姊妹，佢哋當中有貧有富，不過都全心事奉耶和華。經文勸勉嗰啲富有嘅人“唔好心高氣傲，亦都唔好指望無定嘅財富，而係要指望……上帝”。（請讀提摩太前書6:17-19）另外，聖經提醒上帝嘅所有子民，無論貧窮定係富有，都要小心貪愛錢財呢種精神。（提摩太前書6:9,10）我哋用耶和華嘅觀點嚟睇弟兄姊妹，就唔會按照佢哋財富嘅多少去判斷佢哋。不過，我哋又可唔可以根據年齡嚟判斷人呢？等我哋嚟睇吓。

13． 關於尊敬年長嘅人，聖經點樣教導我哋？

¹³ 聖經多次教導我哋要尊敬年長嘅人。利未記19:32話：“要喺白髮嘅人面前起立，要關懷老人，要敬畏你嘅上帝。”箴言16:31又話：“人若行走正義嘅道路，白髮就係華美嘅冠冕。”保羅亦都勸勉提摩太唔好嚴厲責備年長嘅弟兄，對佢哋要好似對待自己嘅父親噉。（提摩太前書5:1,2）雖然提摩太比呢啲年長嘅弟兄負有更多職責，不過佢仲係體恤同尊敬佢哋。

14． 乜嘢情況下，我哋可能要勸告或管教比我哋年長嘅人？

¹⁴ 如果某個年長嘅基督徒故意犯罪，或者提倡某啲耶和華唔鍾意嘅事，我哋應該點樣做呢？我哋會唔會畏縮而唔敢指出佢嘅錯誤呢？耶和華唔會因為對方係個長者就縱容佢犯罪。請留意以賽亞書65:20背後嘅原則：“活到一百歲而犯罪嘅，必受咒詛。”以西結嘅異象亦都表達咗類似嘅原則。（以西結書9:5-7）所以，我哋最尊敬嘅應該係萬古常在者耶和華上帝。（但以理書7:9,10,13,14）如果我哋記得呢點嘅話，噉無論一個人年紀幾大，當佢需要被糾正嘅時候，我哋就會有勇氣向佢提出勸告。（加拉太書6:1）

15． 點解我哋應該尊重年輕嘅弟兄？

¹⁵ 會衆入面年輕嘅弟兄又點呢？你點睇佢哋？使徒保羅寫信俾年輕嘅提摩太話：“唔好俾人睇小你年輕。要喺講話、行為、愛心、信心、貞潔方面，做忠信嘅人嘅榜樣。”（提摩太前書4:12）保羅寫呢啲話嗰時，提摩太可能只係三十歲出頭。不過，保羅就委派佢擔任重要嘅職責。無論保羅基於乜嘢原因講呢番話，我哋都可以從中學到，千祈唔好因為弟兄年輕就睇小佢哋。唔好忘記，耶穌喺三十幾歲嘅時候，已經擔負重任，執行地上嘅傳道工作。

16,17． （甲）長老考慮推薦某個弟兄嘅時候，應該以乜嘢為根據？（乙）乜嘢例子表明，個人觀點或者文化傳統可能會同聖經有抵觸？

 ¹⁶ 可能喺我哋嘅文化入面，年輕男子通常唔容易受人尊重。如果係噉，即使一個年輕弟兄符合資格，會衆嘅長老都可能唔會推薦佢做助理僕人或長老。所有長老都應該謹記，聖經冇規定一個人要到幾歲先至可以受推薦做助理僕人或長老。（提摩太前書3:1-10,12,13；提多書1:5-9）如果一個長老喺呢方面跟從文化傳統，或者自己定規條，噉佢就係冇聽從聖經嘅指引嘞。我哋考慮年輕弟兄係咪符合資格嗰時，一定要以聖經為標準，而唔係根據個人觀點或者文化傳統。（提摩太後書3:16,17）

¹⁷ 請諗吓，呢種唔符合聖經觀點嘅文化傳統點樣妨礙符合資格嘅弟兄擔任更多職責。喺某個國家，有個助理僕人負有一啲重要嘅職責，而且執行得好好。雖然會衆嘅長老都同意，呢個年輕嘅弟兄符合聖經當中對長老列出嘅要求，不過最終都冇推薦呢個弟兄做長老。有啲年長嘅長老堅持認為，呢個弟兄睇起嚟太年輕，可能其他人唔會尊重佢。結果，呢個弟兄只係因為年輕就冇被推薦，真係好可惜。其實，呢個只係其中一個事例。報告顯示，世界唔同地區嘅會衆都普遍存在呢個問題。我哋的確應該仰賴上帝嘅話語，而唔係自己嘅文化傳統或個人觀點！我哋噉樣做，就係聽從耶穌嘅吩咐，唔會只憑眼見作判斷。

18,19． 我哋用耶和華嘅觀點去睇其他人，就需要點樣做？

¹⁸ 耶和華唔會對人有偏見。雖然我哋唔完美，不過都可以效法耶和華，用佢嘅觀點去睇其他人。（使徒行傳10:34,35）所以，我哋必須不斷留意聖經嘅提醒。我哋噉樣做，就會聽從耶穌嘅吩咐，唔會憑 “外表判斷人”。（約翰福音7:24）

¹⁹ 好快，我哋嘅君王耶穌基督會審判全人類。佢嘅審判係基於上帝嘅正義標準，而唔係單憑佢嘅所見所聞，呢個的確係我哋所期待嘅！（以賽亞書11:3,4）